Chapter 213

vaiśaṃpāyana uvāca |
uktavanto yadā vākyamasakṛtsarvavṛṣṇayaḥ |
tato'bravīdvāsudevo vākyaṃ dharmārthasaṃhitam || 1 ||
[Analyze grammar]

nāvamānaṃ kulasyāsya guḍākeśaḥ prayuktavān |
saṃmāno'bhyadhikastena prayukto'yamasaṃśayam || 2 ||
[Analyze grammar]

arthalubdhānna vaḥ pārtho manyate sātvatānsadā |
svayaṃvaramanādhṛṣyaṃ manyate cāpi pāṇḍavaḥ || 3 ||
[Analyze grammar]

pradānamapi kanyāyāḥ paśuvatko'numaṃsyate |
vikrayaṃ cāpyapatyasya kaḥ kuryātpuruṣo bhuvi || 4 ||
[Analyze grammar]

etāndoṣāṃśca kaunteyo dṛṣṭavāniti me matiḥ |
ataḥ prasahya hṛtavānkanyāṃ dharmeṇa pāṇḍavaḥ || 5 ||
[Analyze grammar]

ucitaścaiva saṃbandhaḥ subhadrā ca yaśasvinī |
eṣa cāpīdṛśaḥ pārthaḥ prasahya hṛtavāniti || 6 ||
[Analyze grammar]

bharatasyānvaye jātaṃ śaṃtanośca mahātmanaḥ |
kuntibhojātmajāputraṃ ko bubhūṣeta nārjunam || 7 ||
[Analyze grammar]

na ca paśyāmi yaḥ pārthaṃ vikrameṇa parājayet |
api sarveṣu lokeṣu sendrarudreṣu māriṣa || 8 ||
[Analyze grammar]

sa ca nāma rathastādṛṅmadīyāste ca vājinaḥ |
yoddhā pārthaśca śīghrāstraḥ ko nu tena samo bhavet || 9 ||
[Analyze grammar]

tamanudrutya sāntvena parameṇa dhanaṃjayam |
nivartayadhvaṃ saṃhṛṣṭā mamaiṣā paramā matiḥ || 10 ||
[Analyze grammar]

yadi nirjitya vaḥ pārtho balādgacchetsvakaṃ puram |
praṇaśyedvo yaśaḥ sadyo na tu sāntve parājayaḥ || 11 ||
[Analyze grammar]

tacchrutvā vāsudevasya tathā cakrurjanādhipa |
nivṛttaścārjunastatra vivāhaṃ kṛtavāṃstataḥ || 12 ||
[Analyze grammar]

uṣitvā tatra kaunteyaḥ saṃvatsaraparāḥ kṣapāḥ |
puṣkareṣu tataḥ śiṣṭaṃ kālaṃ vartitavānprabhuḥ |
pūrṇe tu dvādaśe varṣe khāṇḍavaprasthamāviśat || 13 ||
[Analyze grammar]

abhigamya sa rājānaṃ vinayena samāhitaḥ |
abhyarcya brāhmaṇānpārtho draupadīmabhijagmivān || 14 ||
[Analyze grammar]

taṃ draupadī pratyuvāca praṇayātkurunandanam |
tatraiva gaccha kaunteya yatra sā sātvatātmajā |
subaddhasyāpi bhārasya pūrvabandhaḥ ślathāyate || 15 ||
[Analyze grammar]

tathā bahuvidhaṃ kṛṣṇāṃ vilapantīṃ dhanaṃjayaḥ |
sāntvayāmāsa bhūyaśca kṣamayāmāsa cāsakṛt || 16 ||
[Analyze grammar]

subhadrāṃ tvaramāṇaśca raktakauśeyavāsasam |
pārthaḥ prasthāpayāmāsa kṛtvā gopālikāvapuḥ || 17 ||
[Analyze grammar]

sādhikaṃ tena rūpeṇa śobhamānā yaśasvinī |
bhavanaṃ śreṣṭhamāsādya vīrapatnī varāṅganā |
vavande pṛthutāmrākṣī pṛthāṃ bhadrā yaśasvinī || 18 ||
[Analyze grammar]

tato'bhigamya tvaritā pūrṇendusadṛśānanā |
vavande draupadīṃ bhadrā preṣyāhamiti cābravīt || 19 ||
[Analyze grammar]

pratyutthāya ca tāṃ kṛṣṇā svasāraṃ mādhavasya tām |
sasvaje cāvadatprītā niḥsapatno'stu te patiḥ |
tathaiva muditā bhadrā tāmuvācaivamastviti || 20 ||
[Analyze grammar]

tataste hṛṣṭamanasaḥ pāṇḍaveyā mahārathāḥ |
kuntī ca paramaprītā babhūva janamejaya || 21 ||
[Analyze grammar]

