Chapter 125

[English text for this chapter is available]

ṛṣaya ūcuḥ |
sūtasūta mahābhāga tvayā lokahitaiṣiṇā |
kathitaṃ kārtikākhyānaṃ bhuktimuktipradāyakam || 1 ||
[Analyze grammar]

adhunā māghamāhātmyaṃ vada no lomaharṣaṇe |
śrutena yena lokānāṃ saṃśayaḥ kṣīyate mahān || 2 ||
[Analyze grammar]

purā kena mahābhāga loke'sminsaṃprakāśitam |
māghasnānasya māhātmyaṃ setihāsaṃ tadādiśa || 3 ||
[Analyze grammar]

sūta uvāca |
sādhusādhu muniśreṣṭhā yūyaṃ kṛṣṇaparāyaṇaḥ |
yatpṛcchatha mudāyuktā bhaktyā kṛṣṇakathā muhuḥ || 4 ||
[Analyze grammar]

kathayiṣyāmi māghasya māhātmyaṃ puṇyavardhanam |
pāpaghnaṃ śṛṇvatāṃ puṃsāṃ snātānāṃ cāruṇodaye || 5 ||
[Analyze grammar]

ekadāpārvatī viprāḥ śaṃkaraṃ lokaśaṃkaram |
papraccha vinayopetā spṛṣṭvā taccaraṇāṃbujam || 6 ||
[Analyze grammar]

pārvatyuvāca |
devadeva mahādeva bhaktānāmabhayaprada |
prasīda nātha viśveśa yatpṛcche tadvadādhunā || 7 ||
[Analyze grammar]

śrutā nānāvidhā dharmāstvattaḥ pūrvaṃ mayā vibho |
adhunā śrotumicchāmi māhātmyaṃ māghajaṃ vada || 8 ||
[Analyze grammar]

tattu kena purā cīrṇaṃ ko vidhiḥ kā ca devatā |
tatsarvaṃ vistarādbrūhi yatastvaṃ bhaktavatsalaḥ || 9 ||
[Analyze grammar]

maheśa uvāca |
adhvarā'vabhṛthasnāta ṛṣibhiḥ kṛtamaṃgalaḥ |
pūjito nāgaraiḥ sarvaiḥ svapurānnirgato bahiḥ || 10 ||
[Analyze grammar]

dilīpo bhūbhṛtāṃ śreṣṭho mṛgayārasiko nṛpaḥ |
kautūhalasamāviṣṭa ākheṭavyūhasaṃvṛtaḥ || 11 ||
[Analyze grammar]

upānadrūḍhapādastu nīloṣṇīṣa uracchadī |
baddhagodhāṃgulitrāṇo dhanuṣpāṇiḥ sarīsṛpaḥ || 12 ||
[Analyze grammar]

baddhakṣudrāsidhānuṣkaistathābhūtaiśca pattibhiḥ |
gāṃdhāreṣu suramyeṣu vaneṣu vipuleṣu ca || 13 ||
[Analyze grammar]

ullaṃghitamahāsrotā yuvā paṃcāsyavikramaḥ |
mudā krīḍati taiḥ sārddhaṃ kuṃjeṣu mṛgayanmṛgān || 14 ||
[Analyze grammar]

hanyatāṃ hanyatāmeṣa mṛgo vaiṣa palāyate |
iti jalpansvabhṛtyeṣu svayamutpattya haṃti ca || 15 ||
[Analyze grammar]

itastataḥ punaryāti kvacitpaśyanvanasthalīm |
viṭapoḍḍīnasaṃtrasta līna kekikulākulām || 16 ||
[Analyze grammar]

hariṇīgaṇavitrastāṃ dhāvacchāvakadiṅmukhām |
kvacitpheravaphetkāratārārāvavibhīṣaṇām || 17 ||
[Analyze grammar]

khaḍgayūthaiḥ kvacillakṣmīṃ dadhānāmiva daṃtinām |
kvacitkoṭarasaṃdaṣṭolūkanādavinādinīm || 18 ||
[Analyze grammar]

mṛgāripadamudrābhirmudritāṃ ca kvacitkvacit |
śārdūlanakhanirbhinna rohidraktāruṇāṃ kvacit || 19 ||
[Analyze grammar]

pīvarastanabhārārta susnigdhamahiṣīgaṇaiḥ |
avarodhājirakṣoṇīṃ sūcayaṃtī manaḥ kvacit || 20 ||
[Analyze grammar]

