Chapter 165

saṃjaya uvāca |
krūramāyodhanaṃ jajñe tasminrājasamāgame |
rudrasyeva hi kruddhasya nighnatastu paśūnyathā || 1 ||
[Analyze grammar]

hastānāmuttamāṅgānāṃ kārmukāṇāṃ ca bhārata |
chatrāṇāṃ cāpaviddhānāṃ cāmarāṇāṃ ca saṃyuge || 2 ||
[Analyze grammar]

bhagnacakrai rathaiścāpi pātitaiśca mahādhvajaiḥ |
sādibhiśca hataiḥ śūraiḥ saṃkīrṇā vasudhābhavat || 3 ||
[Analyze grammar]

bāṇapātanikṛttāstu yodhāste kurusattama |
ceṣṭanto vividhāśceṣṭā vyadṛśyanta mahāhave || 4 ||
[Analyze grammar]

vartamāne tathā yuddhe ghore devāsuropame |
abravītkṣatriyāṃstatra dharmarājo yudhiṣṭhiraḥ |
abhidravata saṃyattāḥ kumbhayoniṃ mahārathāḥ || 5 ||
[Analyze grammar]

eṣa vai pārṣato vīro bhāradvājena saṃgataḥ |
ghaṭate ca yathāśakti bhāradvājasya nāśane || 6 ||
[Analyze grammar]

yādṛśāni hi rūpāṇi dṛśyante no mahāraṇe |
adya droṇaṃ raṇe kruddhaḥ pātayiṣyati pārṣataḥ |
te yūyaṃ sahitā bhūtvā kumbhayoniṃ parīpsata || 7 ||
[Analyze grammar]

yudhiṣṭhirasamājñaptāḥ sṛñjayānāṃ mahārathāḥ |
abhyadravanta saṃyattā bhāradvājaṃ jighāṃsavaḥ || 8 ||
[Analyze grammar]

tānsamāpatataḥ sarvānbhāradvājo mahārathaḥ |
abhyadravata vegena martavyamiti niścitaḥ || 9 ||
[Analyze grammar]

prayāte satyasaṃdhe tu samakampata medinī |
vavurvātāḥ sanirghātāstrāsayanto varūthinīm || 10 ||
[Analyze grammar]

papāta mahatī colkā ādityānnirgateva ha |
dīpayantīva tāpena śaṃsantīva mahadbhayam || 11 ||
[Analyze grammar]

jajvaluścaiva śastrāṇi bhāradvājasya māriṣa |
rathāḥ svananti cātyarthaṃ hayāścāśrūṇyavāsṛjan || 12 ||
[Analyze grammar]

hataujā iva cāpyāsīdbhāradvājo mahārathaḥ |
ṛṣīṇāṃ brahmavādānāṃ svargasya gamanaṃ prati |
suyuddhena tataḥ prāṇānutsraṣṭumupacakrame || 13 ||
[Analyze grammar]

tataścaturdiśaṃ sainyairdrupadasyābhisaṃvṛtaḥ |
nirdahankṣatriyavrātāndroṇaḥ paryacaradraṇe || 14 ||
[Analyze grammar]

hatvā viṃśatisāhasrānkṣatriyānarimardanaḥ |
daśāyutāni tīkṣṇāgrairavadhīdviśikhaiḥ śitaiḥ || 15 ||
[Analyze grammar]

so'tiṣṭhadāhave yatto vidhūma iva pāvakaḥ |
kṣatriyāṇāmabhāvāya brāhmamātmānamāsthitaḥ || 16 ||
[Analyze grammar]

pāñcālyaṃ virathaṃ bhīmo hatasarvāyudhaṃ vaśī |
aviṣaṇṇaṃ mahātmānaṃ tvaramāṇaḥ samabhyayāt || 17 ||
[Analyze grammar]

tataḥ svarathamāropya pāñcālyamarimardanaḥ |
abravīdabhisaṃprekṣya droṇamasyantamantikāt || 18 ||
[Analyze grammar]

na tvadanya ihācāryaṃ yoddhumutsahate pumān |
tvarasva prāgvadhāyaiva tvayi bhāraḥ samāhitaḥ || 19 ||
[Analyze grammar]

sa tathokto mahābāhuḥ sarvabhārasahaṃ navam |
abhipatyādade kṣipramāyudhapravaraṃ dṛḍham || 20 ||
[Analyze grammar]

saṃrabdhaśca śarānasyandroṇaṃ durvāraṇaṃ raṇe |
vivārayiṣurācāryaṃ śaravarṣairavākirat || 21 ||
[Analyze grammar]

