Chapter 42

[English text for this chapter is available]

dvicatvāriṃśattamo'dhyāyaḥ |
sakhya ūcuḥ |
sudevā kā tvayā proktā kimācārā vadasva naḥ |
tvayā proktaṃ mahābhāge vada naḥ satyameva ca || 1 ||
[Analyze grammar]

sukalovāca |
ayodhyāyāṃ mahārājaḥ sa āsīddharmakovidaḥ |
manuputro mahābhāgaḥ sarvadharmārthatatparaḥ || 2 ||
[Analyze grammar]

ikṣvākurnāma sarvajño devabrāhmaṇapūjakaḥ |
tasya bhāryā sadā puṇyā pativrataparāyaṇā || 3 ||
[Analyze grammar]

tayā sārddhaṃ yajedyajñaṃ tīrthāni vividhāni ca |
vedarājasya vīrasya kāśīśasya mahātmanaḥ || 4 ||
[Analyze grammar]

sudevā nāma vai kanyā satyācāraparāyaṇā |
upayeme mahārāja ikṣvākustāṃ mahīpatiḥ || 5 ||
[Analyze grammar]

sudevā cārusarvāṃgī satyavrataparāyaṇā |
tayā sārddhaṃ sa vai rājā janānāṃ puṇyanāyakaḥ || 6 ||
[Analyze grammar]

sa reme nṛpaśārdūlo nityaṃ ca priyayā tayā |
ekadā tu mahārājastayā sārddhaṃ vanaṃ yayau || 7 ||
[Analyze grammar]

gaṃgāraṇyaṃ samāsādya mṛgayāṃ krīḍate sadā |
siṃhānhatvā varāhāṃśca gajāṃśca mahiṣāṃstathā || 8 ||
[Analyze grammar]

krīḍamānasya tasyāgre varāhaśca samāgataḥ |
bahuśūkarayūthena putrapautrairalaṃkṛtaḥ || 9 ||
[Analyze grammar]

ekā ca śūkarī tasya priyāpārśve pratiṣṭhitā |
varāhaiḥ śūkaraistasya tameva parivāritā || 10 ||
[Analyze grammar]

dṛṣṭvā ca rājarājeṃdraṃ durjayaṃ mṛgayāratam |
parvatādhāramāśritya bhāryayā saha śūkaraḥ || 11 ||
[Analyze grammar]

tiṣṭhatyekaḥ suvīryeṇa putrānpautrāngurūñchiśūn |
jñātvā teṣāṃ mahārāja mṛgāṇāṃ kadanaṃ mahat || 12 ||
[Analyze grammar]

tānuvāca sutānpautrānbhāryāṃ tāṃ ca sa śūkaraḥ |
kośalādhipatirvīro manuputro mahābalaḥ || 13 ||
[Analyze grammar]

krīḍate mṛgayāṃ kāṃte mṛgānsaṃharate bahūn |
sa māṃ dṛṣṭvā mahārāja eṣyate nātra saṃśayaḥ || 14 ||
[Analyze grammar]

anyeṣāṃ lubdhakānāṃ me nāsti prāṇabhayaṃ dhruvam |
mamarūpaṃ nṛpo dṛṣṭvā kṣamāṃ naiva kariṣyati || 15 ||
[Analyze grammar]

harṣeṇa mahatāviṣṭo bāṇapāṇirdhanurddharaḥ |
śvabhiryukto mahātejā lubdhakaiḥ parivāritaḥ || 16 ||
[Analyze grammar]

priye kariṣyate ghātaṃ mamāpyevaṃ na saṃśayaḥ || 17 ||
[Analyze grammar]