kvacidvṛkṣaghanacchannāṃ vanyapuṣpasugaṃdhinīm |
kvacillatāgṛhadvārāṃ bhṛṃgaśabdasuśobhanām || 21 ||
[Analyze grammar]

ardhaniḥsṛtanirmoka nāgabhīmabṛhadvilām |
bileṣu līnājagarairbhīmāṃ nirmokasarpiṇīm || 22 ||
[Analyze grammar]

kvaciddāvānalajvālāṃ śilājyotiḥ suśobhanām |
phūtkāraśabdasaṃpūrṇāṃ mṛgavyāghrasamākulām || 23 ||
[Analyze grammar]

pravimuṃcañchunāṃ yūthaṃ śaśakeṣu kvacitkvacit |
palvaleṣu ca viśramya punaryāti vanāntaram || 24 ||
[Analyze grammar]

evaṃ vrajati rājendre vyādhavarge ca valgati |
kurvankolāhalaṃ tatra sāraṃgo nirgato vanāt || 25 ||
[Analyze grammar]

sphālavegakramākrāṃta durgamārgamahītalaḥ |
kadācidgaganārūḍhaḥ kadācidbhūmigocaraḥ || 26 ||
[Analyze grammar]

vakrasroto'tigaṃbhīraṃ kaṇṭakadrumasaṃkulam |
praviṣṭo viṣamāraṇyaṃ rājā'sau tatpadānugaḥ || 27 ||
[Analyze grammar]

dūrāddūrataraṃ gatvā deśāddeśaṃ ca nirjanam |
mṛgādarśanasaṃrambha saṃśuṣkagalakandharaḥ || 28 ||
[Analyze grammar]

tāmratālumukhaḥ svinnaḥ śrāṃtapattiḥ skhaladdhvaniḥ |
atītya dīrghamārgānsa tṛṣārto madhyage ravau || 29 ||
[Analyze grammar]

dadarśāgre tu kāsāraṃ spardhayaṃtamapāṃpatim |
ghanapādapatīrasthaṃ sutīrthaṃ vimalaṃ śubham || 30 ||
[Analyze grammar]

viśālaṃ vikacāṃbhojaṃ madhumattamadhuvratam |
padminīpatrapālāśacchannaṃ marakatairiva || 31 ||
[Analyze grammar]

svacchaṃdamucchalanmatsyaṃ svacchaṃ sādhumano yathā |
calajjalacarairmiśraṃ vīcirājivirājitam || 32 ||
[Analyze grammar]

aṃtargrāhagaṇakrūraṃ khalānāmiva mānasam |
kvacicchaivāladurgamyaṃ kṛpaṇasyaiva maṃdiram |
nānāvihaṅgasarvārtiṃ śamayaṃtaṃ divāniśam || 33 ||
[Analyze grammar]

dātāramiva sarvasvairāpannārtipraṇāśanam |
tarpayaṃtaṃ nijāṃbhobhiḥ śvāpadānsvapitṝniva || 34 ||
[Analyze grammar]

haraṃtaṃ sarvasaṃtāpaṃ himāṃśuriva cāhnikam |
taṃ dṛṣṭvābhūdgataglāniścātako jaladaṃ yathā || 35 ||
[Analyze grammar]

tatra pītajalo rājā kṛtamādhyāhnikakriyaḥ |
bhuktvā kheṭakamāṃsāni sahāyaiḥ sahito nṛpaḥ || 36 ||
[Analyze grammar]

uvāsa sarasastīre suramyāṃ kathayankathām |
tataḥ śarāsane bāṇaṃ kṛtvā rātrau sthitastarau || 37 ||
[Analyze grammar]

vyādhāḥ saṃdhānamāsthāya rurudhuḥ kakubhāṃ pathaḥ |
evaṃ sthiteṣu vīreṣu vane vistārya vāgurām || 38 ||
[Analyze grammar]

niśārdhe nirgataṃ yūthaṃ sūkarāṇāṃ taṭe taṭe |
caritvā sarasīkaṃdānpapāta vyādhasaṃkule || 39 ||
[Analyze grammar]

rājñā viddhāśca te kroḍā vyādhaiśca bahavo hatāḥ |
kṣaṇenaiva varāhāste viddhāḥ peturmahītale || 40 ||
[Analyze grammar]

tāndṛṣṭvā tumulaṃ nādaṃ vyādhāścakruḥ sudarpitāḥ |
dhāvaṃtaḥ pramudāyuktā militā yatra bhūpatiḥ || 41 ||
[Analyze grammar]

