Chapter 269

[English text for this chapter is available]

sūta uvāca |
kapāleśasya māhātmyaṃ śrūyatāmadhunā dvijāḥ |
caturthasya mahābhāgāstatra kṣetre sthitasya ca || 1 ||
[Analyze grammar]

śrutamātreṇa yenātra naraḥ pāpātpramucyate || 2 ||
[Analyze grammar]

ṛṣaya ūcuḥ |
trayāṇāṃ caiva liṃgānāṃ pūrvoktānāṃ mahāmate |
śrutāsmābhiḥ samutpattiḥkapāleśvaravarjitā |
kenāyaṃ sthāpito devaḥ kapāleśvarasaṃjñitaḥ || 3 ||
[Analyze grammar]

tasmindṛṣṭe phalaṃ kiṃ syātpūjite ca vadasva naḥ || 4 ||
[Analyze grammar]

sūta uvāca |
iṃdreṇa sthāpitaḥ pūrvameṣa devo dvijottamāḥ |
kapāleśvasaṃjñastu brahmahatyā vimuktaye || 5 ||
[Analyze grammar]

tatprabhāvatsuraśreṣṭha stayā mukte dvijottamāḥ |
pāpaṃ pūruṣadānena ityeṣā vaidikī śrutiḥ |
anyo'pi yo narastaṃ ca pūjayitvā prabhaktitaḥ |
prayacchedbrāhmaṇendrāya śuddhaye pāpapūruṣam |
sa mucyetpātakādghorādbrahmahatyāsamudbhavāt || 7 ||
[Analyze grammar]

dakṣiṇāmūrtimāsādya provācedaṃ bṛhaspatiḥ |
hāṭakeśvaraje kṣetre gatvā taṃ vīkṣya śaṃkaram || 8 ||
[Analyze grammar]

yo dadāti śarīraṃ ca kṛtvā hemamayaṃ tataḥ |
mucyate nātra saṃdehaḥ pātakaiḥ pūrvasaṃyutaiḥ || 9 ||
[Analyze grammar]

ṛṣaya ūcuḥ |
brahmahatyā kathaṃ jātā surendrasya hi sūtaja |
etannaḥ sarvamācakṣva paraṃ kautūhalaṃ hi naḥ || 10 ||
[Analyze grammar]

kapāleśvarasaṃjñastu kathaṃ devo'tra saṃsthitaḥ |
brahmahatyā kathaṃ naṣṭā tatprabhāvāddivaspateḥ || 11 ||
[Analyze grammar]

sa pāpapūruṣo deyo vidhinā kena sūtaja |
kairmaṃtraiḥ sa hi deyaḥ kaiścaiva hyupaskaraiḥ || 12 ||
[Analyze grammar]

darśanātpūjanāccāpi kiṃ phalaṃ jāyate nṛṇām |
adattvā svaśarīraṃ vā pūjayā kevalaṃ vada || 13 ||
[Analyze grammar]

sūta uvāca |
ahaṃ vaḥ kīrtayiṣyāmi kathāmetāṃ purātanīm |
yāṃ śrutvāpi mahābhāgā naraḥ pāpātpramucyate || 14 ||
[Analyze grammar]

ajñānājjñānato vāpi vihitairanyajanmajaiḥ |
dṛṣṭamātreṇa yenātra pātakāttaddinodbhavāt |
mucyate nātra saṃdehaḥ satyametanmayoditam || 15 ||
[Analyze grammar]

purā tvaṣṭuḥ suto jajñe vṛtro hi dvijasattamāḥ |
pulomaduhituḥ pārśvādvibhāvaryāḥ suvīryavān || 16 ||
[Analyze grammar]

sa bāla eva dharmātmā āsītsarvajanapriyaḥ |
dānavaṃ bhāvamutsṛjya dvijabhaktiparāyaṇaḥ || 17 ||
[Analyze grammar]

sa gatvā puṣkarāraṇyaṃ parameṇa samādhinā |
toṣayāmāsa deveśaṃ padmajaṃ tapasi sthitaḥ || 18 ||
[Analyze grammar]