tau nyavārayatāṃ śreṣṭhau saṃrabdhau raṇaśobhinau |
udīrayetāṃ brāhmāṇi divyānyastrāṇyanekaśaḥ || 22 ||
[Analyze grammar]

sa mahāstrairmahārāja droṇamācchādayadraṇe |
nihatya sarvāṇyastrāṇi bhāradvājasya pārṣataḥ || 23 ||
[Analyze grammar]

sa vasātīñśibīṃścaiva bāhlīkānkauravānapi |
rakṣiṣyamāṇānsaṃgrāme droṇaṃ vyadhamadacyutaḥ || 24 ||
[Analyze grammar]

dhṛṣṭadyumnastadā rājangabhastibhirivāṃśumān |
babhau pracchādayannāśāḥ śarajālaiḥ samantataḥ || 25 ||
[Analyze grammar]

tasya droṇo dhanuśchittvā viddhvā cainaṃ śilīmukhaiḥ |
marmāṇyabhyahanadbhūyaḥ sa vyathāṃ paramāmagāt || 26 ||
[Analyze grammar]

tato bhīmo dṛḍhakrodho droṇasyāśliṣya taṃ ratham |
śanakairiva rājendra droṇaṃ vacanamabravīt || 27 ||
[Analyze grammar]

yadi nāma na yudhyerañśikṣitā brahmabandhavaḥ |
svakarmabhirasaṃtuṣṭā na sma kṣatraṃ kṣayaṃ vrajet || 28 ||
[Analyze grammar]

ahiṃsā sarvabhūteṣu dharmaṃ jyāyastaraṃ viduḥ |
tasya ca brāhmaṇo mūlaṃ bhavāṃśca brahmavittamaḥ || 29 ||
[Analyze grammar]

śvapākavanmlecchagaṇānhatvā cānyānpṛthagvidhān |
ajñānānmūḍhavadbrahmanputradāradhanepsayā || 30 ||
[Analyze grammar]

ekasyārthe bahūnhatvā putrasyādharmavidyathā |
svakarmasthānvikarmastho na vyapatrapase katham || 31 ||
[Analyze grammar]

sa cādya patitaḥ śete pṛṣṭenāveditastava |
dharmarājena tadvākyaṃ nātiśaṅkitumarhasi || 32 ||
[Analyze grammar]

evamuktastato droṇo bhīmenotsṛjya taddhanuḥ |
sarvāṇyastrāṇi dharmātmā hātukāmo'bhyabhāṣata |
karṇa karṇa maheṣvāsa kṛpa duryodhaneti ca || 33 ||
[Analyze grammar]

saṃgrāme kriyatāṃ yatno bravīmyeṣa punaḥ punaḥ |
pāṇḍavebhyaḥ śivaṃ vo'stu śastramabhyutsṛjāmyaham || 34 ||
[Analyze grammar]

iti tatra mahārāja prākrośaddrauṇimeva ca |
utsṛjya ca raṇe śastraṃ rathopasthe niveśya ca |
abhayaṃ sarvabhūtānāṃ pradadau yogayuktavān || 35 ||
[Analyze grammar]

tasya tacchidramājñāya dhṛṣṭadyumnaḥ samutthitaḥ |
khaḍgī rathādavaplutya sahasā droṇamabhyayāt || 36 ||
[Analyze grammar]

hāhākṛtāni bhūtāni mānuṣāṇītarāṇi ca |
droṇaṃ tathāgataṃ dṛṣṭvā dhṛṣṭadyumnavaśaṃ gatam || 37 ||
[Analyze grammar]

hāhākāraṃ bhṛśaṃ cakruraho dhigiti cābruvan |
droṇo'pi śastrāṇyutsṛjya paramaṃ sāmyamāsthitaḥ || 38 ||
[Analyze grammar]

tathoktvā yogamāsthāya jyotirbhūto mahātapāḥ |
divamākrāmadācāryaḥ sadbhiḥ saha durākramam || 39 ||
[Analyze grammar]

dvau sūryāviti no buddhirāsīttasmiṃstathā gate |
ekāgramiva cāsīddhi jyotirbhiḥ pūritaṃ nabhaḥ |
samapadyata cārkābhe bhāradvājaniśākare || 40 ||
[Analyze grammar]

