Chapter 9

itīyamakṣibhruvavibhrameṅgitasphuṭāmanicchāṃ vivarītumutsukā |
taduktimātraśravaṇecchayāśṛṇoddigīśasaṃdeśagiraṃ na gauravāt || 1 ||
[Analyze grammar]

tadarpitāmaśrutavadvidhāya tāṃ digīśasaṃdeśamayīṃ sarasvatīm |
idaṃ tamurvītalaśītaladyutiṃ jagāda vaidarbhanarendranandinī || 2 ||
[Analyze grammar]

mayāṅga pṛṣṭaḥ kulanāmanī bhavānamū vimucyaiva kimanyaduktavān |
na mahyamatrottaradhārayasya kiṃ hriye'pi seyaṃ bhavato'dhamarṇatā || 3 ||
[Analyze grammar]

adṛśyamānā kvacidīkṣitā kvacinmamānuyoge bhavataḥ sarasvatī |
kvacitprakāśāṃ kvacidasphuṭārṇasaṃ sarasvatīṃ jetumanāḥ sarasvatīṃ || 4 ||
[Analyze grammar]

giraḥ śrutā eva tava śṛuvaḥsudhāḥ ślathā bhavannāmni tu na śrutispṛhā |
pipāsutā śāntimupaiti vārijā na jātu dugdhānmadhuno'dhikādapi || 5 ||
[Analyze grammar]

bibharti vaṃśaḥ katamastamopahaṃ bhavādṛśaṃ nāyakaratnamīdṛśam |
tamanyasāmānyadhiyāvamānitaṃ tvayā mahāntaṃ bahu mantumutsahe || 6 ||
[Analyze grammar]

itīrayitvā viratāṃ sa tāṃ punargirānujagrāhatarāṃ narādhipaḥ |
virutya viśrāntavatīṃ tapātyaye ghanāghanaścātakamaṇḍalīmiva || 7 ||
[Analyze grammar]

aye mamodāsitameva jihvayā dvaye'pi tasminnanatiprayojane |
garau giraḥ pallavanārthalāghave mitaṃ ca sāraṃ ca vaco hi vāggmitā || 8 ||
[Analyze grammar]

vṛthā katheyaṃ mayi varṇapaddhatiḥ kayānupūrvyā samaketi keti ca |
kṣame samakṣavyavahāramāvayoḥ pade vidhātuṃ khalu yuṣmadasmadī || 9 ||
[Analyze grammar]

yadi svabhāvānmama nojjvalaṃ kulaṃ tatastadudbhāvanamaucitī kutaḥ |
athāvadātaṃ tadaho viḍambanā tathā kathā preṣyatayopaseduṣaḥ || 10 ||
[Analyze grammar]

iti pratītyaiva mayāvadhīrite tavāpi nirbandharaso na śobhate |
haritpatīnāṃ prativācikaṃ prati śramo girāṃ te ghaṭate hi saṃprati || 11 ||
[Analyze grammar]

tathāpi nirbadhnati te'thavā spṛhāmihānurundhe mitayā na kiṃ girā |
himāṃśuvaṃśasya karīrameva māṃ niśamya kiṃ nāsi phalegrahigrahā || 12 ||
[Analyze grammar]

mahājanācāraparamparedṛśī svanāma nāmādadate na sādhavaḥ |
ato'bhidhātuṃ na tadutsahe punarjanaḥ kilācāramucaṃ vigāyati || 13 ||
[Analyze grammar]

ado'yamālapya śikhīva śārado babhūva tūṣṇīmahitāpakārakaḥ |
athāsyarāgasya dadhā padepade vacāṃsi haṃsīva vidarbhajādade || 14 ||
[Analyze grammar]

sudhāṃśuvaṃśābharaṇaṃ bhavāniti śrute'pi nāpaiti viśeṣasaṃśayaḥ |
kiyatsu maunaṃ vitatā kiyatsu vāgmahatyaho vañcanacāturī tava || 15 ||
[Analyze grammar]

mayāpi deyaṃ prativācikaṃ na te svanāma matkarṇasudhāmakurvate |
pareṇa puṃsā hi mamāpi saṃkathā kulābalācārasahāsanāsahā || 16 ||
[Analyze grammar]

hṛdābhinandya prativandyanuttaraḥ priyāgiraḥ sasmitamāha sa sma tām |
vadāmi vāmākṣi pareṣu mā kṣipa svamīdṛśaṃ mākṣikamākṣipadvacaḥ || 17 ||
[Analyze grammar]

karoṣi nemaṃ phalinaṃ mama śramaṃ diśo'nugṛhṇāsi na kaṃcana prabhum |
tvamitthamarhāsi surānupāsituṃ rasāmṛtasnānapavitrayā girā || 18 ||
[Analyze grammar]

sureṣu saṃdeśayasīdṛśīṃ bahuṃ rasasraveṇa stimitāṃ na bhāratīm |
madarpitā darpakatāpiteṣu yā prayāti dāvārditadāvavṛṣṭitām || 19 ||
[Analyze grammar]

yathāyatheha tvadupekṣayānayā nimeṣamapyeṣa jano vilambate |
ruṣā śaravyīkaraṇe divaukasāṃ tathātathādya tvarate rateḥ patiḥ || 20 ||
[Analyze grammar]

