Chapter 57

saṃjaya uvāca |
kuntīputrastu taṃ mantraṃ smaranneva dhanaṃjayaḥ |
pratijñāmātmano rakṣanmumohācintyavikramaḥ || 1 ||
[Analyze grammar]

taṃ tu śokena saṃtaptaṃ svapne kapivaradhvajam |
āsasāda mahātejā dhyāyantaṃ garuḍadhvajaḥ || 2 ||
[Analyze grammar]

pratyutthānaṃ tu kṛṣṇasya sarvāvasthaṃ dhanaṃjayaḥ |
nālopayata dharmātmā bhaktyā premṇā ca sarvadā || 3 ||
[Analyze grammar]

pratyutthāya ca govindaṃ sa tasmāyāsanaṃ dadau |
na cāsane svayaṃ buddhiṃ bībhatsurvyadadhāttadā || 4 ||
[Analyze grammar]

tataḥ kṛṣṇo mahātejā jānanpārthasya niścayam |
kuntīputramidaṃ vākyamāsīnaḥ sthitamabravīt || 5 ||
[Analyze grammar]

mā viṣāde manaḥ pārtha kṛthāḥ kālo hi durjayaḥ |
kālaḥ sarvāṇi bhūtāni niyacchati pare vidhau || 6 ||
[Analyze grammar]

kimarthaṃ ca viṣādaste tadbrūhi vadatāṃ vara |
na śocitavyaṃ viduṣā śokaḥ kāryavināśanaḥ || 7 ||
[Analyze grammar]

śocannandayate śatrūnkarśayatyapi bāndhavān |
kṣīyate ca narastasmānna tvaṃ śocitumarhasi || 8 ||
[Analyze grammar]

ityukto vāsudevena bībhatsuraparājitaḥ |
ābabhāṣe tadā vidvānidaṃ vacanamarthavat || 9 ||
[Analyze grammar]

mayā pratijñā mahatī jayadrathavadhe kṛtā |
śvo'smi hantā durātmānaṃ putraghnamiti keśava || 10 ||
[Analyze grammar]

matpratijñāvighātārthaṃ dhārtarāṣṭraiḥ kilācyuta |
pṛṣṭhataḥ saindhavaḥ kāryaḥ sarvairgupto mahārathaiḥ || 11 ||
[Analyze grammar]

daśa caikā ca tāḥ kṛṣṇa akṣauhiṇyaḥ sudurjayāḥ |
pratijñāyāṃ ca hīnāyāṃ kathaṃ jīveta madvidhaḥ || 12 ||
[Analyze grammar]

duḥkhopāyasya me vīra vikāṅkṣā parivartate |
drutaṃ ca yāti savitā tata etadbravīmyaham || 13 ||
[Analyze grammar]

śokasthānaṃ tu tacchrutvā pārthasya dvijaketanaḥ |
saṃspṛśyāmbhastataḥ kṛṣṇaḥ prāṅmukhaḥ samavasthitaḥ || 14 ||
[Analyze grammar]

idaṃ vākyaṃ mahātejā babhāṣe puṣkarekṣaṇaḥ |
hitārthaṃ pāṇḍuputrasya saindhavasya vadhe vṛtaḥ || 15 ||
[Analyze grammar]

pārtha pāśupataṃ nāma paramāstraṃ sanātanam |
yena sarvānmṛdhe daityāñjaghne devo maheśvaraḥ || 16 ||
[Analyze grammar]

yadi tadviditaṃ te'dya śvo hantāsi jayadratham |
atha jñātuṃ prapadyasva manasā vṛṣabhadhvajam || 17 ||
[Analyze grammar]

taṃ devaṃ manasā dhyāyañjoṣamāssva dhanaṃjaya |
tatastasya prasādāttvaṃ bhaktaḥ prāpsyasi tanmahat || 18 ||
[Analyze grammar]

tataḥ kṛṣṇavacaḥ śrutvā saṃspṛśyāmbho dhanaṃjayaḥ |
bhūmāvāsīna ekāgro jagāma manasā bhavam || 19 ||
[Analyze grammar]

tataḥ praṇihite brāhme muhūrte śubhalakṣaṇe |
ātmānamarjuno'paśyadgagane sahakeśavam || 20 ||
[Analyze grammar]

