Chapter 16

[English text for this chapter is available]

śrutadeva uvāca |
taddarśanāhlādapariplutāśayaḥ sadyaḥ samutthāya nanāma mūrdhnā |
ciraṃ nirīkṣyā'kulalocano hyamuṃ viśvātmadevaṃ jagatāmadhīśam || 1 ||
[Analyze grammar]

dadhāra pādāvavanijya tajjalaṃ yatpādajā'brahma jagatpunāti |
samarcayāmāsa mahāvibhūtibhirmahārhavastrābharaṇānulepanaiḥ || 2 ||
[Analyze grammar]

sragdhūpadīpāmṛtabhakṣaṇādibhistvaggātravittātmasamarpaṇena |
tuṣṭāva viṣṇuṃ puruṣaṃ purāṇaṃ nārāyaṇaṃ nirguṇamadvitīyam || 3 ||
[Analyze grammar]

niraṃjanaṃ viśvasṛjāmadhīśaṃ vande paraṃ padmabhavādivaṃditam |
yanmāyayā tattvaviduttamā janā vimohitā viśvasṛjāmadhīśvaram || 4 ||
[Analyze grammar]

muhyaṃti māyācariteṣu mūḍhā guṇeṣu citraṃ bhagavadviceṣṭitam |
anīha etadbahudhaika ātmanā sṛjatyavatyatti na sajjate'pyatha || 5 ||
[Analyze grammar]

samastadevāsurasaukhyaduḥkhaprāptyai bhavānpūrṇamanoratho'pi |
tatrā'pi kāle svajanābhiguptyai bibharṣi sattvaṃ khalanigrahāya || 6 ||
[Analyze grammar]

tamoguṇaṃ rākṣasa bandhanāya rajoguṇaṃ nirguṇa viśvamūrte |
diṣṭyā tvadaṃghriḥ praṇatāghanāśanastīrthāspadaṃ hṛdi dhṛtaḥ suvipakvayogaiḥ || 7 ||
[Analyze grammar]

utsiktabhaktyupahṛtāśaya jīvabhāvāḥ prāpurgatiṃ tava padasmṛtimātrato ye |
bhavākhyakāloragapāśabandhaḥ punaḥpunarjanmajarādiduḥkhaiḥ || 8 ||
[Analyze grammar]

bhramāmi yoniṣvahamākhubhakṣyavatpravṛddhatarṣastava pādavismṛteḥ |
nūnaṃ na dattaṃ na ca te kathā śrutā na sādhavo jātu mayā'pi sevitāḥ || 9 ||
[Analyze grammar]

tenāribhirdhvastaparārdhyalakṣmīrvanaṃ praviṣṭaḥ svaguruhyaghaṃ smaran |
smṛtau ca tau māṃ samupetya duḥkhātsaṃbodhayāṃcakraturārtabaṃdhū || 10 ||
[Analyze grammar]

vaiśākhadharmaiḥ śruticoditaiḥ śubhaiḥ svargāpavargādi pumarthahetubhiḥ |
tadbodhato'haṃ kṛtavānsamastāñcchubhāvahānmādhavamāsadharmān || 11 ||
[Analyze grammar]

tasmādabhūnme paramaḥ prasādastenākhilāḥ saṃpada ūrjitā imāḥ |
nāgnirna sūryo na ca candratārakā na bhūrjalaṃ khaṃ śvasano'tha vāṅmanaḥ || 12 ||
[Analyze grammar]

upāsitāste'pi haratyaghaṃ cirādvipaścito ghnanti muhūrtasevayā |
yānmanyase tvaṃ bhavino'pi bhūriśastyakteṣaṇāṃstvatpadanyastacittān || 13 ||
[Analyze grammar]

namaḥ svataṃtrāya vicitrakarmaṇe namaḥ parasmai sadanugrahāya |
tvanmāyayā mohito'haṃ guṇeṣu dārārtharūpeṣu bhramāmyanarthadṛk || 14 ||
[Analyze grammar]

tvatpādapadme sati mūlanāśane samastapāpāpaharaṃ sunirmalam |
sukhecchayānarthanidānabhūtaiḥ sutātmadārairmamatābhiyuktaḥ || 15 ||
[Analyze grammar]