iyaccirasyāvadadhanti matpathe kimindranetrāṇyaśanirna nirmamau |
dhigastu māṃ satvarakāryamantharaṃ sthitaḥ parapreṣyaguṇo'pi yatra na || 21 ||
[Analyze grammar]

idaṃ nigadya kṣitibhartari sthite tayābhyadhāyi svagataṃ vidagdhayā |
adhistri taṃ dūtayatāṃ bhuvaḥ smaraṃ mano dadhatyā nayanaipuṇavyaye || 22 ||
[Analyze grammar]

jalādhipastvāmadiśanmayi dhruvaṃ paretarājaḥ prajighāya sa sphuṭam |
marutvataiva prahito'si niścitaṃ niyojitaścordhvamukhena tejasā || 23 ||
[Analyze grammar]

atha prakāśaṃ nibhṛtasmitā satī satīkulasyābharaṇaṃ kimapyasau |
punastadābhāṣaṇavibhramonmukhaṃ mukhaṃ vidarbhādhipasaṃbhavā dadhau || 24 ||
[Analyze grammar]

vṛthā parīhāsa iti pragalbhatā na neti ca tvādṛśi vāgvigarhaṇā |
bhavatyavajñā ca bhavatyanuttarādataḥ praditsuḥ prativācamasmi te || 25 ||
[Analyze grammar]

kathaṃ nu teṣāṃ kṛpayāpi vāgasāvasāvi mānuṣyakalāñchane jane |
svabhāvabhaktipravaṇaṃ pratīśvarāḥ kayā na vācā mudamudgiranti vā || 26 ||
[Analyze grammar]

aho mahendrasya kathaṃ mayaucitī surāṅganāsaṃgamaśomitābhṛtaḥ |
hradasya haṃsāvalimāṃsalaśriyo valākayeva prabalā viḍambanā || 27 ||
[Analyze grammar]

puraḥ surīṇāṃ bhaṇa keva mānavī na yatra tāstatra tu śobhikāpi sā |
akāñcane'kiṃcananāyikāṅgake kimārakūṭābharaṇena na śriyaḥ || 28 ||
[Analyze grammar]

yathātathā nāma giraḥ kirantu te śrutī punarme badhire tadakṣare |
pṛṣatkiśorī kurutāmasaṃgatāṃ kathaṃ manovṛttimapi dvipādhipe || 29 ||
[Analyze grammar]

ado nigadyaiva natāsyayā tayā śrutau lagitvābhihitālirālapat |
praviśya yanme hṛdayaṃ hriyāha tadviniryadākarṇaya manmukhādhvanā || 30 ||
[Analyze grammar]

bibhemi cintāmapi kartumīdṛśīṃ cirāya cittārpitanaiṣadheśvarā |
mṛṇālatantucchidurā satīsthitirlavādapi truṭyati cāpalātkila || 31 ||
[Analyze grammar]

mamāśayaḥ svapnadaśājñayāpi vā nalaṃ vilaṅghyetaramaspṛśadyadi |
kutaḥ punastatra samastasākṣiṇī nijaiva buddhirvibudhairna pṛcchyate || 32 ||
[Analyze grammar]

api svamasvapnamasūṣupannamī parasya dārānanavaitumeva mām |
svayaṃ duradhvārṇavanāvikāḥ kathaṃ spṛśantu vijñāya hṛdāpi tādṛśīm || 33 ||
[Analyze grammar]

anugrahaḥ kevalameṣa mādṛśe manuṣyajanmanyapi yanmano jane |
sa cedvidheyastadamī tameva me prasadya bhikṣāṃ vitarītumīśatām || 34 ||
[Analyze grammar]

api draḍhīyaḥ śṛṇu matpratiśṛutaṃ sa pīḍayetpāṇimimaṃ na cennṛpaḥ |
hutāśanodbandhanavārikāritāṃ nijāyuṣastatkaravai svavairitām || 35 ||
[Analyze grammar]

niṣiddhamapyācaraṇīyamāpadi kriyā satī nāvati yatra sarvathā |
ghanāmbunā rājapathe hi picchile kvacidbudhairapyapathena gamyate || 36 ||
[Analyze grammar]

striyā mayā vāggmiṣu teṣu śakyate na jātu samyagvitarītumuttaram |
tadatra madbhāṣitasūtrapaddhatau prabanddhṛtāstu pratibanddhṛtā na te || 37 ||
[Analyze grammar]

nirasya dūtaḥ sma tathā visarjitaḥ priyoktirapyāha kaduṣṇamakṣaram |
kutūhaleneva muhuḥ kuhūravaḥ viḍambya ḍimbhena pikaḥ prakopitaḥ || 38 ||
[Analyze grammar]

aho manastvāmanu te'pi tanvate tvamapyamībhyo vimukhīti kautikam |
kva vā nidhirnirdhanameti kiṃca taṃ sa vākkavāṭaṃ ghaṭayannirasyati || 39 ||
[Analyze grammar]

sahākhilastrīṣu vahe'vahelayā mahendrarāgādgurumādaraṃ tvayi |
tvamīdṛśi śreyasi saṃmukhe'pi taṃ parāṅmukhī candramukhi nyavīvṛtaḥ || 40 ||
[Analyze grammar]

divaukasaṃ kāmayate na mānavī navīnamaśrāvi tavānanādidam |
kathaṃ na vā durgrahadoṣa eṣa te hitena samyagguruṇā'pi śamyate || 41 ||
[Analyze grammar]