śrutvā tu puṇḍarīkākṣaḥ saṃprāptaṃ svapurottamam |
arjunaṃ pāṇḍavaśreṣṭhamindraprasthagataṃ tadā || 22 ||
[Analyze grammar]

ājagāma viśuddhātmā saha rāmeṇa keśavaḥ |
vṛṣṇyandhakamahāmātraiḥ saha vīrairmahārathaiḥ || 23 ||
[Analyze grammar]

bhrātṛbhiśca kumāraiśca yodhaiśca śataśo vṛtaḥ |
sainyena mahatā śaurirabhiguptaḥ paraṃtapaḥ || 24 ||
[Analyze grammar]

tatra dānapatirdhīmānājagāma mahāyaśāḥ |
akrūro vṛṣṇivīrāṇāṃ senāpatirariṃdamaḥ || 25 ||
[Analyze grammar]

anādhṛṣṭirmahātejā uddhavaśca mahāyaśāḥ |
sākṣādbṛhaspateḥ śiṣyo mahābuddhirmahāyaśāḥ || 26 ||
[Analyze grammar]

satyakaḥ sātyakiścaiva kṛtavarmā ca sātvataḥ |
pradyumnaścaiva sāmbaśca niśaṭhaḥ śaṅkureva ca || 27 ||
[Analyze grammar]

cārudeṣṇaśca vikrānto jhillī vipṛthureva ca |
sāraṇaśca mahābāhurgadaśca viduṣāṃ varaḥ || 28 ||
[Analyze grammar]

ete cānye ca bahavo vṛṣṇibhojāndhakāstathā |
ājagmuḥ khāṇḍavaprasthamādāya haraṇaṃ bahu || 29 ||
[Analyze grammar]

tato yudhiṣṭhiro rājā śrutvā mādhavamāgatam |
pratigrahārthaṃ kṛṣṇasya yamau prāsthāpayattadā || 30 ||
[Analyze grammar]

tābhyāṃ pratigṛhītaṃ tadvṛṣṇicakraṃ samṛddhimat |
viveśa khāṇḍavaprasthaṃ patākādhvajaśobhitam || 31 ||
[Analyze grammar]

siktasaṃmṛṣṭapanthānaṃ puṣpaprakaraśobhitam |
candanasya rasaiḥ śītaiḥ puṇyagandhairniṣevitam || 32 ||
[Analyze grammar]

dahyatāguruṇā caiva deśe deśe sugandhinā |
susaṃmṛṣṭajanākīrṇaṃ vaṇigbhirupaśobhitam || 33 ||
[Analyze grammar]

pratipede mahābāhuḥ saha rāmeṇa keśavaḥ |
vṛṣṇyandhakamahābhojaiḥ saṃvṛtaḥ puruṣottamaḥ || 34 ||
[Analyze grammar]

saṃpūjyamānaḥ pauraiśca brāhmaṇaiśca sahasraśaḥ |
viveśa bhavanaṃ rājñaḥ puraṃdaragṛhopamam || 35 ||
[Analyze grammar]

yudhiṣṭhirastu rāmeṇa samāgacchadyathāvidhi |
mūrdhni keśavamāghrāya paryaṣvajata bāhunā || 36 ||
[Analyze grammar]

taṃ prīyamāṇaṃ kṛṣṇastu vinayenābhyapūjayat |
bhīmaṃ ca puruṣavyāghraṃ vidhivatpratyapūjayat || 37 ||
[Analyze grammar]

tāṃśca vṛṣṇyandhakaśreṣṭhāndharmarājo yudhiṣṭhiraḥ |
pratijagrāha satkārairyathāvidhi yathopagam || 38 ||
[Analyze grammar]

guruvatpūjayāmāsa kāṃścitkāṃścidvayasyavat |
kāṃścidabhyavadatpremṇā kaiścidapyabhivāditaḥ || 39 ||
[Analyze grammar]

tato dadau vāsudevo janyārthe dhanamuttamam |
haraṇaṃ vai subhadrāyā jñātideyaṃ mahāyaśāḥ || 40 ||
[Analyze grammar]

rathānāṃ kāñcanāṅgānāṃ kiṅkiṇījālamālinām |
caturyujāmupetānāṃ sūtaiḥ kuśalasaṃmataiḥ |
sahasraṃ pradadau kṛṣṇo gavāmayutameva ca || 41 ||
[Analyze grammar]

