Chapter 48

[English text for this chapter is available]

brahmovāca |
ataḥ paraṃ tu viprarṣe cāṃḍālapatito dvijaḥ |
pralapya ca bahūnśokānjagāma kaśyapaṃ munim || 1 ||
[Analyze grammar]

gatvovāca muniśreṣṭha vadāsmākaṃ hitaṃ vacaḥ |
yathā pāpādvimucyehaṃ muniśreṣṭha tathā kuru || 2 ||
[Analyze grammar]

tamuvāca mahātejā īṣaddhāsyaḥ samaṃtataḥ |
kaśyapa uvāca |
saṃdarśanācca mlecchānāmupaśāṃtosi vai svayam || 3 ||
[Analyze grammar]

gāyatryāśca japairhomairvrataiścāṃdrāyaṇadibhiḥ |
smara nityaṃ hareḥ pādamupoṣya harivāsaram || 4 ||
[Analyze grammar]

aharniśaṃ harerdhyānaṃ praṇāmaṃ kuru taṃ prabhum |
tīrthasnānena maṃtreṇa paṃkasyāṃtaṃ gamiṣyasi || 5 ||
[Analyze grammar]

tataḥ pāpakṣayādeva brāhmaṇatvaṃ ca lapsyase |
vratairvṛṣādhikairmokṣaṃ nāśayankalmaṣaṃ dvija || 6 ||
[Analyze grammar]

munestasya vacaḥ śrutvā kṛtakṛtyo'bhavattadā |
puṇyaṃ sa vividhaṃ kṛtvāpunarbrahmatvamāptavān || 7 ||
[Analyze grammar]

tatastaptvā tapastīvraṃsvarlokaṃ ciramabhyagāt |
sadvṛttasyākhilaṃ pāpaṃ kṣayaṃ yāti dine dine || 8 ||
[Analyze grammar]

asadvṛttasya puṇyaṃ hi kṣayaṃ yātyaṃjanopamam |
anācārāddhato vipra ācārātsuratāṃ vrajet || 9 ||
[Analyze grammar]

tataḥ kaṃṭhagataiḥ prāṇairācāraṃ kurute dvijaḥ |
karmaṇā manasāṃgena sadācāraṃ sadā kuru || 10 ||
[Analyze grammar]

kaśyapasyopadeśena sa vinīto'bhavaddvijaḥ |
ācāraṃ tu punaḥ kṛtvā tapastaptatvā divaṃ gataḥ || 11 ||
[Analyze grammar]

anācārī hato vipraḥ svargalokeṣu garhitaḥ |
ācāraṃ tu punaḥ kṛtvā suraloke mahīyate || 12 ||
[Analyze grammar]

nārada uvāca |
prāpnuvaṃti gatiṃ lokāḥ pūjayitvā dvijottamān |
dvijānāṃ pīḍanaṃ kṛtvā gatiṃ gacchati kāṃ prabho || 13 ||
[Analyze grammar]

brahmovāca |
kṣudhā saṃtaptadehānāṃ brāhmaṇānāṃ mahātmanām |
nārcayecchaktito bhaktyā sa yāti narakaṃ naraḥ || 14 ||
[Analyze grammar]

paruṣeṇa krośayitvā krodhādyastu visarjayet |
sa yāti narakaṃ ghoraṃ mahārauravakṛcchrakam || 15 ||
[Analyze grammar]

sannivṛttastataḥ kīṭādyantyajātiṣu jāyate |
tato rogī daridrastu kṣudhayā paripīḍitaḥ || 16 ||
[Analyze grammar]

nāvamanyettato vipraṃ kṣudhayā gṛhamāgatam |
na dadāmīti yo brūyāddevāgnibrāhmaṇeṣu saḥ || 17 ||
[Analyze grammar]

tiryagyoniśataṃ gatvā cāṃḍālyamupagacchati |
pādamudyamya yo vipraṃ haṃti gāṃ pitarau gurum || 18 ||
[Analyze grammar]

raurave niyato vāsastasya nāstīha niṣkṛtiḥ |
yadi puṇyādbhavejjanma sa eva paṃgutāṃ vrajet || 19 ||
[Analyze grammar]

atidīno viṣādī ca duḥkhaśokābhipīḍitaḥ |
evaṃ janmatrayaṃ prāpya bhavettasya ca niṣkṛtiḥ || 20 ||
[Analyze grammar]

muṣṭicapeṭakīlaiśca hanyādvipraṃ tu yaḥ pumān |
tāpane raurave ghore kalpāṃtaṃ sopi tiṣṭhati || 21 ||
[Analyze grammar]

atha janma samāsādya kukkuraḥ krūracaṃḍakaḥ |
aṃtyajātiṣu jātopi daridraḥ kukṣiśūlavān || 22 ||
[Analyze grammar]

pādamudyacchate vā yastasya pāde śilīpadaḥ |
khaṃjo vā maṃdajaṃgho vā khaṇḍapādo bhavennaraḥ || 23 ||
[Analyze grammar]

pakṣavātena cāṃgāni prakaṃpaṃte sadaiva hi |
mātaraṃ pitaraṃ vipraṃ snātakaṃ ca tapasvinam || 24 ||
[Analyze grammar]

