Chapter 48

[English text for this chapter is available]

śrīsūta uvāca |
rāmanāthaṃ samuddiśya kathāṃ pāpavināśinīm |
pravakṣyāmi muniśreṣṭhāḥ śṛṇudhvaṃ susamāhitāḥ || 1 ||
[Analyze grammar]

pāṃḍyadeśādhipo rājā purāsīcchaṃkarābhidhaḥ |
brahmaṇyaḥ satyasaṃdhaśca yāyajūkaśca dhārmikaḥ || 2 ||
[Analyze grammar]

vedavedāṃgatattvajñaḥ parasainyavidāraṇaḥ |
caturo'pyāśramānvarṇāndharmataḥ paripālayan || 3 ||
[Analyze grammar]

vaidikācāranirataḥ purāṇasmṛtipāragaḥ |
śivaviṣṇvarcako nityamanyadaivatapūjakaḥ || 4 ||
[Analyze grammar]

mahādānaprado nityaṃ brāhmaṇānāṃ mahātmanām |
mṛgayārthaṃ yayau dhīmānsa kadācittapovanam || 5 ||
[Analyze grammar]

siṃhavyāghrebhamahiṣa krūrasatvabhayaṃkaram |
jhillikābhīṣaṇaravaṃ sarīsṛpasamākulam || 6 ||
[Analyze grammar]

bhīmaśvāpadasaṃpūrṇaṃ dāvānalabhayaṃkaram |
mahāraṇyaṃ praviśyātha śaṃkaro rājaśekharaḥ || 7 ||
[Analyze grammar]

anekasainikopeta ākheṭikulasaṃkulaḥ |
pādukāgūḍhacaraṇo raktoṣṇīṣo haricchadaḥ || 8 ||
[Analyze grammar]

baddhagodhāṃgulitrāṇo dhṛtakodaṇḍasāyakaḥ |
kakṣyābaddhamahākhaṅgaḥ śvetāśvavaramāsthitaḥ || 9 ||
[Analyze grammar]

suveṣadhārī sannaddhaḥ pattisaṃghasamāvṛtaḥ |
kāṃtāreṣu ca sarveṣu parvateṣu guhāsu ca || 10 ||
[Analyze grammar]

samuttīrṇa mahāsrotā yuvā siṃhaparākramaḥ |
vicacāra balaiḥ sākaṃ darīṣu mṛgayanmṛgān || 11 ||
[Analyze grammar]

badhyatāṃ vadhyatāmeṣa yāti vegānmṛgo vane |
evaṃ vadatsu sainyeṣu svayamutplutya śaṃkaraḥ || 12 ||
[Analyze grammar]

mṛgaṃ haṃti mahārājo vigāhya vipinasthalīm |
siṃhānvarāhānmahiṣānkuñjarāccharabhāṃstathā || 13 ||
[Analyze grammar]

vinighnansa mṛgānanyānvanyāñchaṃkarabhūpatiḥ |
kutracidvipinoddeśe darīmadhyanivāsinam || 14 ||
[Analyze grammar]

vyāghracarmadharaṃ śāṃtaṃ muniṃ niyatamānasam |
vyāghrabuddhyā jaghānāśu śareṇānataparvaṇā || 15 ||
[Analyze grammar]

ativegena vipreṃdrāstatpatnīṃ ca sasāyakaḥ |
nijaghāna patiprāṇāṃ niviṣṭāṃ patyuraṃtike || 16 ||
[Analyze grammar]

vilokya mātāpitarau tatputro nihatau vane |
ruroda bhṛśaduḥkhārto vilalāpa ca kātaraḥ || 17 ||
[Analyze grammar]

bhostāta mātarmāṃ hitvā yuvāṃ yātau kva vādhunā |
ahaṃ kutra gamiṣyāmi ko vā me śaraṇaṃ bhavet || 18 ||
[Analyze grammar]

ko māmadhyāpayedvedāñchāstraṃ vā pāṭhayetpitaḥ |
aṃba me bhojanaṃ kā vā dāsyate sopadeśakam || 19 ||
[Analyze grammar]

