Chapter 33

[English text for this chapter is available]

ṛṣaya ūcuḥ |
bhagavañchrotumicchāmo vrataṃ pāśupataṃ param |
brahmādayo 'pi yatkṛtvā sarve pāśupatāḥ smṛtāḥ || 1 ||
[Analyze grammar]

vāyuruvāca |
rahasyaṃ vaḥ pravakṣyāmi sarvapāpanikṛntanam |
vrataṃ pāśupataṃ śrautamatharvaśirasi śrutam || 2 ||
[Analyze grammar]

kālaścaitrī paurṇamāsī deśaḥ śivaparigrahaḥ |
kṣetrārāmādyaraṇyaṃ vā praśastaśśubhalakṣaṇaḥ || 3 ||
[Analyze grammar]

tatra pūrvaṃ trayodaśyāṃ susnātaḥ sukṛtāhnikaḥ |
anujñāpya svamācāryaṃ saṃpūjya praṇipatya ca || 4 ||
[Analyze grammar]

pūjāṃ vaiśeṣikīṃ kṛtvā śuklāṃbaradharaḥ svayam |
śuklayajñopavītī ca śuklamālyānulepanaḥ || 5 ||
[Analyze grammar]

darbhāsane samāsīno darbhamuṣṭiṃ pragṛhya ca |
prāṇāyāmatrayaṃ kṛtvā prāṅmukho vāpyudaṅmukhaḥ || 6 ||
[Analyze grammar]

dhyātvā devaṃ ca devīṃ ca tadvijñāpanavartmanā |
vratametatkaromīti bhavetsaṃkalpya dīkṣitaḥ || 6 ||
[Analyze grammar]

yāvaccharīrapātaṃ vā dvādaśābdamathāpi vā |
tadardhaṃ vā tadardhaṃ vā māsadvādaśakaṃ tu vā || 7 ||
[Analyze grammar]

tadardhaṃ vā tadardhaṃ vā māsamekamathāpi vā |
dinadvādaśakaṃ vā 'tha dinaṣaṭkamathāpi vā || 8 ||
[Analyze grammar]

tadardhaṃ dinamekaṃ vā vratasaṃkalpanāvadhi |
agnimādhāya vidhivadvirajāhomakāraṇāt || 9 ||
[Analyze grammar]

hutvājyena samidbhiśca caruṇā ca yathākramam |
pūrṇāmāpūrya tāṃ bhūyastattvānāṃ śuddhimuddiśan || 10 ||
[Analyze grammar]

juhuyānmūlamantreṇa taireva samidādibhiḥ |
tattvānyetāni maddehe śuddhyaṃtām 1 tyanusmaran || 11 ||
[Analyze grammar]

pañcabhūtāni tanmātrāḥ pañcakarmendriyāṇi ca |
jñānakarmavibhedena pañcakarmavibhāgaśaḥ || 12 ||
[Analyze grammar]

tvagādidhātavassapta pañca prāṇādivāyavaḥ |
manobuddhirahaṃ khyātirguṇāḥ prakṛtipūruṣau || 13 ||
[Analyze grammar]

rāgo vidyākale caiva niyatiḥ kāla eva ca |
māyā ca śuddhividyā ca maheśvarasadāśivau || 14 ||
[Analyze grammar]

śaktiśca śivatattvaṃ ca tattvāni kramaśo viduḥ |
mantraistu virajairhutvā hotāsau virajā bhavet || 15 ||
[Analyze grammar]

śivānugrahamāsādya jñānavānsa hi jāyate |
atha gomayamādāya piṇḍīkṛtyābhimaṃtrya ca || 16 ||
[Analyze grammar]

vinyasyāgnau ca samprokṣya dine tasminhaviṣyabhuk |
prabhāte tu caturdaśyāṃ kṛtvā sarvaṃ puroditam || 17 ||
[Analyze grammar]

dine tasminnirāhāraḥ kālaṃ śeṣaṃ samāpayet |
prātaḥ parvaṇi cāpyevaṃ kṛtvā homā vasānataḥ || 18 ||
[Analyze grammar]