tānādāya bhaṭairbhūyo niḥsṛtaḥ sarasītaṭāt |
svapuraṃ gaṃtukāmo'sau dṛṣṭavānpathi tāpasam || 42 ||
[Analyze grammar]

brāhmaṇaṃ vṛddhahārītaṃ śaṃkhacakrasuśobhitam |
niyamairduṣkarairugraiḥ parikṣīṇakalevaram || 43 ||
[Analyze grammar]

asthiśeṣaṃ mahaddāṃtaṃ visphuratkarkaśatvacam |
dadhānaṃ hāriṇaṃ carma vasānaṃ mṛduvalkalam || 44 ||
[Analyze grammar]

kurvāṇaṃ naigamaṃ jāpyaṃ nakhalomajaṭādharam |
taṃ vanāśramiṇaṃ dṛṣṭvā mārgaṃ dattvā sasaṃbhramaḥ || 45 ||
[Analyze grammar]

praṇamya śirasā rājā kṛtapadmāṃjalisthitaḥ |
atha cainamalaṃkārairdvijo niścitya bhūmipam || 46 ||
[Analyze grammar]

uvāca śreyase hetoḥ paropakṛtivāṃcchayā |
kimarthaṃ gamyate rājankāle puṇyatame śubhe || 47 ||
[Analyze grammar]

māghamāse vihāyaiva prātaḥsnānaṃ sarovare |
pratyuvāca tato rājā nāhaṃ jāne dvijottama || 48 ||
[Analyze grammar]

māghasnānaphalaṃ kīdṛktanme kathaya vistarāt |
iti bhūpavacaḥ śrutvā prāha vaikhānaso muniḥ || 49 ||
[Analyze grammar]

bhagavāndyumaṇiḥ śīghramabhyudeti tamopahā |
snānakālo'yamasmākaṃ na kathā'vasaro nṛpa || 50 ||
[Analyze grammar]

snātvā gaccha vasiṣṭhaṃ taṃ pṛcchasva svakulaprabhum |
ityuktvā tāpaso maunī prātaḥsnānāya nirgataḥ || 51 ||
[Analyze grammar]

pratyāvṛtya dilīpo'pi tatra snātvā yathāvidhi |
punaḥ svanagarīṃ vīro gato'sau harṣapūritaḥ || 52 ||
[Analyze grammar]

antaḥpure nivedyātha vānaprasthakathāṃ punaḥ |
śvetāśvarathamāruhya suśvetacchatracāmaraḥ || 53 ||
[Analyze grammar]

sālaṃkāraḥ suvāsāśca saṃvṛtto maṃtribhiḥ saha |
jayaśabdānpunaḥ śṛṇvanstuto māgadhabaṃdibhiḥ || 54 ||
[Analyze grammar]

vasiṣṭhasyāśramaṃ yāta ṛṣivākyamanusmaran |
tatraiva natvā brahmarṣiṃ vinayācārapūrvakam || 55 ||
[Analyze grammar]

dattāsano gṛhītārghya āśīrbhiḥ samalaṃkṛtaḥ |
sānaṃdaṃ muninā pṛṣṭaḥ kuśalaṃ bhūpatiryadā || 56 ||
[Analyze grammar]

tadābravīdvaco rājā harṣayanmunimānasam |
so'pi vaikhānasenoktaṃ papraccha madhurākṛtiḥ || 57 ||
[Analyze grammar]

dilīpa uvāca |
bhagavaṃstvatprasādena śrutā vistarato mayā |
ācāro daṃḍanītiśca rājadharmāśca ye pare || 58 ||
[Analyze grammar]

caturṇāmapi varṇānāmāśramāṇāṃ ca yāḥ kriyāḥ |
dānāni tadvidhānāni yajñāśca vidhayastathā || 59 ||
[Analyze grammar]

vratāni tatpradiṣṭāni viṣṇorārādhanaṃ tathā |
adhunā śrotumicchāmi māghasnāne ca yatphalam |
vidheyaṃ yadvidhānena tanme brahmanmune vada || 60 ||
[Analyze grammar]

vasiṣṭha uvāca |
samyaguktaṃ paraṃ śreyo lokatrayahitāvaham |
nirmalīkaraṇaṃ tena muninā vanavāsinā || 61 ||
[Analyze grammar]

kaṭākṣaiḥ kāminīnāṃ te pratyāsannamakhaṃḍitāḥ |
kāmayaṃte mṛgārke te srotasi snātumeva ca || 62 ||
[Analyze grammar]

vinā vahniṃ vinā yajñamiṣṭāpūrtaṃ vinā priye |
vāṃcchaṃti sadgatiṃ snātuṃ prātarmāghe bahirjale || 63 ||
[Analyze grammar]

