Chapter 34

[English text for this chapter is available]

nārada uvāca |
tatastṛtīyaliṃgasya cikīrṣu sthāpanaṃ guham |
brahmā prāhāsya prītyarthaṃ svayamanyaṃ prakurmahe || 1 ||
[Analyze grammar]

yadyapyetacchubhaṃ liṃgaṃ sarvadoṣavivarjitam |
tathāpyanyatkariṣye'haṃ sarvaśreṣṭhatamaṃ hi yat || 2 ||
[Analyze grammar]

tato brahmā sarvadoṣavimuktaṃ nirmame svayam |
dṛṣṭikāṃtaṃ manaḥkāṃtaṃ phalakāṃtaṃ suliṃgakam || 3 ||
[Analyze grammar]

tatra skaṃdasya prītyarthaṃ sarvadevairninirmitam |
saraḥ suramyaṃ tīrthāni tatra te nidadhustathā || 4 ||
[Analyze grammar]

gaṃgādikāni tīrthāni yāni procurdivaukasaḥ |
idaṃ yāvatsarastāvatsarvairatra samuṣyatām || 5 ||
[Analyze grammar]

evamastviti tānyūcuḥ prītyarthaṃ śarajanmanaḥ |
tato brahmā svayaṃ tatra raudrairmaṃtrairhutāśanam |
gādhiputrādibhirvipraistarpayāmāsa saṃyutaḥ || 6 ||
[Analyze grammar]

tato vaiśākhamāsasya caturddaśyāṃ śubhe dine |
pratiṣṭhāṃ cakrire liṃge ciraṃ vipramukā dvijāḥ || 7 ||
[Analyze grammar]

jagurgaṃdharvapatayo nanṛtuścāpsarogaṇāḥ |
tataḥ skaṃdaḥ prītiyuktaḥ snātvā sarasi śobhane || 8 ||
[Analyze grammar]

sarvatīrthodakaiḥ snāpya talliṃgaṃ bhaktisaṃyutaḥ |
vividhaiḥ pūjayāmāsa puṣpairmaṃtraiśca paṃcabhiḥ || 9 ||
[Analyze grammar]

pūjākāle svayaṃ tatra liṃgamadhyesthito haraḥ |
jaṃgamā jaṃgamaiḥ sārdhaṃ svayaṃ jagrāha pūjanam || 10 ||
[Analyze grammar]

tatastaṃ pūjayanprāha skaṃdo bhaktipariplutaḥ |
kena kenopahāreṇa tvayi dattena kiṃ phalam || 11 ||
[Analyze grammar]

śrīmahādeva uvāca |
mama yaḥ sthāpayelliṃgaṃ śubhaṃ sadma ca kārayet |
malloke vasate'sau ca vāvaccaṃdradivākarau || 12 ||
[Analyze grammar]

mama sadma sudhāśubhraṃ yāvatsaṃkhyaṃ karoti yaḥ |
tāvaṃtyeva ca janmāni yaśasāsau virājate || 13 ||
[Analyze grammar]

dhvajabhūto dhvajaṃ dattvā vipāpaḥ syātpatākayā |
vidhāya citravinyāsa gaṃdharvaiḥ saha modate || 14 ||
[Analyze grammar]

rajaḥsaṃśodhanaṃ kṛtvā naro rogaiḥ pramucyate |
prāpnoti dehaṃ hārdaṃ ca surasadmānulepanāt || 15 ||
[Analyze grammar]

puṣpakṣīrādi bhirdattaistilābho'kṣatadarbhakaiḥ |
śaṃbhoḥ śirasi dattvārghya divi varṣāyutaṃ vaset || 16 ||
[Analyze grammar]

ghṛtena hatapāpaḥ syānmadhunā subhago bhavet |
virogo dadhidugdhābhyāṃ liṃgaṃ saṃsnāpya jāyate || 17 ||
[Analyze grammar]