ācārāñcchikṣayetko vā tāta tvayi mṛte'dhunā |
aṃba bālaṃ prakupitaṃ kā vā māmupalāpa yet || 20 ||
[Analyze grammar]

yuvāṃ nirāgasāvadya kena pāpena sāyakaiḥ |
nihatau vai taponiṣṭhau matprāṇau madgurū vane || 21 ||
[Analyze grammar]

evaṃ tayoḥ suto viprā muktakaṇṭhaṃ ruroda vai |
atha pralapitaṃ śrutvā śaṃkaro vipine caran || 22 ||
[Analyze grammar]

tacchabdābhimukhaḥ sadyaḥ prayayau sa darīmukham |
tatratyā munayo'pyāśu samāgacchaṃstamāśramam || 23 ||
[Analyze grammar]

te dṛṣṭvā munayaḥ sarve śareṇa nihataṃ munim |
tatpatnīṃ ca hatāṃ viprā rājānaṃ ca dhanurdharam || 24 ||
[Analyze grammar]

vilapaṃtaṃ sutaṃ cāpi vilokya bhṛśavihvalāḥ |
putramāśvāsayāmāsurmā rodīriti kātaram || 25 ||
[Analyze grammar]

munaya ūcuḥ |
āḍhye vāpi daridre vā mūrkhe vā paṃḍite'pi vā |
pīne vātha kṛśe vāpi samavartī paretarāṭ || 26 ||
[Analyze grammar]

vane vā nagare grāme parvate vā sthalāṃtare |
mṛtyorvaśe prayātavyaṃ sarvairapi hi jaṃtubhiḥ || 27 ||
[Analyze grammar]

vatsa nityaṃ ca garbhasthairjātairapi ca jaṃtubhiḥ |
yuvabhiḥ sthaviraiḥ sarvairyātavyaṃ yamapattanam || 28 ||
[Analyze grammar]

varṇibhiśca gṛhasthaiśca vānaprasthaiśca bhikṣubhiḥ |
kāle prāpte tvayaṃ dehastyaktavyo dvijaputraka || 29 ||
[Analyze grammar]

brāhmaṇaiḥ kṣatriyairvaiśyaiḥ śūdrairapi ca saṃkaraiḥ |
yātavyaṃ pretanilaye dvijaputra mahāmate || 30 ||
[Analyze grammar]

devāśca munayo yakṣā gaṃdharvoragarākṣasāḥ |
anye ca jaṃtavaḥ sarve brahmaviṣṇuharādayaḥ || 31 ||
[Analyze grammar]

sarve yāsyaṃti vilayaṃ na tvaṃ śocitumarhasi |
advayaṃ saccidānaṃdaṃ yadbrahmopaniṣadgatam || 32 ||
[Analyze grammar]

na tasya vilayo janma vardhanaṃ cāpi sattama |
malabhāṃḍe navadvāre pūyāsṛkchoṇitālaye || 33 ||
[Analyze grammar]

dehe'sminbudbudākāre kṛmiyūthasamākule |
kāmakrodhabhayadrohamohamātsaryakāriṇi || 34 ||
[Analyze grammar]

paradāraparakṣetraparadravyaikalolupe |
hiṃsāsūyāśucivyāpte viṣṭhāmūtraikabhājane || 35 ||
[Analyze grammar]

yaḥ kuryācchobhanadhiyaṃ sa mūḍhaḥ sa ca durmatiḥ |
bahucchidraghaṭākāre dehe'sminnaśucau sadā || 36 ||
[Analyze grammar]

vāyoravasthitiḥ kiṃ syātprāṇākhyasya ciraṃ dvija |
ato mā kuru śokaṃ tvaṃ jananīṃ pitaraṃ prati || 37 ||
[Analyze grammar]

tau svakarmavaśādyātau gṛhaṃ tyaktvā tvidaṃ kvacit |
tava karmavaśāttvaṃ ca tiṣṭhasyasminmahītale || 38 ||
[Analyze grammar]

