Chapter 43

[English text for this chapter is available]

sukalovāca |
evaṃ te śūkarāḥ sarve yuddhāya samupasthitāḥ |
puraḥ sthitasya te rājño hyavatasthuśca lubdhakāḥ || 1 ||
[Analyze grammar]

mahāvarāho rājeṃdra girisānuṃ samāśritaḥ |
mahatā yūthabhāvena vyūhaṃ kṛtvā pratiṣṭhati || 2 ||
[Analyze grammar]

kapilaḥ sthūlapīnāṃgo mahādaṃṣṭro mahāmukhaḥ |
duḥsahaḥ śūkaro rājangarjate cātibhairavam || 3 ||
[Analyze grammar]

tānapaśyanmahārājaḥ śālatālavanāśrayān |
teṣāṃ tadvacanaṃ śrutvā manuputraḥ pratāpavān || 4 ||
[Analyze grammar]

gṛhyatāṃ śūra vārāho vidhyatāṃ baladarpitaḥ |
evamābhāṣya tānvīro manuputraḥ pratāpavān || 5 ||
[Analyze grammar]

atha te lubdhakāḥ sarve mṛgayā madamohitāḥ |
saṃnaddhā daṃśitāḥ sarve śvabhiḥ sārddhaṃ prajagmire || 6 ||
[Analyze grammar]

harṣeṇa mahatāviṣṭo rājarājo mahābalaḥ |
aśvārūḍhaḥ susainyena caturaṃgeṇa saṃyataḥ || 7 ||
[Analyze grammar]

gaṃgātīraṃ samāyāto merau girivarottame |
ratnadhātusamākīrṇe nānāvṛkṣairalaṃkṛte || 8 ||
[Analyze grammar]

sukalovāca |
yo baladhāma marīcicayakaranikaramayaprottuṃgo'tyuccam |
gaganameva saṃprāpto nānā nagācaritaśobho girirājo bhāti || 9 ||
[Analyze grammar]

yojanabahalavimala gaṃgāpravāha samuccarattīravīcītaraṃgabhaṃgairmuktāphalasadṛśairnirmalāṃbukaṇaiḥ |
sarvatra prakṣālita dhavalatalaśilātalogirīṃdra suḥśriyāyuktaḥ || 10 ||
[Analyze grammar]

devaiścāraṇakinnaraiḥ parivṛto gaṃdharvavidyādharaiḥ siddhairapsarasāṃgaṇairmunijanairnāgeṃdra vidyādharaiḥ |
śrīkhaṃḍairbahucaṃdanaissasaralaiḥ śālaistamālairgirī rudrā kṣairvarasiddhidāyakaghanaiḥ kalpadrumaiḥ śobhate || 11 ||
[Analyze grammar]

nānādhātuvicitro vai nānāratnavicitritaiḥ |
vimānaiḥ kāṃcanairdaṃḍaiḥ kalatrairupaśobhate || 12 ||
[Analyze grammar]

nālikeravanairdivyaiḥ pūgavṛkṣairvirājate |
divyapunnāgabakulaiḥ kadalīkhaṃḍamaṃḍitaiḥ || 13 ||
[Analyze grammar]

puṣpakaiścaṃpakairadri pāḥṭalaiḥ ketakaistathā |
nānāvallīvitānaiśca puṣpitaiḥ padmakaistathā || 14 ||
[Analyze grammar]

nānāvarṇaiḥ supuṣpaiśca nānāvṛkṣairalaṃkṛtaḥ |
divyavṛkṣaiḥ samākīrṇaḥ sphāṭikasya śilātalaiḥ || 15 ||
[Analyze grammar]

yogiyogīndra saṃsiddhaiḥ kaṃdarāṃtarnivāsibhiḥ |
nirjharaiścaiva ramyaiśca bahuprasravaṇairgiriḥ || 16 ||
[Analyze grammar]

