Chapter 8

dhṛtarāṣṭra uvāca |
tathā prayāte śibiraṃ droṇaputre mahārathe |
kaccitkṛpaśca bhojaśca bhayārtau na nyavartatām || 1 ||
[Analyze grammar]

kaccinna vāritau kṣudrai rakṣibhirnopalakṣitau |
asahyamiti vā matvā na nivṛttau mahārathau || 2 ||
[Analyze grammar]

kaccitpramathya śibiraṃ hatvā somakapāṇḍavān |
duryodhanasya padavīṃ gatau paramikāṃ raṇe || 3 ||
[Analyze grammar]

pāñcālairvā vinihatau kaccinnāsvapatāṃ kṣitau |
kaccittābhyāṃ kṛtaṃ karma tanmamācakṣva saṃjaya || 4 ||
[Analyze grammar]

saṃjaya uvāca |
tasminprayāte śibiraṃ droṇaputre mahātmani |
kṛpaśca kṛtavarmā ca śibiradvāryatiṣṭhatām || 5 ||
[Analyze grammar]

aśvatthāmā tu tau dṛṣṭvā yatnavantau mahārathau |
prahṛṣṭaḥ śanakai rājannidaṃ vacanamabravīt || 6 ||
[Analyze grammar]

yattau bhavantau paryāptau sarvakṣatrasya nāśane |
kiṃ punaryodhaśeṣasya prasuptasya viśeṣataḥ || 7 ||
[Analyze grammar]

ahaṃ pravekṣye śibiraṃ cariṣyāmi ca kālavat |
yathā na kaścidapi me jīvanmucyeta mānavaḥ || 8 ||
[Analyze grammar]

ityuktvā prāviśaddrauṇiḥ pārthānāṃ śibiraṃ mahat |
advāreṇābhyavaskandya vihāya bhayamātmanaḥ || 9 ||
[Analyze grammar]

sa praviśya mahābāhuruddeśajñaśca tasya ha |
dhṛṣṭadyumnasya nilayaṃ śanakairabhyupāgamat || 10 ||
[Analyze grammar]

te tu kṛtvā mahatkarma śrāntāśca balavadraṇe |
prasuptā vai suviśvastāḥ svasainyaparivāritāḥ || 11 ||
[Analyze grammar]

atha praviśya tadveśma dhṛṣṭadyumnasya bhārata |
pāñcālyaṃ śayane drauṇirapaśyatsuptamantikāt || 12 ||
[Analyze grammar]

kṣaumāvadāte mahati spardhyāstaraṇasaṃvṛte |
mālyapravarasaṃyukte dhūpaiścūrṇaiśca vāsite || 13 ||
[Analyze grammar]

taṃ śayānaṃ mahātmānaṃ visrabdhamakutobhayam |
prābodhayata pādena śayanasthaṃ mahīpate || 14 ||
[Analyze grammar]

sa buddhvā caraṇasparśamutthāya raṇadurmadaḥ |
abhyajānadameyātmā droṇaputraṃ mahāratham || 15 ||
[Analyze grammar]

tamutpatantaṃ śayanādaśvatthāmā mahābalaḥ |
keśeṣvālambya pāṇibhyāṃ niṣpipeṣa mahītale || 16 ||
[Analyze grammar]

sa balāttena niṣpiṣṭaḥ sādhvasena ca bhārata |
nidrayā caiva pāñcālyo nāśakacceṣṭituṃ tadā || 17 ||
[Analyze grammar]

tamākramya tadā rājankaṇṭhe corasi cobhayoḥ |
nadantaṃ visphurantaṃ ca paśumāramamārayat || 18 ||
[Analyze grammar]

tudannakhaistu sa drauṇiṃ nātivyaktamudāharat |
ācāryaputra śastreṇa jahi mā mā ciraṃ kṛthāḥ |
tvatkṛte sukṛtāṃllokāngaccheyaṃ dvipadāṃ vara || 19 ||
[Analyze grammar]