yadā karmakṣayaste syāttadā tvaṃ ca mariṣyasi |
mariṣyamāṇapreto hi mṛtapretasya śocati || 39 ||
[Analyze grammar]

yasminkāle samutpannau tava mātā pitā tathā |
na tasmiṃstvaṃ samutpannastato bhinnā gatirhi vaḥ || 40 ||
[Analyze grammar]

yadi tulyā gatiste syāttābhyāṃ saha mahāmate || |
tarhi tvayāpi yātavyaṃ mṛtau yatra hi tau gatau || 41 ||
[Analyze grammar]

mṛtānāṃ bāṃdhavā ye tu muṃcaṃtyaśrūṇi bhūtale |
pibaṃtyaśrūṇi tānyaddhā mṛtāḥ pretāḥ paratra vai || 42 ||
[Analyze grammar]

ataḥ śokaṃ parityajya dhṛtiṃ kṛtvā samāhitaḥ |
anayoḥ pretakāryāṇi kuru tvaṃ vaidikāni tu || 43 ||
[Analyze grammar]

śaraghātānmṛtāvetau yasmātte jananī pitā |
atastaddoṣaśāṃtyarthamasthīnyādāya vai tayoḥ || 44 ||
[Analyze grammar]

rāmanāthaśivakṣetre rāmasetau vimuktide |
sthāpayasva tathā śrāddhaṃ sapiṃḍīkaraṇādikam || 45 ||
[Analyze grammar]

tatraiva kuru śuddhyarthaṃ tayorbāhmaṇaputraka |
tena durmṛtyudoṣasya śāṃtirbhavati nānyathā || 46 ||
[Analyze grammar]

śrīsūta uvāca |
evamuktaḥ sa munibhiḥ śākalyasya suto dvijāḥ |
jāṃgalākhyastayoḥ sarvaṃ pitṛmedhaṃ cakāra vai || 47 ||
[Analyze grammar]

anyedyurasthīnyādāya hālāsyaṃ prayayau ca saḥ |
tasmādrāmeśvaraṃ sadyo gatvā'yaṃ jāṃgalo dvijaḥ || 48 ||
[Analyze grammar]

muniproktaprakāreṇa tasminrāmeśvarasthale |
nidhāya pitrorasthīni śrāddhādīnyakarottathā || 49 ||
[Analyze grammar]

prathamābdikaparyaṃtaṃ kāryaṃ tatrākarocca saḥ |
sthitvābdaṃ sa muneḥ putra eko jāṃgalasaṃjñakaḥ || 5 ||
[Analyze grammar]

ābdikāṃte dine vipro rātrau svapne vilokya tu |
svamātaraṃ ca pitaraṃ śaṃkhacakragadādharau || 51 ||
[Analyze grammar]

garuḍopari saṃviṣṭau padmamālāvibhūṣitau |
śobhitau tulasīdāmnā sphuranmakarakuṃḍalau || 52 ||
[Analyze grammar]

kaustubhālaṃkṛtoraskau pītāṃbaravirājitau |
evaṃ dṛṣṭvā munisuto jāṃgalaḥ suprasannadhīḥ || 53 ||
[Analyze grammar]

svāśramaṃ punarāgatya sukhena nyavasaddvijāḥ |
svapnadṛṣṭaṃ ca vṛttāṃtaṃ mātāpitroḥ sa jāṃgalaḥ || 54 ||
[Analyze grammar]

tebhyo nyavedayatsarvaṃ brāhmaṇebhyo'tiharṣitaḥ |
śrutvā te munayo vṛttamāsansaṃprītamānasāḥ || 55 ||
[Analyze grammar]

atha rājānamālokya sarve te'pi maharṣayaḥ |
avadankupitā viprāḥ śapaṃtaḥ śaṃkaraṃ nṛpam || 56 ||
[Analyze grammar]

pāṃḍyabhūpa mahāmūrkha krauryādbrāhmaṇaghātaka |
strīhatyā brahmahatyā ca kṛtā yasmāttvayādhunā || 57 ||
[Analyze grammar]

