Chapter 7

[English text for this chapter is available]

śrīvyāsa uvāca |
bhūya eva pravakṣyāmi gaṅgāmāhātmyamuttamam |
tacchrutvā mānavāḥ sarve sarvānkāmānavāpnuyuḥ || 1 ||
[Analyze grammar]

yena nācaritaṃ snānaṃ gaṅgāyāṃ lokamātari |
ālokya tanmukhaṃ sadyaḥ karttavyaṃ sūryadarśanam || 2 ||
[Analyze grammar]

prabhāte yaḥ smaredbhaktyā gaṅgā ityakṣaradvayam |
tasya naśyaṃti pāpāni tamovadaruṇodaye || 3 ||
[Analyze grammar]

na dṛṣṭā yena saritāṃ pravarā jahnukanyakā |
tasyāgrāhyāṇi sarvāṇi annādi salilāni ca || 4 ||
[Analyze grammar]

śarīrāṇi parityajya gaṅgāsnānaṃ prakurvatām |
gātrāṇyāyānti pāpāni gaṅgāsnānamakurvatām || 5 ||
[Analyze grammar]

aho citramaho citramahocitramidaṃ punaḥ |
pataṃti narake mūḍhā gaṅgānāmnisthite sati || 6 ||
[Analyze grammar]

śirasā yo vahedbhaktyā gaṅgāmbhaḥ kaṇikāmapi |
sa mucyate mahāpāpairbrahmahatyādibhirdvijaḥ || 7 ||
[Analyze grammar]

lalāṭe dṛśyate yasya gaṅgāsaikatamuttamam |
sa puṇyātmā jagatsarvaṃ punāti nātra saṃśayaḥ || 8 ||
[Analyze grammar]

gaṅgātīrātsamāyāṃtaṃ yaḥ paśyetparamādaraiḥ |
so'śvamedhasahasrāṇi phalaṃ prāpnoti mānavaḥ || 9 ||
[Analyze grammar]

gaṅgātīramahaṃ yāmi tvamāgaccheti vakti yaḥ |
tasya viṣṇuḥ prasannātmā sarvānkāmānprayacchati || 10 ||
[Analyze grammar]

gaṃgeti nāma saṃsmṛtya yastu kūpajale'pi ca |
karoti mānavaḥ snānaṃ gaṅgāsnānaphalaṃ labhet || 11 ||
[Analyze grammar]

gaṅgāmbhaḥ śīkaraṃ yastu saṃmitaṃ sarṣapasya ca |
prāpnoti mṛtyukāleṣu sa gacchetparamaṃ padam || 12 ||
[Analyze grammar]

atraiva śṛṇu viprarṣe itihāsaṃ purātanam |
yasya śravaṇamātreṇa gaṅgādevī prasīdati || 13 ||
[Analyze grammar]

āsīttretāyuge vipro dharmasvo nāma dhārmikaḥ |
śāṃto dāṃto dayāyukto vedavedāṅgapāragaḥ || 14 ||
[Analyze grammar]

satyavādī krodhahīno hiṃsāhīno jitendriyaḥ |
sarvabhūtahitaiṣī ca yogābhyasarataḥ sadā || 15 ||
[Analyze grammar]

saṃsārasāgaraṃ tarttuṃ sa vipro vaiṣṇavo janaḥ |
pūjayāmāsa deveśaṃ kriyāyogena keśavam || 16 ||
[Analyze grammar]

kadācitprāpya puṇyāhaṃ sa ca viprarṣabho dvija |
jagāma jāhnavītīraṃ mumukṣuḥ snānahetave || 17 ||
[Analyze grammar]

tatra gaṃgāṃbhasi snātvā kṛtvā ca tarpaṇādikam |
gṛhaṃ gaṃtuṃ manaścakre gaṃgāṃbhaḥ karttarīṃ vahan || 18 ||
[Analyze grammar]

tasminkāle tato vipra vaiśyo ratnakarāhvayaḥ |
kṛtvā vāṇijyamāyāṃtaṃ sakalaiḥ kiṃkarairvṛtaḥ || 19 ||
[Analyze grammar]