tasya tuṣṭaḥ svayaṃ brahmā dṛṣṭigocaramāgataḥ |
provāca varado'smīti kiṃ te kṛtyaṃ karomyaham || 19 ||
[Analyze grammar]

vṛtra uvāca |
yadi tuṣṭosi me deva brāhmaṇatvaṃ prayaccha me |
brāhmaṇatvaṃ samāsādya sādhayāmi paraṃ padam || 20 ||
[Analyze grammar]

tena kiṃcidasādhyaṃ na brāhmaṇyena bhavenmama |
brāhmaṇena samaṃ cānyanna kiṃcitpratibhāti me || 21 ||
[Analyze grammar]

paramaṃ daivataṃ kiṃcinna viprādvidyate param |
tasmānme hṛtsthitaṃ nānyadapi rājyaṃ triviṣṭape || 22 ||
[Analyze grammar]

sūta uvāca |
tasya tadvacanaṃ śrutvā tuṣṭastasya pitāmahaḥ |
brāhmaṇatvaṃ svayaṃ dattvā tataḥ provāca sādaram || 23 ||
[Analyze grammar]

mayā tvaṃ vihito vipra putra prakuru vāṃchitam |
prasādayasva satataṃ brāhmaṇānbrahmavittamān || 24 ||
[Analyze grammar]

brāhmaṇaiḥ suprasannaiśca prīyaṃte sarvadevatāḥ |
tasmātsarvaprayatnena pūjanīyā dvijottamāḥ || 25 ||
[Analyze grammar]

sūta uvāca |
evamuktastadā tena vṛtro'bhūdbrāhmaṇastataḥ |
brāhmyā lakṣmyā samopeto brahmacaryaparāyaṇaḥ || 26 ||
[Analyze grammar]

tasmiṃstapasi saṃsthe tu hatā iṃdreṇa dānavāḥ |
vaṃśocchede samāpanne dānavānāṃ mahātmanām || 27 ||
[Analyze grammar]

tataste dānavāḥ sarve parābhūtāḥ suraistataḥ |
svaṃ sthānaṃ saṃparityajya duḥkhaśokasamanvitāḥ || 28 ||
[Analyze grammar]

tanmātaraṃ puraskṛtvā tatsakāśamupāgatāḥ |
sa ca tāṃ mātaraṃ dṛṣṭvā vṛtāṃ taiśca samanvitaḥ || 29 ||
[Analyze grammar]

dānavaiśca parābhūtaistathābhūtāṃ ca mātaram |
kimāgamanakṛtyaṃ ca duḥkhitānāṃ mamāṃtike || 30 ||
[Analyze grammar]

dānavā ūcuḥ |
vayaṃ devaiḥ parābhūtā bhavaṃtaṃ śaraṇāgatāḥ |
kva yāmo'nyatra cā'smākaṃ tvāṃ vinā nāsti saṃśrayaḥ || 31 ||
[Analyze grammar]

teṣāṃ tadvacanaṃ śrutvā vṛtraḥ provāca sādaram |
devānahaṃ haniṣyāmi gamyatāṃ tatra mā ciram || 32 ||
[Analyze grammar]

tavāgamanakṛtyaṃ ca mātaḥ kathaya sāṃpratam || 33 ||
[Analyze grammar]

mātovāca |
tathā kuru mahābhāga śīghraṃ dāraparigraham |
vaṃśavṛddhau pramāṇaṃ cedvākyaṃ tava mamodbhavam || 34 ||
[Analyze grammar]

eṣa eva paro dharma eṣa eva paro nayaḥ |
putrasya jananīvākyaṃ yatkaroti samāhitaḥ || 35 ||
[Analyze grammar]

tathā strīṇāṃ patiṃ muktvā nānyāsti bhuvi devatā |
jananyāṃ jīvamānāyāṃ tathaiva ca sutasya ca || 36 ||
[Analyze grammar]

atikramya ca yā nārī patiṃ dharmaparā bhavet |
tatsarvaṃ viphalaṃ tasyā jāyate nātra saṃśayaḥ || 37 ||
[Analyze grammar]

putraḥ svajananīvākyaṃ yo'tikramya yathāruci |
karoti dharmakṛtyāni tāni sarvāṇi tasya ca || 38 ||
[Analyze grammar]

