Chapter 9

[English text for this chapter is available]

devyuvāca |
divyaṃ tejo namasyāmi yanme dṛṣṭaṃ purātane |
kālāgnirudramadhyasthaṃ prabhāse śaṃkarodbhavam || 1 ||
[Analyze grammar]

yo vedasaṃghairṛṣibhiḥ purāṇairvedoktayogairapi ijyamānaḥ |
taṃ devadevaṃ śaraṇaṃ vrajāmi someśvaraṃ pāpavināśahetum || 2 ||
[Analyze grammar]

devadeva jagannātha bhaktānugrahakāraka |
saṃśayo hṛdi me kaścittaṃ bhavāñchettumarhati || 3 ||
[Analyze grammar]

īśvara uvāca |
kaḥ saṃśayaḥ samutpannastava devi yaśasvini |
tanme kathaya kalyāṇi tatsarvaṃ kathayāmyaham || 4 ||
[Analyze grammar]

devyuvāca |
yadi tvaṃ ca mahādevo muṇḍamālā kathaṃ kṛtā |
anādi nidhano dhātā sṛṣṭisaṃhārakārakaḥ || 5 ||
[Analyze grammar]

tato vihasya deveśaḥ śaṃkaro vākyamabravīt |
anekamuṇḍakoṭībhiryā me mālā virājate || 6 ||
[Analyze grammar]

nārāyaṇa sahasrāṇāṃ brahmaṇāmayutasya ca || kṛtā śiraḥkaroṭībhiranādinidhanā tataḥ || 7 ||
[Analyze grammar]

anyo viṣṇuśca bhavati anyo brahmā bhavatyapi |
kalpe kalpe mayā sṛṣṭaḥ kalpe viṣṇuḥ prajāpatiḥ || 8 ||
[Analyze grammar]

ahamevaṃvidho devi kṣetre prābhāsike sthitaḥ |
kālāgniliṃgamūle tu muṃḍamālāvibhūṣitaḥ || 9 ||
[Analyze grammar]

akṣasūtradharaḥ śānta ādimadhyāṃtavarjitaḥ |
padmāsanastho varado himakundendusannibhaḥ || 10 ||
[Analyze grammar]

mama vāme sthito viṣṇurdakṣiṇe ca pitāmahaḥ |
jaṭhare caturo vedāḥ hṛdaye brahma śāśvatam || 11 ||
[Analyze grammar]

agniḥ somaśca sūryaśca locaneṣu vyavasthitāḥ || 12 ||
[Analyze grammar]

evaṃvidho mahādevi prabhāse saṃvyavasthitaḥ |
āpyatattvātsamānīte mā te bhūtsaṃśayaḥ kvacit || 13 ||
[Analyze grammar]

evamuktā tadā devī harṣagadgadayā girā |
tuṣṭāva devadeveśaṃ bhaktyā paramayā yutā || 14 ||
[Analyze grammar]

devyuvāca || jaya deva mahādeva sarvabhāvana īśvara |
namaste'stu sureśāya parameśāya vai namaḥ || 15 ||
[Analyze grammar]

anādisṛṣṭikartre ca namaḥ sarvagatāya ca |
sarvasthāya namastubhyaṃ dhāmnāṃ dhāmne namo'stu te || 16 ||
[Analyze grammar]

ṣaḍaṃtāya namastubhyaṃ dvādaśāntāya te namaḥ |
haṃsabheda namastubhyaṃ namastubhyaṃ ca mokṣada || 17 ||
[Analyze grammar]

iti stutastadā devyā pracalaccandraśekharaḥ |
tatastuṣṭastu bhagavānidaṃ vacanamabravīt || 18 ||
[Analyze grammar]

īśvara uvāca |
sādhusādhu mahāprājñe tuṣṭo'haṃ vriyatāṃ varaḥ || 19 ||
[Analyze grammar]

devyuvāca |
yadi tuṣṭo'si deveśa varārhā yadi vāpyaham |
prabhāsa kṣetramāhātmyaṃ punarvistarato vada || 20 ||
[Analyze grammar]

bhūteśa bhagavānviṣṇurdaityānāmantakāgraṇīḥ |
sa kasmāddvārakāṃ hitvā prabhāsakṣetramāśritaḥ || 21 ||
[Analyze grammar]

