Chapter 12

dhṛtarāṣṭra uvāca |
kirmīrasya vadhaṃ kṣattaḥ śrotumicchāmi kathyatām |
rakṣasā bhīmasenasya kathamāsītsamāgamaḥ || 1 ||
[Analyze grammar]

vidura uvāca |
śṛṇu bhīmasya karmedamatimānuṣakarmaṇaḥ |
śrutapūrvaṃ mayā teṣāṃ kathānteṣu punaḥ punaḥ || 2 ||
[Analyze grammar]

itaḥ prayātā rājendra pāṇḍavā dyūtanirjitāḥ |
jagmustribhirahorātraiḥ kāmyakaṃ nāma tadvanam || 3 ||
[Analyze grammar]

rātrau niśīthe svābhīle gate'rdhasamaye nṛpa |
pracāre puruṣādānāṃ rakṣasāṃ bhīmakarmaṇām || 4 ||
[Analyze grammar]

tadvanaṃ tāpasā nityaṃ śeṣāśca vanacāriṇaḥ |
dūrātpariharanti sma puruṣādabhayātkila || 5 ||
[Analyze grammar]

teṣāṃ praviśatāṃ tatra mārgamāvṛtya bhārata |
dīptākṣaṃ bhīṣaṇaṃ rakṣaḥ solmukaṃ pratyadṛśyata || 6 ||
[Analyze grammar]

bāhū mahāntau kṛtvā tu tathāsyaṃ ca bhayānakam |
sthitamāvṛtya panthānaṃ yena yānti kurūdvahāḥ || 7 ||
[Analyze grammar]

daṣṭoṣṭhadaṃṣṭraṃ tāmrākṣaṃ pradīptordhvaśiroruham |
sārkaraśmitaḍiccakraṃ sabalākamivāmbudam || 8 ||
[Analyze grammar]

sṛjantaṃ rākṣasīṃ māyāṃ mahārāvavirāviṇam |
muñcantaṃ vipulaṃ nādaṃ satoyamiva toyadam || 9 ||
[Analyze grammar]

tasya nādena saṃtrastāḥ pakṣiṇaḥ sarvatodiśam |
vimuktanādāḥ saṃpetuḥ sthalajā jalajaiḥ saha || 10 ||
[Analyze grammar]

saṃpradrutamṛgadvīpimahiṣarkṣasamākulam |
tadvanaṃ tasya nādena saṃprasthitamivābhavat || 11 ||
[Analyze grammar]

tasyoruvātābhihatā tāmrapallavabāhavaḥ |
vidūrajātāśca latāḥ samāśliṣyanta pādapān || 12 ||
[Analyze grammar]

tasminkṣaṇe'tha pravavau māruto bhṛśadāruṇaḥ |
rajasā saṃvṛtaṃ tena naṣṭarkṣamabhavannabhaḥ || 13 ||
[Analyze grammar]

pañcānāṃ pāṇḍuputrāṇāmavijñāto mahāripuḥ |
pañcānāmindriyāṇāṃ tu śokavega ivātulaḥ || 14 ||
[Analyze grammar]

sa dṛṣṭvā pāṇḍavāndūrātkṛṣṇājinasamāvṛtān |
āvṛṇottadvanadvāraṃ maināka iva parvataḥ || 15 ||
[Analyze grammar]

taṃ samāsādya vitrastā kṛṣṇā kamalalocanā |
adṛṣṭapūrvaṃ saṃtrāsānnyamīlayata locane || 16 ||
[Analyze grammar]

duḥśāsanakarotsṛṣṭaviprakīrṇaśiroruhā |
pañcaparvatamadhyasthā nadīvākulatāṃ gatā || 17 ||
[Analyze grammar]

momuhyamānāṃ tāṃ tatra jagṛhuḥ pañca pāṇḍavāḥ |
indriyāṇi prasaktāni viṣayeṣu yathā ratim || 18 ||
[Analyze grammar]