jyotirbhiśca samākīrṇaṃ siddhacāraṇasevitam |
vāyuvegagatiḥ pārthaḥ khaṃ bheje sahakeśavaḥ || 21 ||
[Analyze grammar]

keśavena gṛhītaḥ sa dakṣiṇe vibhunā bhuje |
prekṣamāṇo bahūnbhāvāñjagāmādbhutadarśanān || 22 ||
[Analyze grammar]

udīcyāṃ diśi dharmātmā so'paśyacchvetaparvatam |
kuberasya vihāre ca nalinīṃ padmabhūṣitām || 23 ||
[Analyze grammar]

saricchreṣṭhāṃ ca tāṃ gaṅgāṃ vīkṣamāṇo bahūdakām |
sadāpuṣpaphalairvṛkṣairupetāṃ sphaṭikopalām || 24 ||
[Analyze grammar]

siṃhavyāghrasamākīrṇāṃ nānāmṛgagaṇākulām |
puṇyāśramavatīṃ ramyāṃ manojñāṇḍajasevitām || 25 ||
[Analyze grammar]

mandarasya pradeśāṃśca kiṃnarodgītanāditān |
hemarūpyamayaiḥ śṛṅgairnānauṣadhividīpitān |
tathā mandāravṛkṣaiśca puṣpitairupaśobhitān || 26 ||
[Analyze grammar]

snigdhāñjanacayākāraṃ saṃprāptaḥ kālaparvatam |
puṇyaṃ himavataḥ pādaṃ maṇimantaṃ ca parvatam |
brahmatuṅgaṃ nadīścānyāstathā janapadānapi || 27 ||
[Analyze grammar]

suśṛṅgaṃ śataśṛṅgaṃ ca śaryātivanameva ca |
puṇyamaśvaśiraḥsthānaṃ sthānamātharvaṇasya ca || 28 ||
[Analyze grammar]

vṛṣadaṃśaṃ ca śailendraṃ mahāmandarameva ca |
apsarobhiḥ samākīrṇaṃ kiṃnaraiścopaśobhitam || 29 ||
[Analyze grammar]

tāṃśca śailānvrajanpārthaḥ prekṣate sahakeśavaḥ |
śubhaiḥ prasravaṇairjuṣṭānhemadhātuvibhūṣitān || 30 ||
[Analyze grammar]

candraraśmiprakāśāṅgīṃ pṛthivīṃ puramālinīm |
samudrāṃścādbhutākārānapaśyadbahulākarān || 31 ||
[Analyze grammar]

viyaddyāṃ pṛthivīṃ caiva paśyanviṣṇupade vrajan |
vismitaḥ saha kṛṣṇena kṣipto bāṇa ivātyagāt || 32 ||
[Analyze grammar]

grahanakṣatrasomānāṃ sūryāgnyośca samatviṣam |
apaśyata tadā pārtho jvalantamiva parvatam || 33 ||
[Analyze grammar]

samāsādya tu taṃ śailaṃ śailāgre samavasthitam |
taponityaṃ mahātmānamapaśyadvṛṣabhadhvajam || 34 ||
[Analyze grammar]

sahasramiva sūryāṇāṃ dīpyamānaṃ svatejasā |
śūlinaṃ jaṭilaṃ gauraṃ valkalājinavāsasam || 35 ||
[Analyze grammar]

nayanānāṃ sahasraiśca vicitrāṅgaṃ mahaujasam |
pārvatyā sahitaṃ devaṃ bhūtasaṃghaiśca bhāsvaraiḥ || 36 ||
[Analyze grammar]

gītavāditrasaṃhrādaistālalāsyasamanvitam |
valgitāsphoṭitotkruṣṭaiḥ puṇyagandhaiśca sevitam || 37 ||
[Analyze grammar]

stūyamānaṃ stavairdivyairmunibhirbrahmavādibhiḥ |
goptāraṃ sarvabhūtānāmiṣvāsadharamacyutam || 38 ||
[Analyze grammar]

vāsudevastu taṃ dṛṣṭvā jagāma śirasā kṣitim |
pārthena saha dharmātmā gṛṇanbrahma sanātanam || 39 ||
[Analyze grammar]

lokādiṃ viśvakarmāṇamajamīśānamavyayam |
manasaḥ paramāṃ yoniṃ khaṃ vāyuṃ jyotiṣāṃ nidhim || 40 ||
[Analyze grammar]

