Chapter 22

[English text for this chapter is available]

tasminnavasare vyomni samāvirabhavadrathaḥ |
sahasrasūryasaṃkāśaścārucīravṛṣadhvajaḥ || 1 ||
[Analyze grammar]

aśvaratnadvayodāro rathacakracatuṣṭayaḥ |
sañcitānekadivyāstraśastraratnapariṣkṛtaḥ || 2 ||
[Analyze grammar]

tasyāpi rathavaryasya syātsa eva hi sārathiḥ |
yathā ca traipure yuddhe pūrvaṃ śārvarathe sthitaḥ || 3 ||
[Analyze grammar]

sa taṃ rathavaraṃ brahmā śāsanādeva śūlinaḥ |
haressamīpamānīya kṛtāñjalirabhāṣata || 4 ||
[Analyze grammar]

bhagavanbhadra bhadrāṃga bhagavānindubhūṣaṇaḥ |
ājñāpayati vīrastvāṃ rathamāroḍhumavyayaḥ || 5 ||
[Analyze grammar]

rebhyāśramasamīpasthastryaṃbako 'ṃbikayā saha |
sampaśyate mahābāho dussahaṃ te parākramam || 6 ||
[Analyze grammar]

tasya tadvacanaṃ śrutvā sa vīro gaṇakuñjaraḥ |
āruroha rathaṃ divyamanugṛhya pitāmaham || 7 ||
[Analyze grammar]

tathā rathavare tasminsthite brahmaṇi sārathau |
bhadrasya vavṛdhe lakṣmī rudrasyeva puradviṣaḥ || 8 ||
[Analyze grammar]

tataḥ śaṃkhavaraṃ dīptaṃ pūrṇacaṃdrasamaprabham |
pradadhmau vadane kṛtvā bhānukaṃpo mahābalaḥ || 9 ||
[Analyze grammar]

tasya śaṃkhasya taṃ nādaṃ bhinnasārasasannibham |
śrutvā bhayena devānāṃ jajvāla jaṭharānalaḥ || 10 ||
[Analyze grammar]

yakṣavidyādharāhīndraiḥ siddhairyuddhadidṛkṣubhiḥ |
kṣaṇena nibaḍībhūtāḥ sākāśavivarā diśāḥ || 11 ||
[Analyze grammar]

tataḥ śārṅgeṇa cāpāṅkātsa nārāyaṇanīradaḥ |
mahatā bāṇavarṣeṇa tutoda gaṇagovṛṣam || 12 ||
[Analyze grammar]

taṃ dṛṣṭvā viṣṇumāyāṃtaṃ śatadhā bāṇavarṣiṇam |
sa cādade dhanurjaitraṃ bhadro bāṇasahasramuk || 13 ||
[Analyze grammar]

samādāya ca taddivyaṃ dhanussamarabhairavam |
śanairvisphārayāmāsa meruṃ dhanuriveśvaraḥ || 14 ||
[Analyze grammar]

tasya visphāryamāṇasya dhanuṣo 'bhūnmahāsvanaḥ |
tena svanena mahatā pṛthivīṃ samakaṃpayat || 15 ||
[Analyze grammar]

tataḥ śaravaraṃ ghoraṃ dīptamāśīviṣopamam |
jagrāha gaṇapaḥ śrīmānsvayamugraparākramaḥ || 16 ||
[Analyze grammar]

bāṇoddhāre bhujo hyasya tūṇīvadanasaṃgataḥ |
pratyadṛśyata valmīkaṃ vivekṣuriva pannagaḥ || 17 ||
[Analyze grammar]

samuddhṛtaḥ kare tasya tatkṣaṇaṃ ruruce śareḥ |
mahābhujaṃgasaṃdaṣṭo yathā bālabhujaṅgamaḥ || 18 ||
[Analyze grammar]

