Chapter 83

bhīṣma uvāca |
eṣā prathamato vṛttirdvitīyāṃ śṛṇu bhārata |
yaḥ kaścijjanayedarthaṃ rājñā rakṣyaḥ sa mānavaḥ || 1 ||
[Analyze grammar]

hriyamāṇamamātyena bhṛto vā yadi vābhṛtaḥ |
yo rājakośaṃ naśyantamācakṣīta yudhiṣṭhira || 2 ||
[Analyze grammar]

śrotavyaṃ tasya ca raho rakṣyaścāmātyato bhavet |
amātyā hyupahantāraṃ bhūyiṣṭhaṃ ghnanti bhārata || 3 ||
[Analyze grammar]

rājakośasya goptāraṃ rājakośavilopakāḥ |
sametya sarve bādhante sa vinaśyatyarakṣitaḥ || 4 ||
[Analyze grammar]

atrāpyudāharantīmamitihāsaṃ purātanam |
muniḥ kālakavṛkṣīyaḥ kausalyaṃ yaduvāca ha || 5 ||
[Analyze grammar]

kosalānāmādhipatyaṃ saṃprāpte kṣemadarśini |
muniḥ kālakavṛkṣīya ājagāmeti naḥ śrutam || 6 ||
[Analyze grammar]

sa kākaṃ pañjare baddhvā viṣayaṃ kṣemadarśinaḥ |
pūrvaṃ paryacaradyuktaḥ pravṛttyarthī punaḥ punaḥ || 7 ||
[Analyze grammar]

adhīye vāyasīṃ vidyāṃ śaṃsanti mama vāyasāḥ |
anāgatamatītaṃ ca yacca saṃprati vartate || 8 ||
[Analyze grammar]

iti rāṣṭre paripatanbahuśaḥ puruṣaiḥ saha |
sarveṣāṃ rājayuktānāṃ duṣkṛtaṃ paripṛṣṭavān || 9 ||
[Analyze grammar]

sa buddhvā tasya rāṣṭrasya vyavasāyaṃ hi sarvaśaḥ |
rājayuktāpacārāṃśca sarvānbuddhvā tatastataḥ || 10 ||
[Analyze grammar]

tameva kākamādāya rājānaṃ draṣṭumāgamat |
sarvajño'smīti vacanaṃ bruvāṇaḥ saṃśitavrataḥ || 11 ||
[Analyze grammar]

sa sma kausalyamāgamya rājāmātyamalaṃkṛtam |
prāha kākasya vacanādamutredaṃ tvayā kṛtam || 12 ||
[Analyze grammar]

asau cāsau ca jānīte rājakośastvayā hṛtaḥ |
evamākhyāti kāko'yaṃ tacchīghramanugamyatām || 13 ||
[Analyze grammar]

tathānyānapi sa prāha rājakośaharānsadā |
na cāsya vacanaṃ kiṃcidakṛtaṃ śrūyate kvacit || 14 ||
[Analyze grammar]

tena viprakṛtāḥ sarve rājayuktāḥ kurūdvaha |
tamatikramya suptasya niśi kākamapothayan || 15 ||
[Analyze grammar]

vāyasaṃ tu vinirbhinnaṃ dṛṣṭvā bāṇena pañjare |
pūrvāhṇe brāhmaṇo vākyaṃ kṣemadarśinamabravīt || 16 ||
[Analyze grammar]

rājaṃstvāmabhayaṃ yāce prabhuṃ prāṇadhaneśvaram |
anujñātastvayā brūyāṃ vacanaṃ tvatpuro hitam || 17 ||
[Analyze grammar]

mitrārthamabhisaṃtapto bhaktyā sarvātmanā gataḥ |
ayaṃ tavārthaṃ harate yo brūyādakṣamānvitaḥ || 18 ||
[Analyze grammar]

saṃbubodhayiṣurmitraṃ sadaśvamiva sārathiḥ |
atimanyuprasakto hi prasajya hitakāraṇam || 19 ||
[Analyze grammar]

tathāvidhasya suhṛdaḥ kṣantavyaṃ saṃvijānatā |
aiśvaryamicchatā nityaṃ puruṣeṇa bubhūṣatā || 20 ||
[Analyze grammar]

taṃ rājā pratyuvācedaṃ yanmā kiṃcidbhavānvadet |
kasmādahaṃ na kṣameyamākāṅkṣannātmano hitam || 21 ||
[Analyze grammar]

brāhmaṇa pratijānīhi prabrūhi yadi cecchasi |
kariṣyāmi hi te vākyaṃ yadyanmāṃ vipra vakṣyasi || 22 ||
[Analyze grammar]

muniruvāca |
jñātvā nayānapāyāṃśca bhṛtyataste bhayāni ca |
bhaktyā vṛttiṃ samākhyātuṃ bhavato'ntikamāgamam || 23 ||
[Analyze grammar]

prāgevoktaśca doṣo'yamācāryairnṛpasevinām |
agatīkagatirhyeṣā yā rājñā saha jīvikā || 24 ||
[Analyze grammar]