bhavaṃti ca tathā nūnaṃ vṛthā bhasmahutaṃ yathā |
araṇye ruditānīva ūṣare vāpitāni ca || 39 ||
[Analyze grammar]

yathaiva badhirasyāgre gītaṃ nṛtyamacakṣuṣaḥ |
tadvanmātṛmatādanyakṛtaṃ putrasya dharmajam || 40 ||
[Analyze grammar]

sarvaṃ karma na saṃdehastenāhaṃ tvāmupāgatā |
baṃdhūnāṃ vacanātputra duḥkhārtā ca viśeṣataḥ || 41 ||
[Analyze grammar]

kiṃ vā te bahunoktena bhūyo bhūyaśca putraka |
ānṛṇyaṃ jāyate yadvatpitṝṇāṃ tattathā śṛṇu || 42 ||
[Analyze grammar]

tava vatsa pramāṇaṃ cetkuruṣva ca vaco mama |
tasyāstadvacanaṃ śrutvā vṛtraḥ saṃciṃtya cetasi || 43 ||
[Analyze grammar]

śrutismṛtyuktamārgeṇa na māturvidyate param |
sa tatheti pratijñāya ānināya parigraham || 44 ||
[Analyze grammar]

tvaṣṭā tasmai dadau prītastato ratnānyanekaśaḥ |
saṃkhyāhīnāni tasyaiva kupyākupyamanaṃtakam || 45 ||
[Analyze grammar]

hastyaśvayānakośāḍhyaṃ so'bhiṣiktaḥ pade nije |
dānavānāṃ mahāvīryo brāhmaṇyena samanvitaḥ || 46 ||
[Analyze grammar]

abhiṣiktaṃ tadā vṛtraṃ svarājye te'surādayaḥ |
śrutvābhiṣekaṃ saṃhṛṣṭāstasya vṛtrasya bāṃdhavāḥ || 47 ||
[Analyze grammar]

dānavāśca samājagmurye tatrāsanpurogatāḥ |
pātālādgiridurgācca sthaladurgebhya eva ca |
kṛtavairāḥ samaṃ devaiḥ kopena mahatā vṛtāḥ || 48 ||
[Analyze grammar]

tataḥ protsāhitaḥ sarvairdānavaiḥ sa mahābalaḥ |
prasthitaḥ śatrunāśāya mahendrabhavanaṃ prati || 49 ||
[Analyze grammar]

śakro'pi vṛtramākarṇya samāyāṃtaṃ yuyutsayā |
sanmukhaḥ prayayau hṛṣṭaḥ sarvadevasamanvitaḥ || 50 ||
[Analyze grammar]

tataḥ samabhavadyuddhaṃ devānāṃ dānavaiḥ saha |
merupṛṣṭhe suvistīrṇe nityameva divāniśam || 51 ||
[Analyze grammar]

nityaṃ parājayo jajñe devānāṃ dānavaiḥ saha |
tatrovāca guruḥ śakra mā yuddhaṃ kuru devapa || 52 ||
[Analyze grammar]

vṛtro'yaṃ dāruṇo yuddhe baladvayasamanvitaḥ |
catvāraścāgrato vedāḥ pṛṣṭhataḥ saśaraṃ dhanuḥ || 53 ||
[Analyze grammar]

tena jeyatamo daityastavaiva ca mahāhave |
tasmātsaṃdhānametena tvaṃ kuruṣva śacīpate || 54 ||
[Analyze grammar]

tato viśvāsamāyā taṃ jahi vajreṇa dānavam |
ṣaḍupāyai ripurvadhya iti śāstranidarśanam || 55 ||
[Analyze grammar]

bhuṃjānaśca śayānaśca dattvā kanyāmapi svakām |
vipradānena saṃyojya kṛtvāpi śapathaṃ gurum |
māyāprapaṃcamāsādya tasmādevaṃ samācara || 56 ||
[Analyze grammar]

indra uvāca |
yadyevaṃ ca svayaṃ gatvā tvaṃ viśvāse niyojaya |
tava vākyena viśvāsaṃ nūnaṃ yāsyati dānavaḥ || 57 ||
[Analyze grammar]