tasyaikaḥ kiṃkaro vipraḥ kālakalpa iti smṛtaḥ |
daṃḍahastaḥ samāyāto vihitākhilapātakaḥ || 20 ||
[Analyze grammar]

athavartmaśramaśrāṃtastasya ratnakarasya ca |
suṣvāpaiko balīvarddaḥ pathi brāhmaṇasattama || 21 ||
[Analyze grammar]

pathi svapaṃtaṃ taṃ dṛṣṭvā kālakalpo vṛṣaṃ tataḥ |
daṇḍena tāḍayāmāsa bāhudhā'tyaṃtanirddayaḥ || 22 ||
[Analyze grammar]

taddaṇḍaghātajanitakrodhena vṛṣabhena saḥ |
viṣāṇābhyāṃ sutīkṣṇābhyāṃ samutthāya vidāritaḥ || 23 ||
[Analyze grammar]

tacchṛṅgadvayanirbhinnavakṣāḥ sa gatalocanaḥ |
tatsannidhiṃ dayāyukto dharmastu tvarito yayau || 24 ||
[Analyze grammar]

tataḥ karṇātsamādāya tulasīpatramuttamam |
gaṅgāmbhaḥ śīkarairdivyaiḥ siktosau tena dhīmatā || 25 ||
[Analyze grammar]

gataprāṇaṃ samālokya sa vipraḥ paramārthavit |
vismitaḥ svagṛhaṃ gaṃtuṃ manaścakre dvijottama || 26 ||
[Analyze grammar]

atha gacchanpathi prājño gaṅgānāmāni kīrtayan |
yamadūtāndadarśāgre koṭikoṭi sahasraśaḥ || 27 ||
[Analyze grammar]

chinnaikapādāḥ kecicca kecicchinnaikapāṇayaḥ |
ke'pi ke'pi cchinnakarṇāḥ ke'pyekanayanāstathā || 28 ||
[Analyze grammar]

kecicca cchinnanāsāśca cchinnajihvāśca kecana |
bhagnadaṃtāḥ ke'pi ke'pi ke'pi daṃtavivarjitāḥ || 29 ||
[Analyze grammar]

ke'pi śoṇitadhārābhirliptasarvakalevarāḥ |
vimuktakaiśikāḥ ke'pi ke'pi vaktravivarjitāḥ || 30 ||
[Analyze grammar]

ke'pi ke'pi tathā nagnāḥ ke'pi nirbhinnavakṣasaḥ |
ke'pi jarjaritāṃgāśca mahātīkṣṇaiḥ śilīmukhaiḥ || 31 ||
[Analyze grammar]

niṣiddhāṃgulihastāśca dṛḍhapāśaistathāpare |
kraṃdaṃto vyathayā ke'pi palāyanaparāyaṇāḥ || 32 ||
[Analyze grammar]

evaṃbhūtānyamapreṣyānsa vilokya dvijottamaḥ |
sakaṃpahṛdayo bhītyā tataḥ stabdhaivābhavat || 33 ||
[Analyze grammar]

avalaṃbya tato dhairyaṃ sa vipro haribhaktikṛt |
ityapṛcchanmadhurayā kirātānyamakiṃkarān || 34 ||
[Analyze grammar]

dharma uvāca |
ke yūyaṃ vikṛtākārāḥ pāśamudgarapāṇayaḥ |
daṃṣṭrākarālavadanā aṃgārasadṛśaprabhāḥ || 35 ||
[Analyze grammar]

yūyaṃ sarve mahāvīra jvalatpāvakalocanāḥ |
kṛtā tathāpi yuṣmākamiyaṃ kenāpi durgatiḥ || 36 ||
[Analyze grammar]

yamadūtā ūcuḥ |
yamadūtā vayaṃ sarve yamājñāhāriṇaḥ sadā |
sadaṃḍo'yaṃ dvijāsmākaṃ sumahānkadanodayaḥ || 37 ||
[Analyze grammar]

dharmasva uvāca |
akasmādāgatā yūyaṃ mahābalaparākramāḥ |
etāvata iyaṃ kena kathaṃ vā durgatiḥ kṛtā || 38 ||
[Analyze grammar]

