Chapter 37

[English text for this chapter is available]

pulastya uvāca |
tadadbhutatamaṃ vākyaṃ śrutvā ca raghunaṃdanaḥ |
gauravādvismayāccāpi bhūyaḥ praṣṭuṃ pracakrame || 1 ||
[Analyze grammar]

rāma uvāca |
bhagavaṃstadvanaṃ ghoraṃ yatrāsau taptavāṃstapaḥ |
śveto vaidarbhako rājā tadadbhutamabhūtkathaṃ || 2 ||
[Analyze grammar]

viṣamaṃ tadvanaṃ rājā śūnyaṃ mṛgavivarjitaṃ |
praviṣṭastapa āsthātuṃ kathaṃ vada mahāmune || 3 ||
[Analyze grammar]

samaṃtādyojanaśataṃ nirmanuṣyamabhūtkathaṃ |
bhavānkathaṃ praviṣṭastadyena kāryeṇa tadvada || 4 ||
[Analyze grammar]

agastya uvāca |
purā kṛtayuge rājā manurdaṃḍadharaḥ prabhuḥ |
tasya putrotha nāmnāsīdikṣvākuramitadyutiḥ || 5 ||
[Analyze grammar]

taṃ putraṃ pūrvajaṃ rājye nikṣipya bhuvisaṃmatam |
pṛthivyāṃ rājavaṃśānāṃ bhava rājetyuvāca ha || 6 ||
[Analyze grammar]

tatheti ca pratijñātaṃ pituḥ putreṇa rāghava |
tataḥparamasaṃhṛṣṭaḥ punastaṃ pratyabhāṣata || 7 ||
[Analyze grammar]

prītosmi paramodāra karmaṇā te na saṃśayaḥ |
daṃḍena ca prajā rakṣa na ca daṃḍamakāraṇam || 8 ||
[Analyze grammar]

aparādhiṣu yo daṃḍaḥ pātyate mānavairiha |
sa daṃḍo vidhivanmuktaḥ svargaṃ nayati pārthivam || 9 ||
[Analyze grammar]

tasmāddaṇḍe mahābāho yatnavānbhava putraka |
dharmaste paramo loke kṛta evaṃ bhaviṣyati || 10 ||
[Analyze grammar]

iti taṃ bahusaṃdiśya manuḥ putraṃ samādhinā |
jagāma tridivaṃ hṛṣṭo brahmalokamanuttamam || 11 ||
[Analyze grammar]

janayiṣye kathaṃ putrāniti ciṃtāparo'bhavat |
karmabhirbahubhistaistaissasutaissaṃyuto'bhavat || 12 ||
[Analyze grammar]

toṣayāmāsa putraissa pitṝndevasutopamaiḥ |
sarveṣāmuttamasteṣāṃ kanīyānraghunaṃdana || 13 ||
[Analyze grammar]

śūraśca kṛtavidyaśca guruśca janapūjayā |
nāma tasyātha daṃḍeti pitā cakre sa buddhimān || 14 ||
[Analyze grammar]

bhaviṣyaddaṇḍapatanaṃ śarīre tasya vīkṣya ca |
saṃpaśyamānastaṃ doṣaṃ ghoraṃ putrasya rāghava || 15 ||
[Analyze grammar]

sa viṃdhyanīlayormadhye rājyamasya dadau prabhuḥ |
sa daṃḍastatra rājābhūdramye parvatamūrddhani || 16 ||
[Analyze grammar]

puraṃ cāpratimaṃ tena niveśāya tathā kṛtam |
nāma tasya purasyātha madhumattamiti svayam || 17 ||
[Analyze grammar]

tathādeśena saṃpannaḥ śūro vāsamathākarot |
evaṃ rājā sa tadrājyaṃ cakāra sapurohitaḥ || 18 ||
[Analyze grammar]

prahṛṣṭa suprajākīrṇaṃ devarājo yathā divi |
tataḥ sa daṃḍaḥ kākutstha bahuvarṣagaṇāyutam || 19 ||
[Analyze grammar]

akārayattu dharmātmā rājyaṃ nihatakaṃṭakaṃ |
atha kāle tu kasmiṃścidrājā bhārgavamāśramam || 20 ||
[Analyze grammar]

ramaṇīyamupākrāmaccaitramāse manorame |
tatra bhārgavakanyāṃ tu rūpeṇāpratimāṃ bhuvi || 21 ||
[Analyze grammar]