sūta uvāca |
śakrasya matamājñāya pratasthe ca bṛhaspatiḥ |
yatra vṛtraḥ sthito daityo yuddhārthaṃ kṛtaniścayaḥ || 58 ||
[Analyze grammar]

vṛtro'pi taṃ samālokya svayaṃ prāptaṃ bṛhaspatim |
sadaiva dvijabhaktaḥ sa hṛṣṭātmā samapadyata |
viśeṣātpraṇipatyoccairvākyametadabhāṣata || 59 ||
[Analyze grammar]

vṛtra uvāca |
svāgataṃ te dvijaśreṣṭha kiṃ karomi praśādhi mām |
priyā me brāhmaṇā yasmāttasmātkīrtaya sāṃpratam || 60 ||
[Analyze grammar]

bṛhaspatiruvāca || saṃdigdho vijayo yuddhe yasmāddaivena sattama |
tasmātkuru maheṃdreṇa vyavasthāṃ vacanānmama || 61 ||
[Analyze grammar]

tvaṃ bhuṃkṣva bhūtalaṃ kṛtsnaṃ śakraścāpi triviṣṭapam |
vyavasthayā'nayā nityaṃ vartitavyaṃ parasparam || 62 ||
[Analyze grammar]

vṛtra uvāca |
ahaṃ tava vaco brahmankariṣyāmi sadaiva hi |
saṃgamaṃ kuru śakreṇa sāṃprataṃ mama saddvija || 63 ||
[Analyze grammar]

sūta uvāca |
atha śakraṃ samānīya bṛhaspatirudāradhīḥ |
vṛtreṇa saha saṃdhānaṃ cakre caiva parasparam || 64 ||
[Analyze grammar]

ekārimitratāṃ gatvā tāvubhau daityadevapau |
prahṛṣṭau gatavantau tau tataścaiva nijaṃ gṛham || 65 ||
[Analyze grammar]

atha śakracchalānveṣī sadā vṛtrasya vartate |
na cchidraṃ labhate kvāpi vīkṣamāṇopi yatnataḥ || 66 ||
[Analyze grammar]

kathaṃcidapi so'bhyeti tatsakāśaṃ puraṃdaraḥ |
kiṃcicchidraṃ samāsādya tatpratāpena dahyate || 67 ||
[Analyze grammar]

iṃdra uvāca |
na śaknomi ca taṃ daityaṃ vīkṣituṃ ca kathaṃcana |
tejasā sarvato vyāptaṃ tatkathaṃ sūdayāmyaham || 68 ||
[Analyze grammar]

tasmātkaṃcidupāyaṃ me tadvadhārthaṃ prakīrtaya |
yathā śaknomi tatsoḍhuṃ tejastasya durātmanaḥ || 69 ||
[Analyze grammar]

sūta uvāca |
tasya tadvacanaṃ śrutvā ciraṃ dhyātvā bṛhaspatiḥ |
tataḥ provāca taṃ śakraṃ vinayāvanataṃ sthitam || 70 ||
[Analyze grammar]

bṛhaspatiruvāca |
tasya brāhmyaṃ sthitaṃ tejaḥ samyaggātre puraṃdara |
vīkṣituṃ naiva śaknoṣi tena tvaṃ tridaśādhipa || 71 ||
[Analyze grammar]

tathā te kīrtayiṣyāmi tasyopāyaṃ vadhodbhavam |
vadhayiṣyasi yenātra taṃ tvaṃ dānavasattamam || 72 ||
[Analyze grammar]

prācīsarasvatītīre puṣkarāraṇyamāśritaḥ |
dadhīcirnāma viprarṣiḥ śatayojanamucchritaḥ || 73 ||
[Analyze grammar]

tatra nityaṃ tapaḥ kurvanstauti nityaṃ pitāmaham |
sa nirviṇṇo muniśreṣṭhaḥ prāṇānāṃ dhāraṇe hare || 74 ||
[Analyze grammar]

ciraṃtano muniḥ sa syājjarayātisamāvṛtaḥ |
taṃ prārthaya drutaṃ gatvā tasyāsthīni gurūṇi ca || 75 ||
[Analyze grammar]

