Chapter 164

saṃjaya uvāca |
tasmiṃstathā vartamāne narāśvagajasaṃkṣaye |
duḥśāsano mahārāja dhṛṣṭadyumnamayodhayat || 1 ||
[Analyze grammar]

sa tu rukmarathāsakto duḥśāsanaśarārditaḥ |
amarṣāttava putrasya śarairvāhānavākirat || 2 ||
[Analyze grammar]

kṣaṇena sa rathastasya sadhvajaḥ sahasārathiḥ |
nādṛśyata mahārāja pārṣatasya śaraiścitaḥ || 3 ||
[Analyze grammar]

duḥśāsanastu rājendra pāñcālyasya mahātmanaḥ |
nāśakatpramukhe sthātuṃ śarajālaprapīḍitaḥ || 4 ||
[Analyze grammar]

sa tu duḥśāsanaṃ bāṇairvimukhīkṛtya pārṣataḥ |
kirañśarasahasrāṇi droṇamevābhyayādraṇe || 5 ||
[Analyze grammar]

pratyapadyata hārdikyaḥ kṛtavarmā tadantaram |
sodaryāṇāṃ trayaścaiva ta enaṃ paryavārayan || 6 ||
[Analyze grammar]

taṃ yamau pṛṣṭhato'nvaitāṃ rakṣantau puruṣarṣabhau |
droṇāyābhimukhaṃ yāntaṃ dīpyamānamivānalam || 7 ||
[Analyze grammar]

saṃprahāramakurvaṃste sarve sapta mahārathāḥ |
amarṣitāḥ sattvavantaḥ kṛtvā maraṇamagrataḥ || 8 ||
[Analyze grammar]

śuddhātmānaḥ śuddhavṛttā rājansvargapuraskṛtāḥ |
āryaṃ yuddhamakurvanta parasparajigīṣavaḥ || 9 ||
[Analyze grammar]

śuklābhijanakarmāṇo matimanto janādhipāḥ |
dharmayuddhamayudhyanta prekṣanto gatimuttamām || 10 ||
[Analyze grammar]

na tatrāsīdadharmiṣṭhamaśastraṃ yuddhameva ca |
nātra karṇī na nālīko na lipto na ca vastakaḥ || 11 ||
[Analyze grammar]

na sūcī kapiśo nātra na gavāsthirgajāsthikaḥ |
iṣurāsīnna saṃśliṣṭo na pūtirna ca jihmagaḥ || 12 ||
[Analyze grammar]

ṛjūnyeva viśuddhāni sarve śastrāṇyadhārayan |
suyuddhena parāṃllokānīpsantaḥ kīrtimeva ca || 13 ||
[Analyze grammar]

tadāsīttumulaṃ yuddhaṃ sarvadoṣavivarjitam |
caturṇāṃ tava yodhānāṃ taistribhiḥ pāṇḍavaiḥ saha || 14 ||
[Analyze grammar]

dhṛṣṭadyumnastu tānhitvā tava rājanratharṣabhān |
yamābhyāṃ vāritāndṛṣṭvā śīghrāstro droṇamabhyayāt || 15 ||
[Analyze grammar]

nivāritāstu te vīrāstayoḥ puruṣasiṃhayoḥ |
samasajjanta catvāro vātāḥ parvatayoriva || 16 ||
[Analyze grammar]

dvābhyāṃ dvābhyāṃ yamau sārdhaṃ rathābhyāṃ rathapuṃgavau |
samāsaktau tato droṇaṃ dhṛṣṭadyumno'bhyavartata || 17 ||
[Analyze grammar]

dṛṣṭvā droṇāya pāñcālyaṃ vrajantaṃ yuddhadurmadam |
yamābhyāṃ tāṃśca saṃsaktāṃstadantaramupādravat || 18 ||
[Analyze grammar]

duryodhano mahārāja kirañśoṇitabhojanān |
taṃ sātyakiḥ śīghrataraṃ punarevābhyavartata || 19 ||
[Analyze grammar]

tau parasparamāsādya samīpe kurumādhavau |
hasamānau nṛśārdūlāvabhītau samagacchatām || 20 ||
[Analyze grammar]

