Chapter 127

[English text for this chapter is available]

kārtavīrya uvāca |
hetunā kena viprarṣe māghasnāne mahādbhutaḥ |
prabhāvo varṇyate nūnaṃ tanme kathaya suvrata || 1 ||
[Analyze grammar]

gatapāpo yadekena dvitīyena divaṃ gataḥ |
vaiśyo'sau māghapuṇyena brūhi me tatkutūhalam || 2 ||
[Analyze grammar]

dattātreya uvāca |
nisargātsalilaṃ medhyaṃ nirmalaṃ śucipāṃḍuram |
malahaṃ puruṣavyāghra drāvakaṃ dāhanāśanam |
tārakaṃ sarvabhūtānāṃ poṣaṇaṃ jīvanaṃ ca yat || 3 ||
[Analyze grammar]

āpo nārāyaṇodevaḥ sarvavedeṣu paṭhyate |
grahāṇāṃ ca yathā sūryo nakṣatrāṇāṃ yathā śaśī |
māsānāṃ ca tathā māghaḥ śreṣṭhaḥ sarveṣu karmasu || 4 ||
[Analyze grammar]

makarasthe ravau māghe prātaḥ kāle tathā'male |
goṣpade'pi jale snānaṃ svargadaṃ pāpināmapi || 5 ||
[Analyze grammar]

yogo'yaṃ durlabho rājaṃstrailokye sacarācare |
asminyoge tvaśakto'pi snāyādyadi dinatrayam || 6 ||
[Analyze grammar]

dadyātkiṃcidaśakto'pi daridrābhāvavāṃcchayā |
trisnānenāpi māghasya dhanino dīrghajīvinaḥ || 7 ||
[Analyze grammar]

paṃca vā sapta vāhāni caṃdravadvardhate phalam |
saṃprāpte makarāditye puṇye puṇyaprade nṛṇām || 8 ||
[Analyze grammar]

satkāryāstithayaḥ sarvā snānadānādi karmasu |
kartāraṃ dāpayaṃtīha hyakṣayaṃ śāśvataṃ padam || 9 ||
[Analyze grammar]

tasmānmāghe bahiḥ snāyādātmano hitakāmyayā |
athātaḥ saṃpravakṣyāmi māghasnānavidhiṃ param || 10 ||
[Analyze grammar]

kartavyo niyamaḥ kaścidvratarūpī narottamaiḥ |
phalātiśayahetorvai kiṃcidbhojyaṃ tyajedbudhaḥ || 11 ||
[Analyze grammar]

bhūmau śayīta hotavyamājyaṃ tilavimiśritam |
trikālaṃ cārcayedviṣṇuṃ vāsudevaṃ sanātanam || 12 ||
[Analyze grammar]

dātavyo dīpako'khaṃḍo devamuddiśya mādhavam |
iṃdhanaṃ kaṃbalaṃ vastramupānatkuṃkumaṃ ghṛtam || 13 ||
[Analyze grammar]

tailaṃ kārpāsakoṣṭhaṃ ca tūlīṃ tūlavaṭīṃ paṭīm |
annaṃ caiva yathāśakti deyaṃ māghe narādhipa || 14 ||
[Analyze grammar]

suvarṇaṃ rattikāmātraṃ dadyādvedavide tathā |
taddānamakṣayaṃ rājansamudra iva sarvadā || 15 ||
[Analyze grammar]

parasyāgniṃ na seveta tyajeccaiva pratigraham |
māghāṃte bhojayedviprānyathāśakti narādhipa || 16 ||
[Analyze grammar]

deyā ca dakṣiṇā tebhya ātmanaḥ śreya icchatā |
ekādaśīvidhānena māghasyodyāpanaṃ tathā || 17 ||
[Analyze grammar]

kartavyaṃ śraddadhānena hyakṣayya svargavāṃchayā |
anaṃtapuṇyāvāptyarthaṃ viṣṇusaṃprītihetave || 18 ||
[Analyze grammar]

makarasthe ravau māghe goviṃdācyutamādhava |
snānenānena bho deva yathoktaphalado bhava || 19 ||
[Analyze grammar]

iti maṃtraṃ samuccārya snāyānmaunī samāhitaḥ |
vāsudevaṃ hariṃ kṛṣṇaṃ mādhavaṃ ca smaretpunaḥ || 20 ||
[Analyze grammar]

gṛhe'pi sajalaṃ kuṃbhaṃ vāyunā niśipīḍitam |
tatsnānaṃ tīrthasadṛśaṃ sarvakāmaphalapradam || 21 ||
[Analyze grammar]

tatra vratena dātavyaṃ sānnaṃ copaskarānvitam |
tatsnānasya prabhāveṇa naro na nirayaṃ vrajet || 22 ||
[Analyze grammar]

taptena vāriṇā snānaṃ yadgṛhe kriyate naraiḥ |
ṣaḍabdaphaladaṃ taddhi makarasthe divākare || 23 ||
[Analyze grammar]

bahiḥ snānaṃ tu vāpyādau dvādaśābdaphalaṃ smṛtam |
taḍāge dviguṇaṃ rājannadyāṃ caiva caturguṇam || 24 ||
[Analyze grammar]