upasaṃhṛtya rudrāgniṃ gṛhṇīyādbhasma yatnataḥ |
tataśca jaṭilo muṇḍī śikhaikajaṭa eva vā || 19 ||
[Analyze grammar]

bhūtvā snātvā tato vītalajjaścetsyāddigambaraḥ |
api kāṣāyavasanaścarmacīrāmbaro 'tha vā || 20 ||
[Analyze grammar]

ekāmbaro valkalī vā bhaveddaṇḍī ca mekhalī |
prakṣālya caraṇau paścāddvirācamyātmanastanum || 21 ||
[Analyze grammar]

saṃkulīkṛtya tadbhasma virajānalasaṃbhavam |
agnirityādibhirmaṃtraiḥ ṣaḍbhirātharvaṇaiḥ kramāt || 22 ||
[Analyze grammar]

vibhṛjyāṃgāni mūrdhādicaraṇāṃtāni taisspṛśet |
tatastena krameṇaiva samuddhṛtya ca bhasmanā || 23 ||
[Analyze grammar]

sarvāṃgoddhūlanaṃ kuryātpraṇavena śivena vā |
tatastripuṇḍraṃ racayettriyāyuṣasamāhvayam || 24 ||
[Analyze grammar]

śivabhāvaṃ samāgamya śivayogamathācaret |
kuryātstrisandhyamapyevametatpāśupataṃ vratam || 25 ||
[Analyze grammar]

bhuktimuktipradaṃ caitatpaśutvaṃ vinivartayet |
tatpaśutvaṃ parityajya kṛtvā pāśupataṃ vratam || 26 ||
[Analyze grammar]

pūjanīyo mahādevo liṃgamūrtissanātanaḥ |
padmamaṣṭadalaṃ haimaṃ navaratnairalaṃkṛtam || 27 ||
[Analyze grammar]

karṇikākeśaropetamāsanaṃ parikalpayet |
vibhave tadabhāve tu raktaṃ sitamathāpi vā || 28 ||
[Analyze grammar]

padmaṃ tasyāpyabhāve tu kevalaṃ bhāvanāmayam |
tatpadmakarṇikāmadhye kṛtvā liṃgaṃ kanīyasam || 29 ||
[Analyze grammar]

sphīṭikaṃ pīṭhikopetaṃ pūjayedvidhivatkramāt |
pratiṣṭhāpya vidhānena talliṃgaṃ kṛtaśodhanam || 30 ||
[Analyze grammar]

parikalpyāsanaṃ mūrtiṃ pañcavaktraprakārataḥ |
pañcagavyādibhiḥ pūrṇairyathāvibhavasaṃbhṛtaiḥ || 31 ||
[Analyze grammar]

snāpayetkalaśaiḥ pūrṇairaṣṭāpadasamudbhavaiḥ |
gaṃdhadravyaissakarpūraiścandanādyaissakuṃkumaiḥ || 32 ||
[Analyze grammar]

savedikaṃ samālipya liṃgaṃ bhūṣaṇabhūṣitam |
bilvapatraiśca padmaiśca raktaiḥ śvetaistathotpalaiḥ || 33 ||
[Analyze grammar]

nīlotpalaistathānyaiśca puṣpaistaistaissugaṃdhibhiḥ |
puṇyaiḥ praśastaiḥ patraiśca citrairdūrvākṣatādibhiḥ || 34 ||
[Analyze grammar]

samabhyarcya yathālābhaṃ mahāpūjāvidhānataḥ |
dhūpaṃ dīpaṃ tathā cāpi naivedyaṃ ca samādiśet || 35 ||
[Analyze grammar]

nivedayitvā vibhave kalyāṇaṃ ca samācaret |
iṣṭāni ca viśiṣṭāni nyāyenopārjitāni ca || 36 ||
[Analyze grammar]

sarvadravyāṇi deyāni vrate tasminviśeṣataḥ |
śrīpatrotpalapadmānāṃ saṃkhyā sāhasrikī matā || 37 ||
[Analyze grammar]

pratyekamaparā saṃkhyā śatamaṣṭottaraṃ dvijāḥ |
tatrāpi ca viśeṣeṇa na tyajedbilvapatrakam || 38 ||
[Analyze grammar]

