Chapter 19

saṃjaya uvāca |
śvetāśvo'pi mahārāja vyadhamattāvakaṃ balam |
yathā vāyuḥ samāsādya tūlarāśiṃ samantataḥ || 1 ||
[Analyze grammar]

pratyudyayustrigartāstaṃ śibayaḥ kauravaiḥ saha |
śālvāḥ saṃśaptakāścaiva nārāyaṇabalaṃ ca yat || 2 ||
[Analyze grammar]

satyasenaḥ satyakīrtirmitradevaḥ śrutaṃjayaḥ |
sauśrutiścitrasenaśca mitravarmā ca bhārata || 3 ||
[Analyze grammar]

trigartarājaḥ samare bhrātṛbhiḥ parivāritaḥ |
putraiścaiva maheṣvāsairnānāśastradharairyudhi || 4 ||
[Analyze grammar]

te sṛjantaḥ śaravrātānkiranto'rjunamāhave |
abhyadravanta samare vāryoghā iva sāgaram || 5 ||
[Analyze grammar]

te tvarjunaṃ samāsādya yodhāḥ śatasahasraśaḥ |
agacchanvilayaṃ sarve tārkṣyaṃ dṛṣṭveva pannagāḥ || 6 ||
[Analyze grammar]

te vadhyamānāḥ samare nājahuḥ pāṇḍavaṃ tadā |
dahyamānā yathā rājañśalabhā iva pāvakam || 7 ||
[Analyze grammar]

satyasenastribhirbāṇairvivyādha yudhi pāṇḍavam |
mitradevastriṣaṣṭyā ca candradevaśca saptabhiḥ || 8 ||
[Analyze grammar]

mitravarmā trisaptatyā sauśrutiścāpi pañcabhiḥ |
śatruṃjayaśca viṃśatyā suśarmā navabhiḥ śaraiḥ || 9 ||
[Analyze grammar]

śatruṃjayaṃ ca rājānaṃ hatvā tatra śilāśitaiḥ |
sauśruteḥ saśirastrāṇaṃ śiraḥ kāyādapāharat |
tvaritaścandradevaṃ ca śarairninye yamakṣayam || 10 ||
[Analyze grammar]

athetarānmahārāja yatamānānmahārathān |
pañcabhiḥ pañcabhirbāṇairekaikaṃ pratyavārayat || 11 ||
[Analyze grammar]

satyasenastu saṃkruddhastomaraṃ vyasṛjanmahat |
samuddiśya raṇe kṛṣṇaṃ siṃhanādaṃ nanāda ca || 12 ||
[Analyze grammar]

sa nirbhidya bhujaṃ savyaṃ mādhavasya mahātmanaḥ |
ayasmayo mahācaṇḍo jagāma dharaṇīṃ tadā || 13 ||
[Analyze grammar]

mādhavasya tu viddhasya tomareṇa mahāraṇe |
pratodaḥ prāpataddhastādraśmayaśca viśāṃ pate || 14 ||
[Analyze grammar]

sa pratodaṃ punargṛhya raśmīṃścaiva mahāyaśāḥ |
vāhayāmāsa tānaśvānsatyasenarathaṃ prati || 15 ||
[Analyze grammar]

viṣvaksenaṃ tu nirbhinnaṃ prekṣya pārtho dhanaṃjayaḥ |
satyasenaṃ śaraistīkṣṇairdārayitvā mahābalaḥ || 16 ||
[Analyze grammar]

tataḥ suniśitairbāṇai rājñastasya mahacchiraḥ |
kuṇḍalopacitaṃ kāyāccakarta pṛtanāntare || 17 ||
[Analyze grammar]

taṃ nihatya śitairbāṇairmitravarmāṇamākṣipat |
vatsadantena tīkṣṇena sārathiṃ cāsya māriṣa || 18 ||
[Analyze grammar]

tataḥ śaraśatairbhūyaḥ saṃśaptakagaṇānvaśī |
pātayāmāsa saṃkruddhaḥ śataśo'tha sahasraśaḥ || 19 ||
[Analyze grammar]

