Chapter 1

saṃjaya uvāca |
tataste sahitā vīrāḥ prayātā dakṣiṇāmukhāḥ |
upāstamayavelāyāṃ śibirābhyāśamāgatāḥ || 1 ||
[Analyze grammar]

vimucya vāhāṃstvaritā bhītāḥ samabhavaṃstadā |
gahanaṃ deśamāsādya pracchannā nyaviśanta te || 2 ||
[Analyze grammar]

senāniveśamabhito nātidūramavasthitāḥ |
nikṛttā niśitaiḥ śastraiḥ samantātkṣatavikṣatāḥ || 3 ||
[Analyze grammar]

dīrghamuṣṇaṃ ca niḥśvasya pāṇḍavānanvacintayan |
śrutvā ca ninadaṃ ghoraṃ pāṇḍavānāṃ jayaiṣiṇām || 4 ||
[Analyze grammar]

anusārabhayādbhītāḥ prāṅmukhāḥ prādravanpunaḥ |
te muhūrtaṃ tato gatvā śrāntavāhāḥ pipāsitāḥ || 5 ||
[Analyze grammar]

nāmṛṣyanta maheṣvāsāḥ krodhāmarṣavaśaṃ gatāḥ |
rājño vadhena saṃtaptā muhūrtaṃ samavasthitāḥ || 6 ||
[Analyze grammar]

dhṛtarāṣṭra uvāca |
aśraddheyamidaṃ karma kṛtaṃ bhīmena saṃjaya |
yatsa nāgāyutaprāṇaḥ putro mama nipātitaḥ || 7 ||
[Analyze grammar]

avadhyaḥ sarvabhūtānāṃ vajrasaṃhanano yuvā |
pāṇḍavaiḥ samare putro nihato mama saṃjaya || 8 ||
[Analyze grammar]

na diṣṭamabhyatikrāntuṃ śakyaṃ gāvalgaṇe naraiḥ |
yatsametya raṇe pārthaiḥ putro mama nipātitaḥ || 9 ||
[Analyze grammar]

adrisāramayaṃ nūnaṃ hṛdayaṃ mama saṃjaya |
hataṃ putraśataṃ śrutvā yanna dīrṇaṃ sahasradhā || 10 ||
[Analyze grammar]

kathaṃ hi vṛddhamithunaṃ hataputraṃ bhaviṣyati |
na hyahaṃ pāṇḍaveyasya viṣaye vastumutsahe || 11 ||
[Analyze grammar]

kathaṃ rājñaḥ pitā bhūtvā svayaṃ rājā ca saṃjaya |
preṣyabhūtaḥ pravarteyaṃ pāṇḍaveyasya śāsanāt || 12 ||
[Analyze grammar]

ājñāpya pṛthivīṃ sarvāṃ sthitvā mūrdhni ca saṃjaya |
kathamadya bhaviṣyāmi preṣyabhūto durantakṛt || 13 ||
[Analyze grammar]

kathaṃ bhīmasya vākyāni śrotuṃ śakṣyāmi saṃjaya |
yena putraśataṃ pūrṇamekena nihataṃ mama || 14 ||
[Analyze grammar]

kṛtaṃ satyaṃ vacastasya vidurasya mahātmanaḥ |
akurvatā vacastena mama putreṇa saṃjaya || 15 ||
[Analyze grammar]

adharmeṇa hate tāta putre duryodhane mama |
kṛtavarmā kṛpo drauṇiḥ kimakurvata saṃjaya || 16 ||
[Analyze grammar]

saṃjaya uvāca |
gatvā tu tāvakā rājannātidūramavasthitāḥ |
apaśyanta vanaṃ ghoraṃ nānādrumalatākulam || 17 ||
[Analyze grammar]

te muhūrtaṃ tu viśramya labdhatoyairhayottamaiḥ |
sūryāstamayavelāyāmāseduḥ sumahadvanam || 18 ||
[Analyze grammar]

nānāmṛgagaṇairjuṣṭaṃ nānāpakṣisamākulam |
nānādrumalatācchannaṃ nānāvyālaniṣevitam || 19 ||
[Analyze grammar]

nānātoyasamākīrṇaṃ taḍāgairupaśobhitam |
padminīśatasaṃchannaṃ nīlotpalasamāyutam || 20 ||
[Analyze grammar]

praviśya tadvanaṃ ghoraṃ vīkṣamāṇāḥ samantataḥ |
śākhāsahasrasaṃchannaṃ nyagrodhaṃ dadṛśustataḥ || 21 ||
[Analyze grammar]

upetya tu tadā rājannyagrodhaṃ te mahārathāḥ |
dadṛśurdvipadāṃ śreṣṭhāḥ śreṣṭhaṃ taṃ vai vanaspatim || 22 ||
[Analyze grammar]

te'vatīrya rathebhyastu vipramucya ca vājinaḥ |
upaspṛśya yathānyāyaṃ saṃdhyāmanvāsata prabho || 23 ||
[Analyze grammar]

tato'staṃ parvataśreṣṭhamanuprāpte divākare |
sarvasya jagato dhātrī śarvarī samapadyata || 24 ||
[Analyze grammar]

grahanakṣatratārābhiḥ prakīrṇābhiralaṃkṛtam |
nabhoṃ'śukamivābhāti prekṣaṇīyaṃ samantataḥ || 25 ||
[Analyze grammar]