hatvā gurugaṇaṃ krodhātkuṃbhīpāke ciraṃ bhavet |
uṣitvā caiva jāyeta kīṭajātiṣu tatparam || 25 ||
[Analyze grammar]

viruddhaṃ paruṣaṃ vākyaṃ yo vadeddhi dvijātiṣu |
aṣṭau kuṣṭhāḥ prajāyaṃte tasya dehe dṛḍhaṃ suta || 26 ||
[Analyze grammar]

vicarcikātha dadrūśca maṃḍalaḥ śukti sidhmakau |
kālakuṣṭhastathā śuklastaruṇaścātidāruṇaḥ || 27 ||
[Analyze grammar]

tato bhiṣakprayoge ca pāpātpuṇyaṃ palāyate |
apuṇyājjalarekheva tenaiva nidhanaṃ vrajet || 28 ||
[Analyze grammar]

eṣāṃ madhye mahākuṣṭhāstraya eva prakīrtitāḥ |
kālakuṣṭhastathā śuklastaruṇaścātidāruṇaḥ || 29 ||
[Analyze grammar]

mahāpātakabhāvānāṃ jñānātsaṃsargatopi vā |
atipātakināmeva trayo dehe bhavaṃti vai || 30 ||
[Analyze grammar]

saṃsargātsahasaṃbaṃdhādrogaḥ saṃcarate nṛṇām |
dūrātparityajeddhīraḥ spṛṣṭvā snānaṃ samācaret || 31 ||
[Analyze grammar]

patitaṃ kuṣṭhasaṃyuktaṃ cāṃḍālaṃ ca gavāśinam |
śvānaṃ rajasvalāṃ bhillaṃ spṛṣṭvā snānaṃ samācaret || 32 ||
[Analyze grammar]

duritasyānurūpeṇa dehe kuṣṭhā vyavasthitāḥ |
ihaloke paratraivāpyatra nāsti tu saṃśayaḥ || 33 ||
[Analyze grammar]

nyāyenopārjitāṃ vṛttiṃ brahmasvaṃ harate tu yaḥ |
akṣayaṃ narakaṃ prāpya punarjanma na vidyate || 34 ||
[Analyze grammar]

piśuno yastu viprāṇāṃ raṃdhrānveṣaṇatatparaḥ |
taṃ dṛṣṭvāpyathavā spṛṣṭvā sacelo jalamāviśet || 35 ||
[Analyze grammar]

brahmasvaṃ praṇayādbhuktaṃ dahatyāsaptamaṃ kulam |
vikrameṇa tu bhuṃjāno daśapūrvāndaśāparān || 36 ||
[Analyze grammar]

na viṣaṃ viṣamityāhurbrahmasvaṃ viṣamucyate |
viṣamekākinaṃ haṃti brahmasvaṃ putrapautrakam || 37 ||
[Analyze grammar]

mohācca mātaraṃ gatvā brāhmaṇīṃ ca gurostriyam |
patitvā raurave ghore punarutpattidurlabhaḥ || 38 ||
[Analyze grammar]

pataṃti pitarastasya kuṃbhīpāketha tāpane |
avīcikālasūtre ca mahārauravaraurave || 39 ||
[Analyze grammar]

kadācidapi vā teṣāṃ niṣkṛtiṃ nānumenire |
prāṇaṃ hatvā dvijātīnāṃ svayaṃ yātyapunarbhavam || 40 ||
[Analyze grammar]

pataṃti puruṣāstasya raurave ca sahasraśaḥ |
nārada uvāca |
sarveṣāmeva viprāṇāṃ vadhe ca pātakaṃ samam || 41 ||
[Analyze grammar]

viṣamaṃ vā kutastiṣṭhettattvato vaktumarhasi |
brahmovāca |
hatvā vipraṃ dhruvaṃ putra pātakaṃ yadudāhṛtam || 42 ||
[Analyze grammar]

labhate brahmahā ghoraṃ vaktavyaṃ cāparaṃ śṛṇu |
lakṣakoṭisahasrāṇāṃ brāhmaṇānāṃ vadhaṃ bhajet || 43 ||
[Analyze grammar]

vedaśāstrayutaṃ hatvā śrotriyaṃ vijiteṃdriyam |
vipraṃ ca vaiṣṇavaṃ hatvā tasmāddaśaguṇottaram || 44 ||
[Analyze grammar]

svavaṃśānpātayitvā tu punarjanma na viṃdate |
trivedaṃ snātakaṃ hatvā vadhasyāṃtaṃ na vindate || 45 ||
[Analyze grammar]

śrotriyaṃ ca sadācāraṃ tīrthamaṃtraprapūtakam |
īdṛśaṃ brāhmaṇaṃ hantuḥ pāpasyāṃto na vidyate || 46 ||
[Analyze grammar]

apakāraṃ samuddiśya dvijaḥ prāṇānparityajet |
dṛśyate yena cānyena brahmahā sa bhavennaraḥ || 47 ||
[Analyze grammar]

vacobhiḥ paruṣairvṛttaiḥ pīḍitastāḍito dvijaḥ |
yamuddiśya tyajetprāṇāṃstamāhurbrahmaghātinam || 48 ||
[Analyze grammar]

