Chapter 32

[English text for this chapter is available]

ṛṣaya ūcuḥ |
kiṃ tacchreṣṭamanuṣṭhānaṃ mokṣo yenaparokṣitaḥ |
tattasya sādhanaṃ cādya vaktumarhasi māruta || 1 ||
[Analyze grammar]

vāyuruvāca |
śaivo hi paramo dharmaḥ śreṣṭhānuṣṭhānaśabditaḥ |
yatrāparokṣo lakṣyeta sākṣānmokṣapradaḥ śivaḥ || 2 ||
[Analyze grammar]

sa tu pañcavidho jñeyaḥ pañcabhiḥ parvabhiḥ kramāt |
kriyātapojapadhyānajñānātmabhiranuttaraiḥ || 3 ||
[Analyze grammar]

taireva sottaraissiddho dharmastu paramo mataḥ |
parokṣamaparokṣaṃ ca jñānaṃ yatra ca mokṣadam || 4 ||
[Analyze grammar]

paramo 'paramaścobhau dharmau hi śruticoditau |
dharmaśabdābhidheyerthe pramāṇaṃ śrutireva naḥ || 5 ||
[Analyze grammar]

paramo yogaparyanto dharmaḥ śrutiśirogataḥ |
dharmastvaparamastadvadadhaḥ śrutimukhotthitaḥ || 6 ||
[Analyze grammar]

apaśvātmādhikāratvādyo dharamaḥ paramo mataḥ |
sādhāraṇastato 'nyastu sarveṣāmadhikārataḥ || 7 ||
[Analyze grammar]

sa cāyaṃ paramo dharmaḥ paradharmasya sādhanam |
dharmaśāstrādibhissamyaksāṃga evopabṛṃhitaḥ || 8 ||
[Analyze grammar]

śaivo yaḥ paramo dharmaḥ śreṣṭhānuṣṭhānaśabditaḥ |
itihāsapurāṇābhyāṃ kathaṃcidupabṛṃhitaḥ || 9 ||
[Analyze grammar]

śaivāgamaistu saṃpannaḥ sahāṃgopāṃvistaraḥ |
tatsaṃskārādhikāraiśca samyagevopabṛṃhitaḥ || 10 ||
[Analyze grammar]

śaivāgamo hi dvividhaḥ śrauto 'śrautaśca saṃskṛtaḥ |
śrutisāramayaḥ śrautassvataṃtra itaro mataḥ || 11 ||
[Analyze grammar]

svataṃtro daśadhā pūrvaṃ tathāṣṭādaśadhā punaḥ |
kāmikādisamākhyābhissiddhaḥ siddhāntasaṃjñitaḥ || 12 ||
[Analyze grammar]

śrutisāramayo yastu śatakoṭipravistaraḥ |
paraṃ pāśupataṃ yatra vrataṃ jñānaṃ ca kathyate || 13 ||
[Analyze grammar]

yugāvarteṣu śiṣyeta yogācāryasvarūpiṇā |
tatratatrāvatīrṇena śivenaiva pravartyate || 14 ||
[Analyze grammar]

saṃkṣipyāsya pravaktāraścatvāraḥ paramarṣaya |
rururdadhīco 'gastyaśca upamanyurmahāyaśāḥ || 15 ||
[Analyze grammar]

te ca pāśupatā jñeyāssaṃhitānāṃ pravartakāḥ |
tatsaṃtatīyā guravaḥ śataśo 'tha sahasraśaḥ || 16 ||
[Analyze grammar]

tatroktaḥ paramo dharmaścaryādyātmā caturvidhaḥ |
teṣu pāśupato yogaḥ śivaṃ pratyakṣayeddṛḍham || 17 ||
[Analyze grammar]

tasmācchreṣṭhamanuṣṭhānaṃ yogaḥ pāśupato mataḥ |
tatrāpyupāyako yukto brahmaṇā sa tu kathyate || 18 ||
[Analyze grammar]

