Chapter 20

dhṛtarāṣṭra uvāca |
atitīvrāṇi duḥkhāni duḥsahāni bahūni ca |
tavāhaṃ saṃjayāśrauṣaṃ putrāṇāṃ mama saṃkṣayam || 1 ||
[Analyze grammar]

tathā tu me kathayase yathā yuddhaṃ tu vartate |
na santi sūta kauravyā iti me naiṣṭhikī matiḥ || 2 ||
[Analyze grammar]

duryodhanastu virathaḥ kṛtastatra mahāraṇe |
dharmaputraḥ kathaṃ cakre tasminvā nṛpatiḥ katham || 3 ||
[Analyze grammar]

aparāhṇe kathaṃ yuddhamabhavallomaharṣaṇam |
tanmamācakṣva tattvena kuśalo hyasi saṃjaya || 4 ||
[Analyze grammar]

saṃjaya uvāca |
saṃsakteṣu ca sainyeṣu yudhyamāneṣu bhāgaśaḥ |
rathamanyaṃ samāsthāya putrastava viśāṃ pate || 5 ||
[Analyze grammar]

krodhena mahatāviṣṭaḥ saviṣo bhujago yathā |
duryodhanastu dṛṣṭvā vai dharmarājaṃ yudhiṣṭhiram |
uvāca sūta tvaritaṃ yāhi yāhīti bhārata || 6 ||
[Analyze grammar]

atra māṃ prāpaya kṣipraṃ sārathe yatra pāṇḍavaḥ |
dhriyamāṇena chatreṇa rājā rājati daṃśitaḥ || 7 ||
[Analyze grammar]

sa sūtaścodito rājñā rājñaḥ syandanamuttamam |
yudhiṣṭhirasyābhimukhaṃ preṣayāmāsa saṃyuge || 8 ||
[Analyze grammar]

tato yudhiṣṭhiraḥ kruddhaḥ pramatta iva sadgavaḥ |
sārathiṃ codayāmāsa yāhi yatra suyodhanaḥ || 9 ||
[Analyze grammar]

tau samājagmaturvīrau bhrātarau rathasattamau |
sametya ca mahāvīryau saṃnaddhau yuddhadurmadau |
tatakṣaturmaheṣvāsau śarairanyonyamāhave || 10 ||
[Analyze grammar]

tato duryodhano rājā dharmaśīlasya māriṣa |
śilāśitena bhallena dhanuściccheda saṃyuge |
taṃ nāmṛṣyata saṃkruddho vyavasāyaṃ yudhiṣṭhiraḥ || 11 ||
[Analyze grammar]

apavidhya dhanuśchinnaṃ krodhasaṃraktalocanaḥ |
anyatkārmukamādāya dharmaputraścamūmukhe || 12 ||
[Analyze grammar]

duryodhanasya ciccheda dhvajaṃ kārmukameva ca |
athānyaddhanurādāya pratyavidhyata pāṇḍavam || 13 ||
[Analyze grammar]

tāvanyonyaṃ susaṃrabdhau śaravarṣāṇyamuñcatām |
siṃhāviva susaṃkruddhau parasparajigīṣayā || 14 ||
[Analyze grammar]

anyonyaṃ jaghnatuścaiva nardamānau vṛṣāviva |
anyonyaṃ prekṣamāṇau ca ceratustau mahārathau || 15 ||
[Analyze grammar]

tataḥ pūrṇāyatotsṛṣṭairanyonyaṃ sukṛtavraṇau |
virejaturmahārāja puṣpitāviva kiṃśukau || 16 ||
[Analyze grammar]

tato rājanpratibhayānsiṃhanādānmuhurmuhuḥ |
talayośca tathā śabdāndhanuṣośca mahāhave || 17 ||
[Analyze grammar]

śaṅkhaśabdaravāṃścaiva cakratustau rathottamau |
anyonyaṃ ca mahārāja pīḍayāṃ cakraturbhṛśam || 18 ||
[Analyze grammar]

tato yudhiṣṭhiro rājā tava putraṃ tribhiḥ śaraiḥ |
ājaghānorasi kruddho vajravego durāsadaḥ || 19 ||
[Analyze grammar]

prativivyādha taṃ tūrṇaṃ tava putro mahīpatim |
pañcabhirniśitairbāṇairhemapuṅkhaiḥ śilāśitaiḥ || 20 ||
[Analyze grammar]

tato duryodhano rājā śaktiṃ cikṣepa bhārata |
sarvapāraśavīṃ tīkṣṇāṃ maholkāpratimāṃ tadā || 21 ||
[Analyze grammar]

tāmāpatantīṃ sahasā dharmarājaḥ śilāśitaiḥ |
tribhiściccheda sahasā taṃ ca vivyādha saptabhiḥ || 22 ||
[Analyze grammar]

nipapāta tataḥ sātha hemadaṇḍā mahāghanā |
nipatantī maholkeva vyarājacchikhisaṃnibhā || 23 ||
[Analyze grammar]

śaktiṃ vinihatāṃ dṛṣṭvā putrastava viśāṃ pate |
navabhirniśitairbhallairnijaghāna yudhiṣṭhiram || 24 ||
[Analyze grammar]

so'tividdho balavatāmagraṇīḥ śatrutāpanaḥ |
duryodhanaṃ samuddiśya bāṇaṃ jagrāha satvaraḥ || 25 ||
[Analyze grammar]

samādhatta ca taṃ bāṇaṃ dhanuṣyugraṃ mahābalaḥ |
cikṣepa ca tato rājā rājñaḥ kruddhaḥ parākramī || 26 ||
[Analyze grammar]

sa tu bāṇaḥ samāsādya tava putraṃ mahāratham |
vyamohayata rājānaṃ dharaṇīṃ ca jagāma ha || 27 ||
[Analyze grammar]

tato duryodhanaḥ kruddho gadāmudyamya vegitaḥ |
vidhitsuḥ kalahasyāntamabhidudrāva pāṇḍavam || 28 ||
[Analyze grammar]

tamālakṣyodyatagadaṃ daṇḍahastamivāntakam |
dharmarājo mahāśaktiṃ prāhiṇottava sūnave |
dīpyamānāṃ mahāvegāṃ maholkāṃ jvalitāmiva || 29 ||
[Analyze grammar]

rathasthaḥ sa tayā viddho varma bhittvā mahāhave |
bhṛśaṃ saṃvignahṛdayaḥ papāta ca mumoha ca || 30 ||
[Analyze grammar]

tatastvaritamāgatya kṛtavarmā tavātmajam |
pratyapadyata rājānaṃ magnaṃ vai vyasanārṇave || 31 ||
[Analyze grammar]

bhīmo'pi mahatīṃ gṛhya gadāṃ hemapariṣkṛtām |
abhidudrāva vegena kṛtavarmāṇamāhave |
evaṃ tadabhavadyuddhaṃ tvadīyānāṃ paraiḥ saha || 32 ||
[Analyze grammar]