tasyāvyaktāṃ tu tāṃ vācaṃ saṃśrutya drauṇirabravīt |
ācāryaghātināṃ lokā na santi kulapāṃsana |
tasmācchastreṇa nidhanaṃ na tvamarhasi durmate || 20 ||
[Analyze grammar]

evaṃ bruvāṇastaṃ vīraṃ siṃho mattamiva dvipam |
marmasvabhyavadhītkruddhaḥ pādāṣṭhīlaiḥ sudāruṇaiḥ || 21 ||
[Analyze grammar]

tasya vīrasya śabdena māryamāṇasya veśmani |
abudhyanta mahārāja striyo ye cāsya rakṣiṇaḥ || 22 ||
[Analyze grammar]

te dṛṣṭvā varṣmavantaṃ tamatimānuṣavikramam |
bhūtameva vyavasyanto na sma pravyāharanbhayāt || 23 ||
[Analyze grammar]

taṃ tu tenābhyupāyena gamayitvā yamakṣayam |
adhyatiṣṭhatsa tejasvī rathaṃ prāpya sudarśanam || 24 ||
[Analyze grammar]

sa tasya bhavanādrājanniṣkramyānādayandiśaḥ |
rathena śibiraṃ prāyājjighāṃsurdviṣato balī || 25 ||
[Analyze grammar]

apakrānte tatastasmindroṇaputre mahārathe |
saha tai rakṣibhiḥ sarvaiḥ praṇeduryoṣitastadā || 26 ||
[Analyze grammar]

rājānaṃ nihataṃ dṛṣṭvā bhṛśaṃ śokaparāyaṇāḥ |
vyākrośankṣatriyāḥ sarve dhṛṣṭadyumnasya bhārata || 27 ||
[Analyze grammar]

tāsāṃ tu tena śabdena samīpe kṣatriyarṣabhāḥ |
kṣipraṃ ca samanahyanta kimetaditi cābruvan || 28 ||
[Analyze grammar]

striyastu rājanvitrastā bhāradvājaṃ nirīkṣya tam |
abruvandīnakaṇṭhena kṣipramādravateti vai || 29 ||
[Analyze grammar]

rākṣaso vā manuṣyo vā nainaṃ jānīmahe vayam |
hatvā pāñcālarājaṃ yo rathamāruhya tiṣṭhati || 30 ||
[Analyze grammar]

tataste yodhamukhyāstaṃ sahasā paryavārayan |
sa tānāpatataḥ sarvānrudrāstreṇa vyapothayat || 31 ||
[Analyze grammar]

dhṛṣṭadyumnaṃ ca hatvā sa tāṃścaivāsya padānugān |
apaśyacchayane suptamuttamaujasamantike || 32 ||
[Analyze grammar]

tamapyākramya pādena kaṇṭhe corasi caujasā |
tathaiva mārayāmāsa vinardantamariṃdamam || 33 ||
[Analyze grammar]

yudhāmanyustu saṃprāpto mattvā taṃ rakṣasā hatam |
gadāmudyamya vegena hṛdi drauṇimatāḍayat || 34 ||
[Analyze grammar]

tamabhidrutya jagrāha kṣitau cainamapātayat |
visphurantaṃ ca paśuvattathaivainamamārayat || 35 ||
[Analyze grammar]

tathā sa vīro hatvā taṃ tato'nyānsamupādravat |
saṃsuptāneva rājendra tatra tatra mahārathān |
sphurato vepamānāṃśca śamiteva paśūnmakhe || 36 ||
[Analyze grammar]

tato nistriṃśamādāya jaghānānyānpṛthagjanān |
bhāgaśo vicaranmārgānasiyuddhaviśāradaḥ || 37 ||
[Analyze grammar]

tathaiva gulme saṃprekṣya śayānānmadhyagaulmikān |
śrāntānnyastāyudhānsarvānkṣaṇenaiva vyapothayat || 38 ||
[Analyze grammar]

