Chapter 34

vaiśaṃpāyana uvāca |
yājñasenyā vacaḥ śrutvā bhīmaseno'tyamarṣaṇaḥ |
niḥśvasannupasaṃgamya kruddho rājānamabravīt || 1 ||
[Analyze grammar]

rājyasya padavīṃ dharmyāṃ vraja satpuruṣocitām |
dharmakāmārthahīnānāṃ kiṃ no vastuṃ tapovane || 2 ||
[Analyze grammar]

naiva dharmeṇa tadrājyaṃ nārjavena na caujasā |
akṣakūṭamadhiṣṭhāya hṛtaṃ duryodhanena naḥ || 3 ||
[Analyze grammar]

gomāyuneva siṃhānāṃ durbalena balīyasām |
āmiṣaṃ vighasāśena tadvadrājyaṃ hi no hṛtam || 4 ||
[Analyze grammar]

dharmaleśapraticchannaḥ prabhavaṃ dharmakāmayoḥ |
arthamutsṛjya kiṃ rājandurgeṣu paritapyase || 5 ||
[Analyze grammar]

bhavato'nuvidhānena rājyaṃ naḥ paśyatāṃ hṛtam |
ahāryamapi śakreṇa guptaṃ gāṇḍīvadhanvanā || 6 ||
[Analyze grammar]

kuṇīnāmiva bilvāni paṅgūnāmiva dhenavaḥ |
hṛtamaiśvaryamasmākaṃ jīvatāṃ bhavataḥ kṛte || 7 ||
[Analyze grammar]

bhavataḥ priyamityevaṃ mahadvyasanamīdṛśam |
dharmakāme pratītasya pratipannāḥ sma bhārata || 8 ||
[Analyze grammar]

karśayāmaḥ svamitrāṇi nandayāmaśca śātravān |
ātmānaṃ bhavataḥ śāstre niyamya bharatarṣabha || 9 ||
[Analyze grammar]

yadvayaṃ na tadaivaitāndhārtarāṣṭrānnihanmahi |
bhavataḥ śāstramādāya tannastapati duṣkṛtam || 10 ||
[Analyze grammar]

athaināmanvavekṣasva mṛgacaryāmivātmanaḥ |
avīrācaritāṃ rājanna balasthairniṣevitām || 11 ||
[Analyze grammar]

yāṃ na kṛṣṇo na bībhatsurnābhimanyurna sṛñjayaḥ |
na cāhamabhinandāmi na ca mādrīsutāvubhau || 12 ||
[Analyze grammar]

bhavāndharmo dharma iti satataṃ vratakarśitaḥ |
kaccidrājanna nirvedādāpannaḥ klībajīvikām || 13 ||
[Analyze grammar]

durmanuṣyā hi nirvedamaphalaṃ sarvaghātinam |
aśaktāḥ śriyamāhartumātmanaḥ kurvate priyam || 14 ||
[Analyze grammar]

sa bhavāndṛṣṭimāñśaktaḥ paśyannātmani pauruṣam |
ānṛśaṃsyaparo rājannānarthamavabudhyase || 15 ||
[Analyze grammar]

asmānamī dhārtarāṣṭrāḥ kṣamamāṇānalaṃ sataḥ |
aśaktāneva manyante tadduḥkhaṃ nāhave vadhaḥ || 16 ||
[Analyze grammar]

tatra cedyudhyamānānāmajihmamanivartinām |
sarvaśo hi vadhaḥ śreyānpretya lokāṃllabhemahi || 17 ||
[Analyze grammar]

atha vā vayamevaitānnihatya bharatarṣabha |
ādadīmahi gāṃ sarvāṃ tathāpi śreya eva naḥ || 18 ||
[Analyze grammar]

sarvathā kāryametannaḥ svadharmamanutiṣṭhatām |
kāṅkṣatāṃ vipulāṃ kīrtiṃ vairaṃ praticikīrṣatām || 19 ||
[Analyze grammar]