śareṇa ghanatīvreṇa bhadro rudraparākramaḥ |
vivyādha kupito gāḍhaṃ lalāṭe viṣṇumavyayam || 19 ||
[Analyze grammar]

lalāṭe 'bhihito viṣṇuḥ pūrvamevāvamānitaḥ |
cukopa gaṇapeṃdrāya mṛgeṃdrāyeva govṛṣaḥ || 20 ||
[Analyze grammar]

tatastvaśanikalpena krūrāsyena maheṣuṇā |
vivyādha gaṇarājasya bhuje bhujagasannibhe || 21 ||
[Analyze grammar]

so 'pi tasya bhuje bhūyaḥ sūryāyutasamaprabham |
visasarja śaraṃ vegādvīrabhadro mahābalaḥ || 22 ||
[Analyze grammar]

sa ca viṣṇuḥ punarbhadraṃ bhadro viṣṇuṃ tathā punaḥ |
sa ca taṃ sa ca taṃ viprāśśaraistāvanujaghnatuḥ || 23 ||
[Analyze grammar]

tayoḥ parasparaṃ vegāccharānāśu vimuṃcatoḥ |
dvayossamabhavadyuddhaṃ tumulaṃ romaharṣaṇam || 24 ||
[Analyze grammar]

taddṛṣṭvā tumulaṃ yuddhaṃ tayoreva parasparam |
hāhākāro mahānāsīdākāśe khecareritaḥ || 25 ||
[Analyze grammar]

tatastvanalatuṃḍena śareṇādityavarcasā |
vivyādha sudṛḍhaṃ bhadro viṣṇormahati vakṣasi || 26 ||
[Analyze grammar]

sa tu tīvraprapātena śareṇa dṛḍhamāhataḥ |
mahatīṃ rujamāsādya nipapāta vimohitaḥ || 27 ||
[Analyze grammar]

punaḥ kṣaṇādivotthāya labdhasaṃjñastadā hariḥ |
sarvāṇyapi ca divyāstrāṇyathainaṃ pratyavāsṛjat || 28 ||
[Analyze grammar]

sa ca viṣṇurdhanurmuktānsarvāñcharvacamūpatiḥ |
sahasā vārayāmāsa ghoraiḥ pratiśaraiḥ śarān || 29 ||
[Analyze grammar]

tato viṣṇussvanāmāṃkaṃ bāṇamavyāhataṃ kvacit |
sasarja krodharaktā kṣastamuddiśya gaṇeśvaram || 30 ||
[Analyze grammar]

taṃ bāṇaṃ bāṇavaryeṇa bhadro bhadrāhvayeṇa tu |
aprāptameva bhagavāñciccheda śatadhā pathi || 30 ||
[Analyze grammar]

athaikeneṣuṇā śārṅgaṃ dvābhyāṃ pakṣau garutmataḥ |
nimeṣādeva ciccheda tadadbhutamivābhavat || 31 ||
[Analyze grammar]

tato yogabalādviṣṇurdehāddevānsudāruṇān |
śaṃkhacakragadāhastān visasarja sahasraśaḥ || 32 ||
[Analyze grammar]

sarvāṃstānkṣaṇamātreṇa traipurāniva śaṃkaraḥ |
nirdadāha mahābāhurnetrasṛṣṭena vahninā || 33 ||
[Analyze grammar]

tataḥ kruddhataro viṣṇuścakramudyamya satvaraḥ |
tasminvīro samutsraṣṭuṃ tadānīmudyato 'bhavat || 34 ||
[Analyze grammar]

taṃ dṛṣṭvā cakramudyamya purataḥ samupasthitam |
smayanniva gaṇeśāno vyaṣṭaṃbhayadayatnataḥ || 35 ||
[Analyze grammar]

staṃbhitāṃgastu taccakraṃ ghoramapratimaṃ kvacit |
icchannapi samutsraṣṭuṃ na viṣṇurabhavatkṣamaḥ || 36 ||
[Analyze grammar]

