Chapter 52

[English text for this chapter is available]

śrīviśveśvara uvāca |
dvyadhikaṃ devi jānīhi paṃcāśattamamīśvaram |
oṃkāreśvara ityākhyā yasyāsti bhuvanatraye || 1 ||
[Analyze grammar]

prākṛte kalpasaṃjñe tu prathame prathamaṃ mayā |
vaktrādutpādito devi puruṣaḥ kapilākṛtiḥ || 2 ||
[Analyze grammar]

tataḥ sa puruṣo divyaḥ kiṃ karomītyupasthitaḥ |
vibhajātmānamityukto mayāṃtarddhānago'bhavat || 3 ||
[Analyze grammar]

nirvāṇasyeva dīpasya gatistasya na lakṣitā |
tatastasyābhavacciṃtā kathamātmā vibhajyate || 4 ||
[Analyze grammar]

evaṃ ciṃtayatastasya caturmityotthitastataḥ |
trivarṇasvararūpī ca caturvargaphalapradaḥ || 5 ||
[Analyze grammar]

ṛgyajuḥsāmanāmā ca brahmaviṣṇuśivātmakaḥ |
vyāpnuvansakalāṃllokānprabhāvaiḥ pṛthubhistadā || 6 ||
[Analyze grammar]

oṃkāra iti tasyākhyā mayā datā prasādataḥ |
tadoktābhirudārābhirvāṇībhiḥ samalaṃkṛtaḥ || 7 ||
[Analyze grammar]

hṛdayāttasya devasya vaṣaṭkāraḥ samutthitaḥ |
chaṃdasāṃ pravarā devī caturviṃśākṣarā parā || 8 ||
[Analyze grammar]

ṣaṭkukṣiḥ sā tripādā ca paṃcaśīrṣopalakṣitā |
samīpavarttinī devī pārśve tatra vyavasthitā || 9 ||
[Analyze grammar]

gāyatrī madhurābhāṣā sāvitrī lokaviśrutā |
sa coṃkāro mayā prokto gāyatryā saha pārvati |
sṛṣṭiṃ kuru mamādeśādvicitrāmanayā saha || 10 ||
[Analyze grammar]

ityuktastriśikho bhūtvā hiraṇyasadṛśākṛtiḥ |
sṛṣṭimutpādayāmāsa svaśarīrānmamājñayā || 11 ||
[Analyze grammar]

pūrvaṃ devagaṇāścaiva trayastriṃśacca devatāḥ |
manuṣyā ṛṣayaścaiva vedaprāmāṇyataḥ kṛtāḥ || 12 ||
[Analyze grammar]

teṣāṃ dehe praviṣṭānāṃ prādurbhāvaḥ punarbhavet |
yathā sūryasya satatamudayāstamanaṃ bhavet || 13 ||
[Analyze grammar]

saṃhṛtyoṃkāramakhilānsadevāsurapannagān |
kṛtātmagarbhe bhagavānoṃkāro jagataḥ prabhuḥ || 14 ||
[Analyze grammar]

sasarja sarvabhūtāni kalpāṃte parvatātmaje |
avyaktaḥ śāśvataścaiva tasya sarvamidaṃ jagat || 15 ||
[Analyze grammar]

karttā caiva vikarttā ca saṃhartā ca mahāṃstu yaḥ |
oṃkārapūrvakā vedā yajñāścoṃkārapūrvakāḥ || 16 ||
[Analyze grammar]

oṃkārapūrvakaṃ jñānaṃ tapaścoṃkārapūrvakam |
svayaṃbhūriti vijñeyaḥ sa brahmā bhuvanādhipaḥ || 17 ||
[Analyze grammar]

sa vāyuriti vijñeyaḥ sarvajñaḥ sa prajākaraḥ |
viśve devāstathā sādhyā rudrādityāstathāśvinau || 18 ||
[Analyze grammar]

prajānāṃ patayaścaiva sapta caiva maharṣayaḥ |
vasavo'psarasaścaiva gaṃdharvāścaiva rākṣasāḥ || 19 ||
[Analyze grammar]