gobhūhiraṇyamāṇikya svarṇa dhenvādikāni ye |
adattvecchaṃti caikārṇe māghaṃ snātā narādhipa || 64 ||
[Analyze grammar]

triḥsaptāhavrataiḥ kṛcchraiḥ parākaiśca nijāṃ tanum |
aśoṣyecchaṃti ye svargaṃ tapasi snāṃtu te sadā || 65 ||
[Analyze grammar]

hareḥ pūjā ca vaiśākhe tapaḥ pūjā ca kārtike |
tapohomastathā dānaṃ trayaṃ māghe viśiṣyate || 66 ||
[Analyze grammar]

sānubaṃdho'tiparyāso dharādhīśo bhaveddhruvam |
kaivalyotpādakā buddhi yayā vā na bhavetpunaḥ || 67 ||
[Analyze grammar]

padadhryā varivasyā sā vihitā divyalocanaiḥ |
tadanannaṃ tapo dānaṃ māghemāsi nṛpottama || 68 ||
[Analyze grammar]

sakāmo vā prajā ye vā haraye tadvināpi vā |
kāyaśuddhivratī bhūtvā caturddhāsnānajaṃ phalam || 69 ||
[Analyze grammar]

nirannā aditiḥ sasnau māghe dvādaśavatsare |
putrāṃśca dvādaśādityānlabhe trailokyadīpakān || 70 ||
[Analyze grammar]

subhagā rohiṇī māghā dānaśīlātvaruṃdhatī |
śacī ca rūpasaṃpannā prāsāde saptabhūmike || 71 ||
[Analyze grammar]

vimalīkṛtaśobhāḍhyo nartakī lalitājire |
dvīpavarṇasamucchinne rūpavatstrījanākule || 72 ||
[Analyze grammar]

gītavāditranirghoṣe maṃgalācāraśobhite |
vedadhvanipavitre ca vidvadviprairalaṃkṛte || 73 ||
[Analyze grammar]

surārcanarate ramye sadātithiniṣevite |
muditāṃste vasaṃtīha yaiḥ snānaṃ makare ravau || 74 ||
[Analyze grammar]

yairdattaṃ bahu māghe ca murāriścārcitaḥ stutaḥ |
iṣṭavastuparityāgānniyamasya tu pālanāt || 75 ||
[Analyze grammar]

dharmasūtiḥ sadā māghaḥ pāpamūlaṃ nikṛṃtati |
kāmamūlaḥ phaladvārā niṣkāmo jñānadaḥ sadā || 76 ||
[Analyze grammar]

ye lokā jñānaśīlānāṃ ye lokā vipinaukasām |
ye lokā viṣṇubhaktānāṃ te māghasnāyināṃ sadā || 77 ||
[Analyze grammar]

devalokānnivartaṃte puṇyairanyaiḥ paraṃtapa |
kadācinna nivartaṃte māghasnānaratā narāḥ || 78 ||
[Analyze grammar]

māghe snātvā tu yo dhenuṃ dadyānmartyaḥ payasvinīm |
tasyā yāvaṃti romāṇi sarvāṃge ca nṛpottama || 79 ||
[Analyze grammar]

tāvadvarṣasahasrāṇi svargaloke mahīyate |
māghasnānaṃ prakurvāṇo yo dadyātsaguḍāṃstilān || 80 ||
[Analyze grammar]

pātakaṃ tasya prakṣālya nirmalo bhāti vai naraḥ |
sarveṣāṃ dhānyarāśīnāṃ tilāḥ pāpapraṇāśanāḥ || 81 ||
[Analyze grammar]

tasmānmāghe prayatnena tilā deyā nṛpottama |
māghasnānaṃ prakurvāṇo dadyādbrāhmaṇabhojanam || 82 ||
[Analyze grammar]

pitṝnsaṃtarpya śuddhātmā yāti viṣṇoḥ paraṃpadam |
tasmātsarvaprayatnena māgho dānena nīyate || 83 ||
[Analyze grammar]

adānaṃ na kṣipenmāghaṃ sarvadā nṛpasattama |
vittānusāraṃ jñātvā vai māghe dānaṃ sadā dadet || 84 ||
[Analyze grammar]

māghasnānaṃ tu yaḥ kuryādupānahakamaṃḍalūn |
dadāti brāhmaṇebhyaśca sa svarge tiṣṭhati dhruvam || 85 ||
[Analyze grammar]