anugrahādeva divaukasāṃ naro nirasya mānuṣyakameti divyatām |
ayovikāre svaritatvamiṣyate kuto'yasāṃ siddharasaspṛśāmapi || 42 ||
[Analyze grammar]

hariṃ parityajya nalābhilāṣukā na lajjase vā viduṣibruvā katham |
upekṣitekṣoḥ karabhācchamīratāduruṃ vade tvāṃ karabhoru bhoriti || 43 ||
[Analyze grammar]

vihāya hā sarvasuparvanāyakaṃ tvayā dhṛtaḥ kiṃnarasādhimabhramaḥ |
mukhaṃ vimucya śvasitasya dhārayā vṛthaiva nāsāpathadhāvanaśramaḥ || 44 ||
[Analyze grammar]

taponale juhvati sūrayastanūrdive phalāyānyajanurbhaviṣṇave |
kare punaḥ karṣati saiva vihvalā balādiva tvāṃ valase na bāliśe || 45 ||
[Analyze grammar]

yadi svamudbandhumanā vinā nalaṃ bhaverbhavantīṃ harirantarikṣāgām |
divisthitānāṃ prathitaḥ patistato hariṣyati nyāyyamupekṣate hi kaḥ || 46 ||
[Analyze grammar]

nivekṣyase yadyanale nalojjhitā sure tadasminmahatī dayā kṛtā |
cirādanenārthanayāpi durlabhaṃ svayaṃ tvayaivāṅga yadaṅgamarṣyate || 47 ||
[Analyze grammar]

jitaṃjitaṃ tatkhalu pāśapāṇinā vinānalaṃ vāri yadi pravekṣyasi |
tadā tvadākhyānbahirapyasūnasau payaḥpatirvakṣasi vakṣyatetarām || 48 ||
[Analyze grammar]

kariṣyase yadyata eva dūṣaṇādupāyamanyaṃ viduṣī svamṛtyave |
priyātithiḥ svena gṛhāgatā kathaṃ na dharmarājaṃ caritārthayiṣyasi || 49 ||
[Analyze grammar]

niṣedhaveṣo vidhireṣa te'thavā tavaiva yuktā khalu vāci vakratā |
vijṛmbhitaṃ yasya kila dhvaneridaṃ vidagdhanārīvadanaṃ tadākaraḥ || 50 ||
[Analyze grammar]

bhramāmi te bhaimi sarasvatīrasapravāhacakreṣu nipatya katyadaḥ |
trapāmapākṛtya manākkuru sphuṭaṃ kṛtārthanīyaḥ katamaḥ surottamaḥ || 51 ||
[Analyze grammar]

mataḥ kimaurāvatakumbhakaitavapragalbhapīnastanadigdhavastava |
sahasranetrānna pṛthagmate mama tvadaṅgalakṣmīmavagāhituṃ kṣamaḥ || 52 ||
[Analyze grammar]

prasīda tasmai damayanti saṃtataṃ tvadaṅgasaggaprabhavairjagatprabhuḥ |
pulomajālocanatīkṣṇakaṇṭakaistanuṃ ghanāmātanutāṃ sa kaṇṭakaiḥ || 53 ||
[Analyze grammar]

abodhi tattvaṃ dahane'nurajyase svayaṃ khalu kṣattriyagotrajanmanaḥ |
vinā tamojasvinamanyataḥ kathaṃ manorathaste valate vilāsini || 54 ||
[Analyze grammar]

tvayaikasatyā tanutāpaśaṅkayā tato nivartyaṃ na manaḥ kathaṃcana |
himopamā tasya parīkṣaṇakṣaṇe satīṣu vṛttiḥ śataśo nirūpitā || 55 ||
[Analyze grammar]

sa dharmarājaḥ khalu dharmaśīlayā tvayāsti cittātithitāmavāpitaḥ |
mamāpi sādhuḥ pratibhātyayaṃ kramaścakāsti yogyena hi yogyasaṃgamaḥ || 56 ||
[Analyze grammar]

ajātavicchedalavaiḥ smarodbhavairagastyabhāsā diśi nirmalatviṣi |
dhutāvadhiṃ kālamamṛtyuśaṅkitā nimeṣavattena nayasva kelibhiḥ || 57 ||
[Analyze grammar]

śirīṣamṛdvī varuṇaṃ kimīhase payaḥprakṛtyā mṛduvargavāsavam |
vihāya sarvānvṛṇute sma kiṃ na sā niśāpi śītāṃśumanena hetunā || 58 ||
[Analyze grammar]

asevi yastyaktadivā divāniśaṃ śriyaḥ priyeṇānaṇurāmaṇīyakaḥ |
sahāmunā tatra payaḥ payonidhau kṛśodari krīḍa yathāmanoratham || 59 ||
[Analyze grammar]

iti sphuṭaṃ tadvacasastayādarātsuraspṛhāropaviḍambanādapi |
karāṅkasuptaikakapolakarṇayā śrutaṃ ca tadbhāṣitamaśrutaṃ ca tat || 60 ||
[Analyze grammar]

cirādanadhyāyamavāṅmukhī mukhe tataḥ sma sā vāsayate damasvasā |
kṛtāyataśvāsavimokṣaṇātha taṃ kṣaṇādvabhāṣe karuṇaṃ vicakṣaṇā || 61 ||
[Analyze grammar]