yodhānaśvāndvipāṃścaiva prācchinatsa varāsinā |
rudhirokṣitasarvāṅgaḥ kālasṛṣṭa ivāntakaḥ || 39 ||
[Analyze grammar]

visphuradbhiśca tairdrauṇirnistriṃśasyodyamena ca |
ākṣepeṇa tathaivāsestridhā raktokṣito'bhavat || 40 ||
[Analyze grammar]

tasya lohitasiktasya dīptakhaḍgasya yudhyataḥ |
amānuṣa ivākāro babhau paramabhīṣaṇaḥ || 41 ||
[Analyze grammar]

ye tvajāgrata kauravya te'pi śabdena mohitāḥ |
nirīkṣyamāṇā anyonyaṃ drauṇiṃ dṛṣṭvā pravivyathuḥ || 42 ||
[Analyze grammar]

tadrūpaṃ tasya te dṛṣṭvā kṣatriyāḥ śatrukarśanāḥ |
rākṣasaṃ manyamānāstaṃ nayanāni nyamīlayan || 43 ||
[Analyze grammar]

sa ghorarūpo vyacaratkālavacchibire tataḥ |
apaśyaddraupadīputrānavaśiṣṭāṃśca somakān || 44 ||
[Analyze grammar]

tena śabdena vitrastā dhanurhastā mahārathāḥ |
dhṛṣṭadyumnaṃ hataṃ śrutvā draupadeyā viśāṃ pate |
avākirañśaravrātairbhāradvājamabhītavat || 45 ||
[Analyze grammar]

tatastena ninādena saṃprabuddhāḥ prabhadrakāḥ |
śilīmukhaiḥ śikhaṇḍī ca droṇaputraṃ samārdayan || 46 ||
[Analyze grammar]

bhāradvājastu tāndṛṣṭvā śaravarṣāṇi varṣataḥ |
nanāda balavannādaṃ jighāṃsustānsudurjayān || 47 ||
[Analyze grammar]

tataḥ paramasaṃkruddhaḥ piturvadhamanusmaran |
avaruhya rathopasthāttvaramāṇo'bhidudruve || 48 ||
[Analyze grammar]

sahasracandraṃ vipulaṃ gṛhītvā carma saṃyuge |
khaḍgaṃ ca vipulaṃ divyaṃ jātarūpapariṣkṛtam |
draupadeyānabhidrutya khaḍgena vyacaradbalī || 49 ||
[Analyze grammar]

tataḥ sa naraśārdūlaḥ prativindhyaṃ tamāhave |
kukṣideśe'vadhīdrājansa hato nyapatadbhuvi || 50 ||
[Analyze grammar]

prāsena viddhvā drauṇiṃ tu sutasomaḥ pratāpavān |
punaścāsiṃ samudyamya droṇaputramupādravat || 51 ||
[Analyze grammar]

sutasomasya sāsiṃ tu bāhuṃ chittvā nararṣabhaḥ |
punarabhyahanatpārśve sa bhinnahṛdayo'patat || 52 ||
[Analyze grammar]

nākulistu śatānīko rathacakreṇa vīryavān |
dorbhyāmutkṣipya vegena vakṣasyenamatāḍayat || 53 ||
[Analyze grammar]

atāḍayacchatānīkaṃ muktacakraṃ dvijastu saḥ |
sa vihvalo yayau bhūmiṃ tato'syāpāharacchiraḥ || 54 ||
[Analyze grammar]

śrutakarmā tu parighaṃ gṛhītvā samatāḍayat |
abhidrutya tato drauṇiṃ savye sa phalake bhṛśam || 55 ||
[Analyze grammar]

sa tu taṃ śrutakarmāṇamāsye jaghne varāsinā |
sa hato nyapatadbhūmau vimūḍho vikṛtānanaḥ || 56 ||
[Analyze grammar]

tena śabdena vīrastu śrutakīrtirmahādhanuḥ |
aśvatthāmānamāsādya śaravarṣairavākirat || 57 ||
[Analyze grammar]

