Chapter 53

[English text for this chapter is available]

īśvara uvāca |
tripaṃcāśattamaṃ viddhi suprasiddhamatheśvaram |
paraṃ viśveśvaraṃ khyātaṃ viśveṣu bhuvaneṣvapi || 1 ||
[Analyze grammar]

babhūva nṛpatiḥ pūrvaṃ vidarbhāyāṃ vidūrathaḥ |
sontaḥpurāyutopetaṃ cakre rājyamakaṃṭakam || 2 ||
[Analyze grammar]

jaghāna tāpasaṃ so'tha pramādānmṛgayā gataḥ |
kṛṣṇājinadharaṃ śāṃtaṃ dhyāyaṃtaṃ brahma śāśva tam || 3 ||
[Analyze grammar]

mṛgaṃ matvā mahāraṇye brāhmaṇaṃ devamohitaḥ |
 tena karmavipākena dehāṃte rauravaṃ gataḥ || 4 ||
[Analyze grammar]

tatrāsau yātanā ghorāṃ anubhūyātmakālataḥ |
tasmādihāgato marttye sarpo viṣadharo'bhavat || 5 ||
[Analyze grammar]

adaśatso'pi kopena brāhmaṇaṃ caraṇe priye |
lakuṭena hataḥ so'pi paṃcatvaṃ tatkṣaṇādgataḥ || 6 ||
[Analyze grammar]

cyutastu narakātsiṃho dvitīye'bhūtsudāruṇaḥ |
rājānaṃ bhakṣayāmāsa rājalokairnipātitaḥ || 7 ||
[Analyze grammar]

punarvyāghro babhūvāsau tṛtīye'pi bhavāṃtare |
tīkṣṇapādanakhairghorairghātayāmāsa sūkarān || 8 ||
[Analyze grammar]

tenāpi vaiśyo nidhanaṃ nītaḥ kaścidvanāṃtare |
niṣādairnihataḥ so'pi bāṇaiḥ paṃcatvamāgataḥ || 9 ||
[Analyze grammar]

caturthe 'pi gajo jātaḥ siṃhādvadhamavāptavān |
paṃcame makaro jātaḥ kṣārāṃbhasi mahodadhau || 10 ||
[Analyze grammar]

snātukāmāmatho rāmāmājaghānātipāpakṛt |
dhīvaraiḥ kṛtadhikkārairbaḍiśaiḥ sannipātitaḥ || 11 ||
[Analyze grammar]

punaḥ ṣaṣṭhe bhave jātaḥ piśācaḥ piśitāśanaḥ |
siddhamaṃtrairathodagrairatharvaprabhavairbhṛśam || 12 ||
[Analyze grammar]

maṃtrī maṃtravidāṃ śreṣṭho brāhmaṇastaṃ jaghāna ha |
saptame sa punarjāto durnirīkṣyavapurbhṛśam || 13 ||
[Analyze grammar]

tīkṣṇadaṃṣṭraḥ karālāsyo māṃsaśoṇitabhojanaḥ |
śuṣkāṃgo marubhūmīṣu pāpiṣṭho brahmarākṣasaḥ || 14 ||
[Analyze grammar]

ākramya nimirājena rājñā rākṣasaśatruṇā |
samāropya dhanuḥ saṃkhye brahmāstreṇa nipātitaḥ || 15 ||
[Analyze grammar]

dāruṇaḥ sārameyo'bhūdatikṛṣṇo'ṣṭame bhave |
sa śūkarakhurāghātavraṇaiḥ paṃcatvamāgataḥ || 16 ||
[Analyze grammar]

navame jaṃbuko jātaḥ śmaśāne sa ca māṃsabhuk |
laulyātsa nidhanaṃ prāpto duḥkhārtto dāvavahninā || 17 ||
[Analyze grammar]

daśame tvabhavadgṛdhrastīkṣṇatuṃḍo bhayāvahaḥ |
pūtimāṃsavasāhāro rogeṇa nidhanaṃ gataḥ || 18 ||
[Analyze grammar]

ekādaśe 'pi caṃḍālo gato'vaṃtyāṃ varānane |
dravyasya haraṇārthaṃ vai praviṣṭo dvijaveśmani || 19 ||
[Analyze grammar]

sa daṃḍapāśikenaiva prāpto baddhaśca tatkṣaṇāt |
ānīto hi vadhārthāya vṛkṣāgre hyavalaṃvitaḥ || 20 ||
[Analyze grammar]

tatraiva liṃgamāsannaṃ sādhvi śūleśvarottare |
tasya dṛṣṭipathaṃ prāptamativiklavacetasaḥ || 21 ||
[Analyze grammar]

kṣaṇena nidhanaṃ prāptaḥ sa gatastridaśālayam |
tatra bhuktvā varānbhogānavatīrya ca bhūtale || 22 ||
[Analyze grammar]

jātaḥ khyāto vidarbhāyāṃ viśveśonāma pārthivaḥ |
jāti smaratvamāpanno liṃgadarśanapuṇyataḥ || 23 ||
[Analyze grammar]