māghasnānamayaṃ rājankurvāṇastapa uttamam |
dānaṃ vinā kṣipennaiva dānātsvargamavāpyate || 86 ||
[Analyze grammar]

dānena prāpyate svargo dānena prāpyate sukham |
dānena hīyate pāpaṃ mahāpātakajaṃ nṛpa || 87 ||
[Analyze grammar]

adānaṃ na tapo bhāti hyasūryaṃ gaganaṃ yathā |
asaṃtatikulaṃ yadvādācāreṇa vinā gṛham || 88 ||
[Analyze grammar]

nātaḥ parataraṃ kiṃcitpavitraṃ pāpanāśanam |
vidyādharāya saṃgītaṃ bhṛguṇā maṇiparvate || 89 ||
[Analyze grammar]

rājovāca |
brahmankadā bhṛgurvipro nijagāda mahīdhare |
tasmai dharmopadeśaṃ ca kathyatāṃ me kutūhalāt || 90 ||
[Analyze grammar]

vasiṣṭha uvāca |
dvādaśābdaṃ purā rājanna vavarṣa balāhakaḥ |
tenodvignāḥ prajāḥ kṣīṇā gatāḥ sarvā diśo daśa || 91 ||
[Analyze grammar]

khilībhūte tadā madhye himavadviṃdhyayornṛpa |
svāhāsvadhāvaṣaṭkāravedādhyayanavarjite || 92 ||
[Analyze grammar]

sopaplave tadā loke luptadharme ca niṣprabhe |
phalamūlānnapānīya śūnye vai bhūmimaṃḍale || 93 ||
[Analyze grammar]

viṃdhyapādatarucchanna ramyarevātaṭāśramāt |
sahaśiṣyaiśca nirgamya himādriṃ sa gato bhṛguḥ || 94 ||
[Analyze grammar]

tatra tiṣṭhati kailāsagireḥ paścimato giriḥ |
maṇikūṭa iti khyāto hemaratnaśiloccayaḥ || 95 ||
[Analyze grammar]

adho'dhasphaṭikaśveto madhye nīlaśilo giriḥ |
bhūtibhiḥ sarvataḥ śuklo nīlakaṃṭha ivābabhau || 96 ||
[Analyze grammar]

sarvatrāsau nīlaśilo hemarekhāṃtarāṃtaraḥ |
sphuradvidyullataḥ kṛṣṇo jīmūtaiva rājate || 97 ||
[Analyze grammar]

mūrdhni nīlaśilaḥ śaila adhaḥ kāṃcanamekhalaḥ |
nārāyaṇa ivābhāti parivīta ivāṃbaraḥ || 98 ||
[Analyze grammar]

amekhalā sunīlābho madhye madhye sitopalaḥ |
satārakamiva vyoma śuśubhe sa mahīdharaḥ || 99 ||
[Analyze grammar]

labdhvātmanastanuṃ śubhrāṃ dīptadivyauṣadhīdharaḥ |
bahudyotakaro bhāti dvitīya iva caṃdramāḥ || 100 ||
[Analyze grammar]

adhityakāsu saṃgītaiḥ kinnarīṇāṃ sakīcakaiḥ |
raṃbhāpatrapatākābhiḥ śobhate sa sadā'calaḥ || 101 ||
[Analyze grammar]

haritopalavaidūrya padmarāgaśitāśmanām |
rugraśmimaṃḍalaiḥ so'ga iṃdracāpairivāvṛtaḥ || 102 ||
[Analyze grammar]

sarvadhātumayairhemairnānāratnaiḥ praśobhitaḥ |
so'gnijvālairivātyuccaiḥ śṛṃgaiḥ sarvatra veṣṭitaḥ || 103 ||
[Analyze grammar]

tasyāgatya nitaṃbeṣu satṛṇā suśilāsu ca |
vidyādharyaḥ pradevaṃte svapatīnkāmaviklavāḥ || 104 ||
[Analyze grammar]

niruddhāṃtarmarunmārgā jitakleśā virāgiṇaḥ |
dhyāyaṃtyaharniśaṃ brahma ramyasānuguhāsu ca || 105 ||
[Analyze grammar]

sākṣasūtrakarāḥ siddhā ardhonmīlitalocanāḥ |
ārādhayaṃti bhūteśaṃ suṃdarīṣu darīṣu ca || 106 ||
[Analyze grammar]

maṃdārakusumāmoda surabhīkṛtadiṅmukhaḥ |
eṣa nirjhariṇī vāri jhaṃkāramukharaḥ sadā || 107 ||
[Analyze grammar]

