Chapter 38

[English text for this chapter is available]

bhīṣma uvāca |
kathaṃ rāmeṇa viprarṣe kānyakubje tu vāmanaḥ |
sthāpitaḥ kva ca labdhosau vistarānmama kīrtaya || 1 ||
[Analyze grammar]

tathā hi madhurā caiṣā yā vāṇī rāmakīrtane |
kīrtitā bhagavanmahyaṃ hṛtā karṇasukhāvaha || 2 ||
[Analyze grammar]

anurāgeṇa taṃ lokāḥ snehātpaśyaṃti rāghavam |
dharmajñaśca kṛtajñaśca buddhyā ca pariniṣṭhitaḥ || 3 ||
[Analyze grammar]

praśāsti pṛthivīṃ sarvāṃ dharmeṇa susamāhitaḥ |
tasminśāsati vai rājyaṃ sarvakāmaphalādrumāḥ || 4 ||
[Analyze grammar]

rasavaṃtaḥ prabhūtāśca vāsāṃsi vividhāni ca |
akṛṣṭapacyā pṛthivī niḥsapatnā mahātmanaḥ || 5 ||
[Analyze grammar]

devakāryaṃ kṛtaṃ tena rāvaṇo lokakaṃṭakaḥ |
saputromātyasahito līlayaiva nipātitaḥ || 6 ||
[Analyze grammar]

tasyabuddhissamutpannā pūrṇe dharme dvijottama |
tasyāhaṃ caritaṃ sarvaṃ śrotumicchāmi vai mune || 7 ||
[Analyze grammar]

pulastya uvāca |
kasyacittvatha kālasya rāmo dharmapathe sthitaḥ |
yaccakāra mahābāho śṛṇuṣvaikamanā nṛpa || 8 ||
[Analyze grammar]

sasmāra rākṣaseṃdraṃ taṃ kathaṃ rājā vibhīṣaṇaḥ |
laṃkāyāṃ saṃsthito rājyaṃ kariṣyati ca rākṣasaḥ || 9 ||
[Analyze grammar]

gīrvāṇeṣu prātikūlyaṃ vināśasya tu lakṣaṇam |
mayā tasya tu taddattaṃ rājyaṃ caṃdrārkakālikam || 10 ||
[Analyze grammar]

tasyāvināśataḥ kīrtiḥ sthirā me śāśvatī bhavet |
rāvaṇena tapastaptaṃ vināśāyātmanastviha || 11 ||
[Analyze grammar]

vidhvastaḥ sa ca pāpiṣṭho devakārye mayādhunā |
tadidānīṃ mayānveṣyaḥ svayaṃ gatvā vibhīṣaṇaḥ || 12 ||
[Analyze grammar]

saṃdeṣṭavyaṃ hitaṃ tasya yena tiṣṭhetsa śāśvatam |
evaṃ ciṃtayatastasya rāmasyāmitatejasaḥ || 13 ||
[Analyze grammar]

ājagāmātha bharato rāmaṃ dṛṣṭvābravīdidam |
kiṃ tvaṃ ciṃtayase deva na rahasyaṃ vadasva me || 14 ||
[Analyze grammar]

devakārye dharāyāṃ vā svakārye vā narottama |
evaṃ bruvaṃtaṃ bharataṃ dhyāyamānamavasthitam || 15 ||
[Analyze grammar]

abravīdrāghavo vākyaṃ rahasyaṃ tu na vai tava |
bhavānbahiścaraḥ prāṇo lakṣmaṇaśca mahāyaśāḥ || 16 ||
[Analyze grammar]

avedyaṃ bhavato nāsti mama satyaṃ vidhāraya |
eṣā me mahatī ciṃtā kathaṃ devairvibhīṣaṇaḥ || 17 ||
[Analyze grammar]

vartate yaddhitārthaṃ vai daśagrīvo nipātitaḥ |
gamiṣye tadahaṃ laṃkāṃ yatra cāsau vibhīṣaṇaḥ || 18 ||
[Analyze grammar]

taṃ ca dṛṣṭvā purīṃ tāṃ tu kāryamuktvā ca rākṣasam |
ālokya sarvavasudhāṃ sugrīvaṃ vānareśvaram || 19 ||
[Analyze grammar]

mahārājaṃ ca śatrughnaṃ bhātṛputrāṃśca sarvaśaḥ |
evaṃ vadati kākutsthe bharataḥ purataḥ sthitaḥ || 20 ||
[Analyze grammar]

uvāca rāghavaṃ vākyaṃ gamiṣye bhavatā saha |
evaṃ kuru mahābāho saumitririha tiṣṭhatu || 21 ||
[Analyze grammar]

ityuktvā bharataṃ rāmaḥ saumitraṃ cāha vai pure |
rakṣākāryā tvayā vīra yāvadāgamanaṃ hi nau || 22 ||
[Analyze grammar]

evaṃ lakṣmaṇamādiśya dhyātvā vai puṣpakaṃ nṛpa |
āruroha sa vai yānaṃ kausalyānaṃdavardhanaḥ || 23 ||
[Analyze grammar]