pānīyadadhidugdhādyaiḥ kramāddaśaguṇaṃ phalam |
māsaṃ saṃsnāpya vai bhaktyā piṣṭādyaiśca virūkṣayet || 18 ||
[Analyze grammar]

kapilāpaṃcagavyena surasiṃdhujalena vā |
māṃ ca saṃsnāpya cābhyacca mallokamadhigacchati || 19 ||
[Analyze grammar]

kuśodakādgaṃdhajalaṃ tasmāttīrthodakaṃ varam |
tīrthebhyaśca jalaṃ darśe mahīsāgarasaṃbhavam || 20 ||
[Analyze grammar]

kapilāṃ dattvā yadāpnoti tatphalaṃ kalaśe pṛthak |
mṛttāmraraupyasauvarṇaiḥ kramācchataguṇaṃ phalam || 21 ||
[Analyze grammar]

śrīkhaṃḍāgarukāśmīraśaśinaḥ kramaśo'dhikāḥ |
māṃ ca taiśca samālabhya syācchrīmānsubhagaḥ sukhī || 22 ||
[Analyze grammar]

praśasto guglulo dhūpastasmāccaṃdro'garurvaraḥ |
dhūpānetānnaro dattvā sukhaṃ svargamavāpnuyāt || 23 ||
[Analyze grammar]

dīpadaḥ kīrtimāpnoti cakṣuruttamameva ca |
naivedyasya pradānena naro mṛṣṭāśano bhavet || 24 ||
[Analyze grammar]

puṣpeṇa hemakarṇasya prabaddhena dvisaṃguṇam |
phalamāpnoti puruṣaḥ satyasaṃdhaśca jāyate || 25 ||
[Analyze grammar]

akhaṃḍairbilvapatraiśca puṣpairvā vividhairapi |
liṃgaṃ prapūraṇaṃ kṛtvā lakṣmekaṃ vaseddivi || 26 ||
[Analyze grammar]

yastu puṣpagṛhaṃ kuryānnaraḥ śuddhāśayo bhavet |
puṣpakeṇa vimānena divi saṃkrīḍate ciram || 27 ||
[Analyze grammar]

bhūṣaṇāṃbaradānena naro bhavati bhogabhāk |
saccāmarapradānena jāyate pārthivo naraḥ || 28 ||
[Analyze grammar]

ramyaṃ vitānaṃ yo dadyācchatrubhirnābhūyate |
gītaṃ vādyaṃ pranṛtyaṃ ca kṛtvā śuddho vrajetsa mām || 29 ||
[Analyze grammar]

śaṃkhaghaṃṭāpradānena vidvānbhavati śabdavān |
vidhāya rathayātrāṃ ca ciraṃ śokaiḥ pramucyate || 30 ||
[Analyze grammar]

namaskāraṃ praṇāmaṃ ca kṛtvā jāyenmahākule |
vācayaṃścāgrataḥ śāstraṃ mama jñānī prajāyate || 31 ||
[Analyze grammar]

vimucyate manomohairbhaktyā stutvā ca māṃ naraḥ |
godānaphalamāpnoti nirmālyaspheṭanānmama || 32 ||
[Analyze grammar]

ārārtikaṃ bhrāmayitvā artihīnaḥ prajāyate |
kṛtvā śītalikāṃ tāpairmucyate doṣa saṃbhavaiḥ || 33 ||
[Analyze grammar]

natvā dattvātha śaktyā ca dānaṃ liṃgasya saṃnidhau |
phalaṃ śataguṇaṃ prāpya iha cāmutra modate || 34 ||
[Analyze grammar]

praṇāmātpaṃcadaśa ca snānādviṃśatiṃ pūjayā |
śataṃ yathāproktavidheraparādhānahaṃ kṣame || 35 ||
[Analyze grammar]

etatsarvaṃ yathoddiṣṭaṃ kumārātra bhaviṣyati |
ye māṃ prapūjayiṣyaṃti kumāreśvara saṃsthitam || 36 ||
[Analyze grammar]

vārāṇasyāṃ yathā vatsa viśvanātho'smi saṃsthitaḥ || 37 ||
[Analyze grammar]

guptakṣetre tathā sthāsye kumāreśvaramadhyataḥ || 38 ||
[Analyze grammar]