haimamekaṃ paraṃ prāhuḥ padmaṃ padmasahasrakāt |
nīlotpalādiṣvapyetatsamānaṃ bilbapatrakaiḥ || 39 ||
[Analyze grammar]

puṣpāntare na niyamo yathālābhaṃ nivedayet |
aṣṭāṅgamarghyamutkṛṣṭaṃ dhūpālepau viśeṣataḥ || 40 ||
[Analyze grammar]

candanaṃ vāmadevākhye haritālaṃ ca pauruṣe |
īśāne bhasitaṃ kecidālepanamitīdṛśām || 41 ||
[Analyze grammar]

na dhūpamiti manyante dhūpāntaravidhānataḥ |
sitāgurumaghorākhye mukhe kṛṣṇāguruṃ punaḥ || 42 ||
[Analyze grammar]

pauruṣe guggulaṃ savye saumye saugaṃdhikaṃ mukhe |
īśāne 'pi hyuśīrādi deyāddhūpaṃ viśeṣataḥ || 43 ||
[Analyze grammar]

śarkarāmadhukarpūrakapilāghṛtasaṃyutam |
caṃdanāgurukāṣṭhādyaṃ sāmānyaṃ saṃpracakṣate || 44 ||
[Analyze grammar]

karpūravartirājyāḍhyā deyā dīpāvalistataḥ |
arghyamācamanaṃ deyaṃ prativaktramataḥ param || 45 ||
[Analyze grammar]

prathamāvaraṇe pūjyo kramāddherambaṣaṇmukhau |
brahmāṃgāni tataścaiva prathamāvaraṇercite || 46 ||
[Analyze grammar]

dvitīyāvaraṇe pūjyā vighneśāścakravartinaḥ |
tṛtīyāvaraṇe pūjyā bhavādyā aṣṭamūrtayaḥ || 47 ||
[Analyze grammar]

mahādevādayastatra tathaikādaśamūrtayaḥ |
caturthāvaraṇe pūjyāḥ sarva eva gaṇeśvarāḥ || 48 ||
[Analyze grammar]

bahireva tu padmasya pañcamāvaraṇe kramāt |
daśadikpatayaḥ pūjyāḥ sāstrāḥ sānucarāstathā || 49 ||
[Analyze grammar]

brahmaṇo mānasāḥ putrāḥ sarve 'pi jyotiṣāṃ gaṇāḥ |
sarvā devyaśca devāśca sarve sarve ca khecarāḥ || 50 ||
[Analyze grammar]

pātālavāsinaścānye sarve munigaṇā api |
yogino hi sakhāssarve pataṃgā mātarastathā || 51 ||
[Analyze grammar]

kṣetrapālāśca sagaṇāḥ sarvaṃ caitaccarācaram |
pūjanīyaṃ śivaprītyā mattvā śaṃbhuvibhūtimat || 52 ||
[Analyze grammar]

athāvaraṇapūjāṃte saṃpūjya parameśvaram |
sājyaṃ savyaṃ janaṃ hṛdyaṃ havirbhaktyā nivedayet || 53 ||
[Analyze grammar]

mukhavāsādikaṃ dattvā tāmbūlaṃ sopadaṃśakam |
alaṃkṛtya ca bhūyo 'pi nānāpuṣpavibhūṣaṇaiḥ || 54 ||
[Analyze grammar]

nīrājanāṃte vistīrya pūjāśeṣaṃ samāpayet |
caṣakaṃ sopakāraṃ ca śayanaṃ ca samarpayet || 55 ||
[Analyze grammar]

candrasaṃkāśahāraṃ ca śayanīyaṃ samarpayet |
ādyaṃ nṛpocitaṃ hṛdyaṃ tatsarvamanurūpataḥ || 56 ||
[Analyze grammar]

kṛtvā ca kārayitvā ca hitvā ca pratipūjanam |
stotraṃ vyapohanaṃ japtvā vidyāṃ pañcākṣarīṃ japet || 57 ||
[Analyze grammar]

pradakṣiṇāṃ praṇāmaṃ ca kṛtvātmānaṃ samarpayet |
tataḥ purastāddevasya guruviprau ca pūjayet || 58 ||
[Analyze grammar]

