Chapter 13

tato divasamāsitvā kāntāmāturahaṃ gṛhe |
priyāṃ navavadhūveṣāṃ pradoṣe pariṇītavān || 1 ||
[Analyze grammar]

prasādādaryapādānāṃ kulastrītvamupāgatām |
tāmādāya svamāvāsaṃ pravṛttotsavamāgamam || 2 ||
[Analyze grammar]

tatra sā sadhanādhyakṣaṃ taṃ yakṣaṃ kusumādibhiḥ |
abhyarcya pānadānena suduṣtoṣamatoṣayat || 3 ||
[Analyze grammar]

padmarāgamayīṃ śuktiṃ padmarāgadravatviṣaḥ |
ādāya madhunaḥ pūrṇāṃ tato māmabravītpriyā || 4 ||
[Analyze grammar]

maṅgalānāṃ pradhānatvātkāryasaṃsiddhidāyinī |
eṣā dhanapateḥ śeṣā svādurāsvādyatāmiti || 5 ||
[Analyze grammar]

mayoktamananujñātastātapādairguṇānapi |
nāhaṃ sevitumicchāmi kiṃ punarvyasanaṃ mahat || 6 ||
[Analyze grammar]

tataḥ sā dṛḍhasaṃrambhā śapathairavyatikramaiḥ |
cirānniruttarīkṛtya māmanicchumapāyayat || 7 ||
[Analyze grammar]

pītaikamadhuśuktiṃ ca māṃ sāpṛcchatkṛtasmitā |
kimāsvādamidaṃ pānamiti pratyabravaṃ tataḥ || 8 ||
[Analyze grammar]

āpāne madhurāsvādamanusvāde tu tiktakam |
kṣaye kaṣāyakaṭukamavacchede manāgiti || 9 ||
[Analyze grammar]

sābravīdvyaktamadyāpi na jānītha rasaṃ punaḥ |
pīyatāmiti pītaṃ ca punastadvacanādmayā || 10 ||
[Analyze grammar]

idaṃ kīdṛśamityasyai pṛcchatyai kathitaṃ mayā |
kimarthamapi me cittaṃ gatamasvasthatāmiti || 11 ||
[Analyze grammar]

tayoktamaparāpyekā śuktirāsvādyatāṃ tataḥ |
gamiṣyatyacirādeva cittaṃ te svasthatāmiti || 12 ||
[Analyze grammar]

tasyāmapi ca pītāyāmapaśyaṃ vegavadbhramān |
taruprāsādaśailādīn sthāvarānapi jaṅgamān || 13 ||
[Analyze grammar]

yathā cāhaṃ tayopāyairagrāmyaiḥ śapathādibhiḥ |
anicchanpāyitaḥ pānaṃ tathā tāmapyapāyayam || 14 ||
[Analyze grammar]

balavadbhyāmathākramya madena madanena ca |
yadeva rucitam tābhyāṃ tattaivāsmi pravartitaḥ || 15 ||
[Analyze grammar]

yaḥ saṃtoṣayituṃ yakṣaṃ vivāhaḥ kṛtrimaḥ kṛtaḥ |
tena kṛtrimamevāsau kanyātvaṃ pratipāditā || 16 ||
[Analyze grammar]

tataḥ prātarupāgamya madhugandhādhivāsitam |
ghrātvā hariśikho veśma saṃbhrāntamatiruktavān || 17 ||
[Analyze grammar]

apūrva iva gandho'yamaryaputra vibhāvyate |
manye'ryaputrayā yūyamanicchāḥ pāyitā iti || 18 ||
[Analyze grammar]

sa mayoktaḥ sakhe sakhyā tavāhaṃ pāyito balāt |
bhavatāpi rucau satyāṃ sthīyatāṃ pīyatāmiti || 19 ||
[Analyze grammar]

so'bravīdvyasanagrāmagrāmaṇyaṃ bhavatāmapi |
pānaṃ sādhu na paśyāmi kiṃ punarmantriṇāmiti || 20 ||
[Analyze grammar]

mayoktamaryapādeṣu samitreṣu samāśatam |
pālayatsu kimasmākamātmabhirvañcitairiti || 21 ||
[Analyze grammar]

tenoktaṃ mantrisacivairvijñāpyaṃ kāryamāgatam |
anuṣṭhāne punastasya svātantryaṃ svāmināmiti || 22 ||
[Analyze grammar]

taṃ pibantaṃ sahāvābhyāmālokya marubhūtikaḥ |
niḥśaṅkaḥ pātumārabdhastaṃ ca dṛṣṭvā tapantakaḥ || 23 ||
[Analyze grammar]

rājamānastato raktairaṅgarāgasragambaraiḥ |
punaruktapriyālāpo māmavandata gomukhaḥ || 24 ||
[Analyze grammar]

tamatyāsannamāsīnamatimātrapriyaṃvadam |
pādau saṃvāhayantaṃ me kruddho hariśikho'bravīt || 25 ||
[Analyze grammar]

unmatta kimasaṃbaddhaṃ bhāṣamāṇaḥ puraḥ prabhoḥ |
udvejayasi bhartāramapasṛtyāsyatāmiti || 26 ||
[Analyze grammar]