tasyāpi śaravarṣāṇi carmaṇā prativārya saḥ |
sakuṇḍalaṃ śiraḥ kāyādbhrājamānamapāharat || 58 ||
[Analyze grammar]

tato bhīṣmanihantā taṃ saha sarvaiḥ prabhadrakaiḥ |
ahanatsarvato vīraṃ nānāpraharaṇairbalī |
śilīmukhena cāpyenaṃ bhruvormadhye samārdayat || 59 ||
[Analyze grammar]

sa tu krodhasamāviṣṭo droṇaputro mahābalaḥ |
śikhaṇḍinaṃ samāsādya dvidhā ciccheda so'sinā || 60 ||
[Analyze grammar]

śikhaṇḍinaṃ tato hatvā krodhāviṣṭaḥ paraṃtapaḥ |
prabhadrakagaṇānsarvānabhidudrāva vegavān |
yacca śiṣṭaṃ virāṭasya balaṃ tacca samādravat || 61 ||
[Analyze grammar]

drupadasya ca putrāṇāṃ pautrāṇāṃ suhṛdāmapi |
cakāra kadanaṃ ghoraṃ dṛṣṭvā dṛṣṭvā mahābalaḥ || 62 ||
[Analyze grammar]

anyānanyāṃśca puruṣānabhisṛtyābhisṛtya ca |
nyakṛntadasinā drauṇirasimārgaviśāradaḥ || 63 ||
[Analyze grammar]

kālīṃ raktāsyanayanāṃ raktamālyānulepanām |
raktāmbaradharāmekāṃ pāśahastāṃ śikhaṇḍinīm || 64 ||
[Analyze grammar]

dadṛśuḥ kālarātriṃ te smayamānāmavasthitām |
narāśvakuñjarānpāśairbaddhvā ghoraiḥ pratasthuṣīm |
harantīṃ vividhānpretānpāśabaddhānvimūrdhajān || 65 ||
[Analyze grammar]

svapne suptānnayantīṃ tāṃ rātriṣvanyāsu māriṣa |
dadṛśuryodhamukhyāste ghnantaṃ drauṇiṃ ca nityadā || 66 ||
[Analyze grammar]

yataḥ pravṛttaḥ saṃgrāmaḥ kurupāṇḍavasenayoḥ |
tataḥ prabhṛti tāṃ kṛtyāmapaśyandrauṇimeva ca || 67 ||
[Analyze grammar]

tāṃstu daivahatānpūrvaṃ paścāddrauṇirnyapātayat |
trāsayansarvabhūtāni vinadanbhairavānravān || 68 ||
[Analyze grammar]

tadanusmṛtya te vīrā darśanaṃ paurvakālikam |
idaṃ tadityamanyanta daivenopanipīḍitāḥ || 69 ||
[Analyze grammar]

tatastena ninādena pratyabudhyanta dhanvinaḥ |
śibire pāṇḍaveyānāṃ śataśo'tha sahasraśaḥ || 70 ||
[Analyze grammar]

so'cchinatkasyacitpādau jaghanaṃ caiva kasyacit |
kāṃścidbibheda pārśveṣu kālasṛṣṭa ivāntakaḥ || 71 ||
[Analyze grammar]

atyugrapratipiṣṭaiśca nadadbhiśca bhṛśāturaiḥ |
gajāśvamathitaiścānyairmahī kīrṇābhavatprabho || 72 ||
[Analyze grammar]

krośatāṃ kimidaṃ ko'yaṃ kiṃ śabdaḥ kiṃ nu kiṃ kṛtam |
evaṃ teṣāṃ tadā drauṇirantakaḥ samapadyata || 73 ||
[Analyze grammar]

apetaśastrasaṃnāhānsaṃrabdhānpāṇḍusṛñjayān |
prāhiṇonmṛtyulokāya drauṇiḥ praharatāṃ varaḥ || 74 ||
[Analyze grammar]

tatastacchastravitrastā utpatanto bhayāturāḥ |
nidrāndhā naṣṭasaṃjñāśca tatra tatra nililyire || 75 ||
[Analyze grammar]