vicaraṃtīṃ vanoddeśe daṃḍo'paśyadanuttamām |
uttuṃgapīvarīṃ śyāmāṃ caṃdrābhavadanāṃ śubhām || 22 ||
[Analyze grammar]

sunāsāṃ cārusarvāṃgīṃ pīnonnatapayodharām |
madhye kṣāmāṃ ca vistīrṇāṃ dṛṣṭvā tāṃ kurute mudam || 23 ||
[Analyze grammar]

ekavastrāṃ vane caikāṃ prathame yauvane sthitām |
sa tāṃ dṛṣṭvātvadharmeṇa anaṃgaśarapīḍitaḥ || 24 ||
[Analyze grammar]

abhigamya suviśrāṃtāṃ kanyāṃ vacanamabravīt |
kutastvamasi suśroṇi kasya cāsi suśobhane || 25 ||
[Analyze grammar]

pīḍatohamanaṃgena pṛcchāmi tvāṃ suśobhane |
tvayā me'pahṛtaṃ cittaṃ darśanādeva suṃdari || 26 ||
[Analyze grammar]

idaṃ te vadanaṃ ramyaṃ munīnāṃ cittahārakam |
yadyahaṃ na labhe bhoktuṃ mṛtaṃ māmavadhāraya || 27 ||
[Analyze grammar]

tvayā hṛtā mama prāṇā māṃ jīvaya sulocane |
dāsosmi te varārohe bhaktaṃ māṃ bhaja śobhane || 28 ||
[Analyze grammar]

tasyaivaṃ tu bruvāṇasya madonmattasya kāminaḥ |
bhārgavī pratyuvācedaṃ vacaḥ savinayaṃ nṛpam || 29 ||
[Analyze grammar]

bhārgavasya sutāṃ viddhi śukrasyākliṣṭakarmaṇaḥ |
arajāṃ nāma rājeṃdra jyeṣṭhāmāśramavāsinaḥ || 30 ||
[Analyze grammar]

śukraḥ pitā me rājeṃdra tvaṃ ca śiṣyo mahātmanaḥ |
dharmato bhaginī cāhaṃ bhavāmi nṛpanaṃdana || 31 ||
[Analyze grammar]

evaṃvidhaṃ vaco vaktuṃ na tvamarhasi pārthiva |
anyebhyopi suduṣṭebhyo rakṣyā cāhaṃ sadā tvayā || 32 ||
[Analyze grammar]

krodhano me pitā raudro bhasmatvaṃ tvāṃ samānayet |
athavā rājadharmeṇāsaṃbaṃdhaṃ kuruṣe balāt || 33 ||
[Analyze grammar]

pitaraṃ yācayasva tvaṃ dharmadṛṣṭena karmaṇā |
varayasva nṛpaśreṣṭha pitaraṃ me mahādyutim || 34 ||
[Analyze grammar]

anyathā vipulaṃ duḥkhaṃ tava ghoraṃ bhaveddhruvam |
kruddho hi me pitā sarvaṃ trailokyamabhinirdahet || 35 ||
[Analyze grammar]

tato'śubhaṃ mahāghoraṃ śrutvā daṃḍaḥ sudāruṇam |
pratyuvāca madonmattaḥ śirasābhinataḥ punaḥ || 36 ||
[Analyze grammar]

prasādaṃ kuru suśroṇi kāmonmattasya kāmini |
tvayā ruddhā mama prāṇā viśīryaṃti śubhānane || 37 ||
[Analyze grammar]

tvāṃ prāpya vairaṃ me'trāstu vadho vāpi mahattaraḥ |
bhaktaṃ bhajasva māṃ bhīru tvayi bhaktirhi me parā || 38 ||
[Analyze grammar]

evamuktvā tu tāṃ kanyāṃ balātsaṃgṛhya bāhunā |
anyena rājñā hastena vivastrā sā tathā kṛtā || 39 ||
[Analyze grammar]

aṃgamaṃge samāśleṣya mukhe caiva mukhaṃ kṛtam |
visphuraṃtīṃ yathākāmaṃ maithunāyopacakrame || 40 ||
[Analyze grammar]

tamanarthaṃ mahāghoraṃ daṃḍaḥ kṛtvā sudāruṇam |
nagaraṃ svaṃ jagāmāśu madonmatta iva dvipaḥ || 41 ||
[Analyze grammar]

bhārgavī rudatī dīnā āśramasyāvidūrataḥ |
pratyapālayadudvignā pitaraṃ devasammitam || 42 ||
[Analyze grammar]