ataḥ śarīrasaṃtyāgaṃ kuru tvaṃ havyavāhane |
nocettava na śuddhiḥ syātprāyaścittaśatairapi || 58 ||
[Analyze grammar]

tvatsaṃbhāṣaṇamātreṇa brahmahatyāyutaṃ bhavet |
asmatsakāśādgaccha tvaṃ pāṃḍyānāṃ kulapāṃsana || 59 ||
[Analyze grammar]

ityukto munibhiḥ pāṃḍyaḥ śaṃkaro dvijapuṃgavāḥ |
tathāstu dehasaṃtyāgaṃ kariṣye havyavāhane || 60 ||
[Analyze grammar]

brahmahatyāviśuddhyarthaṃ bhavatāṃ sannidhāvaham |
anugrahaṃ me kurvaṃtu bhavaṃto munisattamāḥ || 61 ||
[Analyze grammar]

tathā śarīra saṃtyāgātpātakaṃ me layaṃ vrajet |
evamuktvā munīnsarvāñcchaṃkaraḥ pāṃḍyabhūpatiḥ || 62 ||
[Analyze grammar]

svānmaṃtriṇaḥ samāhūya babhāṣe vacanaṃ tvidam |
bho maṃtriṇo brahmahatyā mayā'kāryavicārataḥ || 63 ||
[Analyze grammar]

strīhatyā ca tathā krūrā mahānarakadāyinī |
etatpātakaśuddhyarthaṃ munīnāṃ vacanādaham || 64 ||
[Analyze grammar]

pradīpte 'gnau mahājvāle parityakṣye kalevaram |
kāṣṭhānyānayata kṣipraṃ tairagniśca samidhyatām || 65 ||
[Analyze grammar]

mama putraṃ ca suruciṃ rājye sthāpayatācirāt |
mā śokaṃ kurutāmātyā daivataṃ duratikramam || 66 ||
[Analyze grammar]

itīritā nṛpatinā maṃtriṇo rurudustadā |
pāṃḍyanātha mahārāja ripūṇāmapi vatsala || 67 ||
[Analyze grammar]

vayaṃ hi bhavatā nityaṃ putravatparipālitāḥ |
tvāṃ vinā na pravekṣyāma purīṃ devapuropamām || 68 ||
[Analyze grammar]

havyavāhaṃ pravekṣyāmo mahā kāṣṭhasamedhitam |
teṣāṃ pralapitaṃ śrutvā pāṃḍya śaṃkarabhūpatiḥ |
provāca maṃtriṇaḥ sarvānvacanaṃ sāṃtvapūrvakam || 69 ||
[Analyze grammar]

śaṃkara uvāca |
kiṃ kariṣyatha bho'mātyā mahāpātakinā mayā || 70 ||
[Analyze grammar]

siṃhāsanaṃ samāruhya na kartuṃ yujyate bata |
caturarṇavaparyaṃtadharāpālanamaṃjasā || 71 ||
[Analyze grammar]

matputraṃ suruciṃ śīghramataḥ sthāpayatāsane |
kāṣṭhānyānayata kṣipraṃ praveṣṭuṃ havyavāhanam || 72 ||
[Analyze grammar]

mama maṃtrivarā yūyaṃ vilaṃbaṃ tyajatādhunā |
ityuktā maṃtriṇaḥ kāṣṭhaṃ samāninyuḥ kṣaṇena te || 73 ||
[Analyze grammar]

agniṃ prajvalitaṃ kāṣṭhairdṛṣṭvā śaṃkarabhūpatiḥ |
snātvācamya viśuddhātmā munīnāṃ saṃnidhau tadā || 74 ||
[Analyze grammar]

agniṃ pradakṣiṇīkṛtya tānmunīnapi satvaram |
agniṃ munīnnamaskṛtya dhyātvā devamumāpatim || 75 ||
[Analyze grammar]

agnau patitumārebhe dhairyamālaṃbya bhūpatiḥ |
tasminnavasare viprā munīnāmapi śṛṇvatām || 76 ||
[Analyze grammar]

aśarīrā samudabhūdvāṇī bhairavanādinī |
bhoḥ śaṃkara mahīpāla mānalaṃ praviśādhunā || 77 ||
[Analyze grammar]

brahmahatyānimittaṃ te bhayaṃ mā bhūnmahāmate |
tavopadeśaṃ vakṣyāmi rahasyaṃ vedasaṃmitam || 78 ||
[Analyze grammar]