ṣaṣṭi tīrthasahasrāṇi ṣaṣṭikoṭiśatāni ca |
dvārakāmadhyasaṃsthāni kathaṃ nyakkṛtavānhariḥ || 22 ||
[Analyze grammar]

amarairāvṛtāṃ puṇyāṃ puṇyakṛdbhirniṣevitām |
evaṃ tāṃ dvārakāṃ tyaktvā prabhāsaṃ kathamāgataḥ || 23 ||
[Analyze grammar]

devamānuṣayornetā dyobhuvoḥ prabhavo hariḥ |
kimarthaṃ dvārakāṃ tyaktvā prabhāse nidhanaṃ gataḥ || 24 ||
[Analyze grammar]

yaścakraṃ varttayatyeko mānuṣāṇāṃ manomayam |
prabhāse sa kathaṃ kālaṃ cakre cakrabhṛtāṃ varaḥ || 25 ||
[Analyze grammar]

gopāyanaṃ yaḥ kurute jagataḥ sārvalaukikam |
sa kathaṃ bhagavānviṣṇuḥ prabhāsakṣetramāśritaḥ || 26 ||
[Analyze grammar]

yoṃtakāle jalaṃ pītvā kṛtvā toyamayaṃ vapuḥ |
lokamekārṇavaṃ cakre dṛṣṭyā dṛṣṭena cātmanā || 27 ||
[Analyze grammar]

sa kathaṃ pañcatāṃ prāpa prabhāse pārvatīpate |
yaḥ purāṇe purāṇātmā vārāhaṃ vapurāsthitaḥ || 28 ||
[Analyze grammar]

uddadhāra mahīṃ kṛtsnāṃ saśailavanakānanām |
sa kathaṃ tyaktavāngātraṃ prabhāse pāpanāśane || 29 ||
[Analyze grammar]

yena siṃhaṃ vapuḥ kṛtvā hiraṇyakaśipurhataḥ |
sa kathaṃ devadeveśaḥ prabhāsaṃ kṣetramāśritaḥ || 30 ||
[Analyze grammar]

sahasracaraṇaṃ devaṃ sahasrākṣaṃ mahāprabham |
sahasraśirasaṃ vedā yamāhurvai yugeyuge || 31 ||
[Analyze grammar]

tatyāja sa kathaṃ devaḥ prabhāse svaṃ kalevaram |
nābhyaraṇyāṃ samudbhūtaṃ yasya paitāmahaṃ gṛham || 32 ||
[Analyze grammar]

ekārṇavagate loke tatpaṃkajamapaṃkajam |
yenoddhṛtaṃ kṣaṇenaiva prabhāsasthaḥ sa kiṃ hariḥ || 33 ||
[Analyze grammar]

uttarāṃśe samudrasya kṣīrodasyā mṛtodadheḥ |
yaḥ śete śāśvataṃ yogamāsthāya paravīrahā |
sa kathaṃ tyaktavāndehaṃ prabhāse parameśvaraḥ || 34 ||
[Analyze grammar]

havyādānyaḥ surāṃścakre kavyādāṃśca pitṝ napi |
sa kathaṃ devadeveśaḥ prabhāsaṃ kṣetramāśritaḥ || 35 ||
[Analyze grammar]

yugānurūpaṃ yaḥ kṛtvā rūpaṃ lokahitāya vai |
dharmamuddharate devaḥ sa kathaṃ kṣetramāśritaḥ || 36 ||
[Analyze grammar]

trayo varṇāstrayo lokāstraividyaṃ pāṭhakāstrayaḥ |
traikālyaṃ trīṇi karmāṇi trayo devāstrayo guṇāḥ |
sṛṣṭaṃ yena purā devaḥ sa kathaṃ kṣetramāśritaḥ || 37 ||
[Analyze grammar]

yā gatirddharmayuktānāmagatiḥ pāpakarmiṇām |
cāturvarṇyasya prabhavaścāturvarṇyasya rakṣitā || 38 ||
[Analyze grammar]

cāturvidyasya yo vettā cāturāśramyasaṃsthitaḥ |
kasmātsa dvārakāṃ hitvā prabhāse paṃcatāṃ gataḥ || 39 ||
[Analyze grammar]

digaṃtaraṃ nabhobhūmirāpo vāyurvibhāvasuḥ |
caṃdrasūryadvayaṃ jyotiryugeśaḥ kṣaṇadātanuḥ || 40 ||
[Analyze grammar]

yaḥ paraṃ śrūyate jyotiryaḥ paraṃ śrūyate tapaḥ |
yaḥ paraṃ parataḥ proktaḥ paraṃ yaḥ paramātmavān || 41 ||
[Analyze grammar]

