Chapter 9

[English text for this chapter is available]

īśvara uvāca |
śivo maheśvaraścaiva rudro viṣṇuḥ pitāmahaḥ |
saṃsāravaidyassarvajñaḥ paramātmeti mukhyataḥ || 1 ||
[Analyze grammar]

nāmāṣṭakamidaṃ nityaṃ śivasya pratipādakam |
ādyantapañcakantatra śāntyatītādyanukramāt || 2 ||
[Analyze grammar]

saṃjñā sahāśivādīnāṃ pañcopādhiparigrahāt |
upādhivinivṛttau tu yathāsvaṃ vini vartate || 3 ||
[Analyze grammar]

padameva hitaṃ nityamanityāḥ padinaḥ smṛtāḥ |
padānāṃ parivṛtti syānmucyaṃte padino yataḥ || 4 ||
[Analyze grammar]

parivṛttyantare tvevaṃ bhūyastasyāpyupādhinā |
ātmāntarābhidhānaṃ syātpādādyaṃ nāmapaṃcakam || 5 ||
[Analyze grammar]

anyattu tritayaṃ nāmnāmupādānādibhedataḥ |
trividhopādhiracanācchiva eva tu vartate || 6 ||
[Analyze grammar]

anādimalasaṃśleṣaprāgabhāvātsvabhāvataḥ |
atyantapariśuddhātmetyato'yaṃ śiva ucyate || 7 ||
[Analyze grammar]

athavā'śeṣakalyāṇaguṇaikaghana īśvaraḥ |
śiva ityucyate sadbhiśśivatattvārthavedibhiḥ || 8 ||
[Analyze grammar]

trayoviṃśatitatvebhyaḥ parāprakṛtirucyate |
prakṛtestu paramprāhuḥ puruṣampañcaviṃśakam || 9 ||
[Analyze grammar]

yadvedādau svaramprāhurvācyavācakabhāvataḥ |
vedaikavedyaṃ yāthātmyādvedānte ca pratiṣṭhitam || 10 ||
[Analyze grammar]

sa eva prakṛtau līno bhoktā yaḥ prakṛteryataḥ |
tasya prakṛtilīnasya yaḥ parassa maheśvaraḥ || 11 ||
[Analyze grammar]

tadadhīnapravṛttittvātprakṛteḥ puruṣasya ca |
athavā triguṇantattvaṃ māyeyamidamavyayam || 12 ||
[Analyze grammar]

māyāntu prakṛtimvidyānmāyinantu maheśvaram |
māyāvimocako'nantomaheśvarasamanvayāt || 13 ||
[Analyze grammar]

ru dduḥkhaṃ duḥkhaheturvā taddrāvayati yaḥ prabhuḥ |
rudra ityucyate tasmācchivaḥ paramakāraṇam || 14 ||
[Analyze grammar]

śivatattvādibhūmyantaṃ śarīrādi ghaṭādi ca |
vyāpyādhitiṣṭhati śivastamādviṣṇurudāhṛtaḥ || 15 ||
[Analyze grammar]

jagataḥ pitṛbhūtānāṃ śivo mūrtyātmanāmapi || |
pitṛbhāvena sarveṣāṃ pitāmaha udīritaḥ || 16 ||
[Analyze grammar]

nidānajño yathā vaidyo rogasya nivartakaḥ |
upāyairbheṣajaistadvallayabhogādhikārakaḥ || 17 ||
[Analyze grammar]

saṃsārasyeśvaro nityaṃ sthūlasya vinivartakaḥ |
saṃsāra vaidya ityuktassarvatattvārthavedibhiḥ || 18 ||
[Analyze grammar]

daśārddhajñānasiddhyarthamindriyeṣu ca satsvapi |
trikālabhāvino bhāvānsthūlānsūkṣmānaśeṣataḥ || 19 ||
[Analyze grammar]

