Chapter 13

[English text for this chapter is available]

ṛṣaya ūcuḥ |
bhavatā kathitā sṛṣṭirbhavasya paramātmanaḥ |
caturmukhamukhāttasya saṃśayo naḥ prajāyate || 1 ||
[Analyze grammar]

devaśreṣṭho virūpākṣo dīptaśśūladharo haraḥ |
kālātmā bhagavān rudraḥ kapardī nīlalohitaḥ || 2 ||
[Analyze grammar]

sabrahmakamimaṃ lokaṃ saviṣṇumapi pāvakam |
yaḥ saṃharati saṃkruddho yugāṃte samupasthite || 3 ||
[Analyze grammar]

yasya brahmā ca viṣṇuśca praṇāmaṃ kuruto bhayāt |
lokasaṃkocakasyāsya yasya tau vaśavartinau || 4 ||
[Analyze grammar]

yo 'yaṃ devaḥ svakādaṃgādbrahmaviṣṇū purāsṛjat |
sa eva hi tayornityaṃ yogakṣemakaraḥ prabhuḥ || 5 ||
[Analyze grammar]

sa kathaṃ bhagavān rudra ādidevaḥ purātanaḥ |
putratvamagamacchaṃbhurbrahmaṇo 'vyaktajanmanaḥ || 6 ||
[Analyze grammar]

prajāpatiśca viṣṇuśca rudrasyaitau parasparam |
sṛṣṭau parasparasyāṃgāditi prāgapi śuśruma || 7 ||
[Analyze grammar]

kathaṃ punaraśeṣāṇāṃ bhūtānāṃ hetubhūtayoḥ |
guṇapradhānabhāvena prādurbhāvaḥ parasparāt || 8 ||
[Analyze grammar]

nāpṛṣṭaṃ bhavatā kiṃcinnāśrutaṃ ca kathaṃcana |
bhagavacchiṣyabhūtena bhavatā sakalaṃ smṛtam || 9 ||
[Analyze grammar]

tattvaṃ vada yathā brahmā munīnāmavadadvibhuḥ |
vayaṃ śraddhālavastāta śrotumīśvarasadyaśaḥ || 10 ||
[Analyze grammar]

vāyuruvāca |
sthāne pṛṣṭamidaṃ viprā bhavadbhiḥ praśnakovidaiḥ |
idameva purā pṛṣṭo mama prāha pitāmahaḥ || 11 ||
[Analyze grammar]

tadahaṃ sampravakṣyāmi yathā rudrasamudbhavaḥ |
yathā ca punarutpattirbrahmaviṣṇvoḥ parasparam || 12 ||
[Analyze grammar]

trayaste kāraṇātmāno jatāssākṣānmaheśvarāt |
carācarasya viśvasya sargasthityaṃtahetavaḥ || 13 ||
[Analyze grammar]

paramaiśvaryasaṃyuktāḥ parameśvarabhāvitāḥ |
tacchaktyādhiṣṭhitā nityaṃ tatkāryakaraṇakṣamāḥ || 14 ||
[Analyze grammar]

pitrā niyamitāḥ pūrvaṃ trayopi triṣu karmasu |
brahmā sarge haristrāṇe rudraḥ saṃharaṇe tathā || 15 ||
[Analyze grammar]

tathāpyanyonyamātsaryādanyonyātiśayāśinaḥ |
tapasā toṣayitvā svaṃ pitaraṃ parameśvaram || 16 ||
[Analyze grammar]

labdhvā sarvātmanā tasya prasādātparameṣṭhinaḥ |
brahmanārāyaṇau pūrvaṃ rudraḥ kalpāntare 'sṛjat || 17 ||
[Analyze grammar]

kalpāntare punarbrahmā rudraviṣṇū jaganmayaḥ |
viṣṇuśca bhagavānrudraṃ brahmāṇamasṛjatpunaḥ || 18 ||
[Analyze grammar]

nārāyaṇaṃ punarbrahmā brahmāṇamasṛjatpunaḥ |
evaṃ kalpeṣu kalpeṣu brahmaviṣṇumaheśvarāḥ || 19 ||
[Analyze grammar]

paraspareṇa jāyaṃte parasparahitaiṣiṇaḥ |
tattatkalpāntavṛttāntamadhikṛtya maharṣibhiḥ || 20 ||
[Analyze grammar]

prabhāvaḥ kathyate teṣāṃ parasparasamudbhavāt |
śṛṇu teṣāṃ kathāṃ citrāṃ puṇyāṃ pāpapramocinīm || 21 ||
[Analyze grammar]

kalpe tatpuruṣe vṛttāṃ brahmaṇaḥ parameṣṭhinaḥ |
purā nārāyaṇo nāma kalpe vai meghavāhane || 22 ||
[Analyze grammar]

divyaṃ varṣasahasraṃ tu megho bhūtvāvahaddharām |
tasya bhāvaṃ samālakṣya viṣṇorviśvajagadguruḥ || 23 ||
[Analyze grammar]

sarvassarvātmabhāvena pradadau śaktimavyayām |
śaktiṃ labdhvā tu sarvātmā śivātsarveśvarāttadā || 24 ||
[Analyze grammar]

sasarja bhagāvan viṣṇurviśvaṃ viśvasṛjā saha |
viṣṇostadvaibhavaṃ dṛṣṭvā sṛṣṭastena pitāmahaḥ || 25 ||
[Analyze grammar]

