Chapter 45

saṃjaya uvāca |
drauṇistu rathavaṃśena mahatā parivāritaḥ |
āpatatsahasā rājanyatra rājā vyavasthitaḥ || 1 ||
[Analyze grammar]

tamāpatantaṃ sahasā śūraḥ śaurisahāyavān |
dadhāra sahasā pārtho veleva makarālayam || 2 ||
[Analyze grammar]

tataḥ kruddho mahārāja droṇaputraḥ pratāpavān |
arjunaṃ vāsudevaṃ ca chādayāmāsa patribhiḥ || 3 ||
[Analyze grammar]

avacchannau tataḥ kṛṣṇau dṛṣṭvā tatra mahārathāḥ |
vismayaṃ paramaṃ gatvā praikṣanta kuravastadā || 4 ||
[Analyze grammar]

arjunastu tato divyamastraṃ cakre hasanniva |
tadastraṃ brāhmaṇo yuddhe vārayāmāsa bhārata || 5 ||
[Analyze grammar]

yadyaddhi vyākṣipadyuddhe pāṇḍavo'straṃ jighāṃsayā |
tattadastraṃ maheṣvāso droṇaputro vyaśātayat || 6 ||
[Analyze grammar]

astrayuddhe tato rājanvartamāne bhayāvahe |
apaśyāma raṇe drauṇiṃ vyāttānanamivāntakam || 7 ||
[Analyze grammar]

sa diśo vidiśaścaiva chādayitvā vijihmagaiḥ |
vāsudevaṃ tribhirbāṇairavidhyaddakṣiṇe bhuje || 8 ||
[Analyze grammar]

tato'rjuno hayānhatvā sarvāṃstasya mahātmanaḥ |
cakāra samare bhūmiṃ śoṇitaughataraṅgiṇīm || 9 ||
[Analyze grammar]

nihatā rathinaḥ petuḥ pārthacāpacyutaiḥ śaraiḥ |
hayāśca paryadhāvanta muktayoktrāstatastataḥ || 10 ||
[Analyze grammar]

taddṛṣṭvā karma pārthasya drauṇirāhavaśobhinaḥ |
avākiradraṇe kṛṣṇaṃ samantānniśitaiḥ śaraiḥ || 11 ||
[Analyze grammar]

tato'rjunaṃ mahārāja drauṇirāyamya patriṇā |
vakṣodeśe samāsādya tāḍayāmāsa saṃyuge || 12 ||
[Analyze grammar]

so'tividdho raṇe tena droṇaputreṇa bhārata |
ādatta parighaṃ ghoraṃ drauṇeścainamavākṣipat || 13 ||
[Analyze grammar]

tamāpatantaṃ parighaṃ kārtasvaravibhūṣitam |
drauṇiściccheda sahasā tata uccukruśurjanāḥ || 14 ||
[Analyze grammar]

so'nekadhāpatadbhūmau bhāradvājasya sāyakaiḥ |
viśīrṇaḥ parvato rājanyathā syānmātariśvanā || 15 ||
[Analyze grammar]

tato'rjuno raṇe drauṇiṃ vivyādha daśabhiḥ śaraiḥ |
sārathiṃ cāsya bhallena rathanīḍādapāharat || 16 ||
[Analyze grammar]

sa saṃgṛhya svayaṃ vāhānkṛṣṇau prācchādayaccharaiḥ |
tatrādbhutamapaśyāma drauṇerāśu parākramam || 17 ||
[Analyze grammar]

ayacchatturagānyacca phalgunaṃ cāpyayodhayat |
tadasya samare rājansarve yodhā apūjayan || 18 ||
[Analyze grammar]

yadā tvagrasyata raṇe droṇaputreṇa phalgunaḥ |
tato raśmīnrathāśvānāṃ kṣurapraiścicchide jayaḥ || 19 ||
[Analyze grammar]

prādravaṃsturagāste tu śaravegaprabādhitāḥ |
tato'bhūnninado bhūyastava sainyasya bhārata || 20 ||
[Analyze grammar]