upatyakāsu kheladbhirvanasthaiḥ kalabhairgajaiḥ |
kastūrīmṛgayūthaiśca cārucitramṛgaistathā || 108 ||
[Analyze grammar]

vilasaccāmarīvṛṃdairvicitraiḥ śvāpadaistathā |
nadatpārāvataiścaiva cakoraiścāpi kokilaiḥ || 109 ||
[Analyze grammar]

rājahaṃsamayūraiśca sadā ramyaḥ sa parvataḥ |
sevyamānaḥ sadā devairguhyakairapsarogaṇaiḥ || 110 ||
[Analyze grammar]

rājovāca |
bahvāścaryamayaḥ śailaḥ sarvasiddhisamāśrayaḥ |
bhagavankiyaducchrāyaḥ kiyadāyāmavistaraḥ || 111 ||
[Analyze grammar]

ṛṣiruvāca |
ṣaṭtriṃśadyojanocchrāyo mastake daśayojanaḥ |
āyāmavistarābhyāṃ sa mūle ṣoḍaśayojanaḥ || 112 ||
[Analyze grammar]

haricaṃdanamaṃdāracūtarājivirājitaḥ |
devadārudrumākīrṇaḥ saralārjunaśobhitaḥ || 113 ||
[Analyze grammar]

kālāgarulavaṃgaiśca nikuṃjaiśca latāgṛhaiḥ |
virājate giriśreṣṭhaḥ sadā puṣpaphalapradaḥ || 114 ||
[Analyze grammar]

taṃ dṛṣṭvā parvataṃ ramyaṃ tadā durbhikṣapīḍitaḥ |
bhṛguścakāra tatraiva vasatiṃ hṛṣṭamānasaḥ || 115 ||
[Analyze grammar]

tasminmanohare śaile kaṃdareṣu vaneṣu ca |
cirakālaṃ tapastepe tapaḥsu nirato bhṛguḥ |
evaṃ tiṣṭhati rājeṃdra dvije svāśramavāsini || 116 ||
[Analyze grammar]

avatīryāgatau śailāddvau vidyādharadaṃpatī |
samāgamya muniṃ natvā sthitau tāvatiduḥkhitau || 117 ||
[Analyze grammar]

tathāvidhau ca tau dṛṣṭvā maṃjuvākyaṃ dvijo'bravīt |
vada vidyādhara prītyā yuvāṃ kimatiduḥkhitau || 118 ||
[Analyze grammar]

śrutvā tasya munervākyaṃ prāha vidyādharo dvijam |
śrūyatāṃ tāpasaśreṣṭha mama duḥkhasya kāraṇam || 119 ||
[Analyze grammar]

sukṛtasya phalaṃ prāpya prāpto'smi tridaśālayam |
labdhvā'pi devatādehaṃ mukhaṃ vyāghrasya me'bhavat || 120 ||
[Analyze grammar]

na jāne karmaṇaḥ kasya vipāko'yamupasthitaḥ |
iti saṃsmṛtya saṃsmṛtya na lebhe śarma me manaḥ || 121 ||
[Analyze grammar]

anyacca śrūyatāṃ vipra yena me hyākulaṃ manaḥ |
jāyeyaṃ mama kalyāṇī madhuvāṇī surūpiṇī || 122 ||
[Analyze grammar]

nṛtyagītakalābhijñā sarvasadguṇaśālinī |
yasminkāle kumārīyaṃ tadā cā'malayānayā || 123 ||
[Analyze grammar]

vipaṃcīṃ parivādinyā taṃtrībhiḥ saptabhirbhṛśam |
vīṇāvādarasābhijñastoṣito nārado muniḥ || 124 ||
[Analyze grammar]

mugdhabhāvepi gāyaṃtyā tvanayā raktakaṃṭhayā |
vicitrasvaranādajño devarājo'pi toṣitaḥ || 125 ||
[Analyze grammar]

asyāḥ kautukabhinnāṃgyā vādayaṃtyā vipaṃcikām |
nānāvakragatisnigdhaṃ śrutvā taṃ paṃcamadhvanim || 126 ||
[Analyze grammar]

tutoṣodbhinnaromāṃco dhunvanmauli maheśvaraḥ |
śīlaudāryaguṇagrāmarūpayauvanasaṃpadā || 127 ||
[Analyze grammar]

nānayā sadṛśī nāke kācidasti nitaṃbinī |
kveyaṃ devamukhī rāmā kvāhaṃ vyāghramukhaḥ pumān || 128 ||
[Analyze grammar]