ātmārthaṃ yudhyamānānāṃ vidite kṛtyalakṣaṇe |
anyairapahṛte rājye praśaṃsaiva na garhaṇā || 20 ||
[Analyze grammar]

karśanārtho hi yo dharmo mitrāṇāmātmanastathā |
vyasanaṃ nāma tadrājanna sa dharmaḥ kudharma tat || 21 ||
[Analyze grammar]

sarvathā dharmanityaṃ tu puruṣaṃ dharmadurbalam |
jahatastāta dharmārthau pretaṃ duḥkhasukhe yathā || 22 ||
[Analyze grammar]

yasya dharmo hi dharmārthaṃ kleśabhāṅna sa paṇḍitaḥ |
na sa dharmasya vedārthaṃ sūryasyāndhaḥ prabhāmiva || 23 ||
[Analyze grammar]

yasya cārthārthamevārthaḥ sa ca nārthasya kovidaḥ |
rakṣate bhṛtako'raṇyaṃ yathā syāttādṛgeva saḥ || 24 ||
[Analyze grammar]

ativelaṃ hi yo'rthārthī netarāvanutiṣṭhati |
sa vadhyaḥ sarvabhūtānāṃ brahmaheva jugupsitaḥ || 25 ||
[Analyze grammar]

satataṃ yaśca kāmārthī netarāvanutiṣṭhati |
mitrāṇi tasya naśyanti dharmārthābhyāṃ ca hīyate || 26 ||
[Analyze grammar]

tasya dharmārthahīnasya kāmānte nidhanaṃ dhruvam |
kāmato ramamāṇasya mīnasyevāmbhasaḥ kṣaye || 27 ||
[Analyze grammar]

tasmāddharmārthayornityaṃ na pramādyanti paṇḍitāḥ |
prakṛtiḥ sā hi kāmasya pāvakasyāraṇiryathā || 28 ||
[Analyze grammar]

sarvathā dharmamūlo'rtho dharmaścārthaparigrahaḥ |
itaretarayonī tau viddhi meghodadhī yathā || 29 ||
[Analyze grammar]

dravyārthasparśasaṃyoge yā prītirupajāyate |
sa kāmaścittasaṃkalpaḥ śarīraṃ nāsya vidyate || 30 ||
[Analyze grammar]

arthārthī puruṣo rājanbṛhantaṃ dharmamṛcchati |
arthamṛcchati kāmārthī na kāmādanyamṛcchatī || 31 ||
[Analyze grammar]

na hi kāmena kāmo'nyaḥ sādhyate phalameva tat |
upayogātphalasyeva kāṣṭhādbhasmeva paṇḍitaḥ || 32 ||
[Analyze grammar]

imāñśakunikānrājanhanti vaitaṃsiko yathā |
etadrūpamadharmasya bhūteṣu ca vihiṃsatām || 33 ||
[Analyze grammar]

kāmāllobhācca dharmasya pravṛttiṃ yo na paśyati |
sa vadhyaḥ sarvabhūtānāṃ pretya ceha ca durmatiḥ || 34 ||
[Analyze grammar]

vyaktaṃ te vidito rājannartho dravyaparigrahaḥ |
prakṛtiṃ cāpi vetthāsya vikṛtiṃ cāpi bhūyasīm || 35 ||
[Analyze grammar]

tasya nāśaṃ vināśaṃ vā jarayā maraṇena vā |
anarthamiti manyante so'yamasmāsu vartate || 36 ||
[Analyze grammar]

indriyāṇāṃ ca pañcānāṃ manaso hṛdayasya ca |
viṣaye vartamānānāṃ yā prītirupajāyate |
sa kāma iti me buddhiḥ karmaṇāṃ phalamuttamam || 37 ||
[Analyze grammar]

evameva pṛthagdṛṣṭvā dharmārthau kāmameva ca |
na dharmapara eva syānna cārthaparamo naraḥ |
na kāmaparamo vā syātsarvānseveta sarvadā || 38 ||
[Analyze grammar]

dharmaṃ pūrvaṃ dhanaṃ madhye jaghanye kāmamācaret |
ahanyanucaredevameṣa śāstrakṛto vidhiḥ || 39 ||
[Analyze grammar]

kāmaṃ pūrvaṃ dhanaṃ madhye jaghanye dharmamācaret |
vayasyanucaredevameṣa śāstrakṛto vidhiḥ || 40 ||
[Analyze grammar]

dharmaṃ cārthaṃ ca kāmaṃ ca yathāvadvadatāṃ vara |
vibhajya kāle kālajñaḥ sarvānseveta paṇḍitaḥ || 41 ||
[Analyze grammar]

mokṣo vā paramaṃ śreya eṣa rājansukhārthinām |
prāptirvā buddhimāsthāya sopāyaṃ kurunandana || 42 ||
[Analyze grammar]