nadīpravāhasaṃhraṣṭaiḥ saṃgamairupaśobhate |
hradaiśca palvalaiḥ kuṃḍairnirmalodakadhāribhiḥ || 17 ||
[Analyze grammar]

girirājo vibhātyekaḥ sānubhiḥ saha saṃsthitaiḥ |
śarabhaiścaiva śārdūlairmṛgayūthairalaṃkṛtaḥ || 18 ||
[Analyze grammar]

mahāmattaiśca mātaṃgairmahiṣairurubhiḥ sadā |
anekairdivyabhāvaiśca girirājo vibhāti saḥ || 19 ||
[Analyze grammar]

ayodhyādhipatirvīra ikṣvākurmanunaṃdanaḥ |
tayā subhāryayā yuktaścaturaṃgabalena ca || 20 ||
[Analyze grammar]

purato lubdhakā yāṃti śūrāḥ śvānaśca śīghragāḥ |
yatrāste śūkaraḥ śūro bhāryayā sahito balī || 21 ||
[Analyze grammar]

bahubhiḥ śūkarairgupto gurubhiḥ śiśubhistataḥ |
merubhūmiṃ samāśritya gaṃgātīraṃ samaṃtataḥ || 22 ||
[Analyze grammar]

sukalovāca |
tāmuvāca varāhastu supriyāṃ harṣasaṃyutaḥ |
priye paśya samāyātaḥ kośalādhipatirbalī || 23 ||
[Analyze grammar]

māmuddiśya mahāprājño mṛgayāṃ krīḍate nṛpaḥ |
yuddhameva kariṣyāmi surāsurapraharṣakam || 24 ||
[Analyze grammar]

atha bhūpo mahātejā bāṇapāṇirdhanurdharaḥ |
sudevāṃ satyadharmāṃgīṃ tāmuvāca praharṣitaḥ || 25 ||
[Analyze grammar]

paśya priye mahākolaṃ garjamānaṃ mahābalam |
parivārasamāyuktaṃ duḥsahaṃ mṛgaghātibhiḥ || 26 ||
[Analyze grammar]

adyaivāhaṃ haniṣyāmi subāṇairniśitaiḥ priye |
māmeva hi mahāśūro yuddhāya samupāśrayet || 27 ||
[Analyze grammar]

evamuktvā priyo bhāryāṃ lubdhakānvākyamabravīt |
yathā śūro mahāśūrāḥ preṣayadhvaṃ hi śūkaram || 28 ||
[Analyze grammar]

atha te preṣitāḥ śūrā balatejaḥ parākramāḥ |
garjamānāḥ pradhāvaṃti balatejaḥ parākramāḥ || 29 ||
[Analyze grammar]

kolaṃ pratigatāḥ sarve vāyuvegena sāṃpratam |
vidhyaṃti bāṇajālaiste niśitairvanacārakāḥ || 30 ||
[Analyze grammar]

nānā śastrairathāstraiśca vārāhaṃ vīrarūpiṇam || 31 ||
[Analyze grammar]

sukalovāca |
pataṃti bāṇatomarā vimuktā lubdhakaiḥ śarā ghanāgiriṃpravarṣiṇo yathātathā dharāṃtare |
hato dṛḍhaprahāribhiḥ sa nirjitastatastathā śataistu yūthapālakaḥ sa kolaḥ saṃgaraṃgataḥ || 32 ||
[Analyze grammar]

svaputrapautrabāṃdhavaiḥ parāṃśca saṃharetsa vai pataṃti te svadaṃṣṭrayā hatāhave'valubdhakāḥ |
pataṃti pādahastakāḥ sthitasya vegabhrāmaṇaiḥ salubdhagarjamevataṃ varāho'paśyadāgatam || 33 ||
[Analyze grammar]

svatejasā vināśitaṃ mukhāgradaṃṣṭrayā hataṃ |
gataḥ sa yatra bhūpatiḥ sa vāṃchatenasaṃgaram || 34 ||
[Analyze grammar]