pāṇḍavāstu jayaṃ labdhvā tava sainyamupādravan |
samantānniśitānbāṇānvimuñcanto jayaiṣiṇaḥ || 21 ||
[Analyze grammar]

pāṇḍavaistu mahārāja dhārtarāṣṭrī mahācamūḥ |
punaḥ punaratho vīrairabhajyata jayoddhataiḥ || 22 ||
[Analyze grammar]

paśyatāṃ te mahārāja putrāṇāṃ citrayodhinām |
śakuneḥ saubaleyasya karṇasya ca mahātmanaḥ || 23 ||
[Analyze grammar]

vāryamāṇā mahāsenā putraistava janeśvara |
nāvatiṣṭhata saṃgrāme tāḍyamānā samantataḥ || 24 ||
[Analyze grammar]

tato yodhairmahārāja palāyadbhistatastataḥ |
abhavadvyākulaṃ bhītaiḥ putrāṇāṃ te mahadbalam || 25 ||
[Analyze grammar]

tiṣṭha tiṣṭheti satataṃ sūtaputrasya jalpataḥ |
nāvatiṣṭhata sā senā vadhyamānā mahātmabhiḥ || 26 ||
[Analyze grammar]

athotkruṣṭaṃ mahārāja pāṇḍavairjitakāśibhiḥ |
dhārtarāṣṭrabalaṃ dṛṣṭvā dravamāṇaṃ samantataḥ || 27 ||
[Analyze grammar]

tato duryodhanaḥ karṇamabravītpraṇayādiva |
paśya karṇa yathā senā pāṇḍavairarditā bhṛśam || 28 ||
[Analyze grammar]

tvayi tiṣṭhati saṃtrāsātpalāyati samantataḥ |
etajjñātvā mahābāho kuru prāptamariṃdama || 29 ||
[Analyze grammar]

sahasrāṇi ca yodhānāṃ tvāmeva puruṣarṣabha |
krośanti samare vīra drāvyamāṇāni pāṇḍavaiḥ || 30 ||
[Analyze grammar]

etacchrutvā tu rādheyo duryodhanavaco mahat |
madrarājamidaṃ vākyamabravītsūtanandanaḥ || 31 ||
[Analyze grammar]

paśya me bhujayorvīryamastrāṇāṃ ca janeśvara |
adya hanmi raṇe sarvānpāñcālānpāṇḍubhiḥ saha |
vāhayāśvānnaravyāghra bhadreṇaiva janeśvara || 32 ||
[Analyze grammar]

evamuktvā mahārāja sūtaputraḥ pratāpavān |
pragṛhya vijayaṃ vīro dhanuḥśreṣṭhaṃ purātanam |
sajyaṃ kṛtvā mahārāja saṃmṛjya ca punaḥ punaḥ || 33 ||
[Analyze grammar]

saṃnivārya ca yodhānsvānsatyena śapathena ca |
prāyojayadameyātmā bhārgavāstraṃ mahābalaḥ || 34 ||
[Analyze grammar]

tato rājansahasrāṇi prayutānyarbudāni ca |
koṭiśaśca śarāstīkṣṇā niragacchanmahāmṛdhe || 35 ||
[Analyze grammar]

jvalitaistairmahāghoraiḥ kaṅkabarhiṇavājitaiḥ |
saṃchannā pāṇḍavī senā na prājñāyata kiṃcana || 36 ||
[Analyze grammar]

hāhākāro mahānāsītpāñcālānāṃ viśāṃ pate |
pīḍitānāṃ balavatā bhārgavāstreṇa saṃyuge || 37 ||
[Analyze grammar]

nipatadbhirgajai rājannaraiścāpi sahasraśaḥ |
rathaiścāpi naravyāghra hayaiścāpi samantataḥ || 38 ||
[Analyze grammar]

prākampata mahī rājannihataistaistatastataḥ |
vyākulaṃ sarvamabhavatpāṇḍavānāṃ mahadbalam || 39 ||
[Analyze grammar]

