Chapter 14

tatastāmabravaṃ bhīru tvameva hi mama priyā |
tathāpi tu vinodena tiṣṭhāmaḥ kathyatāmiti || 1 ||
[Analyze grammar]

grahītavyāni nāmāni gurudevadvijanmanām |
yasmāttena viśuddhyarthaṃ svānamācaritaṃ tayā || 2 ||
[Analyze grammar]

asti merugiriprāṃśurāṣāḍho nāma parvataḥ |
śūrapaṇḍitavittāḍhyavidyādharakulālayaḥ || 3 ||
[Analyze grammar]

tatra vidyādharasvāmī vedavānvegavāniti |
yaḥ kuberādhikasvo'pi niḥsva eva dinātyaye || 4 ||
[Analyze grammar]

tasyāpi pṛthivī nāma mahiṣī prāṃśuvaṃśajā |
tṛṇāya manyate sthairyād yā devīṃ pṛthivīmapi || 5 ||
[Analyze grammar]

tau ca putramavindantau ciraṃ duḥkhamatiṣṭhatām |
prauḍhāyā iva kanyāyāḥ pitarau sadṛśaṃ varam || 6 ||
[Analyze grammar]

tau manaḥputrikā nāma kulavidyāṃ sutārthinau |
ārādhayitumārabdhau tayā coktaṃ prasannayā || 7 ||
[Analyze grammar]

sarvavidyādharotkṛṣṭavidyādharaparākramaḥ |
bhavitā bhavatoḥ putraḥ putrakau duḥkhamujjhatam || 8 ||
[Analyze grammar]

ekā ca duhitā yasyāḥ kalāśālī bhaviṣyati |
śūraḥ sāṅga ivānaṅgo vidyādharapatiḥ patiḥ || 9 ||
[Analyze grammar]

kāle kvacidatīte ca prasūtā pṛthivī sutam |
trivargamakṣataṃ devī pṛthivīva surakṣitā || 10 ||
[Analyze grammar]

manaḥputrikayā dattaḥ sa yasmātkulavidyayā |
tasmānmānasavegākhyaḥ putraḥ pitrā prasādhitaḥ || 11 ||
[Analyze grammar]

saṃvatsaratraye'tīte jātāyā duhituḥ kṛtam |
nāma vegavatātmīyamasau vegavatī tataḥ || 12 ||
[Analyze grammar]

labdheṣṭatanayau tau ca modamānāvaharniśam |
nītavantau ciraṃ kālamekāharniśasaṃmitam || 13 ||
[Analyze grammar]

vegavānekadā snātaḥ prīṇitāgnisuradvijaḥ |
bhadrāsanasthamātmānaṃ dadarśa ādarśamaṇḍale || 14 ||
[Analyze grammar]

atha haṃsamivāsīnamañjanācalamūrdhani |
mṛṇāladhavalaṃ keśaṃ dṛṣṭavānātmamūrdhani || 15 ||
[Analyze grammar]

tato bhadrāsanaṃ tyaktvā vasudhāsthaṇḍile sthitaḥ |
pṛṣṭo mānasavegena kimetaditi vegavān || 16 ||
[Analyze grammar]

tenoktaṃ palitaṃ dṛṣṭvā manaḥputrikavaṃśajāḥ |
tapāṃsi vā niṣevante vedāntavihitāni vā || 17 ||
[Analyze grammar]

tatprajāḥ pālayeḥ putra prajāstvāṃ pālayantu ca |
pālitairhi mṛgendro'pi kānanaireva pālyate || 18 ||
[Analyze grammar]

atha mānasavegena krośantīṣu prajāsu ca |
rājā mandasukhotkaṇṭhaḥ pratiyātastapovanam || 19 ||
[Analyze grammar]

bhartrā nivartyamānāpi vacobhiḥ sopapattibhiḥ |
na nivṛttā yadā devī tadopāyaṃ prayuktavān || 20 ||
[Analyze grammar]

adyaivāhaṃ cyuto rājyādadyaiveyaṃ pativratā |
na me saṃpādayatyājñāmaho dharmaḥ satāmiti || 21 ||
[Analyze grammar]

