Chapter 272

yudhiṣṭhira uvāca |
aho dharmiṣṭhatā tāta vṛtrasyāmitatejasaḥ |
yasya vijñānamatulaṃ viṣṇorbhaktiśca tādṛśī || 1 ||
[Analyze grammar]

durvijñeyamidaṃ tāta viṣṇoramitatejasaḥ |
kathaṃ vā rājaśārdūla padaṃ tajjñātavānasau || 2 ||
[Analyze grammar]

bhavatā kathitaṃ hyetacchraddadhe cāhamacyuta |
bhūyastu me samutpannā buddhiravyaktadarśanāt || 3 ||
[Analyze grammar]

kathaṃ vinihato vṛtraḥ śakreṇa bharatarṣabha |
dharmiṣṭho viṣṇubhaktaśca tattvajñaśca padānvaye || 4 ||
[Analyze grammar]

etanme saṃśayaṃ brūhi pṛcchato bharatarṣabha |
vṛtrastu rājaśārdūla yathā śakreṇa nirjitaḥ || 5 ||
[Analyze grammar]

yathā caivābhavadyuddhaṃ taccācakṣva pitāmaha |
vistareṇa mahābāho paraṃ kautūhalaṃ hi me || 6 ||
[Analyze grammar]

bhīṣma uvāca |
rathenendraḥ prayāto vai sārdhaṃ suragaṇaiḥ purā |
dadarśāthāgrato vṛtraṃ viṣṭhitaṃ parvatopamam || 7 ||
[Analyze grammar]

yojanānāṃ śatānyūrdhvaṃ pañcocchritamariṃdama |
śatāni vistareṇātha trīṇyevābhyadhikāni tu || 8 ||
[Analyze grammar]

tatprekṣya tādṛśaṃ rūpaṃ trailokyenāpi durjayam |
vṛtrasya devāḥ saṃtrastā na śāntimupalebhire || 9 ||
[Analyze grammar]

śakrasya tu tadā rājannūrustambho vyajāyata |
bhayādvṛtrasya sahasā dṛṣṭvā tadrūpamuttamam || 10 ||
[Analyze grammar]

tato nādaḥ samabhavadvāditrāṇāṃ ca nisvanaḥ |
devāsurāṇāṃ sarveṣāṃ tasminyuddha upasthite || 11 ||
[Analyze grammar]

atha vṛtrasya kauravya dṛṣṭvā śakramupasthitam |
na saṃbhramo na bhīḥ kācidāsthā vā samajāyata || 12 ||
[Analyze grammar]

tataḥ samabhavadyuddhaṃ trailokyasya bhayaṃkaram |
śakrasya ca surendrasya vṛtrasya ca mahātmanaḥ || 13 ||
[Analyze grammar]

asibhiḥ paṭṭiśaiḥ śūlaiḥ śaktitomaramudgaraiḥ |
śilābhirvividhābhiśca kārmukaiśca mahāsvanaiḥ || 14 ||
[Analyze grammar]

astraiśca vividhairdivyaiḥ pāvakolkābhireva ca |
devāsuraistataḥ sainyaiḥ sarvamāsītsamākulam || 15 ||
[Analyze grammar]

pitāmahapurogāśca sarve devagaṇāstathā |
ṛṣayaśca mahābhāgāstadyuddhaṃ draṣṭumāgaman || 16 ||
[Analyze grammar]

vimānāgryairmahārāja siddhāśca bharatarṣabha |
gandharvāśca vimānāgryairapsarobhiḥ samāgaman || 17 ||
[Analyze grammar]

tato'ntarikṣamāvṛtya vṛtro dharmabhṛtāṃ varaḥ |
aśmavarṣeṇa devendraṃ parvatātsamavākirat || 18 ||
[Analyze grammar]

tato devagaṇāḥ kruddhāḥ sarvataḥ śastravṛṣṭibhiḥ |
aśmavarṣamapohanta vṛtrapreritamāhave || 19 ||
[Analyze grammar]

vṛtraśca kuruśārdūla mahāmāyo mahābalaḥ |
mohayāmāsa devendraṃ māyāyuddhena sarvataḥ || 20 ||
[Analyze grammar]

tasya vṛtrārditasyātha moha āsīcchatakratoḥ |
rathaṃtareṇa taṃ tatra vasiṣṭhaḥ samabodhayat || 21 ||
[Analyze grammar]

vasiṣṭha uvāca |
devaśreṣṭho'si devendra surārivinibarhaṇa |
trailokyabalasaṃyuktaḥ kasmācchakra viṣīdasi || 22 ||
[Analyze grammar]