atha tāṃ rākṣasīṃ māyāmutthitāṃ ghoradarśanām |
rakṣoghnairvividhairmantrairdhaumyaḥ samyakprayojitaiḥ |
paśyatāṃ pāṇḍuputrāṇāṃ nāśayāmāsa vīryavān || 19 ||
[Analyze grammar]

sa naṣṭamāyo'tibalaḥ krodhavisphāritekṣaṇaḥ |
kāmamūrtidharaḥ kṣudraḥ kālakalpo vyadṛśyata || 20 ||
[Analyze grammar]

tamuvāca tato rājā dīrghaprajño yudhiṣṭhiraḥ |
ko bhavānkasya vā kiṃ te kriyatāṃ kāryamucyatām || 21 ||
[Analyze grammar]

pratyuvācātha tadrakṣo dharmarājaṃ yudhiṣṭhiram |
ahaṃ bakasya vai bhrātā kirmīra iti viśrutaḥ || 22 ||
[Analyze grammar]

vane'sminkāmyake śūnye nivasāmi gatajvaraḥ |
yudhi nirjitya puruṣānāhāraṃ nityamācaran || 23 ||
[Analyze grammar]

ke yūyamiha saṃprāptā bhakṣyabhūtā mamāntikam |
yudhi nirjitya vaḥ sarvānbhakṣayiṣye gatajvaraḥ || 24 ||
[Analyze grammar]

yudhiṣṭhirastu tacchrutvā vacastasya durātmanaḥ |
ācacakṣe tataḥ sarvaṃ gotranāmādi bhārata || 25 ||
[Analyze grammar]

pāṇḍavo dharmarājo'haṃ yadi te śrotramāgataḥ |
sahito bhrātṛbhiḥ sarvairbhīmasenārjunādibhiḥ || 26 ||
[Analyze grammar]

hṛtarājyo vane vāsaṃ vastuṃ kṛtamatistataḥ |
vanamabhyāgato ghoramidaṃ tava parigraham || 27 ||
[Analyze grammar]

kirmīrastvabravīdenaṃ diṣṭyā devairidaṃ mama |
upapāditamadyeha cirakālānmanogatam || 28 ||
[Analyze grammar]

bhīmasenavadhārthaṃ hi nityamabhyudyatāyudhaḥ |
carāmi pṛthivīṃ kṛtsnāṃ nainamāsādayāmyaham || 29 ||
[Analyze grammar]

so'yamāsādito diṣṭyā bhrātṛhā kāṅkṣitaściram |
anena hi mama bhrātā bako vinihataḥ priyaḥ || 30 ||
[Analyze grammar]

vetrakīyagṛhe rājanbrāhmaṇacchadmarūpiṇā |
vidyābalamupāśritya na hyastyasyaurasaṃ balam || 31 ||
[Analyze grammar]

hiḍimbaśca sakhā mahyaṃ dayito vanagocaraḥ |
hato durātmanānena svasā cāsya hṛtā purā || 32 ||
[Analyze grammar]

so'yamabhyāgato mūḍho mamedaṃ gahanaṃ vanam |
pracārasamaye'smākamardharātre samāsthite || 33 ||
[Analyze grammar]

adyāsya yātayiṣyāmi tadvairaṃ cirasaṃbhṛtam |
tarpayiṣyāmi ca bakaṃ rudhireṇāsya bhūriṇā || 34 ||
[Analyze grammar]

adyāhamanṛṇo bhūtvā bhrātuḥ sakhyustathaiva ca |
śāntiṃ labdhāsmi paramāṃ hatva rākṣasakaṇṭakam || 35 ||
[Analyze grammar]

yadi tena purā mukto bhīmaseno bakena vai |
adyainaṃ bhakṣayiṣyāmi paśyataste yudhiṣṭhira || 36 ||
[Analyze grammar]

enaṃ hi vipulaprāṇamadya hatvā vṛkodaram |
saṃbhakṣya jarayiṣyāmi yathāgastyo mahāsuram || 37 ||
[Analyze grammar]