śatadhā devakhāteṣu śatadhā tu mahānade |
śataṃ caturguṇaṃ rājanmahānadyāśca saṃgame || 25 ||
[Analyze grammar]

sahasraguṇitaṃ sarvaṃ tatphalaṃ makare ravau |
gaṃgāyāṃ snānamātreṇa labhate mānavo nṛpa || 26 ||
[Analyze grammar]

gaṃgāyāṃ ye'vagāhaṃti māghamāse nṛpottama |
caturyugasahasraṃ tu na pataṃti surālayāt || 27 ||
[Analyze grammar]

dinedine sahasraṃ tu suvarṇānāṃ viśāṃpate |
tena dattaṃ tu gaṃgāyāṃ yo māghe snāti mānavaḥ || 28 ||
[Analyze grammar]

śatena guṇitaṃ māghe sahasraṃ rājasattama |
nirdiṣṭamṛṣibhiḥ snānaṃ gaṃgāyāmunasaṃgame || 29 ||
[Analyze grammar]

pāpaughabhūribhārasya dāhārthe ca prajāpatiḥ |
prayāgaṃ vidadhe bhūpa prajānāṃ ca hite sthitaḥ || 30 ||
[Analyze grammar]

śṛṇu sthānamidaṃ samyaksitāsita jalaṃ kila |
pāparūpa paśūnāṃ ca brahmaṇā vihitaṃ purā || 31 ||
[Analyze grammar]

sitāsitajale majjedapi pāpaśatānvitaḥ |
makarasthe ravau māghe naiva garbheṣu majjati || 32 ||
[Analyze grammar]

sūnārato'pi yo martyaḥ prayāge snānamācaret |
māghemāsi naravyāghra sa yāti paramaṃpadam || 33 ||
[Analyze grammar]

sitāsitā tu yā dhārā sarasvatyāvigarbhitā |
tanmārgaṃ viṣṇulokasya sṛṣṭikartā sasarja vai || 34 ||
[Analyze grammar]

dustarā vaiṣṇavī māyā devairapi sudurjayā |
prayāge dahyate sā tu māghe māsi narādhipa || 35 ||
[Analyze grammar]

tejomayeṣu lokeṣu bhuktvā bhogānanekaśaḥ |
paścāccakriṇi līyaṃte prayāge māgha majjanāt || 36 ||
[Analyze grammar]

upaspṛśati yo māghe makarārke sitāsite |
na tatpuṇyaṃ ca saṃkhyātuṃ citragupto'pi vetyalam || 37 ||
[Analyze grammar]

sannimajjati yo māghe makarastha sitāsite |
tasya puṇyasya māhātmyaṃ vaktuṃ brahmāpi na kṣamaḥ || 38 ||
[Analyze grammar]

saṃvatsaraśataṃ sāgraṃ nirāhārasya yatphalam |
prayāge māghamāse tu tryahasnānasya tatphalam || 39 ||
[Analyze grammar]

svarṇabhārasahasreṇa kurukṣetraravigrahe |
yatphalaṃ labhate māghe veṇyāḥ snānāddine dine || 40 ||
[Analyze grammar]

rājasūyasahasrasya rājannavikalaṃ phalam |
sitāsite tu māghe ca snānānāṃ bhavati dhruvam || 41 ||
[Analyze grammar]

pṛthivyāṃ yāni tīrthāni puryaḥ sapta ca yāḥ punaḥ |
veṇyāṃ snātuṃ samāyāṃti māghemāsi nṛpottama || 42 ||
[Analyze grammar]

sarvatīrthāni kṛṣṇāni pāpināṃ saṃgadoṣataḥ |
bhavaṃti śuklavarṇāni prayāge māghamajjanāt || 43 ||
[Analyze grammar]