ṛṣayo munayo devāḥ sarve brahmavidastathā |
deśānāṃ pārthivānāṃ ca sa ca vadhyo bhavediha || 49 ||
[Analyze grammar]

ato brahmavadhaṃ prāpya pitṛbhiḥ saha pacyate |
prāyopaveśakaṃ vipraṃ budhaḥ saṃmānayeddhruvam || 50 ||
[Analyze grammar]

doṣaiścāpi vinirmuktamuddiśya prāṇamutsṛjet |
sa pralipto vadhairghorairna tu yaṃ parikīrtayet || 51 ||
[Analyze grammar]

ātmaghātaṃ drumārohaṃ koṭarai rūpajīvinaṃ |
yaḥ kuryādātmanoghātaṃ svavaṃśe brahmahā bhavet || 52 ||
[Analyze grammar]

bhrūṇaṃ ca ghātayedyastu śiśuṃ vā āturaṃ gurum |
brahmahā svayameva syānna tu yaṃ parikīrtayet || 53 ||
[Analyze grammar]

mārayecca sagotraṃ vā brāhmaṇaṃ brāhmaṇādhamaḥ |
tasyaiva tadbhavetpāpaṃ na tu yaṃ parikīrttayet || 54 ||
[Analyze grammar]

pīḍayitvā dvijaṃ śūdraḥ svakāryaṃ cāpi sādhayet |
tatrāpāpe ca śūdrasya pātakaṃ nānyathā bhavet || 55 ||
[Analyze grammar]

tātkālika vadhaṃ hatvā haṃtāramātatāyinaṃ |
na ca haṃtā ca tatpāpairlipyate dvijasattama || 56 ||
[Analyze grammar]

ātatāyinamāyāṃtamapi vedāṃtagaṃ raṇe |
jighāṃsaṃtaṃ jighāṃsecca na tena brahmahā bhavet || 57 ||
[Analyze grammar]

agnido garadaścaiva dhanahārī ca suptaghaḥ |
kṣetradārāpahārī ca ṣaḍete hyātatāyinaḥ || 58 ||
[Analyze grammar]

khalo rājavadhodyogī pitṝṇāṃ ca vadhe rataḥ |
anuyāyī nṛpo rājñaścatvāraścātatāyinaḥ || 59 ||
[Analyze grammar]

tatkṣaṇānna mṛtaṃ vipraṃ punarhaṃtuṃ na yujyate |
purnahatvā vadhaṃ ghoraṃ jñānātprāpnoti niścitaṃ || 60 ||
[Analyze grammar]

loke viprasamo nāsti pūjanīyo jagadguruḥ |
hatvā taṃ yadbhavetpāpaṃ tatparaṃ ca na vidyate || 61 ||
[Analyze grammar]

devavatpūjanīyosau devāsuragaṇairnaraiḥ |
brāhmaṇasya samo nāsti triṣu lokeṣu niścitaṃ || 62 ||
[Analyze grammar]

nārada uvāca |
kāṃ vṛttiṃ samupāśritya jīvitavyaṃ dvijena hi |
apānena suraśreṣṭha tatvato vaktumarhasi || 63 ||
[Analyze grammar]

brahmovāca |
ayācitā ca yā bhikṣā praśastā sā prakīrtitā |
uñchavṛttistato bhadrā subhadrā sarvavṛttiṣu || 64 ||
[Analyze grammar]

yāmāśritya muniśreṣṭhā gacchaṃti brahmaṇaḥ padam |
dakṣiṇā yajñaśeṣāṇāṃ grāhyā yajñagatena hi || 65 ||
[Analyze grammar]

pāṭhanaṃ yājanaṃ kṛtvā grahītavyaṃ dhanaṃ dvijaiḥ |
pāṭhayitvā paṭhitvā ca kṛtvā svastyayanaṃ śubhaṃ || 66 ||
[Analyze grammar]

brāhmaṇānāmidaṃ jīvyaṃ śiṣṭā vṛttiḥ pratigrahaḥ |
śāstropajīvino dhanyā dhanyā vṛkṣopajīvinaḥ || 67 ||
[Analyze grammar]

dhanyā vṛkṣalatājīvyā vāṭīsasyopajīvinaḥ |
anna jaṃtu vadhe pāpaṃ tasya doṣopaśāṃtaye || 68 ||
[Analyze grammar]

navadhānyāni śastāni viprebhyaḥ saṃpradāpayet |
na cetprāṇivadhe hyatra kṣīyaṃte cāyuṣo dhruvaṃ || 69 ||
[Analyze grammar]

tasmāddadyātsubahūni pitṛdevadvijātiṣu |
abhāvātkṣattriyāvṛttirbrāhmaṇairūpajīvyate || 70 ||
[Analyze grammar]

nyāyayuddheṣu yoddhavyaṃ caredvīravrataṃ śubham |
sa tayā ca dvijo vṛtyā yaddhanaṃ labhate nṛpāt || 71 ||
[Analyze grammar]

pitṛyajñādidāneṣu medhyaṃ taddhanamucyate |
samabhyaseddhanurvidyāṃ vedayuktāṃ sadānaghaḥ || 72 ||
[Analyze grammar]