puṣpakaṃ tu tataḥ prāptaṃ gāṃdhāraviṣayo yataḥ |
bharatasya sutau dṛṣṭvā jagannītiṃ nirīkṣya ca || 24 ||
[Analyze grammar]

pūrvāṃ diśaṃ tato gatvā lakṣmaṇasya sutau yataḥ |
pureṣu teṣu ṣaḍrātramuṣitvā raghunaṃdanau || 25 ||
[Analyze grammar]

gatau tena vimānena dakṣiṇāmabhito diśam |
gaṃgāyāmunasaṃbhedaṃ prayāgamṛṣisevitam || 26 ||
[Analyze grammar]

abhivādya bharadvājamatrerāśramamīyatuḥ |
saṃbhāṣya ca munīṃstatra janasthānamupāgatau || 27 ||
[Analyze grammar]

rāma uvāca |
atra pūrvaṃ hṛtā sītā rāvaṇena durātmanā |
hatvā jaṭāyuṣaṃ gṛdhraṃ yosau pitṛsakho hi nau || 28 ||
[Analyze grammar]

atrāsmākaṃ mahadyuddhaṃ kabaṃdhena kubuddhinā |
hatena tena dagdhena sītāste rāvaṇālaye || 29 ||
[Analyze grammar]

ṝṣyamūke girivare sugrīvo nāma vānaraḥ |
sa te kariṣyate sāhyaṃ paṃpāṃ vraja sahānujaḥ || 30 ||
[Analyze grammar]

paṃpāsaraḥ samāsādya śabarīṃ gaccha tāpasīm |
ityukto duḥkhito vīra nirāśo jīvite sthitaḥ || 31 ||
[Analyze grammar]

iyaṃ sā nalinī vīra yasyāṃ vai lakṣmaṇovadat |
mā kṛthāḥ puruṣavyāghra śokaṃ śatruvināśana || 32 ||
[Analyze grammar]

ājñākāriṇi bhṛtye ca mayi prāpsyasi maithilīm |
atra me vārṣikā māsā gatā varṣaśatopamāḥ || 33 ||
[Analyze grammar]

atraiva nihato vālī sugrīvārthe paraṃtapa |
eṣā sā dṛśyate nūnaṃ kiṣkiṃdhā vālipālitā || 34 ||
[Analyze grammar]

yasyāṃ vai sa hi dharmātmā sugrīvo vānareśvaraḥ |
vānaraiḥ sahito vīra tāvadāste samāḥ śatam || 35 ||
[Analyze grammar]

vānaraissaha sugrīvo yāvadāste sabhāṃ gataḥ |
tāvattatrāgatau vīrau puryāṃ bharatarāghavau || 36 ||
[Analyze grammar]

dṛṣṭvā sa bhrātarau prāptau praṇipatyābravīdidam |
kva yuvāṃ prasthitau vīrau kāryaṃ kiṃ nu kariṣyathaḥ || 37 ||
[Analyze grammar]

viniveśyāsane tau ca dadāvarghye svayaṃ tadā |
evaṃ sabhāsthite tatra dharmiṣṭe raghunaṃdane || 38 ||
[Analyze grammar]

aṃgadotha hanūmāṃśca nalo nīlaśca pāṭalaḥ |
gajo gavākṣo gavayaḥ panasaśca mahāyaśāḥ || 39 ||
[Analyze grammar]

purodhaso maṃtriṇaśca daivajño dadhivakrakaḥ |
nīlaśśatabalirmaindo dvivido gaṃdhamādanaḥ || 40 ||
[Analyze grammar]

vīrabāhussubāhuśca vīraseno vināyakaḥ |
sūryābhaḥ kumudaścaiva suṣeṇo hariyūthapaḥ || 41 ||
[Analyze grammar]

ṝṣabho vinataścaiva gavākhyo bhīmavikramaḥ |
ṝkṣarājaśca dhūmraśca sahasainyairupāgatāḥ || 42 ||
[Analyze grammar]

aṃtaḥpurāṇi sarvāṇi rumā tārā tathaiva ca |
avarodhoṃgadasyāpi tathānyāḥ paricārikāḥ || 43 ||
[Analyze grammar]

praharṣamatulaṃ prāpya sādhusādhviti cābruvan |
vānarāśca mahātmānaḥ sugrīvasahitāstadā || 44 ||
[Analyze grammar]

vānaryaśca mahābhāgāstārādyāstatra rāghavam |
abhiprekṣyāśrukaṃṭhyaśca praṇipatyedamabruvan || 45 ||
[Analyze grammar]

kva sā devī tvayā deva yā vinirjityarāvaṇam |
śuddhiṃ kṛtvā hi te vahnau pituragra umāpateḥ || 46 ||
[Analyze grammar]

tvayānītā purīṃ rāma na tāṃ paśyāmi tegrataḥ |
na vinā tvaṃ tayā deva śobhase raghunaṃdana || 47 ||
[Analyze grammar]

tvayā vināpi sādhvī sā kva nu tiṣṭhati jānakī |
anyāṃ bhāryāṃ na te vedmi bhāryāhīno na śobhase || 48 ||
[Analyze grammar]

