Chapter 33

draupadyuvāca |
nāvamanye na garhe ca dharmaṃ pārtha kathaṃcana |
īśvaraṃ kuta evāhamavamaṃsye prajāpatim || 1 ||
[Analyze grammar]

ārtāhaṃ pralapāmīdamiti māṃ viddhi bhārata |
bhūyaśca vilapiṣyāmi sumanāstannibodha me || 2 ||
[Analyze grammar]

karma khalviha kartavyaṃ jātenāmitrakarśana |
akarmāṇo hi jīvanti sthāvarā netare janāḥ || 3 ||
[Analyze grammar]

ā mātṛstanapānācca yāvacchayyopasarpaṇam |
jaṅgamāḥ karmaṇā vṛttimāpnuvanti yudhiṣṭhira || 4 ||
[Analyze grammar]

jaṅgameṣu viśeṣeṇa manuṣyā bharatarṣabha |
icchanti karmaṇā vṛttimavāptuṃ pretya ceha ca || 5 ||
[Analyze grammar]

utthānamabhijānanti sarvabhūtāni bhārata |
pratyakṣaṃ phalamaśnanti karmaṇāṃ lokasākṣikam || 6 ||
[Analyze grammar]

paśyāmi svaṃ samutthānamupajīvanti jantavaḥ |
api dhātā vidhātā ca yathāyamudake bakaḥ || 7 ||
[Analyze grammar]

svakarma kuru mā glāsīḥ karmaṇā bhava daṃśitaḥ |
kṛtyaṃ hi yo'bhijānāti sahasre nāsti so'sti vā || 8 ||
[Analyze grammar]

tasya cāpi bhavetkāryaṃ vivṛddhau rakṣaṇe tathā |
bhakṣyamāṇo hyanāvāpaḥ kṣīyate himavānapi || 9 ||
[Analyze grammar]

utsīderanprajāḥ sarvā na kuryuḥ karma cedyadi |
api cāpyaphalaṃ karma paśyāmaḥ kurvato janān |
nānyathā hyabhijānanti vṛttiṃ loke kathaṃcana || 10 ||
[Analyze grammar]

yaśca diṣṭaparo loke yaścāyaṃ haṭhavādakaḥ |
ubhāvapasadāvetau karmabuddhiḥ praśasyate || 11 ||
[Analyze grammar]

yo hi diṣṭamupāsīno nirviceṣṭaḥ sukhaṃ svapet |
avasīdetsudurbuddhirāmo ghaṭa ivāmbhasi || 12 ||
[Analyze grammar]

tathaiva haṭhabuddhiryaḥ śaktaḥ karmaṇyakarmakṛt |
āsīta na ciraṃ jīvedanātha iva durbalaḥ || 13 ||
[Analyze grammar]

akasmādapi yaḥ kaścidarthaṃ prāpnoti pūruṣaḥ |
taṃ haṭheneti manyante sa hi yatno na kasyacit || 14 ||
[Analyze grammar]

yaccāpi kiṃcitpuruṣo diṣṭaṃ nāma labhatyuta |
daivena vidhinā pārtha taddaivamiti niścitam || 15 ||
[Analyze grammar]

yatsvayaṃ karmaṇā kiṃcitphalamāpnoti pūruṣaḥ |
pratyakṣaṃ cakṣuṣā dṛṣṭaṃ tatpauruṣamiti smṛtam || 16 ||
[Analyze grammar]

svabhāvataḥ pravṛtto'nyaḥ prāpnotyarthānakāraṇāt |
tatsvabhāvātmakaṃ viddhi phalaṃ puruṣasattama || 17 ||
[Analyze grammar]

evaṃ haṭhācca daivācca svabhāvātkarmaṇastathā |
yāni prāpnoti puruṣastatphalaṃ pūrvakarmaṇaḥ || 18 ||
[Analyze grammar]

dhātāpi hi svakarmaiva taistairhetubhirīśvaraḥ |
vidadhāti vibhajyeha phalaṃ pūrvakṛtaṃ nṛṇām || 19 ||
[Analyze grammar]