āśīviṣaiśca tasyāhuḥ saṃgataṃ yasya rājabhiḥ |
bahumitrāśca rājāno bahvamitrāstathaiva ca || 25 ||
[Analyze grammar]

tebhyaḥ sarvebhya evāhurbhayaṃ rājopasevinām |
athaiṣāmekato rājanmuhūrtādeva bhīrbhavet || 26 ||
[Analyze grammar]

naikāntenāpramādo hi kartuṃ śakyo mahīpatau |
na tu pramādaḥ kartavyaḥ kathaṃcidbhūtimicchatā || 27 ||
[Analyze grammar]

pramādāddhi skhaledrājā skhalite nāsti jīvitam |
agniṃ dīptamivāsīdedrājānamupaśikṣitaḥ || 28 ||
[Analyze grammar]

āśīviṣamiva kruddhaṃ prabhuṃ prāṇadhaneśvaram |
yatnenopacarennityaṃ nāhamasmīti mānavaḥ || 29 ||
[Analyze grammar]

durvyāhṛtācchaṅkamāno duṣkṛtādduradhiṣṭhitāt |
durāsitāddurvrajitādiṅgitādaṅgaceṣṭitāt || 30 ||
[Analyze grammar]

devateva hi sarvārthānkuryādrājā prasāditaḥ |
vaiśvānara iva kruddhaḥ samūlamapi nirdahet |
iti rājanmayaḥ prāha vartate ca tathaiva tat || 31 ||
[Analyze grammar]

atha bhūyāṃsamevārthaṃ kariṣyāmi punaḥ punaḥ |
dadātyasmadvidho'mātyo buddhisāhāyyamāpadi || 32 ||
[Analyze grammar]

vāyasaścaiva me rājannantakāyābhisaṃhitaḥ |
na ca me'tra bhavāngarhyo na ca yeṣāṃ bhavānpriyaḥ |
hitāhitāṃstu budhyethā mā parokṣamatirbhava || 33 ||
[Analyze grammar]

ye tvādānaparā eva vasanti bhavato gṛhe |
abhūtikāmā bhūtānāṃ tādṛśairme'bhisaṃhitam || 34 ||
[Analyze grammar]

ye vā bhavadvināśena rājyamicchantyanantaram |
antarairabhisaṃdhāya rājansidhyanti nānyathā || 35 ||
[Analyze grammar]

teṣāmahaṃ bhayādrājangamiṣyāmyanyamāśramam |
tairhi me saṃdhito bāṇaḥ kāke nipatitaḥ prabho || 36 ||
[Analyze grammar]

chadmanā mama kākaśca gamito yamasādanam |
dṛṣṭaṃ hyetanmayā rājaṃstapodīrgheṇa cakṣuṣā || 37 ||
[Analyze grammar]

bahunakrajhaṣagrāhāṃ timiṃgilagaṇāyutām |
kākena baḍiśenemāmatārṣaṃ tvāmahaṃ nadīm || 38 ||
[Analyze grammar]

sthāṇvaśmakaṇṭakavatīṃ vyāghrasiṃhagajākulām |
durāsadāṃ duṣpraveśāṃ guhāṃ haimavatīmiva || 39 ||
[Analyze grammar]

agninā tāmasaṃ durgaṃ naubhirāpyaṃ ca gamyate |
rājadurgāvataraṇe nopāyaṃ paṇḍitā viduḥ || 40 ||
[Analyze grammar]

gahanaṃ bhavato rājyamandhakāratamovṛtam |
neha viśvasituṃ śakyaṃ bhavatāpi kuto mayā || 41 ||
[Analyze grammar]

ato nāyaṃ śubho vāsastulye sadasatī iha |
vadho hyevātra sukṛte duṣkṛte na ca saṃśayaḥ || 42 ||
[Analyze grammar]

nyāyato duṣkṛte ghātaḥ sukṛte syātkathaṃ vadhaḥ |
neha yuktaṃ ciraṃ sthātuṃ javenāto vrajedbudhaḥ || 43 ||
[Analyze grammar]

sītā nāma nadī rājanplavo yasyāṃ nimajjati |
tathopamāmimāṃ manye vāgurāṃ sarvaghātinīm || 44 ||
[Analyze grammar]

madhuprapāto hi bhavānbhojanaṃ viṣasaṃyutam |
asatāmiva te bhāvo vartate na satāmiva |
āśīviṣaiḥ parivṛtaḥ kūpastvamiva pārthiva || 45 ||
[Analyze grammar]