krauṃcayugmaṃ mitho yadvaccakravākayugaṃ yathā |
evaṃ vadaṃtīṃ tāṃ tārāṃ tārādhipasamānanām || 49 ||
[Analyze grammar]

prāha pravacasāṃ śreṣṭho rāmo rājīvalocanaḥ |
cārudaṃṣṭre viśālākṣi kālo hi duratikramaḥ || 50 ||
[Analyze grammar]

sarvaṃ kālakṛtaṃ viddhi jagadetaccarācaram |
visṛjyatāḥ striyaḥ sarvāḥ sugrīvobhimukhaḥ sthitaḥ || 51 ||
[Analyze grammar]

sugrīva uvāca |
bhavaṃtau yena kāryeṇa ihāyātau nareśvarau |
taccāpi kathyatāṃ śīghraṃ kṛtyakālo hi vartate || 52 ||
[Analyze grammar]

bruvāṇamevaṃ sugrīvaṃ bharato rāmacoditaḥ |
ācacakṣe ca gamanaṃ laṃkāyāṃ rāghavasya tu |
tau cābravīcca sugrīvo bhavadbhyāṃ sahitaḥ purīm || 53 ||
[Analyze grammar]

gamiṣye rākṣasaṃ deva draṣṭuṃ tatra vibhīṣaṇam |
sugrīveṇaivamukte tu gacchasvetyāha rāghavaḥ || 54 ||
[Analyze grammar]

sugrīvo rāghavau tau ca puṣpake tu sthitāstrayaḥ |
tāvatprāptaṃ vimānaṃ tu samudrasyottaraṃ taṭam || 55 ||
[Analyze grammar]

abravīdbharataṃ rāmo hyatra me rākṣaseśvaraḥ |
caturbhiḥ sacivaiḥ sārdhaṃ jīvitārthe vibhīṣaṇaḥ || 56 ||
[Analyze grammar]

prāptastato lakṣmaṇena laṃkārājyebhiṣecitaḥ |
atra cāhaṃ samudrasya parepāre sthitastryaham || 57 ||
[Analyze grammar]

darśanaṃ dāsyate me'sau jñātikāryaṃ bhaviṣyati |
tāvanna darśanaṃ mahyaṃ dattametena śatruhan || 58 ||
[Analyze grammar]

tataḥ kopaḥ sumadbhūtaścaturthehani rāghava |
dhanurāyamya vegena divyamastraṃ kare dhṛtam || 59 ||
[Analyze grammar]

dṛṣṭvā māṃ śaraṇānveṣī bhīto lakṣmaṇamāśritaḥ |
sugrīveṇānunīto'smi kṣamyatāṃ rāghava tvayā || 60 ||
[Analyze grammar]

tato mayotkṣiptaśaro marudeśe hyapākṛtaḥ |
tatassamudrarājena bhṛśaṃ vinayaśālinā || 61 ||
[Analyze grammar]

uktohaṃ setubaṃdhena laṃkāṃ tvaṃ vraja rāghava |
laṃghayitvā naravyāghra vāripūrṇaṃ mahodadhim || 62 ||
[Analyze grammar]

eṣa seturmayā baddhaḥ samudre varuṇālaye |
tribhirdinaiḥ samāptiṃ vai nīto vānarasattamaiḥ || 63 ||
[Analyze grammar]

prathame divase baddho yojanāni caturdaśa |
dvitīyehani ṣaṭtriṃśattṛtīyerdhaśataṃ tathā || 64 ||
[Analyze grammar]

iyaṃ sā dṛśyate laṃkā svarṇaprākāratoraṇā |
avarodho mahānatra kṛto vānarasattamaiḥ || 65 ||
[Analyze grammar]

atra yuddhaṃ mahadvṛttaṃ caitrāśuklacaturdaśi |
aṣṭacatvāriṃśaddinaṃ yatrāsau rāvaṇo hataḥ || 66 ||
[Analyze grammar]

atra prahasto nīlena hato rākṣasapuṃgavaḥ |
hanūmatā ca dhūmrākṣo hyatraiva vinipātitaḥ || 67 ||
[Analyze grammar]

mahodarātikāyau ca sugrīveṇa mahātmanā |
atraiva me kuṃbhakarṇo lakṣmaṇeneṃdrajittathā || 68 ||
[Analyze grammar]

mayā cātra daśagrīvo hato rākṣasapuṃgavaḥ |
atra saṃbhāṣituṃ prāpto brahmā lokapitāmahaḥ || 69 ||
[Analyze grammar]

pārvatyā sahito devaḥ śūlapāṇirvṛṣadhvajaḥ |
maheṃdrādyāḥ suragaṇāḥ sagaṃdharvāssa kiṃnarāḥ || 70 ||
[Analyze grammar]

pitā me ca samāyāto mahārājastriviṣṭapāt |
vṛtaścāpsarasāṃ saṃghairvidyādharagaṇaistathā || 71 ||
[Analyze grammar]

teṣāṃ samakṣaṃ sarveṣāṃ jānakī śuddhimicchatā |
uktā sītā havyavāhaṃ praviṣṭā śuddhimāgatā || 72 ||
[Analyze grammar]

laṃkādhipaiḥ surairdṛṣṭā gṛhītā pitṛśāsanāt |
athāpyuktotha rājñāhamayodhyāṃ gaccha putrakam || 73 ||
[Analyze grammar]

na me svargo bahumatastvayā hīnasya rāghava |
tāritohaṃ tvayā putra prāpto'smīndrasalokatām || 74 ||
[Analyze grammar]

lakṣmaṇaṃ cābravīdrājā putra puṇyaṃ tvayārjitam |
bhrātrāsamamatho divyāṃllokānprāpsyasi cottamān || 75 ||
[Analyze grammar]

