Chapter 271

uśanovāca |
namastasmai bhagavate devāya prabhaviṣṇave |
yasya pṛthvītalaṃ tāta sākāśaṃ bāhugocaram || 1 ||
[Analyze grammar]

mūrdhā yasya tvanantaṃ ca sthānaṃ dānavasattama |
tasyāhaṃ te pravakṣyāmi viṣṇormāhātmyamuttamam || 2 ||
[Analyze grammar]

bhīṣma uvāca |
tayoḥ saṃvadatorevamājagāma mahāmuniḥ |
sanatkumāro dharmātmā saṃśayacchedanāya vai || 3 ||
[Analyze grammar]

sa pūjito'surendreṇa muninośanasā tathā |
niṣasādāsane rājanmahārhe munipuṃgavaḥ || 4 ||
[Analyze grammar]

tamāsīnaṃ mahāprājñamuśanā vākyamabravīt |
brūhyasmai dānavendrāya viṣṇormāhātmyamuttamam || 5 ||
[Analyze grammar]

sanatkumārastu tataḥ śrutvā prāha vaco'rthavat |
viṣṇormāhātmyasaṃyuktaṃ dānavendrāya dhīmate || 6 ||
[Analyze grammar]

śṛṇu sarvamidaṃ daitya viṣṇormāhātmyamuttamam |
viṣṇau jagatsthitaṃ sarvamiti viddhi paraṃtapa || 7 ||
[Analyze grammar]

sṛjatyeṣa mahābāho bhūtagrāmaṃ carācaram |
eṣa cākṣipate kāle kāle visṛjate punaḥ |
asmingacchanti vilayamasmācca prabhavantyuta || 8 ||
[Analyze grammar]

naiṣa dānavatā śakyastapasā naiva cejyayā |
saṃprāptumindriyāṇāṃ tu saṃyamenaiva śakyate || 9 ||
[Analyze grammar]

bāhye cābhyantare caiva karmaṇā manasi sthitaḥ |
nirmalīkurute buddhyā so'mutrānantyamaśnute || 10 ||
[Analyze grammar]

yathā hiraṇyakartā vai rūpyamagnau viśodhayet |
bahuśo'tiprayatnena mahatātmakṛtena ha || 11 ||
[Analyze grammar]

tadvajjātiśatairjīvaḥ śudhyate'lpena karmaṇā |
yatnena mahatā caivāpyekajātau viśudhyate || 12 ||
[Analyze grammar]

līlayālpaṃ yathā gātrātpramṛjyādātmano rajaḥ |
bahu yatnena mahatā doṣanirharaṇaṃ tathā || 13 ||
[Analyze grammar]

yathā cālpena mālyena vāsitaṃ tilasarṣapam |
na muñcati svakaṃ gandhaṃ tadvatsūkṣmasya darśanam || 14 ||
[Analyze grammar]

tadeva bahubhirmālyairvāsyamānaṃ punaḥ punaḥ |
vimuñcati svakaṃ gandhaṃ mālyagandhe'vatiṣṭhati || 15 ||
[Analyze grammar]

evaṃ jātiśatairyukto guṇaireva prasaṅgiṣu |
buddhyā nivartate doṣo yatnenābhyāsajena vai || 16 ||
[Analyze grammar]

karmaṇā svena raktāni viraktāni ca dānava |
yathā karmaviśeṣāṃśca prāpnuvanti tathā śṛṇu || 17 ||
[Analyze grammar]

yathā ca saṃpravartante yasmiṃstiṣṭhanti vā vibho |
tatte'nupūrvyā vyākhyāsye tadihaikamanāḥ śṛṇu || 18 ||
[Analyze grammar]

anādinidhanaḥ śrīmānharirnārāyaṇaḥ prabhuḥ |
sa vai sṛjati bhūtāni sthāvarāṇi carāṇi ca || 19 ||
[Analyze grammar]

eṣa sarveṣu bhūteṣu kṣaraścākṣara eva ca |
ekādaśavikārātmā jagatpibati raśmibhiḥ || 20 ||
[Analyze grammar]