śvasannivaikamuddhṛtya bāhuṃ cakrasamanvitam |
atiṣṭhadalaso bhūtvā pāṣāṇa iva niścalaḥ || 37 ||
[Analyze grammar]

viśarīro yathājīvo viśṛṅgo vā yathā vṛṣaḥ |
vidaṃṣṭraśca yathā siṃhastathā viṣṇuravasthitaḥ || 38 ||
[Analyze grammar]

taṃ dṛṣṭvā durdaśāpannaṃ viṣṇumiṃdrādayaḥ surāḥ |
samunnaddhā gaṇendreṇa mṛgeṃdreṇeva govṛṣāḥ || 39 ||
[Analyze grammar]

pragṛhītāyudhā yauddhuṃkruddhāḥ samupatasthire |
tāndṛṣṭvā samare bhadraḥkṣudrāniva harirmṛgān || 40 ||
[Analyze grammar]

sākṣādrudratanurvīro varavīragaṇāvṛtaḥ |
aṭṭahāsena ghoreṇa vyaṣṭaṃ bhayadaniṃditaḥ || 41 ||
[Analyze grammar]

tathā śatamakhasyāpi savajro dakṣiṇaḥ karaḥ |
sisṛkṣoreva udvajraścitrīkṛta ivābhavat || 42 ||
[Analyze grammar]

anyeṣāmapi sarveṣāṃ saraktā api bāhavaḥ |
alasānāmivāraṃbhāstādṛśāḥ pratiyāṃtyuta || 43 ||
[Analyze grammar]

evaṃ bhagavatā tena vyāhatāśeṣavaibhavāt |
amarāḥ samare tasya purataḥ sthātumakṣamāḥ || 44 ||
[Analyze grammar]

stabdhairavayavaireva dudruvurbhayavihvalāḥ |
sthitiṃ ca cakrire yuddhe vīratejobhayākulāḥ || 45 ||
[Analyze grammar]

vidrutāṃstridaśānvīrānvīrabhadro mahābhujaḥ |
vivyādha niśitairbāṇairmagho varṣairivācalān || 46 ||
[Analyze grammar]

bahavastasya vīrasya bāhavaḥ parighopamāḥ |
śastraiścakāśire dīptaiḥ sāgnijvālā ivoragāḥ || 47 ||
[Analyze grammar]

astraśastrāṇyanekānisavīro visṛjanbabhau |
visṛjansarvabhūtāni yathādau viśvasaṃbhavaḥ || 48 ||
[Analyze grammar]

yathā raśmibhirādityaḥ pracchādayati medinīm |
tathā vīraḥ kṣaṇādeva śaraiḥ prācchādayaddiśaḥ || 49 ||
[Analyze grammar]

khamaṃḍale gaṇendrasya śarāḥ kanakabhūṣitāḥ |
utpataṃtastaḍidrūpairupamānapadaṃ yayuḥ || 50 ||
[Analyze grammar]

mahāṃtaste suragaṇānmaṃḍūkānivaḍuṃḍubhāḥ |
prāṇairviyojayāmāsuḥ papuśca rudhirāsavam || 51 ||
[Analyze grammar]

nikṛttabāhavaḥ kecitkecillūnavarānanāḥ |
pārśve vidāritāḥ kecinnipeturamarā bhuvi || 52 ||
[Analyze grammar]

viśikhonmathitairgātrairbahubhiśchinnasandhibhiḥ |
vivṛttanayanāḥ kecinnipeturbhūtale mṛtāḥ || 53 ||
[Analyze grammar]

gāṃ praveṣṭumivecchaṃtaḥ khaṃ gaṃtumiva lipsavaḥ |
alabdhātmanirodhānāṃ vyalīyaṃtaḥ parasparam || 53 ||
[Analyze grammar]

bhūmau kecitpraviviśuḥ parvatānāṃ guhāḥ pare |
apare jagmurākāśaṃ pare ca viviśurjalam || 54 ||
[Analyze grammar]

