Chapter 61

vaiśaṃpāyana uvāca |
mahe pratihate śakraḥ sakrodhastridaśeśvaraḥ |
saṃvartakaṃ nāma gaṇaṃ toyadānāmathābravīt || 1 ||
[Analyze grammar]

bho balāhakamātaṅgāḥ śrūyatāṃ mama bhāṣitam |
yadi vo matpriyaṃ kāryaṃ rājabhaktipuraskṛtam || 2 ||
[Analyze grammar]

ete vṛndāvana gatā dāmodaraparāyaṇāḥ |
nandagopādayo gopā vidviṣanti mamotsavam || 3 ||
[Analyze grammar]

ājīvo yaḥ parasteṣāṃ gopatvaṃ ca yataḥ smṛtam |
tā gāvaḥ saptarātreṇa pīḍyantāṃ vṛṣṭimārutaiḥ || 4 ||
[Analyze grammar]

airāvatagataścāhaṃ svayamevāmbu dāruṇam |
srakṣyāmi vṛṣṭiṃ vātaṃ ca vajrāśanisamaprabham || 5 ||
[Analyze grammar]

bhavadbhiścaṇḍavarṣeṇa caratā mārutena ca |
hatāstāḥ savrajā gāvastyakṣyanti bhuvi jīvitam || 6 ||
[Analyze grammar]

evamājñāpayāmāsa sa sarvāñjaladānprabhuḥ |
pratyāhate vai kṛṣṇena śāsane pākaśāsanaḥ || 7 ||
[Analyze grammar]

mahe pratihate viṣṇoḥ śāsanātpākaśāsanaḥ || 7 ||
[Analyze grammar]

tataste jaladāḥ kṛṣṇā ghoranādā bhayāvahāḥ |
ākāśaṃ chādayāmāsuḥ sarvataḥ parvatopamāḥ || 8 ||
[Analyze grammar]

vidyutsaṃpātajananāḥ śakracāpavibhūṣitāḥ |
timirāvṛtamākāśaṃ cakruste jaladāstadā || 9 ||
[Analyze grammar]

gajā ivānye saṃsaktāḥ kecinmakaravarcasaḥ |
nāgā ivānye gagane cerurjaladapuṃgavāḥ || 10 ||
[Analyze grammar]

te'nyonyavapuṣā baddhā nāgayūthāyutopamāḥ |
durdinaṃ vipulaṃ cakruśchādayanto nabhastalam || 11 ||
[Analyze grammar]

nṛhastanāgahastānāṃ veṇūnāṃ caiva sarvaśaḥ |
sthūlanāgoruhastānāṃ satataṃ sarvatodiśam |
dhārābhistulyarūpābhirvavṛṣuste balāhakāḥ || 12 ||
[Analyze grammar]

samudraṃ menire taṃ hi khamārūḍhaṃ nṛcakṣuṣaḥ |
durvigāhyamaparyantamagādhaṃ durdinaṃ mahat || 13 ||
[Analyze grammar]

na saṃpatanti khagamā dudruvurmṛgajātayaḥ |
parvatābheṣu megheṣu khe nadatsu samantataḥ || 14 ||
[Analyze grammar]

suptasūryendusadṛśe meghairnabhasi dāruṇaih |
ativṛṣṭena lokasya virūpamabhavadvapuḥ || 15 ||
[Analyze grammar]

meghaughairniṣprabhākāramadṛśyagrahatārakam |
candrasūryāṃśurahitaṃ khaṃ babhūvātiniṣprabham || 16 ||
[Analyze grammar]

vāriṇā meghamuktena mucyamānena cāsakṛt |
meghayuktena vātena ghūrṇitam viśvatomukham |
ābabhau sarvatastatra bhūmistoyamayī yathā || 17 ||
[Analyze grammar]

vinedurbarhiṇastatra stokakālparutāḥ khagāḥ |
vivṛddhiṃ nimnagā yātāḥ plavagāḥ saṃplavaṃ gatāḥ || 18 ||
[Analyze grammar]

garjitena ca meghānāṃ parjanyaninadena ca |
tarjitānīva kampante tṛṇāni tarubhiḥ saha || 19 ||
[Analyze grammar]