tadvāśu kriyatāṃ rājanprāptirvāpyadhigamyatām |
jīvitaṃ hyāturasyeva duḥkhamantaravartinaḥ || 43 ||
[Analyze grammar]

viditaścaiva te dharmaḥ satataṃ caritaśca te |
jānate tvayi śaṃsanti suhṛdaḥ karmacodanām || 44 ||
[Analyze grammar]

dānaṃ yajñaḥ satāṃ pūjā vedadhāraṇamārjavam |
eṣa dharmaḥ paro rājanphalavānpretya ceha ca || 45 ||
[Analyze grammar]

eṣa nārthavihīnena śakyo rājanniṣevitum |
akhilāḥ puruṣavyāghra guṇāḥ syuryadyapītare || 46 ||
[Analyze grammar]

dharmamūlaṃ jagadrājannānyaddharmādviśiṣyate |
dharmaścārthena mahatā śakyo rājanniṣevitum || 47 ||
[Analyze grammar]

na cārtho bhaikṣacaryeṇa nāpi klaibyena karhicit |
vettuṃ śakyaḥ sadā rājankevalaṃ dharmabuddhinā || 48 ||
[Analyze grammar]

pratiṣiddhā hi te yācñā yayā sidhyati vai dvijaḥ |
tejasaivārthalipsāyāṃ yatasva puruṣarṣabha || 49 ||
[Analyze grammar]

bhaikṣacaryā na vihitā na ca viṭśūdrajīvikā |
kṣatriyasya viśeṣeṇa dharmastu balamaurasam || 50 ||
[Analyze grammar]

udārameva vidvāṃso dharmaṃ prāhurmanīṣiṇaḥ |
udāraṃ pratipadyasva nāvare sthātumarhasi || 51 ||
[Analyze grammar]

anubudhyasva rājendra vettha dharmānsanātanān |
krūrakarmābhijāto'si yasmādudvijate janaḥ || 52 ||
[Analyze grammar]

prajāpālanasaṃbhūtaṃ phalaṃ tava na garhitam |
eṣa te vihito rājandhātrā dharmaḥ sanātanaḥ || 53 ||
[Analyze grammar]

tasmādvicalitaḥ pārtha loke hāsyaṃ gamiṣyasi |
svadharmāddhi manuṣyāṇāṃ calanaṃ na praśasyate || 54 ||
[Analyze grammar]

sa kṣātraṃ hṛdayaṃ kṛtvā tyaktvedaṃ śithilaṃ manaḥ |
vīryamāsthāya kaunteya dhuramudvaha dhuryavat || 55 ||
[Analyze grammar]

na hi kevaladharmātmā pṛthivīṃ jātu kaścana |
pārthivo vyajayadrājanna bhūtiṃ na punaḥ śriyam || 56 ||
[Analyze grammar]

jihvāṃ dattvā bahūnāṃ hi kṣudrāṇāṃ lubdhacetasām |
nikṛtyā labhate rājyamāhāramiva śalyakaḥ || 57 ||
[Analyze grammar]

bhrātaraḥ pūrvajātāśca susamṛddhāśca sarvaśaḥ |
nikṛtyā nirjitā devairasurāḥ pāṇḍavarṣabha || 58 ||
[Analyze grammar]

evaṃ balavataḥ sarvamiti buddhvā mahīpate |
jahi śatrūnmahābāho parāṃ nikṛtimāsthitaḥ || 59 ||
[Analyze grammar]

na hyarjunasamaḥ kaścidyudhi yoddhā dhanurdharaḥ |
bhavitā vā pumānkaścinmatsamo vā gadādharaḥ || 60 ||
[Analyze grammar]

sattvena kurute yuddhaṃ rājansubalavānapi |
na pramāṇena notsāhātsattvastho bhava pāṇḍava || 61 ||
[Analyze grammar]

sattvaṃ hi mūlamarthasya vitathaṃ yadato'nyathā |
na tu prasaktaṃ bhavati vṛkṣacchāyeva haimanī || 62 ||
[Analyze grammar]

arthatyāgo hi kāryaḥ syādarthaṃ śreyāṃsamicchatā |
bījaupamyena kaunteya mā te bhūdatra saṃśayaḥ || 63 ||
[Analyze grammar]

arthena tu samo'nartho yatra labhyeta nodayaḥ |
na tatra vipaṇaḥ kāryaḥ kharakaṇḍūyitaṃ hi tat || 64 ||
[Analyze grammar]