ūrustambhagṛhītāśca kaśmalābhihataujasaḥ |
vinadanto bhṛśaṃ trastāḥ saṃnyapeṣanparasparam || 76 ||
[Analyze grammar]

tato rathaṃ punardrauṇirāsthito bhīmanisvanam |
dhanuṣpāṇiḥ śarairanyānpreṣayadvai yamakṣayam || 77 ||
[Analyze grammar]

punarutpatataḥ kāṃściddūrādapi narottamān |
śūrānsaṃpatataścānyānkālarātryai nyavedayat || 78 ||
[Analyze grammar]

tathaiva syandanāgreṇa pramathansa vidhāvati |
śaravarṣaiśca vividhairavarṣacchātravāṃstataḥ || 79 ||
[Analyze grammar]

punaśca suvicitreṇa śatacandreṇa carmaṇā |
tena cākāśavarṇena tadācarata so'sinā || 80 ||
[Analyze grammar]

tathā sa śibiraṃ teṣāṃ drauṇirāhavadurmadaḥ |
vyakṣobhayata rājendra mahāhradamiva dvipaḥ || 81 ||
[Analyze grammar]

utpetustena śabdena yodhā rājanvicetasaḥ |
nidrārtāśca bhayārtāśca vyadhāvanta tatastataḥ || 82 ||
[Analyze grammar]

visvaraṃ cukruśuścānye bahvabaddhaṃ tathāvadan |
na ca sma pratipadyante śastrāṇi vasanāni ca || 83 ||
[Analyze grammar]

vimuktakeśāścāpyanye nābhyajānanparasparam |
utpatantaḥ pare bhītāḥ kecittatra tathābhraman |
purīṣamasṛjankecitkecinmūtraṃ prasusruvuḥ || 84 ||
[Analyze grammar]

bandhanāni ca rājendra saṃchidya turagā dvipāḥ |
samaṃ paryapataṃścānye kurvanto mahadākulam || 85 ||
[Analyze grammar]

tatra kecinnarā bhītā vyalīyanta mahītale |
tathaiva tānnipatitānapiṃṣangajavājinaḥ || 86 ||
[Analyze grammar]

tasmiṃstathā vartamāne rakṣāṃsi puruṣarṣabha |
tṛptāni vyanadannuccairmudā bharatasattama || 87 ||
[Analyze grammar]

sa śabdaḥ prerito rājanbhūtasaṃghairmudā yutaiḥ |
apūrayaddiśaḥ sarvā divaṃ cāpi mahāsvanaḥ || 88 ||
[Analyze grammar]

teṣāmārtasvaraṃ śrutvā vitrastā gajavājinaḥ |
muktāḥ paryapatanrājanmṛdnantaḥ śibire janam || 89 ||
[Analyze grammar]

taistatra paridhāvadbhiścaraṇodīritaṃ rajaḥ |
akarocchibire teṣāṃ rajanyāṃ dviguṇaṃ tamaḥ || 90 ||
[Analyze grammar]

tasmiṃstamasi saṃjāte pramūḍhāḥ sarvato janāḥ |
nājānanpitaraḥ putrānbhrātṝnbhrātara eva ca || 91 ||
[Analyze grammar]

gajā gajānatikramya nirmanuṣyā hayā hayān |
atāḍayaṃstathābhañjaṃstathāmṛdnaṃśca bhārata || 92 ||
[Analyze grammar]

te bhagnāḥ prapatantaśca nighnantaśca parasparam |
nyapātayanta ca parānpātayitvā tathāpiṣan || 93 ||
[Analyze grammar]

vicetasaḥ sanidrāśca tamasā cāvṛtā narāḥ |
jaghnuḥ svāneva tatrātha kālenābhipracoditāḥ || 94 ||
[Analyze grammar]

tyaktvā dvārāṇi ca dvāḥsthāstathā gulmāṃśca gaulmikāḥ |
prādravanta yathāśakti kāṃdiśīkā vicetasaḥ || 95 ||
[Analyze grammar]

