Chapter 84

bhīṣma uvāca |
hrīniṣedhāḥ sadā santaḥ satyārjavasamanvitāḥ |
śaktāḥ kathayituṃ samyakte tava syuḥ sabhāsadaḥ || 1 ||
[Analyze grammar]

atyāḍhyāṃścātiśūrāṃśca brāhmaṇāṃśca bahuśrutān |
susaṃtuṣṭāṃśca kaunteya mahotsāhāṃśca karmasu || 2 ||
[Analyze grammar]

etānsahāyāṃllipsethāḥ sarvāsvāpatsu bhārata |
kulīnaḥ pūjito nityaṃ na hi śaktiṃ nigūhati || 3 ||
[Analyze grammar]

prasannaṃ hyaprasannaṃ vā pīḍitaṃ hṛtameva vā |
āvartayati bhūyiṣṭhaṃ tadeko hyanupālitaḥ || 4 ||
[Analyze grammar]

kulīnā deśajāḥ prājñā rūpavanto bahuśrutāḥ |
pragalbhāścānuraktāśca te tava syuḥ paricchadāḥ || 5 ||
[Analyze grammar]

dauṣkuleyāśca lubdhāśca nṛśaṃsā nirapatrapāḥ |
te tvāṃ tāta niṣeveyuryāvadārdrakapāṇayaḥ || 6 ||
[Analyze grammar]

arthamānārghyasatkārairbhogairuccāvacaiḥ priyān |
yānarthabhājo manyethāste te syuḥ sukhabhāginaḥ || 7 ||
[Analyze grammar]

abhinnavṛttā vidvāṃsaḥ sadvṛttāścaritavratāḥ |
na tvāṃ nityārthino jahyurakṣudrāḥ satyavādinaḥ || 8 ||
[Analyze grammar]

anāryā ye na jānanti samayaṃ mandacetasaḥ |
tebhyaḥ pratijugupsethā jānīyāḥ samayacyutān || 9 ||
[Analyze grammar]

naikamicchedgaṇaṃ hitvā syāccedanyataragrahaḥ |
yastveko bahubhiḥ śreyānkāmaṃ tena gaṇaṃ tyajet || 10 ||
[Analyze grammar]

śreyaso lakṣaṇaṃ hyetadvikramo yasya dṛśyate |
kīrtipradhāno yaśca syātsamaye yaśca tiṣṭhati || 11 ||
[Analyze grammar]

samarthānpūjayedyaśca nāspardhyaiḥ spardhate ca yaḥ |
na ca kāmādbhayātkrodhāllobhādvā dharmamutsṛjet || 12 ||
[Analyze grammar]

amānī satyavākśakto jitātmā mānyamānitā |
sa te mantrasahāyaḥ syātsarvāvasthaṃ parīkṣitaḥ || 13 ||
[Analyze grammar]

kulīnaḥ satyasaṃpannastitikṣurdakṣa ātmavān |
śūraḥ kṛtajñaḥ satyaśca śreyasaḥ pārtha lakṣaṇam || 14 ||
[Analyze grammar]

tasyaivaṃ vartamānasya puruṣasya vijānataḥ |
amitrāḥ saṃprasīdanti tato mitrībhavantyapi || 15 ||
[Analyze grammar]

ata ūrdhvamamātyānāṃ parīkṣeta guṇāguṇān |
saṃyatātmā kṛtaprajño bhūtikāmaśca bhūmipaḥ || 16 ||
[Analyze grammar]

saṃbaddhāḥ puruṣairāptairabhijātaiḥ svadeśajaiḥ |
ahāryairavyabhīcāraiḥ sarvataḥ suparīkṣitaiḥ || 17 ||
[Analyze grammar]

yodhāḥ srauvāstathā maulāstathaivānye'pyavaskṛtāḥ |
kartavyā bhūtikāmena puruṣeṇa bubhūṣatā || 18 ||
[Analyze grammar]