nāmāṣṭakamayo yogaśśivena parikalpitaḥ |
tena yogena sahasā śaivī prajñā prajāyate || 19 ||
[Analyze grammar]

prajñayā paramaṃ jñānamacirāllabhate sthiram |
prasīdati śivastasya yasya jñānaṃ pratiṣṭhitam || 20 ||
[Analyze grammar]

prasādātparamo yogo yaḥ śivaṃ cāparokṣayet |
śivāparokṣātsaṃsārakāraṇena viyujyate || 21 ||
[Analyze grammar]

tataḥ syānmuktasaṃsāro muktaḥ śivasamo bhavet |
brahmaprokta ityupāyaḥ sa eva pṛthagucyate || 22 ||
[Analyze grammar]

śivo maheśvaraścaiva rudro viṣṇuḥ pitāmahaḥ |
saṃsāravaidyaḥ sarvajñaḥ paramātmeti mukhyataḥ || 23 ||
[Analyze grammar]

nāmāṣṭakamidaṃ mukhyaṃ śivasya pratipādakam |
ādyantu pañcakaṃ jñeyaṃ śāntyatītādyanukramāt || 24 ||
[Analyze grammar]

saṃjñā sadāśivādīnāṃ pañcopādhiparigrahāt |
upādhivinivṛttau tu yathāsvaṃ vinivartate || 25 ||
[Analyze grammar]

padameva hi tannityamanityāḥ padinaḥ smṛtāḥ |
padānāṃ pratikṛttau tu mucyante padino yataḥ || 26 ||
[Analyze grammar]

parivṛttyantare bhūyastatpadaprāptirucyate |
ātmāntarābhidhānaṃ syādyadādyaṃ nāma pañcakam || 27 ||
[Analyze grammar]

anyattu tritayaṃ nāmnāmupādānādiyogataḥ |
trividhopādhivacanācchiva evānuvartate || 28 ||
[Analyze grammar]

anādimalasaṃśleṣaḥ prāgabhāvātsvabhāvataḥ |
atyaṃtaṃ pariśuddhātmetyato 'yaṃ śiva ucyate || 29 ||
[Analyze grammar]

athavāśeṣakalyāṇaguṇaikadhana īśvaraḥ |
śiva ityucyate sadbhiśśivatattvārthavādibhiḥ || 30 ||
[Analyze grammar]

trayoviṃśatitattvebhyaḥ prakṛtirhi parā matā |
prakṛtestu paraṃ prāhuḥ puruṣaṃ pañcaviṃśakam || 31 ||
[Analyze grammar]

yaṃ vedādau svaraṃ prāhurvācyavācakabhāvataḥ |
vedaikavedyayāthātmyādvedānte ca pratiṣṭhitaḥ || 32 ||
[Analyze grammar]

tasya prakṛtilīnasya yaḥ parassa maheśvaraḥ |
tadadhīnapravṛttitvātprakṛteḥ puruṣasya ca || 33 ||
[Analyze grammar]

athavā triguṇaṃ tattvamupeyamidamavyayam |
māyāntu prakṛtiṃ vidyānmāyinaṃ tu maheśvaram || 34 ||
[Analyze grammar]

māyāvikṣobhako 'naṃto maheśvarasamanvayāt |
kālātmā paramātmādiḥ sthūlaḥ sūkṣmaḥ prakīrtitaḥ || 35 ||
[Analyze grammar]

rudduḥkhaṃ duḥkhaheturvā tadrāvayati naḥ prabhuḥ |
rudra ityucyate sadbhiḥ śivaḥ paramakāraṇam || 36 ||
[Analyze grammar]

tattvādibhūtaparyantaṃ śarīrādiṣvatandritaḥ |
vyāpyādhitiṣṭhati śivastato rudra itastataḥ || 37 ||
[Analyze grammar]

