Chapter 126

[English text for this chapter is available]

vasiṣṭha uvāca |
adhunā māghamāhātmyaṃ pravakṣyāmi nṛpottama |
pṛcchate kārtavīryāya dattātreyeṇa bhāṣitam || 1 ||
[Analyze grammar]

dattātreyaṃ hariṃ sākṣādvasaṃtaṃ sahya parvate |
papraccha taṃ dvijaṃ gatvā rājā māhiṣmatīpatiḥ || 2 ||
[Analyze grammar]

sahasrārjuna uvāca |
bhagavanyogināṃ śreṣṭha sarve dharmāḥ śrutā mayā |
māghasnānaphalaṃ brūhi kṛpayā mama suvrata || 3 ||
[Analyze grammar]

dattātreya uvāca |
śrūyatāṃ nṛpaśārdūla etatpraśnottaraṃ śubham |
brahmaṇoktaṃ purā hyetannāradāya mahātmane || 4 ||
[Analyze grammar]

tatsarvaṃ kathayiṣyāmi māghasnānaphalaṃ mahat |
yathādeśaṃ yathātīrthaṃ yathāvidhi yathākriyam || 5 ||
[Analyze grammar]

asminvai bhārate varṣe karmabhūmau viśeṣataḥ |
amāghasnāyināṃ nṝṇāṃ niṣphalaṃ janmakīrtitam || 6 ||
[Analyze grammar]

asūryaṃ gaganaṃ yadvadacandramuḍumaṃḍalam |
tadvannābhāti satkarma māghasnānaṃ vinā nṛpa || 7 ||
[Analyze grammar]

vratairdānaistapobhiśca na tathā prīyate hariḥ |
māghamajjanamātreṇa yathā prīṇāti keśavaḥ || 8 ||
[Analyze grammar]

na samaṃ vidyate kiṃcittejaḥ saureṇa tejasā |
tadvatsnānena māghasya na samāḥ kratujāḥ kriyāḥ || 9 ||
[Analyze grammar]

prītaye vāsudevasya sarvapāpāpanuttaye |
māghasnānaṃ prakurvīta svargalābhāya mānavaḥ || 10 ||
[Analyze grammar]

kiṃ rakṣitena dehena supuṣṭena balīyasā |
adhruveṇāpyaśucinā māghasnānaṃ vinā bhavet || 11 ||
[Analyze grammar]

asthistaṃbhaṃ snāyubaddhaṃ māṃsakṣataja lepanam |
carmāvanaddhaṃ durgaṃdhaṃ pātraṃ mūtrapurīṣayoḥ || 12 ||
[Analyze grammar]

jarāśokavipadvyāptaṃ rogamaṃdiramāturam |
rajasvalamanityaṃ ca sarvadoṣasamāśrayam || 13 ||
[Analyze grammar]

paropatāpitāpārtaṃ paradrohi paraṃ viṣam |
lolupaṃ piśunaṃ krūraṃ kṛtaghnaṃ kṣaṇikaṃ tathā || 14 ||
[Analyze grammar]

duṣpūraṃ durdharaṃ duṣṭaṃ doṣatrayasamanvitam |
aśucisrāvi sacchidraṃ tāpatrayavimohitam || 15 ||
[Analyze grammar]

nisargato'dharmarataṃ tṛṣṇāśata samākulam |
kāmakrodha mahālobha narakadvāra saṃsthitam || 16 ||
[Analyze grammar]

krimiviḍbhasmabhavati pariṇāme śunāṃ haviḥ |
īdṛkśarīraṃ vyarthaṃ hi māghasnānavivarjitam || 17 ||
[Analyze grammar]

budbudāiva toyeṣu pūtikā iva jaṃtuṣu |
jāyaṃte maraṇāyaiva māghasnānavivarjitāḥ || 18 ||
[Analyze grammar]

avaiṣṇavo hato vipro hataṃ śrāddhamayogi ca |
abrahmaṇyaṃ hataṃ kṣetramanācāraṃ hataṃ kulam || 19 ||
[Analyze grammar]

sadaṃbhaśca hato dharmaḥ krodhenaiva hataṃ tapaḥ |
adṛḍhaṃ ca hataṃ jñānaṃ pramādena hataṃ śrutam || 20 ||
[Analyze grammar]