śrutveti vacanaṃ rudrāddevānāṃ śrṛṇvatāṃ guhaḥ |
vismitaḥ praṇipatyainaṃ tuṣṭāva girijāpatim || 39 ||
[Analyze grammar]

namaḥ śivāyāstu nirāmayāya namaḥ śivāyāstu manomayāya |
namaḥ śivāyāstu surārcitāya tubhyaṃ sadā bhaktakṛpāparāya || 40 ||
[Analyze grammar]

namo bhavāyāstu bhavodbhavāya namostu te dhvastamanobhavāya |
namo'stu te gūḍhamahāvratāya namo'stu māyagahanāśrayāya || 41 ||
[Analyze grammar]

namostu śarvāya namaḥ śivāya namostu siddhāya purātanāya |
namostu kālāya namaḥ kalāya namo'stu te kālakalātigāya || 42 ||
[Analyze grammar]

namo nisargātmakabhūtikāya namo'stvameyokṣamaharddhikāya |
namaḥ śaraṇyāya namo'guṇāya namo'stu te bhīmaguṇānugāya || 43 ||
[Analyze grammar]

namo'stu nānābhuvanādhikartre namo'stu bhaktābhimatapradātre |
namo'stu karmaprasāvāya dhātre namaḥ sadā te bhagavansukartre || 44 ||
[Analyze grammar]

anaṃtarūpāya sadaiva tubhyamasahyakopāya sadaiva tubhyam |
ameyamānāya namostu tubhyaṃ vṛṣeṃdrayānāya namo'stu tubhyam || 45 ||
[Analyze grammar]

namaḥ prasiddhāya mahauṣadhāya namo'stu te vyādhigaṇāpahāya |
carācarāyātha vicāradāya kumāranāthāya namaḥ śivāya || 46 ||
[Analyze grammar]

mameśa bhūteśa maheśvarosi kāmeśa vāgīśa baleśa dhīśa |
krodheśa moheśa parāpareśa namostu mokṣeśa guhaśayeśa || 47 ||
[Analyze grammar]

iti saṃstūya varadaṃ śūlapāṇimumāpatim |
praṇipatya umāputro namonama uvāca ha || 48 ||
[Analyze grammar]

evaṃ bhaktiparākrāṃtamātmayogyaṃ stavaṃ śivaḥ |
abhinandya ciraṃ kālamidaṃ vacanamabravīt || 49 ||
[Analyze grammar]

tvayā duḥkhaṃ na saṃciṃtyaṃ mama bhaktavadhātmakam |
karmaṇānena ślāghyo'si munīnāmapi putraka || 50 ||
[Analyze grammar]

ye ca sāyaṃ tathā prātastvatkṛtena stavena mām |
stoṣyaṃti parayā bhaktyā śruṇu teṣāṃ ca yatphalam || 51 ||
[Analyze grammar]

na vyādhirna ca dāridryaṃ na caiveṣṭaviyojanam |
bhuktvā bhogāndurlabhāṃśca mama yāsyaṃti sadma te || 52 ||
[Analyze grammar]

tathānyānapi dāsyāmi varānparamadurlabhān |
bhaktyā tavātituṣṭo'haṃ prītyarthaṃ tava putraka || 53 ||
[Analyze grammar]

mahīsā garakūle tu ye māṃ stoṣyaṃti pūjayā |
teṣāṃ datakṣayaṃ sarvaṃ vaiśākhyāṃ dānapūjanam || 54 ||
[Analyze grammar]