bālye vṛttāni sarvāṇi prīyamāṇau vicintya tau |
anyonyaṃ prekṣamāṇau ca hasamānau punaḥ punaḥ || 21 ||
[Analyze grammar]

atha duryodhano rājā sātyakiṃ pratyabhāṣata |
priyaṃ sakhāyaṃ satataṃ garhayanvṛttamātmanaḥ || 22 ||
[Analyze grammar]

dhikkrodhaṃ dhiksakhe lobhaṃ dhiṅmohaṃ dhigamarṣitam |
dhigastu kṣātramācāraṃ dhigastu balamaurasam || 23 ||
[Analyze grammar]

yattvaṃ māmabhisaṃdhatse tvāṃ cāhaṃ śinipuṃgava |
tvaṃ hi prāṇaiḥ priyataro mamāhaṃ ca sadā tava || 24 ||
[Analyze grammar]

smarāmi tāni sarvāṇi bālye vṛttāni yāni nau |
tāni sarvāṇi jīrṇāni sāṃprataṃ nau raṇājire |
kimanyatkrodhalobhābhyāṃ yudhyāmi tvādya sātvata || 25 ||
[Analyze grammar]

taṃ tathāvādinaṃ rājansātyakiḥ pratyabhāṣata |
prahasanviśikhāṃstīkṣṇānudyamya paramāstravit || 26 ||
[Analyze grammar]

neyaṃ sabhā rājaputra na cācāryaniveśanam |
yatra krīḍitamasmābhistadā rājansamāgataiḥ || 27 ||
[Analyze grammar]

duryodhana uvāca |
kva sā krīḍā gatāsmākaṃ bālye vai śinipuṃgava |
kva ca yuddhamidaṃ bhūyaḥ kālo hi duratikramaḥ || 28 ||
[Analyze grammar]

kiṃ nu no vidyate kṛtyaṃ dhanena dhanalipsayā |
yatra yudhyāmahe sarve dhanalobhātsamāgatāḥ || 29 ||
[Analyze grammar]

saṃjaya uvāca |
taṃ tathāvādinaṃ tatra rājānaṃ mādhavo'bravīt |
evaṃvṛttaṃ sadā kṣatraṃ yaddhantīha gurūnapi || 30 ||
[Analyze grammar]

yadi te'haṃ priyo rājañjahi māṃ mā ciraṃ kṛthāḥ |
tvatkṛte sukṛtāṃllokāngaccheyaṃ bharatarṣabha || 31 ||
[Analyze grammar]

yā te śaktirbalaṃ caiva tatkṣipraṃ mayi darśaya |
necchāmyetadahaṃ draṣṭuṃ mitrāṇāṃ vyasanaṃ mahat || 32 ||
[Analyze grammar]

ityevaṃ vyaktamābhāṣya pratibhāṣya ca sātyakiḥ |
abhyayāttūrṇamavyagro nirapekṣo viśāṃ pate || 33 ||
[Analyze grammar]

tamāyāntamabhiprekṣya pratyagṛhṇāttavātmajaḥ |
śaraiścāvākiradrājañśaineyaṃ tanayastava || 34 ||
[Analyze grammar]

tataḥ pravavṛte yuddhaṃ kurumādhavasiṃhayoḥ |
anyonyaṃ kruddhayorghoraṃ yathā dviradasiṃhayoḥ || 35 ||
[Analyze grammar]

tataḥ pūrṇāyatotsṛṣṭaiḥ sātvataṃ yuddhadurmadam |
duryodhanaḥ pratyavidhyaddaśabhirniśitaiḥ śaraiḥ || 36 ||
[Analyze grammar]

taṃ sātyakiḥ pratyavidhyattathaiva daśabhiḥ śaraiḥ |
pañcāśatā punaścājau triṃśatā daśabhiśca ha || 37 ||
[Analyze grammar]

tasya saṃdadhataśceṣūnsaṃhiteṣuṃ ca kārmukam |
acchinatsātyakistūrṇaṃ śaraiścaivābhyavīvṛṣat || 38 ||
[Analyze grammar]

sa gāḍhaviddho vyathitaḥ pratyapāyādrathāntaram |
duryodhano mahārāja dāśārhaśarapīḍitaḥ || 39 ||
[Analyze grammar]