sa muhūrtādupaspṛśya devarṣiramitadyutiḥ |
svamāśramaṃ śiṣyavṛtaṃ kṣudhārtaḥ sanyavartata || 43 ||
[Analyze grammar]

sopaśyadarajāṃ dīnāṃ rajasā samabhiplutām |
caṃdrasya ghanasaṃyuktāṃ jyotsnāmiva parājitām || 44 ||
[Analyze grammar]

tasya roṣaḥ samabhavatkṣudhārtasya mahātmanaḥ |
nirdahanniva lokāṃstrīṃstānśiṣyānsamuvāca ha || 45 ||
[Analyze grammar]

paśyadhvaṃ viparītasya daṃḍasyādīrghadarśinaḥ |
vipattiṃ ghorasaṃkāśāṃ dīptāmagniśikhāmiva || 46 ||
[Analyze grammar]

yannāśaṃ durgatiṃ prāptassānugaśca na saṃśayaḥ |
yastu dīptahutāśasya arciḥ saṃspṛṣṭavāniha || 47 ||
[Analyze grammar]

yasmātsa kṛtavānpāpamīdṛśaṃ ghorasaṃmitam |
tasmātprāpsyati durmedhāḥ pāṃsuvarṣamanuttamam || 48 ||
[Analyze grammar]

kurājā deśasaṃyuktaḥ sabhṛtyabalavāhanaḥ |
pāpakarmasamācāro vadhaṃ prāpsyati durmatiḥ || 49 ||
[Analyze grammar]

samaṃtādyojanaśataṃ viṣayaṃ cāsya durmateḥ |
dhunotu pāṃsuvarṣeṇa mahatā pākaśāsanaḥ || 50 ||
[Analyze grammar]

sarvasatvāni yānīha jaṃgamasthāvarāṇi vai |
sarveṣāṃ pāṃsuvarṣeṇa kṣayaḥ kṣipraṃ bhaviṣyati || 51 ||
[Analyze grammar]

daṃḍasya viṣayo yāvattāvatsavanamāśramam |
pāṃsuvarṣamivākasmātsaptarātraṃ bhaviṣyati || 52 ||
[Analyze grammar]

ityuktvā krodhasaṃtaptastamāśramanivāsinam |
janaṃ janapadasyāṃte sthīyatāmityuvāca ha || 53 ||
[Analyze grammar]

uktamātre uśanasā āśramāvasatho janaḥ |
kṣipraṃ tu viṣayāttasmātsthānaṃ cakre ca bāhyataḥ || 54 ||
[Analyze grammar]

taṃ tathoktvā munijanamarajāmidamabravīt |
āśrame tvaṃ sudurmedhe vasa ceha samāhitā || 55 ||
[Analyze grammar]

idaṃ yojanaparyaṃtamāśramaṃ ruciraprabham |
araje virajāstiṣṭha kālamatra samāśśatam || 56 ||
[Analyze grammar]

śrutvā niyogaṃ viprarṣerarajā bhārgavī tadā |
tatheti pitaraṃ prāha bhārgavaṃ bhṛśaduḥkhitā || 57 ||
[Analyze grammar]

ityuktvā bhārgavo vāsaṃ tasmādanyamupākramat |
saptāhe bhasmasādbhūtaṃ yathoktaṃ brahmavādinā || 58 ||
[Analyze grammar]

tasmāddaṃḍasya viṣayo viṃdhyaśailasya mānuṣa |
śapto hyuśanasā rāma tadābhūddharṣaṇe kṛte || 59 ||
[Analyze grammar]

tataḥprabhṛti kākutstha daṃḍakāraṇyamucyate |
etatte sarvamākhyātaṃ yanmāṃ pṛcchasi rāghava || 60 ||
[Analyze grammar]

saṃdhyāmupāsituṃ vīra samayo hyativartate |
ete maharṣayo rāma pūrṇakuṃbhāḥ samaṃtataḥ || 61 ||
[Analyze grammar]

kṛtodakā naravyāghra pūjayaṃti divākaram |
sarvairṝṣibhirabhyastaiḥ stotrairbrahmādibhiḥ kṛtaiḥ || 62 ||
[Analyze grammar]

ravirastaṃgato rāma gatvodakamupaspṛśa |
ṝṣervacanamādāya rāmaḥ saṃdhyāmupāsitum || 63 ||
[Analyze grammar]

upacakrāma tatpuṇyaṃ sasaroraghunaṃdanaḥ |
atha tasminvanoddeśe ramye pādapaśobhite || 64 ||
[Analyze grammar]