ikṣvākunāthaṃ sumahatprasahya saṃtrāsya kruddhaḥ sa hi śūkareśaḥ |
yuddhaṃ vane vāṃchati tena sārddhamikṣvākuṇā saṃgaraharṣayuktaḥ || 35 ||
[Analyze grammar]

vārāhaḥ punareva yuddhakuśalaḥ saṃvāṃchate saṃgaraṃ tuṃḍāgreṇa sutīkṣṇadaṃtanakharaiḥ kruddho dharāṃ kṣobhayan |
huṃkāroccāragarvātpraharati vimalaṃ bhūpatiṃ taṃ ca rājañjñātvā viṣṇuparākramaṃ manusutastvānandaromāṃcitaḥ || 36 ||
[Analyze grammar]

dṛṣṭvā śūkarapauruṣaṃ yamatulaṃ mene patirvāvarāḍdevāriṃ manasā vicintya sahasā vārāharūpeṇa vai |
saṃprekṣyaiva mahābalaṃ bahutaraṃ yuktaṃ tvarervāraṇaṃ sainyaṃ kolavināśanāya sahasā saṃgṛhya saṃgṛhyatām || 37 ||
[Analyze grammar]

preṣitāśca vāraṇā rathāśca vegavattarāḥ subāṇakhaḍgadhāriṇo bhuśuṃḍibhiśca mudgaraiḥ |
sapāśapāṇilubdhakā nadaṃti tatra tatparā nivārito na tiṣṭhato hayāgajāśca yadgatāḥ || 38 ||
[Analyze grammar]

kvacitkvacinna dṛśyate kvacitkvacitpradṛśyate kvacidbhayaṃ pradarśayetkvaciddhayānpramardayet || 39 ||
[Analyze grammar]

mardayitvā bhaṭānvīrānvārāho raṇadurjayaḥ |
śabdaṃ cakāradurdhaṣaṃ krodhāruṇavilocanaḥ || 40 ||
[Analyze grammar]

kośalādhipatirvīrastaṃ dṛṣṭvā raṇadurjayam |
yudhyamānaṃ mahākāyaṃ mucaṃtaṃ meghavatsvanam || 41 ||
[Analyze grammar]

garjatisamaraṃ vicarati vilasati vīrānsvatejasā dhīraḥ |
taḍidiva mukheṣu daṃṣṭrā tasya vibhātyullasatyeva || 42 ||
[Analyze grammar]

manuputrastathā dṛṣṭvā kolaṃ ca niśitaiḥ śaraiḥ |
pratibhinnamekaikaṃ śastrāhataṃ ca baṃdhubhiḥ || 43 ||
[Analyze grammar]

narapatiruvāca sainyāḥ kimiha na gṛhṇaṃtu ojasā śūrāḥ |
yudhyadhvaṃ tatra niśitairbāṇaistīkṣṇairanenāpi || 44 ||
[Analyze grammar]

samākarṇya tato vākyaṃ kruddhasyāpi mahātmanaḥ |
tataste sainikāḥ sarve yuddhāya samupasthitāḥ || 45 ||
[Analyze grammar]

anekairbhaṭasāhasrairvane taṃ samare sthitam |
dikṣu sarvāsu saṃhatya bibhiduḥ śūkaraṃ raṇe || 46 ||
[Analyze grammar]

viddhaśca kaiścittadā bāṇajālaiḥ suyodhaiśca saṃgrāmabhūmau viśālaiḥ |
kvaciccakraghātaiḥ kvacidvajrapātairhataṃ durjayaṃ saṃgare taṃ mahāṃtaiḥ || 47 ||
[Analyze grammar]

tataḥ pauruṣaiḥ krodhayuktaḥ sa kolaḥ suvicchidya pāśānraṇe prasthitaḥ saḥ |
mahāśūkaraiḥ sārdhameva prayātastataḥ śoṇitasyāpi dhārābhiṣiktaḥ || 48 ||
[Analyze grammar]