samāśvasya tu putraste sātyakiṃ punarabhyayāt |
visṛjanniṣujālāni yuyudhānarathaṃ prati || 40 ||
[Analyze grammar]

tathaiva sātyakirbāṇānduryodhanarathaṃ prati |
pratataṃ vyasṛjadrājaṃstatsaṃkulamavartata || 41 ||
[Analyze grammar]

tatreṣubhiḥ kṣipyamāṇaiḥ patadbhiśca samantataḥ |
agneriva mahākakṣe śabdaḥ samabhavanmahān || 42 ||
[Analyze grammar]

tatrābhyadhikamālakṣya mādhavaṃ rathasattamam |
kṣipramabhyapatatkarṇaḥ parīpsaṃstanayaṃ tava || 43 ||
[Analyze grammar]

na tu taṃ marṣayāmāsa bhīmaseno mahābalaḥ |
abhyayāttvaritaḥ karṇaṃ visṛjansāyakānbahūn || 44 ||
[Analyze grammar]

tasya karṇaḥ śitānbāṇānpratihanya hasanniva |
dhanuḥ śarāṃśca ciccheda sūtaṃ cābhyahanaccharaiḥ || 45 ||
[Analyze grammar]

bhīmasenastu saṃkruddho gadāmādāya pāṇḍavaḥ |
dhvajaṃ dhanuśca sūtaṃ ca saṃmamardāhave ripoḥ || 46 ||
[Analyze grammar]

amṛṣyamāṇaḥ karṇastu bhīmasenamayudhyata |
vividhairiṣujālaiśca nānāśastraiśca saṃyuge || 47 ||
[Analyze grammar]

saṃkule vartamāne tu rājā dharmasuto'bravīt |
pāñcālānāṃ naravyāghrānmatsyānāṃ ca nararṣabhān || 48 ||
[Analyze grammar]

ye naḥ prāṇāḥ śiro ye no ye no yodhā mahābalāḥ |
ta ete dhārtarāṣṭreṣu viṣaktāḥ puruṣarṣabhāḥ || 49 ||
[Analyze grammar]

kiṃ tiṣṭhata yathā mūḍhāḥ sarve vigatacetasaḥ |
tatra gacchata yatraite yudhyante māmakā rathāḥ || 50 ||
[Analyze grammar]

kṣatradharmaṃ puraskṛtya sarva eva gatajvarāḥ |
jayanto vadhyamānā vā gatimiṣṭāṃ gamiṣyatha || 51 ||
[Analyze grammar]

jitvā ca bahubhiryajñairyakṣyadhvaṃ bhūridakṣiṇaiḥ |
hatā vā devasādbhūtvā lokānprāpsyatha puṣkalān || 52 ||
[Analyze grammar]

te rājñā coditā vīrā yotsyamānā mahārathāḥ |
caturdhā vahinīṃ kṛtvā tvaritā droṇamabhyayuḥ || 53 ||
[Analyze grammar]

pāñcālāstvekato droṇamabhyaghnanbahubhiḥ śaraiḥ |
bhīmasenapurogāśca ekataḥ paryavārayan || 54 ||
[Analyze grammar]

āsaṃstu pāṇḍuputrāṇāṃ trayo'jihmā mahārathāḥ |
yamau ca bhīmasenaśca prākrośanta dhanaṃjayam || 55 ||
[Analyze grammar]

abhidravārjuna kṣipraṃ kurūndroṇādapānuda |
tata enaṃ haniṣyanti pāñcālā hatarakṣiṇam || 56 ||
[Analyze grammar]

kauraveyāṃstataḥ pārthaḥ sahasā samupādravat |
pāñcālāneva tu droṇo dhṛṣṭadyumnapurogamān || 57 ||
[Analyze grammar]

pāñcālānāṃ tato droṇo'pyakarotkadanaṃ mahat |
yathā kruddho raṇe śakro dānavānāṃ kṣayaṃ purā || 58 ||
[Analyze grammar]

droṇāstreṇa mahārāja vadhyamānāḥ pare yudhi |
nātrasanta raṇe droṇātsattvavanto mahārathāḥ || 59 ||
[Analyze grammar]

vadhyamānā mahārāja pāñcālāḥ sṛñjayāstathā |
droṇamevābhyayuryuddhe mohayanto mahāratham || 60 ||
[Analyze grammar]