evamuktastu dharmātmā satyasaṃdho yudhiṣṭhiraḥ |
naitadastīti sakrodho bhartsayāmāsa rākṣasam || 38 ||
[Analyze grammar]

tato bhīmo mahābāhurārujya tarasā druma |
daśavyāmamivodviddhaṃ niṣpatramakarottadā || 39 ||
[Analyze grammar]

cakāra sajyaṃ gāṇḍīvaṃ vajraniṣpeṣagauravam |
nimeṣāntaramātreṇa tathaiva vijayo'rjunaḥ || 40 ||
[Analyze grammar]

nivārya bhīmo jiṣṇuṃ tu tadrakṣo ghoradarśanam |
abhidrutyābravīdvākyaṃ tiṣṭha tiṣṭheti bhārata || 41 ||
[Analyze grammar]

ityuktvainamabhikruddhaḥ kakṣyāmutpīḍya pāṇḍavaḥ |
niṣpiṣya pāṇinā pāṇiṃ saṃdaṣṭoṣṭhapuṭo balī |
tamabhyadhāvadvegena bhīmo vṛkṣāyudhastadā || 42 ||
[Analyze grammar]

yamadaṇḍapratīkāśaṃ tatastaṃ tasya mūrdhani |
pātayāmāsa vegena kuliśaṃ maghavāniva || 43 ||
[Analyze grammar]

asaṃbhrāntaṃ tu tadrakṣaḥ samare pratyadṛśyata |
cikṣepa colmukaṃ dīptamaśaniṃ jvalitāmiva || 44 ||
[Analyze grammar]

tadudastamalātaṃ tu bhīmaḥ praharatāṃ varaḥ |
padā savyena cikṣepa tadrakṣaḥ punarāvrajat || 45 ||
[Analyze grammar]

kirmīraścāpi sahasā vṛkṣamutpāṭya pāṇḍavam |
daṇḍapāṇiriva kruddhaḥ samare pratyayudhyata || 46 ||
[Analyze grammar]

tadvṛkṣayuddhamabhavanmahīruhavināśanam |
vālisugrīvayorbhrātroryathā śrīkāṅkṣiṇoḥ purā || 47 ||
[Analyze grammar]

śīrṣayoḥ patitā vṛkṣā bibhidurnaikadhā tayoḥ |
yathaivotpalapadmāni mattayordvipayostathā || 48 ||
[Analyze grammar]

muñjavajjarjarībhūtā bahavastatra pādapāḥ |
cīrāṇīva vyudastāni rejustatra mahāvane || 49 ||
[Analyze grammar]

tadvṛkṣayuddhamabhavatsumuhūrtaṃ viśāṃ pate |
rākṣasānāṃ ca mukhyasya narāṇāmuttamasya ca || 50 ||
[Analyze grammar]

tataḥ śilāṃ samutkṣipya bhīmasya yudhi tiṣṭhataḥ |
prāhiṇodrākṣasaḥ kruddho bhīmasenaścacāla ha || 51 ||
[Analyze grammar]

taṃ śilātāḍanajaḍaṃ paryadhāvatsa rākṣasaḥ |
bāhuvikṣiptakiraṇaḥ svarbhānuriva bhāskaram || 52 ||
[Analyze grammar]

tāvanyonyaṃ samāśliṣya prakarṣantau parasparam |
ubhāvapi cakāśete prayuddhau vṛṣabhāviva || 53 ||
[Analyze grammar]

tayorāsītsutumulaḥ saṃprahāraḥ sudāruṇaḥ |
nakhadaṃṣṭrāyudhavatorvyāghrayoriva dṛptayoḥ || 54 ||
[Analyze grammar]

duryodhananikārācca bāhuvīryācca darpitaḥ |
kṛṣṇānayanadṛṣṭaśca vyavardhata vṛkodaraḥ || 55 ||
[Analyze grammar]

abhipatyātha bāhubhyāṃ pratyagṛhṇādamarṣitaḥ |
mātaṅga iva mātaṅgaṃ prabhinnakaraṭāmukhaḥ || 56 ||
[Analyze grammar]

