Chapter 8

athādbhutenāstanimeṣamudramunnidralomānamamuṃ yuvānam |
dṛśā papustāḥ sudṛśaḥ samustāḥ sutā ca bhīmasya mahīmaghonaḥ || 1 ||
[Analyze grammar]

kiyacciraṃ daivatabhāṣitāni nihnotumenaṃ prabhavantu nāma |
palālajālaiḥ pihitaḥ svayaṃ hi prakāśamāsādayatīkṣuḍimbhiḥ || 2 ||
[Analyze grammar]

apāṅgamapyāpa dṛśorna raśmirnalasya bhaimīmabhilaṣya yāvat |
smarāśugaḥ subhruvi tāvadasyāṃ pratyaṅgamāpuṅkhaśikhaṃ mamajja || 3 ||
[Analyze grammar]

yadakramaṃ vikramaśaktisāmyādupācaraddvāvapi pañcabāṇaḥ |
kathaṃ na vaimatyamamuṣya cakre śarairanardhārdhavibhāgabhāgbhiḥ || 4 ||
[Analyze grammar]

tasminnalo'sāviti sānvarajyatkṣaṇaṃ kṣaṇaṃ kveha sa ityudāsta |
punaḥ sma tasyāṃ valate'sya cittaṃ dūtyādanenātha punarnyavarti || 5 ||
[Analyze grammar]

kayācidālokya nalaṃ lalajje kayāpi tadbhāsi hṛdā mamajje |
taṃ kāpi mene smarameva kanyā bheje manobhūvaśabhūyamanyā || 6 ||
[Analyze grammar]

kastvaṃ kuto veti na jātu śekustaṃ praṣṭumapyapratibhātibhārāt |
uttasthurabhyutthitivāñchayeva nijāsanānnekarasāḥ kṛśāṅgyaḥ || 7 ||
[Analyze grammar]

svācchandyamānandaparamparāṇāṃ bhaimī tamālokya kimapyavāpa |
mahārayaṃ nirjhariṇīva vārāmāsādya dhārādharakelikālam || 8 ||
[Analyze grammar]

tatraiva magnā yadapaśyadagre nāsyādṛgasthāṅgamayāsyadanyat |
nādāsyadasyai yadi buddhidhārāṃ vicchidya vicchidya cirānnimeṣa || 9 ||
[Analyze grammar]

dṛśāpi sāliṅgitamaṅgamasya jagrāha nāgrāvagatāṅgaharṣaiḥ |
saṅgāntare'nantaramīkṣite tu nivṛtya sasmāra na pūrvadṛṣṭam || 10 ||
[Analyze grammar]

hitvaikamasyāpaghanaṃ viśantī taddṛṣṭiraṅgāntarabhuktisīmām |
ciraṃ cakārobhayalābhalobhātsvabhāvalolā gatamāgataṃ || 11 ||
[Analyze grammar]

nirīkṣitaṃ cāṅgamavīkṣitaṃ ca dṛśā pibantī rabhasena tasya |
samānamānandamiyaṃ dadhānā viveda bhedaṃ na vidarbhasubhruḥ || 12 ||
[Analyze grammar]

sūkṣme ghane naiṣadhakeśapāśe nipatya nispandatarībhavadbhyām |
tasyānubandhaṃ na vimocya gantumapāri tallocanakhañjanābhyām || 13 ||
[Analyze grammar]

bhūlokabharturmukhapāṇipādapadmaiḥ parīrambhamavāpya tasya |
damasvasurdṛṣṭisarojarājiściraṃ na tatyāja sabandhubandham || 14 ||
[Analyze grammar]

tatkālamānandamayībhavantī bhavattarānirvacanīyamohā |
sā muktasaṃsāridaśārasābhyāṃ dvisvādamullāsamabhuṅkta miṣṭam || 15 ||
[Analyze grammar]

dūte nalaśrībhṛti bhāvibhāvā kalaṅkinīyaṃ jani meti nūnam |
na saṃvyadhānnaiṣādhakāyamāyaṃ vidhiḥ svayaṃdūtamimāṃ pratīndram || 16 ||
[Analyze grammar]