evameva manuṣyendra dharmaṃ tyaktvālpakaṃ naraḥ |
bṛhantaṃ dharmamāpnoti sa buddha iti niścitaḥ || 65 ||
[Analyze grammar]

amitraṃ mitrasaṃpannaṃ mitrairbhindanti paṇḍitāḥ |
bhinnairmitraiḥ parityaktaṃ durbalaṃ kurute vaśe || 66 ||
[Analyze grammar]

sattvena kurute yuddhaṃ rājansubalavānapi |
nodyamena na hotrābhiḥ sarvāḥ svīkurute prajāḥ || 67 ||
[Analyze grammar]

sarvathā saṃhataireva durbalairbalavānapi |
amitraḥ śakyate hantuṃ madhuhā bhramarairiva || 68 ||
[Analyze grammar]

yathā rājanprajāḥ sarvāḥ sūryaḥ pāti gabhastibhiḥ |
atti caiva tathaiva tvaṃ savituḥ sadṛśo bhava || 69 ||
[Analyze grammar]

etaddhyapi tapo rājanpurāṇamiti naḥ śrutam |
vidhinā pālanaṃ bhūmeryatkṛtaṃ naḥ pitāmahaiḥ || 70 ||
[Analyze grammar]

apeyātkila bhāḥ sūryāllakṣmīścandramasastathā |
iti loko vyavasito dṛṣṭvemāṃ bhavato vyathām || 71 ||
[Analyze grammar]

bhavataśca praśaṃsābhirnindābhiritarasya ca |
kathāyuktāḥ pariṣadaḥ pṛthagrājansamāgatāḥ || 72 ||
[Analyze grammar]

idamabhyadhikaṃ rājanbrāhmaṇā guravaśca te |
sametāḥ kathayantīha muditāḥ satyasaṃdhatām || 73 ||
[Analyze grammar]

yanna mohānna kārpaṇyānna lobhānna bhayādapi |
anṛtaṃ kiṃciduktaṃ te na kāmānnārthakāraṇāt || 74 ||
[Analyze grammar]

yadenaḥ kurute kiṃcidrājā bhūmimavāpnuvan |
sarvaṃ tannudate paścādyajñairvipuladakṣiṇaiḥ || 75 ||
[Analyze grammar]

brāhmaṇebhyo dadadgrāmāngāśca rājansahasraśaḥ |
mucyate sarvapāpebhyastamobhya iva candramāḥ || 76 ||
[Analyze grammar]

paurajānapadāḥ sarve prāyaśaḥ kurunandana |
savṛddhabālāḥ sahitāḥ śaṃsanti tvāṃ yudhiṣṭhira || 77 ||
[Analyze grammar]

śvadṛtau kṣīramāsaktaṃ brahma vā vṛṣale yathā |
satyaṃ stene balaṃ nāryāṃ rājyaṃ duryodhane tathā || 78 ||
[Analyze grammar]

iti nirvacanaṃ loke ciraṃ carati bhārata |
api caitatstriyo bālāḥ svādhyāyamiva kurvate || 79 ||
[Analyze grammar]

sa bhavānrathamāsthāya sarvopakaraṇānvitam |
tvaramāṇo'bhiniryātu ciramarthopapādakam || 80 ||
[Analyze grammar]

vācayitvā dvijaśreṣṭhānadyaiva gajasāhvayam |
astravidbhiḥ parivṛto bhrātṛbhirdṛḍhadhanvibhiḥ |
āśīviṣasamairvīrairmarudbhiriva vṛtrahā || 81 ||
[Analyze grammar]

amitrāṃstejasā mṛdnannasurebhya ivārihā |
śriyamādatsva kaunteya dhārtarāṣṭrānmahābala || 82 ||
[Analyze grammar]

na hi gāṇḍīvamuktānāṃ śarāṇāṃ gārdhravāsasām |
sparśamāśīviṣābhānāṃ martyaḥ kaścana saṃsahet || 83 ||
[Analyze grammar]

na sa vīro na mātaṅgo na sadaśvo'sti bhārata |
yaḥ saheta gadāvegaṃ mama kruddhasya saṃyuge || 84 ||
[Analyze grammar]

sṛñjayaiḥ saha kaikeyairvṛṣṇīnāmṛṣabheṇa ca |
kathaṃ svidyudhi kaunteya rājyaṃ na prāpnuyāmahe || 85 ||
[Analyze grammar]