īrṣyayā parayā grastaḥ prahasannidamabravīt |
gaccha viṣṇo mayā jñātaṃ tava sargasya kāraṇam || 26 ||
[Analyze grammar]

āvayoradhikaścāsti sa rudro nātra saṃśayaḥ |
tasya devādhidevasya prasādātparameṣṭhinaḥ || 26 ||
[Analyze grammar]

sraṣṭā tvaṃ bhagavānādyaḥ pālakaḥ paramārthataḥ |
ahaṃ ca tapasārādhya rudraṃ tridaśanāyakam || 27 ||
[Analyze grammar]

tvayā saha jagatsarvaṃ srakṣyāmyatra na saṃśayaḥ |
evaṃ viṣṇumupālabhya bhagavānabjasambhavaḥ || 28 ||
[Analyze grammar]

evaṃ vijñāpayāmāsa tapasā prāpya śaṃkaram |
bhagavan devadeveśa viśveśvara maheśvara || 29 ||
[Analyze grammar]

tava vāmāṃgajo viṣṇurdakṣiṇāṃgabhavo hyaham |
mayā saha jagatsarvaṃ tathāpyasṛjadacyutaḥ || 30 ||
[Analyze grammar]

sa matsarādupālabdhastvadāśrayabalānmayā |
madbhāvānnādhikasteti bhāvastvayi maheśvare || 31 ||
[Analyze grammar]

tvatta eva samutpattirāvayossadṛśī yataḥ |
tasya bhaktyā yathāpūrvaṃ prasādaṃ kṛtavānasi || 32 ||
[Analyze grammar]

tathā mamāpi tatsarvaṃ dātumarhasi śaṃkara |
iti vijñāpitastena bhagavān bhaganetrahā || 33 ||
[Analyze grammar]

nyāyena vai dadau sarvaṃ tasyāpi sa ghṛṇānidhiḥ |
labdhvaivamīśvarādeva brahmā sarvātmatāṃ kṣaṇāt || 34 ||
[Analyze grammar]

tvaramāṇotha saṃgamya dadarśa puruṣottamam |
kṣīrārṇavālaye śubhre vimāne sūryasaṃnibhe || 35 ||
[Analyze grammar]

hemaratnānvite divye manasā tena nirmite |
anaṃtabhogaśayyāyāṃ śayānaṃ paṃkajekṣaṇam || 36 ||
[Analyze grammar]

caturbhujamudārāṃgaṃ sarvābharaṇabhūṣitam |
śaṃkhacakradharaṃ saumyaṃ candrabiṃbasamānanam || 37 ||
[Analyze grammar]

śrīvatsavakṣasaṃ devaṃ prasannamadhurasmitam |
dharāmṛdukarāṃbhojasparśaraktapadāṃbujam || 38 ||
[Analyze grammar]

kṣīrārṇavāmṛtamiva śayānaṃ yoganidrayā |
tamasā kālarudrākhyaṃ rajasā kanakāṃḍajam || 39 ||
[Analyze grammar]

sattvena sarvagaṃ viṣṇuṃ nirguṇatve maheśvaram |
taṃ dṛṣṭvā puruṣaṃ brahmā pragalbhamidamabravīt || 40 ||
[Analyze grammar]

grasāmi tvāmahaṃ viṣṇo tvamātmānaṃ yathā purā |
tasya tadvacanaṃ śrutvā pratibuddhya pitāmaham || 41 ||
[Analyze grammar]

udaikṣata mahābāhussmitamīṣaccakāra ca |
tasminnavasare viṣṇurgrastastena mahātmanā || 42 ||
[Analyze grammar]

sṛṣṭaśca brahmaṇā sadyo bhruvormadhyādayatnataḥ |
tasminnavasare sākṣādbhagavānindubhūṣaṇaḥ || 43 ||
[Analyze grammar]

śaktiṃ tayorapi draṣṭumarūpo rūpamāsthitaḥ |
prasādamatulaṃ kartuṃ purā dattavarastayoḥ || 44 ||
[Analyze grammar]

āgacchattatra yatremau brahmanārāyaṇau sthitau |
atha tuṣṭuvaturdevaṃ prītau bhītau ca kautukāt || 45 ||
[Analyze grammar]

praṇematuśca bahuśo bahumānena dūrataḥ |
bhavopi bhagavānetāvanugṛhya pinākadhṛk || 46 ||
[Analyze grammar]

sādaraṃ paśyatoreva tayoraṃtaradhīyata || 47 ||
[Analyze grammar]