aṇavo naiva jānanti māyārṇavamalāvṛtāḥ |
asatsvapi ca sarveṣu siddhasarvārthavediṣu || 20 ||
[Analyze grammar]

yadyathāvasthitaṃ vastu tattathaiva sadāśivaḥ |
ayatnenaiva jānāti tasmātsarvajña ucyate || 21 ||
[Analyze grammar]

sarvātmā paramairebhirguṇairnityasamanvayāt |
svasmātparātmavirahātparamātmā śivassvayam || 22 ||
[Analyze grammar]

iti stutvā mahādevaṃ praṇavātmānamavyayam |
dattvā parāṅmukhādyañca paścādīśānamastake || 23 ||
[Analyze grammar]

punararcya deveśampraṇavena samāhitaḥ |
hastena baddhāñjalinā pūjāpuṣpampragṛhya ca || 24 ||
[Analyze grammar]

unmanāntaṃ śivaṃ nītvā vāmanāsāpuṭādhvanā |
devomudvāsya ca tato dakṣanāsāpuṭādhvanā || 25 ||
[Analyze grammar]

śiva evāhamasmīti tadaikyamanubhūya ca |
sarvāvaraṇadevāṃśca punarudvāsayeddhṛdi || 26 ||
[Analyze grammar]

vidyāpūjāṃ guroḥpūjāṃ kṛtvā paścādyathākramam |
śaṃkhārghapātramaṃtrāṃśca hṛdaye vinyasetkramāt || 27 ||
[Analyze grammar]

nirmālyañca samarpyā'tha caṇḍeśāyeśagocare |
punaśca saṃyataprāṇa ṛṣyādikamathoccaret || 28 ||
[Analyze grammar]

kailāsaprastaro nāma maṇḍalamparibhāṣitam |
arcayennityamevaitatpakṣe vā māsimāsi vā || 29 ||
[Analyze grammar]

ṣaṇmāse vatsare vāpi cāturmāsyādiparvaṇi |
avaśyañca samabhyarcennityaṃ malliṅgamāstikaḥ || 30 ||
[Analyze grammar]

tasminkrame mahādevi viśeṣaḥ ko'pi kathyate |
upadeśadine liṃgampūjitaṃ guruṇā saha || 31 ||
[Analyze grammar]

gṛhṇīyādarcayiṣyāmi śivamāprāṇasaṃkṣayam |
evantrivāramuccāryya śapathaṃ gurusannidhau || 32 ||
[Analyze grammar]

tatassamarcayennityampūrvoktavidhinā priye |
arghaṃ samarpayelliṃgamūrddhanyarghyodakena ca || 33 ||
[Analyze grammar]

praṇavena samabhyarcya dhūpadīpau samarpayet |
aiśānyāṃ caṇḍamārādhya nirmālyañca nivedayet || 34 ||
[Analyze grammar]

prakṣālya lliṃgamvedīñca vastrapūtairjalaistataḥ |
niḥkṣipya puṣpaṃ śirasi liṃgasya praṇavena tu || 35 ||
[Analyze grammar]

ādhāraśaktimārabhya śuddhavidyāsanāvadhi |
vibhāvya sarvaṃ manasā sthāpayetparameśvaram || 36 ||
[Analyze grammar]

pañcagavyādibhirdravyairyathāvibhavasambhṛtaiḥ |
kevalairvā jalaiśśuddhaissurabhi dravyavāsitaiḥ || 37 ||
[Analyze grammar]

pāvamānena rudreṇa nīlena tvaritena ca |
ṛgbhiśca sāmabhirvāpi brahmabhiścaiva pañcabhiḥ || 38 ||
[Analyze grammar]

snāpayeddevadeveśaṃ praṇavena śivena ca |
viśeṣārghyodakenāpi praṇavenābhiṣecayet || 39 ||
[Analyze grammar]

viśodhya vāsasā puṣpaṃ liṃgamūrddhani vinyaset |
pīṭhe liṃgaṃ samāropya sūryādyarcāṃ samācaret || 40 ||
[Analyze grammar]