ākalpasaṃcitaṃ pāpaṃ janmabhiryannarairnṛpa |
tadbhavedbhasmasānmāghe snātānāṃ ca sitāsite || 44 ||
[Analyze grammar]

vāṅmanaḥkāyajaṃ pāpaṃ narasya vilayaṃ vrajet |
prayāge māghamāse tu tryahasnātasya niścitam || 45 ||
[Analyze grammar]

prayāge māghamāse yastryahaṃ snāti ca mānavaḥ |
pāpaṃ tyaktvā divaṃ yāti jīrṇāṃ tvacamivoragaḥ || 46 ||
[Analyze grammar]

kurukṣetrasamā gaṃgā yatrakutrāvagāhitā |
tasmāddaśaguṇā puṇyā yatra viṃdhyena saṃgatā || 47 ||
[Analyze grammar]

tasmācchataguṇā gaṃgā kāśyāmuttaravāhinī |
kāśyāḥ śataguṇāḥ proktā gaṃgāyāmunasaṃgame || 48 ||
[Analyze grammar]

sā sahasraguṇā tāsāṃ bhavetpaścimavāhinī |
yā rājandarśanādeva brahmahatyāpahāriṇī || 49 ||
[Analyze grammar]

yā paścādvāhinī gaṃgā kāliṃdyā saha saṃgatā |
haṃti koṭikṛtaṃ pāpaṃ sā māghe nṛpa durlabhā || 50 ||
[Analyze grammar]

yatkathyate'mṛtaṃ rājansā veṇī bhuvi kīrtitā |
tasyāṃ māghe muhūrtaṃ tu devānāmapi durlabham || 51 ||
[Analyze grammar]

brahmāviṣṇurmahādevo rudrādityamarudgaṇāḥ |
gaṃdharvā lokapālāśca yakṣakinnarapannagāḥ || 52 ||
[Analyze grammar]

aṇimādiguṇaiḥ siddhā ye cānye tattvavādinaḥ |
brahmāṇī pārvatī lakṣmīḥ śacī menāditirditiḥ || 53 ||
[Analyze grammar]

sarvāstā devapatnyaśca tathā nāgāṃganā nṛpa |
ghṛtācī menakā raṃbhā urvaśī ca tilottamā || 54 ||
[Analyze grammar]

gaṇā hyapsarasāṃ sarve pitṝṇāṃ ca gaṇāstathā |
snātumāyāṃti te sarve māghe veṇyāṃ narādhipa || 55 ||
[Analyze grammar]

kṛte yuge svarūpeṇa kalau pracchannarūpiṇaḥ |
prayāge māghamāse tu tryahasnānasya yatphalam || 56 ||
[Analyze grammar]

nāśvamedhasahasreṇa tatphalaṃ labhate bhuvi |
tryahasnānaphalaṃ māghe purā kāṃcanamālinī || 57 ||
[Analyze grammar]

rākṣasāya dadau bhūpa tena muktaḥ sa pāpakṛt |
kārtavīrya uvāca |
bhagavanrākṣasaḥ ko'sau sā kā kāṃcanamālinī || 58 ||
[Analyze grammar]

kathaṃ dattavatī dharmaṃ kathaṃ vā tasya sadgatiḥ |
etatkathaya yogīṃdra atrisaṃtānabhāskara |
yadi tvaṃ manyase śrāvyaṃ paraṃ kautūhalaṃ hi me || 59 ||
[Analyze grammar]

dattātreya uvāca |
śṛṇu rājanvicitraṃ tvamitihāsaṃ purātanam |
yasya smaraṇamātreṇa vājapeyaphalaṃ labhet || 60 ||
[Analyze grammar]

apsarārūpasaṃpannā nāmnā kāṃcanamālinī |
prayāge māghamāse sā snātvā yāti harālayam || 61 ||
[Analyze grammar]

nikuṃje girirājasya tiṣṭhatā girirūpiṇā |
dṛṣṭā gaganamārūḍhā tena vṛddhena rakṣasā || 62 ||
[Analyze grammar]

tejasvinī suhemābhā suśroṇī dīrghalocanā |
caṃdrānanā sukeśī ca pīnonnatapayodharā || 63 ||
[Analyze grammar]

tāṃ dṛṣṭvā rūpasaṃpannāmuvāca rākṣasastadā |
kā tvaṃ kamalapatrākṣi kuta āgamyate tvayā || 64 ||
[Analyze grammar]

ārdraṃ ca vasanaṃ kasmātsārdrā te kabarī kutaḥ |
kutra āgamyate bhīru kutaste khecarī gatiḥ || 65 ||
[Analyze grammar]

kena puṇyena vā bhadre tava tejomayaṃ vapuḥ |
atīvarūpasaṃpannaṃ saṃbhūtaṃ ca manoharam || 66 ||
[Analyze grammar]

tvadvastrabiṃdupātena mama mūrdhni sulocane |
kṣaṇena hyagamacchāṃtiṃ krūraṃ me mānasaṃ sadā || 67 ||
[Analyze grammar]

nīrasya mahimā ko'yametadvyākhyātumarhasi |
tvaṃ me śīlavatī bhāsi nākṛtirnirguṇā bhavet || 68 ||
[Analyze grammar]

apsarā uvāca |
śrūyatāmapsarāścāhaṃ bho rakṣaḥ kāmarūpiṇī |
prayāgataścāgatā'haṃ nāmnā kāṃcanamālinī || 69 ||
[Analyze grammar]