nimeṣamātreṇa ca tajjyotirantaradhīyata |
āsītkilakilāśabdaḥ prahṛṣṭānāṃ divaukasām |
brahmalokaṃ gate droṇe dhṛṣṭadyumne ca mohite || 41 ||
[Analyze grammar]

vayameva tadādrākṣma pañca mānuṣayonayaḥ |
yogayuktaṃ mahātmānaṃ gacchantaṃ paramāṃ gatim || 42 ||
[Analyze grammar]

ahaṃ dhanaṃjayaḥ pārthaḥ kṛpaḥ śāradvato dvijaḥ |
vāsudevaśca vārṣṇeyo dharmarājaśca pāṇḍavaḥ || 43 ||
[Analyze grammar]

anye tu sarve nāpaśyanbhāradvājasya dhīmataḥ |
mahimānaṃ mahārāja yogayuktasya gacchataḥ || 44 ||
[Analyze grammar]

gatiṃ paramikāṃ prāptamajānanto nṛyonayaḥ |
nāpaśyangacchamānaṃ hi taṃ sārdhamṛṣipuṃgavaiḥ |
ācāryaṃ yogamāsthāya brahmalokamariṃdamam || 45 ||
[Analyze grammar]

vitunnāṅgaṃ śaraśatairnyastāyudhamasṛkkṣaram |
dhikkṛtaḥ pārṣatastaṃ tu sarvabhūtaiḥ parāmṛśat || 46 ||
[Analyze grammar]

tasya mūrdhānamālambya gatasattvasya dehinaḥ |
kiṃcidabruvataḥ kāyādvicakartāsinā śiraḥ || 47 ||
[Analyze grammar]

harṣeṇa mahatā yukto bhāradvāje nipātite |
siṃhanādaravaṃ cakre bhrāmayankhaḍgamāhave || 48 ||
[Analyze grammar]

ākarṇapalitaḥ śyāmo vayasāśītipañcakaḥ |
tvatkṛte vyacaratsaṃkhye sa tu ṣoḍaśavarṣavat || 49 ||
[Analyze grammar]

uktavāṃśca mahābāhuḥ kuntīputro dhanaṃjayaḥ |
jīvantamānayācāryaṃ mā vadhīrdrupadātmaja || 50 ||
[Analyze grammar]

na hantavyo na hantavya iti te sainikāśca ha |
utkrośannarjunaścaiva sānukrośastamādravat || 51 ||
[Analyze grammar]

krośamāne'rjune caiva pārthiveṣu ca sarvaśaḥ |
dhṛṣṭadyumno'vadhīddroṇaṃ rathatalpe nararṣabham || 52 ||
[Analyze grammar]

śoṇitena pariklinno rathādbhūmimariṃdamaḥ |
lohitāṅga ivādityo durdarśaḥ samapadyata |
evaṃ taṃ nihataṃ saṃkhye dadṛśe sainiko janaḥ || 53 ||
[Analyze grammar]

dhṛṣṭadyumnastu tadrājanbhāradvājaśiro mahat |
tāvakānāṃ maheṣvāsaḥ pramukhe tatsamākṣipat || 54 ||
[Analyze grammar]

te tu dṛṣṭvā śiro rājanbhāradvājasya tāvakāḥ |
palāyanakṛtotsāhā dudruvuḥ sarvatodiśam || 55 ||
[Analyze grammar]

droṇastu divamāsthāya nakṣatrapathamāviśat |
ahameva tadādrākṣaṃ droṇasya nidhanaṃ nṛpa || 56 ||
[Analyze grammar]

ṛṣeḥ prasādātkṛṣṇasya satyavatyāḥ sutasya ca |
vidhūmāmiva saṃyāntīmulkāṃ prajvalitāmiva |
apaśyāma divaṃ stabdhvā gacchantaṃ taṃ mahādyutim || 57 ||
[Analyze grammar]

hate droṇe nirutsāhānkurūnpāṇḍavasṛñjayāḥ |
abhyadravanmahāvegāstataḥ sainyaṃ vyadīryata || 58 ||
[Analyze grammar]

nihatā hayabhūyiṣṭhāḥ saṃgrāme niśitaiḥ śaraiḥ |
tāvakā nihate droṇe gatāsava ivābhavan || 59 ||
[Analyze grammar]

parājayamathāvāpya paratra ca mahadbhayam |
ubhayenaiva te hīnā nāvindandhṛtimātmanaḥ || 60 ||
[Analyze grammar]

anvicchantaḥ śarīraṃ tu bhāradvājasya pārthivāḥ |
nādhyagacchaṃstadā rājankabandhāyutasaṃkule || 61 ||
[Analyze grammar]