ādhāraśaktyanantau dvau pīṭhādhastātsamarcayet |
siṃhāsanantadūrdhvantu samabhyarcya yathākramam || 41 ||
[Analyze grammar]

athordhvacchadanampīṭhapāde skandaṃ samarcayet |
liṃge mūrtiṃ samākalpya māntvayā saha pūjayet || 42 ||
[Analyze grammar]

samyag bhaktyā vidhānena yatirmaddhyānatatparaḥ |
evammayā te kathitamatiguhyamidampriye || 43 ||
[Analyze grammar]

gopanīyaṃ prayatnena na deyaṃ yasya kasya cit |
mama bhaktāya dātavyaṃ yataye vītarāgiṇe || 44 ||
[Analyze grammar]

gurubhaktāya śāntāya madarthe yogabhāgine |
mamājñāmatilaṃghyaitadyo dadāti vimūḍhadhīḥ || 45 ||
[Analyze grammar]

sa nārakī mama drohī bhaviṣyati na saṃśayaḥ |
madbhaktadānāddeveśi matpriyaśca bhaveddhruvam |
iha bhuktvākhilānbhogānmatsānnidhyamavāpnuyāt || 46 ||
[Analyze grammar]

vyāsa uvāca |
etacchutvā mahādevī mahādevena bhāṣitam |
stutvā tu vividhaiḥ stotrairdevamvedārthagarvitaiḥ || 47 ||
[Analyze grammar]

śrīmatpādābjayoḥ patyuḥ praṇavaṃ parameśvarī |
atiprahṛṣṭahṛdayā mumoda munisattamāḥ || 48 ||
[Analyze grammar]

atiguhyamidamviprāḥ praṇavārthaprakāśakam |
śivajñānaparaṃ hyetadbhavatāmārtināśanam || 49 ||
[Analyze grammar]

sūta uvāca |
ityuktvā muniśārdūlaḥ parāśaryyo mahātapāḥ |
pūjitaḥ parayā bhaktyā munibhirvedavādibhiḥ || 50 ||
[Analyze grammar]

kailāsādrimanusṛtya yayau tasmāttapovanāt |
te'pi prahṛṣṭahṛdayāssatrānte parameśvaram || 51 ||
[Analyze grammar]

sampūjya parayā bhaktyā somaṃ somārddhaśekharam |
yamādiyoganiratāśśivadhyānaparābhavan || 52 ||
[Analyze grammar]

guhāya kathitaṃ hyetaddevyā tenāpi nandine |
sanatkumāramunaye provāca bhagavān hi saḥ || 53 ||
[Analyze grammar]

tasmāllabdhaṃ madguruṇā vyāsenāmitatejasā |
tasmāllabdhamidampuṇyammayāpi munipuṃgavāḥ || 54 ||
[Analyze grammar]

mayā vaśśrāvitaṃ hyetadguhyādguhyataramparam |
jñātvā śivapriyānbhaktyā bhavato giriśapriyam || 55 ||
[Analyze grammar]

bhavadbhirapi dātavyametadguhyaṃ śivapriyam |
yatibhyaśśāntacittebhyo bhaktebhyaśśivapādayoḥ || 56 ||
[Analyze grammar]

etaduktvā mahābhāgassūtaḥ paurāṇikottamaḥ |
tīrthayātrāprasaṃgena cacāra pṛthivīmimām || 57 ||
[Analyze grammar]

etadrahasyamparamaṃ labdhvā sūtānmunīśvarāḥ |
kāśyāmeva samāsīnā muktāśśivapadaṃ yayuḥ || 58 ||
[Analyze grammar]

iti śrīśivamahāpurāṇe ṣaṣṭhyāṃ kailāsasaṃhitāyāṃ praṇavārthapaddhativarṇanaṃ nāma navamo'dhyāyaḥ || 9 ||
[Analyze grammar]