ārdraḥ parikarome'taḥ susnātā'haṃ sitāsite |
gaṃtavyaṃ tu mayā rakṣaḥ kailāse tu nagottame || 70 ||
[Analyze grammar]

tatrāste pārvatīnāthaḥ surāsurasupūjitaḥ |
veṇīvāriprabhāveṇa rakṣaste krūratā gatā || 71 ||
[Analyze grammar]

jātāhaṃ yena puṇyena gaṃdharvasya sumedhasaḥ |
kanyakā divyarūpā tu tatsarvaṃ kathayāmi te || 72 ||
[Analyze grammar]

kaliṃgādhipate rājñastvahamāsīcca veśyakā |
rūpalāvaṇyasaṃpannā saubhāgyamadagarvitā || 73 ||
[Analyze grammar]

anyāsāṃ yuvatīnāṃ ca tatpure'haṃ śiromaṇiḥ |
tajjanmani mayā rakṣo bhuktvā bhogānyathecchayā || 74 ||
[Analyze grammar]

mohitaṃ tatpuraṃ sarvaṃ mayā yauvanasaṃpadā |
ratnāni ca vicitrāṇi bhūṣaṇāni dhanāni ca || 75 ||
[Analyze grammar]

vāsāṃsi citrarūpāṇi karpūrāgurucaṃdanam |
etaccopārjitaṃ sarvaṃ mayā mohanarūpayā || 76 ||
[Analyze grammar]

nāhaṃ jānāmi hemnoṃtaṃ svanivāse niśācara |
saṃsevaṃte yuvāno me caraṇau kāmapīḍitāḥ || 77 ||
[Analyze grammar]

mayā te vaṃcitāḥ sarve sarvasvena tu māyayā |
anyonyaspardhābhāvena mṛtāḥ kecittu kāminaḥ || 78 ||
[Analyze grammar]

itthaṃ tannagare ramye sakale me gatistadā |
prāpte tu vārddhake kāle śuśoca hṛdayaṃ mama |
na dattaṃ na hutaṃ japtaṃ na vrataṃ caritaṃ mayā || 79 ||
[Analyze grammar]

nārādhito mayā devaścaturvargaphalapradaḥ |
na mayā pūjitā devī durgā durgatināśinī |
sarvapāpaharo viṣṇurna smṛto bhogalubdhayā || 80 ||
[Analyze grammar]

na ca saṃtarpitā viprā na kṛtaṃ prāṇināṃ hitam |
aṇumātramidaṃ puṇyaṃ na kṛtaṃ ca pramādataḥ || 81 ||
[Analyze grammar]

pātakaṃ tu kṛtaṃ bhadra tena me dahyate manaḥ |
bahudhaivaṃ vilapyāhaṃ brāhmaṇaṃ śaraṇaṃ gatā || 82 ||
[Analyze grammar]

brahmaṇyaṃ vedavidvāṃsaṃ tasya rājñaḥ purohitam |
sa hi pṛṣṭo mayā rakṣaḥ kathaṃ me niṣkṛtirbhavet || 83 ||
[Analyze grammar]

pāpasyāsya dvijaśreṣṭha kathaṃ yāsyāmi sadgatim |
svenaiva karmaṇā taptāṃ varākīṃ dīnamānasām || 84 ||
[Analyze grammar]

pāpapaṃkanimagnāṃ tvaṃ māmuddhara kacagrahaiḥ |
mayi kāruṇyaṃjaṃ vāri varṣaharṣadṛśā dvija || 85 ||
[Analyze grammar]

sajjane sādhavaḥ sarve sādhuḥ sādhurasajjane |
ityasau madvacaḥ śrutvā cakārānugrahaṃ mayi || 86 ||
[Analyze grammar]

dvija uvāca |
niṣiddhācaraṇaṃ jāne sarvaṃ te'haṃ varānane |
kuru me satvaraṃ vākyaṃ yāhi kṣetraṃ prajāpate || 87 ||
[Analyze grammar]

tatra gatvā kuru snānaṃ tena pāpakṣayastava |
sarvaṃ manogataṃ bhadre tvadīyaṃ śocitaṃ mayā || 88 ||
[Analyze grammar]

nāhamanyatprapaśyāmi yatte pāpapraṇāśanam |
prāyaścittaṃ paraṃ tīrthe snānaṃ ca ṛṣibhiḥ smṛtam || 89 ||
[Analyze grammar]

kiṃtu tīrthe tyajedbhīru manasāpyaśubhaṃ kṛtam |
prayāgasnānaśuddhā tvaṃ svargaṃ yāsyasi niścitam || 90 ||
[Analyze grammar]

prayāgasnānamātreṇa nṛṇāṃ svargo na saṃśayaḥ |
anyadeśakṛtaṃ pāpaṃ tatkṣaṇādeva bhāmini || 91 ||
[Analyze grammar]

prayāge vilayaṃ yāti pāpaṃ tīrthakṛtaṃ vinā |
śṛṇu bhīru purā śakro gautamasya munervadhūm || 92 ||
[Analyze grammar]

dṛṣṭvā kāmavaśaṃ prāptastāṃ gato guptakāmukaḥ |
ugreṇa tena pāpena tadaiva janitaṃ phalam || 93 ||
[Analyze grammar]