sarasyatra ca ye snānaṃ prakariṣyaṃti mānavāḥ |
sarvatīrthaphalā vāptirvaiśākhyāṃ prabhaviṣyati || 55 ||
[Analyze grammar]

kumāreśaṃ tu māṃ bhaktyā mahīsāgarasaṃgame |
snātvā saṃpūjayennityaṃ tasya jātismṛtirbhavet || 56 ||
[Analyze grammar]

jātismṛtiriyaṃ putra yasyāṃ jātau prajāyate |
smarate'syāḥ prakartavyaṃ śreyorūpaṃ sudurlabham || 57 ||
[Analyze grammar]

yasminkāle hyanāvṛṣṭirjāyate kṛttikāsuta |
snāpayedvidhivanmāṃ ca kalaśairvividhaiḥ śubhaiḥ || 58 ||
[Analyze grammar]

ekarātraṃ trirātraṃ vā pañcarātraṃ ca sapta vā |
snāpayedgaṃdhatoyena kuṃkumena vilepayet || 59 ||
[Analyze grammar]

karavīrai raktapuṣpairjapāpuṣpaistathaiva ca |
arcayetpuṣpamālābhiḥ paridhāyāruṇavāsasī || 60 ||
[Analyze grammar]

bhojayedbrahṇāṃścaiva tāpasāñchaṃsivavratān |
lakṣahomaṃ prakurvīta śivahomaṃ grahādikam || 61 ||
[Analyze grammar]

bhūmidānaṃ tataḥ kuryāttatto dadyādgavāhnikam |
āghoṣayecchivāṃ śāṃtiṃ rudrajāpyaṃ hi kārayet || 62 ||
[Analyze grammar]

anenaiva vidhānena kṛtena tu dvijottamaiḥ |
āgarbhitāstadā meghā varṣate nātra saṃśayaḥ || 63 ||
[Analyze grammar]

vividhaiḥ pūryate dhānyaḥ śādvalaiśca vasundharā |
ārogyaṃ hi bhaveccaiva jane gopakule tathā || 64 ||
[Analyze grammar]

dharmayukto bhavedrājā paracakrairna pīḍyate |
gṛtena snāpayenmāṃ ca arkakrāṃtau naro'tra yaḥ || 65 ||
[Analyze grammar]

kanyādāna phalaṃ tasya nātra kāryā vicāraṇā |
kṣīreṇa snāpayeddevaṃ tathā paṃcāmṛtena yaḥ || 66 ||
[Analyze grammar]

agniṣṭomasya yajñasya phalaṃ tasyopajāyate |
kumāreśvaratīrtheyaḥ prāṇatyāgaṃ karoti hi || 67 ||
[Analyze grammar]

rudraloke vasettāvadyāvadābhūtasaṃplavam |
ayane viṣuve caiva grahaṇe caṃdrasūryayoḥ || 68 ||
[Analyze grammar]

paurṇamāsyāmamāvāsyāṃ saṃkrāṃtau vaidhṛte tathā |
kumāreśaṃ naraḥ snātvā mahīsāgarasaṃgame || 69 ||
[Analyze grammar]

bhaktyā yobhyarcayenmāṃ ca tasya puṇyaphalaṃ śrṛṇu |
yanmahītalatīrtheṣu snāne syāttu mahatphalam || 70 ||
[Analyze grammar]

yaccarciteṣu liṃgeṣu sarveṣu syātphalaṃ ca tat |
ārogyaṃ putralābhaṃ ca dhanalābhaṃ sukhaṃsutam || 71 ||
[Analyze grammar]

niścitaṃ labhate martyaḥ kumāreśvarasevayā |
brahmacārī śucirbhūtvā yastiṣṭhedatra tāpasaḥ || 72 ||
[Analyze grammar]

paraṃ pāśupataṃ yogaṃ prāpya yāti layaṃ mayi |
pāpātmanāṃ ca martyānāṃ sadyo'smi phaladarśakaḥ || 73 ||
[Analyze grammar]