tato hrītā ca bhītā ca sāśruśreṇiḥ savepathuḥ |
pādayoḥ patitā patyurvyajñāpayadasau śanaiḥ || 22 ||
[Analyze grammar]

yadā tarhi mayā yūyaṃ pāvayantastapovanam |
upāsyāḥ pāvanatamaṃ sa kālaḥ kathyatāmiti || 23 ||
[Analyze grammar]

so'bravīddurlabhaṃ putraṃ sthirasiṃhāsanāsthitam |
bhartāraṃ vegavatyāśca dṛṣṭvā draṣṭāsi māmiti || 24 ||
[Analyze grammar]

evaṃ caiva ca kalyāṇi pitā vijñāpyatāmiti |
uktā vegavatī mātrā pitaraṃ praṇatābravīt || 25 ||
[Analyze grammar]

tāta tvayi vanaṃ yāte ko me dāsyati modakān |
kalpavṛkṣaprasūtāni phalāni kusumāni vā || 26 ||
[Analyze grammar]

tenoktaṃ yena yenārtho durlabhenāpi kenacit |
tattanmānasavegaste bhrātā dātāsyatāmiti || 27 ||
[Analyze grammar]

iti rājyakalatramitraputrān gṛhadhāmaṃ ca tṛṇāya manyamānaḥ |
gurusattvarajastamaḥkalaṅkāṃ prakṛtiṃ hātumagādvanaṃ narendraḥ || 28 ||
[Analyze grammar]

śriyaṃ mānasavego'pi kadalīdalacañcalām |
śaktitrayaprayogajñaḥ kṛtavānacalācalām || 29 ||
[Analyze grammar]

atha yāte kvacitkāle mātaṅgādhipateḥ sutā |
āṣāḍhaṃ vāyumukteti sakhīparivṛtāgamat || 30 ||
[Analyze grammar]

sā sma vegavatīmāha rājaputri kimāsyate |
uttiṣṭhākāśamārgeṇa gacchāmo malayācalam || 31 ||
[Analyze grammar]

śṛṅgakuñjanitambeṣu tasya ramyeṣu ramyatām |
netrāpidhānikākhyānaputrikākandukairiti || 32 ||
[Analyze grammar]

tayoktaṃ nāsti me śaktirgantumākāśavartmanā |
alabdhakulavidyāyāḥ sakhi tanmṛṣyatāmiti || 33 ||
[Analyze grammar]

upahasya tatastāstāmuccaistāḍitapāṇayaḥ |
ādhatāmbarapakṣāḥ khaṃ haṃsakanyā ivāsthitāḥ || 34 ||
[Analyze grammar]

bhrāturantikamāyātā sāvegā vegavatyapi |
tena coktāṅkamāropya mātaḥ kiṃ dīyatāmiti || 35 ||
[Analyze grammar]

tayoktaṃ dehi me vidyāṃ mahārāja sasādhanām |
siddhavidyābhiradyāhaṃ sakhībhirhāsitā yataḥ || 36 ||
[Analyze grammar]

acireṇaiva dāsyāmi mātarityabhidhāya sā |
bhrātā visarjitāsārabālālaṅkāravañcitā || 37 ||
[Analyze grammar]

ekadā gaurimuṇḍasya bhaginī gaurimadyaśāḥ |
gatā vegavatīṃ draṣṭumāṣāḍhaṃ sasakhī sakhīm || 38 ||
[Analyze grammar]

upahasya ca tāṃ sāpi vipakṣāmiva sārasīm |
sapakṣā rājahaṃsīva gatā prati himācalam || 39 ||
[Analyze grammar]

vegavatyapi sāsthānaṃ gatvā bhrātaramabravīt |
kimayaṃ kṣipyate kālo vidyā me dīyatāmiti || 40 ||
[Analyze grammar]

tenoktamapi dāsyāmi tvarase kimakāraṇam |
gurukāryakriyāvyagraṃ kiṃ na paśyasi māmiti || 41 ||
[Analyze grammar]

sā gatvā manyubhāreṇa sphurantīva tvarāvatī |
apatanmāturutsaṅge saṃtapteva vaśā hrade || 42 ||
[Analyze grammar]