śaktikuṃtagadākhaḍga parighāṇāṃ samaṃtataḥ |
aśvārohaṃ gajārohamaiṃdrajālamamānakaṃ || 73 ||
[Analyze grammar]

rathabhūmigataṃ yuddhaṃ yuktaṃ sarvatra kārayet |
dvija deva dhruvāṇāṃ ca strīṇāṃ vṛttaṃ tapasvinām || 74 ||
[Analyze grammar]

sādhu sādhvī gurūṇāṃ ca nṛpāṇāṃ rakṣaṇāddhruvam |
yatpuṇyaṃ labhyate śūraiḥ kathaṃ tadbrahmavādibhiḥ || 75 ||
[Analyze grammar]

sarvapāpakṣayaṃ kṛtvā sokṣayaṃ svargamaśnute |
sammukhe nyāyayuddhe ca pataṃti brāhmaṇā raṇe || 76 ||
[Analyze grammar]

te vrajaṃti paraṃ sthānaṃ na gamyaṃ brahmavādināṃ |
dharmayuddhasya yadvṛttaṃ śṛṇu puṇyaṃ yathārthataḥ || 77 ||
[Analyze grammar]

saṃmukhena prayudhyaṃte na ca gacchaṃti kātaraṃ |
na bhagnaṃ pṛṣṭhato ghnaṃti niḥśastraṃ prapalāyitam || 78 ||
[Analyze grammar]

ayudhyamānaṃ bhīruṃ ca patitaṃ gatakalmaṣaṃ |
asacchūdraṃ stutiprītamāhave śaraṇāgatam || 79 ||
[Analyze grammar]

hatvā ca narakaṃ yāṃti durvṛttā jayakāṃkṣiṇaḥ |
eṣā ca kṣattriyā vṛttiḥ sadācāraistu gīyate || 80 ||
[Analyze grammar]

yāmāśritya divaṃ yāṃti sarvakṣatriyakuṃjarāḥ |
dharmayuddhe śubho mṛtyuḥ saṃmukhe kṣattriyasya ca || 81 ||
[Analyze grammar]

atra pūto bhavetsopi sarvapāpaiḥ pramucyate |
sa tiṣṭhetsvargaloke ca prāsāde ratnabhūṣite || 82 ||
[Analyze grammar]

jāṃbūnadamayastaṃbhe ratnabhūṣitabhūtale |
iṣṭadravyaiḥ susaṃpūrṇe divyavastropaśobhite || 83 ||
[Analyze grammar]

purataḥ kalpavṛkṣāśca tiṣṭhaṃti sarvadāyinaḥ |
vāpīkūpataṭākādyairudyānairupaśobhite || 84 ||
[Analyze grammar]

yauvanāḍhyāśca sevaṃte taṃ devapurakanyakāḥ |
tasyāgrato mudā nityaṃ nṛtyaṃtyapsarasāṃ gaṇāḥ || 85 ||
[Analyze grammar]

gītaṃ gāyaṃti gaṃdharvā devāśca stutipāṭhakāḥ |
evaṃ krameṇa kalpāṃte sārvabhaumo bhavennṛpaḥ || 86 ||
[Analyze grammar]

sarvabhogaikakartā ca nīruṅmanmathavigrahaḥ |
tasya patnyaḥ prarūpāḍhyāḥ sadaiva yauvanānvitāḥ || 87 ||
[Analyze grammar]

dharmaśīlāḥ sutāḥ śubhrāḥ samṛddhāḥ pitṛsaṃmatāḥ |
evaṃ krameṇa bhuṃjaṃti saptajanmasu kṣatriyāḥ || 88 ||
[Analyze grammar]

anyāyena tu yoddhārastiṣṭhaṃti narake ciram |
evaṃ ca kṣatriyā vṛttirbrāhmaṇairupajīvyate || 89 ||
[Analyze grammar]

vaiśyaiḥ śūdraistathānyaiśca aṃtyajairmlecchajātibhiḥ |
ye ca yodhāḥ prayudhyaṃte nyāyayuddhena sarvadā || 90 ||
[Analyze grammar]

tepi yāṃti paraṃ sthānaṃ sarve varṇā dvijātayaḥ |
na śūro yo dvijo bhīrurastraśastravivarjitaḥ || 91 ||
[Analyze grammar]

vipattau vaiśyavṛtiṃ ca kārayeddvijasattamaḥ |
vaiśyavṛttiṃ vaṇigbhāvaṃ kṛṣiṃ caiva tathāparaiḥ || 92 ||
[Analyze grammar]

kārayetkṛṣivāṇijyaṃ viprakarma na ca tyajet |
vaṇigbhāvānmṛṣātyuktau durgatiṃ prāpnuyāddvijaḥ |
ārdradravyaṃ parityajya brāhmaṇo labhate śivam |
samutpādya tato vṛttiṃ dadyādviprāya sarvaśaḥ || 94 ||
[Analyze grammar]

pitṛyajñe tathā cāgnau juhuyādvidhivaddvijaḥ |
tule'satyaṃ na karttavyaṃ tulādharmapratiṣṭhitā || 95 ||
[Analyze grammar]

chalabhāvaṃ tule kṛtvā narakaṃ pratipadyate |
atulaṃ cāpi yaddravyaṃ tatra mithyā parityajet || 96 ||
[Analyze grammar]

evaṃ mithyā na karttavyā mṛṣā pāpaprasūtikā |
nāsti satyātparodharmo nānṛtātpātakaṃ param || 97 ||
[Analyze grammar]