puṇye manaḥ kasya munerapi syātpramāṇamāste yadaghe'pi dhāvat |
taccinti cittaṃ parameśvarastu bhaktasya hṛṣyatkaruṇo ruṇiddhi || 17 ||
[Analyze grammar]

sālīkadṛṣṭe madanonmadiṣṇuryathāpa śālīnatamā na maunam |
tathaiva tathye'pi nale na lebhe mugdheṣu kaḥ satyamṛṣāvivekaḥ || 18 ||
[Analyze grammar]

vyarthībhavadbhāvapidhānayatnā svareṇa sātha ślathagadgadena |
sakhīcaye sādhvasabaddhavāci svayaṃ tamūce namadānanenduḥ || 19 ||
[Analyze grammar]

natvā śiroratnarucāpi pādyaṃ saṃpādyamācāravidātithibhyaḥ |
priyākṣarālīrasadhārayāpi vaidhī vidheyā madhuparkatṛptiḥ || 20 ||
[Analyze grammar]

svātmāpi śīlena tṛṇaṃ vidheyaṃ deyā vihāyāsanabhūrnijāpi |
ānandabāṣpairapi kalpyamambhaḥ pṛcchā vidheyā madhubhirvacobhiḥ || 21 ||
[Analyze grammar]

padopahore'nupanamratāpi saṃbhāvyate'pāṃ tvarayāparādhaḥ |
tatkartumarhāñjalisañjanena svasaṃbhṛtiḥ prāñjalatāpi tāvat || 22 ||
[Analyze grammar]

purā parityajya mayātyasarji svamāsanaṃ tatkimiti kṣaṇaṃ na |
anarhamapyetadalaṃkriyeta prayātumīhā yadi cānyato'pi || 23 ||
[Analyze grammar]

nivedyatāṃ hanta samāpayantau śirīṣakoṣamradimābhimānam |
pādau kiyaddūramimau prayāse nidhitsate tucchadayaṃ manaste || 24 ||
[Analyze grammar]

anāyi deśaḥ katamastvayādya vasantamuktasya daśāṃ vanasya |
tvadāptasaṃketatayā kṛtārthā śravyāpi nānena janena saṃjñā || 25 ||
[Analyze grammar]

tīrṇaḥ kimarṇonidhireva naiṣa surakṣitebhūdiha yatpraveśaḥ |
phalaṃ kimetasya tu sāhasasya na tāvadadyāpi viniścinomi || 26 ||
[Analyze grammar]

tava praveśe sukṛtāni heturmanye madakṣṇorapi tāvadatra |
na lakṣito rakṣibhaṭairyadābhyāṃ pīto'si tanvā jitapuṣpadhanvā || 27 ||
[Analyze grammar]

yathā kṛtiḥ kācana te yathāvā dauvārikāndhaṃkaraṇī ca śaktiḥ |
rucyo rucībhirjitakāñcanībhistathāsi pīyūṣabhujāṃ sanābhiḥ || 28 ||
[Analyze grammar]

na manmathastvaṃ sa hi nāstimūrtirna cāśvineyaḥ sa hi nādvitīyaḥ |
cihnaiḥ kimanyairathavā taveyaṃ śrīreva tābhyāmadhiko viśeṣaḥ || 29 ||
[Analyze grammar]

ālokatṛptīkṛtaloka yastvāmasūta pīyūṣamayūkhamenam |
kaḥ spardhituṃ dhāvati sādhu sārdhamudanvatā nanvayamanvavāyaḥ || 30 ||
[Analyze grammar]

bhūyo'pi bālā nalasundaraṃ taṃ matvāmaraṃ rakṣijanākṣibandhāt |
ātithyacāṭūnyapadiśya tatsthāṃ śriyaṃ priyāsyāstutava stutaḥ sā || 31 ||
[Analyze grammar]

vāgjanmavaiphalyamasahyaśalyaṃ guṇādbhute vastuni maunitā cet |
khalatvamalpīyasi jalpite tu tadastu bandibhramabhūmitaiva || 32 ||
[Analyze grammar]

kaṃdarpa evedamavindata tvāṃ puṇyena manye punaranyajanma |
caṇḍīśacaṇḍākṣihutāśakuṇḍe juhāva yanmandiramindriyāṇām || 33 ||
[Analyze grammar]