eṣa brahmā ca viṣṇuśca śivaścaiva jagatprabhuḥ |
somaśca bhagavāndevaḥ sarve ca paramarṣayaḥ || 23 ||
[Analyze grammar]

mā kārṣīḥ kaśmalaṃ śakra kaścidevetaro yathā |
āryāṃ yuddhe matiṃ kṛtvā jahi śatruṃ sureśvara || 24 ||
[Analyze grammar]

eṣa lokagurustryakṣaḥ sarvalokanamaskṛtaḥ |
nirīkṣate tvāṃ bhagavāṃstyaja mohaṃ sureśvara || 25 ||
[Analyze grammar]

ete brahmarṣayaścaiva bṛhaspatipurogamāḥ |
stavena śakra divyena stuvanti tvāṃ jayāya vai || 26 ||
[Analyze grammar]

bhīṣma uvāca |
evaṃ saṃbodhyamānasya vasiṣṭhena mahātmanā |
atīva vāsavasyāsīdbalamuttamatejasaḥ || 27 ||
[Analyze grammar]

tato buddhimupāgamya bhagavānpākaśāsanaḥ |
yogena mahatā yuktastāṃ māyāṃ vyapakarṣata || 28 ||
[Analyze grammar]

tato'ṅgiraḥsutaḥ śrīmāṃste caiva paramarṣayaḥ |
dṛṣṭvā vṛtrasya vikrāntamupagamya maheśvaram |
ūcurvṛtravināśārthaṃ lokānāṃ hitakāmyayā || 29 ||
[Analyze grammar]

tato bhagavatastejo jvaro bhūtvā jagatpateḥ |
samāviśanmahāraudraṃ vṛtraṃ daityavaraṃ tadā || 30 ||
[Analyze grammar]

viṣṇuśca bhagavāndevaḥ sarvalokābhipūjitaḥ |
aindraṃ samāviśadvajraṃ lokasaṃrakṣaṇe rataḥ || 31 ||
[Analyze grammar]

tato bṛhaspatirdhīmānupāgamya śatakratum |
vasiṣṭhaśca mahātejāḥ sarve ca paramarṣayaḥ || 32 ||
[Analyze grammar]

te samāsādya varadaṃ vāsavaṃ lokapūjitam |
ūcurekāgramanaso jahi vṛtramiti prabho || 33 ||
[Analyze grammar]

maheśvara uvāca |
eṣa vṛtro mahāñśakra balena mahatā vṛtaḥ |
viśvātmā sarvagaścaiva bahumāyaśca viśrutaḥ || 34 ||
[Analyze grammar]

tadenamasuraśreṣṭhaṃ trailokyenāpi durjayam |
jahi tvaṃ yogamāsthāya māvamaṃsthāḥ sureśvara || 35 ||
[Analyze grammar]

anena hi tapastaptaṃ balārthamamarādhipa |
ṣaṣṭiṃ varṣasahasrāṇi brahmā cāsmai varaṃ dadau || 36 ||
[Analyze grammar]

mahattvaṃ yogināṃ caiva mahāmāyatvameva ca |
mahābalatvaṃ ca tathā tejaścāgryaṃ sureśvara || 37 ||
[Analyze grammar]

etadvai māmakaṃ tejaḥ samāviśati vāsava |
vṛtramenaṃ tvamapyevaṃ jahi vajreṇa dānavam || 38 ||
[Analyze grammar]

śakra uvāca |
bhagavaṃstvatprasādena ditijaṃ sudurāsadam |
vajreṇa nihaniṣyāmi paśyataste surarṣabha || 39 ||
[Analyze grammar]

bhīṣma uvāca |
āviśyamāne daitye tu jvareṇātha mahāsure |
devatānāmṛṣīṇāṃ ca harṣānnādo mahānabhūt || 40 ||
[Analyze grammar]

tato dundubhayaścaiva śaṅkhāśca sumahāsvanāḥ |
murajā ḍiṇḍimāścaiva prāvādyanta sahasraśaḥ || 41 ||
[Analyze grammar]

asurāṇāṃ tu sarveṣāṃ smṛtilopo'bhavanmahān |
prajñānāśaśca balavānkṣaṇena samapadyata || 42 ||
[Analyze grammar]

tamāviṣṭamatho jñātvā ṛṣayo devatāstathā |
stuvantaḥ śakramīśānaṃ tathā prācodayannapi || 43 ||
[Analyze grammar]

rathasthasya hi śakrasya yuddhakāle mahātmanaḥ |
ṛṣibhiḥ stūyamānasya rūpamāsītsudurdṛśam || 44 ||
[Analyze grammar]