Chapter 18

saṃjaya uvāca |
yuyutsuṃ tava putraṃ tu prādravantaṃ mahadbalam |
ulūko'bhyapatattūrṇaṃ tiṣṭha tiṣṭheti cābravīt || 1 ||
[Analyze grammar]

yuyutsustu tato rājañśitadhāreṇa patriṇā |
ulūkaṃ tāḍayāmāsa vajreṇendra ivācalam || 2 ||
[Analyze grammar]

ulūkastu tataḥ kruddhastava putrasya saṃyuge |
kṣurapreṇa dhanuśchittvā tāḍayāmāsa karṇinā || 3 ||
[Analyze grammar]

tadapāsya dhanuśchinnaṃ yuyutsurvegavattaram |
anyadādatta sumahaccāpaṃ saṃraktalocanaḥ || 4 ||
[Analyze grammar]

śākuniṃ ca tataḥ ṣaṣṭyā vivyādha bharatarṣabha |
sārathiṃ tribhirānarchattaṃ ca bhūyo vyavidhyata || 5 ||
[Analyze grammar]

ulūkastaṃ tu viṃśatyā viddhvā hemavibhūṣitaiḥ |
athāsya samare kruddho dhvajaṃ ciccheda kāñcanam || 6 ||
[Analyze grammar]

sa cchinnayaṣṭiḥ sumahāñśīryamāṇo mahādhvajaḥ |
papāta pramukhe rājanyuyutsoḥ kāñcanojjvalaḥ || 7 ||
[Analyze grammar]

dhvajamunmathitaṃ dṛṣṭvā yuyutsuḥ krodhamūrchitaḥ |
ulūkaṃ pañcabhirbāṇairājaghāna stanāntare || 8 ||
[Analyze grammar]

ulūkastasya bhallena tailadhautena māriṣa |
śiraściccheda sahasā yanturbharatasattama || 9 ||
[Analyze grammar]

jaghāna caturo'śvāṃśca taṃ ca vivyādha pañcabhiḥ |
so'tividdho balavatā pratyapāyādrathāntaram || 10 ||
[Analyze grammar]

taṃ nirjitya raṇe rājannulūkastvarito yayau |
pāñcālānsṛñjayāṃścaiva vinighnanniśitaiḥ śaraiḥ || 11 ||
[Analyze grammar]

śatānīkaṃ mahārāja śrutakarmā sutastava |
vyaśvasūtarathaṃ cakre nimeṣārdhādasaṃbhramam || 12 ||
[Analyze grammar]

hatāśve tu rathe tiṣṭhañśatānīko mahābalaḥ |
gadāṃ cikṣepa saṃkruddhastava putrasya māriṣa || 13 ||
[Analyze grammar]

sā kṛtvā syandanaṃ bhasma hayāṃścaiva sasārathīn |
papāta dharaṇīṃ tūrṇaṃ dārayantīva bhārata || 14 ||
[Analyze grammar]

tāvubhau virathau vīrau kurūṇāṃ kīrtivardhanau |
apākrametāṃ yuddhārtau prekṣamāṇau parasparam || 15 ||
[Analyze grammar]

putrastu tava saṃbhrānto vivitso rathamāviśat |
śatānīko'pi tvaritaḥ prativindhyarathaṃ gataḥ || 16 ||
[Analyze grammar]

sutasomastu śakuniṃ vivyādha niśitaiḥ śaraiḥ |
nākampayata saṃrabdho vāryogha iva parvatam || 17 ||
[Analyze grammar]

sutasomastu taṃ dṛṣṭvā pituratyantavairiṇam |
śarairanekasāhasraiśchādayāmāsa bhārata || 18 ||
[Analyze grammar]

tāñśarāñśakunistūrṇaṃ cicchedānyaiḥ patatribhiḥ |
laghvastraścitrayodhī ca jitakāśī ca saṃyuge || 19 ||
[Analyze grammar]