karoti prahāraṃ ca tuṃḍena vīrahayānāṃ dvipānāṃ ca ciccheda vīraḥ |
svadaṃṣṭrāgrabhāgena tīkṣṇena vīrānpadātīnhi saṃpātayedroṣabhāvaiḥ || 49 ||
[Analyze grammar]

jaghānāsya śuṃḍaṃ gajasyāpi ruṣṭo bhaṭānhatānpādanakhaistu hṛṣṭaḥ || 50 ||
[Analyze grammar]

tataste śūkarāḥ sarve lubdhakāśca parasparam |
yuyudhuḥ saṃgaraṃ kṛtvā krodhāruṇavilocanāḥ || 51 ||
[Analyze grammar]

lubdhakaiśca hatāḥ kolāḥ kolaiścāpi sulubdhakāḥ |
nihatāḥ patitā bhūmau kṣatajenāpi sāruṇāḥ || 52 ||
[Analyze grammar]

jīvaṃ tyaktvā hatāḥ kolairlubdhakāḥ patitā raṇe |
mṛtāśca śūkarāstatra śvānaḥ prāṇāṃśca tatyajuḥ || 53 ||
[Analyze grammar]

yatrayatra mṛtā bhūmau patitā mṛgaghātakāḥ |
bahavaḥ śūkarā rājñā khaḍgapātairnipātitāḥ || 54 ||
[Analyze grammar]

kati naṣṭā hatāḥ kolā bhītā durgeṣu saṃsthitāḥ |
kuṃjeṣu kaṃdarāṃteṣu guhāṃteṣu nṛpottama || 55 ||
[Analyze grammar]

lubdhakāśca mṛtāḥ kecicchinnā daṃṣṭrāgrasūkaraiḥ |
prāṇāṃstyaktvā gatāḥ svargaṃ khaṃḍaśo vidalīkṛtāḥ || 56 ||
[Analyze grammar]

vāgurāḥ pāśajālāśca kuṭakāḥ paṃjarāstathā |
nāḍyaśca patitā bhūmau yatratatra samaṃtataḥ || 57 ||
[Analyze grammar]

eko dayitayā sārdhaṃ vārāhaḥ paritiṣṭhati |
pautrakaiḥ paṃcasaptabhiryuddhārthaṃ baladarpitaḥ || 58 ||
[Analyze grammar]

tamuvāca tadā kāṃtaṃ śūkaraṃ śūkarī punaḥ |
gaccha kāṃta mayāsārddhamebhistu bālakaiḥ saha || 59 ||
[Analyze grammar]

prāha prīto varāhastāṃ vivastāṃ supriyāmiti |
kva gacchāmi prabhagnohaṃ sthānaṃ nāsti mahītale || 60 ||
[Analyze grammar]

mayi naṣṭe mahābhāge kolayūthaṃ vinaṃkṣyati |
dvayośca siṃhayormadhye jalaṃ pibati śūkaraḥ || 61 ||
[Analyze grammar]

dvayoḥ śūkarayormadhye siṃho naiva pibatyapaḥ |
evaṃ śūkarajātīṣu dṛśyate balamuttamam || 62 ||
[Analyze grammar]

tadahaṃ nāśayāmyeva yadā bhagno vrajāmyaham |
jāne dharmaṃ mahābhāge bahuśreyovidhāyakam || 63 ||
[Analyze grammar]

kasmāllobhādbhayādvāpi yudhyamānaḥ praṇaśyati |
raṇatīrthaṃ parityajya sasyātpāpī na saṃśayaḥ || 64 ||
[Analyze grammar]

niśitaṃ śastrasaṃvyūhaṃ dṛṣṭvā harṣaṃ pragacchati |
avagāhyāmarīṃ siṃdhuṃ tīrthapāraṃ pragacchati || 65 ||
[Analyze grammar]