śūkaryuvāca |
yadāyadā paśyasi lubdhakānbahūnmahāvane kāṃta samāyudhānbahūn |
etaistu putrairmamapautrakaiḥ samaṃ dūraṃ nu bho yāsi palāyamānaḥ || 18 ||
[Analyze grammar]

tyaktvā sudhairyaṃ balapauruṣaṃ mahanmahābhayenāpi viṣaṇṇacetanaḥ |
dṛṣṭvā nṛpeṃdraṃ puruṣottamottamaṃ karoṣi kiṃ kāṃta vadasvakāraṇam || 19 ||
[Analyze grammar]

tasyāstu vākyaṃ saniśamya kola uvāca tāṃ śūkararājauttaram |
yadarthabhītosmi sulubdhakātpriye dṛṣṭvā gato dūra niśamyaśūkarān || 20 ||
[Analyze grammar]

sulubdhakāḥ pāpakarāḥ śaṭhāḥ priye kurvaṃti pāpaṃ giridurgakaṃdare |
sadaiva duṣṭā bahupāpaciṃtakā jātāśca sarve paripāpināṃ kule || 21 ||
[Analyze grammar]

teṣāṃ hi hastānmaraṇādbibhemi mṛtopi yāsyāmi punaśca pāpam |
dūraṃ giriṃ parvatakaṃdaraṃ ca vrajāmi kāṃte apamṛtyubhītaḥ || 22 ||
[Analyze grammar]

ayaṃ hi puṇyo naranātha āgato viśvādhikaḥ keśavarūpa bhūpaḥ |
yuddhaṃ kariṣye samare mahātmanā sārddhaṃ priye pauruṣavikrameṇa || 23 ||
[Analyze grammar]

jeṣyāmi bhūpaṃ yadi svena tejasā bhokṣyāmi kīrtiṃ tvatulāṃ pṛthivyām |
tenāhato vīravareṇa saṃgare yāsyāmi lokaṃ madhusūdanasya || 24 ||
[Analyze grammar]

mamāṃgabhūtena palenamedasā tṛptiṃ parāṃ yāsyati bhūmināthaḥ |
tṛptā bhaviṣyaṃti sulokadevatā asmādayaṃcāgato vajrapāṇiḥ || 25 ||
[Analyze grammar]

asyaiva hastānmaraṇaṃ yadābhavellābhaśca me suṃdari kīrtiruttamā |
tasmādyaśo bhūmitale jagattraye vrajāmi lokaṃ madhusūdanasya || 26 ||
[Analyze grammar]

naivaṃ bhītosmi kṣubdhosmi gato'haṃ girisānuṣu |
pāpādbhīto gataḥ kāṃtedharmaṃ dṛṣṭvā sthitohyaham || 27 ||
[Analyze grammar]

na jāne pātakaṃ pūrvamanyajanmani cārjitam |
yenāhaṃ śaukarīṃ yoniṃ gato'haṃ pāpasaṃcayāt || 28 ||
[Analyze grammar]

kṣālayiṣyāmyahaṃ ghoraṃ pūrvapātakasaṃcayam |
bāṇodakairmahāghoraiḥ sutīkṣṇairniśitaiḥ śataiḥ || 29 ||
[Analyze grammar]

putrānpautrāṃstu vārāhi kanyāṃ kuṭuṃbabālakam |
giriṃ gaccha gṛhītvā tu mama mohamimaṃ tyaja || 30 ||
[Analyze grammar]

mamasnehaṃ parityajya harireṣa samāgataḥ |
asya hastātprayāsyāmi tadviṣṇoḥ paramaṃ padam || 31 ||
[Analyze grammar]

daivenāpi mamādyaiva svargadvāramanuttamam |
udghāṭitakapāṭaṃ tu yāsyāmi sumahādivam || 32 ||
[Analyze grammar]

sukalovāca |
tacchrutvā vacanaṃ tasya śūkarasya mahātmanaḥ |
uvāca tatpriyā sakhyaḥ sīdamānāṃtarā tadā || 33 ||
[Analyze grammar]

śūkaryuvāca |
yasminyūthe bhavānsvāmī putrapautrairalaṃkṛtaḥ |
mitraiśca bhrātṛbhiścaiva anyaiḥ svajanabāṃdhavaiḥ || 34 ||
[Analyze grammar]

tvayaivālaṃkṛto yūtho bhavatā pariśobhate |
tvāṃ vināyaṃ mahābhāga kīdṛgyūtho bhaviṣyati || 35 ||
[Analyze grammar]

tavaiva svabalenāpi garjamānāśca śūkarāḥ |
vicaraṃti girau kāṃta tanayā mama bālakāḥ || 36 ||
[Analyze grammar]

kaṃdānmūlānsubhakṣaṃti nirbhayāstava tejasā |
durgeṣu vanakuṃjeṣu grāmeṣu nagareṣu ca || 37 ||
[Analyze grammar]