ṛṣistrīgaṃturiṃdrasya tasyāśca puratastadā |
kutsitaṃ garhitaṃ jātamiti lajjākaraṃ vapuḥ || 94 ||
[Analyze grammar]

tadbhartuḥ śāpamāhātmyātsahasrabhagacihnitam |
adhomukhastato bhūtvā devarājo vinirgataḥ || 95 ||
[Analyze grammar]

niniṃda svakṛtaṃ karma so'bhibhūtaḥ salajjitaḥ |
meroḥ śirasi toyāḍhye śatayojanavistṛte || 96 ||
[Analyze grammar]

tatra gatvā praviṣṭastu hemāṃbhoruhakorake |
tatrastho garhayannityamātmānaṃ manmathaṃ tathā || 97 ||
[Analyze grammar]

dhiktāṃ kāmātmatāṃ loke sadyaḥ pātakadāyinīm |
yayā hi narakaṃ yāti sarvalokavigarhitaḥ || 98 ||
[Analyze grammar]

āyuḥ kīrtiryaśodharma dhairya dhvaṃsakarī tathā |
dhiṅmanmathaṃ durācāramāpadāṃ niyataṃ padam || 99 ||
[Analyze grammar]

dehasthaṃ durdamaṃ śatrumasaṃtuṣṭaṃ sadāvaśam |
itthaṃvādini pracchanne vāsave padmasadmani || 100 ||
[Analyze grammar]

ākhaṃḍalaṃ vinā bhīru devaloko na śobhate |
tato devāḥ sagaṃdharvā lokapālāḥ sakinnarāḥ || 101 ||
[Analyze grammar]

śacyā saha samāgamya papracchuste bṛhaspatim |
bhagavanbalabhiddevaṃ naiva jānīmahe vayam || 102 ||
[Analyze grammar]

kva tiṣṭhati gataḥ kutra kutra vā mṛgayāmahe |
na nākaḥ śobhate tena vinā devagaṇaiḥ saha || 103 ||
[Analyze grammar]

suputreṇa vinā yadvatkulaṃ śrīmadguṇānvitam |
upāyaściṃtyatāṃ sadyaḥ svarloke yena śobhate || 104 ||
[Analyze grammar]

sanāthaḥ suśriyāyukto na vilaṃbo'tra yujyate |
iti teṣāṃ vacaḥ śrutvā gururvacanamabravīt || 105 ||
[Analyze grammar]

jāne'haṃ svāparādhena lajjayā yatra tiṣṭhati |
rabhasā labdhakāryasya bhuṃkte sa maghavā phalam || 106 ||
[Analyze grammar]

nṛṇāṃ nītiparityāgādvipākāḥ syurbhayaṃkarāḥ |
aho rājyamadairmattaḥ kṛtyākṛtyamaciṃtayan || 107 ||
[Analyze grammar]

kṛtavānniṃdyamānaṃ hi dṛṣṭādṛṣṭakṣayaṃkaram |
kurvaṃti bāliśā yatra daivopahatabuddhayaḥ || 108 ||
[Analyze grammar]

aparādhādyathājanma syādihāmutra niṣphalam |
adhunā tatra gacchāmo yatra śakraḥ sa tiṣṭhati || 109 ||
[Analyze grammar]

ityuktvā nirgatāḥ sarve bṛhaspatipurogamāḥ |
dṛṣṭvā sarasi vistīrṇe svarṇapaṃkajakānanam || 110 ||
[Analyze grammar]

tuṣṭuvurdevarājānaṃ prabodho yena jāyate |
tato guroḥ prabodhena nirgataḥ padmakuḍmalāt || 111 ||
[Analyze grammar]

dīnānano virūpastu vrīḍākuṃcitalocanaḥ |
jagrāha caraṇāviṃdro gurostasyāgrajanmanaḥ || 112 ||
[Analyze grammar]

trāhi māṃ niṣkṛtiṃ brūhi pāpasyāsya bṛhaspate |
devarājavacaḥ śrutvā jagau vipro bṛhaspatiḥ || 113 ||
[Analyze grammar]