yamadūtā ūcuḥ |
bhayaṃ muṃca dvijaśreṣṭha vṛttāṃtaṃ sakalaṃ śṛṇu |
yathāsmākamidaṃ duḥkhaṃ babhūvātyaṃtaduḥsaham || 39 ||
[Analyze grammar]

yo'sau vṛṣeṇa śṛṅgābhyāṃ kālakalpo vidāritaḥ |
taṃ netuṃ dharmarājena preritāḥ kiṃkarā vayam || 40 ||
[Analyze grammar]

tenājñaptā vayaṃ sarve samastāyudhapāṇayaḥ |
baddhvā taṃ pāpināṃ śreṣṭhaṃ netumiha samāgatāḥ || 41 ||
[Analyze grammar]

athāsau prāptakālaśca kālakalpo durāśayaḥ |
vṛṣeṇahetubhūtena viṣāṇābhyāṃ vidāritaḥ || 42 ||
[Analyze grammar]

sadayena tathā tatra gaṅgāpānīyasīkaraiḥ |
siktaḥ pātakināṃ śreṣṭho gaṅgānāmāni jalpatā || 43 ||
[Analyze grammar]

gaṅgāmbhaḥ kaṇikāsekairgatakalmaṣamapyamum |
baddhvā pāśairdṛḍhaṃ netumudyamaṃ praticakrire || 44 ||
[Analyze grammar]

netuṃ tamapi deveśaḥ śaraṇāgatapālakaḥ |
svadūtānpreṣayāmāsa mahābalaparākramān || 45 ||
[Analyze grammar]

ke'pi dūtāḥ samāgatya tato nārāyaṇājñayā |
sakopāḥ prāhurityasmānpathi brāhmaṇasattama || 46 ||
[Analyze grammar]

viṣṇudūtā ūcuḥ |
ke bhavaṃto mahātmānaḥ kathamenaṃ mahāśayam |
baddhvā nayatha pāśena yūyaṃ vā kasya kiṃkarāḥ || 47 ||
[Analyze grammar]

vihāyainaṃ mahātmānaṃ palāyadhvaṃ yathāsukham |
na cecchirāṃsi yuṣmākaṃ chetsyāmaścakradhārayā || 48 ||
[Analyze grammar]

teṣāmetāni vākyāni garvitāni dvijottama |
saṃśrutyācyutadūtānāṃ te'smābhiratijalpitāḥ || 49 ||
[Analyze grammar]

daṇḍapāṇervayaṃdūtāḥ sarve prāṇādhipasya vai |
nītvainaṃ pāpināṃ śreṣṭhaṃ prayāmaḥ śamanālayam || 50 ||
[Analyze grammar]

yūyaṃ sarve mahātmānastulasīmālyabhūṣitāḥ |
sphuṭapadmapalāśākṣābalino garuḍadhvajāḥ || 51 ||
[Analyze grammar]

divyāṃbaradharā yūyaṃ mayūragalasuṃdarāḥ |
śaṃkhacakragadāpadmadhāraṇāśca caturbhujāḥ || 52 ||
[Analyze grammar]

ke yūyamīdṛśāḥ sarve sarvalakṣaṇasaṃyutāḥ |
imaṃ pātakināṃ śreṣṭhaṃ kathaṃ vā netumicchatha || 53 ||
[Analyze grammar]

viṣṇudūtā ūcuḥ |
vayaṃ sarve viṣṇudūtāḥ puṇyātmānamimaṃ naram |
netumatra samāyātā vaikuṃṭhaṃ prati saṃprati || 54 ||
[Analyze grammar]

imaṃ śrībhagavadbhaktaṃ svajanaṃ gatakalmaṣam |
muṃcatāśu yamapreṣyā yadi jīvitumicchatha || 55 ||
[Analyze grammar]

bhūyasteṣāmidaṃ vākyaṃ śrutvā sarvagataṃ dvija |
kopādyaduktamasmābhistadākarṇaya kathyate || 56 ||
[Analyze grammar]