tato rajatapuṅkhena rājñaḥ śīrṣaṃ mahātmanaḥ |
mitradevasya ciccheda kṣurapreṇa mahāyaśāḥ |
suśarmāṇaṃ ca saṃkruddho jatrudeśe samārdayat || 20 ||
[Analyze grammar]

tataḥ saṃśaptakāḥ sarve parivārya dhanaṃjayam |
śastraughairmamṛduḥ kruddhā nādayanto diśo daśa || 21 ||
[Analyze grammar]

abhyarditastu tairjiṣṇuḥ śakratulyaparākramaḥ |
aindramastramameyātmā prāduścakre mahārathaḥ |
tataḥ śarasahasrāṇi prādurāsanviśāṃ pate || 22 ||
[Analyze grammar]

dhvajānāṃ chidyamānānāṃ kārmukāṇāṃ ca saṃyuge |
rathānāṃ sapatākānāṃ tūṇīrāṇāṃ śaraiḥ saha || 23 ||
[Analyze grammar]

akṣāṇāmatha yoktrāṇāṃ cakrāṇāṃ raśmibhiḥ saha |
kūbarāṇāṃ varūthānāṃ pṛṣatkānāṃ ca saṃyuge || 24 ||
[Analyze grammar]

aśmanāṃ patatāṃ caiva prāsānāmṛṣṭibhiḥ saha |
gadānāṃ parighāṇāṃ ca śaktīnāṃ tomaraiḥ saha || 25 ||
[Analyze grammar]

śataghnīnāṃ sacakrāṇāṃ bhujānāmūrubhiḥ saha |
kaṇṭhasūtrāṅgadānāṃ ca keyūrāṇāṃ ca māriṣa || 26 ||
[Analyze grammar]

hārāṇāmatha niṣkāṇāṃ tanutrāṇāṃ ca bhārata |
chatrāṇāṃ vyajanānāṃ ca śirasāṃ mukuṭaiḥ saha |
aśrūyata mahāñśabdastatra tatra viśāṃ pate || 27 ||
[Analyze grammar]

sakuṇḍalāni svakṣīṇi pūrṇacandranibhāni ca |
śirāṃsyurvyāmadṛśyanta tārāgaṇa ivāmbare || 28 ||
[Analyze grammar]

susragvīṇi suvāsāṃsi candanenokṣitāni ca |
śarīrāṇi vyadṛśyanta hatānāṃ ca mahītale |
gandharvanagarākāraṃ ghoramāyodhanaṃ tadā || 29 ||
[Analyze grammar]

nihatai rājaputraiśca kṣatriyaiśca mahābalaiḥ |
hastibhiḥ patitaiścaiva turagaiścābhavanmahī |
agamyamārgā samare viśīrṇairiva parvataiḥ || 30 ||
[Analyze grammar]

nāsīccakrapathaścaiva pāṇḍavasya mahātmanaḥ |
nighnataḥ śātravānbhallairhastyaśvaṃ cāmitaṃ mahat || 31 ||
[Analyze grammar]

ā tumbādavasīdanti rathacakrāṇi māriṣa |
raṇe vicaratastasya tasmiṃllohitakardame || 32 ||
[Analyze grammar]

sīdamānāni cakrāṇi samūhusturagā bhṛśam |
śrameṇa mahatā yuktā manomārutaraṃhasaḥ || 33 ||
[Analyze grammar]

vadhyamānaṃ tu tatsainyaṃ pāṇḍuputreṇa dhanvinā |
prāyaśo vimukhaṃ sarvaṃ nāvatiṣṭhata saṃyuge || 34 ||
[Analyze grammar]

tāñjitvā samare jiṣṇuḥ saṃśaptakagaṇānbahūn |
rarāja sa mahārāja vidhūmo'gniriva jvalan || 35 ||
[Analyze grammar]

yudhiṣṭhiraṃ mahārāja visṛjantaṃ śarānbahūn |
svayaṃ duryodhano rājā pratyagṛhṇādabhītavat || 36 ||
[Analyze grammar]