sa te dāsyastyasaṃdigdhaṃ tyaktvā prāṇānatipriyān |
tasyāsthibhiḥ praharaṇaṃ vajrākhyaṃ te bhaviṣyati || 76 ||
[Analyze grammar]

amoghaṃ te tato nūnaṃ tvaṃ vṛtraṃ sūdayiṣyasi |
tasya vajrasya tattejo brahmatejo'bhibṛṃhitam |
tena vṛtrodbhavaṃ tejaḥ praśamaṃ saṃprayāsyati || 77 ||
[Analyze grammar]

sūta uvāca |
tacchrutvā satvaraṃ śakraḥ sarvairdaivagaṇaiḥ saha |
jagāma puṣkarāraṇye yatra prācī sarasvatī || 78 ||
[Analyze grammar]

trayastriṃśatsamopetā tīrthānāṃ koṭibhiryutā |
dadhīcerāśramaṃ tatra so'viśaccitrasaṃyutam || 79 ||
[Analyze grammar]

krīḍaṃte nakulaiḥ sarpā yatra tuṣṭiṃ gatā mithaḥ |
mṛgāḥ paṃcānanaiḥ sārdhaṃ vṛṣadaṃśāstathā'khubhiḥ || 80 ||
[Analyze grammar]

ulūka sahitāḥ kākā mitho dveṣavivarjitāḥ |
prabhāvāttasya tapaso dadhīceḥ sumahātmanaḥ || 81 ||
[Analyze grammar]

dadhīcirapi cālokya devāñchakrapurogamān |
samāyātānprahṛṣṭātmā satvaraṃ saṃmukhobhyagāt || 82 ||
[Analyze grammar]

tataścārghyaṃ samādāya praṇipatya muhurmuhuḥ |
śakramabhyāgataṃ prāha kiṃ te kṛtyaṃ karomyaham || 83 ||
[Analyze grammar]

gṛhāyātasya deveśa tacchīghraṃ me nivedaya || 84 ||
[Analyze grammar]

iṃdra uvāca |
ātithyaṃ kuru vipreṃdra gṛhāyātasya sanmune |
tvadasthīni nijānyāśu mama dehyavikalpitam || 85 ||
[Analyze grammar]

atadarthamahaṃ prāptastvatsakāśaṃ munīśvara |
asthibhiste paraṃ kāryaṃ devānāṃ siddhimeṣyati || 86 ||
[Analyze grammar]

sūta uvāca |
iṃdrasya tadvacaḥ śrutvā dadhīcistoṣasaṃyutaḥ |
tataḥ prāha sahasrākṣaṃ sarvairdevaiḥ samanvitam || 87 ||
[Analyze grammar]

aho nāsti mayā tulyaḥ sāṃprataṃ bhuvi kaścana |
puṇyavānyasya deveśaḥ svayamarthī gṛhāgataḥ || 88 ||
[Analyze grammar]

dhanyāni ca mamāsthīni yāni deveśa te hitam |
kariṣyaṃti sadā kāryaṃ rakṣārthaṃ tridivaukasām || 89 ||
[Analyze grammar]

eṣo'haṃ saṃpradāsyāmi priyānprāṇānkṛte tava |
gṛhāṇa svecchayā'sthīni svakāryārthaṃ puraṃdara || 90 ||
[Analyze grammar]

evamuktvā maharṣiḥ sa dhyānamāśritya satvaram |
brahmaraṃdhreṇa niḥsārya prāṇamātmānamatyajat || 91 ||
[Analyze grammar]

tadātmanā parityaktaṃ tasya gātraṃ ca tatkṣaṇāt |
patitaṃ medanīpṛṣṭhe vyasu taddvijasattamāḥ || 91 ||
[Analyze grammar]

tasminneva kāle tu tasyāsthīni śatakratuḥ |
pragṛhya viśvakarmāṇaṃ tataḥ provāca sādaram || 93 ||
[Analyze grammar]

etairasthibhiḥ śīghraṃ me kuru tvaṃ vajramāyudham |
yena vyāpādayāmyāśu vṛtraṃ dānavasattamam || 94 ||
[Analyze grammar]

tasya tadvacanaṃ śrutvā viśvakarmā tvarānvitaḥ |
yathāyudhaṃ tathā cakre vajrākhyaṃ dāruṇākṛti || 95 ||
[Analyze grammar]