āhūya jānakīṃ rājā vākyaṃ cedamuvāca ha |
na ca manyustvayā kāryo bhartāraṃ prati suvrate || 76 ||
[Analyze grammar]

khyātirbhaviṣyatyevāgryā bhartuste śubhalocane |
evaṃ vadati rāme tu puṣpake ca vyavasthite || 77 ||
[Analyze grammar]

tatra ye rākṣasavarāste gatvāśu vibhīṣaṇaṃ |
prāpto rāmaḥ sasugrīvaścārā itthaṃ tadā'vadan || 78 ||
[Analyze grammar]

vibhīṣaṇastu tacchrutvā rāmāgamanamaṃtike |
cārāṃstānpūjayāmāsa sarvakāmadhanādibhiḥ || 79 ||
[Analyze grammar]

alaṃkṛtya purīṃ tāṃ tu niṣkrāntaḥ sacivaiḥ saha |
dṛṣṭvā rāmaṃ vimānasthaṃ merāviva divākaraṃ || 80 ||
[Analyze grammar]

aṣṭāṃgapraṇipātena natvā rāghavamabravīt |
adya me saphalaṃ janma prāptāḥ sarve manorathāḥ || 81 ||
[Analyze grammar]

yaddṛṣṭau devacaraṇau jagadvaṃdyāvaniṃditau |
kṛtaḥ ślāghyosmyahaṃ deva śakrādīnāṃ divaukasāṃ || 82 ||
[Analyze grammar]

ātmānamadhikaṃ manye tridaśeśātpuraṃdarāt |
rāvaṇasya gṛhe dīpte sarvaratnopaśobhite || 83 ||
[Analyze grammar]

upaviṣṭe tu kākutsthe arghaṃ datvā vibhīṣaṇaḥ |
uvāca prāṃjalirbhūtvā sugrīvaṃ bharataṃ tathā || 84 ||
[Analyze grammar]

ihāgatasya rāmasya yaddāsye na tadasti me |
iyaṃ ca laṃkā rāmeṇa ripuṃ trailokyakaṃṭakam || 85 ||
[Analyze grammar]

hatvā tu pāpakarmāṇaṃ dattā pūrvaṃ purī mama |
iyaṃ purī ime dārā amī putrāstathā hyahaṃ || 86 ||
[Analyze grammar]

sarvametanmayā dattaṃ sarvamakṣayamastu te |
tataḥ prakṛtayaḥ sarvā laṃkāvāsijanāśca ye || 87 ||
[Analyze grammar]

ājagmū rāghavaṃ draṣṭuṃ kautūhalasamanvitāḥ |
ukto vibhīṣaṇastaistu rāmaṃ darśaya naḥ prabho || 88 ||
[Analyze grammar]

vibhīṣaṇena kathitā rāghavāya mahātmane |
teṣāmupāyanaṃ sarvaṃ bharato rāmacoditaḥ || 89 ||
[Analyze grammar]

jagrāha vānarendraśca dhanaratnaughasaṃcayaṃ |
evaṃ tatra tryahaṃ rāmo hyavasadrākṣasālaye || 90 ||
[Analyze grammar]

caturthehani saṃprāpte rāme cāpi sabhāsthite |
kekasī putramāhedaṃ rāmaṃ drakṣyāmi putraka || 91 ||
[Analyze grammar]

dṛṣṭe tasminmahatpuṇyaṃ prāpyate munisattamaiḥ |
viṣṇureṣa mahābhāgaścaturmūrtissanātanaḥ || 92 ||
[Analyze grammar]

sītā lakṣmīrmahābhāga na buddhā sāgrajena te |
pitrā te pūrvamākhyātaṃ devānāṃ divisaṃgame || 93 ||
[Analyze grammar]

kule raghūṇāṃ vai viṣṇuḥ putro daśarathasya tu |
bhaviṣyati vināśāya daśagrīvasya rakṣasaḥ || 94 ||
[Analyze grammar]

vibhīṣaṇa uvāca |
evaṃ kuruṣva vai mātargṛhāṇa navamaṃ varam |
pātraṃ caṃdanasaṃyuktaṃ dadhikṣaudrākṣataiḥ saha || 95 ||
[Analyze grammar]

dūrvayārghaṃ saha kuru rājaputrasya darśanam |
saramāmagrataḥ kṛtvā yāścānyā devakanyakāḥ || 96 ||
[Analyze grammar]