ayaṃ pāpī durācāro brahmahatyāsahasrakṛt |
kṛtaghnaścaiva goghnaśca mitraghnaśca durāśayaḥ || 57 ||
[Analyze grammar]

merupramāṇahemāni hṛtāni subahūni ca |
paradārā hṛtā nityamanenātidurātmanā || 58 ||
[Analyze grammar]

koṭikoṭisahasrāṇi jaṃtūnāṃ viṣṇukiṃkarāḥ |
kṛtāśca bahudhā hatyāḥ strīhatyā ca tathaiva ca || 59 ||
[Analyze grammar]

ayaṃ nyāsāpaharaṇaṃ svamātṛgamanaṃ tathā |
gomāṃsabhakṣaṇaṃ caiva cakāra prativāsaram || 60 ||
[Analyze grammar]

parahiṃsākṛtānena dāhaśca paraveśmanaḥ |
sabhāyāṃ paraniṃdā ca vidhavāgarbhapātanam || 61 ||
[Analyze grammar]

gṛhamāyāṃtamatithiṃ dhanalobhena sattama |
ahananniśitaiḥ khaṅgairniśāyāṃ yavanopamaḥ || 62 ||
[Analyze grammar]

etānyanyāni pāpāni mahāntyagaṇitāni ca |
cakāra nīco mūḍho'sau nālpamātraṃ śubhāvaham || 63 ||
[Analyze grammar]

tasmādayaṃ mahāpāpī nīyate yātanāgṛham |
jñeyā hi pāpino daṃḍyā dharmarājasya sattamāḥ || 64 ||
[Analyze grammar]

yūyaṃ vai devadevasya dūtā bhagavato yadi |
tadā kathamimaṃ netuṃ pāpināṃ śreṣṭhamicchatha || 65 ||
[Analyze grammar]

viṣṇudūtā ūcuḥ |
bhavidbhaḥ satyamevoktaṃ ko'pi nāstyatra saṃśayaḥ |
daṇḍyāḥ pātakinaḥ sarve jīvitādhipateḥ sadā || 66 ||
[Analyze grammar]

ayaṃ pāpavinirmukto gaṅgāśīkarasecanāt |
tasmādenaṃ vayaṃ sarve neṣyāmo harimaṃdiram || 67 ||
[Analyze grammar]

tāvattiṣṭhaṃti deheṣu pātakāni śarīriṇām |
gaṅgāmbhaḥ śīkarā yāvanna spṛśaṃti sudurllabham || 68 ||
[Analyze grammar]

caṃdraikakalayā sarvaṃ timiraṃ hanyate yathā |
gaṅgāmbhaḥ śīkareṇāpi pātakaṃ hanyate tathā || 69 ||
[Analyze grammar]

gaṃgānāmāni saṃsmṛtya pāpī mucyeta pātakāt |
sākṣāttatsalilaṃ dṛṣṭvā mucyate'tra kimadbhutam || 70 ||
[Analyze grammar]

śītamapyudakaṃ gāḍgaṃ vahnivatpāpakānane |
yathāgnivatpadmavane śītaṃ toyaṃ ca dāhakṛt || 71 ||
[Analyze grammar]

tasmādayaṃ puṇyakarmā dvitīya iva keśavaḥ |
gacchadhvaṃ śamanapreṣyā yadi kalyāṇamicchata || 72 ||
[Analyze grammar]

teṣāṃ keśavadūtānāṃ śrutvāsmābhiridaṃ vacaḥ |
bhūya eva niruktaṃ yadvihasyoccaiḥ śṛṇuṣva tat || 73 ||
[Analyze grammar]

aho citramaho citramayaṃ kalmaṣamaṃdiraḥ |
gaṅgāmbhaḥ secanādeva vimuktaḥ sarvapātakaiḥ || 74 ||
[Analyze grammar]

svahastopārjitaṃ karma śubhaṃ vā yadi vāśubham |
nābhuktvā mucyate martyaḥ kalpakoṭiśatairapi || 75 ||
[Analyze grammar]

yamājñayā netumimaṃ vayaṃ sarve samāgatāḥ |
kasyāyaṃ vacasāsmābhistyajyate pāpināṃ varaḥ || 76 ||
[Analyze grammar]