divyenāṣṭavidhenātra kośaḥ sādhāraṇo'tra ca |
aghorādyaiḥ paṃcamaṃtraiḥ snāpya liṃgaṃ mahojjavalam || 74 ||
[Analyze grammar]

aghoreṇaiva tattoyaṃ dadyāddivyasya kāraṇe |
pibedetadudīryā prasṛtitrayameva ca || 75 ||
[Analyze grammar]

yadi dharmastathā satyamīśvaro'tra jagattraye |
kośapānātphalaṃ sadyo drakṣyāmyasmi śubhā śubham || 76 ||
[Analyze grammar]

yāsye ceti kulaṃ hanyādgamane ca kuṭumbakam |
darśane ca śubhaṃ pāne hanyāddehaṃ ca mithyayā || 77 ||
[Analyze grammar]

tribhirdinaistribhiḥ pakṣaistribhirmāsaistribhiḥ samaiḥ |
atyugrapuṇyapāpānāṃ mānena phalamaśnute || 78 ||
[Analyze grammar]

ete varāmayā liṃge dattātraṃ sthāpite tvayā |
tava prītyabhivṛddhyarthaṃ brūhi bhūyo'pyumātmaja || 79 ||
[Analyze grammar]

skanda uvāca |
kṛtakṛtyo varairdattaistvayā caitairmaheśvara |
namonamo namastestu nātra tyājyaṃ tvayā vibho || 80 ||
[Analyze grammar]

evaṃ praṇamya devaṃ sa mātaraṃ praṇato'bravīt |
tvayāpi mātarnaivātra tyājyaṃ mama priyepsayā || 81 ||
[Analyze grammar]

tvāmapyatra sthāpayiṣye varadā bhava parvati || 82 ||
[Analyze grammar]

śrīdevyuvāca |
yatra śarvaḥ svabhāvena tatra tiṣṭhāmyahaṃ suta || 83 ||
[Analyze grammar]

tava bhaktyā viśeṣeṇa sthāsye strīṇāṃ varapradā |
yuddheṣu tavakarmāṇi rudrabhakteṣu te kṛpām || 84 ||
[Analyze grammar]

paśyaṃti putriṇāṃ mukhyā prīṇitā ca bhṛśaṃ tvayā |
garbhakleśaḥ striyo manye sāphalyaṃ bhajate tadā || 85 ||
[Analyze grammar]

suto yadā rudrabhaktaḥ sānaṃdaṃ sadbhirīryate |
bhava tasmātpriyārthāya tiṣṭhāmyatra ṣaḍānana || 86 ||
[Analyze grammar]

strībhirārādhitā dāsye saubhāgyaṃ supatiṃ sutān |
caitre cāpi tṛtīyāyāṃ snātvā śītena vāriṇā || 87 ||
[Analyze grammar]

arcayiṣyaṃti māṃ yāśca puṣpairdhūpairvilepanaiḥ |
dāsyāmi cāṣṭasaubhāgyaṃ yā nārī bhaktitatparā || 88 ||
[Analyze grammar]

pitarau śvaśurau putrānpatiṃ saubhāgyasaṃpadaḥ |
kuṃkumaṃ puṣpaśrīkhaṃḍaṃ tāṃbūlāṃjanamikṣavaḥ || 89 ||
[Analyze grammar]

saptamaṃ lavaṇaṃ proktamaṣṭamaṃ ca sujīrakam |
tolayettulayā vāpi sāṃghriśca tulitā bhavet || 90 ||
[Analyze grammar]

suvarmenātha saugandhyadravyaiḥ śubhaphalairapi |
bhuṃkte vā lavaṇaṃ paścānnāsau vai vidhavā bhavet || 91 ||
[Analyze grammar]

māghe vā kārtike vāpi caitre snātvārcayet mām |
daurbhāgyaduḥkhadāridryairna sā saṃyogamāpnuyāt || 92 ||
[Analyze grammar]