īṣaccāpi pravalganti ye sattvā rātricāriṇaḥ |
divācarāśca ye sattvāste nidrāvaśamāgatāḥ || 26 ||
[Analyze grammar]

rātriṃcarāṇāṃ sattvānāṃ ninādo'bhūtsudāruṇaḥ |
kravyādāśca pramuditā ghorā prāptā ca śarvarī || 27 ||
[Analyze grammar]

tasminrātrimukhe ghore duḥkhaśokasamanvitāḥ |
kṛtavarmā kṛpo drauṇirupopaviviśuḥ samam || 28 ||
[Analyze grammar]

tatropaviṣṭāḥ śocanto nyagrodhasya samantataḥ |
tamevārthamatikrāntaṃ kurupāṇḍavayoḥ kṣayam || 29 ||
[Analyze grammar]

nidrayā ca parītāṅgā niṣedurdharaṇītale |
śrameṇa sudṛḍhaṃ yuktā vikṣatā vividhaiḥ śaraiḥ || 30 ||
[Analyze grammar]

tato nidrāvaśaṃ prāptau kṛpabhojau mahārathau |
sukhocitāvaduḥkhārhau niṣaṇṇau dharaṇītale |
tau tu suptau mahārāja śramaśokasamanvitau || 31 ||
[Analyze grammar]

krodhāmarṣavaśaṃ prāpto droṇaputrastu bhārata |
naiva sma sa jagāmātha nidrāṃ sarpa iva śvasan || 32 ||
[Analyze grammar]

na lebhe sa tu nidrāṃ vai dahyamāno'timanyunā |
vīkṣāṃ cakre mahābāhustadvanaṃ ghoradarśanam || 33 ||
[Analyze grammar]

vīkṣamāṇo vanoddeśaṃ nānāsattvairniṣevitam |
apaśyata mahābāhurnyagrodhaṃ vāyasāyutam || 34 ||
[Analyze grammar]

tatra kākasahasrāṇi tāṃ niśāṃ paryaṇāmayan |
sukhaṃ svapantaḥ kauravya pṛthakpṛthagapāśrayāḥ || 35 ||
[Analyze grammar]

supteṣu teṣu kākeṣu visrabdheṣu samantataḥ |
so'paśyatsahasāyāntamulūkaṃ ghoradarśanam || 36 ||
[Analyze grammar]

mahāsvanaṃ mahākāyaṃ haryakṣaṃ babhrupiṅgalam |
sudīrghaghoṇānakharaṃ suparṇamiva veginam || 37 ||
[Analyze grammar]

so'tha śabdaṃ mṛduṃ kṛtvā līyamāna ivāṇḍajaḥ |
nyagrodhasya tataḥ śākhāṃ prārthayāmāsa bhārata || 38 ||
[Analyze grammar]

saṃnipatya tu śākhāyāṃ nyagrodhasya vihaṃgamaḥ |
suptāñjaghāna subahūnvāyasānvāyasāntakaḥ || 39 ||
[Analyze grammar]

keṣāṃcidacchinatpakṣāñśirāṃsi ca cakarta ha |
caraṇāṃścaiva keṣāṃcidbabhañja caraṇāyudhaḥ || 40 ||
[Analyze grammar]

kṣaṇenāhansa balavānye'sya dṛṣṭipathe sthitāḥ |
teṣāṃ śarīrāvayavaiḥ śarīraiśca viśāṃ pate |
nyagrodhamaṇḍalaṃ sarvaṃ saṃchannaṃ sarvato'bhavat || 41 ||
[Analyze grammar]

tāṃstu hatvā tataḥ kākānkauśiko mudito'bhavat |
pratikṛtya yathākāmaṃ śatrūṇāṃ śatrusūdanaḥ || 42 ||
[Analyze grammar]

taddṛṣṭvā sopadhaṃ karma kauśikena kṛtaṃ niśi |
tadbhāvakṛtasaṃkalpo drauṇireko vyacintayat || 43 ||
[Analyze grammar]

upadeśaḥ kṛto'nena pakṣiṇā mama saṃyuge |
śatrūṇāṃ kṣapaṇe yuktaḥ prāptakālaśca me mataḥ || 44 ||
[Analyze grammar]