nadapuṇye girivare kokilāśatamaṃḍite |
nānāpakṣiravodyāne nānāmṛgasamākule || 65 ||
[Analyze grammar]

siṃhavyāghrasamākīrṇe nānādvijasamāvṛte |
gṛdhrolūkau pravasitau bahūnvarṣagaṇānapi || 66 ||
[Analyze grammar]

atholūkasya bhavanaṃ gṛdhraḥ pāpaviniścayaḥ |
mamedamiti kṛtvā'sau kalahaṃ tena cākarot || 67 ||
[Analyze grammar]

rājā sarvasya lokasya rāmo rājīvalocanaḥ |
taṃ prapadyāvahai śīghraṃ kasyaitadbhavanaṃ bhavet || 68 ||
[Analyze grammar]

gṛdhrolūkau prapadyetāṃ jātakopāvamarṣiṇau |
rāmaṃ prapadyatau śīghraṃ kalivyākulacetasau || 69 ||
[Analyze grammar]

tau parasparavidveṣau spṛśataścaraṇau tathā |
atha dṛṣṭvā rāghaveṃdraṃ gṛdhro vacanamabravīt || 70 ||
[Analyze grammar]

surāṇāmasurāṇāṃ ca tvaṃ pradhāno mato mama |
bṛhaspateśca śukrācca tvaṃ viśiṣṭo mahāmatiḥ || 71 ||
[Analyze grammar]

parāvarajño bhūtānāṃ martye śakra ivāparaḥ |
durnirīkṣo yathā sūryo himavāniva gaurave || 72 ||
[Analyze grammar]

sāgaraścāsi gāṃbhīrye lokapālo yamo hyasi |
kṣāṃtyā dharaṇyā tulyosi śīghratve hyanilopamaḥ || 73 ||
[Analyze grammar]

gurustvaṃ sarvasaṃpanno viṣṇurūposi rāghava |
amarṣī durjayo jetā sarvāstravidhipāragaḥ || 74 ||
[Analyze grammar]

śṛṇu tvaṃ mama deveśa vijñāpyaṃ narapuṃgava |
mamālayaṃ pūrvakṛtaṃ bāhuvīryeṇa vai prabho || 75 ||
[Analyze grammar]

ulūko harate rājaṃstvatsamīpe viśeṣataḥ |
īdṛśoyaṃ durācārastvadājñā laṃghako nṛpa || 76 ||
[Analyze grammar]

prāṇāṃtikena daṃḍena rāma śāsitumarhasi |
evamukte tu gṛdhreṇa ulūko vākyamabravīt || 77 ||
[Analyze grammar]

śṛṇu deva mama jñāpyamekacitto narādhipa |
somācchakrācca sūryācca dhanadācca yamāttathā || 78 ||
[Analyze grammar]

jāyate vai nṛpo rāma kiṃcidbhavati mānuṣaḥ |
tvaṃ tu sarvamayo devo nārāyaṇaparāyaṇaḥ || 79 ||
[Analyze grammar]

procyate somatā rājansamyakkārye vicārite |
samyagrakṣasi tāpebhyastamoghno hi yato bhavān || 80 ||
[Analyze grammar]

doṣe daṃḍātprajānāṃ tvaṃ yataḥ pāpabhayāpahaḥ |
dātā prahartā goptā ca teneṃdra iva no bhavān || 81 ||
[Analyze grammar]

adhṛṣyaḥ sarvabhūteṣu tejasā cānalo mataḥ |
abhīkṣṇaṃ tapase pāpāṃstena tvaṃ rāma bhāskaraḥ || 82 ||
[Analyze grammar]

sākṣādvitteśatulyastvamathavā dhanadādhikaḥ |
cittāyattā tu patnīśrīrnityaṃ te rājasattama || 83 ||
[Analyze grammar]

dhanadasya tu kośena dhanadastena vaibhavān |
samaḥ sarveṣu bhūteṣu sthāvareṣu careṣu ca || 84 ||
[Analyze grammar]