sraṣṭāraṃ vāridhārāṇāṃ bhuvaśca prakṛtiṃ parām |
devadānavayakṣāṇāṃ mānavānāṃ ca sādhanam || 41 ||
[Analyze grammar]

yogināṃ paramaṃ brahma vyaktaṃ brahmavidāṃ nidhim |
carācarasya sraṣṭāraṃ pratihartārameva ca || 42 ||
[Analyze grammar]

kālakopaṃ mahātmānaṃ śakrasūryaguṇodayam |
avandata tadā kṛṣṇo vāṅmanobuddhikarmabhiḥ || 43 ||
[Analyze grammar]

yaṃ prapaśyanti vidvāṃsaḥ sūkṣmādhyātmapadaiṣiṇaḥ |
tamajaṃ kāraṇātmānaṃ jagmatuḥ śaraṇaṃ bhavam || 44 ||
[Analyze grammar]

arjunaścāpi taṃ devaṃ bhūyo bhūyo'bhyavandata |
jñātvaikaṃ bhūtabhavyādiṃ sarvabhūtabhavodbhavam || 45 ||
[Analyze grammar]

tatastāvāgatau śarvaḥ provāca prahasanniva |
svāgataṃ vāṃ naraśreṣṭhāvuttiṣṭhetāṃ gataklamau |
kiṃ ca vāmīpsitaṃ vīrau manasaḥ kṣipramucyatām || 46 ||
[Analyze grammar]

yena kāryeṇa saṃprāptau yuvāṃ tatsādhayāmi vām |
vriyatāmātmanaḥ śreyastatsarvaṃ pradadāni vām || 47 ||
[Analyze grammar]

tatastadvacanaṃ śrutvā pratyutthāya kṛtāñjalī |
vāsudevārjunau śarvaṃ tuṣṭuvāte mahāmatī || 48 ||
[Analyze grammar]

namo bhavāya śarvāya rudrāya varadāya ca |
paśūnāṃ pataye nityamugrāya ca kapardine || 49 ||
[Analyze grammar]

mahādevāya bhīmāya tryambakāya ca śaṃbhave |
īśānāya bhagaghnāya namo'stvandhakaghātine || 50 ||
[Analyze grammar]

kumāragurave nityaṃ nīlagrīvāya vedhase |
vilohitāya dhūmrāya vyādhāyānaparājite || 51 ||
[Analyze grammar]

nityaṃ nīlaśikhaṇḍāya śūline divyacakṣuṣe |
hantre goptre trinetrāya vyādhāya vasuretase || 52 ||
[Analyze grammar]

acintyāyāmbikābhartre sarvadevastutāya ca |
vṛṣadhvajāya piṅgāya jaṭine brahmacāriṇe || 53 ||
[Analyze grammar]

tapyamānāya salile brahmaṇyāyājitāya ca |
viśvātmane viśvasṛje viśvamāvṛtya tiṣṭhate || 54 ||
[Analyze grammar]

namo namaste sevyāya bhūtānāṃ prabhave sadā |
brahmavaktrāya śarvāya śaṃkarāya śivāya ca || 55 ||
[Analyze grammar]

namo'stu vācaspataye prajānāṃ pataye namaḥ |
namo viśvasya pataye mahatāṃ pataye namaḥ || 56 ||
[Analyze grammar]

namaḥ sahasraśirase sahasrabhujamanyave |
sahasranetrapādāya namo'saṃkhyeyakarmaṇe || 57 ||
[Analyze grammar]

namo hiraṇyavarṇāya hiraṇyakavacāya ca |
bhaktānukampine nityaṃ sidhyatāṃ nau varaḥ prabho || 58 ||
[Analyze grammar]

evaṃ stutvā mahādevaṃ vāsudevaḥ sahārjunaḥ |
prasādayāmāsa bhavaṃ tadā hyastropalabdhaye || 59 ||
[Analyze grammar]

tato'rjunaḥ prītamanā vavande vṛṣabhadhvajam |
dadarśotphullanayanaḥ samastaṃ tejasāṃ nidhim || 60 ||
[Analyze grammar]

taṃ copahāraṃ svakṛtaṃ naiśaṃ naityakamātmanaḥ |
dadarśa tryambakābhyāśe vāsudevaniveditam || 61 ||
[Analyze grammar]

tato'bhipūjya manasā śarvaṃ kṛṣṇaṃ ca pāṇḍavaḥ |
icchāmyahaṃ divyamastramityabhāṣata śaṃkaram || 62 ||
[Analyze grammar]

