Chapter 12

[English text for this chapter is available]

vāyuruvāca |
sargaṃ ciṃtayatastasya tadā vai buddhipūrvakam |
pradhyānakāle mohastu prādurbhūtastamomayaḥ |
tamomoho mahāmohastāmisraścāndhasaṃjñitaḥ |
avidyā pañcamī caiṣā prādurbhūtā mahātmanaḥ || 1 ||
[Analyze grammar]

pañcadhā 'vasthitaḥ sargo dhyāyatastvabhimāninaḥ |
sarvatastamasātīva bījakumbhavadāvṛtaḥ |
bahirantaścāprakāśaḥ stabdho niḥsaṃjña eva ca |
tasmātteṣāṃ vṛtā buddhirmukhāni karaṇāni ca || 3 ||
[Analyze grammar]

tasmātte saṃvṛtātmāno nagā mukhyāḥ prakīrtitāḥ |
taṃ dṛṣṭvā'sādhakaṃ brahmā prathamaṃ sargamīdṛśam |
aprasannamanā bhūtvā dvitīyaṃ so 'bhyamanyata |
tasyābhidhāyataḥ sargaṃ tiryaksroto 'bhyavartata || 5 ||
[Analyze grammar]

antaḥprakāśāstiryaṃca āvṛtāśca bahiḥ punaḥ |
paśvātmānastato jātā utpathagrāhiṇaśca te |
tamapyasādhakaṃ jñātvā sargamanyamamanyata |
tadordhvasrotaso vṛtto devasargastu sāttvikaḥ || 7 ||
[Analyze grammar]

te sukhaprītibahulā bahirantaśca nāvṛtāḥ |
prakāśā bahirantaścasvabhāvādeva saṃjñitāḥ |
tato 'bhidhyāyatovyaktādarvāksrotastu sādhakaḥ |
manuṣyanāmā sañjātaḥ sargo duḥkhasamutkaṭaḥ || 9 ||
[Analyze grammar]

prakāśābahirantaste tamodriktā rajo 'dhikāḥ |
pañcamonugrahaḥ sargaścaturdhā saṃvyavasthitaḥ |
viparyayeṇa śaktyā ca tuṣṭyāsiddhyā tathaiva ca |
te 'parigrāhiṇaḥ sarve saṃvibhāgaratāḥ punaḥ || 11 ||
[Analyze grammar]

khādanāścāpyaśīlāśca bhūtādyāḥ parikīrtitāḥ |
prathamo mahataḥ sargo brahmaṇaḥ parameṣṭhinaḥ |
tanmātrāṇāṃ dvitīyastu bhūtasargaḥ sa ucyate |
vaikārikastṛtīyastu sarga aindriyakaḥ smṛtaḥ || 13 ||
[Analyze grammar]

ityeṣa prakṛteḥ sargaḥ sambhṛto 'buddhipūrvakaḥ |
mukhyasargaścaturthastu mukhyā vai sthāvarāḥ smṛtāḥ |
tiryaksrotastu yaḥ proktastiryagyoniḥ sa pañcamaḥ |
tadūrdhvasrotasaḥ ṣaṣṭho devasargastu sa smṛtaḥ || 15 ||
[Analyze grammar]

tato 'rvāksrotasāṃ sargaḥ saptamaḥ sa tu mānuṣaḥ |
aṣṭamo 'nugrahaḥ sargaḥ kaumāro navamaḥ smṛtaḥ |
prākṛtāśca trayaḥ pūrve sargāste 'buddhipūrvakāḥ |
buddhipūrvaṃ pravartante mukhyādyāḥ pañca vaikṛtāḥ || 17 ||
[Analyze grammar]

agre sasarja vai brahmā mānasānātmanaḥ samān |
sanandaṃ sanakañcaiva vidvāṃsañca sanātanam |
ṛbhuṃ sanatkumārañca pūrvameva prajāpatiḥ |
sarve te yogino jñeyā vītarāgā vimatsarāḥ || 19 ||
[Analyze grammar]