durgatīrthā bṛhatkūlā karīrīvetrasaṃyutā |
nadī madhurapānīyā yathā rājaṃstathā bhavān |
śvagṛdhragomāyuyuto rājahaṃsasamo hyasi || 46 ||
[Analyze grammar]

yathāśritya mahāvṛkṣaṃ kakṣaḥ saṃvardhate mahān |
tatastaṃ saṃvṛṇotyeva tamatītya ca vardhate || 47 ||
[Analyze grammar]

tenaivopendhano nūnaṃ dāvo dahati dāruṇaḥ |
tathopamā hyamātyāste rājaṃstānpariśodhaya || 48 ||
[Analyze grammar]

bhavataiva kṛtā rājanbhavatā paripālitāḥ |
bhavantaṃ paryavajñāya jighāṃsanti bhavatpriyam || 49 ||
[Analyze grammar]

uṣitaṃ śaṅkamānena pramādaṃ parirakṣatā |
antaḥsarpa ivāgāre vīrapatnyā ivālaye |
śīlaṃ jijñāsamānena rājñaśca sahajīvinā || 50 ||
[Analyze grammar]

kaccijjitendriyo rājā kaccidabhyantarā jitāḥ |
kaccideṣāṃ priyo rājā kaccidrājñaḥ priyāḥ prajāḥ || 51 ||
[Analyze grammar]

jijñāsuriha saṃprāptastavāhaṃ rājasattama |
tasya me rocase rājankṣudhitasyeva bhojanam || 52 ||
[Analyze grammar]

amātyā me na rocante vitṛṣṇasya yathodakam |
bhavato'rthakṛdityeva mayi doṣo hi taiḥ kṛtaḥ |
vidyate kāraṇaṃ nānyaditi me nātra saṃśayaḥ || 53 ||
[Analyze grammar]

na hi teṣāmahaṃ drugdhastatteṣāṃ doṣavadgatam |
arerhi durhatādbheyaṃ bhagnapṛṣṭhādivoragāt || 54 ||
[Analyze grammar]

rājovāca |
bhūyasā paribarheṇa satkāreṇa ca bhūyasā |
pūjito brāhmaṇaśreṣṭha bhūyo vasa gṛhe mama || 55 ||
[Analyze grammar]

ye tvāṃ brāhmaṇa necchanti na te vatsyanti me gṛhe |
bhavataiva hi tajjñeyaṃ yadidānīmanantaram || 56 ||
[Analyze grammar]

yathā syādduṣkṛto daṇḍo yathā ca sukṛtaṃ kṛtam |
tathā samīkṣya bhagavañśreyase viniyuṅkṣva mām || 57 ||
[Analyze grammar]

muniruvāca |
adarśayannimaṃ doṣamekaikaṃ durbalaṃ kuru |
tataḥ kāraṇamājñāya puruṣaṃ puruṣaṃ jahi || 58 ||
[Analyze grammar]

ekadoṣā hi bahavo mṛdnīyurapi kaṇṭakān |
mantrabhedabhayādrājaṃstasmādetadbravīmi te || 59 ||
[Analyze grammar]

vayaṃ tu brāhmaṇā nāma mṛdudaṇḍāḥ kṛpālavaḥ |
svasti cecchāmi bhavataḥ pareṣāṃ ca yathātmanaḥ || 60 ||
[Analyze grammar]

rājannātmānamācakṣe saṃbandhī bhavato hyaham |
muniḥ kālakavṛkṣīya ityevamabhisaṃjñitaḥ || 61 ||
[Analyze grammar]

pituḥ sakhā ca bhavataḥ saṃmataḥ satyasaṃgaraḥ |
vyāpanne bhavato rājye rājanpitari saṃsthite || 62 ||
[Analyze grammar]

sarvakāmānparityajya tapastaptaṃ tadā mayā |
snehāttvāṃ prabravīmyetanmā bhūyo vibhramediti || 63 ||
[Analyze grammar]

ubhe dṛṣṭvā duḥkhasukhe rājyaṃ prāpya yadṛcchayā |
rājyenāmātyasaṃsthena kathaṃ rājanpramādyasi || 64 ||
[Analyze grammar]

bhīṣma uvāca |
tato rājakule nāndī saṃjajñe bhūyasī punaḥ |
purohitakule caiva saṃprāpte brāhmaṇarṣabhe || 65 ||
[Analyze grammar]

ekacchatrāṃ mahīṃ kṛtvā kausalyāya yaśasvine |
muniḥ kālakavṛkṣīya īje kratubhiruttamaiḥ || 66 ||
[Analyze grammar]

hitaṃ tadvacanaṃ śrutvā kausalyo'nvaśiṣanmahīm |
tathā ca kṛtavānrājā yathoktaṃ tena bhārata || 67 ||
[Analyze grammar]