ataḥ sarveṣu kāryeṣu satyameva viśiṣyate |
aśvamedhasahasraṃ tu satyaṃ ca tulayā dhṛtam || 98 ||
[Analyze grammar]

aśvamedhasahasrāddhi satyameva viśiṣyate |
yo vadetsarvakāryeṣu satyaṃ mithyā parityajet || 99 ||
[Analyze grammar]

sa nistarati durgāṇi svargamakṣayamaśnute |
vāṇijyaṃ kārayedvipro mithyā'vaśyaṃ parityajet || 100 ||
[Analyze grammar]

vṛddhiṃ ca nikṣipettīrthe svayaṃ śeṣaṃ tu bhojayet |
dehakleśāttatsahasraguṇaṃ bhavati sarvadā || 101 ||
[Analyze grammar]

arthārjanavidhau martyā viśaṃti viṣame jale |
kāṃtāramaṭavīṃ caiva śvāpadaiḥ sevitāṃ tathā || 102 ||
[Analyze grammar]

giriṃ giriguhāṃ durgāṃ mlecchānāṃ śastrapātinām |
gṛhaṃ pratibhayaṃ sthānaṃ dhanalobhātsamaṃtataḥ || 103 ||
[Analyze grammar]

sutadārānparityajya dūraṃ gacchaṃti lobhinaḥ |
skaṃdhe bhāraṃ vahaṃtyanye taryāṃ cakre nipātanaiḥ || 104 ||
[Analyze grammar]

kṣepaṇībhirmahāduḥkhaissadā prāṇavyayena ca |
arthasya saṃcayaḥ putra prāṇātpriyataro mahān || 105 ||
[Analyze grammar]

ebhirnyāyārjitaṃ vittaṃ vaṇigbhāvena yatnataḥ |
pitṛdevadvijātibhyo dattaṃ cākṣayamaśnute || 106 ||
[Analyze grammar]

etau doṣau mahāṃtau ca vāṇijye lābhakarmaṇi |
lobhānāmaparityāgo mṛṣā grāhyaśca vikrayaḥ || 107 ||
[Analyze grammar]

etau doṣo parityajya kuryādarthārjanaṃ budhaḥ |
akṣayaṃ labhate dānādvaṇigdoṣairna lipyate || 108 ||
[Analyze grammar]

puṇyakarmarato vipraḥ kṛṣiṃ hi parikārayet |
vāhayeddivasasyārdhaṃ balīvardacatuṣṭayam || 109 ||
[Analyze grammar]

abhāvāttritayaṃ caiva aviśrāmaṃ na kārayet |
cārayecca tṛṇe'cchinnai coravyāghravivarjite || 110 ||
[Analyze grammar]

dadyādghāsaṃ yatheṣṭaṃ ca nityamātarpayetsvayam |
goṣṭhaṃ ca kārayettasya kiṃcidvighnavivarjitam || 111 ||
[Analyze grammar]

sadā gomayamūtrābhyāṃ vighasaiśca vivarjitam |
na malaṃ nikṣipedgoṣṭhe sarvadevaniketane || 112 ||
[Analyze grammar]

ātmanaḥ śayanīyasya sadṛśaṃ kārayedbudhaḥ |
samaṃ nirvāpayedyatnācchītavātarajastathā || 113 ||
[Analyze grammar]

prāṇasya sadṛśaṃ paśyedgāṃ ca sāmānyavigraham |
asya dehe sukhaṃduḥkhaṃ tathā tasyaiva kalpate || 114 ||
[Analyze grammar]

anena vidhinā yastu kṛṣikarmāṇi kārayet |
sa ca govāhanairdoṣairna lipyeta dhanī bhavet || 115 ||
[Analyze grammar]

durbalaṃ pīḍayedyastu tathaiva gadasaṃyutam |
atibālātivṛddhaṃ ca sa gohatyāṃ samālabhet || 116 ||
[Analyze grammar]

viṣamaṃ vāhayedyastu durbalaṃ sabalaṃ tathā |
sa gohatyāsamaṃ pāpaṃ prāpnotīha na saṃśayaḥ || 117 ||
[Analyze grammar]

yo vāhayedvinā sasyaṃ khādaṃtaṃ gāṃ nivārayet |
mohāttṛṇaṃ jalaṃ vāpi sa gohatyāsamaṃ labhet || 118 ||
[Analyze grammar]

saṃkrāṃtyāṃ paurṇamāsyāṃ cāmāvāsyāyāṃ tathaiva ca |
halasya vāhanātpāpaṃ gavāmayutahatyayā || 119 ||
[Analyze grammar]

amūṣu pūjayedyastu sitaiścitrādibhirnaraḥ |
kajjalaiḥ kusumaistailaiḥ sokṣayaṃ svargamaśnute || 120 ||
[Analyze grammar]

ghāsamuṣṭiṃ paragave yo dadāti sadāhnikam |
sarvapāpakṣayasyasya svargaṃ cākṣayamaśnute || 121 ||
[Analyze grammar]

yathā viprastathā gauśca dvayoḥ pūjāphalaṃ samam |
vicāre brāhmaṇo mukhyo nṛṇāṃ gāvaḥ paśau tathā || 122 ||
[Analyze grammar]