tamāpatantaṃ sahasā tava putraṃ mahābalam |
dharmarājo drutaṃ viddhvā tiṣṭha tiṣṭheti cābravīt || 37 ||
[Analyze grammar]

sa ca taṃ prativivyādha navabhirniśitaiḥ śaraiḥ |
sārathiṃ cāsya bhallena bhṛśaṃ kruddho'bhyatāḍayat || 38 ||
[Analyze grammar]

tato yudhiṣṭhiro rājā hemapuṅkhāñśilīmukhān |
duryodhanāya cikṣepa trayodaśa śilāśitān || 39 ||
[Analyze grammar]

caturbhiścaturo vāhāṃstasya hatvā mahārathaḥ |
pañcamena śiraḥ kāyātsārathestu samākṣipat || 40 ||
[Analyze grammar]

ṣaṣṭhena ca dhvajaṃ rājñaḥ saptamena ca kārmukam |
aṣṭamena tathā khaḍgaṃ pātayāmāsa bhūtale |
pañcabhirnṛpatiṃ cāpi dharmarājo'rdayadbhṛśam || 41 ||
[Analyze grammar]

hatāśvāttu rathāttasmādavaplutya sutastava |
uttamaṃ vyasanaṃ prāpto bhūmāveva vyatiṣṭhata || 42 ||
[Analyze grammar]

taṃ tu kṛcchragataṃ dṛṣṭvā karṇadrauṇikṛpādayaḥ |
abhyavartanta sahitāḥ parīpsanto narādhipam || 43 ||
[Analyze grammar]

atha pāṇḍusutāḥ sarve parivārya yudhiṣṭhiram |
abhyayuḥ samare rājaṃstato yuddhamavartata || 44 ||
[Analyze grammar]

atha tūryasahasrāṇi prāvādyanta mahāmṛdhe |
kṣveḍāḥ kilakilāśabdāḥ prādurāsanmahīpate |
yadabhyagacchansamare pāñcālāḥ kauravaiḥ saha || 45 ||
[Analyze grammar]

narā naraiḥ samājagmurvāraṇā varavāraṇaiḥ |
rathāśca rathibhiḥ sārdhaṃ hayāśca hayasādibhiḥ || 46 ||
[Analyze grammar]

dvaṃdvānyāsanmahārāja prekṣaṇīyāni saṃyuge |
vismāpanānyacintyāni śastravantyuttamāni ca || 47 ||
[Analyze grammar]

ayudhyanta mahāvegāḥ parasparavadhaiṣiṇaḥ |
anyonyaṃ samare jaghnuryodhavratamanuṣṭhitāḥ |
na hi te samaraṃ cakruḥ pṛṣṭhato vai kathaṃcana || 48 ||
[Analyze grammar]

muhūrtameva tadyuddhamāsīnmadhuradarśanam |
tata unmattavadrājannirmaryādamavartata || 49 ||
[Analyze grammar]

rathī nāgaṃ samāsādya vicaranraṇamūrdhani |
preṣayāmāsa kālāya śaraiḥ saṃnataparvabhiḥ || 50 ||
[Analyze grammar]

nāgā hayānsamāsādya vikṣipanto bahūnatha |
drāvayāmāsuratyugrāstatra tatra tadā tadā || 51 ||
[Analyze grammar]

vidrāvya ca bahūnaśvānnāgā rājanbalotkaṭāḥ |
viṣāṇaiścāpare jaghnurmamṛduścāpare bhṛśam || 52 ||
[Analyze grammar]

sāśvārohāṃśca turagānviṣāṇairbibhidū raṇe |
aparāṃścikṣipurvegātpragṛhyātibalāstathā || 53 ||
[Analyze grammar]

pādātairāhatā nāgā vivareṣu samantataḥ |
cakrurārtasvaraṃ ghoraṃ vyadravanta diśo daśa || 54 ||
[Analyze grammar]

padātīnāṃ tu sahasā pradrutānāṃ mahāmṛdhe |
utsṛjyābharaṇaṃ tūrṇamavaplutya raṇājire || 55 ||
[Analyze grammar]