yaddhyayaṃ puruṣaḥ kiṃcitkurute vai śubhāśubham |
taddhātṛvihitaṃ viddhi pūrvakarmaphalodayam || 20 ||
[Analyze grammar]

kāraṇaṃ tasya deho'yaṃ dhātuḥ karmaṇi karmaṇi |
sa yathā prerayatyenaṃ tathāyaṃ kurute'vaśaḥ || 21 ||
[Analyze grammar]

teṣu teṣu hi kṛtyeṣu viniyoktā maheśvaraḥ |
sarvabhūtāni kaunteya kārayatyavaśānyapi || 22 ||
[Analyze grammar]

manasārthānviniścitya paścātprāpnoti karmaṇā |
buddhipūrvaṃ svayaṃ dhīraḥ puruṣastatra kāraṇam || 23 ||
[Analyze grammar]

saṃkhyātuṃ naiva śakyāni karmāṇi puruṣarṣabha |
agāranagarāṇāṃ hi siddhiḥ puruṣahaitukī || 24 ||
[Analyze grammar]

tile tailaṃ gavi kṣīraṃ kāṣṭhe pāvakamantataḥ |
dhiyā dhīro vijānīyādupāyaṃ cāsya siddhaye || 25 ||
[Analyze grammar]

tataḥ pravartate paścātkaraṇeṣvasya siddhaye |
tāṃ siddhimupajīvanti karmaṇāmiha jantavaḥ || 26 ||
[Analyze grammar]

kuśalena kṛtaṃ karma kartrā sādhu viniścitam |
idaṃ tvakuśaleneti viśeṣādupalabhyate || 27 ||
[Analyze grammar]

iṣṭāpūrtaphalaṃ na syānna śiṣyo na gururbhavet |
puruṣaḥ karmasādhyeṣu syāccedayamakāraṇam || 28 ||
[Analyze grammar]

kartṛtvādeva puruṣaḥ karmasiddhau praśasyate |
asiddhau nindyate cāpi karmanāśaḥ kathaṃ tviha || 29 ||
[Analyze grammar]

sarvameva haṭhenaike diṣṭenaike vadantyuta |
puruṣaprayatnajaṃ kecittraidhametannirucyate || 30 ||
[Analyze grammar]

na caivaitāvatā kāryaṃ manyanta iti cāpare |
asti sarvamadṛśyaṃ tu diṣṭaṃ caiva tathā haṭhaḥ |
dṛśyate hi haṭhāccaiva diṣṭāccārthasya saṃtatiḥ || 31 ||
[Analyze grammar]

kiṃciddaivāddhaṭhātkiṃcitkiṃcideva svakarmataḥ |
puruṣaḥ phalamāpnoti caturthaṃ nātra kāraṇam |
kuśalāḥ pratijānanti ye tattvaviduṣo janāḥ || 32 ||
[Analyze grammar]

tathaiva dhātā bhūtānāmiṣṭāniṣṭaphalapradaḥ |
yadi na syānna bhūtānāṃ kṛpaṇo nāma kaścana || 33 ||
[Analyze grammar]

yaṃ yamarthamabhiprepsuḥ kurute karma pūruṣaḥ |
tattatsaphalameva syādyadi na syātpurākṛtam || 34 ||
[Analyze grammar]

tridvārāmarthasiddhiṃ tu nānupaśyanti ye narāḥ |
tathaivānarthasiddhiṃ ca yathā lokāstathaiva te || 35 ||
[Analyze grammar]

kartavyaṃ tveva karmeti manoreṣa viniścayaḥ |
ekāntena hyanīho'yaṃ parābhavati pūruṣaḥ || 36 ||
[Analyze grammar]

kurvato hi bhavatyeva prāyeṇeha yudhiṣṭhira |
ekāntaphalasiddhiṃ tu na vindatyalasaḥ kvacit || 37 ||
[Analyze grammar]

asaṃbhave tvasya hetuḥ prāyaścittaṃ tu lakṣyate |
kṛte karmaṇi rājendra tathānṛṇyamavāpyate || 38 ||
[Analyze grammar]

alakṣmīrāviśatyenaṃ śayānamalasaṃ naram |
niḥsaṃśayaṃ phalaṃ labdhvā dakṣo bhūtimupāśnute || 39 ||
[Analyze grammar]