vipranaṣṭāśca te'nyonyaṃ nājānanta tadā vibho |
krośantastāta putreti daivopahatacetasaḥ || 96 ||
[Analyze grammar]

palāyatāṃ diśasteṣāṃ svānapyutsṛjya bāndhavān |
gotranāmabhiranyonyamākrandanta tato janāḥ || 97 ||
[Analyze grammar]

hāhākāraṃ ca kurvāṇāḥ pṛthivyāṃ śerate pare |
tānbuddhvā raṇamatto'sau droṇaputro vyapothayat || 98 ||
[Analyze grammar]

tatrāpare vadhyamānā muhurmuhuracetasaḥ |
śibirānniṣpatanti sma kṣatriyā bhayapīḍitāḥ || 99 ||
[Analyze grammar]

tāṃstu niṣpatatastrastāñśibirāñjīvitaiṣiṇaḥ |
kṛtavarmā kṛpaścaiva dvāradeśe nijaghnatuḥ || 100 ||
[Analyze grammar]

viśastrayantrakavacānmuktakeśānkṛtāñjalīn |
vepamānānkṣitau bhītānnaiva kāṃścidamuñcatām || 101 ||
[Analyze grammar]

nāmucyata tayoḥ kaścinniṣkrāntaḥ śibirādbahiḥ |
kṛpasya ca mahārāja hārdikyasya ca durmateḥ || 102 ||
[Analyze grammar]

bhūyaścaiva cikīrṣantau droṇaputrasya tau priyam |
triṣu deśeṣu dadatuḥ śibirasya hutāśanam || 103 ||
[Analyze grammar]

tataḥ prakāśe śibire khaḍgena pitṛnandanaḥ |
aśvatthāmā mahārāja vyacaratkṛtahastavat || 104 ||
[Analyze grammar]

kāṃścidāpatato vīrānaparāṃśca pradhāvataḥ |
vyayojayata khaḍgena prāṇairdvijavaro narān || 105 ||
[Analyze grammar]

kāṃścidyodhānsa khaḍgena madhye saṃchidya vīryavān |
apātayaddroṇasutaḥ saṃrabdhastilakāṇḍavat || 106 ||
[Analyze grammar]

vinadadbhirbhṛśāyastairnarāśvadviradottamaiḥ |
patitairabhavatkīrṇā medinī bharatarṣabha || 107 ||
[Analyze grammar]

mānuṣāṇāṃ sahasreṣu hateṣu patiteṣu ca |
udatiṣṭhankabandhāni bahūnyutthāya cāpatan || 108 ||
[Analyze grammar]

sāyudhānsāṅgadānbāhūnnicakarta śirāṃsi ca |
hastihastopamānūrūnhastānpādāṃśca bhārata || 109 ||
[Analyze grammar]

pṛṣṭhacchinnāñśiraśchinnānpārśvacchinnāṃstathāparān |
samāsādyākaroddrauṇiḥ kāṃściccāpi parāṅmukhān || 110 ||
[Analyze grammar]

madhyakāyānnarānanyāṃścicchedānyāṃśca karṇataḥ |
aṃsadeśe nihatyānyānkāye prāveśayacchiraḥ || 111 ||
[Analyze grammar]

evaṃ vicaratastasya nighnataḥ subahūnnarān |
tamasā rajanī ghorā babhau dāruṇadarśanā || 112 ||
[Analyze grammar]

kiṃcitprāṇaiśca puruṣairhataiścānyaiḥ sahasraśaḥ |
bahunā ca gajāśvena bhūrabhūdbhīmadarśanā || 113 ||
[Analyze grammar]

yakṣarakṣaḥsamākīrṇe rathāśvadvipadāruṇe |
kruddhena droṇaputreṇa saṃchinnāḥ prāpatanbhuvi || 114 ||
[Analyze grammar]

mātṝranye pitṝnanye bhrātṝnanye vicukruśuḥ |
kecidūcurna tatkruddhairdhārtarāṣṭraiḥ kṛtaṃ raṇe || 115 ||
[Analyze grammar]