nivārya samare cāpi śarāṃstānniśitaiḥ śaraiḥ |
ājaghāna susaṃkruddhaḥ sutasomaṃ tribhiḥ śaraiḥ || 20 ||
[Analyze grammar]

tasyāśvānketanaṃ sūtaṃ tilaśo vyadhamaccharaiḥ |
syālastava mahāvīryastataste cukruśurjanāḥ || 21 ||
[Analyze grammar]

hatāśvo virathaścaiva chinnadhanvā ca māriṣa |
dhanvī dhanurvaraṃ gṛhya rathādbhūmāvatiṣṭhata |
vyasṛjatsāyakāṃścaiva svarṇapuṅkhāñśilāśitān || 22 ||
[Analyze grammar]

chādayāmāsuratha te tava syālasya taṃ ratham |
pataṃgānāmiva vrātāḥ śaravrātā mahāratham || 23 ||
[Analyze grammar]

rathopasthānsamīkṣyāpi vivyathe naiva saubalaḥ |
pramṛdnaṃśca śarāṃstāṃstāñśaravrātairmahāyaśāḥ || 24 ||
[Analyze grammar]

tatrātuṣyanta yodhāśca siddhāścāpi divi sthitāḥ |
sutasomasya tatkarma dṛṣṭvāśraddheyamadbhutam |
rathasthaṃ nṛpatiṃ taṃ tu padātiḥ sannayodhayat || 25 ||
[Analyze grammar]

tasya tīkṣṇairmahāvegairbhallaiḥ saṃnataparvabhiḥ |
vyahanatkārmukaṃ rājā tūṇīraṃ caiva sarvaśaḥ || 26 ||
[Analyze grammar]

sa cchinnadhanvā samare khaḍgamudyamya nānadan |
vaiḍūryotpalavarṇābhaṃ hastidantamayatsarum || 27 ||
[Analyze grammar]

bhrāmyamāṇaṃ tatastaṃ tu vimalāmbaravarcasam |
kālopamaṃ tato mene sutasomasya dhīmataḥ || 28 ||
[Analyze grammar]

so'caratsahasā khaḍgī maṇḍalāni sahasraśaḥ |
caturviṃśanmahārāja śikṣābalasamanvitaḥ || 29 ||
[Analyze grammar]

saubalastu tatastasya śarāṃścikṣepa vīryavān |
tānāpatata evāśu ciccheda paramāsinā || 30 ||
[Analyze grammar]

tataḥ kruddho mahārāja saubalaḥ paravīrahā |
prāhiṇotsutasomasya śarānāśīviṣopamān || 31 ||
[Analyze grammar]

ciccheda tāṃśca khaḍgena śikṣayā ca balena ca |
darśayaṃllāghavaṃ yuddhe tārkṣyavīryasamadyutiḥ || 32 ||
[Analyze grammar]

tasya saṃcarato rājanmaṇḍalāvartane tadā |
kṣurapreṇa sutīkṣṇena khaḍgaṃ ciccheda suprabham || 33 ||
[Analyze grammar]

sa cchinnaḥ sahasā bhūmau nipapāta mahānasiḥ |
avaśasya sthitaṃ haste taṃ khaḍgaṃ satsaruṃ tadā || 34 ||
[Analyze grammar]

chinnamājñāya nistriṃśamavaplutya padāni ṣaṭ |
prāvidhyata tataḥ śeṣaṃ sutasomo mahārathaḥ || 35 ||
[Analyze grammar]

sa cchittvā saguṇaṃ cāpaṃ raṇe tasya mahātmanaḥ |
papāta dharaṇīṃ tūrṇaṃ svarṇavajravibhūṣitaḥ |
sutasomastato'gacchacchrutakīrtermahāratham || 36 ||
[Analyze grammar]

saubalo'pi dhanurgṛhya ghoramanyatsuduḥsaham |
abhyayātpāṇḍavānīkaṃ nighnañśatrugaṇānbahūn || 37 ||
[Analyze grammar]

tatra nādo mahānāsītpāṇḍavānāṃ viśāṃ pate |
saubalaṃ samare dṛṣṭvā vicarantamabhītavat || 38 ||
[Analyze grammar]