śatrau mitre ca te dṛṣṭiḥ samaṃtādyāti rāghava |
dharmeṇa śāsanaṃ nityaṃ vyavahāravidhikramaiḥ || 85 ||
[Analyze grammar]

yasya ruṣyasi vai rāma mṛtyustasyābhidhīyate |
gīyase tena vai rājanyama ityabhiviśrutaḥ || 86 ||
[Analyze grammar]

yaścāsau mānuṣo bhāvo bhavato nṛpasattama |
ānṛśaṃsyaparo rājā sarveṣu kṛpayānvitaḥ || 87 ||
[Analyze grammar]

durbalasya tvanāthasya rājā bhavati vai balam |
acakṣuṣo bhaveccakṣuramateṣu matirbhavet || 88 ||
[Analyze grammar]

asmākamapi nāthastvaṃ śrūyatāṃ mama dhārmika |
bhavatā tatra maṃtavyaṃ yathaite kila pakṣiṇaḥ || 89 ||
[Analyze grammar]

yosmannāthaḥ sa pakṣīṃdro bhavato viniyojyakaḥ |
asvāmyaṃ deva nāsmākaṃ sannidhau bhavataḥ prabho || 90 ||
[Analyze grammar]

bhavataiva kṛtaṃ pūrvaṃ bhūtagrāmaṃ caturvidham |
mamālayapraviṣṭastu gṛdhro māṃ bādhate nṛpa || 91 ||
[Analyze grammar]

bhavāndevamanuṣyeṣu śāstā vai narapuṃgava |
etacchrutvā tu vai rāmaḥ sacivānāhvayatsvayam || 92 ||
[Analyze grammar]

viṣṭirjayaṃto vijayaḥ siddhārtho rāṣṭravardhanaḥ |
aśoko dharmapālaśca sumaṃtraśca mahābalaḥ || 93 ||
[Analyze grammar]

ete rāmasya sacivā rājño daśarathasya ca |
nītiyuktā mahātmānaḥ sarvaśāstraviśāradāḥ || 94 ||
[Analyze grammar]

suśāṃtāśca kulīnāśca naye maṃtre ca kovidāḥ |
tānāhūya sa dharmātmā puṣpakādavaruhya ca || 95 ||
[Analyze grammar]

gṛdhrolūkau vivadaṃtau pṛcchati sma raghūttamaḥ |
kati varṣāṇi bho gṛdhra tavedaṃ nilayaṃ kṛtaṃ || 96 ||
[Analyze grammar]

etanme kautukaṃ brūhi yadi jānāsi tattvataḥ |
etacchrutvā vaco gṛdhro babhāṣe rāghavaṃ sthitaṃ || 97 ||
[Analyze grammar]

iyaṃ vasumatī rāma mānuṣairbahubāhubhiḥ |
ucchritairācitā sarvā tadāprabhṛti madgṛhaṃ || 98 ||
[Analyze grammar]

ulūkastvabravīdrāmaṃ pādapairupaśobhitā |
yadaiva pṛthivī rājaṃstadāprabhṛti me gṛhaṃ || 99 ||
[Analyze grammar]

etacchrutvā tu rāmo vai sabhāsada uvācaha |
na sā sabhā yatra na saṃti vṛddhā vṛddhā na te ye na vadaṃti dharmaṃ || 100 ||
[Analyze grammar]

nāsau dharmo yatra na cāsti satyaṃ na tatsatyaṃ yacchalamabhyupaiti |
ye tu sabhyāḥ sabhāṃ gatvā tūṣṇīṃ dhyāyaṃta āsate || 101 ||
[Analyze grammar]

yathāprāptaṃ na bruvate sarve te'nṛtavādinaḥ |
na vakti ca śrutaṃ yaśca kāmātkrodhāttathā bhayāt || 102 ||
[Analyze grammar]

sahasraṃ vāruṇāḥ pāśāḥ pratimuṃcaṃti taṃ naraṃ |
teṣāṃ saṃvatsare pūrṇe pāśa ekaḥ pramucyate || 103 ||
[Analyze grammar]

tasmātsatyaṃ tu vaktavyaṃ jānatā satyamaṃjasā |
etacchrutvā tu sacivā rāmamevābruvaṃstadā || 104 ||
[Analyze grammar]

ulūkaḥ śobhate rājanna tu gṛdhro mahāmate |
tvaṃ pramāṇaṃ mahārāja rājā hi paramā gatiḥ || 105 ||
[Analyze grammar]

rājamūlāḥ prajāḥ sarvā rājā dharmaḥ sanātanaḥ |
śāstā rājā nṛṇāṃ yeṣāṃ na te gacchaṃti durgatim || 106 ||
[Analyze grammar]

vaivasvatena muktāśca bhavaṃti puruṣottamāḥ |
sacivānāṃ vacaḥ śrutvā rāmo vacanamabravīt || 107 ||
[Analyze grammar]