pādau tasya mahīṃ viddhi mūrdhānaṃ divameva ca |
bāhavastu diśo daitya śrotramākāśameva ca || 21 ||
[Analyze grammar]

tasya tejomayaḥ sūryo manaścandramasi sthitam |
buddhirjñānagatā nityaṃ rasastvapsu pravartate || 22 ||
[Analyze grammar]

bhruvoranantarāstasya grahā dānavasattama |
nakṣatracakraṃ netrābhyāṃ pādayorbhūśca dānava || 23 ||
[Analyze grammar]

rajastamaśca sattvaṃ ca viddhi nārāyaṇātmakam |
so''śramāṇāṃ mukhaṃ tāta karmaṇastatphalaṃ viduḥ || 24 ||
[Analyze grammar]

akarmaṇaḥ phalaṃ caiva sa eva paramavyayaḥ |
chandāṃsi tasya romāṇi akṣaraṃ ca sarasvatī || 25 ||
[Analyze grammar]

bahvāśrayo bahumukho dharmo hṛdi samāśritaḥ |
sa brahmaparamo dharmastapaśca sadasacca saḥ || 26 ||
[Analyze grammar]

śrutiśāstragrahopetaḥ ṣoḍaśartvikkratuśca saḥ |
pitāmahaśca viṣṇuśca so'śvinau sa puraṃdaraḥ || 27 ||
[Analyze grammar]

mitraśca varuṇaścaiva yamo'tha dhanadastathā |
te pṛthagdarśanāstasya saṃvidanti tathaikatām |
ekasya viddhi devasya sarvaṃ jagadidaṃ vaśe || 28 ||
[Analyze grammar]

nānābhūtasya daityendra tasyaikatvaṃ vadatyayam |
jantuḥ paśyati jñānena tataḥ sattvaṃ prakāśate || 29 ||
[Analyze grammar]

saṃhāravikṣepasahasrakoṭīstiṣṭhanti jīvāḥ pracaranti cānye |
prajāvisargasya ca pārimāṇyaṃ vāpīsahasrāṇi bahūni daitya || 30 ||
[Analyze grammar]

vāpyaḥ punaryojanavistṛtāstāḥ krośaṃ ca gambhīratayāvagāḍhāḥ |
āyāmataḥ pañcaśatāśca sarvāḥ pratyekaśo yojanataḥ pravṛddhāḥ || 31 ||
[Analyze grammar]

vāpyā jalaṃ kṣipyati vālakoṭyā tvahnā sakṛccāpyatha na dvitīyam |
tāsāṃ kṣaye viddhi kṛtaṃ visargaṃ saṃhāramekaṃ ca tathā prajānām || 32 ||
[Analyze grammar]

ṣaḍjīvavarṇāḥ paramaṃ pramāṇaṃ kṛṣṇo dhūmro nīlamathāsya madhyam |
raktaṃ punaḥ sahyataraṃ sukhaṃ tu hāridravarṇaṃ susukhaṃ ca śuklam || 33 ||
[Analyze grammar]

paraṃ tu śuklaṃ vimalaṃ viśokaṃ gataklamaṃ sidhyati dānavendra |
gatvā tu yoniprabhavāni daitya sahasraśaḥ siddhimupaiti jīvaḥ || 34 ||
[Analyze grammar]

gatiṃ ca yāṃ darśanamāha devo gatvā śubhaṃ darśanameva cāha |
gatiḥ punarvarṇakṛtā prajānāṃ varṇastathā kālakṛto'surendra || 35 ||
[Analyze grammar]

śataṃ sahasrāṇi caturdaśeha parā gatirjīvaguṇasya daitya |
ārohaṇaṃ tatkṛtameva viddhi sthānaṃ tathā niḥsaraṇaṃ ca teṣām || 36 ||
[Analyze grammar]

kṛṣṇasya varṇasya gatirnikṛṣṭā sa majjate narake pacyamānaḥ |
sthānaṃ tathā durgatibhistu tasya prajāvisargānsubahūnvadanti || 37 ||
[Analyze grammar]