vibhindatā duṣkṛtinīṃ mama śrutiṃ digindradurvācikasūcisaṃcayaiḥ |
prayātajīvāmiva māṃ prati sphuṭaṃ kṛtaṃ tvayāpyantakadūtatocitam || 62 ||
[Analyze grammar]

tvadāsyaniryanmadalīkaduryaśomaṣīmayaṃ sallipirūpabhāgiva |
śrutiṃ mamāviśya bhavaddurakṣaraṃ sṛjatyadaḥ kīṭavadutkaṭā rujaḥ || 63 ||
[Analyze grammar]

tamālirūce'tha vidarbhajeritā pragāḍhamaunavratayaikayā sakhī |
trapāṃ samārādhayatīyamanyayā bhavantamāha svarasajñayā mayā || 64 ||
[Analyze grammar]

tamarcituṃ madvaraṇasrajā nṛpaṃ svayaṃvaraḥ saṃbhavitā paredyavi |
mamāsubhirgantumanāḥ puraḥsaraistadantarāyaḥ punareṣa vāsaraḥ || 65 ||
[Analyze grammar]

tadadya viśramya dayāluredhi me dinaṃ ninīṣāmi bhavadvilokinī |
nakhaiḥ kilākhyāyi vilikhya pakṣiṇā tavaiva rūpeṇa samaḥ sa matpriyaḥ || 66 ||
[Analyze grammar]

dṛśordvayī te vidhināsti vañcitā mukhasya lakṣmīṃ tava yanna vīkṣate |
asāvapi śvastadimāṃ nalānane vilokya sāphalyamupaitu janmanaḥ || 67 ||
[Analyze grammar]

mamaiva pāṇaukaraṇe'gnisākṣikaṃ prasaṅgasaṃpāditamaṅga saṃgatam |
na hā sahādhītidhṛtaḥ spṛhā kathaṃ tavāryaputrīyamajaryamarjitum || 68 ||
[Analyze grammar]

digīśvarārthaṃ na kathaṃcana tvayā kadarthanīyāsmi kṛto'yamañjaliḥ |
prasadyatāṃ nādya nigādyamīdṛśaṃ dṛśau dadhe bāṣparayāspade bhṛśam || 69 ||
[Analyze grammar]

vṛṇe digīśāniti kā kathā tathā tvayīti nekṣe nalabhāmapīha yā |
satīvrate'gnau tṛṇayāmi jīvitaṃ smarastu kiṃ vastu tadastu bhasma yaḥ || 70 ||
[Analyze grammar]

nyaveśi ratnatritaye jinena yaḥ sa dharmacintāmaṇirujjhito yayā |
kapālikopānalabhasmanaḥ kṛte tadeva bhasma svakule stṛtaṃ tathā || 71 ||
[Analyze grammar]

nipīya pīyūṣarasaurasīrasau giraḥ svakaṃdarpahutāśanāhutīḥ |
kṛtāntadūtaṃ na tayā yathoditaṃ kṛtāntameva svamamanyatādayam || 72 ||
[Analyze grammar]

sa bhinnamarmāpi tadartikākubhiḥ svadūtadharmānna virantumaihata |
śanairaśaṃsannibhṛtaṃ viniśvasanvicitravākcitraśikhāṇḍanandanaḥ || 73 ||
[Analyze grammar]

divo dhavastvāṃ yadi kalpaśākhinaṃ kadāpi yāceta nijāṅgaṇālayam |
kathaṃ bhaverasya na jīviteśvarā na moghayācñaḥ sa hi bhīru bhūruhaḥ || 74 ||
[Analyze grammar]

śikhī vidhāya tvadavāptikāmanāṃ svayaṃhutasvāṃśahaviḥ svamūrtiṣu |
kratuṃ vidhatte yadi sārvakāmikaṃ kathaṃ sa mithyāstu vidhistu vaidikaḥ || 75 ||
[Analyze grammar]

sadā tadāśāmadhitiṣṭhataḥ karaṃ varaṃ pradātuṃ calitādbalādapi |
muneragastyādvṛṇute sa dharmarāḍyadi tvadāptiṃ bhaṇa tatra kā gatiḥ || 76 ||
[Analyze grammar]

kratoḥ kṛte jāgrati vetti kaḥ kati prabhorapāṃ veśmani kāmadhenavaḥ |
tvadarthamekāmapi yācate sa cetpracetasaḥ pāṇigataiva vartase || 77 ||
[Analyze grammar]

na saṃnidhātrī yadi vighnasiddhaye pativratā patyuranicchayā śacī |
sa eva rājavrajavaiśasātkutaḥ parasparaspardhivaraḥ svayaṃvaraḥ || 78 ||
[Analyze grammar]

nijasya vṛttāntamajānatāṃ mitho mukhasya roṣātparuṣāṇi jalpataḥ |
mṛdhaṃ kimacchattrakadaṇḍatāṇḍavaṃ bhujābhuji kṣoṇibhujāṃ didṛkṣāse || 79 ||
[Analyze grammar]

apārthayanyājakaphūtkṛtiśramaṃ jvaledruṣā cedvapuṣāpi nānalaḥ |
alaṃ nalaḥ kartumanagnisākṣikaṃ vidhiṃ vivāhe tava sārasākṣi kam || 80 ||
[Analyze grammar]

patiṃvarāyāḥ kulajaṃ varasya vā yamaḥ kamapyācaritātithiṃ yadi |
kathaṃ na gantā viphalībhaviṣṇutāṃ svayaṃvaraḥ sādhvi samṛddhimānapi || 81 ||
[Analyze grammar]