śrūyatāmabhidhāsyāmi purāṇaṃ yadudāhṛtaṃ |
dyauḥ sacaṃdrārkanakṣatrā saparvatamahīdrumam || 108 ||
[Analyze grammar]

salilārṇavasaṃmagnaṃ trailokyaṃ sacarācaraṃ |
ekameva tadā hyāsītsarvamekamivāṃbaraṃ || 109 ||
[Analyze grammar]

punarbhūḥ saha lakṣmyā ca viṣṇorjaṭharamāviśat |
tāṃ nigṛhya mahātejāḥ praviśya salilārṇavaṃ || 110 ||
[Analyze grammar]

suṣvāpa hi kṛtātmā sa bahuvarṣaśatānyapi |
viṣṇau supte tato brahmā viveśa jaṭharaṃ tataḥ || 111 ||
[Analyze grammar]

bahusrotaṃ ca taṃ jñātvā mahāyogī samāviśat |
nābhyāṃ viṣṇoḥ samudbhūtaṃ padmaṃ hemavibhūṣitaṃ || 112 ||
[Analyze grammar]

sa tu nirgamya vai brahmā yogī bhūtvā mahāprabhuḥ |
sisṛkṣuḥ pṛthivīṃ vāyuṃ parvatāṃśca mahīruhān || 113 ||
[Analyze grammar]

tadaṃtarāḥ prajāḥ sarvā mānuṣāṃśca sarīsṛpān |
jarāyujāṇḍajānsarvānsasarja sa mahātapāḥ || 114 ||
[Analyze grammar]

tasya gātrasamutpannaḥ kaiṭabho madhunā saha |
dānavau tau mahāvīryau ghorau labdhavarau tadā || 115 ||
[Analyze grammar]

dṛṣṭvā prajāpatiṃ tatra krodhāviṣṭāvubhau nṛpa |
vegena mahatā bhoktuṃ svayaṃbhuvamadhāvatāṃ || 116 ||
[Analyze grammar]

dṛṣṭvā satvāni sarvāṇi nissaranti pṛthakpṛthak |
brahmaṇā saṃstuto viṣṇurhatvā tau madhukaiṭabhau || 117 ||
[Analyze grammar]

pṛthivīṃ vardhayāmāsa sthityarthaṃ medasā tayoḥ |
medogaṃdhā tu dharaṇī medinītyabhidhāṃ gatā || 118 ||
[Analyze grammar]

tasmādgṛdhrastvasatyo vai pāpakarmāparālayam |
svīyaṃ karoti pāpātmā daṇḍanīyo na saṃśayaḥ || 119 ||
[Analyze grammar]

tato'śarīriṇīvāṇī aṃtarikṣātprabhāṣate |
mā vadhī rāma gṛdhraṃ tvaṃ pūrvaṃdagdhaṃ tapobalāt || 120 ||
[Analyze grammar]

purā gautama dagdho'yaṃ prajānātho janeśvara |
brahmadattastu nāmaiṣa śūraḥ satyavrataḥ śuciḥ || 121 ||
[Analyze grammar]

gṛhamāgatya viprarṣerbhojanaṃ pratyayācata |
sāgraṃ varṣaśataṃ caiva bhuktavānnṛpasattama || 122 ||
[Analyze grammar]

brahmadattasya vai tasya pādyamarghyaṃ svayaṃ tataḥ |
ātmanaivākarotsamyagbhojanārthaṃ mahādyute || 123 ||
[Analyze grammar]

samāviśya gṛhaṃ tasya āhāre tu mahātmanaḥ |
nārīṃ pūrṇastanīṃ dṛṣṭvā hastenātha parāmṛśat || 124 ||
[Analyze grammar]

atha kruddhena muninā śāpo dattaḥ sudāruṇaḥ |
gṛdhratvaṃ gaccha vai mūḍha rājā munimathābravīt || 125 ||
[Analyze grammar]

kṛpāṃ kuru mahābhāga śāpoddhāro bhaviṣyati |
dayālustadvacaḥ śrutvā punarāha narādhipa || 126 ||
[Analyze grammar]

utpatsyate raghukule rāmo nāma mahāyaśāḥ |
ikṣvākūṇāṃ mahābhāgo rājā rājīvalocanaḥ || 127 ||
[Analyze grammar]

tena dṛṣṭo vipāpastvaṃ bhavitā narapuṃgava |
dṛṣṭo rāmeṇa tacchrutvā babhūva pṛthivīpatiḥ || 128 ||
[Analyze grammar]