śobhāyaśobhirjitaśaivaśailaṃ karoṣi lajjāgurumaulimailam |
dasrau haṭhaśrīharaṇādudasrau kaṃdarpamapyujjhitarūpadarpam || 34 ||
[Analyze grammar]

avaimi haṃsāvalayo valakṣāstvatkāntikīrteścapalāḥ pulākāḥ |
uḍḍīya yuktaṃ patitāḥ sravantīveśantapūraṃ paritaḥ plavante || 35 ||
[Analyze grammar]

bhavatpadāṅguṣṭhamapi śritā śrīrdhruvaṃ na labdhā kusumāyudhena |
ratīśajetuḥ khalu cihnamasminnardhendurāste nakhaveṣadhārī || 36 ||
[Analyze grammar]

rājā dvijānāmanumāsabhinnaḥ pūrṇāṃ tanūkṛtya tanūṃ tapobhiḥ |
kuhūṣu dṛśyetaratāṃ kimtya sāyujyamāpnoti bhavanmukhasya || 37 ||
[Analyze grammar]

kṛtvā dṛśau te bahuvarṇacitre kiṃ kṛṣṇasārasya tayormṛgasya |
adūrajāgradvidarapraṇālīrekhāmayacchadvidhirardhacandram || 38 ||
[Analyze grammar]

mugdhaḥ sa mohātsubhagānna dehāddadbhavadbhrūracanāya cāpam |
bhrūbhaṅgajeyastava yanmanobhūranena rūpeṇa yadātadābhūt || 39 ||
[Analyze grammar]

mṛgasya netradvitayaṃ tavāsye vidhau vidhutvānumitasya dṛśyam |
tasyaiva cañcatkacapāśaveṣaḥ pucchaḥ sphuraccāmaraguccha eṣaḥ || 40 ||
[Analyze grammar]

āstāmanaṅgīkaraṇādbhavena dṛśyaḥ smaro neti purāṇavāṇī |
tavaiva dehaṃ śritayā śriyeti navastu vastu pratibhātivādaḥ || 41 ||
[Analyze grammar]

tvayā jagatyuccitakāntisāre yadindunāśīli śiloñchavṛttiḥ |
āropi tanmāṇavako'pi maulau sa yajvarājye'pi maheśvareṇa || 42 ||
[Analyze grammar]

ādehadāhaṃ kusumāyudhasya vidhāya saundaryakathādaridram |
tvadaṅgaśilpātpunarīśvareṇa cireṇa jāne jagadanvakampi || 43 ||
[Analyze grammar]

mahī kṛtārthā yadi mānavo'si jitaṃ divā yadyamareṣu ko'pi |
kulaṃ tvayālaṃkṛtamauragaṃ cennādho'pi kasyopari nāgalokaḥ || 44 ||
[Analyze grammar]

seyaṃ na dhatte'nupapattimuccairmaccittavṛttistvayi cintyamāne |
mamau sa bhadraṃ culuke samudrastvayāttagāmbhīryamahattvamudraḥ || 45 ||
[Analyze grammar]

saṃsārasindhāvanubimbamatra jāgarti jāne tava vairaseniḥ |
bimbānubimbau hi vihāya dhāturna jātu dṛṣṭātisarūpasṛṣṭiḥ || 46 ||
[Analyze grammar]

iyatkṛtaṃ kena mahījagatyāmaho mahīyaḥ sukṛtaṃ janena |
pādau yamuddiśya tavāpi padyārajaḥsu padmasrajamārabhete || 47 ||
[Analyze grammar]

bravīti te kiṃ kimiyaṃ na jāne saṃdehadolāmavalambya saṃvit |
kasyāpi dhanysya gṛhātithistvamalīkasaṃbhāvanayāthavālam || 48 ||
[Analyze grammar]

