Chapter 23

[English text for this chapter is available]

adhyāya || 23 ||
[Analyze grammar]

vāyuruvāca |
iti sañchinnabhinnāṃgā devā viṣṇupurogamāḥ |
kṣaṇātkaṣṭāṃ daśāmetya tresuḥ stokāvaśeṣitā || 1 ||
[Analyze grammar]

trastāṃstānsamare vīrān devānanyāṃśca vai gaṇāḥ |
pramathāḥ paramakruddhā vīrabhadrapraṇoditāḥ || 2 ||
[Analyze grammar]

pragṛhya ca tathā doṣaṃ nigaḍairāyasairdṛḍhaiḥ |
babandhuḥ pāṇipādeṣu kaṃdhareṣūdareṣu ca || 3 ||
[Analyze grammar]

tasminnavasare brahmā bhadramadrīndrajānutam |
sārathyāllabdhavātsalyaḥ prārthayan praṇato 'bravīt || 4 ||
[Analyze grammar]

alaṃ krodhena bhagavannaṣṭāścaite divaukasaḥ |
prasīda kṣamyatāṃ sarvaṃ romajaissaha suvrata || 5 ||
[Analyze grammar]

evaṃ vijñāpitastena brahmaṇā parameṣṭhinā |
śamaṃ jagāma saṃprīto gaṇapastasya gauravāt || 6 ||
[Analyze grammar]

devāśca labdhāvasarā devadevasya maṃtriṇaḥ |
dhārayanto 'ñjalīnmūrdhni tuṣṭuvurvividhaiḥ stavaiḥ || 7 ||
[Analyze grammar]

devā ūcuḥ |
namaḥ śivāya śāntāya yajñahantre triśūline |
rudrabhadrāya rudrāṇāṃ pataye rudrabhūtaye || 8 ||
[Analyze grammar]

kālāgnirudrarūpāya kālakāmāṃgahāriṇe |
devatānāṃ śirohantre dakṣasya ca durātmanaḥ || 9 ||
[Analyze grammar]

saṃsargādasya pāpasya dakṣasyākliṣṭakarmaṇaḥ |
śāsitāḥ samare vīra tvayā vayamaninditā || 10 ||
[Analyze grammar]

dagdhāścāmī vayaṃ sarve tvatto bhītāśca bho prabho |
tvameva gatirasmākaṃ trāhi naśśaraṇāgatān || 11 ||
[Analyze grammar]

vāyuruvāca |
tuṣṭastvevaṃ stuto devān visṛjya nigaḍātprabhuḥ |
ānayaddevadevasya samīpamamarāniha || 12 ||
[Analyze grammar]

devopi tatra bhagavānantarikṣe sthitaḥ prabhuḥ |
sagaṇaḥ sarvagaḥ śarvassarvalokamaheśvaraḥ || 13 ||
[Analyze grammar]

taṃ dṛṣṭvā parameśānaṃ devā viṣṇupurogamāḥ |
prītā api ca bhītāśca namaścakrurmaheśvaram || 14 ||
[Analyze grammar]

dṛṣṭvā tānamarānbhītānpraṇatārtiharo haraḥ |
idamāha mahādevaḥ prahasan prekṣya pārvatīm || 15 ||
[Analyze grammar]

mahādeva uvāca |
mābhaiṣṭa tridaśāssarve yūyaṃ vai māmikāḥ prajāḥ |
anugrahārthameveha dhṛto daṃḍaḥ kṛpālunā || 16 ||
[Analyze grammar]

bhavatāṃ nirjarāṇāṃ hi kṣānto 'smābhirvyatikramaḥ |
kruddheṣvasmāsu yuṣmākaṃ na sthitirna ca jīvitam || 17 ||
[Analyze grammar]

vāyuruvāca |
ityuktāstridaśāssarve śarveṇāmitatejasā |
sadyo vigatasandehā nanṛturvibudhā mudā || 18 ||
[Analyze grammar]

prasannamanaso bhūtvānandavihvalamānasāḥ |
stutimārebhire kartuṃ śaṃkarasya divaukasaḥ || 19 ||
[Analyze grammar]