gṛdhratvaṃ tyajya vai śīghraṃ divyagaṃdhānulepanaḥ |
puruṣo divyarūpo'sau babhāṣe taṃ narādhipaṃ || 129 ||
[Analyze grammar]

sādhu rāghava dharmajña tvatprasādādahaṃ vibho |
vimukto narakādghorādapāpastu tvayā kṛtaḥ || 130 ||
[Analyze grammar]

visarjitaṃ mayā gārdhyaṃ nararūpī mahīpatiḥ |
ulūkaṃ prāha dharmajña svagṛhaṃ viśa kauśika || 131 ||
[Analyze grammar]

ahaṃ saṃdhyāmupāsitvā gamiṣye yatra vai muniḥ |
athodakamupaspṛśya saṃdhyāmanvāsya paścimāṃ || 132 ||
[Analyze grammar]

āśramaṃ prāviśadrāmaḥ kuṃbhayonermahātmanaḥ |
tasyāgastyo bahuguṇaṃ phalamūlaṃ ca sādaraṃ || 133 ||
[Analyze grammar]

rasavaṃti ca śākāni bhojanārthamupāharat |
sabhuktavānnaravyāghrastadannamamṛtopamam || 134 ||
[Analyze grammar]

prītaśca parituṣṭaśca tāṃ rātriṃ samupāvasat |
prabhāte kālyamutthāya kṛtvāhnikamariṃdama || 135 ||
[Analyze grammar]

ṝṣiṃ samabhicakrāma gamanāya raghūttamaḥ |
abhivādyābravīdrāmo maharṣiṃ kuṃbhasaṃbhavam || 136 ||
[Analyze grammar]

āpṛcche sādhaye brahmannanujñātuṃ tvamarhasi |
dhanyosmyanugṛhītosmi darśanena mahāmune || 137 ||
[Analyze grammar]

diṣṭyā cāhaṃ bhaviṣyāmi pāvanātmā mahātmanaḥ |
evaṃ bruvati kākutsthe vākyamadbhutadarśanaṃ || 138 ||
[Analyze grammar]

uvāca paramaprīto bāṣpanetrastapodhanaḥ |
atyadbhutamidaṃ vākyaṃ tava rāma śubhākṣaraṃ || 139 ||
[Analyze grammar]

pāvanaṃ sarvabhūtānāṃ tvayoktaṃ raghunaṃdana |
muhūrtamapi rāma tvāṃ maitreṇekṣaṃti ye narāḥ || 140 ||
[Analyze grammar]

pāvitāssarvasūktaiste kathyaṃte tridivaukasaḥ |
ye ca tvāṃ ghoracakṣurbhirīkṣaṃte prāṇino bhuvi || 141 ||
[Analyze grammar]

te hatā brahmadaṃḍena sadyo narakagāminaḥ |
īdṛśastvaṃ raghuśreṣṭha pāvanaḥ sarvadehināṃ || 142 ||
[Analyze grammar]

kathayaṃtaśca lokāstvāṃ siddhimeṣyaṃti rāghava |
gacchasvānāturo'vighnaṃ paṃthānamakutobhayaḥ || 143 ||
[Analyze grammar]

praśādhi rājyaṃ dharmeṇa gatistu jagatāṃ bhavān |
evamuktastu muninā prāñjali pragraho nṛpaḥ || 144 ||
[Analyze grammar]

abhivādayituṃ cakre so'gastyamṛṣisattamam |
abhivādya muniśreṣṭhaṃstāṃśca sarvāṃstapodhikān || 145 ||
[Analyze grammar]

athārohattadāvyagraḥ puṣpakaṃ hemabhūṣitam |
taṃ prayāṃtaṃ munigaṇā āśīrvādaissamaṃtataḥ || 146 ||
[Analyze grammar]

apūpujannareṃdraṃ taṃ sahasrākṣamivāmarāḥ |
tato'rdhadivase prāpte rāmaḥ sarvārthakovidaḥ || 147 ||
[Analyze grammar]

ayodhyāṃ prāpya kākutsthaḥ padbhyāṃ kakṣāmavātarat |
tato visṛjya ruciraṃ puṣpakaṃ kāmavāhitaṃ || 148 ||
[Analyze grammar]

kakṣāṃtarādviniṣkramya dvāsthānrājā'bravīdidaṃ |
lakṣmaṇaṃ bharataṃ caiva gacchadhvaṃ laghuvikramāḥ || 149 ||
[Analyze grammar]