prāpto'ntakālo lokānāṃ prāptā caikārṇavā mahī |
iti gopagaṇā vākyaṃ vyāharanti bhayārditāḥ || 20 ||
[Analyze grammar]

tenotpātāmbuvarṣeṇa gāvo viprahatā bhṛśam || 20 ||
[Analyze grammar]

hambhāravaiḥ krandamānā na celuḥ stambhitopamāḥ |
niṣkampasakthiśravaṇā niṣprayatnakhurānanāḥ |
hṛṣṭalomārdratanavaḥ kṣāmakukṣipayodharāḥ || 21 ||
[Analyze grammar]

kāścitprāṇān jahuḥ śrāntā nipetuḥ kāścidāturāḥ |
kāścitsavatsāḥ patitā gāvaḥ śīkaravejitāḥ || 22 ||
[Analyze grammar]

kāścidākramya kroḍena vatsāṃś tiṣṭhanti mātaraḥ |
vimukhāḥ śrāntasakthyaśca nirāhārāḥ kṛśodarāḥ || 23 ||
[Analyze grammar]

peturārtā vepamānā gāvo varṣaparājitāḥ |
vatsāśconmukhakā bālā dāmodara mukhāḥ sthitāḥ |
trāhīti vadanairdīnaiḥ kṛṣṇamūcurivārtavat || 24 ||
[Analyze grammar]

gavāṃ paśya mahābāho vedanāṃ paramāturāḥ || 24 ||
[Analyze grammar]

gavāṃ tatkadanaṃ dṛṣṭvā durdināgamajaṃ bhayam |
gopāṃścāsannavadanān kopaṃ kṛṣṇaḥ samādadhe || 25 ||
[Analyze grammar]

gāścāpi paramāturāḥ || 25 ||
[Analyze grammar]

roṣatāmrekṣaṇaḥ śrīmān || 25 ||
[Analyze grammar]

aho dhārṣṭyaṃ surapatermāmanādṛtya saṃprati || 25 ||
[Analyze grammar]

gavāṃ vadhaḥ kṛtastasya gopānāṃ ca tathā kṛtaḥ || 25 ||
[Analyze grammar]

sa cintayitvā saṃrabdho dṛṣṭo yogo gavāmiti |
ātmānamātmanā vākyamidamāha priyaṃvadaḥ || 26 ||
[Analyze grammar]

adyāhamimamutpāṭya sakānanavanaṃ girim |
kalpayeyaṃ gavāṃ sthānaṃ varṣatrāṇāya durdharam || 27 ||
[Analyze grammar]

ayaṃ dhṛto mayā śailo bhūmīgṛhanibhopamaḥ |
trāsyante savrajā gāvo madvaśyaśca bhaviṣyati || 28 ||
[Analyze grammar]

evaṃ sa cintayitvā tu viṣṇuḥ satyaparākramaḥ |
ityuktvaikena hastena kṛtvā govardhanācalam |
dadhāra līlayā kṛṣṇaśchatrākamiva bālakaḥ |
bāhvorbalaṃ darśayiṣyan samīpaṃ taṃ mahīdharam |
dorbhyāṃ utpāṭayāmāsa kṛṣṇo giririvāparaḥ || 29 ||
[Analyze grammar]

samūlaviṭapaskandhaścacāla sa mahāgiriḥ || 29 ||
[Analyze grammar]

ghaṇāghaṇakṛtaḥ śailaḥ saprāṇa iva niḥśvasan || 29 ||
[Analyze grammar]

sa dhṛtaḥ saṃgato meghairgiriḥ savyena pāṇinā |
gṛhabhāvaṃ gatastatra gṛhākāreṇa varcasā || 30 ||
[Analyze grammar]

bhūmerutpāṭyamānasya tasya śailasya sānuṣu |
śilāḥ praśithilāścelurniṣpetuśca sapādapāḥ || 31 ||
[Analyze grammar]

rakṣiṣyan godhanaṃ viṣṇurgopānāṃ gopatirhariḥ || 31 ||
[Analyze grammar]

gomadhyasthitagovindo gopān rakṣan sagokulān || 31 ||
[Analyze grammar]

dadhāra godhanaṃ viṣṇurgodharaṃ ca vilambayan || 31 ||
[Analyze grammar]

gopānvismāpayan gopo gomārge saṃsthito hariḥ || 31 ||
[Analyze grammar]

