Chapter 11

dhṛtarāṣṭra uvāca |
evametanmahāprājña yathā vadasi no mune |
ahaṃ caiva vijānāmi sarve ceme narādhipāḥ || 1 ||
[Analyze grammar]

bhavāṃstu manyate sādhu yatkurūṇāṃ sukhodayam |
tadeva viduro'pyāha bhīṣmo droṇaśca māṃ mune || 2 ||
[Analyze grammar]

yadi tvahamanugrāhyaḥ kauraveṣu dayā yadi |
anuśādhi durātmānaṃ putraṃ duryodhanaṃ mama || 3 ||
[Analyze grammar]

vyāsa uvāca |
ayamāyāti vai rājanmaitreyo bhagavānṛṣiḥ |
anvīya pāṇḍavānbhrātṝnihaivāsmaddidṛkṣayā || 4 ||
[Analyze grammar]

eṣa duryodhanaṃ putraṃ tava rājanmahānṛṣiḥ |
anuśāstā yathānyāyaṃ śamāyāsya kulasya te || 5 ||
[Analyze grammar]

brūyādyadeṣa rājendra tatkāryamaviśaṅkayā |
akriyāyāṃ hi kāryasya putraṃ te śapsyate ruṣā || 6 ||
[Analyze grammar]

vaiśaṃpāyana uvāca |
evamuktvā yayau vyāso maitreyaḥ pratyadṛśyata |
pūjayā pratijagrāha saputrastaṃ narādhipaḥ || 7 ||
[Analyze grammar]

dattvārghyādyāḥ kriyāḥ sarvā viśrāntaṃ munipuṃgavam |
praśrayeṇābravīdrājā dhṛtarāṣṭro'mbikāsutaḥ || 8 ||
[Analyze grammar]

sukhenāgamanaṃ kaccidbhagavankurujāṅgale |
kaccitkuśalino vīrā bhrātaraḥ pañca pāṇḍavāḥ || 9 ||
[Analyze grammar]

samaye sthātumicchanti kaccicca puruṣarṣabhāḥ |
kaccitkurūṇāṃ saubhrātramavyucchinnaṃ bhaviṣyati || 10 ||
[Analyze grammar]

maitreya uvāca |
tīrthayātrāmanukrāmanprāpto'smi kurujāṅgalam |
yadṛcchayā dharmarājaṃ dṛṣṭavānkāmyake vane || 11 ||
[Analyze grammar]

taṃ jaṭājinasaṃvītaṃ tapovananivāsinam |
samājagmurmahātmānaṃ draṣṭuṃ munigaṇāḥ prabho || 12 ||
[Analyze grammar]

tatrāśrauṣaṃ mahārāja putrāṇāṃ tava vibhramam |
anayaṃ dyūtarūpeṇa mahāpāyamupasthitam || 13 ||
[Analyze grammar]

tato'haṃ tvāmanuprāptaḥ kauravāṇāmavekṣayā |
sadā hyabhyadhikaḥ snehaḥ prītiśca tvayi me prabho || 14 ||
[Analyze grammar]

naitadaupayikaṃ rājaṃstvayi bhīṣme ca jīvati |
yadanyonyena te putrā virudhyante narādhipa || 15 ||
[Analyze grammar]

meḍhībhūtaḥ svayaṃ rājannigrahe pragrahe bhavān |
kimarthamanayaṃ ghoramutpatantamupekṣase || 16 ||
[Analyze grammar]

dasyūnāmiva yadvṛttaṃ sabhāyāṃ kurunandana |
tena na bhrājase rājaṃstāpasānāṃ samāgame || 17 ||
[Analyze grammar]

vaiśaṃpāyana uvāca |
tato vyāvṛtya rājānaṃ duryodhanamamarṣaṇam |
uvāca ślakṣṇayā vācā maitreyo bhagavānṛṣiḥ || 18 ||
[Analyze grammar]

duryodhana mahābāho nibodha vadatāṃ vara |
vacanaṃ me mahāprājña bruvato yaddhitaṃ tava || 19 ||
[Analyze grammar]

mā druhaḥ pāṇḍavānrājankuruṣva hitamātmanaḥ |
pāṇḍavānāṃ kurūṇāṃ ca lokasya ca nararṣabha || 20 ||
[Analyze grammar]