śrutveti girijāvācaṃ sānaṃdaḥ pārvatīsutaḥ |
sthāpayitvā girisutāṃ kapardinamathābravīt || 93 ||
[Analyze grammar]

puṣpairdhūpairmodakaiśca pūrvamabhyarcya tvāṃ prabho |
pujayaṃti kumāreśaṃ teṣāṃ vighnaharo bhava || 94 ||
[Analyze grammar]

kapardyuvāca |
bhrātastvayā sthāpite'smiṃlliṃge bhaktāśca ye narāḥ |
na teṣāṃ mama vighnāni mama vāganugāminī || 95 ||
[Analyze grammar]

evamukte vighnarājñā pratīte'sthāpayacca tam |
tasmādasau sadābhyarcyaścaturthyāṃ ca viśeṣataḥ || 96 ||
[Analyze grammar]

evaṃ sthāpya kumāreśaṃ labdhvā caitānvarāñchivāt |
manasā kṛtakṛtyaṃ cātmānaṃ mene ṣaḍānanaḥ || 97 ||
[Analyze grammar]

tasthāvaṃśena tatraiva kumāreśvarasaṃnidhau |
atra sthitaṃ kumāraṃ ye paśyanti svāmiyātrimaḥ || 98 ||
[Analyze grammar]

saphalā svāmiyātrā ca teṣāṃ bhavati bhārata |
kārtikyāṃ ca viśeṣeṇa kārtikeyaṃ samarcayet || 99 ||
[Analyze grammar]

yatphalaṃ svāmiyātrāyāṃ tatphalaṃ samāvāpnuyāt |
evaṃvidhamidaṃ pārtha mahīsāgarasaṃgamam || 100 ||
[Analyze grammar]

nimittīkṛtya cātmānaṃ sādhvarthe liṃgamarcitam |
rogābhibhūto rogairvā nāmnāmaṣṭottaraṃ śatam || 101 ||
[Analyze grammar]

japtvā śucirbrahmacārī māsaṃ mucyeta pātakāt |
etadārādhya saṃjātā rajirāmādayaḥ purā || 102 ||
[Analyze grammar]

śatasaṃkhyābalaṃ rājyaṃ rudraloka ca bhejire |
jāmadagnyastvidaṃ liṃgamārādhya ca samāyutam || 103 ||
[Analyze grammar]

lebhe kuṭhāramujjahne yenārjunabhujānyudhi |
agrato devadevasya jñātvā tīrthe mahāguṇān || 104 ||
[Analyze grammar]

rāmeśvaramiti khyātaṃ sthāpitaṃ liṃgamuttamam |
tacca yo'bhyarcayedbhaktyā rudralokaṃ sa gacchati || 105 ||
[Analyze grammar]

prītaḥ syāttasya rāmaśca kumāreśaśca phālguna |
iti saṃkṣepataḥ proktaṃ kumāreśasya varṇanam || 106 ||
[Analyze grammar]

kumāreśasya māhātmyaṃ kīrtayedyastadagrataḥ |
ye ca śrṛṇvaṃtyanudinaṃ rudraloke vasaṃti te || 107 ||
[Analyze grammar]

asya liṃgasya māhātmyaṃ śrāddhakāle tu yaḥ paṭhet |
pitṝṇāmakṣayaṃ jāyate nātra saṃśayaḥ || 108 ||
[Analyze grammar]

asya liṃgasya māhātmyaṃ gurviṇīṃ śrāvayedyadi |
guṇavāñjāyate putraḥ kanyā cāpi pativratā || 109 ||
[Analyze grammar]

etatpuṇyaṃ pāpaharaṃ dharmyaṃ cāhlādakārakam |
paṭhatāṃ cāpi sarvābhīṣṭaphala pradam || 110 ||
[Analyze grammar]