Chapter 163

saṃjaya uvāca |
tato duḥśāsanaḥ kruddhaḥ sahadevamupādravat |
rathavegena tīvreṇa kampayanniva medinīm || 1 ||
[Analyze grammar]

tasyāpatata evāśu bhallenāmitrakarśanaḥ |
mādrīsutaḥ śiro yantuḥ saśirastrāṇamacchinat || 2 ||
[Analyze grammar]

nainaṃ duḥśāsanaḥ sūtaṃ nāpi kaścana sainikaḥ |
hṛtottamāṅgamāśutvātsahadevena buddhavān || 3 ||
[Analyze grammar]

yadā tvasaṃgṛhītatvātprayāntyaśvā yathāsukham |
tato duḥśāsanaḥ sūtaṃ buddhavāngatacetasam || 4 ||
[Analyze grammar]

sa hayānsaṃnigṛhyājau svayaṃ hayaviśāradaḥ |
yuyudhe rathināṃ śreṣṭhaścitraṃ laghu ca suṣṭhu ca || 5 ||
[Analyze grammar]

tadasyāpūjayankarma sve pare caiva saṃyuge |
hatasūtarathenājau vyacaradyadabhītavat || 6 ||
[Analyze grammar]

sahadevastu tānaśvāṃstīkṣṇairbāṇairavākirat |
pīḍyamānāḥ śaraiścāśu prādravaṃste tatastataḥ || 7 ||
[Analyze grammar]

sa raśmiṣu viṣaktatvādutsasarja śarāsanam |
dhanuṣā karma kurvaṃstu raśmīnsa punarutsṛjat || 8 ||
[Analyze grammar]

chidreṣu teṣu taṃ bāṇairmādrīputro'bhyavākirat |
parīpsaṃstvatsutaṃ karṇastadantaramavāpatat || 9 ||
[Analyze grammar]

vṛkodarastataḥ karṇaṃ tribhirbhallaiḥ samāhitaiḥ |
ākarṇapūrṇairabhyaghnanbāhvorurasi cānadat || 10 ||
[Analyze grammar]

saṃnyavartata taṃ karṇaḥ saṃghaṭṭita ivoragaḥ |
tadabhūttumulaṃ yuddhaṃ bhīmarādheyayostadā || 11 ||
[Analyze grammar]

tau vṛṣāviva saṃkruddhau vivṛttanayanāvubhau |
vegena mahatānyonyaṃ saṃrabdhāvabhipetatuḥ || 12 ||
[Analyze grammar]

abhisaṃśliṣṭayostatra tayorāhavaśauṇḍayoḥ |
abhinnaśarapātatvādgadāyuddhamavartata || 13 ||
[Analyze grammar]

gadayā bhīmasenastu karṇasya rathakūbaram |
bibhedāśu tadā rājaṃstadadbhutamivābhavat || 14 ||
[Analyze grammar]

tato bhīmasya rādheyo gadāmādāya vīryavān |
avāsṛjadrathe tāṃ tu bibheda gadayā gadām || 15 ||
[Analyze grammar]

tato bhīmaḥ punargurvīṃ cikṣepādhirathergadām |
tāṃ śarairdaśabhiḥ karṇaḥ supuṅkhaiḥ susamāhitaiḥ |
pratyavidhyatpunaścānyaiḥ sā bhīmaṃ punarāvrajat || 16 ||
[Analyze grammar]

tasyāḥ pratinipātena bhīmasya vipulo dhvajaḥ |
papāta sārathiścāsya mumoha gadayā hataḥ || 17 ||
[Analyze grammar]

sa karṇe sāyakānaṣṭau vyasṛjatkrodhamūrchitaḥ |
dhvaje śarāsane caiva śarāvāpe ca bhārata || 18 ||
[Analyze grammar]

tataḥ punastu rādheyo hayānasya ratheṣubhiḥ |
ṛṣyavarṇāñjaghānāśu tathobhau pārṣṇisārathī || 19 ||
[Analyze grammar]

sa vipannaratho bhīmo nakulasyāpluto ratham |
hariryathā gireḥ śṛṅgaṃ samākrāmadariṃdamaḥ || 20 ||
[Analyze grammar]

tathā droṇārjunau citramayudhyetāṃ mahārathau |
ācāryaśiṣyau rājendra kṛtapraharaṇau yudhi || 21 ||
[Analyze grammar]

laghusaṃdhānayogābhyāṃ rathayośca raṇena ca |
mohayantau manuṣyāṇāṃ cakṣūṃṣi ca manāṃsi ca || 22 ||
[Analyze grammar]

upāramanta te sarve yodhāsmākaṃ pare tathā |
adṛṣṭapūrvaṃ paśyantastadyuddhaṃ guruśiṣyayoḥ || 23 ||
[Analyze grammar]

vicitrānpṛtanāmadhye rathamārgānudīryataḥ |
anyonyamapasavyaṃ ca kartuṃ vīrau tadaiṣatuḥ |
parākramaṃ tayoryodhā dadṛśustaṃ suvismitāḥ || 24 ||
[Analyze grammar]