śṛṇuṣvāvahito rājanmaduktaṃ kriyatāṃ tvayā |
dakṣiṇāṃbunidhestīre gaṃdhamādanaparvate || 79 ||
[Analyze grammar]

rāmasetau mahāpuṇye mahāpātakanāśane |
rāmapratiṣṭhitaṃ ligaṃ rāmanāthaṃ maheśvaram || 80 ||
[Analyze grammar]

sevasva varṣamekaṃ tvaṃ trikālaṃ bhaktipūrvakam |
pradakṣiṇaprakramaṇaṃ namaskāraṃ ca vai kuru || 81 ||
[Analyze grammar]

mahābhiṣekaḥ kriyatāṃ rāmanāthasya vai tvayā |
naivedyaṃ vividhaṃ rājankriyatāṃ ca dinedine || 82 ||
[Analyze grammar]

candanāgarukarpūrai rāmaliṃgaṃ prapūjaya |
bhāradvayena gavyena hyājyena tvabhiṣecaya || 83 ||
[Analyze grammar]

pratyahaṃ ca gavāṃ kṣīrairdvibhāraparisaṃmitaiḥ |
madhudroṇena talliṃgaṃ pratyahaṃ snāpaya prabhoḥ || 84 ||
[Analyze grammar]

pratyahaṃ pāyasānnena naivedyaṃ kuru bhūpate |
pratyahaṃ tilatailena dīpārādhanamācara || 85 ||
[Analyze grammar]

etena tava rājeṃdra rāmanāthasya śūlinaḥ |
strīhatyrā brahmahatyā ca tatkṣaṇādeva naśyataḥ || 86 ||
[Analyze grammar]

darśanādrāmanāthasya bhrūṇahatyāśatāni ca |
ayutaṃ brahmahatyānāṃ surāpānāyutaṃ tathā || 87 ||
[Analyze grammar]

svarṇasteyāyutaṃ rājangurustrīgamanāyutam |
etatsaṃsargadoṣāśca vinaśyaṃti kṣaṇādvibho || 88 ||
[Analyze grammar]

mahāpātakatulyāni yāni pāpāni saṃti vai |
tāni sarvāṇi naśyaṃti rāmanāthasya sevayā || 89 ||
[Analyze grammar]

mahatī rāmanāthasya sevā labhyeta cennṛṇām || |
kiṃ gaṃgayā ca gayayā prayāgeṇādhvareṇa vā || 90 ||
[Analyze grammar]

tadgaccha rāmasetuṃ tvaṃ rāmanāthaṃ bhajāniśam |
vilaṃbaṃ mā kuru vibho gamane ca tvarāṃ kuru || 91 ||
[Analyze grammar]

ityuktvā virarāmātha sāpi vāgaśarīriṇī |
tacchrutvā munayaḥ sarve tvarayaṃti sma bhūpatim || 92 ||
[Analyze grammar]

gaccha śīghaṃ mahārāja rāmasetuṃ vimuktidam || |
rāmanāthasya māhātmyamajñātvāsmābhirīritam || 93 ||
[Analyze grammar]

dehatyāgaṃ kuruṣveti vahnau prajvalite'dhunā |
anujñāto munivarairiti rājā sa śaṃkaraḥ || 94 ||
[Analyze grammar]

caturaṃgabalaṃ puryāṃ prāpayitvā tvarānvitaḥ |
namaskṛtya munīnsarvānprahṛṣṭenāṃtarātmanā || 95 ||
[Analyze grammar]