prāptaiva tāvattava rūpasṛṣṭiṃ nipīya dṛṣṭirjanuṣaḥ phalaṃ me |
api śrutī nāmṛtamādriyetāṃ tayoḥ prasādīkuruṣe giraṃ cet || 49 ||
[Analyze grammar]

itthaṃ madhūtthaṃ rasamudgirantī tadoṣṭhabandhūkadhanurvisṛṣṭā |
karṇātprasūnāśugapañcabāṇī vāṇīmiṣeṇāsya mano viveśa || 50 ||
[Analyze grammar]

amujjadākaṇṭhamaṃsau sudhāsu priyaṃ priyāyā vacanaṃ nipīya |
dviṣanmukhe'pi svadate stutiryā tanmi(nmṛ)ṣṭatā neṣṭamukhe tvameyā || 51 ||
[Analyze grammar]

paurastyaśailaṃ janatopanītāṃ gṛhṇanyathāhnaḥ patirarghyapūjām |
tathātitheyīmatha saṃpratīcchanpriyārpitāmāsanamāsasāda || 52 ||
[Analyze grammar]

ayodhi taddhairyamanobhavābhyāṃ tāmeva bhaimīmavalambya bhūmim |
āha sma yatra smaracāpamantaśchinnaṃ bhruvau tajjayabhaṅgavārtām || 53 ||
[Analyze grammar]

atha smarājñāmavadhīrya dhairyādūce sa tadvāgupavīṇito'pi |
vivekadhārāśatadhautamantaḥ satāṃ na kāmaḥ kaluṣīkaroti || 54 ||
[Analyze grammar]

haritpatīnāṃ sadasaḥ pratīhi tvadīyamevātithimāgataṃ mām |
vahantamantarguruṇādareṇa prāṇāniva svaḥprabhuvācikāni || 55 ||
[Analyze grammar]

viramyatāṃ bhūtavatī saparyā niviśyatāmāsanamujjhitaṃ kim |
yā dūtatā naḥ phalinā vidheyā saivātitheyī pṛthurudbhavitrī || 56 ||
[Analyze grammar]

kalyāṇi kalyāni tavāṅgakāni kaccittamāṃ cittamanāvilaṃ te |
alaṃ vilambena giraṃ madīyāmākarṇayākarṇataṭāyatākṣi || 57 ||
[Analyze grammar]

kaumāramārabhya gaṇā guṇānāṃ haranti te dikṣu dhṛtādhipatyān |
surādhirājaṃ salilādhipaṃ ca hutāśanaṃ caryamanandanaṃ ca || 58 ||
[Analyze grammar]

caracciraṃ śaiśavayauvanīyadvairājyabhāji tvayi khedameti |
teṣāṃ rucaścauratareṇa cittaṃ pañceṣuṇā luṇṭhitadhairyavittam || 59 ||
[Analyze grammar]

teṣāmidānīṃ kila kevalaṃ sā hṛdi tvadāśā vilasatyajasram |
āśāstu nāsādya tanūrudārāḥ pūrvādayaḥ pūrvavadātmadārāḥ || 60 ||
[Analyze grammar]

anena sārdhaṃ tava yauvanena koṭiṃ parāmacchiduro'dhyarohat |
premāpi tanvi tvayi vāsavasya guṇo'pi cāpe sumanaḥśarasya || 61 ||
[Analyze grammar]

prācīṃ prayāte virahādayaṃ te tāpācca rūpācca śaśāṅkaśaṅkī |
parāparādhairnidadhāti bhānau ruṣāruṇaṃ locanavṛndamindraḥ || 62 ||
[Analyze grammar]

trinetramāṭreṇa ruṣā kṛtaṃ yattadeva yo'dyāpi na saṃvṛṇoti |
na veda ruṣṭe'dya sahasranetre gantā sa kāmaḥ khalu kāmavasthām || 63 ||
[Analyze grammar]

pikasya vāṅmātrākṛtādvyalīkānna sa prabhurnandati nandane'pi |
bālasya cūḍāśaśino'parādhānnārādhanaṃ śilati śūlino'pi || 64 ||
[Analyze grammar]

tamomayīkṛtya diśaḥ parāgaiḥ smareṣavaḥ śakradṛśāṃ diśanti |
kuhūgiraścañcupuṭaṃ dvijasya rākārajanyāmapi satyavācam || 65 ||
[Analyze grammar]

