Chapter 7

saṃjaya uvāca |
sa evaṃ cintayitvā tu droṇaputro viśāṃ pate |
avatīrya rathopasthāddadhyau saṃprayataḥ sthitaḥ || 1 ||
[Analyze grammar]

drauṇiruvāca |
ugraṃ sthāṇuṃ śivaṃ rudraṃ śarvamīśānamīśvaram |
giriśaṃ varadaṃ devaṃ bhavaṃ bhāvanamavyayam || 2 ||
[Analyze grammar]

śitikaṇṭhamajaṃ śakraṃ krathaṃ kratuharaṃ haram |
viśvarūpaṃ virūpākṣaṃ bahurūpamumāpatim || 3 ||
[Analyze grammar]

śmaśānavāsinaṃ dṛptaṃ mahāgaṇapatiṃ prabhum |
khaṭvāṅgadhāriṇaṃ muṇḍaṃ jaṭilaṃ brahmacāriṇam || 4 ||
[Analyze grammar]

manasāpyasucintyena duṣkareṇālpacetasā |
so'hamātmopahāreṇa yakṣye tripuraghātinam || 5 ||
[Analyze grammar]

stutaṃ stutyaṃ stūyamānamamoghaṃ carmavāsasam |
vilohitaṃ nīlakaṇṭhamapṛktaṃ durnivāraṇam || 6 ||
[Analyze grammar]

śukraṃ viśvasṛjaṃ brahma brahmacāriṇameva ca |
vratavantaṃ taponityamanantaṃ tapatāṃ gatim || 7 ||
[Analyze grammar]

bahurūpaṃ gaṇādhyakṣaṃ tryakṣaṃ pāriṣadapriyam |
gaṇādhyakṣekṣitamukhaṃ gaurīhṛdayavallabham || 8 ||
[Analyze grammar]

kumārapitaraṃ piṅgaṃ govṛṣottamavāhanam |
tanuvāsasamatyugramumābhūṣaṇatatparam || 9 ||
[Analyze grammar]

paraṃ parebhyaḥ paramaṃ paraṃ yasmānna vidyate |
iṣvastrottamabhartāraṃ digantaṃ caiva dakṣiṇam || 10 ||
[Analyze grammar]

hiraṇyakavacaṃ devaṃ candramaulivibhūṣitam |
prapadye śaraṇaṃ devaṃ parameṇa samādhinā || 11 ||
[Analyze grammar]

imāṃ cāpyāpadaṃ ghorāṃ tarāmyadya sudustarām |
sarvabhūtopahāreṇa yakṣye'haṃ śucinā śucim || 12 ||
[Analyze grammar]

iti tasya vyavasitaṃ jñātvā tyāgātmakaṃ manaḥ |
purastātkāñcanī vediḥ prādurāsīnmahātmanaḥ || 13 ||
[Analyze grammar]

tasyāṃ vedyāṃ tadā rājaṃścitrabhānurajāyata |
dyāṃ diśo vidiśaḥ khaṃ ca jvālābhirabhipūrayan || 14 ||
[Analyze grammar]

dīptāsyanayanāścātra naikapādaśirobhujāḥ |
dvipaśailapratīkāśāḥ prādurāsanmahānanāḥ || 15 ||
[Analyze grammar]

śvavarāhoṣṭrarūpāśca hayagomāyugomukhāḥ |
ṛkṣamārjāravadanā vyāghradvīpimukhāstathā || 16 ||
[Analyze grammar]

kākavaktrāḥ plavamukhāḥ śukavaktrāstathaiva ca |
mahājagaravaktrāśca haṃsavaktrāḥ sitaprabhāḥ || 17 ||
[Analyze grammar]

dārvāghāṭamukhāścaiva cāṣavaktrāśca bhārata |
kūrmanakramukhāścaiva śiśumāramukhāstathā || 18 ||
[Analyze grammar]

mahāmakaravaktrāśca timivaktrāstathaiva ca |
harivaktrāḥ krauñcamukhāḥ kapotebhamukhāstathā || 19 ||
[Analyze grammar]

pārāvatamukhāścaiva madguvaktrāstathaiva ca |
pāṇikarṇāḥ sahasrākṣāstathaiva ca śatodarāḥ || 20 ||
[Analyze grammar]

nirmāṃsāḥ kokavaktrāśca śyenavaktrāśca bhārata |
tathaivāśiraso rājannṛkṣavaktrāśca bhīṣaṇāḥ || 21 ||
[Analyze grammar]

pradīptanetrajihvāśca jvālāvaktrāstathaiva ca |
meṣavaktrāstathaivānye tathā chāgamukhā nṛpa || 22 ||
[Analyze grammar]