jagataḥ pitṛbhūtānāṃ śivo mūrtyātmanāmapi |
pitṛbhāvena sarveṣāṃ pitāmaha udīritaḥ || 38 ||
[Analyze grammar]

nidānajño yathā vaidyo rogasya vinivartakaḥ |
upāyairbheṣajaistadvallayabhogādhikārataḥ || 39 ||
[Analyze grammar]

saṃsārasyeśvaro nityaṃ samūlasya nivartakaḥ |
saṃsāravaidya ityuktaḥ sarvatattvārthavedibhiḥ || 40 ||
[Analyze grammar]

daśārthajñānasiddhyarthamindriyeṣveṣu satsvapi |
trikālabhāvino bhāvānsthūlānsūkṣmānaśeṣataḥ || 41 ||
[Analyze grammar]

aṇavo naiva jānanti māyayaiva malāvṛtāḥ |
asatsvapi ca sarveṣu sarvārthajñānahetuṣu || 42 ||
[Analyze grammar]

yadyathāvasthitaṃ vastu tattathaiva sadāśivaḥ |
ayatnenaiva jānāti tasmātsarvajña ucyate || 43 ||
[Analyze grammar]

sarvātmā paramairebhirguṇairnityasamanvayāt |
svasmātparātmavirahātparamātmā śivaḥ svayam || 44 ||
[Analyze grammar]

nāmāṣṭakamidaṃ caiva labdhvācāryaprasādataḥ |
nivṛttyādikalāgranthiṃ śivādyaiḥ pañcanāmabhiḥ || 45 ||
[Analyze grammar]

yathāsvaṃ kramaśaśchitvā śodhayitvā yathāguṇam |
guṇitaireva soddhātairaniruddhairathāpi vā || 46 ||
[Analyze grammar]

hṛtkaṇṭhatālubhrūmadhyabrahmarandhrasamanvitām |
chittvā paryaṣṭakākāraṃ svātmānaṃ ca suṣumṇayā || 47 ||
[Analyze grammar]

dvādaśāṃtaḥsthitasyendornītvopari śivaujasi |
saṃhṛtyaṃ vadanaṃ paścādyathāsaṃskaraṇaṃ layāt || 48 ||
[Analyze grammar]

śāktenāmṛtavarṣeṇa saṃsiktāyāṃ tanau punaḥ |
avatārya svamātmānamamṛtātmākṛtiṃ hṛdi || 49 ||
[Analyze grammar]

dvādaśāṃtaḥsthitasyendoḥ parastācchvetapaṃkaje |
samāsīnaṃ mahādevaṃ śaṃkarambhaktavatsalam || 50 ||
[Analyze grammar]

ardhanārīśvaraṃ devaṃ nirmalaṃ madhurākṛtim |
śuddhasphaṭikasaṃkāśaṃ prasannaṃ śītaladyutim || 51 ||
[Analyze grammar]

dhyātvā hi mānase devaṃ svasthacitto 'tha mānavaḥ |
śivanāmāṣṭakenaiva bhāvapuṣpaissamarcayet || 52 ||
[Analyze grammar]

abhyarcanānte tu punaḥ prāṇānāyamya mānavaḥ |
samyakcittaṃ samādhāya śārvaṃ nāmāṣṭakaṃ japet || 53 ||
[Analyze grammar]

nābhau cāṣṭāhutīrhutvā pūrṇāhutyā namastataḥ |
aṣṭapuṣpapradānena kṛtvābhyarcanamaṃtimam || 54 ||
[Analyze grammar]

nivedayetsvamātmānaṃ culukodakavartmanā |
evaṃ kṛtvā cirādeva jñānaṃ pāśupataṃ śubham || 55 ||
[Analyze grammar]

labhate tatpratiṣṭhāṃ ca vṛttaṃ cānuttamaṃ tathā |
yogaṃ ca paramaṃ labdhvā mucyate nātra saṃśayaḥ || 56 ||
[Analyze grammar]