ādyaṃ vapuśca gṛhṇāno lokānāmīśvareśvaraḥ || 31 ||
[Analyze grammar]

vyarthaṃ cakāra govindo godharasya samīhitam || 31 ||
[Analyze grammar]

govardhanasyāsya gireḥ khe khaṇāyitavigrahaḥ || 31 ||
[Analyze grammar]

śikharairghūṇamānaiśca sīdamānaiśca sarvataḥ |
vidhṛtaiścocchritaiḥ śṛṅgairagamaḥ khagamo'bhavat || 32 ||
[Analyze grammar]

calatprasravaṇaiḥ pārśvairmeghaughairekatāṃ gataiḥ |
bhidyamānāśmanicayaścacāla dharaṇīdharaḥ || 33 ||
[Analyze grammar]

na meghānāṃ pravṛṣṭānāṃ na śailasyāśmavarṣiṇaḥ |
vāyośca ghūrṇamānasya vidyutāṃ bhramatāmapi |
viṣṇutejobhibhūtānāmadṛśyanta vapūṃṣi ca |
vividuste janā rūpaṃ vāyostasya ca garjataḥ || 34 ||
[Analyze grammar]

meghaiḥ śikharasaṃdhānairjalaprasravaṇānvitaiḥ |
miśrīkṛta ivābhāti giriruddāmabarhiṇaḥ || 35 ||
[Analyze grammar]

āpluto'yaṃ giriḥ pakṣairiti vidyādharoragāḥ |
gandharvaṛṣayaścaiva vāco muñcanti susvarāḥ || 36 ||
[Analyze grammar]

sa kṛṣṇatalavinyasto muktamūlaḥ kṣitestalāt |
rītīrnirvartayāmāsa kāñcanāñjanarājatīḥ || 37 ||
[Analyze grammar]

kānicicchāditānīva saṃkīrṇārdhāni kānicit |
girermeghaṃ praviṣṭāni tasya śṛṅgāṇi cābhavan || 38 ||
[Analyze grammar]

giriṇā kampyamānena kampitānāṃ tu śākhinām |
puṣpamuccāvacaṃ bhūmau vyaśīryata samantataḥ || 39 ||
[Analyze grammar]

niḥsṛtāḥ pṛthumūrdhānaḥ svastikārdhavibhūṣitāḥ |
dvijihvapatayaḥ kruddhāḥ khecarāḥ khe samantataḥ || 40 ||
[Analyze grammar]

ārtiṃ jagmuḥ khagagaṇā varṣeṇa ca bhayena ca |
utpatyotpatya gaganātpunaḥ peturavāṅmukhāḥ || 41 ||
[Analyze grammar]

rejuścāroṣitāḥ siṃhāḥ sajalā iva toyadāḥ |
gargarā iva mathyanto neduḥ śārdūlapuṃgavāḥ || 42 ||
[Analyze grammar]

viṣamaiśca samībhūtaiḥ samaiścātyantadurgamaiḥ |
vyāvṛttadehaḥ sa girī ramya evopalakṣyate || 43 ||
[Analyze grammar]

abhivṛṣṭasya tairmeghaistasya rūpaṃ babhūva ha |
stambhitasyeva rudreṇa tripurasya vihāyasi || 44 ||
[Analyze grammar]

bāhudaṇḍena kṛṣṇasya vidhṛtaṃ sumahattadā |
nīlābhrapaṭalacchannaṃ tadgiricchatramābabhau || 45 ||
[Analyze grammar]

svapnāyamāno jaladairnimīlitaguhāmukhaḥ |
bāhūpadhāne kṛṣṇasya prasupta iva khe giriḥ || 46 ||
[Analyze grammar]