anarthaṃ saṃśayāvasthaṃ vṛṇvate muktasaṃśayāḥ |
dhīrā narāḥ karmaratā na tu niḥsaṃśayaṃ kvacit || 40 ||
[Analyze grammar]

ekāntena hyanartho'yaṃ vartate'smāsu sāṃpratam |
na tu niḥsaṃśayaṃ na syāttvayi karmaṇyavasthite || 41 ||
[Analyze grammar]

atha vā siddhireva syānmahimā tu tathaiva te |
vṛkodarasya bībhatsorbhrātrośca yamayorapi || 42 ||
[Analyze grammar]

anyeṣāṃ karma saphalamasmākamapi vā punaḥ |
viprakarṣeṇa budhyeta kṛtakarmā yathā phalam || 43 ||
[Analyze grammar]

pṛthivīṃ lāṅgalenaiva bhittvā bījaṃ vapatyuta |
āste'tha karṣakastūṣṇīṃ parjanyastatra kāraṇam || 44 ||
[Analyze grammar]

vṛṣṭiścennānugṛhṇīyādanenāstatra karṣakaḥ |
yadanyaḥ puruṣaḥ kuryātkṛtaṃ tatsakalaṃ mayā || 45 ||
[Analyze grammar]

taccedaphalamasmākaṃ nāparādho'sti naḥ kvacit |
iti dhīro'nvavekṣyaiva nātmānaṃ tatra garhayet || 46 ||
[Analyze grammar]

kurvato nārthasiddhirme bhavatīti ha bhārata |
nirvedo nātra gantavyo dvāvetau hyasya karmaṇaḥ |
siddhirvāpyatha vāsiddhirapravṛttirato'nyathā || 47 ||
[Analyze grammar]

bahūnāṃ samavāye hi bhāvānāṃ karma sidhyati |
guṇābhāve phalaṃ nyūnaṃ bhavatyaphalameva vā |
anārambhe tu na phalaṃ na guṇo dṛśyate'cyuta || 48 ||
[Analyze grammar]

deśakālāvupāyāṃśca maṅgalaṃ svasti vṛddhaye |
yunakti medhayā dhīro yathāśakti yathābalam || 49 ||
[Analyze grammar]

apramattena tatkāryamupadeṣṭā parākramaḥ |
bhūyiṣṭhaṃ karmayogeṣu sarva eva parākramaḥ || 50 ||
[Analyze grammar]

yaṃ tu dhīro'nvavekṣeta śreyāṃsaṃ bahubhirguṇaiḥ |
sāmnaivārthaṃ tato lipsetkarma cāsmai prayojayet || 51 ||
[Analyze grammar]

vyasanaṃ vāsya kāṅkṣeta vināśaṃ vā yudhiṣṭhira |
api sindhorgirervāpi kiṃ punarmartyadharmiṇaḥ || 52 ||
[Analyze grammar]

utthānayuktaḥ satataṃ pareṣāmantaraiṣaṇe |
ānṛṇyamāpnoti naraḥ parasyātmana eva ca || 53 ||
[Analyze grammar]

na caivātmāvamantavyaḥ puruṣeṇa kadācana |
na hyātmaparibhūtasya bhūtirbhavati bhārata || 54 ||
[Analyze grammar]

evaṃ saṃsthitikā siddhiriyaṃ lokasya bhārata |
citrā siddhigatiḥ proktā kālāvasthāvibhāgataḥ || 55 ||
[Analyze grammar]

brāhmaṇaṃ me pitā pūrvaṃ vāsayāmāsa paṇḍitam |
so'smā arthamimaṃ prāha pitre me bharatarṣabha || 56 ||
[Analyze grammar]

nītiṃ bṛhaspatiproktāṃ bhrātṝnme'grāhayatpurā |
teṣāṃ sāṃkathyamaśrauṣamahametattadā gṛhe || 57 ||
[Analyze grammar]

sa māṃ rājankarmavatīmāgatāmāha sāntvayan |
śuśrūṣamāṇāmāsīnāṃ pituraṅke yudhiṣṭhira || 58 ||
[Analyze grammar]