pṛthivī tu samāhūya sacivau bharturabravīt |
acireṇa piturmūlaṃ dārikāṃ nayataṃ yuvām || 43 ||
[Analyze grammar]

antaraṅgo hi saṃbandhaḥ putraiḥ pitrorakṛtrimaḥ |
bhrātarastu dviṣantyeva bhrātṝnekodarānapi || 44 ||
[Analyze grammar]

tau tāmākāśamārgeṇa nītavantau tapovanam |
mārgāyatanamārgeṣu sāmbhaḥsu gamitaśramām || 45 ||
[Analyze grammar]

athāsthimayakāyānāṃ taḍidbabhrujaṭābṛtām |
te'paśyaṃstatra vṛndāni tāpasānāṃ tapasyatām || 46 ||
[Analyze grammar]

pṛcchanti sma ca tatraikamabhivādya tapasvinam |
brahmanbrūhi tamuddeśaṃ yatrāste vegavāniti || 47 ||
[Analyze grammar]

so'bravītparvatāgre'sāvaṅguṣṭhāgreṇa tiṣṭhati |
anugacchati gacchantamaṃśumantaṃ ca cakṣuṣā || 48 ||
[Analyze grammar]

parṇaśālā ca tasyeyaṃ yasyāḥ siṃhamataṅgajau |
aṅgaṇe krīḍataḥ prītāvimau ca śikhipannagau || 49 ||
[Analyze grammar]

āsannāgamanaścāsau dagdhaṃ hi kaṭhinaiḥ karaiḥ |
tasyāhlādayituṃ cakṣureṣa mandāyate raviḥ || 50 ||
[Analyze grammar]

tapastāntaṃ tataḥ kāyaṃ sakāyamiva vegavān |
kāyakleśaṃ vahannāgādvaikhānasamṛgāvṛtaḥ || 51 ||
[Analyze grammar]

atha vegavatī dṛṣṭvā vegavantaṃ tathāvidham |
abravīnmantriṇau nāyaṃ mama tātaḥ sa vegavān || 52 ||
[Analyze grammar]

tasya candraprabhacchattraprabhāḥ samukuṭaprabhāḥ |
prabhāsayanti dhāvantīṃ puraḥ sāmantasantatim || 53 ||
[Analyze grammar]

ayaṃ tu siṃhamātaṅgaśārdūlamṛgatāpasaiḥ |
tyaktavairaiḥ sahāyāti nūnaṃ ko'pīndrajālikaḥ || 54 ||
[Analyze grammar]

tābhyāmuktaṃ sa evāyaṃ tathā cetthaṃ ca dṛśyate |
tādṛśā eva dṛśyante tathā cetthaṃ ca sādhavaḥ || 55 ||
[Analyze grammar]

vandyatāṃ ca pitetyuktā vandamānārdracakṣuṣā |
aṅkamāropitā pitrā rūḍhadarbhāṅkuravraṇam || 56 ||
[Analyze grammar]

mantriṇāvapi bhartāramucitāntaravartinau |
śirovāgbhiravandetāmatha vegavatoditau || 57 ||
[Analyze grammar]

āgaccha taṃ mamābhyāśamalaṃ sthitvātidūrataḥ |
janarañjanamātraṃ hi gataṃ tad rājyanāṭakam || 58 ||
[Analyze grammar]

āsannasthaṇḍilasthau tau pṛṣṭavānatha vegavān |
rājño mānasavegasya rājyaṃ no varṇyatāmiti || 59 ||
[Analyze grammar]

tābhyāmuktamaśakyaṃ tadguṇāḍhyenāpi śaṃsitum |
tamapekṣya tu rājānaḥ śeṣāśchattraviḍambakāḥ || 60 ||
[Analyze grammar]

iyaṃ māṇavikā kasmādānīteti ca pṛcchate |
vidyālābhārthamityuktaṃ tasmai tābhyāṃ savistaram || 61 ||
[Analyze grammar]

tenoktamacirādeṣā labdhavidyā gamiṣyati |
yuvābhyāṃ nītipannābhyāṃ sa bālaḥ pālyatāmiti || 62 ||
[Analyze grammar]