tānyanīkāni dṛptāni śastravanti mahānti ca |
drāvyamāṇānyadṛśyanta saubalena mahātmanā || 39 ||
[Analyze grammar]

yathā daityacamūṃ rājandevarājo mamarda ha |
tathaiva pāṇḍavīṃ senāṃ saubaleyo vyanāśayat || 40 ||
[Analyze grammar]

dhṛṣṭadyumnaṃ kṛpo rājanvārayāmāsa saṃyuge |
yathā dṛptaṃ vane nāgaṃ śarabho vārayedyudhi || 41 ||
[Analyze grammar]

niruddhaḥ pārṣatastena gautamena balīyasā |
padātpadaṃ vicalituṃ nāśaknottatra bhārata || 42 ||
[Analyze grammar]

gautamasya vapurdṛṣṭvā dhṛṣṭadyumnarathaṃ prati |
vitresuḥ sarvabhūtāni kṣayaṃ prāptaṃ ca menire || 43 ||
[Analyze grammar]

tatrāvocanvimanaso rathinaḥ sādinastathā |
droṇasya nidhane nūnaṃ saṃkruddho dvipadāṃ varaḥ || 44 ||
[Analyze grammar]

śāradvato mahātejā divyāstravidudāradhīḥ |
api svasti bhavedadya dhṛṣṭadyumnasya gautamāt || 45 ||
[Analyze grammar]

apīyaṃ vāhinī kṛtsnā mucyeta mahato bhayāt |
apyayaṃ brāhmaṇaḥ sarvānna no hanyātsamāgatān || 46 ||
[Analyze grammar]

yādṛśaṃ dṛśyate rūpamantakapratimaṃ bhṛśam |
gamiṣyatyadya padavīṃ bhāradvājasya saṃyuge || 47 ||
[Analyze grammar]

ācāryaḥ kṣiprahastaśca vijayī ca sadā yudhi |
astravānvīryasaṃpannaḥ krodhena ca samanvitaḥ || 48 ||
[Analyze grammar]

pārṣataśca bhṛśaṃ yuddhe vimukho'dyāpi lakṣyate |
ityevaṃ vividhā vācastāvakānāṃ paraiḥ saha || 49 ||
[Analyze grammar]

viniḥśvasya tataḥ kruddhaḥ kṛpaḥ śāradvato nṛpa |
pārṣataṃ chādayāmāsa niśceṣṭaṃ sarvamarmasu || 50 ||
[Analyze grammar]

sa vadhyamānaḥ samare gautamena mahātmanā |
kartavyaṃ na prajānāti mohitaḥ paramāhave || 51 ||
[Analyze grammar]

tamabravīttato yantā kaccitkṣemaṃ nu pārṣata |
īdṛśaṃ vyasanaṃ yuddhe na te dṛṣṭaṃ kadācana || 52 ||
[Analyze grammar]

daivayogāttu te bāṇā nātaranmarmabhedinaḥ |
preṣitā dvijamukhyena marmāṇyuddiśya sarvaśaḥ || 53 ||
[Analyze grammar]

vyāvartaye tatra rathaṃ nadīvegamivārṇavāt |
avadhyaṃ brāhmaṇaṃ manye yena te vikramo hataḥ || 54 ||
[Analyze grammar]

dhṛṣṭadyumnastato rājañśanakairabravīdvacaḥ |
muhyate me manastāta gātre svedaśca jāyate || 55 ||
[Analyze grammar]

vepathuṃ ca śarīre me romaharṣaṃ ca paśya vai |
varjayanbrāhmaṇaṃ yuddhe śanairyāhi yato'cyutaḥ || 56 ||
[Analyze grammar]

arjunaṃ bhīmasenaṃ vā samare prāpya sārathe |
kṣemamadya bhavedyantariti me naiṣṭhikī matiḥ || 57 ||
[Analyze grammar]

tataḥ prāyānmahārāja sārathistvarayanhayān |
yato bhīmo maheṣvāso yuyudhe tava sainikaiḥ || 58 ||
[Analyze grammar]

pradrutaṃ tu rathaṃ dṛṣṭvā dhṛṣṭadyumnasya māriṣa |
kirañśaraśatānyeva gautamo'nuyayau tadā || 59 ||
[Analyze grammar]