iti brahmansadāciṃtya dahyāmi hṛdi sarvadā |
iti vidyādharaproktaṃ śrutvā cekṣvākunaṃdanaḥ || 129 ||
[Analyze grammar]

trikālajño bhṛguḥ prāha prahasandivyalocanaḥ |
śṛṇu vidyādharaśreṣṭha vicitraṃ karmaṇāṃ phalam || 130 ||
[Analyze grammar]

prāpya prājñā na muhyaṃti muhyaṃtyajñānacetasaḥ |
makṣikāpadamātraṃ tu yathā hi viṣamaṃ viṣam || 131 ||
[Analyze grammar]

kriyātvavihitālpāpi vipāke dāruṇā tathā |
upoṣyaikādaśīṃ māghe tailābhyaṃgaḥ kṛtastvayā || 132 ||
[Analyze grammar]

dvādaśyāṃ prāgbhave dehe tena vyāghramukhobhavān |
upoṣyaikādaśīṃ puṇyāṃ dvādaśyāṃ tailasevanāt || 133 ||
[Analyze grammar]

kurūpaṃ prāptavāndehaṃ purāhyevaṃ purūravāḥ |
dṛṣṭvātmanaḥ kukāyaṃ sa tena duḥkhena duḥkhitaḥ || 134 ||
[Analyze grammar]

girirājaṃ samāgamya devatāsarasastaṭe |
sthitvā ca paramaprītyā śuciḥ snātaḥ kuśāsane || 135 ||
[Analyze grammar]

navanīlaghanaśyāmaṃ nalināyatalocanam |
śaṃkhacakragadāpadmadharaṃ pītāṃbarāvṛtam || 136 ||
[Analyze grammar]

kaustubhena virājaṃtaṃ vanamālādharaṃ harim |
ciṃtayanhṛdaye rājā nigrahītākhileṃdriyaḥ || 137 ||
[Analyze grammar]

māsatrayaṃ nirāhārastapastepe sudāruṇam |
alpena tapasā tuṣṭaḥ saptajanmakṛtārcanaḥ || 138 ||
[Analyze grammar]

saṃsmaraṃstasya bhūpasya tadā prādurabhūtsvayam |
māghasya śuklapakṣe tu dvādaśyāṃ makare ravau || 139 ||
[Analyze grammar]

śaṃkhādbhirabhiṣicyāśu mudā taṃ cakravartinam |
vāsudevo dadau tasmai smārayaṃstailaceṣṭitam || 140 ||
[Analyze grammar]

atīva suṃdaraṃ rūpaṃ kamanīyaṃ manoharam |
yena taṃ cakame devī urvaśī devanāyikā || 141 ||
[Analyze grammar]

itthaṃ labdhavaro rājā kṛtakṛtyaḥ puraṃ gataḥ |
iti karmagatiṃ jñātvā kiṃ vidyādhara khidyate || 142 ||
[Analyze grammar]

bhavānparijihīrṣuśceddānavasya virūpatām |
śīghraṃ madvacanādeva prācīnāghavināśanam || 143 ||
[Analyze grammar]

māghamāse kuru snānaṃ maṇikūṭanadījale |
munisiddhasurairjuṣṭe kathayiṣyāmi tadvidhim || 144 ||
[Analyze grammar]

tavabhāgyavaśānmāgho nikaṭaḥ paṃcame'hani |
pauṣasyaikādaśīṃ śuklāmārabhya sthaṃḍileśayaḥ || 145 ||
[Analyze grammar]

māsamekaṃ nirāhārastrikālaṃ snānamācara |
trikālamarcayanviṣṇuṃ tyaktabhogo jiteṃdriyaḥ || 146 ||
[Analyze grammar]

māghasyaikādaśīśuklā yāvadvidyādharottama |
tato nirdagdhapāpaṃ tvāṃ dvādaśyāṃ puṇyavāsare || 147 ||
[Analyze grammar]

abhiṣicya śivaistoyairmaṃtrapūtairahaṃ sura |
kāmavaktropamaṃ vaktraṃ kariṣyāmi tavānagha || 148 ||
[Analyze grammar]

devatāvadanobhūtvā tvaṃ vidyādharasattama |
anayā varavarṇinyā sārddhaṃ krīḍa yathāsukham || 149 ||
[Analyze grammar]

jñātamāghaprabhāvastvaṃ māghasnānaṃ sadā kuru |
yathāmanorathāvāptirjāyate tava sarvadā || 150 ||
[Analyze grammar]