viṣṇudūtā ūcuḥ |
yūyaṃ pāpadhiyo nūnaṃ vivekaparivarjitāḥ |
yuṣmābhirjahnukanyāyā na jñāyaṃte yato guṇāḥ || 77 ||
[Analyze grammar]

kāryaṃ vede niṣiddhaṃ yattatpātakamiti smṛtam |
yadvedasaṃmataṃ kāryaṃ tadeva dharmyamucyate || 78 ||
[Analyze grammar]

devo nārāyaṇaḥ sākṣātsvayaṃbhūriti śuśruma |
yathā viṣṇustathā gaṃgā gaṃgaiva sarvapāpahā || 79 ||
[Analyze grammar]

aśubhaṃ vā śubhaṃ karma svahastaracitaṃ hariḥ |
harau prasanne pāpāni kutra tiṣṭhaṃti dehinām || 80 ||
[Analyze grammar]

janmāntarārjitaiḥ pāpairgatā yūyamimāṃ gatim |
adyāpi pāpakarmāṇaḥ kimarthaṃ pāpamicchatha || 81 ||
[Analyze grammar]

gaṅgānindākarā yūyaṃ viṣṇuniṃdākarāstathā |
ato yuṣmānhaniṣyāmaḥ pāpinaścakradhārayā || 82 ||
[Analyze grammar]

ityuktvā viṣṇudūtāste kopādaruṇalocanāḥ |
cakrire samarāraṃbhamasmābhiḥ saha sattama || 83 ||
[Analyze grammar]

jīveśa dūtā hanyaṃtāmiti procuśca te ruṣā |
bhūyobhūyo vadaṃto'smānnijaghnuścakradhārayā || 84 ||
[Analyze grammar]

ityuktvā viṣṇudūtāste saṃgrāmetyaṃtadāruṇāḥ |
sarve śaṃkhānsamādadhmuḥ sahasā hṛṣṭamānasāḥ || 85 ||
[Analyze grammar]

tato'smākaṃ siṃhanādaiḥ payodastanitairiva |
kodaṃḍānāṃ ca vistārairvyāptaṃ vipra jagattrayam || 86 ||
[Analyze grammar]

atha vṛkṣaiḥ śilābhiśca tathā parvatavṛṣṭibhiḥ |
asmābhirviṣṇudūtāste bāṇaiśca vidalīkṛtāḥ || 87 ||
[Analyze grammar]

ṛṣṭibhirbhiṃdipālaiśca bāṇaiśca parighaistathā |
kuṭhāraiśchurikābhiśca daṃḍaiśca śaṃkubhistathā || 88 ||
[Analyze grammar]

khaṅgaiśca śaktibhiścaiva niśitaiśca śilīmukhaiḥ |
gadābhiścakradhārābhirnārācaiśca subhīṣaṇaiḥ || 89 ||
[Analyze grammar]

etairanyaiśca viṣamairastraiste viṣṇukiṃkarāḥ |
nijaghnurbahudhā kopādvajrakalpairmahārṇave || 90 ||
[Analyze grammar]

tadāstrajarjarāḥ sarve vayaṃ bhītyā palāyitāḥ |
nipetuḥ ke'pi saṃgrāme gataprāṇāḥ sahasraśaḥ || 91 ||
[Analyze grammar]

tato'smāṃste samālokya palāyanaparāyaṇān |
mudā kaṃbūnsamādadhmurbalino viṣṇukiṃkarāḥ || 92 ||
[Analyze grammar]

atha cchittvā dvijaśreṣṭha kālakalpasya baṃdhanam |
vimāne taṃ samāropya jagmurbhagavataḥ puram || 93 ||
[Analyze grammar]

gaṅgāśīkarasekasya prabhāvenaiva sattama |
jagāma harisālokyaṃ kālakalpo'ti pātakī || 94 ||
[Analyze grammar]

sthitvā kalpaśataṃ tatra bhuktvā bhogānmanoharān |
jñānamāsādya tatraiva paramaṃ mokṣamāptavān || 95 ||
[Analyze grammar]