nārada uvāca |
vipro brahmamukhe jātaḥ kathito me tvayānagha |
kathaṃ gobhiḥ samo nātha vismayo me vidhe dhruvam || 123 ||
[Analyze grammar]

brahmovāca |
śṛṇu cātra yathātathyaṃ brāhmaṇānāṃ gavāṃ yathā |
ekapiṃḍakriyaikyaṃ tu puruṣairnirmitaṃ purā || 124 ||
[Analyze grammar]

purā brahmamukhodbhūtaṃ kūṭaṃ tejomayaṃ mahat |
caturbhāgaprajātaṃ tadvedognirgaurdvijastathā || 125 ||
[Analyze grammar]

prāktejaḥ saṃbhavo vedo vahnireva tathaiva ca |
parato gaustathā vipro jātaścaiva pṛthakpṛthak || 126 ||
[Analyze grammar]

tatra sṛṣṭā mayā cādau vedāścatvāra ekaśaḥ |
sthityarthaṃ sarvalokānāṃ bhuvanānāṃ samaṃtataḥ || 127 ||
[Analyze grammar]

agnirhavyāni bhuṃjīta devahetostathā dvijaḥ |
ājyaṃ goprabhavaṃ viddhi tasmādete prasūtakāḥ || 128 ||
[Analyze grammar]

na saṃti yadi lokeṣu catvāromī mahattarāḥ |
tadākhilaṃ ca bhuvanaṃ naṣṭaṃ sthāvarajaṃgamam || 129 ||
[Analyze grammar]

ebhirdhṛtāḥ sadā lokāḥ pratiṣṭhaṃti svabhāvataḥ |
svabhāvo brahmarūposāvete brahmamayāḥ smṛtāḥ || 130 ||
[Analyze grammar]

tasmādgauḥ pūjanīyosau vipra devāsurairapi |
udāraḥ sarvakāryeṣu jātastathyo guṇākaraḥ || 131 ||
[Analyze grammar]

sarvadevamayaḥ sākṣātsarvasatvānukaṃpakaḥ |
asya kāryaṃ mayā sṛṣṭaṃ puraiva poṣaṇaṃ prati || 132 ||
[Analyze grammar]

ataeva mayā dattaṃ varaṃ cātisuśobhanam |
ekajanmani te mokṣastavāstviti viniścitam || 133 ||
[Analyze grammar]

atraiva ye mṛtā gāvastvāgacchaṃti mamālayam |
pāpasya kaṇamātraṃ tu teṣāṃ dehena tiṣṭhati || 134 ||
[Analyze grammar]

devī gaurdhenukā devāścādidevī triśaktikā |
prasādādyasya yajñānāṃ prabhavo hi viniścitaḥ || 135 ||
[Analyze grammar]

gavāṃ sarvapavitrāṇi punaṃti sakalaṃ jagat |
mūtraṃ gorgomayaṃ kṣīraṃ dadhisarpistathaiva ca || 136 ||
[Analyze grammar]

amīṣāṃ bhakṣaṇe pāpaṃ na tiṣṭhati kalevare |
tasmādghṛtaṃ dadhi kṣīraṃ nityaṃ khādaṃti dhārmikāḥ || 137 ||
[Analyze grammar]

viśiṣṭaṃ sarvadravyeṣu gavyamiṣṭaṃ paraṃ śubham |
yasyāsye bhojanaṃ nāsti tasya mūrtistu pūtikā || 138 ||
[Analyze grammar]

annādyaṃ paṃcarātreṇa saptarātreṇa vai payaḥ |
dadhi viṃśatirātreṇa ghṛtaṃ syānmāsamekakam || 139 ||
[Analyze grammar]

agavyairyastu bhuṃkte vai māsamekaṃ niraṃtaram |
bhojane tasya martyasya pretāḥ khādaṃti caiva hi || 140 ||
[Analyze grammar]

paramānnaṃ paraṃ śuddhaṃ svinnaṃ cātapataṇḍulaiḥ |
bhuktvā tu yatkṛtaṃ puṇyaṃ koṭikoṭiguṇaṃ bhavet || 141 ||
[Analyze grammar]

anyaccāpi ca yaddravyaṃ haviṣyaṃ śāstranirmitam |
tadbhuktavā yatkṛtaṃ karma sarvaṃ lakṣaguṇaṃ bhavet || 142 ||
[Analyze grammar]

nirāmiṣaṃ ca yatkiṃcittasmādyadyatphalaṃ labhet |
tasmādgauḥ sarvakāryeṣu śasta eko yugeyuge || 143 ||
[Analyze grammar]

sarvadā sarvakāmeṣu dharmakāmārthamokṣadaḥ |
nārada uvāca |
keṣu kiṃ vā prayogeṇa paraṃ puṇyaṃ prakīrtitaṃ || 144 ||
[Analyze grammar]

vada tatsarvalokeśa yathā jānāmi tatvataḥ |
brahmovāca |
sakṛtpradakṣiṇaṃ kṛtvā godhanaṃ cābhivaṃdayet || 145 ||
[Analyze grammar]

sarvapāpairvinirmuktaḥ svargaṃ cākṣayamaśnute |
surācāryo yathā vaṃdyaḥ pūjyosau mādhavo yathā || 146 ||
[Analyze grammar]

saptapradakṣiṇaṃ kṛtvā caiśvaryātpākaśāsanaḥ |
kalya utthāya gomadhye pātraṃ gṛhya sahodakam || 147 ||
[Analyze grammar]

niṣiṃcedyo gavāṃ śṛṃgaṃ mastakenaiva tajjalam |
pratīccheta nirāhārastasya puṇyaṃ nibodhata || 148 ||
[Analyze grammar]