devā ūcuḥ |
tvameva devākhilalokakartā pātā ca hartā parameśvaro 'si |
kaviṣṇurudrākhyasvarūpabhedai rajastamassattvadhṛtātmamūrte || 20 ||
[Analyze grammar]

sarvamūrte namaste 'stu viśvabhāvana pāvana |
amūrte bhaktahetorhi gṛhītākṛtisaukhyada || 21 ||
[Analyze grammar]

caṃdro 'gado hi deveśa kṛpātastava śaṃkara |
nimajjanānmṛtaḥ prāpa sukhaṃ mihirajājaliḥ || 22 ||
[Analyze grammar]

sīmantinī hatadhavā tava pūjanataḥ prabho |
saubhāgyamatulaṃ prāpa somavāravratātsutān || 23 ||
[Analyze grammar]

śrīkarāya dadau devaḥ svīyaṃ padamanuttamam |
sudarśanamarakṣastvaṃ nṛpamaṃḍalabhītitaḥ || 24 ||
[Analyze grammar]

meduraṃ tārayāmāsa sadāraṃ ca ghṛṇānidhiḥ |
śāradāṃ vidhavāṃ cakre sadhavāṃ kriyayā bhavān || 25 ||
[Analyze grammar]

bhadrāyuṣo vipattiṃ ca vicchidya tvamadāḥ sukham |
sauminī bhavabandhādvai muktā 'bhūttava sevanāt || 26 ||
[Analyze grammar]

viṣṇuruvāca |
tvaṃ śaṃbho kaharīśāśca rajassattvatamoguṇaiḥ |
kartā pātā tathā hartā janānugrahakāṃkṣayā || 27 ||
[Analyze grammar]

sarvagarvāpahārī ca sarvatejovilāsakaḥ |
sarvavidyādigūḍhaśca sarvānugrahakārakaḥ || 28 ||
[Analyze grammar]

tvattaḥ sarvaṃ ca tvaṃ sarvaṃ tvayi sarvaṃ girīśvara |
trāhi trāhi punastrāhi kṛpāṃ kuru mamopari || 29 ||
[Analyze grammar]

athāsminnantare brahmā praṇipatya kṛtāṃjaliḥ |
evaṃ tvavasaraṃ prāpya vyajñāpayata śūline || 30 ||
[Analyze grammar]

brahmovāca |
jaya deva mahādeva praṇatārtivibhaṃjana |
īdṛśeṣvaparādheṣu ko 'nyastvattaḥ prasīdati || 31 ||
[Analyze grammar]

labdhamāno bhaviṣyaṃti ye purā nihitā mṛdhe |
pratyāpattirna kasya syātprasanne parameśvare || 32 ||
[Analyze grammar]

yadidaṃ devadevānāṃ kṛtamantuṣu dūṣaṇam |
tadidaṃ bhūṣaṇaṃ manyeta aṃgīkāragauravāt || 33 ||
[Analyze grammar]

iti vijñāpyamānastu brahmaṇā parameṣṭhinā |
vilokya vadanaṃ devyā devadevassmayanniva || 34 ||
[Analyze grammar]

putrabhūtasya vātsalyādbrahmaṇaḥ padmajanmanaḥ |
devādīnāṃ yathāpūrvamaṃgāni pradadau prabhuḥ || 35 ||
[Analyze grammar]

prathamādyaiśca yā devyo daṃḍitā devamātaraḥ |
tāsāmapi yathāpūrvāṇyaṃgāni giriśo dadau || 36 ||
[Analyze grammar]

dakṣasya bhagavāneva svayaṃ brahmā pitāmahaḥ |
tatpāpānuguṇaṃ cakre jaracchāgamukhaṃ mukham || 37 ||
[Analyze grammar]

so 'pi saṃjñāṃ tato labdhvā sa dṛṣṭvā jīvitaḥ sudhī |
bhītaḥ kṛtāñjaliḥ śaṃbhuṃ tuṣṭāva pralapanbahu || 38 ||
[Analyze grammar]