pāṇḍavāstu jayaṃ labdhvā paratra ca mahadyaśaḥ |
bāṇaśabdaravāṃścakruḥ siṃhanādāṃśca puṣkalān || 62 ||
[Analyze grammar]

bhīmasenastato rājandhṛṣṭadyumnaśca pārṣataḥ |
varūthinyāmanṛtyetāṃ pariṣvajya parasparam || 63 ||
[Analyze grammar]

abravīcca tadā bhīmaḥ pārṣataṃ śatrutāpanam |
bhūyo'haṃ tvāṃ vijayinaṃ pariṣvakṣyāmi pārṣata |
sūtaputre hate pāpe dhārtarāṣṭre ca saṃyuge || 64 ||
[Analyze grammar]

etāvaduktvā bhīmastu harṣeṇa mahatā yutaḥ |
bāhuśabdena pṛthivīṃ kampayāmāsa pāṇḍavaḥ || 65 ||
[Analyze grammar]

tasya śabdena vitrastāḥ prādravaṃstāvakā yudhi |
kṣatradharmaṃ samutsṛjya palāyanaparāyaṇāḥ || 66 ||
[Analyze grammar]

pāṇḍavāstu jayaṃ labdhvā hṛṣṭā hyāsanviśāṃ pate |
arikṣayaṃ ca saṃgrāme tena te sukhamāpnuvan || 67 ||
[Analyze grammar]

tato droṇe hate rājankuravaḥ śastrapīḍitāḥ |
hatapravīrā vidhvastā bhṛśaṃ śokaparāyaṇāḥ || 68 ||
[Analyze grammar]

vicetaso hatotsāhāḥ kaśmalābhihataujasaḥ |
ārtasvareṇa mahatā putraṃ te paryavārayan || 69 ||
[Analyze grammar]

rajasvalā vepamānā vīkṣamāṇā diśo daśa |
aśrukaṇṭhā yathā daityā hiraṇyākṣe purā hate || 70 ||
[Analyze grammar]

sa taiḥ parivṛto rājā trastaiḥ kṣudramṛgairiva |
aśaknuvannavasthātumapāyāttanayastava || 71 ||
[Analyze grammar]

kṣutpipāsāpariśrāntāste yodhāstava bhārata |
ādityena ca saṃtaptā bhṛśaṃ vimanaso'bhavan || 72 ||
[Analyze grammar]

bhāskarasyeva patanaṃ samudrasyeva śoṣaṇam |
viparyāsaṃ yathā merorvāsavasyeva nirjayam || 73 ||
[Analyze grammar]

amarṣaṇīyaṃ taddṛṣṭvā bhāradvājasya pātanam |
trastarūpatarā rājankauravāḥ prādravanbhayāt || 74 ||
[Analyze grammar]

gāndhārarājaḥ śakunistrastastrastataraiḥ saha |
hataṃ rukmarathaṃ dṛṣṭvā prādravatsahito rathaiḥ || 75 ||
[Analyze grammar]

varūthinīṃ vegavatīṃ vidrutāṃ sapatākinīm |
parigṛhya mahāsenāṃ sūtaputro'payādbhayāt || 76 ||
[Analyze grammar]

rathanāgāśvakalilāṃ puraskṛtya tu vāhinīm |
madrāṇāmīśvaraḥ śalyo vīkṣamāṇo'payādbhayāt || 77 ||
[Analyze grammar]

hatapravīrairbhūyiṣṭhaṃ dvipairbahupadātibhiḥ |
vṛtaḥ śāradvato'gacchatkaṣṭaṃ kaṣṭamiti bruvan || 78 ||
[Analyze grammar]

bhojānīkena śiṣṭena kaliṅgāraṭṭabāhlikaiḥ |
kṛtavarmā vṛto rājanprāyātsujavanairhayaiḥ || 79 ||
[Analyze grammar]

padātigaṇasaṃyuktastrasto rājanbhayārditaḥ |
ulūkaḥ prādravattatra dṛṣṭvā droṇaṃ nipātitam || 80 ||
[Analyze grammar]

darśanīyo yuvā caiva śaurye ca kṛtalakṣaṇaḥ |
duḥśāsano bhṛśodvignaḥ prādravadgajasaṃvṛtaḥ || 81 ||
[Analyze grammar]

gajāśvarathasaṃyukto vṛtaścaiva padātibhiḥ |
duryodhano mahārāja prāyāttatra mahārathaḥ || 82 ||
[Analyze grammar]