sa yāti vaiṣṇavaṃ lokaṃ puruṣāṃśca samuddharet |
samāyāṃtaṃ ca tadahaṃ kathaṃ bhagno vrajāmi vai || 66 ||
[Analyze grammar]

yodhanaṃ śastrasaṃkīrṇaṃ pravīrānandadāyakam |
dṛṣṭvā prayāti saṃhṛṣṭastasya puṇyaphalaṃ śṛṇu || 67 ||
[Analyze grammar]

padepade mahatsnānaṃ bhāgīrathyāḥ prajāyate |
raṇādbhagno gṛhaṃ yāti yo lobhācca priye śṛṇu || 68 ||
[Analyze grammar]

mātṛdoṣaṃ prakāśeta strījātaḥ parikathyate |
atra yajñāśca tīrthāśca atra devā mahaujasaḥ || 69 ||
[Analyze grammar]

paśyaṃti kautukaṃ kāṃte munayaḥ siddhacāraṇāḥ |
trailokyaṃ vartate tatra yatra vīraprakāśanam || 70 ||
[Analyze grammar]

samarādbhagnaṃ prapaśyaṃti sarve trailokyavāsinaḥ |
śapaṃti nirghṛṇaṃ pāpaṃ prahasanti punaḥpunaḥ || 71 ||
[Analyze grammar]

durgatiṃ darśayettasya dharmarājo na saṃśayaḥ |
sammukhaḥ samare yuddhe svaśiraḥ śoṇitaṃ pibet || 72 ||
[Analyze grammar]

aśvamedhaphalaṃ bhuṃkte iṃdralokaṃ pragacchati |
yadā jayati saṃgrāme śatrūñchūro varānane || 73 ||
[Analyze grammar]

tadā prabhuṃjate lakṣmīṃ nānābhogānna saṃśayaḥ |
yadā tatra tyajetprāṇānsammukhaḥ sannirāśrayaḥ || 74 ||
[Analyze grammar]

sa gacchetparamaṃ sthānaṃ devakanyāṃ prabhuṃjate |
evaṃ dharmaṃ vijānāmi kathaṃ bhagno vrajāmyaham || 75 ||
[Analyze grammar]

anena samare yuddhaṃ kariṣye nātra saṃśayaḥ |
manoḥ putreṇa dhīreṇa rājñā ikṣvākuṇā saha || 76 ||
[Analyze grammar]

ḍiṃbhāngṛhītvā yāhi tvaṃ sukhaṃ jīva varānane |
tasya śrutvā vacaḥ prāha baddhāhaṃ tava baṃdhanaiḥ || 77 ||
[Analyze grammar]

snehamānarasākhyaiśca ratikrīḍanakaiḥ priya |
purataste sutaiḥ sārddhaṃ prāṇāṃstyakṣyāmi mānada || 78 ||
[Analyze grammar]

evametau susaṃbhāṣya parasparahitaiṣiṇau |
yuddhāya niścitau bhūtvā samālokayato ripūn || 79 ||
[Analyze grammar]

kośalādhipatiṃ vīraṃ tamikṣvākuṃ mahāmatim || 80 ||
[Analyze grammar]

yathaiva meghaḥ parigarjate divi prāvṛṭsukāleṣu taḍitprakāśaiḥ |
tathaiva saṃgarjati kāṃtayā samaṃ samāhvayedrājavaraṃ khurāgraiḥ || 81 ||
[Analyze grammar]

taṃ garjamānaṃ dadṛśe mahātmā vārāhamekaṃ puruṣārthayuktam |
sasāra aśvasya javenayuktaḥ sasammukhaṃ tasya nṛvīradhīraḥ || 82 ||
[Analyze grammar]

iti śrīpadmapurāṇe bhūmikhaṃḍe venopākhyāne sukalācaritre |
trayaścatvāriṃśattamo'dhyāyaḥ || 43 ||
[Analyze grammar]