vrajasva rāghavābhyāśaṃ tasmādagre vrajāmyaham |
evamuktvā gataṃ rakṣo yatra rāmo vyavasthitaḥ || 97 ||
[Analyze grammar]

utsārya dānavānsarvānrāmaṃ draṣṭuṃ samāgatān |
sabhāṃ tāṃ vimalāṃ kṛtvā rāmaṃ svābhimukhe sthitam || 98 ||
[Analyze grammar]

vibhīṣaṇa uvāca |
vijñāpyaṃ śṛṇu me deva vadataśca viśāṃpate |
daśagrīvaṃ kuṃbhakarṇaṃ yā ca māṃ cāpyajījanat || 99 ||
[Analyze grammar]

iyaṃ sā devamātā naḥ pādau te draṣṭumicchati |
tasyāstu tvaṃ kṛpāṃ kṛtvā darśanaṃ dātu marhasi || 100 ||
[Analyze grammar]

rāma uvāca |
ahaṃ tasyāḥ samīpaṃ tu mātṛdarśanakāṃkṣayā |
gamiṣye rākṣaseṃdra tvaṃ śīghraṃ yāhi mamāgrataḥ || 101 ||
[Analyze grammar]

pratijñāya tu taṃ vākyamuttasthau ca varāsanāt |
mūrdhni cāṃjalimādhāya praṇāmamakarodvibhuḥ || 102 ||
[Analyze grammar]

abhivādayehaṃ bhavatīṃ mātā bhavasi dharmataḥ |
mahatā tapasā cāpi puṇyena vividhena ca || 103 ||
[Analyze grammar]

imau te caraṇau devi mānavo yadi paśyati |
pūrṇassyāttadahaṃ prīto dṛṣṭvemau putravatsale || 104 ||
[Analyze grammar]

kausalyā me yathā mātā bhavatī ca tathā mama |
kekasī cābravīdrāmaṃ ciraṃ jīva sukhī bhava || 105 ||
[Analyze grammar]

bhartrā me kathitaṃ vīra viṣṇurmānuṣarūpadhṛt |
avatīrṇo raghukule hitārthetra divaukasām || 106 ||
[Analyze grammar]

daśagrīva vināśāya bhūtiṃ dātuṃ vibhīṣaṇe |
vālino nidhanaṃ caiva setubaṃdhaṃ ca sāgare || 107 ||
[Analyze grammar]

putro daśarathasyaiva sarvaṃ sa ca kariṣyati |
idānīṃ tvaṃ mayā jñātaḥ smṛtvā tadbhartṛbhāṣitam || 108 ||
[Analyze grammar]

sītā lakṣmīrbhavānviṣṇurdevā vai vānarāstathā |
gṛhaṃ putra gamiṣyāmi sthirakīrtimavāpnuhi || 109 ||
[Analyze grammar]

saramovāca |
ihaiva vatsaraṃ pūrṇamaśokavanikāsthitā |
sevitā jānakī deva sukhaṃ tiṣṭhati te priyā || 110 ||
[Analyze grammar]

nityaṃ smarāmi vai pādau sītāyāstu paraṃtapa |
kadā drakṣyāmi tāṃ devīṃ ciṃtayānā tvaharniśam || 111 ||
[Analyze grammar]

kimarthaṃ devadevena nānītā jānakī tviha |
ekākī naiva śobhethā yoṣitā ca tayā vinā || 112 ||
[Analyze grammar]

samīpe śobhate sītā tvaṃ ca tasyāḥ paraṃtapa |
evaṃ bruvantyāṃ bharataḥ keyamityabravīdvacaḥ || 113 ||
[Analyze grammar]

tataśceṃgitavidrāmo bharataṃ prāha satvaram |
vibhīṣaṇasya bhāryā vai saramā nāma nāmataḥ || 114 ||
[Analyze grammar]

priyā sakhī mahābhāgā sītāyāssudṛḍhaṃ matā |
sarvaṃkālakṛtaṃ paśya na jāne kiṃ kariṣyati || 115 ||
[Analyze grammar]

gaccha tvaṃ subhage bhartṛgehaṃ pālaya śobhane |
māṃ tyaktvā hi gatā devī bhāgyahīnaṃ gatiryathā || 116 ||
[Analyze grammar]

tayā virahitaḥ subhru ratiṃ viṃde na karhicit |
śūnyā eva diśaḥ sarvāḥ paśyāmīha punarbhraman || 117 ||
[Analyze grammar]

visṛjyatāṃ ca saramāṃ sītāyāstu priyāṃ sakhīm |
gatāyāmatha kekasyāṃ rāmaḥ prāha vibhīṣaṇam || 118 ||
[Analyze grammar]

daivatebhyaḥ priyaṃ kāryaṃ nāparādhyāstvayā surāḥ |
ājñayā rājarājasya vartitavyaṃ tvayānagha || 119 ||
[Analyze grammar]

laṃkāyāṃ mānuṣo yo vai samāgacchetkathaṃcana |
rākṣasairna ca haṃtavyo draṣṭavyosau yathā tvaham || 120 ||
[Analyze grammar]

vibhīṣaṇa uvāca |
ājñayāhaṃ naravyāghra kariṣye sarvameva tu |
vibhīṣaṇe hi vadati vāyū rāmamuvāca ha || 121 ||
[Analyze grammar]

ihāstivaiṣṇavī mūrtiḥ pūrvaṃ baddho baliryayā |
tāṃ nayasva mahābhāga kānyakubje pratiṣṭhaya || 122 ||
[Analyze grammar]

viditvā tadabhiprāyaṃ vāyunā samudāhṛtam |
vibhīṣaṇastvalaṃkṛtya ratnaiḥ sarvaiśca vāmanam || 123 ||
[Analyze grammar]