gaṅgāprabhāvairasmākametadduḥkhaṃ gataṃ prabho |
gaccha brāhmaṇa bhadraṃ te suprīto nijamaṃdiram || 96 ||
[Analyze grammar]

ityuktvā yamadūtāste yayuryamapuraṃ dvija |
bhūya eva sa dharmasvaḥ prīto gaṅgātaṭaṃ yayau || 97 ||
[Analyze grammar]

gaṃgāyāṃ snānamācarya sarvalokasya mātari |
baddhāñjaliḥ sa viprastāṃ tuṣṭāva parameśvarīm || 98 ||
[Analyze grammar]

dharmasva uvāca |
gaṃge samastajagadaṃba calattaraṃge'nagādicārutaramastakapuṣpamāle |
kaṃsāricārucaraṇadvayareṇuhantri bhaktyā namāmi duritakṣayakāriṇīṃ tvām || 99 ||
[Analyze grammar]

mātaḥ samastasukhade pravare nadīnāṃ vyāsādivipracayagītagaṇe guṇāḍhye |
saṃsārabhairavamahārṇavamadhyanauke vaṃdeta vāṃghriyugalaṃ duritāpahāri || 100 ||
[Analyze grammar]

yasyāstavāṃbukaṇikāmapi jahnukanye saudāsanāmanṛpatirdvijakoṭihatyām |
saṃprāpya muktimagamattrisurairalabhyāṃ tāṃ tvāṃ namāmi śirasā varade prasīda || 101 ||
[Analyze grammar]

nārāyaṇācyutajanārddanakṛṣṇarāma gaṅgādi nāma gadato mama devi mātaḥ |
saṃsārapātakanivāriṇi dehapātastvadvāriṇīha bhavatu tvadanugraheṇa || 2 ||
[Analyze grammar]

kiṃ vā tapobhirakhileśvari kiṃ japairvā dānaiśca kiṃ turagame dyumakhaiśca kiṃvā |
tvannīraśīkaramavāpya surairalabhyāṃ muktiṃ vrajaṃti manujā atipāpino'pi || 3 ||
[Analyze grammar]

svāhā tvameva parameśvari yā svadhā tvaṃ gīrvāṇavṛṃdapitṛlokasutṛptihetoḥ |
satvaṃ rajastama iti triguṇasvarūpāṃ sṛṣṭisthitipralayakāriṇi naumi tāṃ tvām || 4 ||
[Analyze grammar]

dhatte lalāṭaphalake tava saikataṃ yaḥ puṇḍraṃ ca devi tava tīramṛdā sadaivam |
tvannāma sarvarasadhāmavadecca bhaktyā tvatpādareṇurakhilostu mamaiva mūrdhni || 5 ||
[Analyze grammar]

tvadrodhasi tripathage vasatiṃ vidhāya pītvā ca vāri tava pātakanāśakāri |
smṛtvā ca nāma tava vīcirasaṃ ca dṛṣṭvā saṃsārabaṃdhanahare mama jātu janma || 6 ||
[Analyze grammar]

nākaṃ śubhe sumahadullasitā manuṣyāḥ kurvaṃti bhītiratidurgamavartma matvā |
vyartheva sā kila yato'mṛtade tvadīyaṃ sopānabhūtamudakaṃ tridivaprayāṇe || 7 ||
[Analyze grammar]

pāpāni roganikarāśca śarīradehe tiṣṭhaṃti tāvadakhileśvari bhuktidātri |
kurvaṃti yāvadamaleṣu tavodakeṣu snānaṃ na hi tripathage saritāṃ pradhāne || 8 ||
[Analyze grammar]

yasyāstavācyuta viraṃci śivādayo'pi śakrādidevanikarā vrajituṃ mahimnām |
pāraṃ pare paramamokṣapadapradātrīṃ tāṃ tvāṃ vadaṃti taṭinīmitike'pi mohāt || 9 ||
[Analyze grammar]

gaṅge samastasukhadāyini kiṃcideva jānāti te paśupatirbhagavānmahattvam |
yasmādasau sumanasāṃ pravaro'tibhaktyā dhatte sadaiva śirasā jagadīśvarīṃ tvām || 110 ||
[Analyze grammar]