tenoktaṃ mūrkha naivedaṃ madasāmarthyajṛmbhitam |
svāmino niḥsapatnau tu pādāvicchāmi sevitum || 27 ||
[Analyze grammar]

yadā tūbhayavaitarddhabhartṛmūrdhabhirarcitau |
bhaviṣyatastadāsmākaṃ sasapatnau bhaviṣyataḥ || 28 ||
[Analyze grammar]

vaitarddhanāmagrahaṇāttato madanamañjukā |
smitasaṃdarśitaprītirabravītsāśrulocanā || 29 ||
[Analyze grammar]

aho cāturyamādhuryapradhānaguṇabhūṣaṇāḥ |
ālāpā nirgatāḥ saumyādgomukhasya mukhāditi || 30 ||
[Analyze grammar]

mayoktaṃ bhaṇa paśyāmastvayā kasmācciraṃ sthitam |
ko vā tavedamākāramujjvalaṃ kṛtavāniti || 31 ||
[Analyze grammar]

tenoktaṃ vayamāhūya māgadhyā rājasaṃnidhau |
ājñāpitāstava bhrātrā pānamāsevitaṃ niśi || 32 ||
[Analyze grammar]

tena pānagṛhātpānaṃ svādyamānaṃ svadeta yat |
svayamāsvādya tadbhrātre tvayā prasthāpyatāmiti || 33 ||
[Analyze grammar]

so'haṃ devīdvayenāpi maṇḍayitvā svapāṇibhiḥ |
pānāgārāya gamitaḥ pānādhyakṣapuraḥsaraḥ || 34 ||
[Analyze grammar]

tatra cāsvādayanneva tattatpānaṃ manāṅ manāk |
matto'haṃ preṣayāmi sma yuṣmabhyamapi saṃtatam || 35 ||
[Analyze grammar]

tasmātpibata niḥśaṅkāḥ kāpiśāyanamāsavam |
anujnātāḥ sahāmātyairgurubhirmuditairiti || 36 ||
[Analyze grammar]

sevamānastataḥ pānaṃ sakāntāmitramaṇḍalaḥ |
divasān gamayāmi sma prahṛṣṭaparicārakaḥ || 37 ||
[Analyze grammar]

kadācidekaparyaṅkasthitā madanamañjukā |
yuṣmābhiḥ sukhasuptāhaṃ na draṣṭavyetyabhāṣata || 38 ||
[Analyze grammar]

mama tvāsītkimityeṣā nivārayati māmiti |
yatsatyaṃ sutarāṃ cetaḥ kutūhalataraṅgitam || 39 ||
[Analyze grammar]

kadācidardharātre'haṃ sthāvarākārajaṅgame |
pāne pariṇatiṃ yāti pratibuddhaḥ pipāsitaḥ || 40 ||
[Analyze grammar]

tataḥ parijanaṃ dṛṣṭvā prasuptamabhavanmama |
na yuktaṃ sukhasuptasya śatrorapi nibodhanam || 41 ||
[Analyze grammar]

bhāryā punaḥ śarīrārdhamato madanamañjukām |
pratibodhya jalaṃ yāce taddhi me na virūpyate || 42 ||
[Analyze grammar]

iti nirdhārya tasyāṃ ca mayā dṛṣṭirnipātitā |
yāvadanyaiva sā kāpi nārīrūpaiva candrikā || 43 ||
[Analyze grammar]

āsīcca mama kiṃ yakṣī kiṃ gandharvī kimapsarāḥ |
mānuṣī syātkulastrī syādgaṇikā syādiyaṃ na hi || 44 ||
[Analyze grammar]

yasmādanyatamāpyāsāṃ lakṣaṇairnopapadyate |
tasmādvidyādharī prāptā kāpi kenāpi hetunā || 45 ||
[Analyze grammar]

iti nirṇīya nipuṇaṃ kariṇītālukomalau |
gāḍhaṃ saṃvāhayāmi sma tasyāścaraṇapallavau || 46 ||
[Analyze grammar]

sā tu saṃtyījatā nidrāṃ sadyaścaraṇapīḍayā |
māmālokya tathābhūtaṃ bhītā bhūmāv upāviśat || 47 ||
[Analyze grammar]

abravīcca na kartavyamaryaputreṇa sāhasam |
tvādṛśāmanukampyo hi balināṃ pramadājanaḥ || 48 ||
[Analyze grammar]

tataḥ śrūtveti yatsatyamātmanyevāsmi lajjitaḥ |
evaṃ kāriṇamapyeṣā saṃbhāvayati māmiti || 49 ||
[Analyze grammar]

sā māṃ lajjitamālokya jānusaṃnihitānanam |
lajjāmapaharantīva tvaritedamabhāṣata || 50 ||
[Analyze grammar]

śrūyatāṃ cāpriyaṃ sā te priyā madanamañjukā |
tvadguṇasmaraṇavyagrā nayate divasāniti || 51 ||
[Analyze grammar]

āsīnme manasi hṛtā na sā mṛtā sā yā dṛṣṭervrajati na gocaraṃ priyā me |
jyotsnā hi sphuṭadhavalāpi kaumudīndorandhānāṃ bahalatamomalīmasaiva || 52 ||
[Analyze grammar]