karṇastveko yudhāṃ śreṣṭho vidhūma iva pāvakaḥ |
dahañśatrūnnaravyāghra śuśubhe sa paraṃtapaḥ || 40 ||
[Analyze grammar]

te vadhyamānāḥ karṇena pāñcālāścedibhiḥ saha |
tatra tatra vyamuhyanta vanadāhe yathā dvipāḥ |
cukruśuste naravyāghra yathāprāgvā narottamāḥ || 41 ||
[Analyze grammar]

teṣāṃ tu krośatāṃ śrutvā bhītānāṃ raṇamūrdhani |
dhāvatāṃ ca diśo rājanvitrastānāṃ samantataḥ |
ārtanādo mahāṃstatra pretānāmiva saṃplave || 42 ||
[Analyze grammar]

vadhyamānāṃstu tāndṛṣṭvā sūtaputreṇa māriṣa |
vitresuḥ sarvabhūtāni tiryagyonigatānyapi || 43 ||
[Analyze grammar]

te vadhyamānāḥ samare sūtaputreṇa sṛñjayāḥ |
arjunaṃ vāsudevaṃ ca vyākrośanta muhurmuhuḥ |
pretarājapure yadvatpretarājaṃ vicetasaḥ || 44 ||
[Analyze grammar]

athābravīdvāsudevaṃ kuntīputro dhanaṃjayaḥ |
bhārgavāstraṃ mahāghoraṃ dṛṣṭvā tatra sabhīritam || 45 ||
[Analyze grammar]

paśya kṛṣṇa mahābāho bhārgavāstrasya vikramam |
naitadastraṃ hi samare śakyaṃ hantuṃ kathaṃcana || 46 ||
[Analyze grammar]

sūtaputraṃ ca saṃrabdhaṃ paśya kṛṣṇa mahāraṇe |
antakapratimaṃ vīraṃ kurvāṇaṃ karma dāruṇam || 47 ||
[Analyze grammar]

sutīkṣṇaṃ codayannaśvānprekṣate māṃ muhurmuhuḥ |
na ca paśyāmi samare karṇasya prapalāyitam || 48 ||
[Analyze grammar]

jīvanprāpnoti puruṣaḥ saṃkhye jayaparājayau |
jitasya tu hṛṣīkeśa vadha eva kuto jayaḥ || 49 ||
[Analyze grammar]

tato janārdanaḥ prāyāddraṣṭumicchanyudhiṣṭhiram |
śrameṇa grāhayiṣyaṃśca karṇaṃ yuddhena māriṣa || 50 ||
[Analyze grammar]

arjunaṃ cābravītkṛṣṇo bhṛśaṃ rājā parikṣataḥ |
tamāśvāsya kuruśreṣṭha tataḥ karṇaṃ haniṣyasi || 51 ||
[Analyze grammar]

tato dhanaṃjayo draṣṭuṃ rājānaṃ bāṇapīḍitam |
rathena prayayau kṣipraṃ saṃgrāme keśavājñayā || 52 ||
[Analyze grammar]

gacchanneva tu kaunteyo dharmarājadidṛkṣayā |
sainyamālokayāmāsa nāpaśyattatra cāgrajam || 53 ||
[Analyze grammar]

yuddhaṃ kṛtvā tu kaunteyo droṇaputreṇa bhārata |
duḥsahaṃ vajriṇā saṃkhye parājigye bhṛgoḥ sutam || 54 ||
[Analyze grammar]

drauṇiṃ parājitya tatogradhanvā kṛtvā mahadduṣkaramāryakarma |
ālokayāmāsa tataḥ svasainyaṃ dhanaṃjayaḥ śatrubhirapradhṛṣyaḥ || 55 ||
[Analyze grammar]

sa yudhyamānaḥ pṛtanāmukhasthāñśūrāñśūro harṣayansavyasācī |
pūrvāpadānaiḥ prathitaiḥ praśaṃsansthirāṃścakārātmarathānanīke || 56 ||
[Analyze grammar]