mamāgamanamākhyāya samānayata mā ciram |
śrutvātha bhāṣitaṃ dvāsthā rāmasyākliṣṭakarmaṇaḥ || 150 ||
[Analyze grammar]

gatvā kumārāvāhūya rāghavāya nyavadeyan |
dvāsthaiḥ kumārāvānītau rāghavasya nideśataḥ || 151 ||
[Analyze grammar]

dṛṣṭvā tu rāghavaḥ prāptau priyau bharatalakṣmaṇau |
samāliṃgya tu rāmastau vākyaṃ cedamuvāca ha || 152 ||
[Analyze grammar]

kṛtaṃ mayā yathātathyaṃ dvijakāryamanuttamaṃ |
dharmahetumato bhūyaḥ kartumicchāmi rāghavau || 153 ||
[Analyze grammar]

bhavadbhyāmātmabhūtābhyāṃ rājasūyaṃ kratūttamaṃ |
sahito yaṣṭumicchāmi yatra dharmaśca śāśvataḥ || 154 ||
[Analyze grammar]

puṣkarasthena vai pūrvaṃ brahmaṇā lokakāriṇā |
śatatrayeṇa yajñānāmiṣṭaṃ ṣaṣṭyādhikena ca || 155 ||
[Analyze grammar]

iṣṭvā hi rājasūyena somo dharmeṇa dharmavit |
prāptaḥ sarveṣu lokeṣu kīrtisthānamanuttamam || 156 ||
[Analyze grammar]

iṣṭvā hi rājasūyena mitraḥ śatrunibarhaṇaḥ |
muhūrtena suśuddhena varuṇatvamupāgataḥ || 157 ||
[Analyze grammar]

tasmādbhavaṃtau saṃciṃtya kāryesminvadataṃ hi tat |
bharata uvāca |
tvaṃ dharmaḥ paramaḥ sādho tvayi sarvā vasuṃdharā || 158 ||
[Analyze grammar]

pratiṣṭhitā mahābāho yaśaścāmitavikrama |
mahīpālāśca sarve tvāṃ prajāpatimivāmarāḥ || 159 ||
[Analyze grammar]

nirīkṣaṃte mahātmāno lokanātha tathā vayaṃ |
prajāśca pitṛvadrājanpaśyaṃti tvāṃ mahāmate || 160 ||
[Analyze grammar]

pṛthivyāṃ gatibhūtosi prāṇināmiha rāghava |
satvamevaṃvidhaṃ yajñaṃ nāharttāsi paraṃtapa || 161 ||
[Analyze grammar]

pṛthivyāṃ sarvabhūtānāṃ vināśo dṛśyate yataḥ |
śrūyate rājaśārdūla somasya manujeśvara || 162 ||
[Analyze grammar]

jyotiṣāṃ sumahadyuddhaṃ saṃgrāme tārakāmaye |
tārā bṛhaspaterbhāryā hṛtā somenakāmataḥ || 163 ||
[Analyze grammar]

tatra yuddhaṃ mahadvṛttaṃ devadānavanāśanam |
varuṇasya kratau ghore saṃgrāme matsyakacchapāḥ || 164 ||
[Analyze grammar]

nivṛtte rājaśārdūla sarve naṣṭā jalecarāḥ |
hariścaṃdrasya yajñāṃte rājasūyasya rāghava || 165 ||
[Analyze grammar]

āḍībakaṃmahadyuddhaṃ sarvalokavināśanam |
pṛthivyāṃ yāni satvāni tiryagyonigatāni vai || 166 ||
[Analyze grammar]

divyānāṃ pārthivānāṃ ca rājasūye kṣayaḥ śrutaḥ |
sa tvaṃ puruṣaśārdūla buddhyā saṃciṃtya pārthiva || 167 ||
[Analyze grammar]

prāṇināṃ ca hitaṃ saumyaṃ pūrṇadharmaṃ samācara |
bharatasya vacaḥ śrutvā rāghavaḥ prāha sādaram || 168 ||
[Analyze grammar]

prītosmi tava dharmajña vākyenānena śatruhan |
nivartitā rājasūyānmatirme dharmavatsala || 169 ||
[Analyze grammar]

pūrṇaṃ dharmaṃ kariṣyāmi kānyakubje ca vāmanam |
sthāpayiṣyāmyahaṃ vīra sā me khyātirdivaṃ gatā || 170 ||
[Analyze grammar]

bhaviṣyati na saṃdeho yathā gaṃgā bhagīrathāt || 171 ||
[Analyze grammar]