śaraiḥ prasūnaistudataḥ smarasya smartuṃ sa kiṃ nāśaninā karoti |
abhedyamasyāhaha varma na syādanaṅgatā cedgiriśaprasādaḥ || 66 ||
[Analyze grammar]

dhṛtādhṛtestasya bhavadviyogādanyānyaśayyāracanāya lūnaiḥ |
apyanyadāridryaharāḥ pravālaijītā daridrāstaravo'marāṇām || 67 ||
[Analyze grammar]

ravairguṇāsphālabhavaiḥ smarasya svarṇāthakarṇau badhirāvabhūtām |
guroḥ śṛṇotu smaramohanidrāprabodhadakṣāṇi kimakṣarāṇi || 68 ||
[Analyze grammar]

anaṅgatāpapraśamāya tasya kadarthyamānā muhurāmṛṇālam |
madhaumadhau nākanadīnalinyo varaṃ vahantāṃ śiśire'nurāgam || 69 ||
[Analyze grammar]

damasvasaḥ seyamupaiti tṛṣṇā harerjagatyagrimalekhyalakṣmīm |
dṛśāṃ yadabdhistava nāma dṛṣṭitribhāgalobhārtimasau bibharti || 70 ||
[Analyze grammar]

agnyāhitā nityamupāsate yāṃ dedīpyamānāṃ tanumaṣṭāmūrteḥ |
āśāpatiste damayanti so'pi smareṇa dāsībhavituṃ nyadeśi || 71 ||
[Analyze grammar]

tvadgocarastaṃ khalu pañcabāṇaḥ karoti saṃtāpya tathā vinītam |
svayaṃ yathā svāditataptabhūyaḥ paraṃ na saṃtāpayitā sa bhūyaḥ || 72 ||
[Analyze grammar]

adāhi yastena daśārdhabāṇaḥ purāpurārernayanālayena |
na nirdahaṃstaṃ bhavadakṣivāsī na vairaśuddheradhunādhamarṇaḥ || 73 ||
[Analyze grammar]

somāya kupyanniva viprayuktaḥ sa somamācāmati dūyamānam |
nāmāpi jāgarti hi yatra śatrostejasvinastaṃ katame sahante || 74 ||
[Analyze grammar]

śarairajasraṃ kusumāyudhasya kadarthyamānastaruṇi tvadarthe |
abhyarcayadbhirvinivedyamānādapyeṣa manye kusumādbibheti || 75 ||
[Analyze grammar]

smarendhane vakṣasi tena dattā saṃvartikā śaivalavallicitrā |
rarāja cetobhavapāvakasya dhūmāvilā kīlaparampareva || 76 ||
[Analyze grammar]

putrī suhṛdyena saroruhāṇāṃ yatpreyasī candanavāsitā dik |
dhairyaṃ vibhuḥ so'pi tayaiva hetoḥ smarapratāpajvalane juhāva || 77 ||
[Analyze grammar]

taṃ dahyamānairapi manmathaidhaṃ hastairupāste malayaḥ pravālaiḥ |
kṛcchre'pyasau nojjhati tasya sevāṃ sadā yadāśāmavalambate yaḥ || 78 ||
[Analyze grammar]

smarasya kīrtyeva sitīkṛtāni taddoḥpratāpairiva tāpitāni |
aṅgāni dhatte sa bhavadviyogātpāṇḍūni caṇḍajvarajarjarāṇi || 79 ||
[Analyze grammar]

yastanvi bhartā ghusṛṇena sāyaṃ diśaḥ samālambhanakautukinyāḥ |
tadā sa cetaḥ prajighāya tubhyaṃ yadā gato naiti nivṛtya pānthaḥ || 80 ||
[Analyze grammar]