teṣāṃ tūtsādyamānānāṃ pāñcālānāṃ samantataḥ |
abhavadbhairavo nādo vadhyatāṃ śaraśaktibhiḥ || 61 ||
[Analyze grammar]

vadhyamāneṣu saṃgrāme pāñcāleṣu mahātmanā |
udīryamāṇe droṇāstre pāṇḍavānbhayamāviśat || 62 ||
[Analyze grammar]

dṛṣṭvāśvanarasaṃghānāṃ vipulaṃ ca kṣayaṃ yudhi |
pāṇḍaveyā mahārāja nāśaṃsurvijayaṃ tadā || 63 ||
[Analyze grammar]

kacciddroṇo na naḥ sarvānkṣapayetparamāstravit |
samiddhaḥ śiśirāpāye dahankakṣamivānalaḥ || 64 ||
[Analyze grammar]

na cainaṃ saṃyuge kaścitsamarthaḥ prativīkṣitum |
na cainamarjuno jātu pratiyudhyeta dharmavit || 65 ||
[Analyze grammar]

trastānkuntīsutāndṛṣṭvā droṇasāyakapīḍitān |
matimāñśreyase yuktaḥ keśavo'rjunamabravīt || 66 ||
[Analyze grammar]

naiṣa yuddhena saṃgrāme jetuṃ śakyaḥ kathaṃcana |
api vṛtrahaṇā yuddhe rathayūthapayūthapaḥ || 67 ||
[Analyze grammar]

āsthīyatāṃ jaye yogo dharmamutsṛjya pāṇḍava |
yathā vaḥ saṃyuge sarvānna hanyādrukmavāhanaḥ || 68 ||
[Analyze grammar]

aśvatthāmni hate naiṣa yudhyediti matirmama |
taṃ hataṃ saṃyuge kaścidasmai śaṃsatu mānavaḥ || 69 ||
[Analyze grammar]

etannārocayadrājankuntīputro dhanaṃjayaḥ |
anye tvarocayansarve kṛcchreṇa tu yudhiṣṭhiraḥ || 70 ||
[Analyze grammar]

tato bhīmo mahābāhuranīke sve mahāgajam |
jaghāna gadayā rājannaśvatthāmānamityuta || 71 ||
[Analyze grammar]

bhīmasenastu savrīḍamupetya droṇamāhave |
aśvatthāmā hata iti śabdamuccaiścakāra ha || 72 ||
[Analyze grammar]

aśvatthāmeti hi gajaḥ khyāto nāmnā hato'bhavat |
kṛtvā manasi taṃ bhīmo mithyā vyāhṛtavāṃstadā || 73 ||
[Analyze grammar]

bhīmasenavacaḥ śrutvā droṇastatparamapriyam |
manasā sannagātro'bhūdyathā saikatamambhasi || 74 ||
[Analyze grammar]

śaṅkamānaḥ sa tanmithyā vīryajñaḥ svasutasya vai |
hataḥ sa iti ca śrutvā naiva dhairyādakampata || 75 ||
[Analyze grammar]

sa labdhvā cetanāṃ droṇaḥ kṣaṇenaiva samāśvasat |
anucintyātmanaḥ putramaviṣahyamarātibhiḥ || 76 ||
[Analyze grammar]

sa pārṣatamabhidrutya jighāṃsurmṛtyumātmanaḥ |
avākiratsahasreṇa tīkṣṇānāṃ kaṅkapatriṇām || 77 ||
[Analyze grammar]

taṃ vai viṃśatisāhasrāḥ pāñcālānāṃ nararṣabhāḥ |
tathā carantaṃ saṃgrāme sarvato vyakirañśaraiḥ || 78 ||
[Analyze grammar]

tataḥ prāduṣkaroddroṇo brāhmamastraṃ paraṃtapaḥ |
vadhāya teṣāṃ śūrāṇāṃ pāñcālānāmamarṣitaḥ || 79 ||
[Analyze grammar]

tato vyarocata droṇo vinighnansarvasomakān |
śirāṃsyapātayaccāpi pāñcālānāṃ mahāmṛdhe |
tathaiva parighākārānbāhūnkanakabhūṣaṇān || 80 ||
[Analyze grammar]