nimittaṃ manyamānāstu pariṇamya mahāgajāḥ |
jagṛhurbibhiduścaiva citrāṇyābharaṇāni ca || 56 ||
[Analyze grammar]

pratimāneṣu kumbheṣu dantaveṣṭeṣu cāpare |
nigṛhītā bhṛśaṃ nāgāḥ prāsatomaraśaktibhiḥ || 57 ||
[Analyze grammar]

nigṛhya ca gadāḥ kecitpārśvasthairbhṛśadāruṇaiḥ |
rathāśvasādibhistatra saṃbhinnā nyapatanbhuvi || 58 ||
[Analyze grammar]

sarathaṃ sādinaṃ tatra apare tu mahāgajāḥ |
bhūmāvamṛdnanvegena savarmāṇaṃ patākinam || 59 ||
[Analyze grammar]

rathaṃ nāgāḥ samāsādya dhuri gṛhya ca māriṣa |
vyākṣipansahasā tatra ghorarūpe mahāmṛdhe || 60 ||
[Analyze grammar]

nārācairnihataścāpi nipapāta mahāgajaḥ |
parvatasyeva śikharaṃ vajrabhagnaṃ mahītale || 61 ||
[Analyze grammar]

yodhā yodhānsamāsādya muṣṭibhirvyahananyudhi |
keśeṣvanyonyamākṣipya cicchidurbibhiduḥ saha || 62 ||
[Analyze grammar]

udyamya ca bhujāvanyo nikṣipya ca mahītale |
padā coraḥ samākramya sphurato vyahanacchiraḥ || 63 ||
[Analyze grammar]

mṛtamanyo mahārāja padbhyāṃ tāḍitavāṃstadā |
jīvataśca tathaivānyaḥ śastraṃ kāye nyamajjayat || 64 ||
[Analyze grammar]

muṣṭiyuddhaṃ mahaccāsīdyodhānāṃ tatra bhārata |
tathā keśagrahaścogro bāhuyuddhaṃ ca kevalam || 65 ||
[Analyze grammar]

samāsaktasya cānyena avijñātastathāparaḥ |
jahāra samare prāṇānnānāśastrairanekadhā || 66 ||
[Analyze grammar]

saṃsakteṣu ca yodheṣu vartamāne ca saṃkule |
kabandhānyutthitāni sma śataśo'tha sahasraśaḥ || 67 ||
[Analyze grammar]

lohitaiḥ sicyamānāni śastrāṇi kavacāni ca |
mahāraṅgānuraktāni vastrāṇīva cakāśire || 68 ||
[Analyze grammar]

evametanmahāyuddhaṃ dāruṇaṃ bhṛśasaṃkulam |
unmattaraṅgapratimaṃ śabdenāpūrayajjagat || 69 ||
[Analyze grammar]

naiva sve na pare rājanvijñāyante śarāturāḥ |
yoddhavyamiti yudhyante rājāno jayagṛddhinaḥ || 70 ||
[Analyze grammar]

svānsve jaghnurmahārāja parāṃścaiva samāgatān |
ubhayoḥ senayorvīrairvyākulaṃ samapadyata || 71 ||
[Analyze grammar]

rathairbhagnairmahārāja vāraṇaiśca nipātitaiḥ |
hayaiśca patitaistatra naraiśca vinipātitaiḥ || 72 ||
[Analyze grammar]

agamyarūpā pṛthivī māṃsaśoṇitakardamā |
kṣaṇenāsīnmahārāja kṣatajaughapravartinī || 73 ||
[Analyze grammar]

pāñcālānavadhītkarṇastrigartāṃśca dhanaṃjayaḥ |
bhīmasenaḥ kurūnrājanhastyanīkaṃ ca sarvaśaḥ || 74 ||
[Analyze grammar]

evameṣa kṣayo vṛttaḥ kurupāṇḍavasenayoḥ |
aparāhṇe mahārāja kāṅkṣantyorvipulaṃ jayam || 75 ||
[Analyze grammar]