yatkṛtaṃ naḥ prasuptānāṃ rakṣobhiḥ krūrakarmabhiḥ |
asāṃnidhyāddhi pārthānāmidaṃ naḥ kadanaṃ kṛtam || 116 ||
[Analyze grammar]

na devāsuragandharvairna yakṣairna ca rākṣasaiḥ |
śakyo vijetuṃ kaunteyo goptā yasya janārdanaḥ || 117 ||
[Analyze grammar]

brahmaṇyaḥ satyavāgdāntaḥ sarvabhūtānukampakaḥ |
na ca suptaṃ pramattaṃ vā nyastaśastraṃ kṛtāñjalim |
dhāvantaṃ muktakeśaṃ vā hanti pārtho dhanaṃjayaḥ || 118 ||
[Analyze grammar]

tadidaṃ naḥ kṛtaṃ ghoraṃ rakṣobhiḥ krūrakarmabhiḥ |
iti lālapyamānāḥ sma śerate bahavo janāḥ || 119 ||
[Analyze grammar]

stanatāṃ ca manuṣyāṇāmapareṣāṃ ca kūjatām |
tato muhūrtātprāśāmyatsa śabdastumulo mahān || 120 ||
[Analyze grammar]

śoṇitavyatiṣiktāyāṃ vasudhāyāṃ ca bhūmipa |
tadrajastumulaṃ ghoraṃ kṣaṇenāntaradhīyata || 121 ||
[Analyze grammar]

saṃveṣṭamānānudvignānnirutsāhānsahasraśaḥ |
nyapātayannarānkruddhaḥ paśūnpaśupatiryathā || 122 ||
[Analyze grammar]

anyonyaṃ saṃpariṣvajya śayānāndravato'parān |
saṃlīnānyudhyamānāṃśca sarvāndrauṇirapothayat || 123 ||
[Analyze grammar]

dahyamānā hutāśena vadhyamānāśca tena te |
parasparaṃ tadā yodhā anayanyamasādanam || 124 ||
[Analyze grammar]

tasyā rajanyāstvardhena pāṇḍavānāṃ mahadbalam |
gamayāmāsa rājendra drauṇiryamaniveśanam || 125 ||
[Analyze grammar]

niśācarāṇāṃ sattvānāṃ sa rātrirharṣavardhinī |
āsīnnaragajāśvānāṃ raudrī kṣayakarī bhṛśam || 126 ||
[Analyze grammar]

tatrādṛśyanta rakṣāṃsi piśācāśca pṛthagvidhāḥ |
khādanto naramāṃsāni pibantaḥ śoṇitāni ca || 127 ||
[Analyze grammar]

karālāḥ piṅgalā raudrāḥ śailadantā rajasvalāḥ |
jaṭilā dīrghasakthāśca pañcapādā mahodarāḥ || 128 ||
[Analyze grammar]

paścādaṅgulayo rūkṣā virūpā bhairavasvanāḥ |
ghaṭajānavo'tihrasvāśca nīlakaṇṭhā vibhīṣaṇāḥ || 129 ||
[Analyze grammar]

saputradārāḥ sukrūrā durdarśanasunirghṛṇāḥ |
vividhāni ca rūpāṇi tatrādṛśyanta rakṣasām || 130 ||
[Analyze grammar]

pītvā ca śoṇitaṃ hṛṣṭāḥ prānṛtyangaṇaśo'pare |
idaṃ varamidaṃ medhyamidaṃ svādviti cābruvan || 131 ||
[Analyze grammar]

medomajjāsthiraktānāṃ vasānāṃ ca bhṛśāśitāḥ |
paramāṃsāni khādantaḥ kravyādā māṃsajīvinaḥ || 132 ||
[Analyze grammar]

vasāṃ cāpyapare pītvā paryadhāvanvikukṣilāḥ |
nānāvaktrāstathā raudrāḥ kravyādāḥ piśitāśinaḥ || 133 ||
[Analyze grammar]