apaḥ prati svāmitayā'paraḥ suraḥ sa tā niṣedhedyadi naiṣadhakrudhā |
nalāya lobhāttatapāṇaye'pi te pitā kathaṃ tvāṃ vada saṃpradāsyate || 82 ||
[Analyze grammar]

idaṃ mahatte'bhihitaṃ hitaṃ mayā vihāya mohaṃ damayanti cintaya |
sureṣu vighnaikapareṣu ko naraḥ karasthamapyarthamavāptumīśvaraḥ || 83 ||
[Analyze grammar]

imā girastasya vicintya cetasā tatheti saṃpratyayamāsasāda sā |
nivāritāvagrahanīranirjhare nabhonabhasyatvamalambhayaddṛśau || 84 ||
[Analyze grammar]

sphuṭotpalābhyāmalidaṃpatīva tadvilocanābhyāṃ kucakuḍnalāśayā |
nipatya bindū hṛdi kajjalāvilau maṇīva nīlau taralau virejatuḥ || 85 ||
[Analyze grammar]

dhutāpatatpuṣpaśilīmukhāśugaiḥ śucestadāsītsarasī rasasya sā |
rayāya baddhādarayāśrudhārayā sanālanīlotpalalolalocanā || 86 ||
[Analyze grammar]

athodbhramantī rudatī gatakṣamā sasaṃbhramā luptaratiḥ skhalanmatiḥ |
vyadhātpriyaprāptivighātaniścayānmṛdūni dūnā paridevitāni sā || 87 ||
[Analyze grammar]

tvarasva pañceṣuhutāśanātmanastanuṣva madbhasmamayaṃ yaśaścayam |
vidhe parehāphalabhakṣaṇavratī patādya tṛpyannasubhirmamāphalaiḥ || 88 ||
[Analyze grammar]

bhṛśaṃ viyogānalatapyamāna kiṃ vilīyase na tvamayomayaṃ yadi |
smareṣubhirbhedya na vajramapyasi bravīṣi na svānta kathaṃ na dīryase || 89 ||
[Analyze grammar]

vilambase jīvita kiṃ drava drutaṃ jvalatyadaste hṛdayaṃ niketanam |
jahāsi nādyāpi mṛṣā sukhāsikāmapūrvamālasyamidaṃ tavedṛśam || 90 ||
[Analyze grammar]

dṛśau mṛṣā pātakino manorathāḥ kathaṃ pṛthū vāmapi vipralebhire |
priyaśriyaḥ prekṣaṇaghāti pātakaṃ svamaśrubhiḥ kṣālayataṃ śataṃ samāḥ || 91 ||
[Analyze grammar]

priyaṃ na mṛtyuṃ na labhe tvadīpsitaṃ tadeva na syānmama yattvamicchasi |
viyogameveccha manaḥ priyeṇa me tava prasādānna bhavatvasau mama || 92 ||
[Analyze grammar]

na kākuvākyairativāmamaṅgajaṃ dviṣatsu yāce pavanaṃ tu dakṣiṇam |
diśāpi madbhasma kiratvayaṃ tayā priyo yayā vairavidhirvadhāvadhiḥ || 93 ||
[Analyze grammar]

amūni gacchanti yugāni na kṣaṇaḥ kiyatsahiṣye na hi mṛtyurasti me |
na māṃ tu kāntaḥ sphuṭamantarujjhitā na taṃ manastacca na kāyavāyavaḥ || 94 ||
[Analyze grammar]

madugratāpavyayaśaktaśīkaraḥ surāḥ sa vaḥ kena pape kṛpārṇavaḥ |
udeti koṭirna mude maduttamā kimāśu saṃkalpakaṇaśrameṇa vaḥ || 95 ||
[Analyze grammar]

mamaiva vāhardinamaśrudurdinaiḥ prasahya varṣāsu ṛtau prasañjite |
kathaṃ nu śṛṇvantu suṣupya devatā bhavatvaraṇyeruditaṃ na me giraḥ || 96 ||
[Analyze grammar]

iyaṃ na te naiṣādha dṛkpathātithistvadekatānasya janasya yātanā |
hrade hrade hā na kiyadgaveṣitaḥ sa vedhasā'gopi khago'pi vakti yaḥ || 97 ||
[Analyze grammar]

mamāpi kiṃ no dayase dayāghana tvadaṅghrimagnaṃ yadi vettha me manaḥ |
nimajjayansaṃtamase parāśayaṃ vidhistu vācyaḥ kva tavāgasaḥ kathā || 98 ||
[Analyze grammar]

kathāvaśeṣaṃ tava sā kṛte gatetyupaiṣyati zrotrapathaṃ katham na te |
dayāṇunā māṃ samanugrahīpyase tadāpi tāvadyadi nātha nādhunā || 99 ||
[Analyze grammar]

mamādarīdaṃ vidarītumāntaraṃ tadarthikalpadruma kiṃcidarthaye |
bhidāṃ hṛdi dvāramavāpya mā sa me hatāsubhiḥ prāṇasamaḥ samaṃ gamaḥ || 10 ||
[Analyze grammar]

iti priyākākubhirunmiṣanbhṛśaṃ digīśadūtyena hṛdi sthirīkṛtaḥ |
nṛpaṃ sa yoge'pi viyogamanmathaḥ kṣaṇaṃ tamudbhrāntamajījanatpunaḥ || 101 ||
[Analyze grammar]