tataḥ pārthasya vijñāya varārthe vacanaṃ prabhuḥ |
vāsudevārjunau devaḥ smayamāno'bhyabhāṣata || 63 ||
[Analyze grammar]

saro'mṛtamayaṃ divyamabhyāśe śatrusūdanau |
tatra me taddhanurdivyaṃ śaraśca nihitaḥ purā || 64 ||
[Analyze grammar]

yena devārayaḥ sarve mayā yudhi nipātitāḥ |
tata ānīyatāṃ kṛṣṇau saśaraṃ dhanuruttamam || 65 ||
[Analyze grammar]

tathetyuktvā tu tau vīrau taṃ śarvaṃ pārṣadaiḥ saha |
prasthitau tatsaro divyaṃ divyāścaryaśatairvṛtam || 66 ||
[Analyze grammar]

nirdiṣṭaṃ yadvṛṣāṅkena puṇyaṃ sarvārthasādhakam |
tajjagmaturasaṃbhrāntau naranārāyaṇāvṛṣī || 67 ||
[Analyze grammar]

tatastu tatsaro gatvā sūryamaṇḍalasaṃnibham |
nāgamantarjale ghoraṃ dadṛśāte'rjunācyutau || 68 ||
[Analyze grammar]

dvitīyaṃ cāparaṃ nāgaṃ sahasraśirasaṃ varam |
vamantaṃ vipulāṃ jvālāṃ dadṛśāte'gnivarcasam || 69 ||
[Analyze grammar]

tataḥ kṛṣṇaśca pārthaśca saṃspṛśyāpaḥ kṛtāñjalī |
tau nāgāvupatasthāte namasyantau vṛṣadhvajam || 70 ||
[Analyze grammar]

gṛṇantau vedaviduṣau tadbrahma śatarudriyam |
aprameyaṃ praṇamantau gatvā sarvātmanā bhavam || 71 ||
[Analyze grammar]

tatastau rudramāhātmyāddhitvā rūpaṃ mahoragau |
dhanurbāṇaśca śatrughnaṃ taddvaṃdvaṃ samapadyata || 72 ||
[Analyze grammar]

tato jagṛhatuḥ prītau dhanurbāṇaṃ ca suprabham |
ājahraturmahātmānau dadatuśca mahātmane || 73 ||
[Analyze grammar]

tataḥ pārśvādvṛṣāṅkasya brahmacārī nyavartata |
piṅgākṣastapasaḥ kṣetraṃ balavānnīlalohitaḥ || 74 ||
[Analyze grammar]

sa tadgṛhya dhanuḥśreṣṭhaṃ tasthau sthānaṃ samāhitaḥ |
vyakarṣaccāpi vidhivatsaśaraṃ dhanuruttamam || 75 ||
[Analyze grammar]

tasya maurvīṃ ca muṣṭiṃ ca sthānaṃ cālakṣya pāṇḍavaḥ |
śrutvā mantraṃ bhavaproktaṃ jagrāhācintyavikramaḥ || 76 ||
[Analyze grammar]

sarasyeva ca taṃ bāṇaṃ mumocātibalaḥ prabhuḥ |
cakāra ca punarvīrastasminsarasi taddhanuḥ || 77 ||
[Analyze grammar]

tataḥ prītaṃ bhavaṃ jñātvā smṛtimānarjunastadā |
varamāraṇyakaṃ dattaṃ darśanaṃ śaṃkarasya ca |
manasā cintayāmāsa tanme saṃpadyatāmiti || 78 ||
[Analyze grammar]

tasya tanmatamājñāya prītaḥ prādādvaraṃ bhavaḥ |
tacca pāśupataṃ ghoraṃ pratijñāyāśca pāraṇam || 79 ||
[Analyze grammar]

saṃhṛṣṭaromā durdharṣaḥ kṛtaṃ kāryamamanyata |
vavandatuśca saṃhṛṣṭau śirobhyāṃ tau maheśvaram || 80 ||
[Analyze grammar]

anujñātau kṣaṇe tasminbhavenārjunakeśavau |
prāptau svaśibiraṃ vīrau mudā paramayā yutau |
indrāviṣṇū yathā prītau jambhasya vadhakāṅkṣiṇau || 81 ||
[Analyze grammar]