śrūyaṃte yāni tīrthāni triṣu lokeṣu nārada |
siddhacāraṇayuktāni sevitāni maharṣibhiḥ || 149 ||
[Analyze grammar]

abhiṣekassamasteṣāṃ gavāṃ śṛṃgodakasya ca |
prātarutthāya yo martyaḥ spṛśedgāṃ ca ghṛtaṃ madhu || 150 ||
[Analyze grammar]

sarṣapāṃśca priyaṃgūṃśca kalmaṣātpratimucyate |
ghṛtakṣīrapradā gāvo ghṛtayonyo ghṛtodbhavāḥ || 151 ||
[Analyze grammar]

ghṛtanadyo ghṛtāvartāstā me saṃtu sadā gṛhe |
ghṛtaṃ me sarvagātreṣu ghṛtaṃ me manasi sthitam || 152 ||
[Analyze grammar]

gāvo mamāgrato nityaṃ gāvaḥ pṛṣṭhata eva ca |
gāvaśca sarvagātreṣu gavāṃmadhye vasāmyaham || 153 ||
[Analyze grammar]

ityācamya japenmaṃtraṃ sāyaṃprātaridaṃ śuciḥ |
sarvapāpakṣayastasya svarloke pūjito bhavet || 154 ||
[Analyze grammar]

yathā gauśca tathā vipro yathāviprastathā hariḥ |
hariryathā tathā gaṃgā etena hyavṛṣāḥ smṛtāḥ || 155 ||
[Analyze grammar]

gāvo baṃdhurmanuṣyāṇāṃ manuṣyā bāṃdhavā gavām |
gauśca yasmingṛhe nāsti tadbaṃdhurahitaṃ gṛham || 156 ||
[Analyze grammar]

gomukhe cāśritā vedāḥ saṣaḍaṃgapadakramāḥ |
śṛṃgayośca sthitau nityaṃ sahaiva harikeśavau || 157 ||
[Analyze grammar]

udare'vasthitaḥ skaṃdaḥ śīrṣe brahmā sthitaḥ sadā |
vṛṣaddhvajo lalāṭe ca śṛṃgāgra iṃdra eva ca || 158 ||
[Analyze grammar]

karṇayoraśvinau devau cakṣuṣośśaśibhāskarau |
daṃteṣu garuḍo devo jihvāyāṃ ca sarasvatī || 159 ||
[Analyze grammar]

apāne sarvatīrthāni prasrāve caiva jāhnavī |
ṛṣayo romakūpeṣu mukhataḥ pṛṣṭhato yamaḥ || 160 ||
[Analyze grammar]

dhanado varuṇaścaiva dakṣiṇaṃ pārśvamāśritau |
vāmapārśve sthitā yakṣāstejasvaṃto mahābalāḥ || 161 ||
[Analyze grammar]

mukhamadhye ca gaṃdharvā nāsāgre pannagāstathā |
khurāṇāṃ paścime pārśve'psarasaśca samāśritāḥ || 162 ||
[Analyze grammar]

gomaye vasate lakṣmīrgomūtre sarvamaṃgalā |
pādāgre khecarā vedyā haṃbhāśabde prajāpatiḥ || 163 ||
[Analyze grammar]

catvāraḥ sāgarāḥ pūrṇā dhenūnāṃ ca staneṣu vai |
gāṃ ca spṛśati yo nityaṃ snāto bhavati nityaśaḥ || 164 ||
[Analyze grammar]

ato martyaḥ prapuṣṭaistu sarvapāpaiḥ pramucyate |
gavāṃ rajaḥ khuroddhūtaṃ śirasā yastu dhārayet || 165 ||
[Analyze grammar]

sa ca tīrthajale snātaḥ sarvapāpaiḥ pramucyate |
nārada uvāca |
gavāṃ ca daśavarṇānāṃ kasya dāne ca kiṃphalam || 166 ||
[Analyze grammar]

brūhi tattvaṃ guruśreṣṭha parameṣṭhinpriyaṃ yadi |
brahmovāca |
śvetāṃ gāṃ brāhmaṇe datvā mānavaśceśvaro bhavet || 167 ||
[Analyze grammar]

prāsāde vasate nityaṃ bhogī ca sukhamedhate |
dhūmrā tu svargakāṃtāra saṃsāre pāpamokṣiṇī || 168 ||
[Analyze grammar]

akṣayaṃ kapilādānaṃ kṛṣṇāṃ datvā na sīdati |
pāṃḍurā durlabhā loke gaurī ca kulanaṃdinī || 169 ||
[Analyze grammar]

raktākṣī rūpakāmasya dhanakāmasya nīlikā |
ekāṃ ca kapilāṃ datvā sarvapāpaiḥ pramucyate || 170 ||
[Analyze grammar]