gaṃge devi jaganmātaḥ prasīda parameśvari |
paripāhi namastubhyaṃ rakṣa māṃ sevakaṃ svakam || 11 ||
[Analyze grammar]

parabrahmasvarūpāṃ tvāṃ sarvalokaikamātaram |
śaknomi kimahaṃ stotuṃ bhrāṃtacitto'tra mokṣade || 12 ||
[Analyze grammar]

vyāsa uvāca |
iti stutā jagaddhātrī tena vipreṇa dhīmatā |
āvirbabhūva sahasā gaṅgā mūrtimatī dvija || 13 ||
[Analyze grammar]

dadarśa purato gaṅgāṃ dvibhujāṃ makarāsanām |
kundenduśaṅkhadhavalāṃ sarvālaṅkārabhūṣitām || 14 ||
[Analyze grammar]

tāṃ dṛṣṭvā purato gaṅgāṃ gaṅgāgaṅgeti kīrtayan |
vavaṃde caraṇau tasyāḥ śirasāliṅgya medinīm || 15 ||
[Analyze grammar]

mohayaṃtī smitā lokaiḥ suprītā parameśvarī |
tamuvāca tato vipra varaṃ vṛṇviti jaimine || 16 ||
[Analyze grammar]

dharmasva uvāca |
mātastvatsalilasparśādbrahmahāpi ca mokṣabhāk |
mayā tvaṃ dṛśyate sākṣātsādhyaṃ kimaparaṃ mama || 117 ||
[Analyze grammar]

tathāpyekaṃ varaṃ yāce tvannīre parameśvari |
mṛtyurbhavatu me devi tvannāmasmarato mama || 118 ||
[Analyze grammar]

mayā kṛtena stotreṇa yastvāṃ stauti sadeśvari |
so'pi bhuktvākhilānkāmānaṃte yāsyati sadgatim || 119 ||
[Analyze grammar]

gaṅgovāca |
anayā bhavato bhaktyā saṃtuṣṭāsmi dvijottama |
śīghraṃ te kuśalaṃ sarvaṃ bhaviṣyati na saṃśayaḥ || 120 ||
[Analyze grammar]

tvayā kṛtamidaṃ stotraṃ trisaṃdhyaṃ yaḥ paṭhennaraḥ |
tasyāhamapi saṃtuṣṭā dāsyāmi muktimuttamām || 121 ||
[Analyze grammar]

vyāsa uvāca |
iti datvā varaṃ tasmai sā devī bhaktavatsalā |
dharmasvanāmne viprendra tatraivāṃtaradhīyata || 122 ||
[Analyze grammar]

sa ca vipro varaṃ prāpya kṛtakṛtya ivābhavat |
gaṅgārodhasi tatraiva tasthau vipra manorame || 123 ||
[Analyze grammar]

tataḥ kālena mahatā vimale jāhnavījale |
sukhamṛtyuṃ samāsādya jagāma padamuttamam || 124 ||
[Analyze grammar]

kālakalpo'pi pāpātmā sikto gaṅgāmbuśīkaraiḥ |
prāptavānuttamaṃ mokṣamanyeṣāṃ kā kathā dvija || 125 ||
[Analyze grammar]

anicchayāpi gāṅgeyaṃ jalaṃ spṛṣṭvā phalānvitam |
spṛśatāṃ bhaktibhāvena kiṃ bhavennahi vedmi tat || 126 ||
[Analyze grammar]

gaṅgāsamaṃ nāsti tīrthaṃ bhūyobhūyo mayocyate |
yadambukaṇikāṃ spṛṣṭvā paramaṃ dhāma labhyate || 127 ||
[Analyze grammar]

ye bhaktibhāvena saridvarāyāḥ spṛśaṃti yeṃ'bhakaṇikāmapīha |
te yāṃti nūnaṃ padamacyutasya pāpairvimuktāḥ sakalairmahograiḥ || 128 ||
[Analyze grammar]

iti śrīpadmapurāṇe kriyāyogasāre gaṅgāśīkaramāhātmye saptamo'dhyāyaḥ || 7 ||
[Analyze grammar]