īśvarāsaktamanaso na cakruḥ sṛṣṭaye matim |
teṣu sṛṣṭyanapekṣeṣu gateṣu sanakādiṣu |
sraṣṭukāmaḥ punarbrahmā tatāpa paramaṃ tapaḥ |
tasyaivaṃ tapyamānasya na kiṃcitsamavartata || 21 ||
[Analyze grammar]

tato dīrgheṇa kālena duḥkhātkrodho vyajāyata |
krodhāviṣṭasya netrābhyāṃ prāpatannaśrubindavaḥ |
tatastebhyo 'śrubindubhyo bhūtāḥ pretāstadābhavan |
sarvāṃstānaśrujāndṛṣṭvā brahmātmānamaniṃdata || 23 ||
[Analyze grammar]

tasya tīvrā 'bhavanmūrchā krodhāmarṣasamudbhavā |
mūrchitastu jahau prāṇānkrodhāviṣṭaḥ prajāpatiḥ |
tataḥ prāṇeśvaro rudro bhagavānnīlalohitaḥ |
prasādamatulaṃ kartuṃ prādurāsītprabhormukhāt || 25 ||
[Analyze grammar]

daśadhā caikadhā cakre svātmānaṃ prabhurīśvaraḥ |
te tenoktā mahātmāno daśadhā caikadhā kṛtāḥ |
yūyaṃ sṛṣṭā mayā vatsā lokānugrahakāraṇāt |
tasmātsarvasya lokasya sthāpanāya hitāya ca || 27 ||
[Analyze grammar]

prajāsantānahetośca prayatadhvamatandritāḥ |
evamuktāśca rurudurdudruvuśca samantataḥ |
rodanāddrāvaṇāccaiva te rudrā nāmataḥ smṛtāḥ |
ye rudrāste khalu prāṇā ye prāṇāste mahātmakāḥ || 29 ||
[Analyze grammar]

tato mṛtasya devasya brahmaṇaḥ parameṣṭhinaḥ |
ghṛṇī dadau punaḥ prāṇānbrahmaputro maheśvaraḥ |
prahṛṣṭavadano rudraḥ prāṇapratyāgamādvibhoḥ |
abhyabhāṣata viśveśo brahmāṇaṃ paramaṃ vacaḥ || 31 ||
[Analyze grammar]

mābhairmābhairmahābhāga viriṃca jagatāṃ guro |
mayā te prāṇitāḥ prāṇāḥ sukhamuttiṣṭha suvrata |
svapnānubhūtamiva tacchrutvā vākyaṃ manoharam |
haraṃ nirīkṣya śanakairnetraiḥ phullāmbujaprabhaiḥ || 33 ||
[Analyze grammar]

tathā pratyāgataprāṇaḥ snigdhagambhīrayā girā |
uvāca vacanaṃ brahmā tamuddiśya kṛtāñjaliḥ |
tvaṃ hi darśanamātreṇa cānandayasi me manaḥ |
ko bhavān viśvamūrtyā vā sthita ekādaśātmakaḥ || 35 ||
[Analyze grammar]

tasya tadvacanaṃ śrutvā vyājahāra maheśvaraḥ |
spṛśan kārābhyāṃ brahmāṇaṃ susukhābhyāṃ sureśvaraḥ |
māṃ viddhi paramātmānaṃ tava putratvamāgatam |
ete caikādaśa rudrāstvāṃ surakṣitumāgatāḥ || 37 ||
[Analyze grammar]

tasmāttīvrāmimāmmūrchāṃ vidhūya madanugrahāt |
prabuddhasva yathāpūrvaṃ prajā vai sraṣṭumarhasi |
evaṃ bhagavatā prokto brahmā prītamanā hyabhūt |
nānāṣṭakena viśvātmā tuṣṭāva parameśvaram || 39 ||
[Analyze grammar]

brahmovāca |
namaste bhagavan rudra bhāskarāmitatejase |
namo bhavāya devāya rasāyāmbumayātmane |
śarvāya kṣitirūpāya nandīsurabhaye namaḥ || 41 ||
[Analyze grammar]