taṃ cāpyātha tato rakṣaḥ pratijagrāha vīryavān |
tamākṣipadbhīmaseno balena balināṃ varaḥ || 57 ||
[Analyze grammar]

tayorbhujaviniṣpeṣādubhayorbalinostadā |
śabdaḥ samabhavadghoro veṇusphoṭasamo yudhi || 58 ||
[Analyze grammar]

athainamākṣipya balādgṛhya madhye vṛkodaraḥ |
dhūnayāmāsa vegena vāyuścaṇḍa iva drumam || 59 ||
[Analyze grammar]

sa bhīmena parāmṛṣṭo durbalo balinā raṇe |
vyaspandata yathāprāṇaṃ vicakarṣa ca pāṇḍavam || 60 ||
[Analyze grammar]

tata enaṃ pariśrāntamupalabhya vṛkodaraḥ |
yoktrayāmāsa bāhubhyāṃ paśuṃ raśanayā yathā || 61 ||
[Analyze grammar]

vinadantaṃ mahānādaṃ bhinnabherīsamasvanam |
bhrāmayāmāsa suciraṃ visphurantamacetasam || 62 ||
[Analyze grammar]

taṃ viṣīdantamājñāya rākṣasaṃ pāṇḍunandanaḥ |
pragṛhya tarasā dorbhyāṃ paśumāramamārayat || 63 ||
[Analyze grammar]

ākramya sa kaṭīdeśe jānunā rākṣasādhamam |
apīḍayata bāhubhyāṃ kaṇṭhaṃ tasya vṛkodaraḥ || 64 ||
[Analyze grammar]

atha taṃ jaḍasarvāṅgaṃ vyāvṛttanayanolbaṇam |
bhūtale pātayāmāsa vākyaṃ cedamuvāca ha || 65 ||
[Analyze grammar]

hiḍimbabakayoḥ pāpa na tvamaśrupramārjanam |
kariṣyasi gataścāsi yamasya sadanaṃ prati || 66 ||
[Analyze grammar]

ityevamuktvā puruṣapravīrastaṃ rākṣasaṃ krodhavivṛttanetraḥ |
prasrastavastrābharaṇaṃ sphurantamudbhrāntacittaṃ vyasumutsasarja || 67 ||
[Analyze grammar]

tasminhate toyadatulyarūpe kṛṣṇāṃ puraskṛtya narendraputrāḥ |
bhīmaṃ praśasyātha guṇairanekairhṛṣṭāstato dvaitavanāya jagmuḥ || 68 ||
[Analyze grammar]

evaṃ vinihataḥ saṃkhye kirmīro manujādhipa |
bhīmena vacanāttasya dharmarājasya kaurava || 69 ||
[Analyze grammar]

tato niṣkaṇṭakaṃ kṛtvā vanaṃ tadaparājitaḥ |
draupadyā saha dharmajño vasatiṃ tāmuvāsa ha || 70 ||
[Analyze grammar]

samāśvāsya ca te sarve draupadīṃ bharatarṣabhāḥ |
prahṛṣṭamanasaḥ prītyā praśaśaṃsurvṛkodaram || 71 ||
[Analyze grammar]

bhīmabāhubalotpiṣṭe vinaṣṭe rākṣase tataḥ |
viviśustadvanaṃ vīrāḥ kṣemaṃ nihatakaṇṭakam || 72 ||
[Analyze grammar]

sa mayā gacchatā mārge vinikīrṇo bhayāvahaḥ |
vane mahati duṣṭātmā dṛṣṭo bhīmabalāddhataḥ || 73 ||
[Analyze grammar]

tatrāśrauṣamahaṃ caitatkarma bhīmasya bhārata |
brāhmaṇānāṃ kathayatāṃ ye tatrāsansamāgatāḥ || 74 ||
[Analyze grammar]

vaiśaṃpāyana uvāca |
evaṃ vinihataṃ saṃkhye kirmīraṃ rākṣasottamam |
śrutvā dhyānaparo rājā niśaśvāsārtavattadā || 75 ||
[Analyze grammar]