na kvāpi nidrāṃ labhate na śarma pravṛddhatarṣaḥ punareva tasmin |
labdhvā durāpaṃ naradevajanma tvaṃ yatnataḥ sarvapumarthahetuḥ || 16 ||
[Analyze grammar]

padāravindaṃ na bhajāmi deva saṃmūḍhacetā viṣayeṣu lālasaḥ |
karomi karmāṇi suniṣṭhitaḥ sanpravṛddhatarṣastadapekṣayā dadat || 17 ||
[Analyze grammar]

punaśca bhūyāmahamadya bhūyāmityeva cintāśatalolamānasaḥ |
tadaiva jīvasya bhavetkṛpā vibho duraṃtaśaktestava viśvamūrte || 18 ||
[Analyze grammar]

samāgamaḥ syānmahatāṃ hi puṃsāṃ bhavāṃbudhiryena hi goṣpadāyate |
satsaṃgamo deva yadaiva bhūyāttarhīśa deve tvayi jāyate matiḥ || 19 ||
[Analyze grammar]

samastarājyāpagamaṃ hi manye hyanugrahaṃ te mayi jātamañjasā |
yathārya te brahmasurāsurādyairnivṛttatarṣairapi haṃsayūthaiḥ || 20 ||
[Analyze grammar]

itaḥ smarāmyacyutameva sādaraṃ bhavāpahaṃ pādasaroruhaṃ vibho |
akiṃcanaprārthyamamandabhāgyadaṃ na kāmaye'nyattava pādapadmāt || 21 ||
[Analyze grammar]

ato na rājyaṃ na sutādikośaṃ dehena śaśvatpatatā rajobhuvā |
bhajāmi nityaṃ tadupāsitavyaṃ pādāraviṃdaṃ munibhirvicintyam || 22 ||
[Analyze grammar]

prasīda deveśa jagannivāsa smṛtiryathā syāttava pādapadme |
saktiḥ sadā gacchatu dārakośaputrātmacihneṣu gaṇeṣu me prabho || 23 ||
[Analyze grammar]

bhūyānmanaḥ kṛṣṇapadāravindayorvacāṃsi te divyakathānuvarṇane |
netre mameme tava vigrahekṣaṇe śrotre kathāyāṃ rasanā tadarpite || 24 ||
[Analyze grammar]

ghrāṇaṃ ca tvapādasarojasaurabhe tvadbhaktagandhādivilepane sakṛt |
syātāṃ ca hastau tava mandire vibho saṃmārjjanādau mama nityadaiva || 25 ||
[Analyze grammar]

pādau vibho kṣetrakathā'nusarpaṇe mūrdhā ca me syāttava vandane'niśam |
kāmaśca me syāttava satkathāyāṃ buddhiśca me syāttava ciṃtane'niśam || 26 ||
[Analyze grammar]

dināni me syustava satkathodayairudgīyamānairmunibhirgṛhāgataiḥ |
hīnaḥ prasaṃgastava me na bhūyātkṣaṇaṃ nimeṣārddhamathā'pi viṣṇo || 27 ||
[Analyze grammar]

na pārameṣṭhyaṃ na ca sārvabhaumaṃ na cāpavargaṃ spṛhayāmi viṣṇo |
tvatpādasevāṃ ca sadaiva kāmaye prārthyāṃ śriyā brahmabhavādibhiḥ suraiḥ || 28 ||
[Analyze grammar]

iti rājñā stuto viṣṇuḥ prasannaḥ kamalekṣaṇaḥ |
meghagambhīrayā vācā tamuvāca kṣitīśvaram || 29 ||
[Analyze grammar]

śrībhagavānuvāca |
jāne tvāṃ dāsavaryaṃ me niṣkāmukamakalmaṣam |
athā'pi te pradāsyāmi varaṃ daivatadurlabham || 30 ||
[Analyze grammar]