ṣaḍasri śataparvākhyaṃ madhye kṣāmaṃ vibhīṣaṇam |
pradadau ca tatastasmai sahasrākṣāya dhīmate || 96 ||
[Analyze grammar]

atha taṃ sa samādāya dvādaśārkasamaprabham |
samādhisthaṃ carairjñātvā vṛtraṃ saṃdhyārcane ratam || 97 ||
[Analyze grammar]

tataśca pṛṣṭhabhāgaṃ sa samāśritya trilokarāṭ |
cikṣepa vajramuddiśya tadvadhārthaṃ samutsukaḥ || 98 ||
[Analyze grammar]

sa hatastena vajreṇa dānavo bhasmasādgataḥ |
śakropi hatamajñātvā bhayāttasyātha dudruve || 99 ||
[Analyze grammar]

manuṣyarahite deśe viṣame gulmasaṃvṛte |
lilye śakrastadā sarvaṃ mene vṛtramayaṃ jagat || 100 ||
[Analyze grammar]

etasminnaṃtare devāḥ paśyaṃtaḥ sarvato diśam |
siddhacāraṇagandharvā ājagmuśca śatakratum || 101 ||
[Analyze grammar]

tataḥ kṛcchrācca tairdṛṣṭaḥ śakro'sau gahane vane |
nilīno bhayasaṃtrasto gulmamadhye vyavasthitaḥ || 102 ||
[Analyze grammar]

devā ūcuḥ |
kiṃ tvaṃ bhītaḥ sahasrākṣa vṛtro'yaṃ ghātitastvayā |
parivāreṇa sarveṇa vīkṣito'smābhireva ca || 103 ||
[Analyze grammar]

asmādāgaccha gacchāmo gṛhaṃ prati puraṃdara |
kuru trailokyarājyaṃ tvaṃ sāṃprataṃ hatakaṇṭakam || 104 ||
[Analyze grammar]

tacchrutvā'tha viniṣkrāṃto gulmamadhyācchatakratuḥ |
hṛṣṭaromā hataṃ śrutvā vṛtraṃ dānavasattamam || 105 ||
[Analyze grammar]

atha paśyaṃti yāvattaṃ devāḥ sarve śatakratum |
tāvattejovihīnaṃ tadgātraṃ durgaṃdhitāyutam || 106 ||
[Analyze grammar]

dṛṣṭvā lokagururbrahmā devānsarvānuvāca ha |
śakro'yaṃ sāṃprataṃ vyāptaḥ pāpayā brahmahatyayā || 107 ||
[Analyze grammar]

yadanena hato vṛtro brahmabhūtaśchalena saḥ |
tasmāttyājyaḥ sudūreṇa no cetpāpamavāpsyatha || 108 ||
[Analyze grammar]

brahmaghnena samaṃ sparśaḥ saṃbhāṣo'tha vinirmitaḥ |
pāpāya jāyate puṃsāṃ tasmāttaṃ dūratastyajet || 109 ||
[Analyze grammar]

āstāṃ saṃsparśanaṃ tasya saṃbhāṣo vā viśeṣataḥ |
darśanaṃ vāpi tasyāhuḥ sarvapāpapradaṃ nṛṇām || 110 ||
[Analyze grammar]

sūta uvāca |
tacchrutvā brahmaṇo vākyaṃ śakro dṛṣṭvā'tmanastanum |
tejasā saṃparityaktāṃ durgandhena samāvṛtām || 111 ||
[Analyze grammar]

tataḥ provāca lokeśaṃ dīnaḥ praṇatakandharaḥ |
tavāhaṃ kiṃkaro deva tvayeṃdratve niyojitaḥ || 112 ||
[Analyze grammar]

tasmātkuru prasādaṃ me brahmahatyāvināśanam |
prāyaścittaṃ vibho brūhi yena śuddhiḥ prajāyate || 113 ||
[Analyze grammar]

brahmovāca |
aṣṭaṣaṣṭiṣu tīrtheṣu tvaṃ snātvā balasūdana |
ātmānaṃ hemajaṃ dehi pāpapūruṣasaṃjñitam || 114 ||
[Analyze grammar]