gajānrathānsamāruhya parasyāpi hayāñjanāḥ |
prakīrṇakeśā vidhvastā na dvāvekatra dhāvataḥ || 83 ||
[Analyze grammar]

nedamastīti puruṣā hatotsāhā hataujasaḥ |
utsṛjya kavacānanye prādravaṃstāvakā vibho || 84 ||
[Analyze grammar]

anyonyaṃ te samākrośansainikā bharatarṣabha |
tiṣṭha tiṣṭheti na ca te svayaṃ tatrāvatasthire || 85 ||
[Analyze grammar]

dhuryānpramucya tu rathāddhatasūtānsvalaṃkṛtān |
adhiruhya hayānyodhāḥ kṣipraṃ padbhiracodayan || 86 ||
[Analyze grammar]

dravamāṇe tathā sainye trastarūpe hataujasi |
pratisrota iva grāho droṇaputraḥ parāniyāt || 87 ||
[Analyze grammar]

hatvā bahuvidhāṃ senāṃ pāṇḍūnāṃ yuddhadurmadaḥ |
kathaṃcitsaṃkaṭānmukto mattadviradavikramaḥ || 88 ||
[Analyze grammar]

dravamāṇaṃ balaṃ dṛṣṭvā palāyanakṛtakṣaṇam |
duryodhanaṃ samāsādya droṇaputro'bravīdidam || 89 ||
[Analyze grammar]

kimiyaṃ dravate senā trastarūpeva bhārata |
dravamāṇāṃ ca rājendra nāvasthāpayase raṇe || 90 ||
[Analyze grammar]

tvaṃ cāpi na yathāpūrvaṃ prakṛtistho narādhipa |
karṇaprabhṛtayaśceme nāvatiṣṭhanti pārthivāḥ || 91 ||
[Analyze grammar]

anyeṣvapi ca yuddheṣu naiva senādravattadā |
kaccitkṣemaṃ mahābāho tava sainyasya bhārata || 92 ||
[Analyze grammar]

kasminnidaṃ hate rājanrathasiṃhe balaṃ tava |
etāmavasthāṃ saṃprāptaṃ tanmamācakṣva kaurava || 93 ||
[Analyze grammar]

tattu duryodhanaḥ śrutvā droṇaputrasya bhāṣitam |
ghoramapriyamākhyātuṃ nāśakatpārthivarṣabhaḥ || 94 ||
[Analyze grammar]

bhinnā nauriva te putro nimagnaḥ śokasāgare |
bāṣpeṇa pihito dṛṣṭvā droṇaputraṃ rathe sthitam || 95 ||
[Analyze grammar]

tataḥ śāradvataṃ rājā savrīḍamidamabravīt |
śaṃseha sarvaṃ bhadraṃ te yathā sainyamidaṃ drutam || 96 ||
[Analyze grammar]

atha śāradvato rājannārtiṃ gacchanpunaḥ punaḥ |
śaśaṃsa droṇaputrāya yathā droṇo nipātitaḥ || 97 ||
[Analyze grammar]

kṛpa uvāca |
vayaṃ droṇaṃ puraskṛtya pṛthivyāṃ pravaraṃ ratham |
prāvartayāma saṃgrāmaṃ pāñcālaireva kevalaiḥ || 98 ||
[Analyze grammar]

tataḥ pravṛtte saṃgrāme vimiśrāḥ kurusomakāḥ |
anyonyamabhigarjantaḥ śastrairdehānapātayan || 99 ||
[Analyze grammar]

tato droṇo brāhmamastraṃ vikurvāṇo nararṣabhaḥ |
ahanacchātravānbhallaiḥ śataśo'tha sahasraśaḥ || 100 ||
[Analyze grammar]

pāṇḍavāḥ kekayā matsyāḥ pāñcālāśca viśeṣataḥ |
saṃkhye droṇarathaṃ prāpya vyanaśankālacoditāḥ || 101 ||
[Analyze grammar]

sahasraṃ rathasiṃhānāṃ dvisāhasraṃ ca dantinām |
droṇo brahmāstranirdagdhaṃ preṣayāmāsa mṛtyave || 102 ||
[Analyze grammar]