gurvabhaktā hatā nārī brahmacārī tayā hataḥ |
adīpte'gnau hato homo hatā bhuṃktirasākṣikā || 21 ||
[Analyze grammar]

upajīvyā hatā kanyā svārthe pākakriyā hatā |
śūdrabhikṣo hato yāgaḥ kṛpaṇasya hataṃ dhanam || 22 ||
[Analyze grammar]

anabhyāsā hatā vidyā hato rājā virodhakṛt |
jīvanārthaṃ hataṃ tīrthaṃ jīvanārthaṃ hataṃ vratam || 23 ||
[Analyze grammar]

asatyā ca hatā vāṇī tathā paiśunyavādinī |
saṃdigdhaśca hato maṃtro vyagracitto hato japaḥ || 24 ||
[Analyze grammar]

hatamaśrotriye dānaṃ hato lokaśca nāstikaḥ |
aśraddhayā hataṃ sarvaṃ kṛtaṃ yatpāralaukikam || 25 ||
[Analyze grammar]

ihaloko hato nṝṇāṃ daridrāṇāṃ yathā nṛpa |
manuṣyāṇāṃ tathā janma māghasnānaṃ vinā hatam || 26 ||
[Analyze grammar]

makarasthe ravau yo hi na snātyanudite ravau |
kathaṃ pāpaiḥ pramucyeta kathaṃ sa tridivaṃ vrajet || 27 ||
[Analyze grammar]

brahmahā hemahārī ca surāpo gurutalpagaḥ |
māghasnāyī vipāpaḥ syāttatsaṃsargī ca paṃcamaḥ || 28 ||
[Analyze grammar]

māghamāse raṭaṃtyāpaḥ kiṃcidabhyudite ravau |
brahmaghnaṃ vā surāpaṃ vā kaṃpaṃtaṃ taṃ punīmahe || 29 ||
[Analyze grammar]

upapāpāni sarvāṇi pātakāni mahāṃtyapi |
bhasmībhavaṃti sarvāṇi māghasnānodyataṃ naram || 30 ||
[Analyze grammar]

kaṃpaṃti sarvapāpāni māghasnānasamāgame |
nāśakālo'yamasmākaṃ yadi snāsyati vāriṇi || 31 ||
[Analyze grammar]

evaṃ krośaṃti pāpāni dṛṣṭvā snānodyataṃ naram |
pāvakā iva dīpyaṃte māghasnānairnarottamāḥ || 32 ||
[Analyze grammar]

vimuktāḥ sarvapāpebhyo meghebhya iva caṃdramāḥ |
ārdraśuṣkaṃ laghusthūlaṃ vāṅmanaḥ karmabhiḥ kṛtam || 33 ||
[Analyze grammar]

māghasnānaṃ dahetpāpaṃ pāvakaḥ samidho yathā |
prāmādikaṃ ca yatpāpaṃ jñānājñānakṛtaṃ ca yat || 34 ||
[Analyze grammar]

snānamātreṇa tannaśyenmakarasthe divākare |
niṣpāpāstridivaṃ yāṃti pāpiṣṭhā yāṃti śuddhatām || 35 ||
[Analyze grammar]

saṃdeho nātra kartavyo māghasnāne narādhipa |
sarve'dhikāriṇo māghe viṣṇubhaktau yathā nṛpa || 36 ||
[Analyze grammar]

sarveṣāṃ svargado māghaḥ sarveṣāṃ pāpanāśanaḥ |
eṣa eva paro maṃtro hyetadeva paraṃ tapaḥ || 37 ||
[Analyze grammar]

prāyaścittaṃ paraṃ caitanmāghasnānamanuttamam |
nṛṇāṃ janmāṃtarābhyāsānmāghasnāne matirbhavet || 38 ||
[Analyze grammar]

adhyātmajñānakauśalyaṃ janmābhyāsādyathā nṛpa |
saṃsārakardamālepa prakṣālana viśāradam || 39 ||
[Analyze grammar]

pāvanaṃ pāvanānāṃ ca māghasnānaparaṃ nṛpa |
snāṃti māghe na ye rājansarvakāmaphalaprade || 40 ||
[Analyze grammar]