vagavatyapi sotsāhā karoti sma mahattapaḥ |
kalpitāhārakartavyā phalamūlajalānilaiḥ || 63 ||
[Analyze grammar]

jalāharaṇasaṃmārgakusumapracayādibhiḥ |
ārādhayaddurārādhānasau vaikhānasānapi || 64 ||
[Analyze grammar]

uccinvantī kadācitsā phullāṃ kānanamallikām |
hā sarpeṇāsmi daṣṭeti sākrandāgamadāśramam || 65 ||
[Analyze grammar]

yathāsaṃnihitaistatra vaikhānasakumārakaiḥ |
mā rājadārike bhaiṣīrityuktvā parivāritā || 66 ||
[Analyze grammar]

kvāsau kvāsau khalaḥ sarpa iti pṛṣṭā kumārakaiḥ |
amuṣminmallikāgulmae iti tebhyo nyavedayat || 67 ||
[Analyze grammar]

te tvālokya tamuddeśamavocannuccakaistarām |
rājaputri na sarpo'yamayaṃ sarpāntakaḥ śikhī || 68 ||
[Analyze grammar]

dṛṣṭvā prasāritāṃ grīvāmutphaṇāśīviṣopamām |
tvayā sarpa iti jñātaṃ tasmādāśvasyatāmiti || 69 ||
[Analyze grammar]

uṭajāṅgaṇamānītaḥ sa mayūraḥ kumārakaiḥ |
vicitrairnartito mārgaistayā kuṭṭitatālayā || 70 ||
[Analyze grammar]

prekṣaṇīyaṃ ca taddraṣṭumadṛṣṭaṃ vanavāsibhiḥ |
militāḥ sarvae evāsthustapovananivāsinaḥ || 71 ||
[Analyze grammar]

etasminneva vṛttānte vegavantamupāgatam |
viśrāntamupagamyedamavocaṃstaṃ tapasvinaḥ || 72 ||
[Analyze grammar]

rājadārikayā rājaṃstapastaptaṃ sudustapam |
vayamārādhitāḥ prītāstadvidyāṃ labhatāmiti || 73 ||
[Analyze grammar]

tenoktaṃ yadi ca prītāno bhavanto'nujānate |
tato gṛhṇātviyaṃ vidyāḥ pañcāṅgaparivāritāḥ || 74 ||
[Analyze grammar]

anayā yattapastaptamasmābhiścedamīdṛśam |
tadasyāḥ kulavidyānāmalaṃ bhavatu siddhaye || 75 ||
[Analyze grammar]

yacca mānasavegasya vidyāsiddhiprabhāvitam |
balaṃ caturguṇaṃ tasmādbāleyaṃ pratipadyatām || 76 ||
[Analyze grammar]

yaścāsyāḥ ko'pi dīrghāyurgrahīṣyati varaḥ karam |
rājyasya daśamaṃ bhāgaṃ sa madīyasya bhokṣyati || 77 ||
[Analyze grammar]

evamuktvā tatastasyāstatsarvaṃ kṛtavānpitā |
sāpi labdhābhyanujñānā vegenodapatannabhaḥ || 78 ||
[Analyze grammar]

tataḥ kanakalekheva bhāsā kaṣaśilāmasau |
piśaṅgabhavatī yāntī śyāmalāmambarasthalīm || 79 ||
[Analyze grammar]

dṛṣṭā mānasavegena saṃbhramabhrāntacakṣuṣā |
avātarattadāsthāne haṃsīvāmbhojakānane || 80 ||
[Analyze grammar]

kathaṃcitpratyabhijñāya lajjiteneva tena sā |
āliṅgyotsaṅgamāropya gamitā māturantikam || 81 ||
[Analyze grammar]

mātāpi duhitṛsnehamanādṛtyaiva satvarā |
apṛcchadapi kalyāṇi kuśalī vegavāniti || 82 ||
[Analyze grammar]

kiṃ vāphalapralāpena sāramevāvadhīyatām |
yāsau vegavatī sāhaṃ tasya vegavataḥ sutā || 83 ||
[Analyze grammar]

atīte tu kvacitkāle saśarīreva cārutā |
nītā mānasavegena kāpi bhūmau varāṅganā || 84 ||
[Analyze grammar]