apaśyamānastu kirīṭamālī yudhi jyeṣṭhaṃ bhrātaramājamīḍham |
uvāca bhīmaṃ tarasābhyupetya rājñaḥ pravṛttistviha keti rājan || 57 ||
[Analyze grammar]

bhīma uvāca |
apayāta ito rājā dharmaputro yudhiṣṭhiraḥ |
karṇabāṇavibhugnāṅgo yadi jīvetkathaṃcana || 58 ||
[Analyze grammar]

arjuna uvāca |
tasmādbhavāñśīghramitaḥ prayātu rājñaḥ pravṛttyai kurusattamasya |
nūnaṃ hi viddho'tibhṛśaṃ pṛṣatkaiḥ karṇena rājā śibiraṃ gato'sau || 59 ||
[Analyze grammar]

yaḥ saṃprahāre niśi saṃpravṛtte droṇena viddho'tibhṛśaṃ tarasvī |
tasthau ca tatrāpi jayapratīkṣo droṇena yāvanna hataḥ kilāsīt || 60 ||
[Analyze grammar]

sa saṃśayaṃ gamitaḥ pāṇḍavāgryaḥ saṃkhye'dya karṇena mahānubhāvaḥ |
jñātuṃ prayāhyāśu tamadya bhīma sthāsyāmyahaṃ śatrugaṇānnirudhya || 61 ||
[Analyze grammar]

bhīma uvāca |
tvameva jānīhi mahānubhāva rājñaḥ pravṛttiṃ bharatarṣabhasya |
ahaṃ hi yadyarjuna yāmi tatra vakṣyanti māṃ bhīta iti pravīrāḥ || 62 ||
[Analyze grammar]

tato'bravīdarjuno bhīmasenaṃ saṃśaptakāḥ pratyanīkaṃ sthitā me |
etānahatvā na mayā tu śakyamito'payātuṃ ripusaṃghagoṣṭhāt || 63 ||
[Analyze grammar]

athābravīdarjunaṃ bhīmasenaḥ svavīryamāśritya kurupravīra |
saṃśaptakānpratiyotsyāmi saṃkhye sarvānahaṃ yāhi dhanaṃjayeti || 64 ||
[Analyze grammar]

tadbhīmasenasya vaco niśamya sudurvacaṃ bhrāturamitramadhye |
draṣṭuṃ kuruśreṣṭhamabhiprayātuṃ provāca vṛṣṇipravaraṃ tadānīm || 65 ||
[Analyze grammar]

codayāśvānhṛṣīkeśa vigāhyaitaṃ rathārṇavam |
ajātaśatruṃ rājānaṃ draṣṭumicchāmi keśava || 66 ||
[Analyze grammar]

tato hayānsarvadāśārhamukhyaḥ prācodayadbhīmamuvāca cedam |
naitaccitraṃ tava karmādya vīra yāsyāmahe jahi bhīmārisaṃghān || 67 ||
[Analyze grammar]

tato yayau hṛṣīkeśo yatra rājā yudhiṣṭhiraḥ |
śīghrācchīghrataraṃ rājanvājibhirgaruḍopamaiḥ || 68 ||
[Analyze grammar]

pratyanīke vyavasthāpya bhīmasenamariṃdamam |
saṃdiśya caiva rājendra yuddhaṃ prati vṛkodaram || 69 ||
[Analyze grammar]

tatastu gatvā puruṣapravīrau rājānamāsādya śayānamekam |
rathādubhau pratyavaruhya tasmādvavandaturdharmarājasya pādau || 70 ||
[Analyze grammar]

tau dṛṣṭvā puruṣavyāghrau kṣemiṇau puruṣarṣabha |
mudābhyupagatau kṛṣṇāvaśvināviva vāsavam || 71 ||
[Analyze grammar]

tāvabhyanandadrājā hi vivasvānaśvināviva |
hate mahāsure jambhe śakraviṣṇū yathā guruḥ || 72 ||
[Analyze grammar]

manyamāno hataṃ karṇaṃ dharmarājo yudhiṣṭhiraḥ |
harṣagadgadayā vācā prītaḥ prāha paraṃtapau || 73 ||
[Analyze grammar]