mahendradūtyādi samastamātmanastataḥ sa vismṛtya manorathasthitaiḥ |
kriyāḥ priyāyā lalitaiḥ karambitā vitarkayannitthamalīkamālapat || 102 ||
[Analyze grammar]

ayi priye kasya kṛte vilapyate vilipyate hā mukhamaśrubindubhiḥ |
purastvayāloki namannayaṃ na kiṃ tiraścalallocanalīlayā nalaḥ || 103 ||
[Analyze grammar]

cakāsti binducyutakāticāturī ghanāsrubindusrutikaitavāttava |
masāratārākṣi sasāramātmanā tanoṣi saṃsāramasaṃśayaṃ yataḥ || 104 ||
[Analyze grammar]

apāstapāthoruhi śāyitaṃ kare karoṣi līlākamalaṃ kimānanam |
tanoṣi hāraṃ kiyadasruṇaḥ sravairadoṣanirvāsitabhūṣaṇe hṛdi || 105 ||
[Analyze grammar]

dṛśoramaṅgalyamidaṃ milajjalaṃ kareṇa tāvatparimārjayāmi te |
athāparādhaṃ bhavadaṅghripaṅkajadvayīrajomiḥ samamātmamaulinā || 106 ||
[Analyze grammar]

mama tvadacchāṅghrinakhāmṛtadyuteḥ kirīṭamāṇikyamayūkhamañjarī |
upāsanāmasya karotu rohiṇī tyaja tyajākāraṇaroṣaṇe ruṣam || 107 ||
[Analyze grammar]

tanoṣi mānaṃ mayi cenmanāgapi tvayi śraye tadbahumānamānataḥ |
vinamya vakraṃ yadi vartase kiyannamāmi te caṇḍi tadā padāvadhi || 108 ||
[Analyze grammar]

prabhutvabhūmnānugṛhāṇa vā na vā praṇāmamātrādhigame'pi kaḥ śramaḥ |
kva yācatāṃ kalpalatāsi māṃ prati kva dṛṣṭidāne tava baddhamuṣṭitā || 109 ||
[Analyze grammar]

smareṣumāthaṃ sahase mṛduḥ kathaṃ hṛdi draḍhīyaḥ kucasaṃvṛte tava |
nipatya vaisāriṇaketanasya vā vrajanti bāṇā vimukhotpatiṣṇutām || 110 ||
[Analyze grammar]

smitasya saṃbhāvaya sṛkvaṇā kaṇānvidhehi līlācalacañcalaṃ bhruvaḥ |
apāṅgarathyāpathikīṃ ca helayā prasadya saṃdhehi dṛśaṃ mamopari || 111 ||
[Analyze grammar]

samāpaya prāvṛṣamasruvipruṣāṃ smitena viśrāṇaya kaumudīmudaḥ |
dṛśāvitaḥ khelatu khañjanadvayī vikāsi paṅkeruhamastu te mukham || 112 ||
[Analyze grammar]

sudhārasodvelanakelimakṣarasrajā sṛjāntarmama karṇakūpayoḥ |
dṛśau madīye madirākṣi kāraya smitaśriyā pāyasapāraṇāvidhim || 113 ||
[Analyze grammar]

mamāsanārdhe bhava maṇḍanaṃ na na priye madutsaṅgavibhūṣaṇaṃ bhava |
ahaṃ bhramādālapamaṅga mṛṣyatāṃ vinā mamoraḥ katamattvāsanam || 114 ||
[Analyze grammar]

adhītapañcāśugabāṇavañcane sthitā madantarbahireṣi ceduraḥ |
smarāśugebhyo hṛdayaṃ bibhetu na praviśya tattvanmayasaṃpuṭe mama || 115 ||
[Analyze grammar]

pariṣvajasvānavakāśabāṇatā smarasya lagne hṛdayadvaye'stu nau |
dṛḍhā mama tvatkucayoḥ kaṭhorayorurastaṭīyaṃ paricārikocitā || 116 ||
[Analyze grammar]

tavādharāya spṛhayāmi yanmadhusravaiḥ śravaḥsākṣikamākṣikā giraḥ |
adhityakāsu stanayostanotu te mamendulekhābhyudayādbhutaṃ nakhaḥ || 117 ||
[Analyze grammar]

na vartase manmathanāṭikā kathaṃ prakāśaromāvalisūtradhāriṇī |
tavāṅgahāre rucimeti nāyakaḥ śikhāmaṇiśca dvijarāḍvidūṣakaḥ || 118 ||
[Analyze grammar]