dakṣa uvāca |
jaya deva jagannātha lokānugrahakāraka |
kṛpāṃ kuru maheśānāparādhaṃ me kṣamasva ha || 39 ||
[Analyze grammar]

kartā bhartā ca hartā ca tvameva jagatāṃ prabho |
mayā jñātaṃ viśeṣeṇa viṣṇvādisakaleśvaraḥ || 40 ||
[Analyze grammar]

tvayaiva vitataṃ sarvaṃ vyāptaṃ sṛṣṭaṃ na nāśitam |
na hi tvadadhikāḥ kecidīśāste 'cyutakādayaḥ || 41 ||
[Analyze grammar]

vāyuruvāca |
taṃ tathā vyākulaṃ bhītaṃ pralapaṃtaṃ kṛtāgasam |
smayannivāvadatprekṣya mā bhairiti 1 ghṛṇānidhiḥ || 42 ||
[Analyze grammar]

tathoktvā brahmaṇastasya pituḥ priyacikīrṣayā |
gāṇapatyaṃ dadau tasmai dakṣāyākṣayamīśvaraḥ || 43 ||
[Analyze grammar]

tato brahmādayo devā abhivaṃdya kṛta 2 ṃjaliḥ |
tuṣṭuvuḥ praśrayā vācā śaṃkaraṃ girijādhipam || 44 ||
[Analyze grammar]

brahmādaya ūcuḥ |
jaya śaṃkara deveśa dīnānātha mahāprabho |
kṛpāṃ kuru maheśānāparādhaṃ no kṣamasva vai || 45 ||
[Analyze grammar]

makhapāla makhādhīśa makhavidhvaṃsakāraka |
kṛpāṃ kuru maśānāparādhaṃ naḥ kṣamasva vai || 46 ||
[Analyze grammar]

devadeva pareśāna bhaktaprāṇaprapoṣaka |
duṣṭadaṇḍaprada svāminkṛpāṃ kuru namo 'stu te || 47 ||
[Analyze grammar]

tvaṃ prabho garvahartā vai duṣṭānāṃ tvāmajānatām |
rakṣako hi viśeṣeṇa satāṃ tvatsaktacetasām || 48 ||
[Analyze grammar]

adbhutaṃ caritaṃ te hi niścitaṃ kṛpayā tava |
sarvāparādhaḥ kṣaṃtavyo vibhavo dīnavatsalāḥ || 49 ||
[Analyze grammar]

vāyuruvāca |
iti stuto mahādevo brahmādyairamaraiḥ prabhuḥ |
sa bhaktavatsalassvāmī tutoṣa karuṇodadhiḥ || 50 ||
[Analyze grammar]

cakārānugrahaṃ teṣāṃ brahmādīnāṃ divaukasām |
dadau narāṃśca suprītyā śaṃkaro dīnavatsalaḥ || 51 ||
[Analyze grammar]

sa ca tatastridaśāñcharaṇāgatān paramakāruṇikaḥ parameśvaraḥ |
anugatasmitalakṣaṇayā girā śamitasarvabhayaḥ samabhāṣata || 52 ||
[Analyze grammar]

śiva uvāca |
yadidamāga ihācaritaṃ surairvidhiniyogavaśādiva yantritaiḥ |
śaraṇameva gatānavalokya vastadakhilaṃ kila vismṛtameva naḥ || 53 ||
[Analyze grammar]

tadiha yūyamapi prakṛtaṃ manasyavigaṇayya vimardamapatrapāḥ |
hariviriṃcisurendramukhāssukhaṃ vrajata devapuraṃ prati saṃprati || 54 ||
[Analyze grammar]

iti surānabhidhāya sureśvaro nikṛtadakṣakṛtakraturakratuḥ |
sagirijānucarassaparicchadaḥ sthita ivāmbaratontaradhāddharaḥ || 55 ||
[Analyze grammar]

atha surā api te vigatavyathāḥ kathitabhadrasubhadraparākramāḥ |
sapadi khena sukhena yathāsukhaṃ yayuranekamukhāḥ maghavanmukhāḥ || 56 ||
[Analyze grammar]