Chapter 10

indra uvāca |
evametadbrahmabalaṃ garīyo na brahmataḥ kiṃcidanyadgarīyaḥ |
āvikṣitasya tu balaṃ na mṛṣye vajramasmai prahariṣyāmi ghoram || 1 ||
[Analyze grammar]

dhṛtarāṣṭra prahito gaccha maruttaṃ saṃvartena sahitaṃ taṃ vadasva |
bṛhaspatiṃ tvamupaśikṣasva rājanvajraṃ vā te prahariṣyāmi ghoram || 2 ||
[Analyze grammar]

vyāsa uvāca |
tato gatvā dhṛtarāṣṭro narendraṃ provācedaṃ vacanaṃ vāsavasya |
gandharvaṃ māṃ dhṛtarāṣṭraṃ nibodha tvāmāgataṃ vaktukāmaṃ narendra || 3 ||
[Analyze grammar]

aindraṃ vākyaṃ śṛṇu me rājasiṃha yatprāha lokādhipatirmahātmā |
bṛhaspatiṃ yājakaṃ tvaṃ vṛṇīṣva vajraṃ vā te prahariṣyāmi ghoram |
vacaścedetanna kariṣyase me prāhaitadetāvadacintyakarmā || 4 ||
[Analyze grammar]

marutta uvāca |
tvaṃ caivaitadvettha puraṃdaraśca viśvedevā vasavaścāśvinau ca |
mitradrohe niṣkṛtirvai yathaiva nāstīti lokeṣu sadaiva vādaḥ || 5 ||
[Analyze grammar]

bṛhaspatiryājayitā mahendraṃ devaśreṣṭhaṃ vajrabhṛtāṃ variṣṭham |
saṃvarto māṃ yājayitādya rājanna te vākyaṃ tasya vā rocayāmi || 6 ||
[Analyze grammar]

gandharva uvāca |
ghoro nādaḥ śrūyate vāsavasya nabhastale garjato rājasiṃha |
vyaktaṃ vajraṃ mokṣyate te mahendraḥ kṣemaṃ rājaṃścintyatāmeṣa kālaḥ || 7 ||
[Analyze grammar]

vyāsa uvāca |
ityevamukto dhṛtarāṣṭreṇa rājā śrutvā nādaṃ nadato vāsavasya |
taponityaṃ dharmavidāṃ variṣṭhaṃ saṃvartaṃ taṃ jñāpayāmāsa kāryam || 8 ||
[Analyze grammar]

marutta uvāca |
imamaśmānaṃ plavamānamārādadhvā dūraṃ tena na dṛśyate'dya |
prapadye'haṃ śarma viprendra tvattaḥ prayaccha tasmādabhayaṃ vipramukhya || 9 ||
[Analyze grammar]

ayamāyāti vai vajrī diśo vidyotayandaśa |
amānuṣeṇa ghoreṇa sadasyāstrāsitā hi naḥ || 10 ||
[Analyze grammar]

saṃvarta uvāca |
bhayaṃ śakrādvyetu te rājasiṃha praṇotsye'haṃ bhayametatsughoram |
saṃstambhinyā vidyayā kṣiprameva mā bhaistvamasmādbhava cāpi pratītaḥ || 11 ||
[Analyze grammar]

ahaṃ saṃstambhayiṣyāmi mā bhaistvaṃ śakrato nṛpa |
sarveṣāmeva devānāṃ kṣapitānyāyudhāni me || 12 ||
[Analyze grammar]

diśo vajraṃ vrajatāṃ vāyuretu varṣaṃ bhūtvā nipatatu kānaneṣu |
āpaḥ plavantvantarikṣe vṛthā ca saudāminī dṛśyatāṃ mā bibhastvam || 13 ||
[Analyze grammar]

atho vahnistrātu vā sarvataste kāmaṃ varṣaṃ varṣatu vāsavo vā |
vajraṃ tathā sthāpayatāṃ ca vāyurmahāghoraṃ plavamānaṃ jalaughaiḥ || 14 ||
[Analyze grammar]

marutta uvāca |
ghoraḥ śabdaḥ śrūyate vai mahāsvano vajrasyaiṣa sahito mārutena |
ātmā hi me pravyathate muhurmuhurna me svāsthyaṃ jāyate cādya vipra || 15 ||
[Analyze grammar]

saṃvarta uvāca |
vajrādugrādvyetu bhayaṃ tavādya vāto bhūtvā hanmi narendra vajram |
bhayaṃ tyaktvā varamanyaṃ vṛṇīṣva kaṃ te kāmaṃ tapasā sādhayāmi || 16 ||
[Analyze grammar]

marutta uvāca |
indraḥ sākṣātsahasābhyetu vipra haviryajñe pratigṛhṇātu caiva |
svaṃ svaṃ dhiṣṇyaṃ caiva juṣantu devāḥ sutaṃ somaṃ pratigṛhṇantu caiva || 17 ||
[Analyze grammar]

saṃvarta uvāca |
ayamindro haribhirāyāti rājandevaiḥ sarvaiḥ sahitaḥ somapīthī |
mantrāhūto yajñamimaṃ mayādya paśyasvainaṃ mantravisrastakāyam || 18 ||
[Analyze grammar]