tathā saṃchinnasarvāṃgaissa vīrastridaśairbabhau |
parigrastaprajāvargo bhagavāniva bhairavaḥ || 55 ||
[Analyze grammar]

dagdhatripurasaṃvyūhastripurāriryathābhavat |
evaṃ devabalaṃ sarvaṃ dīnaṃ bībhatsadarśanam || 56 ||
[Analyze grammar]

gaṇeśvarasamutpannaṃ kṛpaṇaṃ vapurādade |
tadā tridaśavīrāṇāmasṛksalilavāhinī || 57 ||
[Analyze grammar]

prāvartata nadī ghorā prāṇināṃ bhayaśaṃsinī |
rudhireṇa pariklinnā yajñabhūmistadā babhau || 58 ||
[Analyze grammar]

raktārdravasanā śyāmā hataśuṃbheva kaiśikī |
tasminmahati saṃvṛtte samare bhṛśadāruṇe || 59 ||
[Analyze grammar]

bhayeneva paritrastā pracacāla vasundharā |
mahormikalilāvartaścukṣubhe ca mahodadhiḥ || 60 ||
[Analyze grammar]

petuścolkā mahotpātāḥ śākhāśca mumucurdrumāḥ |
aprasannā diśaḥ sarvāḥ pavanaścāśivo vavau || 61 ||
[Analyze grammar]

aho vidhiviparyāsastvaśvamedhoyamadhvaraḥ |
yajamānassvayaṃ dakṣau brahmaputraprajāpatiḥ || 62 ||
[Analyze grammar]

dharmādayassadasyāśca rakṣitā garuḍadhvajaḥ |
bhāgāṃśca pratigṛhṇaṃti sākṣādiṃdrādayaḥ surāḥ || 63 ||
[Analyze grammar]

tathāpi yajamānasya yajñasya ca sahartvijaḥ |
sadya eva śiraśchedassādhu saṃpadyate phalam || 64 ||
[Analyze grammar]

tasmānnāvedanirdiṣṭaṃ na ceśvarabahiṣkṛtam |
nāsatparigṛhītaṃ ca karma kuryātkadācana || 65 ||
[Analyze grammar]

kṛtvāpi sumahatpuṇyamiṣṭvā yajñaśatairapi |
na tatphalamavāpnoti bhaktihīno maheśvare || 66 ||
[Analyze grammar]

kṛtvāpi sumahatpāpaṃ bhaktyā yajati yaśśivam |
mucyate pātakaiḥ sarvairnātra kāryā vicāraṇā || 67 ||
[Analyze grammar]

bahunātra kimuktena vṛthā dānaṃ vṛthā tapaḥ |
vṛthā yajño vṛthā homaḥ śivanindāratasya tu || 68 ||
[Analyze grammar]

tataḥ sanārāyaṇakāssarudrāḥ salokapālāssamare suraughāḥ |
gaṇeṃdracāpacyutabāṇaviddhāḥ pradudruvurgāḍharujābhibhūtāḥ || 69 ||
[Analyze grammar]

celuḥ kvacitkecana śīrṇakeśāḥ seduḥ kvacitkecana dīrghagātrāḥ |
petuḥ kvacitkecana bhinnavaktrā neśuḥ kvacitkecana devavīrāḥ || 70 ||
[Analyze grammar]

kecicca tatra tridaśā vipannā visrastavastrābharaṇāstraśastrāḥ |
nipeturudbhāsitadīnamudrā madaṃ ca darpaṃ ca balaṃ ca hitvā || 71 ||
[Analyze grammar]

sasmutpathaprasthitamapradhṛṣyo vikṣipya dakṣādhvaramakṣatāstraiḥ |
babhau gaṇeśassa gaṇeśvarāṇāṃ madhye sthitaḥ siṃha ivarṣabhāṇām || 72 ||
[Analyze grammar]