tathā na tāpāya payonidhīnāmaśvāmukhotthaḥ kṣudhitaḥ śikhāvān |
nijaḥ patiḥ saṃprati vāripopi yathā hṛdisthaḥ smaratāpaduḥsthaḥ || 81 ||
[Analyze grammar]

atpratyuta tvanmṛdubāhuvallīsmṛtisrajaṃ gumphati durvinītā |
tato vidhatte'dhikameva tāpaṃ tena śritā śaityaguṇā mṛṇālī || 82 ||
[Analyze grammar]

nyastaṃ tatastena mṛṇāladaṇḍakhaṇḍaṃ babhāse hṛdi tāpabhāji |
taccittamagnairmadanasya bāṇaiḥ kṛtaṃ śatacchidramiva kṣaṇena || 83 ||
[Analyze grammar]

iti trilokītilakeṣu teṣu manobhuvo vikramakāmacāraḥ |
amoghamastraṃ bhavatīmavāpya madāndhatānargalacāpalasya || 84 ||
[Analyze grammar]

sārotthadhāreva sudhārasasya svayaṃvaraḥ śvo bhavitā taveti |
saṃtarpayantī hṛdayāni teṣāṃ śrutiḥ śrutī nākajuṣāmayāsīt || 85 ||
[Analyze grammar]

samaṃ sapatnībhavaduḥkhatīkṣṇaiḥ svadāranāsāpathikairmarudbhiḥ |
anaṅgaśauryānalatāpaduḥsthairatha pratasthe haritāṃ marudbhiḥ || 86 ||
[Analyze grammar]

apāstapātheyasudhopayogaistvaccumbinaiva svamanorathena |
kṣudhaṃ ca nirvāpayatā tṛṣaṃ ca svādīyasā'dhvā gamitaḥ sukhaṃ taiḥ || 87 ||
[Analyze grammar]

priyā manobhūśaradāvadāhe devīstvadarthena nimajjayadbhiḥ |
sureṣu sāraiḥ kriyate'dhunā taiḥ pādārpaṇānugrahabhūriyaṃ bhūḥ || 88 ||
[Analyze grammar]

alaṃkṛtāsannamahīvibhāgairayaṃ janastairamarairbhavatyām |
avāpito jaṅgamalekhalakṣmīṃ nikṣipya saṃdeśamayākṣarāṇi || 89 ||
[Analyze grammar]

ekaikamete parirabhya pīnastanopapīḍaṃ tvayi saṃdiśanti |
tvaṃ mūrcchatāṃ naḥ smarabhillaśalyairmude viśalyauṣadhivalliredhi || 90 ||
[Analyze grammar]

tvatkāntimasmābhirayaṃ pipāsanmanorathāśvāsanayaikayaiva |
nijaḥ kaṭākṣaḥ khalu vipralabhyaḥ kiyanti yāvadbhaṇa vāsarāṇi || 91 ||
[Analyze grammar]

nije sṛjāsmāsu bhuje bhajantyāvādityavarge pariveṣaveṣam |
prasīda nirvāpaya tāpamaṅgairanaṅgalīlālaharītuṣāraiḥ || 92 ||
[Analyze grammar]

dayasva kiṃ ghātayasi tvamasmānanaṅgacaṇḍālaśarairadṛśyaiḥ |
bhinnā varaṃ tīkṣṇakaṭākṣabāṇaiḥ premastava premarasātpavitraiḥ || 93 ||
[Analyze grammar]

tvadarthinaḥ santu parassahasrāḥ prāṇāstu nastvaccaraṇaprasādaḥ |
viśaṅkase kaitavanartitaṃ cedantaścaraḥ pañcazaraḥ pramāṇam || 94 ||
[Analyze grammar]

asmākamadhyāsitametadantastāvadbhavatyā hṛdayaṃ cirāya |
bahistvayālaṃkriyatāmidānīmuro muraṃ vidviṣataḥ śriyeva || 95 ||
[Analyze grammar]