vyāsa uvāca |
tato devaiḥ sahito devarājo rathe yuktvā tānharīnvājimukhyān |
āyādyajñamadhi rājñaḥ pipāsurāvikṣitasyāprameyasya somam || 19 ||
[Analyze grammar]

tamāyāntaṃ sahitaṃ devasaṃghaiḥ pratyudyayau sapurodhā maruttaḥ |
cakre pūjāṃ devarājāya cāgryāṃ yathāśāstraṃ vidhivatprīyamāṇaḥ || 20 ||
[Analyze grammar]

saṃvarta uvāca |
svāgataṃ te puruhūteha vidvanyajño'dyāyaṃ saṃnihite tvayīndra |
śośubhyate balavṛtraghna bhūyaḥ pibasva somaṃ sutamudyataṃ mayā || 21 ||
[Analyze grammar]

marutta uvāca |
śivena māṃ paśya namaśca te'stu prāpto yajñaḥ saphalaṃ jīvitaṃ me |
ayaṃ yajñaṃ kurute me surendra bṛhaspateravaro janmanā yaḥ || 22 ||
[Analyze grammar]

indra uvāca |
jānāmi te gurumenaṃ tapodhanaṃ bṛhaspateranujaṃ tigmatejasam |
yasyāhvānādāgato'haṃ narendra prītirme'dya tvayi manyuḥ pranaṣṭaḥ || 23 ||
[Analyze grammar]

saṃvarta uvāca |
yadi prītastvamasi vai devarāja tasmātsvayaṃ śādhi yajñe vidhānam |
svayaṃ sarvānkuru mārgānsurendra jānātvayaṃ sarvalokaśca deva || 24 ||
[Analyze grammar]

vyāsa uvāca |
evamuktastvāṅgirasena śakraḥ samādideśa svayameva devān |
sabhāḥ kriyantāmāvasathāśca mukhyāḥ sahasraśaścitrabhaumāḥ samṛddhāḥ || 25 ||
[Analyze grammar]

kḷptasthūṇāḥ kurutārohaṇāni gandharvāṇāmapsarasāṃ ca śīghram |
yeṣu nṛtyerannapsarasaḥ sahasraśaḥ svargoddeśaḥ kriyatāṃ yajñavāṭaḥ || 26 ||
[Analyze grammar]

ityuktāste cakrurāśu pratītā divaukasaḥ śakravākyānnarendra |
tato vākyaṃ prāha rājānamindraḥ prīto rājanpūjayāno maruttam || 27 ||
[Analyze grammar]

eṣa tvayāhamiha rājansametya ye cāpyanye tava pūrve narendrāḥ |
sarvāścānyā devatāḥ prīyamāṇā havistubhyaṃ pratigṛhṇantu rājan || 28 ||
[Analyze grammar]

āgneyaṃ vai lohitamālabhantāṃ vaiśvadevaṃ bahurūpaṃ virājan |
nīlaṃ cokṣāṇaṃ medhyamabhyālabhantāṃ calacchiśnaṃ matpradiṣṭaṃ dvijendrāḥ || 29 ||
[Analyze grammar]

tato yajño vavṛdhe tasya rājño yatra devāḥ svayamannāni jahruḥ |
yasmiñśakro brāhmaṇaiḥ pūjyamānaḥ sadasyo'bhūddharimāndevarājaḥ || 30 ||
[Analyze grammar]

tataḥ saṃvartaścityagato mahātmā yathā vahniḥ prajvalito dvitīyaḥ |
havīṃṣyuccairāhvayandevasaṃghāñjuhāvāgnau mantravatsupratītaḥ || 31 ||
[Analyze grammar]

tataḥ pītvā balabhitsomamagryaṃ ye cāpyanye somapā vai divaukasaḥ |
sarve'nujñātāḥ prayayuḥ pārthivena yathājoṣaṃ tarpitāḥ prītimantaḥ || 32 ||
[Analyze grammar]

tato rājā jātarūpasya rāśīnpade pade kārayāmāsa hṛṣṭaḥ |
dvijātibhyo visṛjanbhūri vittaṃ rarāja vitteśa ivārihantā || 33 ||
[Analyze grammar]

tato vittaṃ vividhaṃ saṃnidhāya yathotsāhaṃ kārayitvā ca kośam |
anujñāto guruṇā saṃnivṛtya śaśāsa gāmakhilāṃ sāgarāntām || 34 ||
[Analyze grammar]

evaṃguṇaḥ saṃbabhūveha rājā yasya kratau tatsuvarṇaṃ prabhūtam |
tattvaṃ samādāya narendra vittaṃ yajasva devāṃstarpayāno vidhānaiḥ || 35 ||
[Analyze grammar]

vaiśaṃpāyana uvāca |
tato rājā pāṇḍavo hṛṣṭarūpaḥ śrutvā vākyaṃ satyavatyāḥ sutasya |
manaścakre tena vittena yaṣṭuṃ tato'mātyairmantrayāmāsa bhūyaḥ || 36 ||
[Analyze grammar]