vṛtaḥ katipayaiḥ sainyaiḥ samādāya dhanaṃ bahu |
rāmanāthasya sevārthamayāsīdgaṃdhamādanam || 96 ||
[Analyze grammar]

uvāsa varṣamekaṃ ca rāmasetau viśuddhide |
ekabhukto jitakrodho vijiteṃdriyasaṃcayaḥ || 97 ||
[Analyze grammar]

trisaṃdhyaṃ rāmanāthaṃ ca sevamānaḥ sabhaktikam |
pradadau rāmanāthāya daśabhāraṃ dhanaṃ mudā || 98 ||
[Analyze grammar]

pratyahaṃ rāmanāthasya mahāpūjāmakārayat |
akarocca dhanuṣkoṭau pratyahaṃ bhaktipūrvakam || 99 ||
[Analyze grammar]

snānaṃ pratidinaṃ cānnaṃ brāhmaṇebhya dadau mudā |
aśarīrāvacaḥproktamakhilaṃ pūjanaṃ tathā || 100 ||
[Analyze grammar]

evaṃ kṛtavatastasya varṣamekaṃ gataṃ dvijāḥ |
varṣāṃte sa śucirbhūtvā śaṃkarastuṣṭamānasaḥ |
tuṣṭāva parameśānaṃ rāmanāthaṃ ghṛṇānidhim || 1 ||
[Analyze grammar]

śaṃkara uvāca |
namāmi rudramīśānaṃ rāmanāthamumāpatim || 2 ||
[Analyze grammar]

pāhi māṃ kṛpayā deva brahmahatyāṃ dahāśu me |
tripuraghna mahādeva kālakūṭaviṣādana || 3 ||
[Analyze grammar]

rakṣa māṃ tvaṃ dayāsiṃdho strīhatyāṃ me vimocaya |
gaṃgādhara virūpākṣa rāmanātha trilocana || 4 ||
[Analyze grammar]

māṃ pālaya kṛpādṛṣṭyā chindhi matpātakaṃ vibho |
kāmāre kāmasaṃdāyinbhaktānāṃ rāghaveśvara || 5 ||
[Analyze grammar]

kaṭākṣaṃ pātaya mayi śuddhaṃ māṃ kuru dhūrjaṭe |
mārkaṃḍeyabhayatrāṇa mṛtyuṃjaya śivāvyaya || 6 ||
[Analyze grammar]

namaste girijārdhāya niṣpāpaṃ kuru māṃ sadā |
rudrākṣamālābharaṇa candraśekhara śaṃkara || 7 ||
[Analyze grammar]

vedoktasamyagācārayogyaṃ māṃ kuru te namaḥ |
sūryadaṃtabhide tubhyaṃ bhāratīnāsikācchide || 8 ||
[Analyze grammar]

rāmeśvarāya devāya namo me śuddhido bhava |
ānaṃdaṃ saccidānaṃdaṃ rāmanāthaṃ vṛṣadhvajam || 9 ||
[Analyze grammar]

bhūyobhūyo namasyāmi pātakaṃ me vinaśyatu |
bhaktyaivaṃ stuvatastasya rāmanāthaṃ maheśvaram || 110 ||
[Analyze grammar]

nirjagāma mukhādrājño brahmahatyātibhīṣaṇā |
nīlavastradharā krūrā mahāraktaśiroruhā || 11 ||
[Analyze grammar]

tāṃ brahmahatyāṃ bībhatsāṃ nṛpavaktrādvinirgatām |
nijaghāna triśūlena bhairavo rudraśāsanāt || 12 ||
[Analyze grammar]

hatāyāṃ brahmahatyāyāṃ bhairaveṇa śivājñayā |
rāmanātho nṛpaṃ prāha stutyā tasya prasannadhīḥ || 13 ||
[Analyze grammar]