dattvārghyamaṣṭau puṣpāṇi devamudvāsya liṃgataḥ |
agneścāgniṃ susaṃyamya hyudvāsya ca tamapyuta || 59 ||
[Analyze grammar]

pratyahaṃ ca janastvevaṃ kuryātsevāṃ puroditām |
tatastatsāmbujaṃ liṃgaṃ sarvopakaraṇānvitam || 60 ||
[Analyze grammar]

samarpayetsvagurave sthāpayedvā śivālaye |
saṃpūjya ca gurūnviprānvratinaśca viśeṣataḥ || 61 ||
[Analyze grammar]

bhaktāndvijāṃśca śaktaśceddīnānāthāṃśca toṣayet |
svayaṃ cānaśane śaktaḥ phalamūlāśane 'tha vā || 62 ||
[Analyze grammar]

payovrato vā bhikṣāśī bhavedekāśanastathā |
naktaṃ yuktāśano nityaṃ bhūśayyānirataḥ śuciḥ || 63 ||
[Analyze grammar]

bhasmaśāyī tṛṇeśāyī cīrājinadhṛto 'thavā |
brahmacaryavrato nityaṃ vratametatsamācaret || 64 ||
[Analyze grammar]

arkavāre tathārdrāyāṃ pañcadaśyāṃ ca pakṣayoḥ |
aṣṭamyāṃ ca caturdaśyāṃ śaktastūpavasedapi || 65 ||
[Analyze grammar]

pākhaṇḍipatitodakyāssūtakāntyajapūrvakān |
varjayetsarvayatnena manasā karmaṇā girā || 66 ||
[Analyze grammar]

kṣamadānadayāsatyāhiṃsāśīlaḥ sadā bhavet |
saṃtuṣṭaśca praśāntaśca japadhyānaratastathā || 67 ||
[Analyze grammar]

kuryāttriṣavaṇasnānaṃ bhasmasnānamathāpi vā |
pūjāṃ vaiśeṣikīṃ caiva manasā vacasā girā || 68 ||
[Analyze grammar]

bahunātra kimuktena nācaredaśivaṃ vratī |
pramādāttu tathācāre nirūpya gurulāghave || 69 ||
[Analyze grammar]

ucitāṃ niṣkṛtiṃ kuryātpūjāhomajapādibhiḥ |
āsamāptervratasyaivamācarenna pramādataḥ || 70 ||
[Analyze grammar]

godānaṃ ca vṛṣotsargaṃ kuryātpūjāṃ ca saṃpadā |
bhaktaśca śivaprītyarthaṃ sarvakāmavivarjitaḥ || 71 ||
[Analyze grammar]

sāmānyametatkathitaṃ vratasyāsya samāsataḥ |
pratimāsaṃ viśeṣaṃ ca pravadāmi yathāśrutam || 72 ||
[Analyze grammar]

vaiśākhe vajraliṃgaṃ tu jyeṣṭhe mārakataṃ śubham |
āṣāḍhe mauktikaṃ vidyācchrāvaṇe nīlanirmitam || 73 ||
[Analyze grammar]

māse bhādrapade caiva padmarāgamayaṃ param |
āśvine māsi vidyādvai liṃgaṃ gomedakaṃ varam || 74 ||
[Analyze grammar]

kārtikyāṃ vaidrumaṃ liṃgaṃ vaidūryaṃ mārgaśīrṣake |
puṣparāgamayaṃ pauṣe māghe dyumaṇijantathā || 75 ||
[Analyze grammar]

phālguṇe candrakāntotthaṃ caitre tadvyatyayo 'thavā |
sarvamāseṣu ratnānāmalābhe haimameva vā || 76 ||
[Analyze grammar]

haimābhāve rājataṃ vā tāmrajaṃ śailajantathā |
mṛnmayaṃ vā yathālābhaṃ jātuṣaṃ cānyadeva vā || 77 ||
[Analyze grammar]

sarvagaṃdhamayaṃ vātha liṃgaṃ kuryādyathāruci |
vratāvasānasamaye samācaritanityakaḥ || 78 ||
[Analyze grammar]