ānīya cārpayadrāme vākyaṃ cedamuvāca ha |
yadā vai nirjitaḥ śakro meghanādena rāghava || 124 ||
[Analyze grammar]

tadā vai vāmanastveṣa ānīto jalajekṣaṇa |
nayasva tamimaṃ deva devadevaṃ pratiṣṭhaya || 125 ||
[Analyze grammar]

tatheti rāghavaḥ kṛtvā puṣpakaṃ ca samāruhat |
dhanaṃ ratnamasaṃkhyeyaṃ vāmanaṃ ca surottamam || 126 ||
[Analyze grammar]

gṛhya sugrīvabharatāvārūḍhau vāmanādanu |
vrajannevāṃbare rāmastiṣṭhetyāha vibhīṣaṇam || 127 ||
[Analyze grammar]

rāghavasya vacaḥ śrutvā bhūyopyāha sa rāghavam |
kariṣye sarvametaddhi yadājñaptaṃ vibho tvayā || 128 ||
[Analyze grammar]

setunānena rājeṃdra pṛthivyāṃ sarvamānavāḥ |
āgatya pratibādherannājñābhaṃgo bhavettava || 129 ||
[Analyze grammar]

kotra me niyamo deva kinnu kāryaṃ mayā vibho |
śrutvaitadrāghavo vākyaṃ rākṣasottamabhāṣitam || 130 ||
[Analyze grammar]

kārmukaṃ gṛhya hastena rāmaḥ setuṃ dvidhācchinat |
trirvibhajya ca vegena madhye vai daśayojanam || 131 ||
[Analyze grammar]

chitvā tu yojanaṃ caikamekaṃ khaṃḍatrayaṃ kṛtam |
velāvanaṃ samāsādya rāmaḥ pūjāṃ ramāpateḥ || 132 ||
[Analyze grammar]

kṛtvā rāmeśvaraṃ nāmnā devadevaṃ janārdanaṃ |
abhiṣicyātha saṃgṛhya vāmanaṃ raghunaṃdanaḥ || 133 ||
[Analyze grammar]

dakṣiṇādudadheścaiva nirjagāma tvarānvitaḥ |
aṃtarikṣādabhūdvāṇī meghagaṃbhīraniḥsvanā || 134 ||
[Analyze grammar]

rudra uvāca |
bho bho rāmāstu bhadraṃ te sthito'hamiha sāṃpratam |
yāvajjagadidaṃ rāma yāvadeṣā dharā sthitā || 135 ||
[Analyze grammar]

tāvadeva ca te setu tīrthaṃ sthāsyati rāghava |
śrutvaivaṃ devadevasya giraṃ tāmamṛtopamām || 136 ||
[Analyze grammar]

rāma uvāca |
namaste devadeveśa bhaktānāmabhayaṃkara |
gaurīkāṃta namastubhyaṃ dakṣayajñavināśana || 137 ||
[Analyze grammar]

namo bhavāya śarvāya rudrāya varadāya ca |
paśūnāṃpataye nityaṃ cogrāya ca kapardine || 138 ||
[Analyze grammar]

mahādevāya bhīmāya tryaṃbakāya diśāṃpate |
īśānāya bhagaghnāya namostvaṃdhakaghātine || 139 ||
[Analyze grammar]

nīlagrīvāya ghorāya vedhase vedhasā stuta |
kumāraśatrunighnāya kumārajananāya ca || 140 ||
[Analyze grammar]

vilohitāya dhūmrāya śivāya krathanāya ca |
namo nīlaśikhaṃḍāya śūline daityanāśine || 141 ||
[Analyze grammar]

ugrāya ca trinetrāya hiraṇyavasuretase |
aniṃdyāyāṃbikābhartre sarvadevastutāya ca || 142 ||
[Analyze grammar]

abhigamyāya kāmyāya sadyojātāya vai namaḥ |
vṛṣadhvajāya muṃḍāya jaṭine brahmacāriṇe || 143 ||
[Analyze grammar]

tapyamānāya tapyāya brahmaṇyāya jayāya ca |
viśvātmane viśvasṛje viśvamāvṛtya tiṣṭhate || 144 ||
[Analyze grammar]

namo namostu divyāya prapannārtiharāya ca |
bhaktānukaṃpine deva viśvatejo manogate || 145 ||
[Analyze grammar]

pulastya uvāca |
evaṃ saṃstūyamānastu devadevo haro nṛpa |
uvāca rāghavaṃ vākyaṃ bhaktinamraṃ purāsthitam || 146 ||
[Analyze grammar]