sā ca tadguṇabhūyiṣṭhāṃ dṛḍhaṃ dveṣṭi kathāmapi |
kṣīṇadoṣaguṇā sādhvī kāmastutikathāmiva || 85 ||
[Analyze grammar]

sa kadācitkvacitkāciddṛṣṭvā tāpasakanyakām |
balādbhoktumupakrāntastayā coktaṃ sphurad ruṣā || 86 ||
[Analyze grammar]

yuktaṃ śāpāgninā dagdhuṃ tvādṛśaṃ pāpacetasam |
kiṃ tu vegavataḥ sādhoḥ putratvaṃ tena mucyase || 87 ||
[Analyze grammar]

sarvathā śāpanāmānaṃ pratīcchatu varaṃ bhavān |
adhīrahṛdayāḥ prāyastrāsagamyā bhavādṛśāḥ || 88 ||
[Analyze grammar]

balātkāmayamānasya niḥkāmāṃ kāñcidaṅganām |
bhavataḥ śatadhā mūrdhā dagdhabuddheḥ sphuṭediti || 89 ||
[Analyze grammar]

tatastrastastataḥ śāpādakāmāṃ kāminīmasau |
api notsahate draṣṭuṃ kuta eva niṣevitum || 90 ||
[Analyze grammar]

sa tu māmabravīnmātastathā madanamañjukā |
protsāhyatāṃ yathā kṣipramupasarpati māmiti || 91 ||
[Analyze grammar]

atha bālasvabhāvena sakutūhalayā mayā |
aśokavanikāmadhye dṛṣṭā madanamañjukā || 92 ||
[Analyze grammar]

saṃkṣiptamadhitiṣṭhantī rūḍhaparṇalatoṭajam |
mlānacampakamāleva purāṇakadalīpuṭam || 93 ||
[Analyze grammar]

parṇaśayyāśirobhāge nihitaḥ saṃpidhānakaḥ |
uṭajābhyantare nyastaḥ sajalaḥ kalaśastayā || 94 ||
[Analyze grammar]

atha lambhitaviśrambhāṃ mañjukāmahamabravam |
kaste mānuṣakeṇārthaḥ kuru vidyādharaṃ patiṃ || 95 ||
[Analyze grammar]

mugdhe mānuṣakāstāvadbahurogādyupadravāḥ |
vidyādharāstu vidyānāṃ prabhāvānnirupadravāḥ || 96 ||
[Analyze grammar]

rājā mānasavegastu bhartā te varṇyatāṃ katham |
yo vidyādhararājānāṃ rājā sphītaśriyāmiti || 97 ||
[Analyze grammar]

doṣānapi manuṣyāṇāṃ gṛhṇāmi sma yathā yathā |
tathā tathābhavattasyāḥ prītisphītākṣamānanam || 98 ||
[Analyze grammar]

guṇānvidyādharāṇāṃ tu gṛhṇāmi sma yathā yathā |
tathā tathābhavattasyāḥ krodhajihmākṣamānanam || 99 ||
[Analyze grammar]

āgantukau yadā caināṃ prītikrodhāvamuñcatām |
gṛhṇāti sma tadā śokaḥ saniśvāsāsravepathuḥ || 100 ||
[Analyze grammar]

athāsyāḥ parimṛjyāsramaśītasparśamabravam |
alaṃ bhagini saṃtapya jīvitaṃ rakṣyatāmiti || 101 ||
[Analyze grammar]

tayā tūktaṃ mayā nedamātmaduḥkhena rudyate |
aśakyaṃ tu bhayaṃ bhīmamāhṛtaṃ mandayā mayā || 102 ||
[Analyze grammar]

sarvavidyākalābhijñaḥ sarvarūpavatāṃ tulā |
kulavidyādhanairyaśca tuṅgairapi na mādyati || 103 ||
[Analyze grammar]

sa madvṛttāntamajñātvā daśāṃ yāsyati kāmapi |
tataḥ sāntaḥpurāmātyarāṣṭraḥ somānvayo nṛpaḥ || 104 ||
[Analyze grammar]

kiṃ tu pratyāśayā prāṇānekayā dhārayāmyaham |
yadādiṣṭaḥ sphuṭādeśairasau vidyādharādibhiḥ || 105 ||
[Analyze grammar]