śaṅkhaṃ ca pūrayāmāsa muhurmuhurariṃdamaḥ |
pārṣataṃ prādravadyantaṃ mahendra iva śambaram || 60 ||
[Analyze grammar]

śikhaṇḍinaṃ tu samare bhīṣmamṛtyuṃ durāsadam |
hārdikyo vārayāmāsa smayanniva muhurmuhuḥ || 61 ||
[Analyze grammar]

śikhaṇḍī ca samāsādya hṛdikānāṃ mahāratham |
pañcabhirniśitairbhallairjatrudeśe samārdayat || 62 ||
[Analyze grammar]

kṛtavarmā tu saṃkruddho bhittvā ṣaṣṭibhirāśugaiḥ |
dhanurekena ciccheda hasanrājanmahārathaḥ || 63 ||
[Analyze grammar]

athānyaddhanurādāya drupadasyātmajo balī |
tiṣṭha tiṣṭheti saṃkruddho hārdikyaṃ pratyabhāṣata || 64 ||
[Analyze grammar]

tato'sya navatiṃ bāṇānrukmapuṅkhānsutejanān |
preṣayāmāsa rājendra te'syābhraśyanta varmaṇaḥ || 65 ||
[Analyze grammar]

vitathāṃstānsamālakṣya patitāṃśca mahītale |
kṣurapreṇa sutīkṣṇena kārmukaṃ cicchide balī || 66 ||
[Analyze grammar]

athainaṃ chinnadhanvānaṃ bhagnaśṛṅgamivarṣabham |
aśītyā mārgaṇaiḥ kruddho bāhvorurasi cārdayat || 67 ||
[Analyze grammar]

kṛtavarmā tu saṃkruddho mārgaṇaiḥ kṛtavikṣataḥ |
dhanuranyatsamādāya samārgaṇagaṇaṃ prabho |
śikhaṇḍinaṃ bāṇavaraiḥ skandhadeśe'bhyatāḍayat || 68 ||
[Analyze grammar]

skandhadeśe sthitairbāṇaiḥ śikhaṇḍī ca rarāja ha |
śākhāpratānairvimalaiḥ sumahānsa yathā drumaḥ || 69 ||
[Analyze grammar]

tāvanyonyaṃ bhṛśaṃ viddhvā rudhireṇa samukṣitau |
anyonyaśṛṅgābhihatau rejaturvṛṣabhāviva || 70 ||
[Analyze grammar]

anyonyasya vadhe yatnaṃ kurvāṇau tau mahārathau |
rathābhyāṃ ceratustatra maṇḍalāni sahasraśaḥ || 71 ||
[Analyze grammar]

kṛtavarmā mahārāja pārṣataṃ niśitaiḥ śaraiḥ |
raṇe vivyādha saptatyā svarṇapuṅkhaiḥ śilāśitaiḥ || 72 ||
[Analyze grammar]

tato'sya samare bāṇaṃ bhojaḥ praharatāṃ varaḥ |
jīvitāntakaraṃ ghoraṃ vyasṛjattvarayānvitaḥ || 73 ||
[Analyze grammar]

sa tenābhihato rājanmūrchāmāśu samāviśat |
dhvajayaṣṭiṃ ca sahasā śiśriye kaśmalāvṛtaḥ || 74 ||
[Analyze grammar]

apovāha raṇāttaṃ tu sārathī rathināṃ varam |
hārdikyaśarasaṃtaptaṃ niḥśvasantaṃ punaḥ punaḥ || 75 ||
[Analyze grammar]

parājite tataḥ śūre drupadasya sute prabho |
prādravatpāṇḍavī senā vadhyamānā samantataḥ || 76 ||
[Analyze grammar]