ityuktaṃ bhṛguṇā tasmai sarvajñena mahātmanā |
vidyādharāya rājeṃdra punargāthā udāhṛtā || 151 ||
[Analyze grammar]

māghasnānairvipannāśa māghasnānairaghakṣayaḥ |
sarvayajñādhiko māghaḥ sarvadānaphalapradaḥ || 152 ||
[Analyze grammar]

māgho garjati yajñebhyo māgho yogācca garjati |
tīvrācca tapaso māgho bho vidyādhara garjati || 153 ||
[Analyze grammar]

puṣkare ca kurukṣetre brahmāvarte pṛthūdake |
avimukte prayāge ca gaṃgāsāgarasaṃgame || 154 ||
[Analyze grammar]

yatphalaṃ daśabhirvarṣaiḥ prāpyate niyamairnaraiḥ |
tatphalaṃ prāpyate māghe tryahasnānānna saṃśayaḥ || 155 ||
[Analyze grammar]

svargaloke ciraṃ rāgo yeṣāṃ manasi vartate |
yatra kvāpi jale taistu snātavyaṃ makare ravau || 156 ||
[Analyze grammar]

āyurārogyasaṃpattirūpasaubhāgyatā guṇāḥ |
yeṣāṃ manorathastaistu na tyājyaṃ māghamajjanam || 157 ||
[Analyze grammar]

ye ca bibhyaṃti narakādye daridrācca saṃcitāt |
sarvathā taiḥ prayatnena māghe kāryaṃ nimajjanam || 158 ||
[Analyze grammar]

dāridrya pāpadaurbhāgya paṃkaprakṣālanāya ca |
māghasnānānna cānyo'sti upāyo rājasattama || 159 ||
[Analyze grammar]

śraddhāhīnāni karmāṇi tathātyalpaphalāni vai |
phalaṃ dadāti saṃpūrṇaṃ māghasnānaṃ yathā tathā || 160 ||
[Analyze grammar]

akāmo vā sakāmo vā yatra kvāpi bahirjale |
ihāmutra ca duḥkhāni māghasnāyī na viṃdati || 161 ||
[Analyze grammar]

pakṣadvaye yathā caṃdro varddhate kṣīyate tathā |
pātakaṃ kṣīyate māghe puṇyarāśiśca vardhate || 162 ||
[Analyze grammar]

yathā ca khanyā jāyaṃte ratnāni vividhāni ca |
snānātpuṇyāni jāyaṃte narāṇāṃ māghatastathā || 163 ||
[Analyze grammar]

kāmadhenuryathā kāmaṃ ciṃtāmaṇistu ciṃtitam |
māghasnānaṃ dadātīha tadvatsarvānmanorathān || 164 ||
[Analyze grammar]

kṛte tapaḥ paraṃ jñānaṃ tretāyāṃ yajanaṃ tathā |
dvāpare tu kalau jñānaṃ māghaḥ sarvayugeṣu ca || 165 ||
[Analyze grammar]

sarveṣāmeva varṇānāmāśramāṇāṃ ca bhūpate |
māghasnānaṃ tu dharmasya dhārābhirabhivarṣati || 166 ||
[Analyze grammar]

vasiṣṭha uvāca |
iti vākyaṃ bhṛgoḥ śrutvā tasminnevāśrame suraḥ |
sahaiva bhṛguṇā māghe girau nirjhariṇī taṭe || 167 ||
[Analyze grammar]

yathoktavidhinā snānamakarodbhāryayā saha |
bhṛgoranugrahātso'tha saṃprāpya manasepsitam || 168 ||
[Analyze grammar]

devatāvadano bhūtvā mumude maṇiparvate |
ājagāma bhṛgurvidhyaṃ tamanugrāhya harṣitaḥ || 169 ||
[Analyze grammar]

maṇimayagirirāje snānamātreṇa māghe madanavadanarūpastatra vidyādharo'bhūt |
kṣapitaniyamadeho viṃdhyapādāvatīrṇo bhṛgurapi sahaśiṣyairājagāmātha revām || 170 ||
[Analyze grammar]

akhilabhuvanasāraṃ māghamāhātmyametaddvijavarabhṛguṇoktaṃ bhūpavidyādharāya |
vividhaphalavicitraṃ yaḥ śṛṇotīha nityaṃ rucirasakalakāmāndevavatprāpnuyātsaḥ || 171 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe māghamāhātmye vasiṣṭhadilīpasaṃvāde paṃcaviṃśatyadhikaśatatamo'dhyāyaḥ || 125 ||
[Analyze grammar]