ādityādiśca yo divyo yaśca daityāṃtako vibhuḥ |
sa kathaṃ devakīsūnuḥ prabhāse siddhimīyivān || 42 ||
[Analyze grammar]

yugāṃte cāṃtako yaśca yaśca lokāṃtakāṃtakaḥ |
seturyo lokasattānāṃ medhyo yo medhyakarmaṇām || 43 ||
[Analyze grammar]

vettā yo vedaviduṣāṃ prabhuryaḥ prabhavātmanām |
somabhūtastu bhūtānāmagnibhūto'gnivartmanām || 44 ||
[Analyze grammar]

manuṣyāṇāṃ manobhūtastapobhūtastapasvinām |
vinayo nayabhūtānāṃ tejastejasvināmapi || 45 ||
[Analyze grammar]

vigraho vigrahāṇāṃ yo gatirgatimatāmapi |
sa kathaṃ dvārakāṃ hitvā prabhāsakṣetramāśritaḥ || 46 ||
[Analyze grammar]

ākāśaprabhavo vāyurvāyuprāṇo hutāśanaḥ |
devā hutāśanaprāṇāḥ prāṇo'gnermadhusūdanaḥ |
sakathaṃ padmajaprāṇaḥ prabhāsaṃ kṣetramāśritaḥ || 47 ||
[Analyze grammar]

sūta uvāca |
iti proktastadā devyā śaṃkaro lokaśaṃkaraḥ |
uvāca prahasanvākyaṃ pārvatīṃ dvijasattamāḥ || 48 ||
[Analyze grammar]

īśvara uvāca |
śṛṇu devi pravakṣyāmi prabhāsakṣetravistaram |
rahasyaṃ sarvapāpaghnaṃ devānāmapi durllabham || 49 ||
[Analyze grammar]

devi kṣetrāṇyanekāni pṛthivyāṃ saṃti bhāmini |
tīrthāni koṭisaṃkhyāni prabhāvasteṣu saṃkhyayā || 50 ||
[Analyze grammar]

asaṃkhyeya prabhāvaṃ hi prabhāsaṃ parikīrtitam |
brahmatattvaṃ viṣṇutattvaṃ raudratattvaṃ tathaiva ca || 51 ||
[Analyze grammar]

tatra bhūyaḥ samāyogo durllabho'nyeṣu pārvati |
prabhāse devadeveśi tattvānāṃ tritayaṃ sthitam || 52 ||
[Analyze grammar]

caturviṃśatitattvaiśca brahmā lokapitāmahaḥ |
bālarūpī ca nāmnāṃ ca tatra sthāne sthitaḥ svayam || 53 ||
[Analyze grammar]

paṃcaviśatitattvānāma dhipo devatāgraṇīḥ |
tasminsthāne sthitaḥ sākṣāddaityānāmaṃtakaḥ śubhe || 54 ||
[Analyze grammar]

ahaṃ devi tvayā sārddhaṃ ṣaṭtriṃśattattvasaṃyutaḥ |
nivasāmi mahābhāge prabhāse pāpanāśane || 55 ||
[Analyze grammar]

evaṃ tattvamayaṃ kṣetraṃ sarvatīrthamayaṃ śubham |
prabhāsameva jānīhi mā kārṣīḥ saṃśayaṃ kvacit || 56 ||
[Analyze grammar]

api kīṭapataṃgā ye mriyaṃte tatra ye narāḥ |
te'pi yāṃti paraṃ sthānaṃ nātra kāryā vicāraṇā || 57 ||
[Analyze grammar]

striyo mlecchāśca śūdrāśca paśavaḥ pakṣiṇo mṛgāḥ |
prabhāse tu mṛtā devi śivalokaṃ vrajaṃti te || 58 ||
[Analyze grammar]

kāmakrodhena ye baddhā lobhena ca vaśīkṛtāḥ |
ajñānatimirākrāṃtā māyātattve ca saṃsthitāḥ || 59 ||
[Analyze grammar]

kālapāśena ye baddhāstṛṣṇājālena mohitāḥ |
adharmaniratā ye ca ye ca tiṣṭhaṃti pāpinaḥ || 60 ||
[Analyze grammar]

brahmaghnāśca kṛtaghnāśca ye cānye gurutalpagāḥ |
mahāpātakinaścāpi te yānti paramāṃ gatim || 61 ||
[Analyze grammar]

mātṛhaṃtā naro yastu pitṛhaṃtā tathaiva ca |
te sarve muktimāyāṃti kiṃ punaḥ śubhakāriṇaḥ || 62 ||
[Analyze grammar]

iti jñātvā mahādevi daityānāmaṃtako hariḥ |
prabhāsakṣetramāsādya tyaktavānsvaṃ kalevaram |
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye prabhāsakṣetre śrīharisthitipraśnavarṇanaṃ nāma navamo'dhyāyaḥ || 9 ||
[Analyze grammar]