śrīmānmāthuradeśyānāṃ dogdhrīṇāṃ puṇyavarcasām |
vaḍavānāṃ ca śubhrāṇāṃ candrāṃśusamavarcasām |
dadau janārdanaḥ prītyā sahasraṃ hemabhūṣaṇam || 42 ||
[Analyze grammar]

tathaivāśvatarīṇāṃ ca dāntānāṃ vātaraṃhasām |
śatānyañjanakeśīnāṃ śvetānāṃ pañca pañca ca || 43 ||
[Analyze grammar]

snāpanotsādane caiva suyuktaṃ vayasānvitam |
strīṇāṃ sahasraṃ gaurīṇāṃ suveṣāṇāṃ suvarcasām || 44 ||
[Analyze grammar]

suvarṇaśatakaṇṭhīnāmarogāṇāṃ suvāsasām |
paricaryāsu dakṣāṇāṃ pradadau puṣkarekṣaṇaḥ || 45 ||
[Analyze grammar]

kṛtākṛtasya mukhyasya kanakasyāgnivarcasaḥ |
manuṣyabhārāndāśārho dadau daśa janārdanaḥ || 46 ||
[Analyze grammar]

gajānāṃ tu prabhinnānāṃ tridhā prasravatāṃ madam |
girikūṭanikāśānāṃ samareṣvanivartinām || 47 ||
[Analyze grammar]

kḷptānāṃ paṭughaṇṭānāṃ varāṇāṃ hemamālinām |
hastyārohairupetānāṃ sahasraṃ sāhasapriyaḥ || 48 ||
[Analyze grammar]

rāmaḥ pādagrāhaṇikaṃ dadau pārthāya lāṅgalī |
prīyamāṇo haladharaḥ saṃbandhaprītimāvahan || 49 ||
[Analyze grammar]

sa mahādhanaratnaugho vastrakambalaphenavān |
mahāgajamahāgrāhaḥ patākāśaivalākulaḥ || 50 ||
[Analyze grammar]

pāṇḍusāgaramāviddhaḥ praviveśa mahānadaḥ |
pūrṇamāpūrayaṃsteṣāṃ dviṣacchokāvaho'bhavat || 51 ||
[Analyze grammar]

pratijagrāha tatsarvaṃ dharmarājo yudhiṣṭhiraḥ |
pūjayāmāsa tāṃścaiva vṛṣṇyandhakamahārathān || 52 ||
[Analyze grammar]

te sametā mahātmānaḥ kuruvṛṣṇyandhakottamāḥ |
vijahruramarāvāse narāḥ sukṛtino yathā || 53 ||
[Analyze grammar]

tatra tatra mahāpānairutkṛṣṭatalanāditaiḥ |
yathāyogaṃ yathāprīti vijahruḥ kuruvṛṣṇayaḥ || 54 ||
[Analyze grammar]

evamuttamavīryāste vihṛtya divasānbahūn |
pūjitāḥ kurubhirjagmuḥ punardvāravatīṃ purīm || 55 ||
[Analyze grammar]

rāmaṃ puraskṛtya yayurvṛṣṇyandhakamahārathāḥ |
ratnānyādāya śubhrāṇi dattāni kurusattamaiḥ || 56 ||
[Analyze grammar]

vāsudevastu pārthena tatraiva saha bhārata |
uvāsa nagare ramye śakraprasthe mahāmanāḥ |
vyacaradyamunākūle pārthena saha bhārata || 57 ||
[Analyze grammar]

tataḥ subhadrā saubhadraṃ keśavasya priyā svasā |
jayantamiva paulomī dyutimantamajījanat || 58 ||
[Analyze grammar]

dīrghabāhuṃ mahāsattvamṛṣabhākṣamariṃdamam |
subhadrā suṣuve vīramabhimanyuṃ nararṣabham || 59 ||
[Analyze grammar]

abhīśca manyumāṃścaiva tatastamarimardanam |
abhimanyumiti prāhurārjuniṃ puruṣarṣabham || 60 ||
[Analyze grammar]