te vadhyamānāḥ samare bhāradvājena pārthivāḥ |
medinyāmanvakīryanta vātanunnā iva drumāḥ || 81 ||
[Analyze grammar]

kuñjarāṇāṃ ca patatāṃ hayaughānāṃ ca bhārata |
agamyarūpā pṛthivī māṃsaśoṇitakardamā || 82 ||
[Analyze grammar]

hatvā viṃśatisāhasrānpāñcālānāṃ rathavrajān |
atiṣṭhadāhave droṇo vidhūmo'gniriva jvalan || 83 ||
[Analyze grammar]

tathaiva ca punaḥ kruddho bhāradvājaḥ pratāpavān |
vasudānasya bhallena śiraḥ kāyādapāharat || 84 ||
[Analyze grammar]

punaḥ pañcaśatānmatsyānṣaṭsahasrāṃśca sṛñjayān |
hastināmayutaṃ hatvā jaghānāśvāyutaṃ punaḥ || 85 ||
[Analyze grammar]

kṣatriyāṇāmabhāvāya dṛṣṭvā droṇamavasthitam |
ṛṣayo'bhyāgamaṃstūrṇaṃ havyavāhapurogamāḥ || 86 ||
[Analyze grammar]

viśvāmitro jamadagnirbhāradvājo'tha gautamaḥ |
vasiṣṭhaḥ kaśyapo'triśca brahmalokaṃ ninīṣavaḥ || 87 ||
[Analyze grammar]

sikatāḥ pṛśnayo gargā bālakhilyā marīcipāḥ |
bhṛgavo'ṅgirasaścaiva sūkṣmāścānye maharṣayaḥ || 88 ||
[Analyze grammar]

ta enamabruvansarve droṇamāhavaśobhinam |
adharmataḥ kṛtaṃ yuddhaṃ samayo nidhanasya te || 89 ||
[Analyze grammar]

nyasyāyudhaṃ raṇe droṇa sametyāsmānavasthitān |
nātaḥ krūrataraṃ karma punaḥ kartuṃ tvamarhasi || 90 ||
[Analyze grammar]

vedavedāṅgaviduṣaḥ satyadharmaparasya ca |
brāhmaṇasya viśeṣeṇa tavaitannopapadyate || 91 ||
[Analyze grammar]

nyasyāyudhamamogheṣo tiṣṭha vartmani śāśvate |
paripūrṇaśca kālaste vastuṃ loke'dya mānuṣe || 92 ||
[Analyze grammar]

iti teṣāṃ vacaḥ śrutvā bhīmasenavacaśca tat |
dhṛṣṭadyumnaṃ ca saṃprekṣya raṇe sa vimanābhavat || 93 ||
[Analyze grammar]

sa dahyamāno vyathitaḥ kuntīputraṃ yudhiṣṭhiram |
ahataṃ vā hataṃ veti papraccha sutamātmanaḥ || 94 ||
[Analyze grammar]

sthirā buddhirhi droṇasya na pārtho vakṣyate'nṛtam |
trayāṇāmapi lokānāmaiśvaryārthe kathaṃcana || 95 ||
[Analyze grammar]

tasmāttaṃ paripapraccha nānyaṃ kaṃcidviśeṣataḥ |
tasmiṃstasya hi satyāśā bālyātprabhṛti pāṇḍave || 96 ||
[Analyze grammar]

tato niṣpāṇḍavāmurvīṃ kariṣyantaṃ yudhāṃ patim |
droṇaṃ jñātvā dharmarājaṃ govindo vyathito'bravīt || 97 ||
[Analyze grammar]

yadyardhadivasaṃ droṇo yudhyate manyumāsthitaḥ |
satyaṃ bravīmi te senā vināśaṃ samupaiṣyati || 98 ||
[Analyze grammar]

sa bhavāṃstrātu no droṇātsatyājjyāyo'nṛtaṃ bhavet |
anṛtaṃ jīvitasyārthe vadanna spṛśyate'nṛtaiḥ || 99 ||
[Analyze grammar]

tayoḥ saṃvadatorevaṃ bhīmaseno'bravīdidam |
śrutvaiva taṃ mahārāja vadhopāyaṃ mahātmanaḥ || 100 ||
[Analyze grammar]

