Chapter 56

saṃjaya uvāca |
tato'rjunasya bhavanaṃ praviśyāpratimaṃ vibhuḥ |
spṛṣṭvāmbhaḥ puṇḍarīkākṣaḥ sthaṇḍile śubhalakṣaṇe |
saṃtastāra śubhāṃ śayyāṃ darbhairvaiḍūryasaṃnibhaiḥ || 1 ||
[Analyze grammar]

tato mālyena vidhivallājairgandhaiḥ sumaṅgalaiḥ |
alaṃcakāra tāṃ śayyāṃ parivāryāyudhottamaiḥ || 2 ||
[Analyze grammar]

tataḥ spṛṣṭodakaṃ pārthaṃ vinītāḥ paricārakāḥ |
darśayāṃ naityakaṃ cakrurnaiśaṃ traiyambakaṃ balim || 3 ||
[Analyze grammar]

tataḥ prītamanāḥ pārtho gandhairmālyaiśca mādhavam |
alaṃkṛtyopahāraṃ taṃ naiśamasmai nyavedayat || 4 ||
[Analyze grammar]

smayamānastu govindaḥ phalgunaṃ pratyabhāṣata |
supyatāṃ pārtha bhadraṃ te kalyāṇāya vrajāmyaham || 5 ||
[Analyze grammar]

sthāpayitvā tato dvāḥsthāngoptṝṃścāttāyudhānnarān |
dārukānugataḥ śrīmānviveśa śibiraṃ svakam |
śiśye ca śayane śubhre bahukṛtyaṃ vicintayan || 6 ||
[Analyze grammar]

na pāṇḍavānāṃ śibire kaścitsuṣvāpa tāṃ niśām |
prajāgaraḥ sarvajanamāviveśa viśāṃ pate || 7 ||
[Analyze grammar]

putraśokābhibhūtena pratijñāto mahātmanā |
sahasā sindhurājasya vadho gāṇḍīvadhanvanā || 8 ||
[Analyze grammar]

tatkathaṃ nu mahābāhurvāsaviḥ paravīrahā |
pratijñāṃ saphalāṃ kuryāditi te samacintayan || 9 ||
[Analyze grammar]

kaṣṭaṃ hīdaṃ vyavasitaṃ pāṇḍavena mahātmanā |
putraśokābhitaptena pratijñā mahatī kṛtā || 10 ||
[Analyze grammar]

bhrātaraścāpi vikrāntā bahulāni balāni ca |
dhṛtarāṣṭrasya putreṇa sarvaṃ tasmai niveditam || 11 ||
[Analyze grammar]

sa hatvā saindhavaṃ saṃkhye punaretu dhanaṃjayaḥ |
jitvā ripugaṇāṃścaiva pārayatvarjuno vratam || 12 ||
[Analyze grammar]

ahatvā sindhurājaṃ hi dhūmaketuṃ pravekṣyati |
na hyetadanṛtaṃ kartumarhaḥ pārtho dhanaṃjayaḥ || 13 ||
[Analyze grammar]

dharmaputraḥ kathaṃ rājā bhaviṣyati mṛte'rjune |
tasminhi vijayaḥ kṛtsnaḥ pāṇḍavena samāhitaḥ || 14 ||
[Analyze grammar]

yadi naḥ sukṛtaṃ kiṃcidyadi dattaṃ hutaṃ yadi |
phalena tasya sarvasya savyasācī jayatvarīn || 15 ||
[Analyze grammar]

evaṃ kathayatāṃ teṣāṃ jayamāśaṃsatāṃ prabho |
kṛcchreṇa mahatā rājanrajanī vyatyavartata || 16 ||
[Analyze grammar]

tasyāṃ rajanyāṃ madhye tu pratibuddho janārdanaḥ |
smṛtvā pratijñāṃ pārthasya dārukaṃ pratyabhāṣata || 17 ||
[Analyze grammar]

arjunena pratijñātamārtena hatabandhunā |
jayadrathaṃ haniṣyāmi śvobhūta iti dāruka || 18 ||
[Analyze grammar]

tattu duryodhanaḥ śrutvā mantribhirmantrayiṣyati |
yathā jayadrathaṃ pārtho na hanyāditi saṃyuge || 19 ||
[Analyze grammar]

akṣauhiṇyo hi tāḥ sarvā rakṣiṣyanti jayadratham |
droṇaśca saha putreṇa sarvāstravidhipāragaḥ || 20 ||
[Analyze grammar]