śṛṇu deveṃdra vakṣye'hamupāyaṃ pāpanāśanam |
prayāgasnānamātreṇa tatkṣaṇādeva pātakāt || 114 ||
[Analyze grammar]

mucyase devarājatvaṃ tatra yāmaḥ sahaiva te |
atha purodhasā sārdhamāgatya balamardanaḥ || 115 ||
[Analyze grammar]

sasnau sitāsite tīrthe sadyo mukto hyaghaistataḥ |
atha devagurustasmai prasannastu varaṃ dadau || 116 ||
[Analyze grammar]

prayāgasnānamātreṇa kṣīṇaṃ pāpaṃ tvayānagha |
kṣīṇapāpasya te śakra matprasādena satvaram || 117 ||
[Analyze grammar]

sahasrametadyonīnāṃ sahasraṃ syāddṛśāṃ tava |
tadaiva dvijavākyena śuśubhe ca śacīpatiḥ || 118 ||
[Analyze grammar]

locanānāṃ sahasreṇa paṃkajairiva mānasam |
atha vṛṃdārakaiḥ sarvairṛṣibhiścābhipūjitaḥ || 119 ||
[Analyze grammar]

gaṃdharvaiḥ stūyamānastu gataḥ śakro'marāvatīm |
itthaṃ sadyo vipāpo'bhūtprayāge pākaśāsanaḥ || 120 ||
[Analyze grammar]

yāhi tvamapi kalyāṇi prayāgaṃ devasevitam |
sadyaḥ pāpavināśāya tathā svargataye dṛḍham || 121 ||
[Analyze grammar]

iti tasya vacaḥ śrutvā setihāsaṃ samaṃgalam |
tadaiva saṃbhramāpannā natvā pādau dvijasya tu || 122 ||
[Analyze grammar]

tyaktvā baṃdhujanaṃ sarvaṃ dāsadāsīgṛhaṃ tathā |
sakalānviṣayānrakṣo viṣagrāsāniva sphuṭam || 123 ||
[Analyze grammar]

vapuśca kṣaṇavidhvaṃsi paśyaṃtī nirgatā hyaham |
narakārṇavasaṃpāta dāruṇāṃtara vahninā || 124 ||
[Analyze grammar]

hṛdaye kuṇapavyāghra tadā tattapyamānayā |
mayā gatvā kṛtaṃ snānaṃ māghe māsi sitāsite || 125 ||
[Analyze grammar]

tasya snānasya māhātmyaṃ śṛṇu vṛddhaniśācara |
tryahātpāpakṣayo jātaḥ saptaviṃśatibhirdinaiḥ || 126 ||
[Analyze grammar]

śeṣairme yadabhūtpuṇyaṃ tena devatvamāgatā |
ramamāṇā tu kailāse girijāyāḥ priyā sakhī || 127 ||
[Analyze grammar]

jātismarā tathā jātā prayāgasya prabhāvataḥ |
smṛtvā prayāgamāhātmyaṃ māghe māghe vrajāmyaham || 128 ||
[Analyze grammar]

iti rākṣasa yatpṛṣṭaṃ tvayā vismitacetasā |
tanmayā kathitaṃ sarvaṃ caritaṃ prītaye tava || 129 ||
[Analyze grammar]

matprītaye caritraṃ svaṃ tvaṃ brūhi mama rākṣasa |
karmaṇā kenajāto'si virūpo'tibhayaṃkaraḥ || 130 ||
[Analyze grammar]

śmaśrulo dīrghadaṃṣṭraṃśca kravyādo girigahvare |
rākṣasa uvāca |
iṣṭaṃ dadāti gṛhṇāti guhyaṃ vadati pṛcchati || 131 ||
[Analyze grammar]

prītyā hi sajjano bhadre tacca sarvaṃ tvayi sthitam |
tvayā saṃbhāvito nūnaṃ manye'haṃ vāmalocane || 132 ||
[Analyze grammar]

bhāvinī niṣkṛtiḥ sadyastvayāsya krūrakarmaṇaḥ |
ato vakṣyāmi te bhadre duṣkṛtaṃ yatsvayaṃkṛtam || 133 ||
[Analyze grammar]

nivedya sajjane duḥkhaṃ tataḥ sarvasukhī bhavet |
śṛṇu suśroṇyahaṃ kāśyāṃ bahvṛco vedapāragaḥ || 134 ||
[Analyze grammar]

jātaḥ purā dvijaḥ śreṣṭhaḥ kule mahati nirmale |
rājñāṃ duṣkṛtināṃ bhīru śūdrāṇāṃ ca tathā viśām || 135 ||
[Analyze grammar]

vārāṇasyāṃ kṛto ghoro mayā duṣṭapratigrahaḥ |
bahudhā bahudhā vāraṃ niṣiddhaḥ kutsito bahu || 136 ||
[Analyze grammar]