na kurvaṃti bhayaṃ tīvraṃ siṃhānāmiha parvate |
manuṣyāṇāṃ mahābāho pālitāstava tejasā || 38 ||
[Analyze grammar]

tvayā tyaktā amī sarve bālakā mama dārakāḥ |
dīnāścaivākulāścaiva bhaviṣyaṃti vicetanāḥ || 39 ||
[Analyze grammar]

nityameva sukhaṃ vartma gatvā paśyaṃti bālakāḥ |
patihīnā yathā nārī śobhate naiva śobhanā || 40 ||
[Analyze grammar]

alaṃkṛtā yathā divyairalaṃkāraiḥ sakāṃcanaiḥ |
paricchadai ratnavastraiḥ pitṛmātṛsahodaraiḥ || 41 ||
[Analyze grammar]

śvaśrūśvaśurakaiścānyaiḥ patihīnā na bhāti sā |
caṃdrahīnā yathā rātrī putrahīnaṃ yathā kulam || 42 ||
[Analyze grammar]

dīpahīnaṃ yathā gehaṃ naiva bhāti kadācana |
tvāṃ vināyaṃ tathā yūtho naiva śobheta mānada || 43 ||
[Analyze grammar]

ācāreṇa vinā martyo jñānahīno yatiryathā |
maṃtrahīno yathā rājā tathāyaṃ naiva śobhate || 44 ||
[Analyze grammar]

kaivartena vinā naurvā saṃpūrṇā parisāgare |
na bhātyevaṃ yathā sārthaḥ sārthavāhena vai vinā || 45 ||
[Analyze grammar]

senādhyakṣeṇa ca vinā yathā sainyaṃ na bhāti ca |
tvāṃ vinā vai tathā sainyaṃ śūkarāṇāṃ mahāmate || 46 ||
[Analyze grammar]

dīno bhaviṣyati tathā vedahīno yathā dvijaḥ |
mayi bhāraṃ kuṭuṃbasya viniveśya pragacchasi || 47 ||
[Analyze grammar]

maraṇaṃ sulabhaṃ jñātvā kā pratijñā tavedṛśī |
tvāṃ vināhaṃ na śaknomi dhartuṃ prāṇānpriyeśvara || 48 ||
[Analyze grammar]

tvayaiva sahitā svargaṃ bhūmiṃ vātha mahāmate |
narakaṃ vāpi bhokṣyāmi satyaṃsatyaṃ vadāmyaham || 49 ||
[Analyze grammar]

tvaṃ vā putrāṃstupautrāṃstu gṛhītvā yūthamuttamam |
āvāṃ vrajāva yūtheśa durgamevaṃ sukaṃdaram || 50 ||
[Analyze grammar]

jīvitavyaṃ parityajya raṇāya parigamyate |
tatra ko dṛśyate lābho maraṇe vada sāṃpratam || 51 ||
[Analyze grammar]

vārāha uvāca |
vīrāṇāṃ tvaṃ na jānāsi sudharmaṃ śṛṇu sāṃpratam |
yuddhārthinā hi vīreṇa vīraṃ gatvā prayācitam || 52 ||
[Analyze grammar]

dehi me yodhanaṃ saṃkhye yuddhārthyahaṃ samāgataḥ |
pareṇa yācitaṃ yuddhaṃ na dadāti yadā naraḥ || 53 ||
[Analyze grammar]

kāmāllobhādbhayādvāpi mohādvā śṛṇu vallabhe |
kuṃbhīpāke tu narake vasedyugasahasrakam || 54 ||
[Analyze grammar]

kṣatriyāṇāṃ paro dharmo yuddhaṃ deyaṃ na saṃśayaḥ |
tadyuddhaṃ dīyamānena raṇabhūmigatena vai || 55 ||
[Analyze grammar]

nirjitaṃ tu paraṃ tatra yaśaḥkīrttiṃ prabhuṃjate |
sa vā hato yudhyamānaḥ pauruṣeṇātinirbhayaḥ || 56 ||
[Analyze grammar]

vīralokamavāpnoti divyānbhogānprabhuṃjate |
yāvadvarṣasahasrāṇāṃ viṃśatyekāṃ priye śṛṇu || 57 ||
[Analyze grammar]