śaṅkhābhāḥ śaṅkhavaktrāśca śaṅkhakarṇāstathaiva ca |
śaṅkhamālāparikarāḥ śaṅkhadhvanisamasvanāḥ || 23 ||
[Analyze grammar]

jaṭādharāḥ pañcaśikhāstathā muṇḍāḥ kṛśodarāḥ |
caturdaṃṣṭrāścaturjihvāḥ śaṅkukarṇāḥ kirīṭinaḥ || 24 ||
[Analyze grammar]

maulīdharāśca rājendra tathākuñcitamūrdhajāḥ |
uṣṇīṣiṇo mukuṭinaścāruvaktrāḥ svalaṃkṛtāḥ || 25 ||
[Analyze grammar]

padmotpalāpīḍadharāstathā kumudadhāriṇaḥ |
māhātmyena ca saṃyuktāḥ śataśo'tha sahasraśaḥ || 26 ||
[Analyze grammar]

śataghnīcakrahastāśca tathā musalapāṇayaḥ |
bhuśuṇḍīpāśahastāśca gadāhastāśca bhārata || 27 ||
[Analyze grammar]

pṛṣṭheṣu baddheṣudhayaścitrabāṇā raṇotkaṭāḥ |
sadhvajāḥ sapatākāśca saghaṇṭāḥ saparaśvadhāḥ || 28 ||
[Analyze grammar]

mahāpāśodyatakarāstathā laguḍapāṇayaḥ |
sthūṇāhastāḥ khaḍgahastāḥ sarpocchritakirīṭinaḥ |
mahāsarpāṅgadadharāścitrābharaṇadhāriṇaḥ || 29 ||
[Analyze grammar]

rajodhvastāḥ paṅkadigdhāḥ sarve śuklāmbarasrajaḥ |
nīlāṅgāḥ kamalāṅgāśca muṇḍavaktrāstathaiva ca || 30 ||
[Analyze grammar]

bherīśaṅkhamṛdaṅgāṃste jharjharānakagomukhān |
avādayanpāriṣadāḥ prahṛṣṭāḥ kanakaprabhāḥ || 31 ||
[Analyze grammar]

gāyamānāstathaivānye nṛtyamānāstathāpare |
laṅghayantaḥ plavantaśca valgantaśca mahābalāḥ || 32 ||
[Analyze grammar]

dhāvanto javanāścaṇḍāḥ pavanoddhūtamūrdhajāḥ |
mattā iva mahānāgā vinadanto muhurmuhuḥ || 33 ||
[Analyze grammar]

subhīmā ghorarūpāśca śūlapaṭṭiśapāṇayaḥ |
nānāvirāgavasanāścitramālyānulepanāḥ || 34 ||
[Analyze grammar]

ratnacitrāṅgadadharāḥ samudyatakarāstathā |
hantāro dviṣatāṃ śūrāḥ prasahyāsahyavikramāḥ || 35 ||
[Analyze grammar]

pātāro'sṛgvasādyānāṃ māṃsāntrakṛtabhojanāḥ |
cūḍālāḥ karṇikālāśca prakṛśāḥ piṭharodarāḥ || 36 ||
[Analyze grammar]

atihrasvātidīrghāśca prabalāścātibhairavāḥ |
vikaṭāḥ kālalamboṣṭhā bṛhacchephāsthipiṇḍikāḥ || 37 ||
[Analyze grammar]

mahārhanānāmukuṭā muṇḍāśca jaṭilāḥ pare |
sārkendugrahanakṣatrāṃ dyāṃ kuryurye mahītale || 38 ||
[Analyze grammar]

utsaheraṃśca ye hantuṃ bhūtagrāmaṃ caturvidham |
ye ca vītabhayā nityaṃ harasya bhrukuṭībhaṭāḥ || 39 ||
[Analyze grammar]

kāmakārakarāḥ siddhāstrailokyasyeśvareśvarāḥ |
nityānandapramuditā vāgīśā vītamatsarāḥ || 40 ||
[Analyze grammar]

prāpyāṣṭaguṇamaiśvaryaṃ ye na yānti ca vismayam |
yeṣāṃ vismayate nityaṃ bhagavānkarmabhirharaḥ || 41 ||
[Analyze grammar]

manovākkarmabhirbhaktairnityamārādhitaśca yaiḥ |
manovākkarmabhirbhaktānpāti putrānivaurasān || 42 ||
[Analyze grammar]

pibanto'sṛgvasāstvanye kruddhā brahmadviṣāṃ sadā |
caturviṃśātmakaṃ somaṃ ye pibanti ca nityadā || 43 ||
[Analyze grammar]