vidyālavaviṣādhmātānvidyādharabhujaṅgakān |
vidyādharanarendro'yaṃ kartā vāntaviṣāniti || 106 ||
[Analyze grammar]

tataḥ śrutveti yatsatyaṃ jātāhaṃ jātasaṃśayā |
vidyādharanarendraḥ syāduta na syādasāviti || 107 ||
[Analyze grammar]

kiṃ kāciddūtikā yātu sāpyasaktā parīkṣitum |
dūtikā matsamā nāsti svayameva vrajāmyataḥ || 108 ||
[Analyze grammar]

tataḥ svārthāhitotsāhā pṛcchāmi sma tava priyām |
tava priyāya kiṃ vārtā tvadīyā dīyatāmiti || 109 ||
[Analyze grammar]

atha kṣaṇamiva dhyātvā tayoktaṃ smayamānayā |
tulyamevāvayoḥ kāryaṃ śaktau satyāṃ kimāsyate || 110 ||
[Analyze grammar]

idaṃ hi guru kartavyaṃ kṣiptakālaṃ ca sīdati |
īdṛśaṃ tvādṛśī karma kāryate kathamanyathā || 111 ||
[Analyze grammar]

iyaṃ maṇḍalitā veṇī mayā sakhi tavāgrataḥ |
daṣṭukāmeva capalā bhīṣaṇāśīviṣāṅganā || 112 ||
[Analyze grammar]

dāhyā vā dahaneneyaṃ mocyā vā gṛdhrajambukaiḥ |
aryaputreṇa vā dagdhadāruṇā gatidāruṇā || 113 ||
[Analyze grammar]

gatvā cāgaccha doleva na sthātavyaṃ kvacicciram |
asaṅgā hi gatiḥ sakhyāḥ kāntaṃ yāntyāḥ smṛteriva || 114 ||
[Analyze grammar]

ityuktājjukayā kṣipraṃ nabhasāhamihāgatā |
apaśyamaryaputraṃ ca hā kvāsīti pravādinam || 115 ||
[Analyze grammar]

aninditamupāyaṃ ca vicintyātmasamarpaṇe |
ajjukārūpayā tubhyamātmā saṃdarśito mayā || 116 ||
[Analyze grammar]

nivāritāśca yad yūyaṃ tadāliṅganalālasāḥ |
sa doṣaḥ kanyakātvasya viśuddhakulajanmanaḥ || 117 ||
[Analyze grammar]

yaccāyācitadānāya vivāhaḥ kārito mayā |
sa ca saṃskartumātmānaṃ kvātra yakṣaḥ kva cājjukā || 118 ||
[Analyze grammar]

yacca pātumanicchantaḥ pāyitāḥ stha balānmadhu |
tatra yatkāraṇaṃ tacca prāyaḥ pratyakṣameva ca || 119 ||
[Analyze grammar]

na draṣṭavyāsmi supteti pratiṣiddhāḥ stha yanmayā |
tatkutūhalavṛddhyarthaṃ vāmaśīlā hi bālatā || 120 ||
[Analyze grammar]

sarvathā vistareṇālamajjukā madamañjukā |
nītā mānasavegena lakṣmīriva durātmanā || 121 ||
[Analyze grammar]

tadājñāpaya māṃ kṣipramimāṃ madanamañjukām |
ānayāmi parairnītāṃ śuddhā nītiriva śriyam || 122 ||
[Analyze grammar]

āsīcca mama na nyāyyaṃ praiṣaṇīyajanocitam |
bhartuḥ kārayituṃ karma bhāryāṃ tuṅgakulodbhavām || 123 ||
[Analyze grammar]

athaināmabruvaṃ caṇḍi śrutamehi śayāvahai |
na hi tāmraśikhaṇḍānāmadyāpi sphurati dhvaniḥ || 124 ||
[Analyze grammar]

ahamapi dhavalenduvaṃśajanmā kuliśakaṭhorakaniṣṭhikāprakoṣṭhaḥ |
priyasamaraparāvarodharuddhānahataripuḥ kathamāhareya dārān || 125 ||
[Analyze grammar]