cāṃḍālasyāpi na tyakto mayā duṣṭapratigrahaḥ |
anyacca pātakaṃ tatra mamābhūnmūḍhacetasaḥ |
tannāsti duṣkṛtaṃ karma mayā yatra na yatkṛtam || 137 ||
[Analyze grammar]

anyacca śrūyatāṃ doṣaḥ kṣetrasya varavarṇini |
avimukte'ṇumātraṃ yattadaghaṃ merutāṃ vrajet |
na dharmastu mayā kaścitsaṃcitastatra janmani || 138 ||
[Analyze grammar]

tato bahutithe kāle mṛtastatraiva śobhane |
avimuktaprabhāveṇa na cāhaṃ narakaṃ gataḥ || 139 ||
[Analyze grammar]

avimukte mṛtaḥ kaścinnarakaṃ neti kilbiṣī |
avimukte kṛtaṃ kiṃcitpāpaṃ vajrī bhaveddṛḍham || 140 ||
[Analyze grammar]

vajralepena pāpena tena me janma rākṣasam |
raudraṃ krūrataraṃ pāpaṃ saṃbhūtaṃ himaparvate || 141 ||
[Analyze grammar]

dvirjāto gṛdhrayonau prāktrirvyāghro dviḥ sarīsṛpaḥ |
ekavāramulūkastu viḍvarāhastataḥ param || 142 ||
[Analyze grammar]

idaṃ tu daśamaṃ janma rākṣasaṃ mama bhāminī |
atītāni sahasrāṇi varṣāṇi mama janmanaḥ || 143 ||
[Analyze grammar]

nāsti me niṣkṛtirbhadre etasmādduḥkhasāgarāt |
atra triyojanaṃ subhrūrnirjaṃtu hi mayā kṛtam || 144 ||
[Analyze grammar]

anāgasāṃ ca bhūtānāṃ bahūnāṃ ca kṛtaḥ kṣayaḥ |
karmaṇā tena me subhrūrdahyate satataṃ manaḥ || 145 ||
[Analyze grammar]

tvaddarśanasudhāsiktaṃ gataṃ śaityaṃ mano mama |
tīrthaṃ phalati kālena sadyaḥ sādhusamāgamaḥ || 146 ||
[Analyze grammar]

ataḥ satsaṃgatiṃ subhrūḥ praśaṃsaṃti manīṣiṇaḥ |
etatte kathitaṃ sarvaṃ svaduḥkhaṃ hṛdgataṃ mayā || 147 ||
[Analyze grammar]

viralaḥ sajjanaḥ subhrūḥ svātmā yasya na khidyate |
jānāsyatrocitaṃ tvaṃ hi kiṃcinno vacmyataḥ param || 148 ||
[Analyze grammar]

asya duḥkhodadheḥ pāraṃ kathaṃ yāmīti ciṃtayan |
sajjanānāṃ samā bhūtiḥ sarveṣāmupajīvanam || 149 ||
[Analyze grammar]

kṣīrārṇavaḥ payo datte haṃsāya na bakāya kim |
dattātreya uvāca |
iti tasya vacaḥ śrutvā dayārdrīkṛtamānasā || 150 ||
[Analyze grammar]

dharmadāne matiṃ kṛtvā jagau kāṃcanamālinī |
kariṣye niṣkṛtiṃ rakṣa idānīṃ khalu mā śucaḥ || 151 ||
[Analyze grammar]

pratijñāṃ tu dṛḍhāṃ kṛtvā yatiṣye tava muktaye |
bahavo hi kṛtā māghā varṣe varṣe yathāvidhi || 152 ||
[Analyze grammar]

śraddhāpūrvaṃ mayā bhadra brahmakṣetre sitāsite |
tāṃ vadāmi tu saṃkhyātiṃ tasya dharmasya rākṣasa || 153 ||
[Analyze grammar]

gūḍho dharmo hi kartavya ityūcurvibudhā janāḥ |
ārte dānaṃ praśaṃsaṃti munayo vedavādinaḥ || 154 ||
[Analyze grammar]

sāgare varṣato bhadra kiṃ meghasya phalaṃ bhavet |
anubhūtaṃ mayā rakṣaḥ svayaṃ tatpuṇyajaṃ phalam || 155 ||
[Analyze grammar]

tattu dāsyāmi te mitra sadyaḥ pāpavināśanam |
niṣpīḍyātha tato vastraṃ jalaṃ kṛtvā karāṃbuje || 156 ||
[Analyze grammar]

dadau sā māghajaṃ puṇyaṃ tasmai vṛddhāya rakṣase |
śṛṇu rājanvicitraṃ hi prabhāvaṃ māghadharmajam || 157 ||
[Analyze grammar]

tadaivaṃ prāpya tatpuṇyaṃ vimuktā rākṣasī tanuḥ |
saṃbhūto devatākārastejo bhāskaravigrahaḥ || 158 ||
[Analyze grammar]