ayutāni ca tatrāsanprayutānyarbudāni ca |
rakṣasāṃ ghorarūpāṇāṃ mahatāṃ krūrakarmaṇām || 134 ||
[Analyze grammar]

muditānāṃ vitṛptānāṃ tasminmahati vaiśase |
sametāni bahūnyāsanbhūtāni ca janādhipa || 135 ||
[Analyze grammar]

pratyūṣakāle śibirātpratigantumiyeṣa saḥ |
nṛśoṇitāvasiktasya drauṇerāsīdasitsaruḥ |
pāṇinā saha saṃśliṣṭa ekībhūta iva prabho || 136 ||
[Analyze grammar]

sa niḥśeṣānarīnkṛtvā virarāja janakṣaye |
yugānte sarvabhūtāni bhasma kṛtveva pāvakaḥ || 137 ||
[Analyze grammar]

yathāpratijñaṃ tatkarma kṛtvā drauṇāyaniḥ prabho |
durgamāṃ padavīṃ kṛtvā piturāsīdgatajvaraḥ || 138 ||
[Analyze grammar]

yathaiva saṃsuptajane śibire prāviśanniśi |
tathaiva hatvā niḥśabde niścakrāma nararṣabhaḥ || 139 ||
[Analyze grammar]

niṣkramya śibirāttasmāttābhyāṃ saṃgamya vīryavān |
ācakhyau karma tatsarvaṃ hṛṣṭaḥ saṃharṣayanvibho || 140 ||
[Analyze grammar]

tāvapyācakhyatustasmai priyaṃ priyakarau tadā |
pāñcālānsṛñjayāṃścaiva vinikṛttānsahasraśaḥ |
prītyā coccairudakrośaṃstathaivāsphoṭayaṃstalān || 141 ||
[Analyze grammar]

evaṃvidhā hi sā rātriḥ somakānāṃ janakṣaye |
prasuptānāṃ pramattānāmāsītsubhṛśadāruṇā || 142 ||
[Analyze grammar]

asaṃśayaṃ hi kālasya paryāyo duratikramaḥ |
tādṛśā nihatā yatra kṛtvāsmākaṃ janakṣayam || 143 ||
[Analyze grammar]

dhṛtarāṣṭra uvāca |
prāgeva sumahatkarma drauṇiretanmahārathaḥ |
nākarodīdṛśaṃ kasmānmatputravijaye dhṛtaḥ || 144 ||
[Analyze grammar]

atha kasmāddhate kṣatre karmedaṃ kṛtavānasau |
droṇaputro maheṣvāsastanme śaṃsitumarhasi || 145 ||
[Analyze grammar]

saṃjaya uvāca |
teṣāṃ nūnaṃ bhayānnāsau kṛtavānkurunandana |
asāṃnidhyāddhi pārthānāṃ keśavasya ca dhīmataḥ || 146 ||
[Analyze grammar]

sātyakeścāpi karmedaṃ droṇaputreṇa sādhitam |
na hi teṣāṃ samakṣaṃ tānhanyādapi marutpatiḥ || 147 ||
[Analyze grammar]

etadīdṛśakaṃ vṛttaṃ rājansuptajane vibho |
tato janakṣayaṃ kṛtvā pāṇḍavānāṃ mahātyayam |
diṣṭyā diṣṭyeti cānyonyaṃ sametyocurmahārathāḥ || 148 ||
[Analyze grammar]

paryaṣvajattato drauṇistābhyāṃ ca pratinanditaḥ |
idaṃ harṣācca sumahadādade vākyamuttamam || 149 ||
[Analyze grammar]

pāñcālā nihatāḥ sarve draupadeyāśca sarvaśaḥ |
somakā matsyaśeṣāśca sarve vinihatā mayā || 150 ||
[Analyze grammar]

idānīṃ kṛtakṛtyāḥ sma yāma tatraiva māciram |
yadi jīvati no rājā tasmai śaṃsāmahe priyam || 151 ||
[Analyze grammar]