īśāya vasave tubhyaṃ namassparśamayātmane |
paśūnāṃ pataye caiva pāvakāyātitejase |
bhīmāya vyomarūpāya śabdamātrāya te namaḥ |
ugrāyograsvarūpāya yajamānātmane namaḥ |
mahādevāya somāya namostvamṛtamūrtaye || 42 ||
[Analyze grammar]

evaṃ stutvā mahādevaṃ brahmā lokapitāmahaḥ |
prārthayāmāsa viśveśaṃ girā praṇatipūrvayā |
bhagavan bhūtabhavyeśa mama putra maheśvara |
sṛṣṭihetostvamutpanno mamāṃge 'naṃganāśanaḥ || 44 ||
[Analyze grammar]

tasmānmahati kāryesmin vyāpṛtasya jagatprabho |
sahāyaṃ kuru sarvatra sraṣṭumarhasi sa prajāḥ |
tenaiṣāṃ pāvito devo rudrastripuramardanaḥ |
bāḍhamityeva tāṃ vāṇīṃ pratijagrāha śaṃkaraḥ || 46 ||
[Analyze grammar]

tatassa bhagavān brahmā hṛṣṭaṃ tamabhinaṃdya ca |
sraṣṭuṃ tenābhyanujñātastathānyāścāsṛjatprajāḥ |
marīcibhṛgvaṃgirasaḥ pulastyaṃ pulahaṃ kratum |
dakṣamatriṃ vasiṣṭhaṃ ca so 'sṛjanmanasaiva ca || 48 ||
[Analyze grammar]

purastādasṛjadbrahmā dharmaṃ saṃkalpameva ca |
ityete brahmaṇaḥ putrā dvādaśādau prakīrtitāḥ |
saha rudreṇa saṃbhūtāḥ purāṇā gṛhamedhinaḥ || 49 ||
[Analyze grammar]

teṣāṃ dvādaśa vaṃśāḥ syurdivyā devagaṇānvitāḥ |
prajāvantaḥ kriyāvanto maharṣibhiralaṃkṛtāḥ |
atha devāsurapitḥnmanuṣyāṃśca catuṣṭayam |
saha rudreṇa sisṛkṣuraṃbhasyetāni vai vidhiḥ || 51 ||
[Analyze grammar]

sa sṛṣṭyarthaṃ samādhāya brahmātmānamayūyujat |
mukhādajanayaddevān pitḥṃścaivopapakṣataḥ |
jaghanādasurān sarvān prajanādapi mānuṣān |
avaskare kṣudhāviṣṭā rākṣasāstasya jajñire || 53 ||
[Analyze grammar]

putrāstamorajaḥprāyā balinaste niśācarāḥ |
sarpā yakṣāstathā bhūtā gaṃdharvāḥ saṃprajajñire |
vayāṃsi pakṣataḥ sṛṣṭāḥ pakṣiṇo vakṣaso 'sṛjat |
mukhatojāṃstathā pārśvāduragāṃśca vinirmame || 55 ||
[Analyze grammar]

padbhyāṃ cāśvānsamātaṃgān śarabhān gavayānmṛgān |
uṣṭrānaśvatarāṃścaiva nyaṃkūnanyāśca jātayaḥ || 1 ||
[Analyze grammar]

auṣadhyaḥ phalamūlāni romabhyastasya jajñire |
gāyatrīṃ ca ṛcaṃ caiva trivṛtsāma rathaṃtaram || 57 ||
[Analyze grammar]