daityāḥ piśācā rakṣāṃsi bhūtāni vividhāni ca |
brāhmaṇāḥ kṣatriyā vaiśyāḥ śūdrā mlecchādayo bhuvi |
sarve catuṣpadāścaiva tiryagyonigatāstadā || 20 ||
[Analyze grammar]

jaṃgamāni ca sattvāni yaccānyajjīvasaṃjñakam |
kṛtvā sarvamaśeṣaṃ ca mamāṃtikamupāgataḥ || 21 ||
[Analyze grammar]

praṇamya prayato bhūtvā vacanaṃ cedamabravīt |
kṛtā sṛṣṭirmayā deva tvatprasādānmaheśvara || 22 ||
[Analyze grammar]

dehi me paramaṃ sthānaṃ yathā kīrttirdhruvā bhavet |
oṃkārasya vacaḥ śrutvā mayā proktaṃ varānane || 23 ||
[Analyze grammar]

mamābhīṣṭakaraṃ sthānaṃ nityamavyayamakṣayam |
mahākālavanaṃ divyaṃ sarvasaṃpatkaraṃ śubham || 24 ||
[Analyze grammar]

tatra te bhavitā kīrttiḥ śāśvatī nātra saṃśayaḥ |
śūleśvarasya devasya pūrvabhāge vyava sthitam || 25 ||
[Analyze grammar]

trikalpaprabhavaṃ liṃgaṃ tvannāmnā khyātimeṣyati |
oṃkāreśvara ityākhyā bhaviṣyati jagattraye || 26 ||
[Analyze grammar]

ityukto hi mayā devi oṃkāro hṛṣṭamānasaḥ |
dadarśa tatra talliṃgaṃ tasmiṃlliṃge layaṃ gataḥ || 27 ||
[Analyze grammar]

tataḥ prabhṛti vedeṣu oṃkāraḥ kriyate dvijaiḥ |
puṇyārthaṃ maṃgalārthaṃ ca prathamaṃ sarvavastuṣu || 28 ||
[Analyze grammar]

layaṃgato yadoṃkārastadāprabhṛti pārvati |
mayocyamānaṃ liṃgasya prabhāvātiśayaṃ śṛṇu || 29 ||
[Analyze grammar]

yadyugādisahasreṣu vyatīpātaśateṣu ca |
ayanānāṃ sahasreṣu yatpuṇyaṃ samudāhṛtam |
tatpuṇyamadhikaṃ devi oṃkāreśvaradarśanāt || 30 ||
[Analyze grammar]

caturṣvapi ca vedeṣu samadhīteṣu yatphalam |
tato'dhikaṃ phalaṃ proktamoṃkāreśvaradarśanāt || 31 ||
[Analyze grammar]

brahmacaryeṇa yatpuṇyaṃ yāvajjīvaṃ kṛtena ca |
tatpuṇyamadhikaṃ proktamoṃkāreśvaradarśanāt || 32 ||
[Analyze grammar]

karīṣasādhane puṇyaṃ yacca puṇyamanāśake |
tatpuṇyamadhikaṃ devi oṃkāreśvaradarśanāt || 33 ||
[Analyze grammar]

pūjāyāṃ yatphalaṃ proktaṃ tasya saṃkhyā na vidyate || 34 ||
[Analyze grammar]

kiṃ yajñairbahuvittāḍhyaiḥ kiṃ tapobhiḥ suduṣkaraiḥ |
oṃkāradarśanādeva tatphalaṃ labhate yataḥ || 35 ||
[Analyze grammar]

pūjanātsparśanādvāpi kīrttanācchravaṇāttathā |
oṃkāreśvaradevasya narāḥ syurmuktibhājanāḥ || 36 ||
[Analyze grammar]

eṣa te kathito devi prabhāvaḥ pāpanāśanaḥ |
oṃkāreśvaradevasya śṛṇu viśveśvaraṃ param || 37 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmya oṃkāreśvaramāhātmyavarṇanaṃnāma dvipaṃcāśattamo'dhyāyaḥ || 52 ||
[Analyze grammar]