maṃtravattaṃ yathoktaṃ ca brāhmaṇāya mahātmane |
snātvā puṇyajale tīrthe brahmaghno'hamiti bruvan || 115 ||
[Analyze grammar]

snātamātrasya te hastādyatra tatpatati kṣitau |
tejaḥ saṃjāyategātre durgaṃdhaśca praṇaśyati || 116 ||
[Analyze grammar]

tasmiṃstīrthe tvayā tacca sthāpyaṃ śakra kapālakam |
maheśvarasya nāmnā ca pūjanīyaṃ tataḥ param || 117 ||
[Analyze grammar]

paṃcabhirvaktramaṃtraiśca tato deyā'tmatastanūḥ |
hemodbhavā dvijendrāya tataḥ śuddhimavāpsyasi || 118 ||
[Analyze grammar]

śakrastu tadvacaḥ śrutvā brahmaṇo'vyaktajanmanaḥ |
kapālaṃ vṛtrajaṃ gṛhya tīrthayātrāṃ tato gataḥ || 119 ||
[Analyze grammar]

aṣṭaṣaṣṭiṣu tīrtheṣu gacchansa ca sureśvaraḥ |
hāṭakeśvaraje kṣetre samāyātaḥ krameṇa ca || 120 ||
[Analyze grammar]

viśvāmitrahrade snātvā yāvattasmādvinirgataḥ |
kapālaṃ patitaṃ tasmātsvayameva hatātmanaḥ || 121 ||
[Analyze grammar]

tatastaṃ pūjayāmāsa mantrairvaktrasamudbhavaiḥ |
sarvapāpaharaiḥ puṇyairyathoktairbrahmaṇā purā || 122 ||
[Analyze grammar]

etasminneva kāle tu durgandho nāśamāptavān |
taccharīrāddvijaśreṣṭhā mahattejo vyajāyata || 123 ||
[Analyze grammar]

etasminnantare brahmā saha devaiḥ samāgataḥ |
brahmahatyāvimuktaṃ taṃ jñātvā sarvasurādhipam || 124 ||
[Analyze grammar]

śrībrahmovāca |
brahmahatyākṛto doṣo gataste surasattama |
śeṣapāpaviśuddhyarthaṃ svarṇadānaṃ prayaccha bhoḥ || 125 ||
[Analyze grammar]

kapālametaddeśe'tra yattvayā paripūjitam |
vṛtrasya paṃcabhirmaṃtrairharavaktrasamudbhavaiḥ || 126 ||
[Analyze grammar]

pradāsyasi tato bhaktyā hemajāmātmanastanum |
vidhinā maṃtrayuktena tava pāpaṃ prayāsyati |
yadyatpūrvakṛtaṃ kṛtsnaṃ pradāya brāhmaṇāya bhoḥ || 127 ||
[Analyze grammar]

evamuktastataḥ śakro brahmaṇā surasaṃnidhau |
tathetyuktvā tu tatkālaṃ pāpapiṃḍaṃ nijaṃ dadau || 128 ||
[Analyze grammar]

kṛtvā hemamayaṃ viprā brāhmaṇāya mahātmane |
gartātīrthasamutthāya vātākhyāyāhitāgnaye || 129 ||
[Analyze grammar]

etasminnaṃtare vipro garhitaḥ so'tha nāgaraiḥ |
dhigdhikpāpa vṛthā vedā ye tvayā pāritāḥ purā || 130 ||
[Analyze grammar]

nāsmābhiḥ saha saṃparkaṃ kadācittvaṃ kariṣyasi |
gṛhītaṃ yattvayā dānaṃ pāpapiṃḍasamudbhavam || 131 ||
[Analyze grammar]

tataḥ provāca vipraḥ sa upamanyukulodbhavaḥ |
vivarṇavadano bhūtvā nāmnā khyātaḥ sa vātakaḥ || 132 ||
[Analyze grammar]

tvayā śakra pradatto me pāpapiṃḍaḥ svako yataḥ |
mayā pratigrahastena dākṣiṇyena kṛtastava || 133 ||
[Analyze grammar]