nirvihaṃgarutairvṛkṣairnirmayūrarutairvanaiḥ |
nirālamba ivābhāti giriḥ sa śikharairvṛtaḥ || 47 ||
[Analyze grammar]

paryastairghūrṇamānaiśca pracaladbhiśca sānubhiḥ |
sajvarāṇīva śailasya vanāni śikharāṇi ca || 48 ||
[Analyze grammar]

uttamāṅgagatāstasya meghāḥ pavanavāhanāḥ |
tvaryamāṇā mahendreṇa toyaṃ mumucurakṣayam || 49 ||
[Analyze grammar]

sa lambamānaḥ kṛṣṇasya bhujāgre saghano giriḥ |
cakrārūḍha ivābhāti deśo nṛpatipīḍitaḥ || 50 ||
[Analyze grammar]

sa meghanicayastasthau giriṃ taṃ parivārya ha |
puraṃ puraskṛtya yathā sphīto janapado mahān || 51 ||
[Analyze grammar]

niveśya taṃ kare śailaṃ tulayitvā ca sasmitam |
provāca goptā gopānāṃ prajāpatiriva sthitaḥ || 52 ||
[Analyze grammar]

etaddevairasaṃbhāvyaṃ divyena vidhinā mayā |
kṛtaṃ girigṛhaṃ gopā nivātaśaraṇaṃ gavām || 53 ||
[Analyze grammar]

na trāsa iha vaḥ kāryo maddhastāddhi nipātane || 53 ||
[Analyze grammar]

vātavarṣabhayenālaṃ tattrāṇaṃ vihitaṃ hi vaḥ || 53 ||
[Analyze grammar]

kṣipraṃ viśantu yūthāni gavāmiha hi śāntaye |
nivāteṣu ca deśeṣu nivasantu yathāsukham |
yathāvrajaṃ yathāyūthaṃ yathāsāraṃ ca vai sukham || 54 ||
[Analyze grammar]

vibhajyatāmayaṃ deśaḥ kṛto varṣanivāraṇaḥ |
śailotpāṭanabhūreṣā mahatī nirmitā mayā |
yuthaśaśca vibhajyātha vasadhvaṃ gopasattamāḥ |
pañcakrośapramāṇena krauśaikaṃ vistaro mahān |
trailokyamapyutsahate grasituṃ kiṃ punarvrajam || 55 ||
[Analyze grammar]

tataḥ kilakilāśabdo gavāṃ hambhāravāśritaḥ |
gopānāṃ tumulo jajñe meghanādaśca bāhyataḥ || 56 ||
[Analyze grammar]

praviśanti tato gāvo gopairyūthaprakalpitāḥ |
tasya śailasya vipulaṃ pradaraṃ gahvarodaram || 57 ||
[Analyze grammar]

kṛṣṇo'pi mūle śailasya śailastambha ivocchritaḥ |
dadhāraikena hastena śailaṃ priyamivātithim || 58 ||
[Analyze grammar]

tato vrajasya bhāṇḍāni yuktāni śakaṭāni ca |
viviśurvarṣabhītāni tadgṛhaṃ girinirmitam || 59 ||
[Analyze grammar]

atidaivaṃ tu kṛṣṇasya dṛṣṭvā tatkarma vajrabhṛt |
mithyāpratijño jaladānvārayāmāsa vai vibhuḥ || 60 ||
[Analyze grammar]

saptarātre tu nirvṛtte dharaṇyāṃ vigatotsave |
jagāma saṃvṛto meghairvṛtrahā svargamuttamam || 61 ||
[Analyze grammar]

nivṛtte saptarātre tu tiṣye skanne śatakratau |
gatābhre vimale vyomni divase dīptabhāskare || 62 ||
[Analyze grammar]

gāvastenaiva mārgeṇa parijagmurgataśramāḥ |
khaṃ ca sthānaṃ tato ghoṣaḥ pratyayātpunareva saḥ || 63 ||
[Analyze grammar]

kṛṣṇo'pi taṃ giriśreṣṭhaṃ svasthāne sthāvarātmavān |
prīto niveśayāmāsa dhruvāya varado vibhuḥ || 64 ||
[Analyze grammar]