śrutena brahmacaryeṇa tapasā ca damena ca |
ye samārādhya śūlāṅkaṃ bhavasāyujyamāgatāḥ || 44 ||
[Analyze grammar]

yairātmabhūtairbhagavānpārvatyā ca maheśvaraḥ |
saha bhūtagaṇānbhuṅkte bhūtabhavyabhavatprabhuḥ || 45 ||
[Analyze grammar]

nānāvicitrahasitakṣveḍitotkruṣṭagarjitaiḥ |
saṃnādayantaste viśvamaśvatthāmānamabhyayuḥ || 46 ||
[Analyze grammar]

saṃstuvanto mahādevaṃ bhāḥ kurvāṇāḥ suvarcasaḥ |
vivardhayiṣavo drauṇermahimānaṃ mahātmanaḥ || 47 ||
[Analyze grammar]

jijñāsamānāstattejaḥ sauptikaṃ ca didṛkṣavaḥ |
bhīmograparighālātaśūlapaṭṭiśapāṇayaḥ |
ghorarūpāḥ samājagmurbhūtasaṃghāḥ samantataḥ || 48 ||
[Analyze grammar]

janayeyurbhayaṃ ye sma trailokyasyāpi darśanāt |
tānprekṣamāṇo'pi vyathāṃ na cakāra mahābalaḥ || 49 ||
[Analyze grammar]

atha drauṇirdhanuṣpāṇirbaddhagodhāṅgulitravān |
svayamevātmanātmānamupahāramupāharat || 50 ||
[Analyze grammar]

dhanūṃṣi samidhastatra pavitrāṇi śitāḥ śarāḥ |
havirātmavataścātmā tasminbhārata karmaṇi || 51 ||
[Analyze grammar]

tataḥ saumyena mantreṇa droṇaputraḥ pratāpavān |
upahāraṃ mahāmanyurathātmānamupāharat || 52 ||
[Analyze grammar]

taṃ rudraṃ raudrakarmāṇaṃ raudraiḥ karmabhiracyutam |
abhiṣṭutya mahātmānamityuvāca kṛtāñjaliḥ || 53 ||
[Analyze grammar]

imamātmānamadyāhaṃ jātamāṅgirase kule |
agnau juhomi bhagavanpratigṛhṇīṣva māṃ balim || 54 ||
[Analyze grammar]

bhavadbhaktyā mahādeva parameṇa samādhinā |
asyāmāpadi viśvātmannupākurmi tavāgrataḥ || 55 ||
[Analyze grammar]

tvayi sarvāṇi bhūtāni sarvabhūteṣu cāsi vai |
guṇānāṃ hi pradhānānāmekatvaṃ tvayi tiṣṭhati || 56 ||
[Analyze grammar]

sarvabhūtāśaya vibho havirbhūtamupasthitam |
pratigṛhāṇa māṃ deva yadyaśakyāḥ pare mayā || 57 ||
[Analyze grammar]

ityuktvā drauṇirāsthāya tāṃ vedīṃ dīptapāvakām |
saṃtyaktātmā samāruhya kṛṣṇavartmanyupāviśat || 58 ||
[Analyze grammar]

tamūrdhvabāhuṃ niśceṣṭaṃ dṛṣṭvā havirupasthitam |
abravīdbhagavānsākṣānmahādevo hasanniva || 59 ||
[Analyze grammar]

satyaśaucārjavatyāgaistapasā niyamena ca |
kṣāntyā bhaktyā ca dhṛtyā ca buddhyā ca vacasā tathā || 60 ||
[Analyze grammar]

yathāvadahamārāddhaḥ kṛṣṇenākliṣṭakarmaṇā |
tasmādiṣṭatamaḥ kṛṣṇādanyo mama na vidyate || 61 ||
[Analyze grammar]

kurvatā tasya saṃmānaṃ tvāṃ ca jijñāsatā mayā |
pāñcālāḥ sahasā guptā māyāśca bahuśaḥ kṛtāḥ || 62 ||
[Analyze grammar]

kṛtastasyaiṣa saṃmānaḥ pāñcālānrakṣatā mayā |
abhibhūtāstu kālena naiṣāmadyāsti jīvitam || 63 ||
[Analyze grammar]

evamuktvā maheṣvāsaṃ bhagavānātmanastanum |
āviveśa dadau cāsmai vimalaṃ khaḍgamuttamam || 64 ||
[Analyze grammar]

athāviṣṭo bhagavatā bhūyo jajvāla tejasā |
varṣmavāṃścābhavadyuddhe devasṛṣṭena tejasā || 65 ||
[Analyze grammar]

tamadṛśyāni bhūtāni rakṣāṃsi ca samādravan |
abhitaḥ śatruśibiraṃ yāntaṃ sākṣādiveśvaram || 66 ||
[Analyze grammar]