gāhamānasya te senāṃ mālavasyendravarmaṇaḥ |
aśvatthāmeti vikhyāto gajaḥ śakragajopamaḥ || 101 ||
[Analyze grammar]

nihato yudhi vikramya tato'haṃ droṇamabruvam |
aśvatthāmā hato brahmannivartasvāhavāditi || 102 ||
[Analyze grammar]

nūnaṃ nāśraddadhadvākyameṣa me puruṣarṣabhaḥ |
sa tvaṃ govindavākyāni mānayasva jayaiṣiṇaḥ || 103 ||
[Analyze grammar]

droṇāya nihataṃ śaṃsa rājañśāradvatīsutam |
tvayokto naiṣa yudhyeta jātu rājandvijarṣabhaḥ |
satyavānhi nṛloke'sminbhavānkhyāto janādhipa || 104 ||
[Analyze grammar]

tasya tadvacanaṃ śrutvā kṛṣṇavākyapracoditaḥ |
bhāvitvācca mahārāja vaktuṃ samupacakrame || 105 ||
[Analyze grammar]

tamatathyabhaye magno jaye sakto yudhiṣṭhiraḥ |
avyaktamabravīdrājanhataḥ kuñjara ityuta || 106 ||
[Analyze grammar]

tasya pūrvaṃ rathaḥ pṛthvyāścaturaṅgula uttaraḥ |
babhūvaivaṃ tu tenokte tasya vāhāspṛśanmahīm || 107 ||
[Analyze grammar]

yudhiṣṭhirāttu tadvākyaṃ śrutvā droṇo mahārathaḥ |
putravyasanasaṃtapto nirāśo jīvite'bhavat || 108 ||
[Analyze grammar]

āgaskṛtamivātmānaṃ pāṇḍavānāṃ mahātmanām |
ṛṣivākyaṃ ca manvānaḥ śrutvā ca nihataṃ sutam || 109 ||
[Analyze grammar]

vicetāḥ paramodvigno dhṛṣṭadyumnamavekṣya ca |
yoddhuṃ nāśaknuvadrājanyathāpūrvamariṃdama || 110 ||
[Analyze grammar]

taṃ dṛṣṭvā paramodvignaṃ śokopahatacetasam |
pāñcālarājasya suto dhṛṣṭadyumnaḥ samādravat || 111 ||
[Analyze grammar]

ya iṣṭvā manujendreṇa drupadena mahāmakhe |
labdho droṇavināśāya samiddhāddhavyavāhanāt || 112 ||
[Analyze grammar]

sa dhanurjaitramādāya ghoraṃ jaladanisvanam |
dṛḍhajyamajaraṃ divyaṃ śarāṃścāśīviṣopamān || 113 ||
[Analyze grammar]

saṃdadhe kārmuke tasmiñśaramāśīviṣopamam |
droṇaṃ jighāṃsuḥ pāñcālyo mahājvālamivānalam || 114 ||
[Analyze grammar]

tasya rūpaṃ śarasyāsīddhanurjyāmaṇḍalāntare |
dyotato bhāskarasyeva ghanānte pariveśinaḥ || 115 ||
[Analyze grammar]

pārṣatena parāmṛṣṭaṃ jvalantamiva taddhanuḥ |
antakālamiva prāptaṃ menire vīkṣya sainikāḥ || 116 ||
[Analyze grammar]

tamiṣuṃ saṃhitaṃ tena bhāradvājaḥ pratāpavān |
dṛṣṭvāmanyata dehasya kālaparyāyamāgatam || 117 ||
[Analyze grammar]

tataḥ sa yatnamātiṣṭhadācāryastasya vāraṇe |
na cāsyāstrāṇi rājendra prādurāsanmahātmanaḥ || 118 ||
[Analyze grammar]

tasya tvahāni catvāri kṣapā caikāsyato gatā |
tasya cāhnastribhāgena kṣayaṃ jagmuḥ patatriṇaḥ || 119 ||
[Analyze grammar]

sa śarakṣayamāsādya putraśokena cārditaḥ |
vividhānāṃ ca divyānāmastrāṇāmaprasannatām || 120 ||
[Analyze grammar]

utsraṣṭukāmaḥ śastrāṇi vipravākyābhicoditaḥ |
tejasā preryamāṇaśca yuyudhe so'timānuṣam || 121 ||
[Analyze grammar]