eko vīraḥ sahasrākṣo daityadānavamarditā |
so'pi taṃ notsahetājau hantuṃ droṇena rakṣitam || 21 ||
[Analyze grammar]

so'haṃ śvastatkariṣyāmi yathā kuntīsuto'rjunaḥ |
aprāpte'staṃ dinakare haniṣyati jayadratham || 22 ||
[Analyze grammar]

na hi dārā na mitrāṇi jñātayo na ca bāndhavāḥ |
kaścinnānyaḥ priyataraḥ kuntīputrānmamārjunāt || 23 ||
[Analyze grammar]

anarjunamimaṃ lokaṃ muhūrtamapi dāruka |
udīkṣituṃ na śakto'haṃ bhavitā na ca tattathā || 24 ||
[Analyze grammar]

ahaṃ dhvajinyaḥ śatrūṇāṃ sahayāḥ sarathadvipāḥ |
arjunārthe haniṣyāmi sakarṇāḥ sasuyodhanāḥ || 25 ||
[Analyze grammar]

śvo nirīkṣantu me vīryaṃ trayo lokā mahāhave |
dhanaṃjayārthaṃ samare parākrāntasya dāruka || 26 ||
[Analyze grammar]

śvo narendrasahasrāṇi rājaputraśatāni ca |
sāśvadviparathānyājau vidraviṣyanti dāruka || 27 ||
[Analyze grammar]

śvastāṃ cakrapramathitāṃ drakṣyase nṛpavāhinīm |
mayā kruddhena samare pāṇḍavārthe nipātitām || 28 ||
[Analyze grammar]

śvaḥ sadevāḥ sagandharvāḥ piśācoragarākṣasāḥ |
jñāsyanti lokāḥ sarve māṃ suhṛdaṃ savyasācinaḥ || 29 ||
[Analyze grammar]

yastaṃ dveṣṭi sa māṃ dveṣṭi yastamanu sa māmanu |
iti saṃkalpyatāṃ buddhyā śarīrārdhaṃ mamārjunaḥ || 30 ||
[Analyze grammar]

yathā tvamaprabhātāyāmasyāṃ niśi rathottamam |
kalpayitvā yathāśāstramādāya vratasaṃyataḥ || 31 ||
[Analyze grammar]

gadāṃ kaumodakīṃ divyāṃ śaktiṃ cakraṃ dhanuḥ śarān |
āropya vai rathe sūta sarvopakaraṇāni ca || 32 ||
[Analyze grammar]

sthānaṃ hi kalpayitvā ca rathopasthe dhvajasya me |
vainateyasya vīrasya samare rathaśobhinaḥ || 33 ||
[Analyze grammar]

chatraṃ jāmbūnadairjālairarkajvalanasaṃnibhaiḥ |
viśvakarmakṛtairdivyairaśvānapi ca bhūṣitān || 34 ||
[Analyze grammar]

balāhakaṃ meghapuṣpaṃ sainyaṃ sugrīvameva ca |
yuktvā vājivarānyattaḥ kavacī tiṣṭha dāruka || 35 ||
[Analyze grammar]

pāñcajanyasya nirghoṣamārṣabheṇaiva pūritam |
śrutvā tu bhairavaṃ nādamupayāyā javena mām || 36 ||
[Analyze grammar]

ekāhnāhamamarṣaṃ ca sarvaduḥkhāni caiva ha |
bhrātuḥ pitṛṣvaseyasya vyapaneṣyāmi dāruka || 37 ||
[Analyze grammar]

sarvopāyairyatiṣyāmi yathā bībhatsurāhave |
paśyatāṃ dhārtarāṣṭrāṇāṃ haniṣyati jayadratham || 38 ||
[Analyze grammar]

yasya yasya ca bībhatsurvadhe yatnaṃ kariṣyati |
āśaṃse sārathe tatra bhavitāsya dhruvo jayaḥ || 39 ||
[Analyze grammar]

dāruka uvāca |
jaya eva dhruvastasya kuta eva parājayaḥ |
yasya tvaṃ puruṣavyāghra sārathyamupajagmivān || 40 ||
[Analyze grammar]

evaṃ caitatkariṣyāmi yathā māmanuśāsasi |
suprabhātāmimāṃ rātriṃ jayāya vijayasya hi || 41 ||
[Analyze grammar]