durlabhānbubhuje bhogānprāptaṃ rājyaṃ cakāra saḥ |
so'bhiṣicya sutaṃ rājye vinītamatidharmavit |
saṃsmaranpūrvavṛttāṃtaṃ jagāmāvaṃtikāṃ purīm || 24 ||
[Analyze grammar]

tatra dṛṣṭvā mahalliṃgaṃ durdarśamatitejasā |
divyena cakṣuṣā'paśyalliṃgamadhye carācaram || 25 ||
[Analyze grammar]

liṃgamadhye sthitāḥ sarve sāgarāḥ saritastathā |
dvīpāśca parvatāścaiva tathānyā divyabhūtayaḥ || 26 ||
[Analyze grammar]

caṃdramāḥ saha nakṣatrairādityaścāgninā saha |
dhanado varuṇaścaiva yamaḥ śakro marutpatiḥ || 27 ||
[Analyze grammar]

maruto devagaṃdharvā ṛṣayaśca tapodhanāḥ |
nāgā yakṣāḥ piśācāśca rākṣasā bhīmavikramāḥ || 28 ||
[Analyze grammar]

brahmādyā devatāścānyāḥ skaṃdo laṃbodarastathā |
sarvaṃ tribhuvanaṃ devi liṃgamadhye vilokitam || 29 ||
[Analyze grammar]

prabhāvaṃ tasya liṃgasya jñātvā samyaṅmahīpatiḥ |
saṃyataḥ pūjayāmāsa viśvayoniṃ maheśvaram || 30 ||
[Analyze grammar]

prasannaścābhavattasya vacanaṃ cedamabravīt |
varaṃ varaya bhadraṃ te kimabhīṣṭaṃ dadāmi te || 31 ||
[Analyze grammar]

tenoktaṃ vacanaṃ rājñā yadi tuṣṭosi me prabho |
ye tvāṃ paśyaṃti manujāḥ śraddhayā'śraddhayā'thavā || 32 ||
[Analyze grammar]

mā bhūtteṣāṃ prapatanaṃ ghore saṃsārasāgare |
viśveśvareti nāmnā vai prasiddho bhava bhūtale || 33 ||
[Analyze grammar]

ityukte vacane bhūyo viśveśo'laṃkṛto gaṇaiḥ |
 vimānena sudīptena gato lokaṃ madīyakam || 34 ||
[Analyze grammar]

gaṇairnānāvidhaiḥ sārddhaṃ stūyamāno varānane |
kirīṭī kuṇḍalī caiva muktāhāravibhūṣitaḥ |
vimānaṃ tasya taddivyaṃ parikramya samaṃtataḥ || 35 ||
[Analyze grammar]

samaheṃdradhanādhyakṣanānānākanivāsinaḥ |
munayaḥ siddhagaṃdharvāstathā cāpsarasāṃ gaṇāḥ || 36 ||
[Analyze grammar]

nṛtyenāmaranārīṇāṃ vilokitavinodakaḥ |
yugakoṭisahasraṃ tu matsamīpe vyavasthitaḥ || 37 ||
[Analyze grammar]

ato devi bhuvi khyāto devo viśveśvareśvaraḥ |
dṛṣṭvā liṃgaṃ ca viśveśaṃ pātakairvipramucyate || 38 ||
[Analyze grammar]

saptajanmakṛtairdehī manovākkāyakarmabhiḥ |
dṛṣṭvā viśveśvaraṃ liṃgaṃ kṛtakṛtyatvamāpyate || 39 ||
[Analyze grammar]

tasya naśyati daurbhāgyamalakṣmīrnāśameti ca |
prāpnoti dehī kāmāṃśca samṛddhiṃ mānasīṃ sadā || 40 ||
[Analyze grammar]

duḥsvapno vyādhayaḥ krūrā grahā bhūtāśca dāruṇāḥ |
praṇaśyanti varārohe viśveśe pūjite sadā || 41 ||
[Analyze grammar]

ye kecicchraddhayā yuktā liṃgamārādhayaṃti vai |
te sarvakāma saṃpannā jāyaṃte ca yugeyuge || 42 ||
[Analyze grammar]

aṃte gatiśca sā divyā jāyate matprasādataḥ |
yatra saṃpūjyate ligaṃ tasmindeśe śubhāḥ kriyāḥ || 43 ||
[Analyze grammar]

na tatra durbhikṣabhayaṃ nāpamṛtyubhayaṃ kvacit |
pretayonau ca vetālā na nāgā na ca daṃṣṭriṇaḥ || 44 ||
[Analyze grammar]

ete ca viṣṇubrahmeṃdrakuberavaruṇādayaḥ |
liṃgārcanena saṃprāptāḥ parāṃ siddhiṃ mahaujasaḥ || 45 ||
[Analyze grammar]

eṣa te kathito devi prabhāvaḥ pāpanāśanaḥ |
viśveśvarasya devasya kaṇṭeśvaramataḥ śṛṇu || 46 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmye viśveśvaramāhātmyavarṇanaṃnāma tripaṃcā śattamo'dhyāyaḥ || 53 ||
[Analyze grammar]