athānyatsa samādāya divyamāṅgirasaṃ dhanuḥ |
śarāṃśca brahmadaṇḍābhāndhṛṣṭadyumnamayodhayat || 122 ||
[Analyze grammar]

tatastaṃ śaravarṣeṇa mahatā samavākirat |
vyaśātayacca saṃkruddho dhṛṣṭadyumnamamarṣaṇaḥ || 123 ||
[Analyze grammar]

taṃ śaraṃ śatadhā cāsya droṇaściccheda sāyakaiḥ |
dhvajaṃ dhanuśca niśitaiḥ sārathiṃ cāpyapātayat || 124 ||
[Analyze grammar]

dhṛṣṭadyumnaḥ prahasyānyatpunarādāya kārmukam |
śitena cainaṃ bāṇena pratyavidhyatstanāntare || 125 ||
[Analyze grammar]

so'tividdho maheṣvāsaḥ saṃbhrānta iva saṃyuge |
bhallena śitadhāreṇa cicchedāsya mahaddhanuḥ || 126 ||
[Analyze grammar]

yaccāsya bāṇaṃ vikṛtaṃ dhanūṃṣi ca viśāṃ pate |
sarvaṃ saṃchidya durdharṣo gadāṃ khaḍgamathāpi ca || 127 ||
[Analyze grammar]

dhṛṣṭadyumnaṃ tato'vidhyannavabhirniśitaiḥ śaraiḥ |
jīvitāntakaraiḥ kruddhaḥ kruddharūpaṃ paraṃtapaḥ || 128 ||
[Analyze grammar]

dhṛṣṭadyumnarathasyāśvānsvarathāśvairmahārathaḥ |
amiśrayadameyātmā brāhmamastramudīrayan || 129 ||
[Analyze grammar]

te miśrā bahvaśobhanta javanā vātaraṃhasaḥ |
pārāvatasavarṇāśca śoṇāśca bharatarṣabha || 130 ||
[Analyze grammar]

yathā savidyuto meghā nadanto jaladāgame |
tathā rejurmahārāja miśritā raṇamūrdhani || 131 ||
[Analyze grammar]

īṣābandhaṃ cakrabandhaṃ rathabandhaṃ tathaiva ca |
praṇāśayadameyātmā dhṛṣṭadyumnasya sa dvijaḥ || 132 ||
[Analyze grammar]

sa chinnadhanvā viratho hatāśvo hatasārathiḥ |
uttamāmāpadaṃ prāpya gadāṃ vīraḥ parāmṛśat || 133 ||
[Analyze grammar]

tāmasya viśikhaistīkṣṇaiḥ kṣipyamāṇāṃ mahārathaḥ |
nijaghāna śarairdroṇaḥ kruddhaḥ satyaparākramaḥ || 134 ||
[Analyze grammar]

tāṃ dṛṣṭvā tu naravyāghro droṇena nihatāṃ śaraiḥ |
vimalaṃ khaḍgamādatta śatacandraṃ ca bhānumat || 135 ||
[Analyze grammar]

asaṃśayaṃ tathābhūte pāñcālyaḥ sādhvamanyata |
vadhamācāryamukhyasya prāptakālaṃ mahātmanaḥ || 136 ||
[Analyze grammar]

tataḥ svarathanīḍasthaḥ svarathasya ratheṣayā |
agacchadasimudyamya śatacandraṃ ca bhānumat || 137 ||
[Analyze grammar]

cikīrṣurduṣkaraṃ karma dhṛṣṭadyumno mahārathaḥ |
iyeṣa vakṣo bhettuṃ ca bhāradvājasya saṃyuge || 138 ||
[Analyze grammar]

so'tiṣṭhadyugamadhye vai yugasaṃnahaneṣu ca |
śoṇānāṃ jaghanārdheṣu tatsainyāḥ samapūjayan || 139 ||
[Analyze grammar]

tiṣṭhato yugapālīṣu śoṇānapyadhitiṣṭhataḥ |
nāpaśyadantaraṃ droṇastadadbhutamivābhavat || 140 ||
[Analyze grammar]

kṣipraṃ śyenasya carato yathaivāmiṣagṛddhinaḥ |
tadvadāsīdabhīsāro droṇaṃ prārthayato raṇe || 141 ||
[Analyze grammar]