yeṣāṃ vainayikī buddhiḥ prakṛtā caiva śobhanā |
tejo dhairyaṃ kṣamā śaucamanurāga sthitirdhṛtiḥ || 19 ||
[Analyze grammar]

parīkṣitaguṇānnityaṃ prauḍhabhāvāndhuraṃdharān |
pañcopadhāvyatītāṃśca kuryādrājārthakāriṇaḥ || 20 ||
[Analyze grammar]

paryāptavacanānvīrānpratipattiviśāradān |
kulīnānsatyasaṃpannāniṅgitajñānaniṣṭhurān || 21 ||
[Analyze grammar]

deśakālavidhānajñānbhartṛkāryahitaiṣiṇaḥ |
nityamartheṣu sarveṣu rājā kurvīta mantriṇaḥ || 22 ||
[Analyze grammar]

hīnatejā hyasaṃhṛṣṭo naiva jātu vyavasyati |
avaśyaṃ janayatyeva sarvakarmasu saṃśayān || 23 ||
[Analyze grammar]

evamalpaśruto mantrī kalyāṇābhijano'pyuta |
dharmārthakāmayukto'pi nālaṃ mantraṃ parīkṣitum || 24 ||
[Analyze grammar]

tathaivānabhijāto'pi kāmamastu bahuśrutaḥ |
anāyaka ivācakṣurmuhyatyūhyeṣu karmasu || 25 ||
[Analyze grammar]

yo vā hyasthirasaṃkalpo buddhimānāgatāgamaḥ |
upāyajño'pi nālaṃ sa karma yāpayituṃ ciram || 26 ||
[Analyze grammar]

kevalātpunarācārātkarmaṇo nopapadyate |
parimarśo viśeṣāṇāmaśrutasyeha durmateḥ || 27 ||
[Analyze grammar]

mantriṇyananurakte tu viśvāso na hi vidyate |
tasmādananuraktāya naiva mantraṃ prakāśayet || 28 ||
[Analyze grammar]

vyathayeddhi sa rājānaṃ mantribhiḥ sahito'nṛjuḥ |
mārutopahatacchidraiḥ praviśyāgniriva drumam || 29 ||
[Analyze grammar]

saṃkrudhyatyekadā svāmī sthānāccaivāpakarṣati |
vācā kṣipati saṃrabdhastataḥ paścātprasīdati || 30 ||
[Analyze grammar]

tāni tānyanuraktena śakyānyanutitikṣitum |
mantriṇāṃ ca bhavetkrodho visphūrjitamivāśaneḥ || 31 ||
[Analyze grammar]

yastu saṃharate tāni bhartuḥ priyacikīrṣayā |
samānasukhaduḥkhaṃ taṃ pṛcchedartheṣu mānavam || 32 ||
[Analyze grammar]

anṛjustvanurakto'pi saṃpannaścetarairguṇaiḥ |
rājñaḥ prajñānayukto'pi na mantraṃ śrotumarhati || 33 ||
[Analyze grammar]

yo'mitraiḥ saha saṃbaddho na paurānbahu manyate |
sa suhṛttādṛśo rājño na mantraṃ śrotumarhati || 34 ||
[Analyze grammar]

avidvānaśuciḥ stabdhaḥ śatrusevī vikatthanaḥ |
sa suhṛtkrodhano lubdho na mantraṃ śrotumarhati || 35 ||
[Analyze grammar]