śataṃ sahasrāṇi tataścaritvā prāpnoti varṇaṃ haritaṃ tu paścāt |
sa caiva tasminnivasatyanīśo yugakṣaye tamasā saṃvṛtātmā || 38 ||
[Analyze grammar]

sa vai yadā sattvaguṇena yuktastamo vyapohanghaṭate svabuddhyā |
sa lohitaṃ varṇamupaiti nīlo manuṣyaloke parivartate ca || 39 ||
[Analyze grammar]

sa tatra saṃhāravisargameva svakarmajairbandhanaiḥ kliśyamānaḥ |
tataḥ sa hāridramupaiti varṇaṃ saṃhāravikṣepaśate vyatīte || 40 ||
[Analyze grammar]

hāridravarṇastu prajāvisargānsahasraśastiṣṭhati saṃcaranvai |
avipramukto niraye ca daitya tataḥ sahasrāṇi daśāparāṇi || 41 ||
[Analyze grammar]

gatīḥ sahasrāṇi ca pañca tasya catvāri saṃvartakṛtāni caiva |
vimuktamenaṃ nirayācca viddhi sarveṣu cānyeṣu ca saṃbhaveṣu || 42 ||
[Analyze grammar]

sa devaloke viharatyabhīkṣṇaṃ tataścyuto mānuṣatāmupaiti |
saṃhāravikṣepaśatāni cāṣṭau martyeṣu tiṣṭhannamṛtatvameti || 43 ||
[Analyze grammar]

so'smādatha bhraśyati kālayogātkṛṣṇe tale tiṣṭhati sarvakaṣṭe |
yathā tvayaṃ sidhyati jīvalokastatte'bhidhāsyāmyasurapravīra || 44 ||
[Analyze grammar]

daivāni sa vyūhaśatāni sapta rakto haridro'tha tathaiva śuklaḥ |
saṃśritya saṃdhāvati śuklametamaṣṭāparānarcyatamānsa lokān || 45 ||
[Analyze grammar]

aṣṭau ca ṣaṣṭiṃ ca śatāni yāni manoviruddhāni mahādyutīnām |
śuklasya varṇasya parā gatiryā trīṇyeva ruddhāni mahānubhāva || 46 ||
[Analyze grammar]

saṃhāravikṣepamaniṣṭamekaṃ catvāri cānyāni vasatyanīśaḥ |
ṣaṣṭhasya varṇasya parā gatiryā siddhā viśiṣṭasya gataklamasya || 47 ||
[Analyze grammar]

saptottaraṃ teṣu vasatyanīśaḥ saṃhāravikṣepaśataṃ saśeṣam |
tasmādupāvṛtya manuṣyaloke tato mahānmānuṣatāmupaiti || 48 ||
[Analyze grammar]

tasmādupāvṛtya tataḥ krameṇa so'gre sma saṃtiṣṭhati bhūtasargam |
sa saptakṛtvaśca paraiti lokānsaṃhāravikṣepakṛtapravāsaḥ || 49 ||
[Analyze grammar]

saptaiva saṃhāramupaplavāni saṃbhāvya saṃtiṣṭhati siddhaloke |
tato'vyayaṃ sthānamanantameti devasya viṣṇoratha brahmaṇaśca |
śeṣasya caivātha narasya caiva devasya viṣṇoḥ paramasya caiva || 50 ||
[Analyze grammar]

saṃhārakāle paridagdhakāyā brahmāṇamāyānti sadā prajā hi |
ceṣṭātmano devagaṇāśca sarve ye brahmalokādamarāḥ sma te'pi || 51 ||
[Analyze grammar]

prajāvisargaṃ tu saśeṣakālaṃ sthānāni svānyeva saranti jīvāḥ |
niḥśeṣāṇāṃ tatpadaṃ yānti cānte sarvāpadā ye sadṛśā manuṣyāḥ || 52 ||
[Analyze grammar]

ye tu cyutāḥ siddhalokātkrameṇa teṣāṃ gatiṃ yānti tathānupūrvyā |
jīvāḥ pare tadbalaveṣarūpā vidhiṃ svakaṃ yānti viparyayeṇa || 53 ||
[Analyze grammar]

sa yāvadevāsti saśeṣabhukte prajāśca devyau ca tathaiva śukle |
tāvattadā teṣu viśuddhabhāvaḥ saṃyamya pañcendriyarūpametat || 54 ||
[Analyze grammar]