śrīrāmanātha uvāca |
pāṃḍyabhūpa mahārāja stotreṇānena te'nagha |
prasanno'haṃ varaṃ dāsye tubhyaṃ varaya cepsitam || 14 ||
[Analyze grammar]

strīhatyābrahmahatyābhyāṃ yaste doṣaḥ sa nirgataḥ |
śuddho vidhūtapāpo'si rājyaṃ pālaya pūrvavat || 15 ||
[Analyze grammar]

ye māmatra niṣevaṃte bhaktiyuktena cetasā |
nāśayāmi nṛṇāṃ teṣāṃ brahmahatyāyutānyapi || 16 ||
[Analyze grammar]

surāpānāyutaṃ bhūpa gurustrīgamanāyutam |
svarṇasteyāyutamapi tatsaṃsargāyutaṃ tathā || 17 ||
[Analyze grammar]

anyānyapi ca pāpāni nāśayāmi na saṃśayaḥ |
matsevino narā rājanna bhūyaḥ saṃsaraṃti te || 18 ||
[Analyze grammar]

kiṃ tu sāyujyarūpāṃ me muktiṃ yāsyantyasaṃśayam |
stuvaṃtyanena stotreṇa ye māṃ bhaktipuraḥsaram || 19 ||
[Analyze grammar]

nāśayāmyahameteṣāṃ mahāpātakasaṃcayam |
prīto'haṃ tava bhaktyā ca stotreṇa manujeśvara || 120 ||
[Analyze grammar]

yatheṣṭaṃ prārthaya varaṃ mattastvaṃ varadānnṛpa |
evamuktaḥ śivenātha śaṃkaro nṛpapuṃgavaḥ |
rāmanāthaṃ babhāṣe taṃ śaṃkaraṃ karuṇānidhim || 21 ||
[Analyze grammar]

nṛpa uvāca |
tava saṃdarśanenāhaṃ kṛtārtho'smi maheśvara || 22 ||
[Analyze grammar]

itaḥ paraṃ prārthanīyaṃ mama nāstyadhunādhikam |
mṛkaṇḍusutasaṃtāpahāri pādayugaṃ tava || 23 ||
[Analyze grammar]

dṛṣṭaṃ mayā mahādeva nātaḥ prārthyaṃ vibhosti vai |
tvatpādapadmayugule niścalā bhaktirastu me || 24 ||
[Analyze grammar]

na punarjanma me bhūyānmātṝṇāmudare'śucau |
ye matkṛtamidaṃ stotraṃ kīrtayaṃti tava prabho |
te narāḥ pāpanirmuktāstvatsevāphalamāpnuyuḥ || 25 ||
[Analyze grammar]

śrīsūta uvāca |
tathāstvityanugṛhyainaṃ rāmanātho dvijottamāḥ || 26 ||
[Analyze grammar]

nīlakaṇṭho virūpākṣo liṃgarūpe tirohitaḥ |
rājāpi rāmanāthena vihitānugrahastataḥ || 27 ||
[Analyze grammar]

rāmanāthaṃ namaskṛtya kṛtārthenāṃtarātmanā |
sa senāsaṃvṛtaḥ prītaḥ prayayāvātmanaḥ purīm || 28 ||
[Analyze grammar]

vṛttāṃtametamavadanmunīnāṃ vanavāsinām |
tebhyaṣiṃcannṛpaṃ rājye munayaḥ prītamānasāḥ || 29 ||
[Analyze grammar]

putradārayuto rājā prāpya rājyamakaṇṭakam |
maṃtribhiḥ sahito viprā rarakṣa pṛthivīṃ ciram || 130 ||
[Analyze grammar]

tatoṃtakāle saṃprāpte dhyāyanrāmeśvaraṃ śivam |
dehāṃte rāmanāthasya sāyujyaṃ prayayau śubham || 31 ||
[Analyze grammar]

evaṃ vaḥ kathitaṃ viprā rāmanāthasya vaibhavam |
caritaṃ puṇyamākhyānaṃ śaṃkarākhya nṛpasya ca || 32 ||
[Analyze grammar]

śṛṇvanpaṭhanvā manujastvimamadhyāyamādarāt |
sarvapāpavinirmukto rāmanāthaṃ samaśnute || 133 ||
[Analyze grammar]