kathaṃ te bhuṃjate bhogāṃścaṃdrasūryagrahopamān |
śṛṇu rājanmahāścaryaṃ māghasnānaprabhāvajam || 41 ||
[Analyze grammar]

kubjikā nāma kalyāṇī brāhmaṇī bhṛguvaṃśajā |
bālavaidhavyaduḥkhārtā tapastepe sudustaram || 42 ||
[Analyze grammar]

viṃdhyapāde mahākṣetre revākapilasaṃgame |
tatra sā vratinī bhūtvā nārāyaṇaparāyaṇā || 43 ||
[Analyze grammar]

sadācāravatī nityaṃ nityaṃ saṃgavivarjitā |
jiteṃdriyā jitakrodhā satyavāgalpabhāṣiṇī || 44 ||
[Analyze grammar]

suśīlā dānaśīlā ca dehaśoṣaṇaśālinī |
pitṛdevadvijebhyaśca datvā huttvā tathānale || 45 ||
[Analyze grammar]

ṣaṣṭhe kāle ca sā bhuṅkte hyuṃcchavṛttiḥ sadā nṛpa |
kṛcchrātikṛcchra pārāka taptakṛcchrādibhirvrataiḥ || 46 ||
[Analyze grammar]

puṇyānnayati sā māsānnarmadāyāśca rodhasi |
evaṃ tayā tapasvinyā valkalinyā suśīlayā || 47 ||
[Analyze grammar]

sumahāsattvaśālinyā dhṛti saṃtoṣayuktayā |
ṣaṣṭirmāghāstayā snātā revākapilasaṃgame || 48 ||
[Analyze grammar]

tataḥ sā tapasā kṣīṇā tasmiṃstīrthe mṛtā nṛpa |
māghasnānajapuṇyena tena sā vaiṣṇave pure || 49 ||
[Analyze grammar]

uvāsa pramudā yuktā caturyugasahasrakam |
suṃdopasuṃdanāśāya paścātpadmabhavātpunaḥ || 50 ||
[Analyze grammar]

tilottameti nāmnā sā brahmaloke'vatāritā |
tena puṇyasyaśeṣeṇa rūpasyaikāyanaṃ yayau || 51 ||
[Analyze grammar]

ayonijābalāratnaṃ devānāmapi mohinī |
lāvaṇyahṛdanī tanvī sābhūdapsarasāṃ varā || 52 ||
[Analyze grammar]

nipuṇasya vidheḥ sraṣṭurnūnamāścaryakāriṇī |
tāmutpādya vidhātā vai tuṣṭo'nujñāṃ tadā dadau || 53 ||
[Analyze grammar]

eṇaśāvākṣi gaccha tvaṃ daityanāśāya satvaram |
tataḥ sā brahmaṇo lokādvīṇāmādāya bhāminī || 54 ||
[Analyze grammar]

gatā puṣkaramārgeṇa yatra tau devavairiṇau |
tatra snātvā tu revāyāḥ pavitre nirmale jale || 55 ||
[Analyze grammar]

paridhāyāṃbaraṃ raktaṃ baṃdhūkakusumaprabham |
raṇadvalayinīcāru siṃjanmekhalanūpurā || 56 ||
[Analyze grammar]

lolamuktāvalīkaṃṭhī calatkuṃḍalaśobhanā |
mādhavī kusumāpīḍā kaṃkelī viṭape sthitā || 57 ||
[Analyze grammar]

gāyaṃtī susvaraṃ sāpi pīḍayaṃtī tu vallakīm |
mūrcchayaṃtī svaraṣaṭkaṃ susnigdhaṃ komalaṃ kalam || 58 ||
[Analyze grammar]

itthaṃ tilottamā bālā tiṣṭhaṃtyaśokakānane |
dṛṣṭvā daityabhaṭairiṃdoḥ kaleva sukhadā hṛdi || 59 ||
[Analyze grammar]

tāṃ dṛṣṭvā vismitai rājansānaṃdaiḥ sainikairbhṛśam |
tvaramāṇairadṛṣṭvaiva gatvā suṃdopasuṃdayoḥ || 60 ||
[Analyze grammar]