śuddhāṃ gatiṃ tāṃ paramāṃ paraiti śuddhena nityaṃ manasā vicinvan |
tato'vyayaṃ sthānamupaiti brahma duṣprāpamabhyeti sa śāśvataṃ vai |
ityetadākhyātamahīnasattva nārāyaṇasyeha balaṃ mayā te || 55 ||
[Analyze grammar]

vṛtra uvāca |
evaṃ gate me na viṣādo'sti kaścitsamyakca paśyāmi vacastavaitat |
śrutvā ca te vācamadīnasattva vikalmaṣo'smyadya tathā vipāpmā || 56 ||
[Analyze grammar]

pravṛttametadbhagavanmaharṣe mahādyuteścakramanantavīryam |
viṣṇoranantasya sanātanaṃ tatsthānaṃ sargā yatra sarve pravṛttāḥ |
sa vai mahātmā puruṣottamo vai tasmiñjagatsarvamidaṃ pratiṣṭhitam || 57 ||
[Analyze grammar]

bhīṣma uvāca |
evamuktvā sa kaunteya vṛtraḥ prāṇānavāsṛjat |
yojayitvā tathātmānaṃ paraṃ sthānamavāptavān || 58 ||
[Analyze grammar]

yudhiṣṭhira uvāca |
ayaṃ sa bhagavāndevaḥ pitāmaha janārdanaḥ |
sanatkumāro vṛtrāya yattadākhyātavānpurā || 59 ||
[Analyze grammar]

bhīṣma uvāca |
mūlasthāyī sa bhagavānsvenānantena tejasā |
tatsthaḥ sṛjati tānbhāvānnānārūpānmahātapāḥ || 60 ||
[Analyze grammar]

turīyārdhena tasyemaṃ viddhi keśavamacyutam |
turīyārdhena lokāṃstrīnbhāvayatyeṣa buddhimān || 61 ||
[Analyze grammar]

arvāksthitastu yaḥ sthāyī kalpānte parivartate |
sa śete bhagavānapsu yo'sāvatibalaḥ prabhuḥ |
tānvidhātā prasannātmā lokāṃścarati śāśvatān || 62 ||
[Analyze grammar]

sarvāṇyaśūnyāni karotyanantaḥ sanatkumāraḥ saṃcarate ca lokān |
sa cāniruddhaḥ sṛjate mahātmā tatsthaṃ jagatsarvamidaṃ vicitram || 63 ||
[Analyze grammar]

yudhiṣṭhira uvāca |
vṛtreṇa paramārthajña dṛṣṭā manye''tmano gatiḥ |
śubhā tasmātsa sukhito na śocati pitāmaha || 64 ||
[Analyze grammar]

śuklaḥ śuklābhijātīyaḥ sādhyo nāvartate'nagha |
tiryaggateśca nirmukto nirayācca pitāmaha || 65 ||
[Analyze grammar]

hāridravarṇe rakte vā vartamānastu pārthiva |
tiryagevānupaśyeta karmabhistāmasairvṛtaḥ || 66 ||
[Analyze grammar]

vayaṃ tu bhṛśamāpannā raktāḥ kaṣṭamukhe'sukhe |
kāṃ gatiṃ pratipatsyāmo nīlāṃ kṛṣṇādhamāmatha || 67 ||
[Analyze grammar]

bhīṣma uvāca |
śuddhābhijanasaṃpannāḥ pāṇḍavāḥ saṃśitavratāḥ |
vihṛtya devalokeṣu punarmānuṣyameṣyatha || 68 ||
[Analyze grammar]

prajāvisargaṃ ca sukhena kāle pratyetya deveṣu sukhāni bhuktvā |
sukhena saṃyāsyatha siddhasaṃkhyāṃ mā vo bhayaṃ bhūdvimalāḥ stha sarve || 69 ||
[Analyze grammar]