devayānaṃ samārūḍhaḥ saharṣotphullalocanaḥ |
dyotamānastadā vyomni bhāsayanprabhayā diśaḥ || 159 ||
[Analyze grammar]

divyarūpadharo reje dvitīya iva bhāskaraḥ |
tato'bhinaṃdayāmāsa satāṃ kāṃcanamālinīm || 160 ||
[Analyze grammar]

bhadre vettīśvaro devaḥ karmaṇāṃ yaḥ phalapradaḥ |
tattvayopakṛtaṃ sarvaṃ yatra me nāsti niṣkṛtiḥ || 161 ||
[Analyze grammar]

idānīmapi kāruṇyātprasīdānugrahaṃ kuru |
śikṣāṃ vidhehi me devi sarvanītimayīṃ śubhām || 162 ||
[Analyze grammar]

sarvadharmakarīṃ nūnaṃ na kurve pātakaṃ yathā |
tāṃ śrutvā tvadanujñātaḥ paścādyāmi surālayam || 163 ||
[Analyze grammar]

dattātreya uvāca |
etanniśamya tenoktaṃ priyaṃ dharmamayaṃ vacaḥ |
atiprītyābravīddharmaṃ rājankāṃcanamālinī || 164 ||
[Analyze grammar]

dharmaṃ bhajasva satataṃ tyaja bhūtahiṃsāṃ sevasva sādhupuruṣānjahi kāmaśatrum |
anyasya doṣaguṇakīrtanamāśu hitvā satyaṃ vadārcaya hariṃ vraja devalokam || 165 ||
[Analyze grammar]

dehe'sthimāṃsarudhire svamatiṃ tyaja tvaṃ jāyāsutādiṣu sadā mamatāṃ vimuṃca |
paśyāniśaṃ jagadidaṃ kṣaṇabhaṃguraṃ hi vairāgyabhāvarasiko bhava yoganiṣṭhaḥ || 166 ||
[Analyze grammar]

prītyā mayā nigaditaṃ tava dharmamārgaṃ citto nidhehi sakalaṃ bhavaśīlayuktaḥ |
saṃtyajya rākṣasatanuṃ dhṛtadevadeho jyotirmayo vraja yathāsukhamāśu nākam || 167 ||
[Analyze grammar]

śrutvādharmaṃ tato hṛṣṭaḥ saṃtuṣṭo rākṣaso'bravīt |
bhavapramuditā nityaṃ sarvadā śivamastu te || 168 ||
[Analyze grammar]

ācandrārkaṃ ramasva tvaṃ kailāse śivasannidhau |
umayā'khaṃḍitaṃ prema tavāstu varavarṇini || 169 ||
[Analyze grammar]

dharmaniṣṭhā taponiṣṭhā mātastvaṃ bhava sarvadā |
māstu lobhaḥ śarīre te āpannārti sadā hara || 170 ||
[Analyze grammar]

ityuktvā tu praṇamyātha satāṃ kāṃcanamālinīm |
jagāma rākṣasaḥ svargaṃ gaṃdharvairbahubhiḥ stutaḥ || 171 ||
[Analyze grammar]

devakanyāstadāgatya vavarṣuḥ puṣpavṛṣṭibhiḥ |
tasyāḥ kāṃcanamālinyā mūrdhni harṣasamākulāḥ || 172 ||
[Analyze grammar]

tāmāliṃgya tataḥ procuḥ kanyakāstu priyaṃ vacaḥ |
kṛtaṃ bhadre tvayā citraṃ rākṣasasya vimokṣaṇam || 173 ||
[Analyze grammar]

duṣṭasyāsya bhayātkaścidviśatyasminna kānane |
adhunā nirbhayā hyatra vicarāmo yathāsukham || 174 ||
[Analyze grammar]

śrutvā tadvacanaṃ rājaṃstāsāṃ kāṃcanamālinī |
hṛṣṭā tenaiva dānena kṛtakṛtyā tadā satī || 175 ||
[Analyze grammar]

taṃ rākṣasaṃ kāṃcanamālinīvarā gandharvakanyā parimocya satvaram |
krīḍaṃtyamūbhiḥ prayayau harālayaṃ prītyā sapūrṇā ca paropakārayā || 176 ||
[Analyze grammar]

saṃvādamenaṃ varakanyakeritaṃ bhaktyā paraṃ yaḥ śṛṇuyācca mānavaḥ |
na bādhyate jātu sadā sa rākṣasairdharme matistasya bhṛśaṃ hi jāyate || 177 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyā |
muttarakhaṇḍe māghamāsamāhātmye dilīpavasiṣṭhasaṃvāde rākṣasamokṣonāma saptaviṃśatyadhikaśatatamo'dhyāyaḥ || 127 ||
[Analyze grammar]