vīraloke vasettāvaddevācārairmahīyate |
manuputraḥ samāyāta ayaṃ vīro na saṃśayaḥ || 58 ||
[Analyze grammar]

saṃgrāmaṃ yācamānastu yuddhaṃ deyaṃ mayā dhruvam |
yuddhātithiḥ samāyāto viṣṇurūpaḥ sanātanaḥ || 59 ||
[Analyze grammar]

satkāro yuddharūpeṇa kartavyaśca mayā śubhe |
śūkaryuvāca |
yadā yuddhaṃ tvayā deyaṃ rājñe caiva mahātmane || 60 ||
[Analyze grammar]

tato'haṃ pauruṣaṃ kāṃta paśyāmi tava kīdṛśam |
evamuktvā priyānputrānsamāhūya tvarānvitā || 61 ||
[Analyze grammar]

uvāca putrakā yūyaṃ śṛṇudhvaṃ vacanaṃ mama |
yuddhātithiḥ samāyāto viṣṇurūpaḥ sanātanaḥ || 62 ||
[Analyze grammar]

mayā tatra pragaṃtavyaṃ yatrāyaṃ hi gamiṣyati |
yāvattiṣṭhati vai nātho bhavatāṃ pratipālakaḥ || 63 ||
[Analyze grammar]

yūyaṃ gacchata vai dūraṃ durgaṃ giriguhāmukham |
sukhaṃ jīvata me vatsā varjayitvā sulubdhakān || 64 ||
[Analyze grammar]

mayā tatraiva gaṃtavyaṃ yatraiṣa hi gamiṣyati |
bhavatāṃ śreṣṭho'yaṃ bhrātā yūtharakṣāṃ kariṣyati || 65 ||
[Analyze grammar]

ete pitṛvyakāḥ sarve bhavatāṃ trāṇakārakāḥ |
dūraṃ prayāta vai sarve māṃ vihāya suputrakāḥ || 66 ||
[Analyze grammar]

putrā ūcuḥ |
ayaṃ hi parvataśreṣṭho bahumūlaphalodakaḥ |
bhayaṃ tu kasya vai nāsti sukhaṃ jīvanamasti vai || 67 ||
[Analyze grammar]

yuvābhyāṃ hi akasmādvai idamuktaṃ bhayaṃkaram |
tanno hi kāraṇaṃ mātarvada satyamihaiva hi || 68 ||
[Analyze grammar]

śūkaryuvāca |
ayaṃ rājā mahāraudraḥ kālarūpaḥ samāgataḥ |
krīḍate mṛgayā lubdho mṛgānhatvā bahūnvane || 69 ||
[Analyze grammar]

ikṣvākurnāma durdharṣo manuputro mahābalaḥ |
saṃhariṣyati kālo'yaṃ dūraṃ yāta suputrakāḥ || 70 ||
[Analyze grammar]

putrā ūcuḥ |
mātaraṃ pitaraṃ tyaktvā yaḥ prayāti sa pāpadhīḥ |
mahāraudraṃ sughoraṃ tu narakaṃ pratipadyate || 71 ||
[Analyze grammar]

mātuḥ puṇyaṃ payaḥ pītvā puṣṭo bhavati nirghṛṇaḥ |
mātaraṃ pitaraṃ tyaktvā yaḥ prayāti sudurbalaḥ || 72 ||
[Analyze grammar]

pūyaṃ narakametīha kṛmidurgaṃdhasaṃkulam |
mātustasmānna yāsyāmo guruṃ tyaktvā ihaiva ca || 73 ||
[Analyze grammar]

evaṃ viṣādaḥ saṃjātasteṣāṃ dharmārthasaṃyutaḥ |
vyūhaṃ kṛtvā sthitāḥ sarve balatejaḥ samākulāḥ || 74 ||
[Analyze grammar]

sāhasotsāhasaṃpannāḥ paśyaṃti nṛpanaṃdanam |
nadaṃtaḥ pauruṣairyuktāḥ krīḍamānā vane tadā || 75 ||
[Analyze grammar]

iti śrīpadmapurāṇe bhūmikhaṃḍe venopākhyāne sukalācaritre |
dvicatvāriṃśattamo'dhyāyaḥ || 42 ||
[Analyze grammar]