śubhāṣṭavargastvadanaṅgajanmanastavādhare'likhyata yatra lekhayā |
madīyadantakṣatarājirañjanaiḥ sa bhūrjatāmarjatu bimbapāṭalaḥ || 119 ||
[Analyze grammar]

girānukampasva dayasva cumbanaiḥ prasīda śuśrūṣayituṃ mayā kucau |
niśeva cāndrasya karotkarasya yanmama tvamekāsi nalasya jīvitam || 120 ||
[Analyze grammar]

muniryathātmānamatha prabodhavān prakāśayantaṃ svamasāvabudhyata |
api prapannāṃ prakṛtiṃ vilokya tāmavāptasaṃskāratayāsṛjadgiraḥ || 121 ||
[Analyze grammar]

aye mayātmā kimanihnutīkṛtaḥ kimatra mantā sa tu māṃ śatakratuḥ |
puraḥ svabhaktyātha namanhriyāvilo vilokitāhe na tadiṅgitānyapi || 122 ||
[Analyze grammar]

svanāma yannāma mudhābhyadhāmaho mahendrakāryaṃ mahadetadujjhitam |
hanūmadādyairyaśasā mayā punardviṣāṃ hasairdūtyapathaḥ sitīkṛtaḥ || 123 ||
[Analyze grammar]

dhiyātmanastāvadacāru nācaraṃ parastu tadveda sa yadvadiṣyati |
janāvanāyodyaminaṃ janārdanaṃ kṣaye jagajjīvapibaṃ śivaṃ vadan || 124 ||
[Analyze grammar]

sphuṭatyadaḥ kiṃ hṛdayaṃ trapābharādyadasya śuddhirvibudhairvibudhyate |
vidantu te tattvamidaṃ tu danturaṃ janānane kaḥ karamarpayiṣyati || 125 ||
[Analyze grammar]

mama śramaścetanayānayā phalī balīyasālopi ca saiva vedhasā |
na vastu daivasvarasādvinaśvaraṃ sureśvaro'pi pratikartumīśvaraḥ || 126 ||
[Analyze grammar]

iti svayaṃ mohamahorminirmitaṃ prakāśanaṃ śocati naiṣadhe nijam |
tathāvyathāmagnataduddidhīrṣayā dayālurāgāllaghu hemahaṃsarāṭ || 127 ||
[Analyze grammar]

nalaṃ sa tatpakṣaravordhvavīkṣiṇaṃ sa eṣa pakṣīti bhaṇantamabhyadhāt |
nayādayaināmatimānirāśatāmasūnvihāteyamataḥ paraṃ param || 128 ||
[Analyze grammar]

sureṣu paśyannijasāparādhatāmiyatprayasyāpi tadarthasiddhaye |
na kūṭasākṣībhavanocito bhavānsatāṃ hi cetaḥśucitātmasākṣikā || 129 ||
[Analyze grammar]

itīriṇāpṛcchya nalaṃ vidarbhajāmapi prayātena khagena sāntvitaḥ |
mṛdurbabhāṣe bhaginīṃ damasya sa praṇamya cittena haritpatīnnṛpaḥ || 130 ||
[Analyze grammar]

dade'pi tubhyaṃ kiyatīḥ kadarthanāḥ sureṣu rāgaprasavāvakeśinīḥ |
adambhadūtyena bhajantu vā dayāṃ diśantu vā daṇḍamamī mamāgasām || 131 ||
[Analyze grammar]

ayogajāmanvabhavaṃ na vedanāṃ hitāya me'bhūdiyamunmadiṣṇutā |
udeti doṣādapi doṣalāghavaṃ kṛśatvamajñānavaśādivainasaḥ || 132 ||
[Analyze grammar]

tavetyayogasmarapāvako'pi me kadarthanātyarthatayā gamaddayām |
prakāśamunmādya yadadya kārayanmayātmanastvāmanukampate sma saḥ || 133 ||
[Analyze grammar]

amī samīhaikaparāstavāmarāḥ svakiṃkaraṃ māmapi kartumīśiṣe |
vicārya kāryaṃ sṛja mā vidhānmudhā kṛtānutāpastvayi pārṣṇivagriham || 134 ||
[Analyze grammar]

udāsitenaiva mayedamudyase bhiyā na tebhyaḥ smaratānavānna vā |
hitaṃ yadi syānmadasuvyayena te tadā tava premaṇi śuddhilabdhaye || 135 ||
[Analyze grammar]

itīritairnaiṣadhasūnṛtāmṛtairvidarbhajanmā bhṛśamullalāsa sā |
ṛtoradhiśrīḥ śiśirānujanmanaḥ pikasvarairdūravikasvarairyathā || 136 ||
[Analyze grammar]

nalaṃ tadāvetya tamāśaye nije ghṛṇāṃ vigānaṃ ca mumoca bhīmajā |
jugupsamānā hi mano dhṛtaṃ tadā satīdhiyā daivatadūtadhāvi sā || 137 ||
[Analyze grammar]

manobhuvaste bhavināṃ manaḥ pitā nimajjayannenasi tanna lajjase |
amudri satputrakathā tvayeti sā sthitā satī manmathanindinī dhiyā || 138 ||
[Analyze grammar]

prasūnamityeva tadaṅgavarṇanā na sā viśeṣātkatamattadityabhūt |
tadā kadambaṃ tadavarṇi lomabhirmudasruṇā prāvṛṣi harṣamāgataiḥ || 139 ||
[Analyze grammar]

mayaiva saṃbodhya nalaṃ vyalāpi yatsvamāha madbuddhamidaṃ vimṛśya tat |
asāviti bhrāntimasāddamasvasuḥ svabhāṣitasvodbhramavibhramakramaḥ || 140 ||
[Analyze grammar]

vidarbharājaprabhavā tataḥ paraṃ trapāsakhī vaktumalaṃ na sā nalam |
purastamūce'bhimukhaṃ yadatrapā mamajja tenaiva mahāhrade hriyaḥ || 141 ||
[Analyze grammar]

yadāpavāryāpi na dātumuttaraṃ śaśāka sakhyāḥ śravasi priyasya sā |
vihasya sakhyeva tamabravīttadā hriyā'dhunā maunadhanā bhavatpriyā || 142 ||
[Analyze grammar]