kṛtvā vaiśeṣikīṃ pūjāṃ hutvā caiva yathā purā |
saṃpūjya ca tathācāryaṃ vratinaśca viśeṣataḥ || 79 ||
[Analyze grammar]

deśikenāpyanujñātaḥ prāṅmukho vāpyudaṅmukhaḥ |
darbhāsano darbhapāṇiḥ prāṇāpānau niyamya ca || 80 ||
[Analyze grammar]

japitvā śaktito mūlaṃ dhyātvā sāmbaṃ triyambakam |
anujñāpya yathāpūrvaṃ namaskṛtya kṛtāñjaliḥ || 81 ||
[Analyze grammar]

samutsṛjāmi bhagavanvratametattvadājñayā |
ityuktvā liṃgamūlasthāndarbhānuttaratastyajet || 82 ||
[Analyze grammar]

tato daṇḍajaṭācīramekhalā api cotsṛjet |
punarācamya vidhivatpañcākṣaramudīrayet || 83 ||
[Analyze grammar]

yaḥ kṛtvātyaṃtikīṃ dīkṣāmādehāntamanākulaḥ |
vratametatprakurvīta sa tu vai naiṣṭhikaḥ smṛtaḥ || 84 ||
[Analyze grammar]

so 'tyāśramī ca vijñeyo mahāpāśupatastathā |
sa eva tapatāṃ śreṣṭha sa eva ca mahāvratī || 85 ||
[Analyze grammar]

na tena sadṛśaḥ kaścitkṛtakṛtyo mumukṣuṣu |
yo yatirnaiṣṭhiko jātastamāhurnaiṣṭhikottamam || 86 ||
[Analyze grammar]

yo 'nvahaṃ dvādaśāhaṃ vā vratametatsamācaret |
so 'pi naiṣṭhikatulyaḥ syāttīvravratasamanvayāt || 87 ||
[Analyze grammar]

ghṛtākto yaścaredetadvrataṃ vrataparāyaṇaḥ |
dvitraikadivasaṃ vāpi sa ca kaścana naiṣṭhikaḥ || 88 ||
[Analyze grammar]

kṛtyamityeva niṣkāmo yaścaredvratamuttamam |
śivārpitātmā satataṃ na tena sadṛśaḥ kvacit || 89 ||
[Analyze grammar]

bhasmacchanno dvijo vidvānmahāpātakasaṃbhavaiḥ |
pāpaissudāruṇaissadyo mucyate nātra saṃśayaḥ || 90 ||
[Analyze grammar]

rudrāgniryatparaṃ vīryantadbhasma parikīrtitam |
tasmātsarveṣu kāleṣu vīryavānbhasmasaṃyutaḥ || 91 ||
[Analyze grammar]

bhasmaniṣṭhasya naśyanti deṣā bhasmāgnisaṃgamāt |
bhasmasnānaviśuddhātmā bhasmaniṣṭha iti smṛtaḥ || 92 ||
[Analyze grammar]

bhasmanā digdhasarvāṃgo bhasmadīptatripuṃḍrakaḥ |
bhasmasnāyī ca puruṣo bhasmaniṣṭha iti smṛtaḥ || 93 ||
[Analyze grammar]

bhūtapretapiśāsāśca rogāścātīva dussahāḥ |
bhasmaniṣṭhasya sānnidhyādvidravaṃti na saṃśayaḥ || 94 ||
[Analyze grammar]

bhāsanādbhāsitaṃ proktaṃ bhasma kalmaṣabhakṣaṇāt |
bhūtibhūtikarī caiva rakṣā rakṣākarī param || 95 ||
[Analyze grammar]

kimanyadiha vaktavyaṃ bhasmamāhātmyakāraṇam |
vratī ca bhasmanā snātassvayaṃ devo maheśvaraḥ || 96 ||
[Analyze grammar]

paramāstraṃ ca śaivānāṃ bhasmaitatpārameśvaram |
dhaumyāgrajasya tapasi vyāpado yannivāritāḥ || 97 ||
[Analyze grammar]

tasmātsarvaprayatnena kṛtvā pāśupatavratam |
dhanavadbhasma saṃgṛhya bhasmasnānarato bhavet || 98 ||
[Analyze grammar]