rudra uvāca |
bho bho rāghava bhadraṃ te brūhi yatte manogatam |
bhavānnārāyaṇo nūnaṃ gūḍho mānuṣayoniṣu || 147 ||
[Analyze grammar]

avatīrṇo devakāryaṃ kṛtaṃ taccānagha tvayā |
idānīṃ svaṃ vrajasthānaṃ kṛtakāryosi śatruhan || 148 ||
[Analyze grammar]

tvayā kṛtaṃ paraṃ tīrthaṃ setvākhyaṃ raghunaṃdana |
āgatya mānavā rājanpaśyeyuriha sāgare || 149 ||
[Analyze grammar]

mahāpātakayuktā ye teṣāṃ pāpaṃ vilīyate |
brahmavadhyādipāpāni yāni kaṣṭāni kānicit || 150 ||
[Analyze grammar]

darśanādeva naśyaṃti nātra kāryā vicāraṇā |
gaccha tvaṃ vāmanaṃ sthāpya gaṃgātīre raghūttama || 151 ||
[Analyze grammar]

pṛthivyāṃ sarvaśaḥ kṛtvā bhāgānaṣṭau paraṃtapa |
śvetadvīpaṃ svakaṃ sthānaṃ vraja deva namostu te || 152 ||
[Analyze grammar]

praṇipatya tato rāmastīrthaṃ prāptaśca puṣkaram |
vimānaṃ tu na yātyūrdhvaṃ veṣṭitaṃ tattu rāghavaḥ || 153 ||
[Analyze grammar]

kimidaṃ veṣṭitaṃ yānaṃ nirālaṃbe'mbare sthitam |
bhavitavyaṃ kāraṇena paśyetyāha sma vānaram || 154 ||
[Analyze grammar]

sugrīvo rāmavacanādavatīrya dharātale |
sa ca paśyati brahmāṇaṃ surasiddhasamanvitam || 155 ||
[Analyze grammar]

brahmarṣisaṅghasahitaṃ caturvedasamanvitam |
dṛṣṭvā''gatyābravīdrāmaṃ sarvalokapitāmahaḥ || 156 ||
[Analyze grammar]

sahito lokapālaiśca vasvādityamarudgaṇaiḥ |
taṃ devaṃ puṣpakaṃ naiva laṃghayeddhi pitāmaham || 157 ||
[Analyze grammar]

avatīrya tato rāmaḥ puṣpakāddhemabhūṣitāt |
natvā viriṃcanaṃ devaṃ gāyatryā saha saṃsthitam || 158 ||
[Analyze grammar]

aṣṭāṃgapraṇipātena paṃcāṃgāliṃgitāvaniḥ |
tuṣṭāva praṇato bhūtvā devadevaṃ viriṃcanam || 159 ||
[Analyze grammar]

rāma uvāca |
namāmi lokakartāraṃ prajāpatisurārcitam |
devanāthaṃ lokanāthaṃ prajānāthaṃ jagatpatim || 160 ||
[Analyze grammar]

namaste devadeveśa surāsuranamaskṛta |
bhūtabhavyabhavannātha haripiṃgalalocana || 161 ||
[Analyze grammar]

bālastvaṃ vṛddharūpī ca mṛgacarmāsanāṃbaraḥ |
tāraṇaścāsi devastvaṃ trailokyaprabhurīśvaraḥ || 162 ||
[Analyze grammar]

hiraṇyagarbhaḥ padmagarbhaḥ vedagarbhaḥ smṛtipradaḥ |
mahāsiddho mahāpadmī mahādaṃḍī ca mekhalī || 163 ||
[Analyze grammar]

kālaśca kālarūpī ca nīlagrīvo vidāṃvaraḥ |
vedakartārbhako nityaḥ paśūnāṃ patiravyayaḥ || 164 ||
[Analyze grammar]

darbhapāṇirhaṃsaketuḥ kartā hartā haro hariḥ |
jaṭī muṃḍī śikhī daṃḍī laguḍī ca mahāyaśāḥ || 165 ||
[Analyze grammar]

bhūteśvaraḥ surādhyakṣaḥ sarvātmā sarvabhāvanaḥ |
sarvagaḥ sarvahārī ca sraṣṭā ca gururavyayaḥ || 166 ||
[Analyze grammar]

kamaṃḍaludharo devaḥ sruksruvādidharastathā |
havanīyo'rcanīyaśca oṃkāro jyeṣṭhasāmagaḥ || 167 ||
[Analyze grammar]

mṛtyuścaivāmṛtaścaiva pāriyātraśca suvrataḥ |
brahmacārī vratadharo guhāvāsī supaṅkajaḥ || 168 ||
[Analyze grammar]

amaro darśanīyaśca bālasūryanibhastathā |
dakṣiṇe vāmataścāpi patnībhyāmupasevitaḥ || 169 ||
[Analyze grammar]

bhikṣuśca bhikṣurūpaśca trijaṭī labdhaniścayaḥ |
cittavṛttikaraḥ kāmo madhurmadhukarastathā || 170 ||
[Analyze grammar]