nādya śakyā mayā hantuṃ pāṇḍavā jitakāśinaḥ |
balavantaḥ kṛtotsāhā labdhalakṣāḥ prahāriṇaḥ |
rājñaḥ sakāśe teṣāṃ ca pratijñāto vadho mayā || 45 ||
[Analyze grammar]

pataṃgāgnisamāṃ vṛttimāsthāyātmavināśinīm |
nyāyato yudhyamānasya prāṇatyāgo na saṃśayaḥ |
chadmanā tu bhavetsiddhiḥ śatrūṇāṃ ca kṣayo mahān || 46 ||
[Analyze grammar]

tatra saṃśayitādarthādyo'rtho niḥsaṃśayo bhavet |
taṃ janā bahu manyante ye'rthaśāstraviśāradāḥ || 47 ||
[Analyze grammar]

yaccāpyatra bhavedvācyaṃ garhitaṃ lokaninditam |
kartavyaṃ tanmanuṣyeṇa kṣatradharmeṇa vartatā || 48 ||
[Analyze grammar]

ninditāni ca sarvāṇi kutsitāni pade pade |
sopadhāni kṛtānyeva pāṇḍavairakṛtātmabhiḥ || 49 ||
[Analyze grammar]

asminnarthe purā gītau śrūyete dharmacintakaiḥ |
ślokau nyāyamavekṣadbhistattvārthaṃ tattvadarśibhiḥ || 50 ||
[Analyze grammar]

pariśrānte vidīrṇe ca bhuñjāne cāpi śatrubhiḥ |
prasthāne ca praveśe ca prahartavyaṃ riporbalam || 51 ||
[Analyze grammar]

nidrārtamardharātre ca tathā naṣṭapraṇāyakam |
bhinnayodhaṃ balaṃ yacca dvidhā yuktaṃ ca yadbhavet || 52 ||
[Analyze grammar]

ityevaṃ niścayaṃ cakre suptānāṃ yudhi māraṇe |
pāṇḍūnāṃ saha pāñcālairdroṇaputraḥ pratāpavān || 53 ||
[Analyze grammar]

sa krūrāṃ matimāsthāya viniścitya muhurmuhuḥ |
suptau prābodhayattau tu mātulaṃ bhojameva ca || 54 ||
[Analyze grammar]

nottaraṃ pratipede ca tatra yuktaṃ hriyā vṛtaḥ |
sa muhūrtamiva dhyātvā bāṣpavihvalamabravīt || 55 ||
[Analyze grammar]

hato duryodhano rājā ekavīro mahābalaḥ |
yasyārthe vairamasmābhirāsaktaṃ pāṇḍavaiḥ saha || 56 ||
[Analyze grammar]

ekākī bahubhiḥ kṣudrairāhave śuddhavikramaḥ |
pātito bhīmasenena ekādaśacamūpatiḥ || 57 ||
[Analyze grammar]

vṛkodareṇa kṣudreṇa sunṛśaṃsamidaṃ kṛtam |
mūrdhābhiṣiktasya śiraḥ pādena parimṛdnatā || 58 ||
[Analyze grammar]

vinardanti sma pāñcālāḥ kṣveḍanti ca hasanti ca |
dhamanti śaṅkhāñśataśo hṛṣṭā ghnanti ca dundubhīn || 59 ||
[Analyze grammar]

vāditraghoṣastumulo vimiśraḥ śaṅkhanisvanaiḥ |
anilenerito ghoro diśaḥ pūrayatīva hi || 60 ||
[Analyze grammar]

aśvānāṃ heṣamāṇānāṃ gajānāṃ caiva bṛṃhatām |
siṃhanādaśca śūrāṇāṃ śrūyate sumahānayam || 61 ||
[Analyze grammar]

diśaṃ prācīṃ samāśritya hṛṣṭānāṃ garjatāṃ bhṛśam |
rathanemisvanāścaiva śrūyante lomaharṣaṇāḥ || 62 ||
[Analyze grammar]

pāṇḍavairdhārtarāṣṭrāṇāṃ yadidaṃ kadanaṃ kṛtam |
vayameva trayaḥ śiṣṭāstasminmahati vaiśase || 63 ||
[Analyze grammar]

kecinnāgaśataprāṇāḥ kecitsarvāstrakovidāḥ |
nihatāḥ pāṇḍaveyaiḥ sma manye kālasya paryayam || 64 ||
[Analyze grammar]

evametena bhāvyaṃ hi nūnaṃ kāryeṇa tattvataḥ |
yathā hyasyedṛśī niṣṭhā kṛte kārye'pi duṣkare || 65 ||
[Analyze grammar]

bhavatostu yadi prajñā na mohādapacīyate |
vyāpanne'sminmahatyarthe yannaḥ śreyastaducyatām || 66 ||
[Analyze grammar]