agniṣṭomaṃ ca yajñānāṃ nirmame prathamānmukhāt |
yajūṃṣi traiṣṭubhaṃ chaṃdaḥstomaṃ pañcadaśaṃ tathā |
bṛhatsāma tathokthaṃ ca dakṣiṇādasṛjanmukhāt |
sāmāni jagatīchaṃdaḥ stomaṃ saptadaśaṃ tathā || 59 ||
[Analyze grammar]

vairūpyamatirātraṃ ca paścimādasṛjanmukhāt |
ekaviṃśamatharvāṇamāptoryāmāṇameva ca |
anuṣṭubhaṃ sa vairājamuttarādasṛjanmukhāt |
uccāvacāni bhūtāni gātrebhyastasya jajñire || 61 ||
[Analyze grammar]

yakṣāḥ piśācā gaṃdharvāstathaivāpsarasāṃ gaṇāḥ |
narakinnararakṣāṃsi vayaḥpaśumṛgoragāḥ |
avyayaṃ caiva yadidaṃ sthāṇusthāvarajaṃgamam |
teṣāṃ vai yāni karmāṇi prāksṛṣṭāni prapedire || 63 ||
[Analyze grammar]

tānyeva te prapadyaṃte sṛjyamānāḥ punaḥ punaḥ |
hiṃsrāhiṃsre mṛdukrūre dharmādharmāvṛtānṛte |
tadbhāvitāḥ prapadyaṃte tasmāttattasya rocate |
mahābhūteṣu nānātvamiṃdriyārtheṣu muktiṣu || 65 ||
[Analyze grammar]

viniyogaṃ ca bhūtānāṃ dhātaiva vyadadhatsvayam |
nāma rūpaṃ ca bhūtānāṃ prākṛtānāṃ prapañcanam |
vedaśabdebhya evādau nirmame 'sau pitāmahaḥ |
ārṣāṇi caiva nāmāni yāśca vedeṣu vṛttayaḥ || 67 ||
[Analyze grammar]

śarvaryaṃte prasūtānāṃ tānyevaibhyo dadāvajaḥ |
yathartāvṛtuliṃgāni nānārūpāṇi paryaye |
dṛśyaṃte tāni tānyeva tathā bhāvā yugādiṣu |
ityeṣa karaṇodbhūto lokasargassvayaṃbhuvaḥ || 69 ||
[Analyze grammar]

mahadādyoviśeṣāṃto vikāraḥ prakṛteḥ svayam |
caṃdrasūryaprabhājuṣṭo grahanakṣatramaṃḍitaḥ |
nadībhiśca samudraiśca parvataiśca sa maṃḍitaḥ |
paraiśca vividhairamyaissphītairjanapadaistathā || 71 ||
[Analyze grammar]

tasmin brahmavane 'vyakto brahmā carati sarvavit |
avyaktabījaprabhava īśvarānugrahe sthitaḥ |
buddhiskaṃdhamahāśākha indriyāṃtarakoṭaraḥ |
mahābhūtapramāṇaśca viśeṣāmalapallavaḥ || 73 ||
[Analyze grammar]

dharmādharmasupuṣpāḍhyaḥ sukhaduḥkhaphalodayaḥ |
ājīvyaḥ sarvabhūtānāṃ brahmavṛkṣaḥ sanātanaḥ |
dyāṃ mūrdhānaṃ tasya viprā vadaṃti khaṃ vai nābhiṃ caṃdrasūryau ca netre |
diśaḥ śrotre caraṇau ca kṣitiṃ ca so 'cintyātmā sarvabhūtapraṇetā || 75 ||
[Analyze grammar]

vaktrāttasya brahmaṇāssaṃprasūtāstadvakṣasaḥ kṣatriyāḥ pūrvabhāgāt |
vaiśyā urubhyāṃ tasya padbhyāṃ ca śūdrāḥ sarve varṇā gātrataḥ saṃprasūtāḥ || 77 ||
[Analyze grammar]