vānaprastho vanagata āśramī pūjitastathā |
jagaddhātā ca karttā ca puruṣaḥ śāśvato dhruvaḥ || 171 ||
[Analyze grammar]

dharmādhyakṣo virūpākṣastridharmo bhūtabhāvanaḥ |
trivedo bahurūpaśca sūryāyutasamaprabhaḥ || 172 ||
[Analyze grammar]

mohakovaṃdhakaścaivadānavānāṃviśeṣataḥ |
devadevaśca padmāṅkastrinetro'bjajaṭastathā || 173 ||
[Analyze grammar]

hariśmaśrurdhanurdhārī bhīmo dharmaparākramaḥ |
evaṃ stutastu rāmeṇa brahmā brahmavidāṃvaraḥ || 174 ||
[Analyze grammar]

uvāca praṇataṃ rāmaṃ kare gṛhya pitāmahaḥ |
viṣṇustvaṃ mānuṣe dehe'vatīrṇo vasudhātale || 175 ||
[Analyze grammar]

kṛtaṃ tadbhavatā sarvaṃ devakāryaṃ mahāvibho |
saṃsthāpya vāmanaṃ devaṃ jāhnavyā dakṣiṇe taṭe || 176 ||
[Analyze grammar]

ayodhyāṃ svapurīṃ gatvā suralokaṃ vrajasva ca |
visṛṣṭo brahmaṇā rāmaḥ praṇipatya pitāmahaṃ || 177 ||
[Analyze grammar]

ārūḍhaḥ puṣpakaṃ yānaṃ saṃprāpto madhurāṃ purīm |
samīkṣya putrasahitaṃ śatrughnaṃ śatrughātinaṃ || 178 ||
[Analyze grammar]

tutoṣa rāghavaḥ śrīmānbharataḥ sa harīśvaraḥ |
śatrughno bhrātarau prāptau śakropendrāvivāgatau || 179 ||
[Analyze grammar]

praṇipatya tato mūrdhnā paṃcāṃgāliṃgitāvaniḥ |
utthāpya cāṃkamāropya rāmo bhrātaramaṃjasā || 180 ||
[Analyze grammar]

bharataśca tataḥ paścātsugrīvastadanaṃtaraṃ |
upaviṣṭo'tha rāmāya so'rghamādāya satvaraṃ || 181 ||
[Analyze grammar]

rājyaṃ nivedayāmāsa cāṣṭāṃgaṃ rāghave tadā |
śrutvā prāptaṃ tato rāmaṃ sarvo vai māthuro janaḥ || 182 ||
[Analyze grammar]

varṇā brāhmaṇabhūyiṣṭhā draṣṭumenaṃ samāgatāḥ |
saṃbhāṣya prakṛtīḥ sarvā naigamānbrāhmaṇaiḥ saha || 183 ||
[Analyze grammar]

dināni paṃcoṣitvā'tra rāmo gaṃtuṃ mano dadhe |
śatrughnaśca tato rāme vājinotha gajāṃstathā || 184 ||
[Analyze grammar]

kṛtākṛtaṃ ca kanakaṃ tatropāyanamāharat |
rāmastvāha tataḥ prītaḥ sarvametanmayā tava || 185 ||
[Analyze grammar]

dattaṃ putrau te'bhiṣiñca rājānau māthure jane |
evamuktvā tato rāmaḥ prāpto madhyaṃdine ravau || 186 ||
[Analyze grammar]

mahodayaṃ samāsādya gaṃgātīre sa vāmanaṃ |
pratiṣṭhāpya dvijānāha bhāvinaḥ pārthivāṃstathā || 187 ||
[Analyze grammar]

mayā kṛto'yaṃ dharmasya seturbhūtivivardhanaḥ |
prāpte kāle pālanīyo na ca lopyaḥ kathaṃcana || 188 ||
[Analyze grammar]

prasāritakareṇaivaṃ prārthanaiṣā mayā kṛtā |
nṛpāḥ kṛte mayārthitve yatkṣemaṃ kriyatāmiha || 189 ||
[Analyze grammar]

nityaṃ dainaṃdinīpūjā kāryā sarvairataṃdritaiḥ |
grāmāndatvā dhanaṃ tacca laṃkāyā āhṛtaṃ ca yat || 190 ||
[Analyze grammar]

preṣayitvā ca kiṣkiṃdhāṃ sugrīvaṃ vānareśvaraṃ |
ayodhyāmāgato rāmaḥ puṣpakaṃ tamathābravīt || 191 ||
[Analyze grammar]

nāgaṃtavyaṃ tvayā bhūyastiṣṭha yatra dhaneśvaraḥ |
kṛtakṛtyastato rāmaḥ kartavyaṃ nāpyamanyata || 192 ||
[Analyze grammar]

pulastya uvāca |
evante bhīṣma rāmasya kathāyogena pārthiva |
utpattirvāmanasyoktā kiṃ bhūyaḥ śrotumicchasi || 193 ||
[Analyze grammar]

kathayāmi tu tatsarvaṃ yatra kautūhalaṃ nṛpa |
sarvaṃ te kīrttayiṣyāmi yenārthī nṛpanaṃdana || 194 ||
[Analyze grammar]