dayodayaścetasi cettavābhūdalaṃkuru dyāṃ viphalo vilambaḥ |
bhuvaḥ svarādeśamathācarāmo bhūmau dhṛtiṃ yāsi yadi svabhūmau || 96 ||
[Analyze grammar]

dhinoti nāsmāñjalajena pūjā tvayānvahaṃ tanvi vitanyamānā |
tava prasādopanate tu maulau pūjāstu nastvatpadapaṅkajābhyām || 97 ||
[Analyze grammar]

svarṇairvitīrṇaiḥ karavāma vāmanetre bhavatyā kimupāsanāsu |
aṅga tvadaṅgāni nipītapītadarpāṇi pāṇiḥ khalu yācate naḥ || 98 ||
[Analyze grammar]

vayaṃ kalādā iva durvidagdhaṃ tvadgaurimaspardhi dahema hema |
prasūnanārācaśarāsanena sahaikavaṃśaprabhavabhru babhu || 99 ||
[Analyze grammar]

sudhāsaraḥsu tvadanaṅgatāpaḥ śānto na naḥ kiṃ punarapsaraḥsu |
nirvāti tu tvanmamatākṣareṇa sūnāśugeṣormadhusīkareṇa || 10 ||
[Analyze grammar]

khaṇḍaḥ kimu tvadgira eva khaṇḍaḥ kiṃ śarkarā tatpathaśarkaraiva |
kṛśāṅgi tadbhaṅgirasotthakacchatṛṇaṃ na dikṣu prathitaṃ tadikṣuḥ || 101 ||
[Analyze grammar]

dadāma kiṃ te sudhayā'dhareṇa tvadāsya eva svayamāsyate hi |
candraṃ vijitya svayameva bhāvi tvadānanaṃ tanmakhabhāgabhoji || 102 ||
[Analyze grammar]

priye vṛṇīṣvāmarabhāvamasmaditi trapākṛdvacanaṃ na kiṃ naḥ |
tvatpādapadme śaraṇaṃ praviśya svayaṃ vayaṃ yena jijīviṣāmaḥ || 103 ||
[Analyze grammar]

nāsmākamasmānmadanāpamṛtyostrāṇāya pīyūṣarasāyanāni |
prasīda tasmādadhikaṃ nijaṃ tu prayaccha pātuṃ radanacchadaṃ naḥ || 104 ||
[Analyze grammar]

pṛṣṭaḥ svaiścāparopaiḥ saha sa hi makareṇātmabhūḥ ketunā'bhūddhattāṃ nastvatprasādādatha manasijatāṃ mānaso nandanaḥ san |
bhrūbhyāṃ te tanvi dhanvī bhavatu tava sitairjaitrabhallaḥ smitaiḥ stādastu tvannetracañcattaraśapharayugādhīnamīnadhvajāṅkaḥ || 105 ||
[Analyze grammar]

svapnena prāpitāyāḥ pratirajani tava śrīṣu magnaḥ kaṭākṣaḥ śrotre gītāmṛtābdhau tvagapi nanu tanūmañjarīsaukumārye |
nāsā śvāsādhivāse'dharamadhuni rasajñā caritreṣu cittaṃ tannastanvaṅgi kaiścinna karaṇahariṇairvāgurā laṅghitāsi || 106 ||
[Analyze grammar]

iti dhṛtasurasārthavācikasraṅnijarasanātalapattrahārakasya |
saphalaya mama dūtatāṃ vṛṇīṣva svayamavadhārya digīśamekameṣu || 107 ||
[Analyze grammar]

ānandayendramatha manmathamagnamagniṃ kelībhiruddhara tanūdari nūtanābhiḥ |
āsādayoditadayaṃ śamane mano vā no vā yadītthamatha tadvaruṇaṃ vṛṇīthāḥ || 108 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
tasyāgādayamaṣṭamaḥ kavikulādṛṣṭādhvapānthe mahākāvye cāruṇi naiṣadhīyacarite sargo nisargojjvalaḥ || 109 ||
[Analyze grammar]