tayoḥ samabhavadyuddhaṃ droṇapāṇḍavayormahat |
āmiṣārthaṃ mahārāja gagane śyenayoriva || 25 ||
[Analyze grammar]

yadyaccakāra droṇastu kuntīputrajigīṣayā |
tattatpratijaghānāśu prahasaṃstasya pāṇḍavaḥ || 26 ||
[Analyze grammar]

yadā droṇo na śaknoti pāṇḍavasya viśeṣaṇe |
tataḥ prāduścakārāstramastramārgaviśāradaḥ || 27 ||
[Analyze grammar]

aindraṃ pāśupataṃ tvāṣṭraṃ vāyavyamatha vāruṇam |
muktaṃ muktaṃ droṇacāpāttajjaghāna dhanaṃjayaḥ || 28 ||
[Analyze grammar]

astrāṇyastrairyadā tasya vidhivaddhanti pāṇḍavaḥ |
tato'straiḥ paramairdivyairdroṇaḥ pārthamavākirat || 29 ||
[Analyze grammar]

yadyadastraṃ sa pārthāya prayuṅkte vijigīṣayā |
tasyāstrasya vighātārthaṃ tattatsa kurute'rjunaḥ || 30 ||
[Analyze grammar]

sa vadhyamāneṣvastreṣu divyeṣvapi yathāvidhi |
arjunenārjunaṃ droṇo manasaivābhyapūjayat || 31 ||
[Analyze grammar]

mene cātmānamadhikaṃ pṛthivyāmapi bhārata |
tena śiṣyeṇa sarvebhyaḥ śastravidbhyaḥ samantataḥ || 32 ||
[Analyze grammar]

vāryamāṇastu pārthena tathā madhye mahātmanām |
yatamāno'rjunaṃ prītyā pratyavārayadutsmayan || 33 ||
[Analyze grammar]

tato'ntarikṣe devāśca gandharvāśca sahasraśaḥ |
ṛṣayaḥ siddhasaṃghāśca vyatiṣṭhanta didṛkṣayā || 34 ||
[Analyze grammar]

tadapsarobhirākīrṇaṃ yakṣarākṣasasaṃkulam |
śrīmadākāśamabhavadbhūyo meghākulaṃ yathā || 35 ||
[Analyze grammar]

tatra smāntarhitā vāco vyacaranta punaḥ punaḥ |
droṇasya stavasaṃyuktāḥ pārthasya ca mahātmanaḥ |
visṛjyamāneṣvastreṣu jvālayatsu diśo daśa || 36 ||
[Analyze grammar]

naivedaṃ mānuṣaṃ yuddhaṃ nāsuraṃ na ca rākṣasam |
na daivaṃ na ca gāndharvaṃ brāhmaṃ dhruvamidaṃ param |
vicitramidamāścaryaṃ na no dṛṣṭaṃ na ca śrutam || 37 ||
[Analyze grammar]

ati pāṇḍavamācāryo droṇaṃ cāpyati pāṇḍavaḥ |
nānayorantaraṃ draṣṭuṃ śakyamastreṇa kenacit || 38 ||
[Analyze grammar]

yadi rudro dvidhākṛtya yudhyetātmānamātmanā |
tatra śakyopamā kartumanyatra tu na vidyate || 39 ||
[Analyze grammar]

jñānamekasthamācārye jñānaṃ yogaśca pāṇḍave |
śauryamekasthamācārye balaṃ śauryaṃ ca pāṇḍave || 40 ||
[Analyze grammar]

nemau śakyau maheṣvāsau raṇe kṣepayituṃ paraiḥ |
icchamānau punarimau hanyetāṃ sāmaraṃ jagat || 41 ||
[Analyze grammar]

ityabruvanmahārāja dṛṣṭvā tau puruṣarṣabhau |
antarhitāni bhūtāni prakāśāni ca saṃghaśaḥ || 42 ||
[Analyze grammar]

tato droṇo brāhmamastraṃ prāduścakre mahāmatiḥ |
saṃtāpayanraṇe pārthaṃ bhūtānyantarhitāni ca || 43 ||
[Analyze grammar]

tataścacāla pṛthivī saparvatavanadrumā |
vavau ca viṣamo vāyuḥ sāgarāścāpi cukṣubhuḥ || 44 ||
[Analyze grammar]

tatastrāso mahānāsītkurupāṇḍavasenayoḥ |
sarveṣāṃ caiva bhūtānāmudyate'stre mahātmanā || 45 ||
[Analyze grammar]

tataḥ pārtho'pyasaṃbhrāntastadastraṃ pratijaghnivān |
brahmāstreṇaiva rājendra tataḥ sarvamaśīśamat || 46 ||
[Analyze grammar]

yadā na gamyate pāraṃ tayoranyatarasya vā |
tataḥ saṃkulayuddhena tadyuddhaṃ vyakulīkṛtam || 47 ||
[Analyze grammar]

nājñāyata tataḥ kiṃcitpunareva viśāṃ pate |
pravṛtte tumule yuddhe droṇapāṇḍavayormṛdhe || 48 ||
[Analyze grammar]

śarajālaiḥ samākīrṇe meghajālairivāmbare |
na sma saṃpatate kaścidantarikṣacarastadā || 49 ||
[Analyze grammar]