sa sātvatyāmatirathaḥ saṃbabhūva dhanaṃjayāt |
makhe nirmathyamānādvā śamīgarbhāddhutāśanaḥ || 61 ||
[Analyze grammar]

yasmiñjāte mahābāhuḥ kuntīputro yudhiṣṭhiraḥ |
ayutaṃ gā dvijātibhyaḥ prādānniṣkāṃśca tāvataḥ || 62 ||
[Analyze grammar]

dayito vāsudevasya bālyātprabhṛti cābhavat |
pitṝṇāṃ caiva sarveṣāṃ prajānāmiva candramāḥ || 63 ||
[Analyze grammar]

janmaprabhṛti kṛṣṇaśca cakre tasya kriyāḥ śubhāḥ |
sa cāpi vavṛdhe bālaḥ śuklapakṣe yathā śaśī || 64 ||
[Analyze grammar]

catuṣpādaṃ daśavidhaṃ dhanurvedamariṃdamaḥ |
arjunādveda vedajñātsakalaṃ divyamānuṣam || 65 ||
[Analyze grammar]

vijñāneṣvapi cāstrāṇāṃ sauṣṭhave ca mahābalaḥ |
kriyāsvapi ca sarvāsu viśeṣānabhyaśikṣayat || 66 ||
[Analyze grammar]

āgame ca prayoge ca cakre tulyamivātmanaḥ |
tutoṣa putraṃ saubhadraṃ prekṣamāṇo dhanaṃjayaḥ || 67 ||
[Analyze grammar]

sarvasaṃhananopetaṃ sarvalakṣaṇalakṣitam |
durdharṣamṛṣabhaskandhaṃ vyāttānanamivoragam || 68 ||
[Analyze grammar]

siṃhadarpaṃ maheṣvāsaṃ mattamātaṅgavikramam |
meghadundubhinirghoṣaṃ pūrṇacandranibhānanam || 69 ||
[Analyze grammar]

kṛṣṇasya sadṛśaṃ śaurye vīrye rūpe tathākṛtau |
dadarśa putraṃ bībhatsurmaghavāniva taṃ yathā || 70 ||
[Analyze grammar]

pāñcālyapi ca pañcabhyaḥ patibhyaḥ śubhalakṣaṇā |
lebhe pañca sutānvīrāñśubhānpañcācalāniva || 71 ||
[Analyze grammar]

yudhiṣṭhirātprativindhyaṃ sutasomaṃ vṛkodarāt |
arjunācchrutakarmāṇaṃ śatānīkaṃ ca nākulim || 72 ||
[Analyze grammar]

sahadevācchrutasenametānpañca mahārathān |
pāñcālī suṣuve vīrānādityānaditiryathā || 73 ||
[Analyze grammar]

śāstrataḥ prativindhyaṃ tamūcurviprā yudhiṣṭhiram |
parapraharaṇajñāne prativindhyo bhavatvayam || 74 ||
[Analyze grammar]

sute somasahasre tu somārkasamatejasam |
sutasomaṃ maheṣvāsaṃ suṣuve bhīmasenataḥ || 75 ||
[Analyze grammar]

śrutaṃ karma mahatkṛtvā nivṛttena kirīṭinā |
jātaḥ putrastavetyevaṃ śrutakarmā tato'bhavat || 76 ||
[Analyze grammar]

śatānīkasya rājarṣeḥ kauravyaḥ kurunandanaḥ |
cakre putraṃ sanāmānaṃ nakulaḥ kīrtivardhanam || 77 ||
[Analyze grammar]

tatastvajījanatkṛṣṇā nakṣatre vahnidaivate |
sahadevātsutaṃ tasmācchrutaseneti taṃ viduḥ || 78 ||
[Analyze grammar]

ekavarṣāntarāstveva draupadeyā yaśasvinaḥ |
anvajāyanta rājendra parasparahite ratāḥ || 79 ||
[Analyze grammar]

jātakarmāṇyānupūrvyāccūḍopanayanāni ca |
cakāra vidhivaddhaumyasteṣāṃ bharatasattama || 80 ||
[Analyze grammar]

kṛtvā ca vedādhyayanaṃ tataḥ sucaritavratāḥ |
jagṛhuḥ sarvamiṣvastramarjunāddivyamānuṣam || 81 ||
[Analyze grammar]

devagarbhopamaiḥ putrairvyūḍhoraskairmahābalaiḥ |
anvitā rājaśārdūla pāṇḍavā mudamāpnuvan || 82 ||
[Analyze grammar]