padātitheyāṃllikhitasya te svayaṃ vitanvatī locananirjharāniyam |
jagāda yāṃ saiva mukhānmama tvayā prasūnabāṇopaniṣanniśamyatām || 143 ||
[Analyze grammar]

asaṃśayaṃ sa tvayi haṃsa eva māṃ śaśaṃsa na tvadvirahāptasaṃśayām |
kva candravaṃśasya vataṃsa madvadhānnṛśaṃsatā saṃbhavinī bhavādṛśe || 144 ||
[Analyze grammar]

jitastavāsyena vidhuḥ smaraḥ śriyā kṛtapratijñau mama tau vadhe kutaḥ |
taveti kṛtvā yadi tajjitaṃ mayā na moghasaṃkalpadharāḥ kilāmarāḥ || 145 ||
[Analyze grammar]

nijāṃśunirdagdhamadaṅgabhasmabhirmudhā vidhurvāñchati lāñchanonmṛjām |
tvadāsyatā yāsyati tāvatāpi kiṃ vadhūvadhenaiva punaḥ kalaṅkitaḥ || 146 ||
[Analyze grammar]

prasīda yaccha svaśarānmanobhuve sa hantu māṃ tairdhutakausumāśugaḥ |
tvadekacittāhamasūnvimuñcatī tvameva bhūtvā tṛṇavajjayāmi tam || 147 ||
[Analyze grammar]

śrutiḥ surāṇāṃ guṇagāyanī yadi tvadaṅghrimagnasya janasya kiṃ tataḥ |
stave raverapsu kṛtāplavaiḥ kṛte na mudvatī jātu bhavetkumudvatī || 148 ||
[Analyze grammar]

kathāsu śiṣyai varamadya na dhriye mamāvagantāsi na bhāvamanyathā |
tvadarthamuktāsutayā sunātha māṃ pratīhi jīvābhyadhikaṃ tvadekikām || 149 ||
[Analyze grammar]

mahendraheterapi rakṣaṇaṃ bhayādyadarthisādhāraṇamastrabhṛdvṛtam |
prasūnabāṇādapi māmarakṣataḥ kṣataṃ taduccairavakīrṇinastava || 150 ||
[Analyze grammar]

tavāsmi māṃ ghātukamapyupekṣase mṛṣāmaraṃ hā'maragauravātsmaram |
avehi caṇḍālamanaṅgamaṅga taṃ svakāṇḍakārasya madhoḥ sakhā hi saḥ || 151 ||
[Analyze grammar]

laghau laghāveva puraḥ pare budhairvidheyamuttejanamātmatejasaḥ |
tṛṇe tṛṇeḍhi jvalanaḥ khalu jvalantramātkarīṣadrumakāṇḍamaṇḍalam || 152 ||
[Analyze grammar]

surāparādhastava vā kiyānayaṃ svayaṃvarāyāmanukampratā mayi |
girāpi vakṣyanti makheṣu tarpaṇādidaṃ na devā mukhalajjayaiva te || 153 ||
[Analyze grammar]

vrajantu te te'pi varaṃ svayaṃvaraṃ prasādya tāneva mayā variṣyase |
na sarvathā tānapi na spṛśeddayā na te'pi tāvanmadanastvameva vā || 154 ||
[Analyze grammar]

itīyamālekhyagate'pi vīkṣite tvayi smaravrīḍasamasyayānayā |
pade pade maunamayāntarīpiṇī pravartitā sāraghasārasāraṇī || 155 ||
[Analyze grammar]

caṇḍālaste viṣāmaviśikhaḥ spṛśyate dṛśyate na khyāto'naṅgastvayi jayati yaḥ kiṃnu kṛttāṅgulīkaḥ |
kṛtvā mittraṃ madhumadhivanasthānamantaścaritvā sakhyāḥ prāṇānharati haritastvadyaśastajjuṣantām || 156 ||
[Analyze grammar]

atha bhīmabhuvaiva raho'bhihitāṃ natamaulirapatrapayā sa nijām |
amaraiḥ saha rājasamājagatiṃ jagatīpatirabhyupagatya yayau || 157 ||
[Analyze grammar]

śvastasyāḥ priyamāptusuddhuradhiyo dhārāḥ sṛjantyā rayānnamronnamrakapolapālipulakairvetasvatīrasruṇaḥ |
catvāraḥ praharāḥ smarārtibhirabhūtsāpi kṣapā duḥkṣayā tattasyāṃ kṛpayākhilaiva vidhinā rātristriyāmā kṛtā || 158 ||
[Analyze grammar]

tadakhilamiha bhūtaṃ bhūtagatyā jagatyāḥ patirabhilapati sma svātmadūtatvatattvam |
tribhuvanajanayāvaddṛttavṛttāntasākṣātkṛtikṛtiṣu nirastānandamindrādiṣu drāk || 159 ||
[Analyze grammar]

śrīharṣaṃ kavirājarājimukuṭālaṃkārahīraḥ sutaṃ śrīhīraḥ suṣuve jitendriyacayaṃ māmalladevī ca yam |
saṃdṛbdhārṇavavarṇanasya navamastasya vyaraṃsīnmahākāvye cāruṇi naiṣadhīyacarite sargo nisargojjvalaḥ || 160 ||
[Analyze grammar]