kathitā saṃbhrameṇaiva varṇayitvā punaḥ punaḥ |
he daityau na vijānīmo devī vā dānavī nu kim || 61 ||
[Analyze grammar]

nāgāṃganātha vā yakṣī strīratnaṃ sarvathā tu sā |
yuvāṃ ratnabhujau loke ratnabhūtā hi sābalā || 62 ||
[Analyze grammar]

vartate nāti dūre'gre aśoke śokahāriṇī |
gatvā tāṃ paśyataṃ śīghraṃ manmathasyāpi mohinīm || 63 ||
[Analyze grammar]

iti senāpatīnāṃ tau śrutvā vācaṃ manoharām |
caṣakaṃ sīdhunastyaktvā vihāya jalasecanam || 64 ||
[Analyze grammar]

uttamastrīsahasrāṇi tyaktvā tasmājjalāśayāt |
śatabhārāyasīṃ krūrāṃ kāladaṃḍopamāṃ gadām || 65 ||
[Analyze grammar]

bhinnābhinnāṃ gṛhītvā tu javenābhiplutaṃ gatau |
yatra śṛṃgārasajjā sā haṃtuṃ caṃḍīva saṃsthitā || 66 ||
[Analyze grammar]

rājansaṃdhukṣayaṃtīva daityayormanmathānalam |
sthitvā tasyāḥ puro jālmau tadrūpeṇavimohitau || 67 ||
[Analyze grammar]

viśeṣānmadhunāmattāvūcatustauparasparam |
bhrātarvirama bhāryeyaṃ mamāstu varavarṇinī || 68 ||
[Analyze grammar]

tvamevārya tyajaitāṃ me bhāryāṃ tu madirekṣaṇām |
ityāgraheṇa saṃrabdhau mātaṃgāviva sonmadau || 69 ||
[Analyze grammar]

anyonyaṃ kālanirdiṣṭau gadayā jaghnatustadā |
parasparaprahāreṇa gatāsū patitau bhuvi || 70 ||
[Analyze grammar]

tau mṛtau sainikairdṛṣṭvā kṛtaḥ kolāhalo mahān |
kālarātrisamā keyaṃ hā kimetadupasthitam || 71 ||
[Analyze grammar]

evaṃ vadatsu sainyeṣu daityau suṃdopasuṃdakau |
pātayitvā gireḥ śṛṃge hrādinīva ttilottamā || 72 ||
[Analyze grammar]

prasthitā gaganaṃ śīghraṃ dyotayaṃtī diśo daśa |
devakāryaṃ tataḥ kṛtvā āgatā brahmaṇaḥ puraḥ || 73 ||
[Analyze grammar]

tatastuṣṭena devena vidhinā sānumoditā |
sthānaṃ sūryarathe dattaṃ tava caṃdrānane mayā || 74 ||
[Analyze grammar]

bhuṃkṣva bhogānanekāṃstvaṃ yāvatsūryoṃbare sthitaḥ |
itthaṃ sā brāhmaṇī rājanbhūtvā cāpsarasāṃ varā || 75 ||
[Analyze grammar]

bhuṃktedyāpi raverloke māghasnānaphalaṃ mahat |
tasmātprayatnato rājanśraddadhānaiḥ sadā naraiḥ || 76 ||
[Analyze grammar]

snātavyaṃ makarāditye vāṃcchadbhiḥ paramāṃ gatim |
nānavāpto'tra tasyāsti puruṣārtho hi kaścana || 77 ||
[Analyze grammar]

nākṣīṇaṃ pātakaṃ kaṃcinmāghe majjati yo naraḥ |
tulayaṃti na tenātra yajñāḥ sarve sadakṣiṇāḥ || 78 ||
[Analyze grammar]

māghasnānena rājeṃdra tīrthe caiva viśeṣataḥ |
na cānyatsvargadaṃ karma na cānyatpāpanāśanam || 79 ||
[Analyze grammar]

na cānyanmokṣadaṃ yasmānmāghasnānasamaṃ bhuvi || 80 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe māghamāhātmye vasiṣṭhadilīpasaṃvāde māghasnānapraśaṃsāyāṃ suṃdopasuṃdadaityavadhonāma ṣaḍviṃśatyadhikaśatatamodhyāyaḥ || 126 ||
[Analyze grammar]