tasyāśvānrathaśaktyāsau tadā kruddhaḥ parākramī |
sarvānekaikaśo droṇaḥ kapotābhānajīghanat || 142 ||
[Analyze grammar]

te hatā nyapatanbhūmau dhṛṣṭadyumnasya vājinaḥ |
śoṇāśca paryamucyanta rathabandhādviśāṃ pate || 143 ||
[Analyze grammar]

tānhayānnihatāndṛṣṭvā dvijāgryeṇa sa pārṣataḥ |
nāmṛṣyata yudhāṃ śreṣṭho yājñasenirmahārathaḥ || 144 ||
[Analyze grammar]

virathaḥ sa gṛhītvā tu khaḍgaṃ khaḍgabhṛtāṃ varaḥ |
droṇamabhyapatadrājanvainateya ivoragam || 145 ||
[Analyze grammar]

tasya rūpaṃ babhau rājanbhāradvājaṃ jighāṃsataḥ |
yathā rūpaṃ paraṃ viṣṇorhiraṇyakaśiporvadhe || 146 ||
[Analyze grammar]

so'caradvividhānmārgānprakārānekaviṃśatim |
bhrāntamudbhrāntamāviddhamāplutaṃ prasṛtaṃ sṛtam || 147 ||
[Analyze grammar]

parivṛttaṃ nivṛttaṃ ca khaḍgaṃ carma ca dhārayan |
saṃpātaṃ samudīrṇaṃ ca darśayāmāsa pārṣataḥ || 148 ||
[Analyze grammar]

tataḥ śarasahasreṇa śatacandramapātayat |
khaḍgaṃ carma ca saṃbādhe dhṛṣṭadyumnasya sa dvijaḥ || 149 ||
[Analyze grammar]

te tu vaitastikā nāma śarā hyāsannaghātinaḥ |
nikṛṣṭayuddhe droṇasya nānyeṣāṃ santi te śarāḥ || 150 ||
[Analyze grammar]

śāradvatasya pārthasya drauṇervaikartanasya ca |
pradyumnayuyudhānābhyāmabhimanyośca te śarāḥ || 151 ||
[Analyze grammar]

athāsyeṣuṃ samādhatta dṛḍhaṃ paramasaṃśitam |
antevāsinamācāryo jighāṃsuḥ putrasaṃmitam || 152 ||
[Analyze grammar]

taṃ śarairdaśabhistīkṣṇaiściccheda śinipuṃgavaḥ |
paśyatastava putrasya karṇasya ca mahātmanaḥ |
grastamācāryamukhyena dhṛṣṭadyumnamamocayat || 153 ||
[Analyze grammar]

carantaṃ rathamārgeṣu sātyakiṃ satyavikramam |
droṇakarṇāntaragataṃ kṛpasyāpi ca bhārata |
apaśyetāṃ mahātmānau viṣvaksenadhanaṃjayau || 154 ||
[Analyze grammar]

apūjayetāṃ vārṣṇeyaṃ bruvāṇau sādhu sādhviti |
divyānyastrāṇi sarveṣāṃ yudhi nighnantamacyutam |
abhipatya tataḥ senāṃ viṣvaksenadhanaṃjayau || 155 ||
[Analyze grammar]

dhanaṃjayastataḥ kṛṣṇamabravītpaśya keśava |
ācāryavaramukhyānāṃ madhye krīḍanmadhūdvahaḥ || 156 ||
[Analyze grammar]

ānandayati māṃ bhūyaḥ sātyakiḥ satyavikramaḥ |
mādrīputrau ca bhīmaṃ ca rājānaṃ ca yudhiṣṭhiram || 157 ||
[Analyze grammar]

yacchikṣayānuddhataḥ sanraṇe carati sātyakiḥ |
mahārathānupakrīḍanvṛṣṇīnāṃ kīrtivardhanaḥ || 158 ||
[Analyze grammar]

tamete pratinandanti siddhāḥ sainyāśca vismitāḥ |
ajayyaṃ samare dṛṣṭvā sādhu sādhviti sātvatam |
yodhāścobhayataḥ sarve karmabhiḥ samapūjayan || 159 ||
[Analyze grammar]