āgantuścānurakto'pi kāmamastu bahuśrutaḥ |
satkṛtaḥ saṃvibhakto vā na mantraṃ śrotumarhati || 36 ||
[Analyze grammar]

yastvalpenāpi kāryeṇa sakṛdākṣārito bhavet |
punaranyairguṇairyukto na mantraṃ śrotumarhati || 37 ||
[Analyze grammar]

kṛtaprajñaśca medhāvī budho jānapadaḥ śuciḥ |
sarvakarmasu yaḥ śuddhaḥ sa mantraṃ śrotumarhati || 38 ||
[Analyze grammar]

jñānavijñānasaṃpannaḥ prakṛtijñaḥ parātmanoḥ |
suhṛdātmasamo rājñaḥ sa mantraṃ śrotumarhati || 39 ||
[Analyze grammar]

satyavākśīlasaṃpanno gambhīraḥ satrapo mṛduḥ |
pitṛpaitāmaho yaḥ syātsa mantraṃ śrotumarhati || 40 ||
[Analyze grammar]

saṃtuṣṭaḥ saṃmataḥ satyaḥ śauṭīro dveṣyapāpakaḥ |
mantravitkālavicchūraḥ sa mantraṃ śrotumarhati || 41 ||
[Analyze grammar]

sarvalokaṃ samaṃ śaktaḥ sāntvena kurute vaśe |
tasmai mantraḥ prayoktavyo daṇḍamādhitsatā nṛpa || 42 ||
[Analyze grammar]

paurajānapadā yasminviśvāsaṃ dharmato gatāḥ |
yoddhā nayavipaścicca sa mantraṃ śrotumarhati || 43 ||
[Analyze grammar]

tasmātsarvairguṇairetairupapannāḥ supūjitāḥ |
mantriṇaḥ prakṛtijñāḥ syustryavarā mahadīpsavaḥ || 44 ||
[Analyze grammar]

svāsu prakṛtiṣu chidraṃ lakṣayeranparasya ca |
mantriṇo mantramūlaṃ hi rājño rāṣṭraṃ vivardhate || 45 ||
[Analyze grammar]

nāsya chidraṃ paraḥ paśyecchidreṣu paramanviyāt |
gūhetkūrma ivāṅgāni rakṣedvivaramātmanaḥ || 46 ||
[Analyze grammar]

mantragrāhā hi rājyasya mantriṇo ye manīṣiṇaḥ |
mantrasaṃhanano rājā mantrāṅgānītaro janaḥ || 47 ||
[Analyze grammar]

rājyaṃ praṇidhimūlaṃ hi mantrasāraṃ pracakṣate |
svāminaṃ tvanuvartanti vṛttyarthamiha mantriṇaḥ || 48 ||
[Analyze grammar]

sa vinīya madakrodhau mānamīrṣyāṃ ca nirvṛtaḥ |
nityaṃ pañcopadhātītairmantrayetsaha mantribhiḥ || 49 ||
[Analyze grammar]

teṣāṃ trayāṇāṃ vividhaṃ vimarśaṃ budhyeta cittaṃ viniveśya tatra |
svaniścayaṃ taṃ paraniścayaṃ ca nivedayeduttaramantrakāle || 50 ||
[Analyze grammar]

dharmārthakāmajñamupetya pṛcchedyukto guruṃ brāhmaṇamuttamārtham |
niṣṭhā kṛtā tena yadā saha syāttaṃ tatra mārgaṃ praṇayedasaktam || 51 ||
[Analyze grammar]

evaṃ sadā mantrayitavyamāhurye mantratattvārthaviniścayajñāḥ |
tasmāttvamevaṃ praṇayeḥ sadaiva mantraṃ prajāsaṃgrahaṇe samartham || 52 ||
[Analyze grammar]

na vāmanāḥ kubjakṛśā na khañjā nāndhā jaḍāḥ strī na napuṃsakaṃ ca |
na cātra tiryaṅna puro na paścānnordhvaṃ na cādhaḥ pracareta kaścit || 53 ||
[Analyze grammar]

āruhya vātāyanameva śūnyaṃ sthalaṃ prakāśaṃ kuśakāśahīnam |
vāgaṅgadoṣānparihṛtya mantraṃ saṃmantrayetkāryamahīnakālam || 54 ||
[Analyze grammar]