na lobhena suraśreṣṭha paśyataste vigarhitaḥ |
ahaṃ ca brāhmaṇaiḥ sarvairetairnagaravāsibhiḥ || 134 ||
[Analyze grammar]

tasmānnāhaṃ grahīṣyāmi etaṃ tava pratigraham || 135 ||
[Analyze grammar]

bhūyo'pi tava dāsyāmi na tvaṃ gṛhṇāsi cetpunaḥ || bra |
hmaśāpaṃ pradāsyāmi dāruṇaṃ ca kṣayātmakam || 136 ||
[Analyze grammar]

iṃdra uvāca |
vedāgaṃpārago vipro yadi kuryātpratigraham |
na sa pāpena lipyeta padmapatramivāṃbhasā || 137 ||
[Analyze grammar]

tasmātte pātakaṃ nāsti śṛṇuṣvātra vaco mama |
etaistvaṃ garhite yasmādbrāhmaṇairnagarodbhavaiḥ || 138 ||
[Analyze grammar]

eteṣāṃ sarvakṛtyeṣu pradhānastvaṃ bhaviṣyasi |
eteṣāṃ putrapautrā ye bhaviṣyaṃti tathā tava || 139 ||
[Analyze grammar]

te sarve cājñayā teṣāṃ vartayiṣyaṃtyasaṃśayam |
yuṣmadvākyavihīnaṃ yatkṛtyaṃ svalpamapi dvija || 140 ||
[Analyze grammar]

teṣāṃ saṃpatsyate vandhyaṃ yathā bhasmahutaṃ tathā |
kapālamocanaṃ nāma khyātametadbhaviṣyati || 141 ||
[Analyze grammar]

ye tu saṃsmṛtya manujāḥ kapālaṃ mama saddvija |
tatra śrāddhaṃ kariṣyaṃti te narā muktisaṃyutāḥ |
śrāddhapakṣe viśeṣeṇa prayāsyaṃti parāṃgatim || 142 ||
[Analyze grammar]

sthānabāhyadvijātīnāṃ kule dāraparigraham |
kṛtvā tvadgotrasaṃbhūtā brāhmaṇā matprasādataḥ || 143 ||
[Analyze grammar]

vyavahāryā bhaviṣyaṃti nagare sarvakarmasu |
evamuktvā sahasrākṣastataścādarśanaṃ gataḥ || 144 ||
[Analyze grammar]

vātopi tena vittena pratigrahakṛtena ca |
cakāra tatra prāsādaṃ devadevasya śūlinaḥ || 145 ||
[Analyze grammar]

tataḥ provāca śakrastānbrāhmaṇānnagarodbhavān |
kapālamocane snātvā yo devaṃ hyarcayiṣyati || 146 ||
[Analyze grammar]

brahmahatyodbhavaṃ pāpaṃ tasya naśyatyasaṃśayam |
mahāpātakayukto vā vipāpmā saṃbhaviṣyati || 147 ||
[Analyze grammar]

sa tatheti pratijñāya brāhmaṇānnagarodbhavān |
tatraiva svāśramaṃ kṛtvā pūjayāmāsa śaṃkaram || 148 ||
[Analyze grammar]

tataḥprabhṛti yatkiṃcitteṣāṃ kṛtyaṃ prajāyate |
tadvākyena prakurvaṃti tatra ye nāgaraḥ sthitāḥ || 149 ||
[Analyze grammar]

etasmātkāraṇājjāto madhyago dvitīyastviha || 150 ||
[Analyze grammar]

etadvaḥ sarvamākhyātamākhyānaṃ pāpanāśanam |
kapāleśvaradevasya śṛṇvatāṃ paṭhatāṃ nṛṇām || 151 ||
[Analyze grammar]

yathā deveśvarasyātra pāpaṃ naṣṭaṃ mahātmanaḥ |
brahmahatyā yathā naṣṭā tasmiṃstīrthe dvijottamāḥ || 152 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye vātakeśvarakṣetrakapālamocaneśvarotpattimāhātmyavarṇanaṃ nāmaikonasaptatyuttaradviśatatamo'dhyāyaḥ || 269 ||
[Analyze grammar]