āyuṣyaṃ cāyutaṃ divyaṃ saṃpadaśca nareśvara |
bhaktirmayi dṛḍhā bhūyādante sāyujyameva ca || 31 ||
[Analyze grammar]

tvayā kṛtena stotreṇa māṃ stuvanti ca ye bhuvi |
teṣāṃ tuṣṭaḥ pradāsyāmi bhuktiṃ muktiṃ na saṃśayaḥ || 32 ||
[Analyze grammar]

tṛtīyaiṣā'kṣayānāma bhuvi khyātā bhaviṣyati |
yasyāṃ tava prasanno'haṃ bhuktimuktiphalapradaḥ || 33 ||
[Analyze grammar]

ye kurvaṃti narā mūḍhāḥ snānadānādikāḥ kriyā |
vyājenā'pi svabhāvādvā yāṃti matpadamavyayam || 34 ||
[Analyze grammar]

ye cā'kṣayatṛtīyāyāṃ pitṝnuddiśya mānavāḥ |
śrāddhaṃ kurvaṃti teṣāṃ vai tadānaṃtyāya kalpate || 35 ||
[Analyze grammar]

na cānayā tithirloke samā vā nādhikā bhuvi |
asyāṃ kṛtaṃ svalpamapi tadakṣayyaphalaṃ bhavet || 36 ||
[Analyze grammar]

yo gāṃ dadyānnṛpaśreṣṭha brāhmaṇāya kuṭuṃbine |
sarvasaṃpatpravarṣākhyā bhuktimuktiḥ kare sthitā || 37 ||
[Analyze grammar]

yo hi dadyādanaḍvāhaṃ sarvapāpavināśanam |
kālamṛtyuvimuktaḥ sandīrghāyuṣyamavāpnuyāt || 38 ||
[Analyze grammar]

vaiśākhamāse yo dharmānkurute matpriyāvahān |
teṣāṃ mṛtyujarājanmabhayaṃ pāpaṃ harāmyaham || 39 ||
[Analyze grammar]

yathā vaiśākhadharmaistu tuṣṭaḥ syāṃ sakalairapi |
māsadharmairna tuṣṭaḥ syāṃ māso me mādhavaḥ priyaḥ || 40 ||
[Analyze grammar]

sarvadhamojjhitā vāpi brahmacaryavivarjitāḥ |
vaiśākhamāsaniratā yāṃti matpadamavyayam || 41 ||
[Analyze grammar]

yaddurāpaṃ tapobhiśca sāṃkhyayogairmakhairapi |
taddhāma paramaṃ yāṃti vaiśākhaniratā narāḥ || 42 ||
[Analyze grammar]

api pāpasahasraṃ vā māso'yaṃ harate'nagha |
prāyaścittavihīnaṃ vā matpādasmaraṇaṃ yathā || 43 ||
[Analyze grammar]

gurūpadiṣṭaḥ kāṃtāre vaiśākhe nirato bhavān |
samārādhya jagannāthaṃ tenāptamakhilaṃ nṛpa || 44 ||
[Analyze grammar]

dharmeṇānena saṃprītaḥ pratyakṣo'haṃ bhavāmi te |
bhuktvā bhogānyathākāmāndevairapisudurlabhān || 45 ||
[Analyze grammar]

iti tasmai varaṃ dattvā devadevo janārdanaḥ |
paśyatāmeva sarveṣāṃ tatraivāṃtaradhīyata || 46 ||
[Analyze grammar]

tato bhūpālavaryo'sau babhūvātyaṃtavismitaḥ |
hṛṣṭapuṣṭatanurbhūpa labdhanaṣṭadhano yathā || 47 ||
[Analyze grammar]

tataḥ śaśāsa pṛthivīṃ taccittastatparāyaṇaḥ |
mahadbhirbodhito nityaṃ gurubhiśca niraṃtaram || 48 ||
[Analyze grammar]

nānyaṃ priyatamaṃ mene vāsudevamṛte nṛpaḥ |
yatsaṃparkātpriyā āsandārāmātyasutādayaḥ || 49 ||
[Analyze grammar]

sarvāndharmāṃścakārā'sau vaiśākhoktānpunaḥpunaḥ |
tena puṇyaprabhāvena putrapautrādibhirvṛtaḥ || 50 ||
[Analyze grammar]

bhuktvā manorathānsarvāndevānāmapi durlabhān |
aṃte jagāma sāyujyaṃ viṣṇordevasya cakriṇaḥ || 51 ||
[Analyze grammar]

ya idaṃ paramākhyānaṃ śṛṇvanti śrāvayaṃti ca |
te sarve pāpanirmuktā yāṃti viṣṇoḥ paraṃ padam || 52 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmvarīṣasaṃvāde pāṃcālādhipateḥ sāyujyaprāptirnāma ṣoḍaśo'dhyāyaḥ || 16 ||
[Analyze grammar]