yattu bālyakṛtaṃ pāpaṃ yauvane vārdhake kṛtam |
vācākṛtaṃ karmakṛtaṃ manasā yatpraciṃtitaṃ || 171 ||
[Analyze grammar]

agamyāgamanaṃ caiva mitradrohe ca pātakam |
mānakūṭaṃ tulākūṭaṃ kanyānṛtaṃ gavānṛtam || 172 ||
[Analyze grammar]

sarvaṃ ca nāśayetkṣipraṃ kapilāṃ yaḥ prayacchati |
daśayojanavistīrṇā mahāpārā mahānadī || 173 ||
[Analyze grammar]

nārā ca jalakāṃtāre prasṛte codakārṇave |
yāvadvatsasya dvau pādau mukhaṃ yāvanna jāyate || 174 ||
[Analyze grammar]

tāvadgauḥ pṛthivī jñeyā yāvadgarbhaṃ na muṃcati |
suvarṇaśṛṃgīṃ vastrāḍhyāṃ sarvālaṃkārabhūṣitām || 175 ||
[Analyze grammar]

tāmrapṛṣṭhīṃ raupyakhurāṃ tathā kāṃsyopadohanām |
śobhitāṃ gaṃdhapuṣpaiśca sarvālaṃkārabhūṣitāṃ || 176 ||
[Analyze grammar]

īdṛśīṃ kapilāṃ dadyāddvijātau vedapārage |
sarvapāpakṣayastasya viṣṇuloke'cyuto bhavet || 177 ||
[Analyze grammar]

tasyāṃ tu duhyamānāyāṃ bhūmau pataṃti biṃdavaḥ |
ārāmādi vijāyaṃte bahupuṣpaphalottamāḥ || 178 ||
[Analyze grammar]

yatra kāmaphalā vṛkṣā nadyaḥ pāyasakardamāḥ |
prāsādāścāpi sauvarṇāstatra gacchaṃti gopradāḥ || 179 ||
[Analyze grammar]

daśadhenūśca yo dadyādekaṃ caiva dhuraṃdharaṃ |
samānaṃ tu phalaṃ proktaṃ brahmaṇā samudāhṛtam || 180 ||
[Analyze grammar]

ekaṃ ca daśabhirdadyātsahasrāṇāṃ śataṃ phalam |
tasyānusārato vedyaṃ phalaṃ nārada yatnataḥ || 181 ||
[Analyze grammar]

pitṝnuddiśya yaḥ putro vṛṣaṃ ca mokṣayedbhuvi |
pitaro viṣṇulokeṣu mahīyaṃte yathepsitam || 182 ||
[Analyze grammar]

catasro vatsataryaśca ekasyaiva vṛṣasya ca |
mokṣyaṃte sarvataḥ putra vidhireṣa sanātanaḥ || 183 ||
[Analyze grammar]

yāvaṃti caiva romāṇi tasya tāsāṃ ca sarvaśaḥ |
tāvadvarṣasahasrāṇi svargaṃ bhujaṃti mānavāḥ || 184 ||
[Analyze grammar]

lāṃgūlena vṛṣo yacca jalaṃ cotkṣipati dhruvaṃ |
tattoyaṃ tu sahasrābdaṃ pitṝṇāmamṛtaṃ bhavet || 185 ||
[Analyze grammar]

khureṇa karṣayedbhūmiṃ tato loṣṭhaṃ ca kardamaḥ |
pitṛbhyaśca svadhā tatra lakṣakoṭiguṇaṃ bhavet || 186 ||
[Analyze grammar]

vidyamāne ca janake yadi mātā vinaśyati |
caṃdanenāṃkitā dhenustasyāḥ svargāya dīyate || 187 ||
[Analyze grammar]

dātā caiva pitṝṇāṃ ca ṛṇaṃ caiva pramuṃcati |
akṣayaṃ labhate svargaṃ pūjito maghavā yathā || 188 ||
[Analyze grammar]

sarvalakṣaṇasaṃyuktā taruṇā gauḥ payasvinī |
samāprasūtikā bhadrā sā ca gauḥ pṛthivī smṛtā || 189 ||
[Analyze grammar]

tasya dānena maṃtrasya pṛthvīdānasamaṃ phalaṃ |
śatakratusamo martyaḥ kulamuddharate śataṃ || 190 ||
[Analyze grammar]

gavāṃ ca haraṇaṃ kṛtvā mṛte gorathavatsake |
krimipūrṇe sa kūpe ca tiṣṭhedābhūtasaṃplavaṃ || 191 ||
[Analyze grammar]

gavāṃ caiva vadhaṃ kṛtvā pitṛbhiḥ saha pacyate |
raurave narake ghore tāvatkālaṃ pratikriyā || 192 ||
[Analyze grammar]

gopracāraprabhagnaśca ṣaṃḍavāhanabaṃdhanaḥ |
akṣayaṃ narakaṃ prāyānpunarjanmani janmani || 193 ||
[Analyze grammar]

sakṛcca śrāvayedyastu kathāṃ puṇyatamāmimāṃ |
sarvapāpakṣayastasya devaiśca saha modate || 194 ||
[Analyze grammar]

ya idaṃ śṛṇuyādvāpi paraṃ puṇyatamaṃ mahat |
saptajanmakṛtātpāpānmucyate tatkṣaṇena hi || 195 ||
[Analyze grammar]