te hi sarve naravyāghrāḥ śūrā vikrāntayodhinaḥ |
sarve nāgāyutaprāṇā vajrasaṃhananā dṛḍhāḥ || 21 ||
[Analyze grammar]

satyavrataparāḥ sarve sarve puruṣamāninaḥ |
hantāro devaśatrūṇāṃ rakṣasāṃ kāmarūpiṇām |
hiḍimbabakamukhyānāṃ kirmīrasya ca rakṣasaḥ || 22 ||
[Analyze grammar]

itaḥ pracyavatāṃ rātrau yaḥ sa teṣāṃ mahātmanām |
āvṛtya mārgaṃ raudrātmā tasthau giririvācalaḥ || 23 ||
[Analyze grammar]

taṃ bhīmaḥ samaraślāghī balena balināṃ varaḥ |
jaghāna paśumāreṇa vyāghraḥ kṣudramṛgaṃ yathā || 24 ||
[Analyze grammar]

paśya digvijaye rājanyathā bhīmena pātitaḥ |
jarāsaṃdho maheṣvāso nāgāyutabalo yudhi || 25 ||
[Analyze grammar]

saṃbandhī vāsudevaśca yeṣāṃ śyālaśca pārṣataḥ |
kastānyudhi samāsīta jarāmaraṇavānnaraḥ || 26 ||
[Analyze grammar]

tasya te śama evāstu pāṇḍavairbharatarṣabha |
kuru me vacanaṃ rājanmā mṛtyuvaśamanvagāḥ || 27 ||
[Analyze grammar]

evaṃ tu bruvatastasya maitreyasya viśāṃ pate |
ūruṃ gajakarākāraṃ kareṇābhijaghāna saḥ || 28 ||
[Analyze grammar]

duryodhanaḥ smitaṃ kṛtvā caraṇenālikhanmahīm |
na kiṃciduktvā durmedhāstasthau kiṃcidavāṅmukhaḥ || 29 ||
[Analyze grammar]

tamaśuśrūṣamāṇaṃ tu vilikhantaṃ vasuṃdharām |
dṛṣṭvā duryodhanaṃ rājanmaitreyaṃ kopa āviśat || 30 ||
[Analyze grammar]

sa kopavaśamāpanno maitreyo munisattamaḥ |
vidhinā saṃprayuktaśca śāpāyāsya mano dadhe || 31 ||
[Analyze grammar]

tataḥ sa vāryupaspṛśya kopasaṃraktalocanaḥ |
maitreyo dhārtarāṣṭraṃ tamaśapadduṣṭacetasam || 32 ||
[Analyze grammar]

yasmāttvaṃ māmanādṛtya nemāṃ vācaṃ cikīrṣasi |
tasmādasyābhimānasya sadyaḥ phalamavāpnuhi || 33 ||
[Analyze grammar]

tvadabhidrohasaṃyuktaṃ yuddhamutpatsyate mahat |
yatra bhīmo gadāpātaistavoruṃ bhetsyate balī || 34 ||
[Analyze grammar]

ityevamukte vacane dhṛtarāṣṭro mahīpatiḥ |
prasādayāmāsa muniṃ naitadevaṃ bhavediti || 35 ||
[Analyze grammar]

maitreya uvāca |
śamaṃ yāsyati cetputrastava rājanyathā tathā |
śāpo na bhavitā tāta viparīte bhaviṣyati || 36 ||
[Analyze grammar]

vaiśaṃpāyana uvāca |
sa vilakṣastu rājendra duryodhanapitā tadā |
maitreyaṃ prāha kirmīraḥ kathaṃ bhīmena pātitaḥ || 37 ||
[Analyze grammar]

maitreya uvāca |
nāhaṃ vakṣyāmyasūyā te na te śuśrūṣate sutaḥ |
eṣa te viduraḥ sarvamākhyāsyati gate mayi || 38 ||
[Analyze grammar]

vaiśaṃpāyana uvāca |
ityevamuktvā maitreyaḥ prātiṣṭhata yathāgatam |
kirmīravadhasaṃvigno bahirduryodhano'gamat || 39 ||
[Analyze grammar]