ākarṇapalitaḥ śyāmo vayasāśītipañcakaḥ |
raṇe paryacaraddroṇo vṛddhaḥ ṣoḍaśavarṣavat || 103 ||
[Analyze grammar]

kliśyamāneṣu sainyeṣu vadhyamāneṣu rājasu |
amarṣavaśamāpannāḥ pāñcālā vimukhābhavan || 104 ||
[Analyze grammar]

teṣu kiṃcitprabhagneṣu vimukheṣu sapatnajit |
divyamastraṃ vikurvāṇo babhūvārka ivoditaḥ || 105 ||
[Analyze grammar]

sa madhyaṃ prāpya pāṇḍūnāṃ śararaśmiḥ pratāpavān |
madhyaṃgata ivādityo duṣprekṣyaste pitābhavat || 106 ||
[Analyze grammar]

te dahyamānā droṇena sūryeṇeva virājatā |
dagdhavīryā nirutsāhā babhūvurgatacetasaḥ || 107 ||
[Analyze grammar]

tāndṛṣṭvā pīḍitānbāṇairdroṇena madhusūdanaḥ |
jayaiṣī pāṇḍuputrāṇāmidaṃ vacanamabravīt || 108 ||
[Analyze grammar]

naiṣa jātu paraiḥ śakyo jetuṃ śastrabhṛtāṃ varaḥ |
api vṛtrahaṇā saṃkhye rathayūthapayūthapaḥ || 109 ||
[Analyze grammar]

te yūyaṃ dharmamutsṛjya jayaṃ rakṣata pāṇḍavāḥ |
yathā vaḥ saṃyuge sarvānna hanyādrukmavāhanaḥ || 110 ||
[Analyze grammar]

aśvatthāmni hate naiṣa yudhyediti matirmama |
hataṃ taṃ saṃyuge kaścidākhyātvasmai mṛṣā naraḥ || 111 ||
[Analyze grammar]

etannārocayadvākyaṃ kuntīputro dhanaṃjayaḥ |
arocayaṃstu sarve'nye kṛcchreṇa tu yudhiṣṭhiraḥ || 112 ||
[Analyze grammar]

bhīmasenastu savrīḍamabravītpitaraṃ tava |
aśvatthāmā hata iti taccābudhyata te pitā || 113 ||
[Analyze grammar]

sa śaṅkamānastanmithyā dharmarājamapṛcchata |
hataṃ vāpyahataṃ vājau tvāṃ pitā putravatsalaḥ || 114 ||
[Analyze grammar]

tadatathyabhaye magno jaye sakto yudhiṣṭhiraḥ |
aśvatthāmānamāhedaṃ hataḥ kuñjara ityuta |
bhīmena girivarṣmāṇaṃ mālavasyendravarmaṇaḥ || 115 ||
[Analyze grammar]

upasṛtya tadā droṇamuccairidamabhāṣata |
yasyārthe śastramādhatse yamavekṣya ca jīvasi |
putraste dayito nityaṃ so'śvatthāmā nipātitaḥ || 116 ||
[Analyze grammar]

tacchrutvā vimanāstatra ācāryo mahadapriyam |
niyamya divyānyastrāṇi nāyudhyata yathā purā || 117 ||
[Analyze grammar]

taṃ dṛṣṭvā paramodvignaṃ śokopahatacetasam |
pāñcālarājasya sutaḥ krūrakarmā samādravat || 118 ||
[Analyze grammar]

taṃ dṛṣṭvā vihitaṃ mṛtyuṃ lokatattvavicakṣaṇaḥ |
divyānyastrāṇyathotsṛjya raṇe prāya upāviśat || 119 ||
[Analyze grammar]

tato'sya keśānsavyena gṛhītvā pāṇinā tadā |
pārṣataḥ krośamānānāṃ vīrāṇāmacchinacchiraḥ || 120 ||
[Analyze grammar]

na hantavyo na hantavya iti te sarvato'bruvan |
tathaiva cārjuno vāhādavaruhyainamādravat || 121 ||
[Analyze grammar]

udyamya bāhū tvarito bruvāṇaśca punaḥ punaḥ |
jīvantamānayācāryaṃ mā vadhīriti dharmavit || 122 ||
[Analyze grammar]

tathāpi vāryamāṇena kauravairarjunena ca |
hata eva nṛśaṃsena pitā tava nararṣabha || 123 ||
[Analyze grammar]

sainikāśca tataḥ sarve prādravanta bhayārditāḥ |
vayaṃ cāpi nirutsāhā hate pitari te'nagha || 124 ||
[Analyze grammar]

saṃjaya uvāca |
tacchrutvā droṇaputrastu nidhanaṃ piturāhave |
krodhamāhārayattīvraṃ padāhata ivoragaḥ || 125 ||
[Analyze grammar]